Doda Idi dan Kasih Sayang Seorang Ibu ala Tgk Di Cucum

Geunap 44 ka geubileueng, hanle madeueng po Ma gata
Poma neutron neujak manoe, neu meusugoe ngon dheun gaca
Neu-ek sinan kalang kalot, uroe seupot katoe sinja
Cok Simanyak jak peumanoe, neuhoi asoe ngon haleuba

Boeh ubat cut boeh ngon jeubeuet, tamong bekjeuet iblih ceulaka
Teuma neuboeh dalam ayon, po Ma meupantonle neudoda
Meunoe neukheunle Ma neu puphon, masa neu ayon putik deulima
He manyak do kuda idi, samanyak cut do kuda idi

He manyak eh beurijang-rijang, Ma jak ublang pula padi
He manyak do kuda idi, simanyak cut do kuda idi
He manyak cut eh bak teungeut, naku siweuet plang peulanggi
He manyak cut do kuda idi, simanyak cut do kuda idi

He manyak cut eh bak sunggoh, na kuboeh ija peulanggi
He manyak do kudaidi, simanyak cut do kuda idi
He manyak cut eh bak sulu,tangkulok muru keukah kubri
He manyak do kudaidi, simanyak cut do kuda idi

He manyak cut eh teulinteueng, naku peh gleueng jaroe gaki
He manyak do kuda idi, simanyak cut do kuda idi
He manyak cut eh beupantah, jeh ayahkah goh keumbali
He manyak do kuda idi, simanyak cut do kuda idi

He manyak cut eh bek wiet teuot, na kujak pot gandagari
He manyak do kuda idi, simanyak cut do kuda idi
He manyak cut ‘oh rayekkah, ka seumah Allah ka pujoe Nabi
‘Oh Ma doda meualon-alon, sinyak lam ayon ka labui mata

Sinyak pih teungeut Nang pih jieh, uroe pih mureh ka teuka faja
Nang pih teugeut na sipade, neungieng ugle ka meucuwaca
Poma neutron jak seumbahyang, dang-dang sinyak goh jaga
Lalu neutron keudeh bak Mon, neu tarek ngon taloe tima

Lheuh neucrong ie kaneutueng rijang, tueng ie seumayang sigra2
Teuma neuek Ma meudhab-dhab, ka neupeurab bak mushalla
Lob seulukom rijang-rijang, neu seumbahyang uleh Poma
‘Ohsare lheueh neu seumayang, do’a sajan meurateb pihka

Teuma neutron u seuramoe, ka neupeutoe bak Jeureukha
Dulan neurawe goh meung sion, sinyak lam ayon pihka jaga
Teuma neu-ek pantah rijang, kaneu tatang bijeh mata
Sinyak pih neucok dalam ayon, ka neukheun phon uleh Poma

Kru seumangat posamlakoe, pakon tamoe boh hate Ma
Kru seumangat he Teungku droe, pakon tamoe nyoe leupeue Ma
Gohlom peungeuh mantong seupot, pakon teukeujot Pocut Banta
Dulan kurawe goh meung sion, gata lam ayon pihka jaga

Sutra kusareng goh siurat, deungon siat sinyak kajaga
Tupeuen kupok goh meung sion, peue untong lon Pobentara
Peue tapajoh meungtan hareukat, meutuah that Poma digata
Hanpeue tangui ngon tapajoh, lon nyoe gadoeh sajan gata

Han ngon tabloe bu ngon eungkot, lon mupaloet sabe ngon gata
‘Ohsare rayek lakee peukayan, toh pakriban pat beulanja
Batee karoem keu tangkulok, seuluweue tasok tajok ban raja
Tohpat pane yum tajak bloe, sinyak samlakoe peulale Ma

Lheueh nyan Poma jak peutoh iek, kaneu peuduek ubak guha
Iek ka jitoeh neu srah rijang, kaneu tatangle ngon tima
Lheueh nyan Poma neu peumanoe, bungong panjoe sinyak baro na
Kaneu peuduek dalam teumalang, rijang-rijang neu uet leuta

