Nazam Akhbarul Na’im Karangan Teungku Di Cucum(cuplikan mukaddimah)

Bismillahirrahmanirrahim

Ulon peuphon ngon nama Allah, nyang that murah dalam donya
Kaphe Iseulam neubri raseuki, bandum sinari agam ngon dara
Lom geumaseh Uroe Akhirat, dum keu umat agama nyang beuna(r)
Ureueng Mukmin agam ngon inong, Tuhan peutamong dalam Syureuga

Alhamdulillah Rabbil ‘alamin, pujoe seukalian keu Rabbana
Bandum pujoe milek Tuhan, nyang Po ‘alam sigom donya
Wasshlaltu wasshalamu ‘ala, Saiyidina Muhammad waalihi washahbihi ajma’in
Rahmat ngon saleuem ateueh Muhammad, wareh ngon sahbat dum seureuta

Lom ateueh nyang ikot sahbat, keunan Rahmat Tuhan bri teuka
Lom pih ateueh ikot meuikot, hingga troih hat Kiamat donya
‘Ohlheueh sheulaweuet deungon pujoe, deungo jinoe lon calitra
Amma bakdu makna komdian, lon keumeung karang saboh calitra

Asai calitra di dalam Kitab, Jawoe ngon ‘Arab lon tueng makna
‘Arab Jawoe lon peu-Aceh, mangat sareh bak tabaca
Lheueh lon suson ka meukarang, lon boeh ngon Nan ban nyang rupa
Kheundak Tuhan Rabbul ‘alamin, Akhbarul Na’im lon boeh nama

Kareuna khaba niekmat Tuhan, meusambot nan deungon rupa
Haba indah indah hana bagoe, tamse pudoe ngon meutia
Lom lon tamse hikayat nyoe, tamse putroe nyang jroh rupa
Badan seudang neungui pi jroh, bee bak tuboeh minyeuk atha

Ngon peukayan leungkap diasoe, intan pudoe kasab sutra
Muka peunoh ban buleuen trang, soe nyang pandang hate suka
Kareuna haba dalam hikayat, donya akhirat le that laba
Soetem pateh that mamfaat, soetem ingat that bahgiya

Tamse putroe bandeng lon boeh, haba seumeuloh that meucahya
Nyang meutuwah galak jih that, ji deungo niekmat hana reuda
‘Oh jipike harok leupah, soena meutuwah ngon bahgiya
Kareuna ji deungo niekmat Tuhan, geubri keu insan agam ngon dara

Hantom putoih neubri sabe, troih ‘an mate hana nyang bla
Diphon gohna langet ngon bumoe, dum geutanyoe goh neupeuna
Nyang niekmat ka Neu peuhase, Neukeumeung bri nyan keuhamba
Teuma neubri sabe-sabe, phon goh lahe troih an kana

Neubri niekmat jroh that meudo-do, got meuato diphon gohna
Hingga kana masa putik, hingga an syik masa tuha
Hingga mate hanatom lapang, hingga tamong dalam syureuga
Nyanka muda muka peunoh, hana nyang sot meupat-pat bla

Jroh meuato seun-seun sitangkok, hingga antok dalam syureuga
Nyanka muda badan seudang, hana lapang got meubanja
Jeuep-jeuep tangkok na geupeugah, jeuep-jeuep ulah na jakitra?
Na nyang mangat na nyang saket, jroh mudlabeth dum peukara

Nyankeu meureud jroh pakaian, nibak badan bajee ija
Nyankeu lon kheun hikayat nyoe, tamse putroe dalam istana
Rupa ceudah neugui pi jroh, bee bak tuboeh minyeuk atha
Soe nyang kalon that meusigak, soe nyang galak nyo bahgiya

Nyokeu mata dijih haloih, jeuet jieu deuh nyang jroh rupa
Leumah jieu hana cacat, dum jeuep-jeuep pat hana cupa
Nyokeu geulinyueng tan meuto-to, jeuet jideungo nyang sibeuna
Nyokeuh hate na ileuham, utoh jipham dumna makna

Nyankeu sabab harok leupah, sabab dijih padok hana
Soe han galak nyan bagoe nyan, buta larangan mata banduwa
Mata duwa dijih teuklok, hana harok meungkon deesya
Geulinyueng tuloe hate hitam, hanjeuet jipham areuti makna

Peue nyang jingo ban geusampoeh, ban angen pruh broh lam tika
Tan sigeutu na mamfaat, tajok alat keusi lasa
Tajok sikin keu sipuntong, tajok tanglong keusi buta
Keusi rumpet tajok subang, keusi rumfang tajok baja

