Peugah Haba Jameun-Mengisahkan masa lalu

Peugah Haba Jameun

Cae, ABI DAUD


Assalamualaikum, Laju uloen kheun
Loen kirem saleum, keu Cek Medya
Para pemirsa, Kota ngon kampung
Loen kirem saleum, loen peu mulia

Aneuk cempala, Ateuh bak kuyun
Na aneuk Tiyung, Ateuh bak Ara
Saboh cae nyo, jino uloen kheun
Peugah haba jameun, Nama judul nya

Bak masa jino, Cit kon peu takheun
Peugah haba jameun, Ka hilang semua
Di Masa dilee, ureung Tuha jameun
Geu  yu  urut Rung, Geupeugah haba

Sambil peugah haba, Rung geuyu urut
Bak Aneuk miet cut cut, Atau Balita
Bandum  gembira, Aneuk miet cut cut
Oh, teubit kentut, Khem  ube  raya

Haba – geupeugah, Bandum manfaat
Jeut keu – ibarat, sotem  peuguna
Walau pun lucu, Haba riwayat
Aso – Lam Kitab, oh geu calitra
Dan – yang lain lom, pih hampir lenyap
Peugah Hikayat, pih ka – jareung na
Di masa dilee, keubit –meu  leuha  that
Peugah Hikayat,  Rata  Desa  na

Ladoem Hikayat, leupah that hayeu
Hikayat Putro bungsu, Ngon Malem Diwa
Ladoem Hikayat, Pih hayeu – leupah
Laju – geu peugah, Kisah Madang drya

Ladoem – geupeugah, Hikayat Perang Sabi
Geu jak perang – kafir, Bila Agama
so so – yang syahid, Dalam perang sabi
Geubri Bidadari, dalam syurga

Jan na – acara, Kenduri sunatan
Sampai  lhee – malam, Geu peugah Hikayat
Oh – geu undang syeh, Pih kon sembarangan
Yang – jago keumarang, Suara pih mangat

Tamu dum Teuka, Ramai kon wayang
Inong  –  Agam, Jak – deungo Hikayat
Ureung – Po Rumoh, Pih leupah senang
Na – geu sediakan, ie  –  Makanan se – ala kadar

Meunan  keuh jameun, Ureung dum Kompak
Keubit that galak,Bak keramaian
Bak jameun dilee, ureung bersatu
Nanggroe pih Makmue, dan lagi Aman

Ateuh bak panjo, Beurago – meusu
Aneuk Leuk Kutru, Ateuh bak Mamplam
Oh no meumada, Cae nyo satu
Oh  – Minggu  –  u  keu, uloen sambungkan

Saleum mulia, uloen ba laju
Phoen that lon tuju, Keu syeh Sofyan
Pih hana lupa, Saleum hormat
Kepada Cut Hab, serta Cek Man

Keu Yah Muda, saleum uloen bri
Keu Tgk. Fuadi, dan Septiawan
Keu Subki Patek, saleum uloen bri
Keu Tgk. Asnawi, Loen kirim salam

Wassalam

Dari ABI DAUD, SAMAHANI

KUTA MALAKA

 

 

Catatan: Semula cae ini tulisan tangan Abi Daud, lalu dikomputerkan!.

Bale Tambeh, malam Jeumeu’at, 13 Khanduri Bu 1437/13 Sy’akban 1437 H/19 Mei 2016, poh 10.30 malam, T.A. Sakti.  (Cae ini telah disenandungkan dalam acara “Cae Bak Jambo” AcehTV tadi malam- malam Senin, 22 Mei 2016).