Asoe pih seuuem nakeuh padah, kaneu ramah on peuriya
Neuboh ie breueh ngon mata plieng, Poma neungieng bak ie muka
Meungnyo jeureungeh galak hate, meungnyo thole hitam muka
Neu eu tan jiek ie meunanoe, neu eu ceukoe tan meucahya

Teuma neupok-pok ie bak asoe, simanyak jimoe meukuw’a-kuw’a
Poma kheun hoeh-hoeh neu peulale, bek kamoele he bentara
Bek kamoe-moe he nyak bintang, jeh leupeue wang ka geuteuka
Bek kamoe-moe he nyak maneh, babah mameh pajoh gula

He nyak polem he nyak polem, tadrob cicem peuwoe keu Ma
‘Oh rayek Sinyak lon peukawen, toeh nyang katem galak dimata
Bek kamoe-moe posamlakoe, bah tajak bloe gula saka
Teuma neucok lam teumalang, Poma timang bijeh mata

Ngon suara keunong ragam, panton dondang kheunle Poma
Simanyak jak kutimang bah, riyeuek bicah lam ceurucu
‘Ohka rayek idin Allah, kujak intatkah ubak Teungku
Simanyak jak kutimang bah, got that mirah kulet tampu

‘Ohsare troih bak Madrasah, bekka minah kabeuet laju
Simanyak jak kutimang beuet, on punteuet tacok nyang luhu, seumurat kayem mangat got kheut, najeuet kabeuet Jawoe ngon Nah’u
Simayak jak kutimang bhoe, bungong panjoe srot cong labu

Meunggoh malem bekka woe-woe, geunap uroe kuintat breueh bu
Simanyak jak kutimang beuen, cicem bayeuen mangat that su
Kabeuet sabe beurang kajan, hareukatkah han kumeunafsu
Simanyak jak kutimang be, bineh pante bungong meulu

Bekka weh2 troh an mate, dikah sabe ka khadam Teungku
Simanyak jak kutimang ban, bungong peukan lampoih bak U
Meunggoh lahe teujali Tuhan, beurang kajan ka khaluet laju
‘Ohlheueh tujoh Poma timang, kalheueh pantang nibak Maja

Lheueh peumanoe neujok bakpo, neujok ngon bu uroe kajula
Bu pih neupeh deungon pisang, Poma suleueng yohnyan sigra
Bu pih habeh sinyak pih troe, jieh keudroe Nang sareng sutra
Sira-sira neuba sareng, neu keureuleng ngon iku mata

Bakneu peu-eh neucukeh-cukeh, nyum bek teuweh nibak mata
Sinyak pih saket ‘oh leumah buleuen, diakhe siseun pih kayemna
Nang pih gundah sinyak saket, thatkeu meureb duka cita
Mita tabib agam ngon inong, Poma tanyong soena do’a

Lonkeu meung yue rajah aneuk, hate sokmok keu Nyak Muda
Ladom2 na nyang mate, Nangmbah reule ro ie mata
Ka jiklik-klik ji ceumumong, ladom inong na nyang gila
Sabab jimoe sabe-sabe, beusot hate jeuet keuluka

Tango jikheun bak jiba-e, weueh aneuk E tatinggai Ma
Kakeuh tajak gata dilee, hokeuh trohkee tanle gata
Meung gob dhot2 jeuep2 sagoe, Nangmbah teunyoe meuraba2
Jak mitabu beungoh seupot, meung saboh eungkot hanle soemita

Eungkot uroe jeh kujak seuet Mon, han kutaguen kupreh gata
Ku peutaba han tapajoh, eungkot keurupoeh takheun hawa
‘Ohku peuwoe nyan dipeukan, tayue taguen nyan ngon cuka
Lheueh Ma taguen hingga masak, kukheun hai Nyak nyoe tarasa

Teuma tapajoh nabube pade, ka hanlotle takheun hai Ma
Habeh jirawe nyangka dilee, inong seudee mita deesya
Habeh ji ingat jiyue rajah, dum jiteuoh guna nyangka
Ji keumeung tot alat peukayan, aneuk kutan hanho kuba