Keusi tan beuet tajok Qur,an, barang kajan han meuguna
Hana sagai na mamfaat, lom meularat kadang pina
Peuekeu sabab nyang jeuet meunan, sabab meuphom dijih hana
Meunan mise hikayat nyoe, beurang kasoe agam dara

Soena tuwah galak habeh, soena paleh nadum tuba
Kareuna haba dalam hikayat, donya akhirat dum deuh nyata
Kisah Donya ngon Uroe Dudoe, HIKAYAT NYOE NYANG PEUNYATA
Soe nyang jeundrong manyoh hate, galak sabe leumah beuna(r)

Hikayat laen ban seukalian, cit ladom tan sinan haba
Na haba nyoe tan haba jeh, disinoe meuceh dum peukara
Hikayat nyoe nyang mei tadeungo, beuta bubo dum calitra
Salah ngon beuna donya akhirat, sit lahe that sinoe nyata

Beuta tem ngui geunap uroe, dum geutanyoe agam ngon dara
Soena meunan sunggoh hate, tanda lahe jih bahgiya
Hikayat laen han bit nyoe, ladom rugoe soe calitra
Nyang ladom na laba bacut, soetem peubuet ban calitra

Ladom hikayat haba jameun, guree kheun-kheun hana laba
Han jeuet tatueng keu ‘ibarat, miseue hikayat Malem Diwa
Miseue hikayat Raja Ahmad, lom hikayat Si Phan Geulima
Miseue hikayat Malem Diwandak, tadeungo galak laba jih hana

Hikayat biek nyan tadeungo mangat, keupeu ingat meusikrak hana
Ureueng nyang peugah lethat kurangan, hikayat biek nyan soe-soe nyang geuma(r)
Ta deungo mangat bak ji pakhok, simalam seuntok ta meujaga
Meunafaat pitan meung sianeuk, habeh minyeuk peudeh ngon mata

‘Oh singoh beungoh teungeut meupakhok, ban gro mabok keunong ie tuba
Hikayat cit? beuna tathe, jeuet keu ‘eleumei soe nyang peucaya
Jeuep-jeuep tangkok jeuet keupeu ingat, jeuet keunubat hate nyang buta
Supaya tathee Tuhan ileuham, na jeuet tapham salah ngon beuna

Asai calitra dalam Kitab, bacut sapat lon suet uluwa
Teuma lon karang sang Hikayat, keupeu ingat agam ngon dara
Soehan pateh meuhat paleh, beuthat beujih aneuk Raja
Han tadeungo kisah Fireu’un, di ujong? thon jih ceulaka

Soehan hiro keubuet Nabi, beurang kari asoe Nuraka
Nyang meutuwah dum jipakoe, Tuhan sidroe buka dada
Ri nyang paleh hana meunyum, nyang takheun dum bak jih pura
Pat nyang na roeh sang beurakah, khem meuhah-hah sare subra

Kareuna jipham ban nyang lahe, tan jipike nyan keu makna
Leugat jihue citkeu wayang, tan ji pandang makeusud makna
Meukeusud makna bukon meunan, ban geukheun nyan bek tahawa
Kareuna salah nibak Allah, nyang lon sareh mangat nyata

Kareuna haba nyang lam humom?, mit soe meunyum lam bicara
Miseue geukheun bek ngieng hareuem, hana meunyuem soe peurasa
Teuma geukheun dum geuato, cit teusawo bak bicara
Hareuem tangieng geupeh geundrang, hareuem pandang inong dara

Lom pih hareuem tangie ‘aurat, ta pudeuh that muda bahlia
‘Ohka meunan dumpeue geukheun, rijang meunyuem soe bahgiya
Teulheueh geuato dum geupeutrang, suroh larang droeteu bida
Toh nyang suroh peubuet rijang, toh nyang larang bek takeureuja

Nyang meutuwah rijang teuingat, rijang ji taubat nibak deesya
Bak sipaleh dumpeue bilaih, hate jih kreueh ban meulila
Miseue on eumpeuek ie han basah, ile gadoh dum uluwa
Ri nyang paleh maken paleh, maken tapeugah maken ceulaka

Peue nyang takheun dum jitangkeh, sabab paleh jih ka raya
Nyang meutuwah maken meutuwah, maken tapeugah maken bahgia
Cit jipateh ban peuneugah, that jipapah ban meutia
Peue nyang takheun dum jipike, manyoh hate ji peurasa

Hate jipike (ji deungo) shurah, sare bohbah ngon ie mata
Cit jitem peunyuem ngon jikeucab, naban ureueng kab drien mangusta
Soe nyan hate na peunyaket, dum jingo phet miseue tuba
Makna peunyaket kana paleh, hitam habeh hanle cahya