Lakoe binoe tan ileumei, hana jithee keunong syeksa
Deesya rayek ureueng ceumumong, nadum jiprang Allah Ta’ala
Bajee apui geupeusok dudoe, balah jimoe dalam donya

Ladom puleh ‘ohroeh ubat, le nyang mangat umu jina
Aneuk saket Nangmbah syawoe, ji meukaoy jeuep2 aulia
Adat mate bek tamoe-moe, harap dudoe neubri pahla
Soe nyang mate lhee droe geunaseh, wajeb dijih asoe Syuruga
Teutapi syarat bek dicumong, page tamong dalam Syuruga

Neu peugot rumoh keujih saboh, nan jih geuboeh Baitus sabara
Nyan meunalaih uroe dudoe, soe nyang tanmoe jitem saba
Ta khanduri bri seudeukah, soe ‘akikah na samporeuna
Aneuk hudep nyan pih sunat, membeuri mamfa’at di Padang Masya

Aneuk teuna tan akikah, Nangmbah payah sia-sia
Aneuk nyang mate meuwoe keu Nabi, han jituri dudoe gata
Nyankeu sabab sie akikah, keu Rasulullah khanduri bak na
Takhanduri keu panghulee, talakee bak pulang teuma

Hukom sicut ban hukom mbah, han jeuet ubah ban galaknya
‘Ohka baleh ban hukom droe, beurang kasoe agam dara
Kareuna Nabi mbah dum insan, cit diphon (ka)lon calitra
Ma jih ngon Ku masa jinoe, cit geunantoe Saidil Ambiya

Ureueng nyang hantem ‘akikah, aneuk gadoh han dimita
Ubak Nabi han jilakee, tan meuteumei di Blang Masya
Nyangtan mate nalom umu, buet Tuhanku neubri teuga
Meunan kayem seuntok-seuntok, hingga rayek Sinyak Muda

‘Ohjeuet jiduek neukeubah dileuen, neujok ayeuem najeuet buet Ma
Ayeuem jicok mat u jaroe, jiduek keudroe aneuk sahda
Pat tapeuduek tan jiminah, meutuah hanpeue payah Ma
Ladom w’et-w’ot ban ulat panah, bukon payah bak takira

Nang sare trok? bak jimeme, patah pate bak jibaba
‘Ohbak jijak meuwoe-ulang, kadang-kadang breueh bu hana
Ladom gobcok pih han jitem, jiklik kayem soe keumeung ba
Teutap ban Nang jigrueb reumok, gob keumeung cok jiwale Ma

Rayek bacut han that cabak, rayek sitak maken gura
Maken meumot-mot meukurumot, taeu w’et-w’ot maken gura
Taeu ji ‘eue keudeh keunoe, pula paloe weh-woe bak Ma
Ji’eue keunoe ji’eue keudeh, seutot binteh ka jilata

Peue meuteumeung habeh jicok, peue meurumpok dum jihila
Hana sapeue jeuet meundiyeueng, sutra beuneung tiek lam jiya
‘Ohta lakee han jitem bri, jimoe sabe ‘ohta hila
Taeu ji’eue geurubah-geuruboeh, jicok buloh cangat sutra

Tataguen bu jicok apui, duek lam reului ji meucuca
Tameurawe jicok lulon, boeh lam ayon jiplah ija
Taseumareng jicok iran, tapok teupeun ek cong peusa
Bacut silab jicok cadoeh, ka jidaboeh nibak rueng Ma

Peuduek cadoeh jicok cago, han tatuho ban kilat faja
Jicok turak cangat beuneung, han ek linteung Nang ngon Maha
Peuduek lam lumueng jitampa mieng, jiteumei trieng jiseupot muka
Ji teumei tungoe seumpom diulee, jiteumei batee jisrom bak dada

Teuma neucok jak peulale, ka neumeme uleh Maha
Maha meme jeuep2 jurong, jeuep2 gampong ka neubaba
‘Ohtreb teuma Sinyak jimoe, ka neupuwoe neujok bak Ma
Neuyue bri dek dilee bacut, Simanyak cut ka lapar dahga

Poma bri dek rijang-rijang, sinyak bintang layee mata
Poma peu-eh dalam ayon, kaneu pantonle neudoda
Jakku timang linto baro, jakku dodo boh hate Ma
Jakku dodo Sinyak Sufi, jakku dodi Cut Banta Ma

Jakku dodo posamlakoe, taeh keudroe cut panglima
Jakku dodo sinyak ‘Ali, jakku dodi Bentara Ma
Jakku dodo darabaro, jakku dodo ayeuem mata Ma
Jakku dodo putroe Diwi, jakku dodi putroe dara Ma

Jakku dodo posambinoe, taeh keudroe boh hate Ma
Jakku dodo Pocut Siti, jakku dodi bijeh mata Ma
Sinyak pih teunget Nang pih jiweh, inong gigeh jak meumita
Jakpot ranub jakpot campli, mita gule bayam tuba

Jakpot on kruet thok boh putek, ka neutarek bungong kala
Mita asam boh seulimeng, boh kuyuen sreng bohme cuka
Teuma neupeu-ekle u rumoh, taeu mehmoh neucang lanja
Teuma neuboeh lam beulangong, neu lawok ngon campli sira

Siblah dapu neu taguen bu, siblah dapu gule rawa
Dandang-dandang Ma teumaguen, sinyak lam ayon pika jaga
Neucok aneuk Poma sandang, ka neutimang sinyak barona
Simanyak jak kutimang cek, bungong putek lhee sirungkhe

Bak treb hudep akai lisek, jeuetka culek bungong uke
Simanyak jak kutimang poih, boeh bak bungkoih kasab rumi
‘Ohka rayek kabeuet sunggoh, lom bak utoh ka meupande
Simanyak jak kutimang poek, bungong silipoek tujoh tangke

He manyak cut ‘ohka rayek, kapoek seulipoek bungong rante
Lheueh neu timang neujok bak Ku, h’oh hai Teungku neupeulale
Lon keumeung jak ubak dapu, jak peutho bu taguen gule
Lon keumeung cang ngon keumamah, lon ticah ngon sira campli

Di Yah pih cok bungong panjoe, wet-wet jaroe jan meudodi
‘Ohban neucok neu peurateb, kajeuet beb-beb bungong geuti
Lailaha illallah, Muhammad-nya nyankeu Nabi
Nyoekeu aneuk nyan seumah Tuhan, jibeuet Quru’an seureuta qari

Tamat Quru’an jineuet Nah’u, jak bak Teungku hantom khali
Teulheueh nyan Minhoj teuma Iqnak, lom jisimak kitab Bukhari
‘Ohtamat nyan jibeuet Tuhfah, teuma ‘Aqidah Imum Sanusi
Lheueh nyan Akhbar kitab teusawoh, beuet beusunggoh hadih Bukhari

Lailaha illallah, Muhammad afdlalul Nabi
Nyoekeu aneuk umu jipanyang, jeuep2 sawang geuintat raseuki
Areuta jih le lom ngon murah, jiseumah Nangmbah peutang pagi
Lom ngon teuga hantom saket, beureukat Sayed Ibnu Jauzi

Lom pih hate hantom susah, jihadap Allah hantom khali
Seuntok sabe seumbah Allah, muraqabah peutang pagi
Lailaha illallah, Muhammad khairul Rasuli
Nyoekeu aneuk nyang saleh that, dum jipeubeuet ileumei Nabi

Lom ngon lisek akai sahda, lom jipubla gob mupake
Soe meudawa dum jihukom, gob bandum han jithok hate
Lailaha illallah, Muhamad-lah ahlul Jannati
Nyoekeu aneuk asoe Syuruga, ji tamong lanja sajan Nabi

Jiba Nangmbah sajan meuhat, yoh susah that uroe page
Ma deungon Ku aneuk peurumoh, duek lam Jannah sajan Nabi
Rateb habeh Ku pih neu-ek, neu geumek ngon Sinyak Muda
Kaneu peurab ubak dapu, neu tanyong bu uroe kajula