Soetan peunyaket leumak mameh, jideungo gigeh ban calitra
Roeh ngon jingo pahla le that, jideungo leugat jipham makna
Pahla pih le soetem pakoe, uroe dudoe asoe Syuruga
Soe nyang pateh ban hikayat, di akhirat sajan Aulia

Soe nyan tem ngui sang na Haji, soe nyang beureuhi sang na Tapa
Soe nyang ngo deesya ampon, gaseh Tuhan soetem baca
Lafai takheun shurah tapike, dalam hate bekta lupa
Tango keu niekmat meuteutindeh, hanteu habeh lon peunyata

Lalu tasyuko keu Hadlarat, sabab niekmat hantom reuda
Soehan syuko dumna niekmat, jeuet meularat keunong meureuka
Agam inong beuta deungo, beuta bubo soe bahgiya
Mangat taturi niekmat Tuhan, bri keu insan agam ngon dara

‘Ohka taturi jeuet tasyuko, nabek tahe sangat gila
‘Ohta syuko niekmat Tuhan, teuingat yohnyan droeteu pahna
Teuingat droe Tuhan peujeuet, zat ngon sifeuet Tuhan peuna
Dumpeue neubri keu geutanyoe, malam uroe bekta lupa

Soe nyang sabe ingat meunan, ureueng nyan han keunong bala
Jeuet keu raakan jih ngon Tuhan, neu gaseh sayang soe meunan na
‘Ohneu gasehle Tuhan sidroe, neu pujoe gata han reuda
Beurang kasoe Tuhan pujoe, patot dudoe asoe Syuruga

Deungon beureukat Nabi Muhammad, Tuhan Hadlarat peutroih pinta
Hate ikhlas ingat keu Tuhan, bekna sajan meujampu riya
Meunyo meujampu riya disinan, meureuka Tuhan pi hana reuda
Jikalee meunan dum geutanyoe, keu Poteu sidroe bekta lupa

Wajeb bandum tasyuko niekmat, bek lale that agam ngon dara
Nyoe tadeungo saboh panton, beuta seuon ateueh jeumala
Beuta pateh dum tabubo, ingat hepo bek darohaka

Tabloe aweueh peugot keu makjun, tataguen ngon bak mangusta
Meungka troe pruet peunoh buthun, hanpeue hireuen keupo areuta
Koh bak bayi plah keu tungkat, seutot urat beukah lanja
Ban Sipa-i lheueh lam ikat, han jiingat pujoe Raja

Peugot peungat duek bak dapu, cok jeumuju dalam ceureupa
‘Ohka peunoh ban nyang nafsu, keu Tuhanku that jilupa
Hana sagai teuingat keu Po, nyum jih bako kon jih hamba
Han padoli keu Po sidroe, nyum jeuet buet droe ban nyang hawa

Hana jithee droe jih insan, peuneujeuet Tuhan dalam donya
Nyoe pih meunsn wahe taulan, keu Tuhan bek sagai lupa
Bekta sangka droeteu bako, Allah kon Po bekta sangka
‘Ohban taeu droeteu lanteueh, ngon kreueh ceubeueh teuga baja

Hanle ingat nyan keu Tuhan, nyum gata kon Tuhan peuna
Taingat keudroe keu Po haihom, nyankeu kawom biek meureuka
Tuhan beusa? Taeu laku, cotle iku sang dumpeue na
‘Ohneu puta hanjan kheun wee, yohnyan jithee keunong meureuka

Nyankeuh lon kheun bek jeungkat that, beuta ingat salah nyangka
Beuta ingat le peue ka neubri, uleh Rabbi keu bandum hamba
Bube nyangka tasyuko tan, talakee ampon jeueb kutika
Ta inga droe ban Kleng salah, jeuep-jeuep naf’ah lam meureuka

‘Ohnoe habeh haba Khuteubah, nyoe lon kisah haba mulia
F’aklamu ya Ikhwany, tathee sare he syeedara
JINOE LON PEUGAH NIEKMAT ALLAH, HAN EK LON KISAH PADUMNA RAYA
Teutapi lon peugah ladom-ladom, soe jeuet muphom ka meumada

Raya ubit agam ngon inong, deungo bak keunong bek meuriba
Lon meung peugah niekmat Tuhan, ubak insan agam ngon dara
Niekmat le that dum meutindeh, han ek habeh lon peunyata
Seupeurti ban Fireuman Tuhan, ayat Quru’an sajan ngon makna

Wain ta’uddu nikmatallahi, La tuhshu haa
Adat tabileueng niekmat Allah, han ek habeh bak tahingga
Kareuna niekmat le meutindeh, han ek habeh bak bicara
Meung nyang neubri keusidroe-droe, beurang kasoe han ek jihingga

Tho ie laot hansep keu daweuet, on kayee tapot sigala rimba
Hansep keureutah dumnan keu le, niekmat Tuhanku han ek soekira
Padum nyang neubri nyawong ngon tuboeh, padum nyang neuboeh akai bicara
Padum nyang neubri jaroe ngon gaki, padum nyang neubri deungon areuta

Padum nyang neubri aneuk pureumoh, nyang ladom jroh neubri rupa
‘Ohka salah neu peujeuet taubat, watee tata’at neubri pahla
Padum nyang neubri darat laot, padum nyang eungkot cut ngon raya
Jeuet tapajoh keu lawan bu, lom neubantu campli sira

Tajak lam laot han jeuet sagai, neubri kapai sambok behtra
Neu peujeuet malam watee taeh, neu peujeuet beungoh watee jaga
Neu peujeuet uroe watee hareukat, pangkai ‘ibadat mita beulanja
Lom ho tajak neu peugot? rot, ‘ohka seupot neubri suwa

Neu peujeuet gle neu peujeuet nanggroe, keu geutanyoe Tuhan karonya
Kayee batee tanoh ngon ie, angen apui niekmat keu hamba
Niekmat tangui ngon tapajoh, hana teudoh Po karonya
Meunan-meunan han ek lon peugah, cit deuh leumah deungon mata

Soehan leumah dumnan niekmat, nyoe seupot that hate buta
Teuma jigaseh meungkeu niekmat, han jiingat keu ureueng peuna
Hana jihiro meung sipade, dumnan neubri sileungkabnya
Nyang keu ureueng hana jipike, tanda hate jihka buta

Maken jeungkat peuleumah bako, hana hiro keu ureueng peuna
Peuleumah ‘alem peuleumah meugah, peuleumah indah bak ureueng donya
Peuleumah gob malee peuleumah gob gaseh, peuleumah lom jih got that guna
Peuleumah cangklak peuleumah bako, leumah jieu droe jihka kaya

Nyang bri dumnyan meuhat Tuhan, meung hireuen tan barang(jan) masa
Han jiingat keu Tuhan bri, dijih beureuhi niekmat saja
Tan meuhadap ubak Tuhan, beurang kajan cit ku donya
Soe gaseh keu donya ulee paleh, bak that nyo jih ulama raya

Rindu hate cit keu niekmat, jigaseh that meungkeu donya
Seupeurti ban Hadih Nabi, lafai lonbri sajan makna
Hubbud dunya ra-isun kulli khathiatin, makna polem lon peunyata
Ta gaseh keu donya ulee salah, meureuka Allah sinan punca

Paleh Fireu’un deungon Qarun, nyang punca phon gaseh keudonya
Soe gaseh keu donya sitree Tuhan, bak that jihnyan ‘Alem ‘Ulama
Jikalau meunan dum geutanyoe, keu donya nyoe bekta geuma(r)
Nyang tagalak meungkeu Tuhan, nyang bridum ban sileungkab na

Bahkeu dumnan lon bri ingat, pasai niekmat lom takira
Niekmat Tuhan han ek tafeuse, beurang soele tan kuwasa
Tho ie laot hanseb daweuet, miseue lon seubut dilee nyangka
Bitpih le that niekmat Tuhan, ‘Ohta simpan dua peukara

Niekmat Wujud Niekmat Amdad, nyankeu meuhat dua peurkara
Niekmat wujud neubrile Tuhan, asai nibak tan Tuhan peuna
Teuma neu peujeuet langet ngon bumoe, dum ngon asoe sianika
Hingga hase ban nyang kheundak, ban nyang layak neumeung peuna

Niekmat wujud nyan geuboeh nan, dilee cittan ka geupeuna
Niekmat amdad beurpanjangan, tulong Tuhan ‘ohka lheueh na
Tuhan tulong dum jeuep-jeuep hai, hana sagai nyang na reuda
Hudep mate saket mangat, dumpeue meuhat Po karonya

Makna niekmat neubri rahmat, citka jehpat lon peunyata
Tadeungo jinoe lon tafeuse, niekmat Rabbi nyan banduwa
Niekmat wujud peuna Tuhan, dilee cittan dum peukara
Nyang na dilee cit meung Tuhan, nyang laen tan ban sineuna