Poma seuot nibak dapu, preh hai Teungku goh that jula
Bulon taguen banla meuju, dang lon peulaku sambai Diwa
Banlon peutho ka keumeung srab, preh sikeujab loncok peuda
Dandang meunan bu pih masak, boeh lam tabak gule rada

Poma boehbu dalam pingan, boeh lam cawan eungkot ngon sira
Teuma neu makeuen lakoe binoe, posamlakoe peuduek bak pha
Teuma neukheun ngon Bismillah, Alhamdulillah sajan bandua
Bu pih neusueb ban nyang patot, sinyak cut eungkotle jihila

Eungkot hanle ka sinyak cok, jaroe neuculok lam cawan sira
Alah bak pihak neugaseh that, hana teuingat eungkot hana
Nyankeu sabab that neugaseh, neutem pajoh bu ngon sira
Jitarek cawan karo kuwah, bu neupajoh nadum tuba

Dua lhee thon dalam susah, bu neupajoh tan meurasa
Pike aneuk bak taingat, bandum niekmat Allah Ta’ala
Bandum neubri aneuk jigaseh, badan reugeh incit meujaga
Aneuk han teungeut Nang han jieh, meuseuki habeh malam jula

Hingga beungoh tan teusiyo, sabab a-o bijeh mata
Geuseulimbot patna teuhah, neutoep pantah uleh poma
Beuta ingat wahe pocut, nyankeu banbuet Ma digata
Meunan sabe seuntok-seuntok, hingga rayek nibak nyangka

‘Ohsare jeuet ka jiteh-teh, maken leubeh peupayah Ma
‘Ohna sihah jibot langkah, leupuem reubah jitajo Ma
Jak peubeudoh rijang-rijang, jiek ilang meucok sutra
Padum na treb bak jipeugleh, kadang teuboih ladom sutra

‘Ohjeuet jijak ka jiplueng2, maken budueng grak geureuba
Taeu jigroeb jilumpat-lumpat, hana siat nyangna sahda
Tuha adoe nibak aduen, tuha kumuen nibak apa
.Ohji kalon kayee bulat, ka jiseungkreut jipeudada

Jiek reunyeun (ji)grob uyub, meung tatakot patah lam pha
‘Ohta kheun bek nadum tayue, han reudee meung sikleb mata
‘Ohmeu teumeung sabe cut-cut, kaji meudrob jimeuwawa
Leupah seunda jeuet keu seundi, ka mupake hanban publa

Kadang2 aneuk bingkeng, ka meudeungkeng teuoh Ku Ma
Adat nyang roeh ngon situpat, jiiem leugat hanle haba
Kadang pih roeh sabe bingkeng, ka meusundengle suara
Ngon sabab nyan kajeuet pake, saket hate meutampa-tampa

Kadang aneuk gob ka meudarah, sare susah Ku jih ngon Ma
Meuhoi Waki Geuchik Sagoe, pakri jinoe aneuk gob ceudra
Teuma mupakat Keuchik Waki, diet geuyue bri ubak Poma
Alah pihak jih sabe cut-cut, han geutuntut balah luka

Poma jakmele ngon ubat, minyeuk got-got sajan geuba
Ngon geuurot pat nyang meusalah, sare Nangmbah duka cita
‘Ohka puleh me bu kunyet, ija sikr’et sajan neuba
Kadang2 lom ngon ringget, sabab geudiet raya luka

Meunan lagee seuntok2, hingga rayek kana bicara
Beuta pike dum geutanyoe, nyandum didroenyan neu usaha
Digata peue nyang na rugoe, siri sagoe jeuet tadawa
Adat nyang kaya han that susah, pantah tiwah peue neucok na

Teuma nyang gasien ka meulagee, reuet2 ulee seumpom jeureukha
Ngon aneuk cabak han macam, breuehbu pitan Allah hai Ma
Singoh beungoh jak peusijuek, tohpat kucok han sapeuena
Pade leukat U manisan, dumpeue pihtan ngon bloe hana

Jak lakee2 soena tembri, ‘oh deuek sare hanpat mita
Langetka u dhoe bumoeka u keueng, bahle teugageueng geureuda seuba
Mita utang hansoe peu-utang, jeuep2 sawang neujak mita
Geutakot hana ngon bayeuele, nyang na pake ngon poatra

Alah bak pihak that neugaseh, adat jeuet bah tuka nyaw’a
Badan payah areuta habeh, pihak neugaseh that keugata
Adatkon niekmat nibak Allah, seumpom peulheueh neugrak rasa
Beuta ingat wahe adoe cut, nyankeu dum buet Poma gata

Beuta ingat bek tadhot-dhot, bekta carot Nangmbah gata
Kadang ngon bingkeng lagee asee, hana jithee nyanban buet Ma
Bek an lusa na jibalah, guna Nangmbah ureueng tuha
Nyankeu aneuk buta hate, han jipike dumnan di Ma

Barang kasoe Nabi neu peugah, han ek balah guna Ku Ma
Nyang na balah cit sigeutu, Mateu ngon Ku gob peuhamba
Tajok ringget dua lhee reutoh, keu teuneuboih Kuteu ngon Ma
Bek Ma ngon Ku gob peunamiet, bahle meugriet habeh areuta

Meunan teuseubut dalam Hadih, narit nyanggleh han syok sangka
Laen nibak nyan tan ngon balah, guna Nangmbah usaha gata
Siuroe-uroe siribee seumbah, keu beunalah han cit padra
Jikalau meunan bandua droe, geunap uroe neugaseh keu gata

Tan ngon balaih tabloe gaseh, lom bak sunggoh talakee do’a
Nyoe tadeungo saboh panton, adoe aduen ngo beuhabeh
Lheueh tadeungo narit ulon nyoe, bandum geutanyoe bak tapateh

Tapot kulat diteungoh blang, tareundang ngon on seulaseh
Beuta ingat guna Mawang, beuta sayang ngon tagaseh
Jak u lampoih pula pisang, dum tateubang bak trieng buloh
Ureueng tuha bekta gurantang, keu Ma ngong Wang bek takheun Oh

Bineh buga timoh garoet, beuta jagoet dum tapeu-eh
Ureueng tuha bekta dhot2, nyang patot ci tabloe gaseh
Tacok sutra boeh bak iran, talhoh sinan lhat bak binteh
KeuKu ngon Ma bak that hireun, peue nyang geukheun beuta pateh

Timoh bugeng blang Sidon-don, meusawak dheun cong sipuleh
Adatna gigeng teuhe aduen, bekta kheun-kheun tuha paleh
Soe nyang banci keu Ku ngon Ma, sinyan lanja laju paleh
Nibak Allah that meureuka, ureueng tuha soe peujayeh

Ma jih ngon Ku soe nyang lawan, bitnyo sinyan asee paleh
Teuseubut dalam Hadih Qudeusi, fireuman Rabbi bak panghulee
Man ahabba abawaihi faqad ahabbany, waman jaafa abawaihi faqad jaafany( , makna lon bri tuma he sampee

Soe nyang gaseh keu Ku ngon Ma, bit sinyan ka jigaseh kee
Soe nyang banci keu Ku ngon Ma, bit sinyan ka jibanci keukee
Soehan gaseh keu Ku ngon Ma, ji peubuet lanja ibadat keu kee
Han ku teurimong ibadat sinyan, beurang kajan jeuep2 watee

Soe nyang gaseh keu Ku ngon Ma, maksiet lanja jipubuet keu kee
Ku peuampon deesya sinyan, beurang kajan deesya bak kee
Salah bak Ma Ku hanku ampon, beuthat yakin jilakee bak kee
Hingga Ma Ku ka jiampon, baro bak lon do’a jilakee

Meunyo ka indah bak jih Ku Ma, han meureuka salah bak kee
Nyandum indah Nangmbah bak Po, soe han hiro keunong meureuka

Catatan: Cuplikan Nazam Akhbarun Na’im karya Tgk Di Cucum. Huruf asli Arab Melayu alias Jawi atau Jawoe.
Bale Tambeh, 8 Adoe Molod 1439/8 J.Awal 1439 H bertepatan 25 Januari 2018 (T.A. Sakti ).

Iklan