Daim-Qaim pih cit sidroe, hana sapeue nyang na seureuta
‘Arasy gohna Kurusi gohlom,sidroe Tuhan trebka lama
Teuma neukheundak peuleumah rahmat, uleh Hadlarat keudum hamba
Teuma neutilek dalam ‘eleumei, sinan meuteumei saboh rahsia

Nyan jimeunan Roh Adlafi?, hakikat Nabi Saidil Ambiya
Teuma neu peujeuet neu peulahe, ruhan Nabi Muhammad kita
Sinan keuh asai bandum ‘alam, pince ninan ban sineuna
Nyankeu nyang phon Tuhan peujeuet, nyawong Muhammad panghulee kita

Lon boeh miseue nyawong Muhammad, sang meuk teubiet dalam meulila
Hingga tutong dum sigala be, nanggroe ngon gle dum meunyala
Hase keu apui sigala nanggroe, bak meuk beusoe asai mula
Sigala apui dum sibarang, lam kandongan meuk meulila

‘Adat meungtan katan apui, asai usui meunan upama
Meunankeu tamse nyawong Muhammad, he dum umat tapeucaya
Adat tan Muhammad meunan tapham, katan ‘alam ban sineuna
Nyankeu sabab Nabi Muhammad, panghulee umat ban sigom donya

Bak hakikat Muhammad eumbah?, that bit salah soe nyang lupa
Nabi Muhammad nyan Ku nyawong, cuba tanyong bak ‘ulama
Nyankeu kaphe paleh leupah, jikheun keu eumbah? Saidil ambia
Hingga jiungki jikheun kon Nabi, lom habibi jikheun brok bangsa

Hana jithee nyan biek Kureh,kaphe paleh ilumei hana
Jikheun badan meugrueb? Kasyu?, kulet lhu ban kulet meuruwa
Oek meukurete? kulet itam, ureung agam meutuue? Muka
Mat bruek pawoh bak jaroe unun, ngon geukheun-kheun seudeukah peuena

Quru’an lhee ploh kaphe kheun dondang, Muhammad karang kaphe jidawa
Jidawa kon Tuhan peutron, meunan jikheun si ceulaka
Han jithee jroh lang-geumilang, ‘ohta pandand naban meutia
Beeneu mangat badan cacang, kulet nasang bungong jeumpa

Soe nyang pandang mata ladat, galak that tango suara
Babah rumeh teusinyom kulom, nyuem beutacom jeuep anggeeta
Teusurat bak badan bahrul nubuet, ladom jeuet beuet ladom angka
Taeu ladom meusubang-subang, lang geumilang jibeudoh cahya

Soe nyang surat boeh bak badan, bak gobnyan han keunong bala
Ho nyang neujak awan peupayong, ji peutudong ateueh Maulana
Hantom keunong seuuem uroe, nibak asoe Nabi mulia
Nyan dum leubeh Nabi Muhammad, bak kaphe laknat han jipeucaya

Leubeh Nabi han ek lon peugah, habeh keureutah siploh banggala?
Bahkeu dumnan di Nabi Muhammad, keu nyawong umat jinoe takira
Nyang phon limpah nibak Nabi, Ulul ‘Azmi nyang mulia
Ulul ‘Azmi Nabi limong droe, lon peugah sinoe cit Nabi ‘Isa

Ulul ‘Azmi Nabi nyang leubeh, teurlalu saleh raya that saba
Limpah nibak Ulul ‘Azmi, nyawong Nabi nyang mursala
Meuhat lhee reutoih lhee blah droe, lon peugah sidroe Zakaria
Makna mursal Tuhan suroeh, neuyue prang musoh nyang tan agama

Limpah sinan nyawong Nabi, nyang Sikati Dua Laksa
Limpah sinan nyawong Wali, umat Nabi nyang ‘Ulama
Limpah sinan Malaikat, nyawong nyan jeuet bak ulama
Limpah sinan nyawong Saleh, ureueng nyag leubeh peubuet takwa

Limpah sinan nyawong ‘awam, nyang Iseulam seumuanya
Limpah sinan nyawong kaphe, nyang meuungki keu agama
Limpah sinan nyawong syaitan, sigala jen dalam donya
Limpah sinan nyawong binatang, gajah rimueng leumo guda

Limpah sinan nyawong kayee, nyang meuree-ree dum cut raya
Limpah sinan nyawong batee, ‘Ohnoe sampoe ka samporeuna
‘Ohnan habeh peuraturan, tinggai sinan tuboeh gasa
‘Oh habeh minyeuk tinggai takeh, hanpeue meudaleh nyoka gasa

Tuhan peujeuet meutia puteh, cit nyang leubeh nibak nyawa
Linteung buju that bit luah, hanya Allah thee sibeuna
Teuma neutilek ngon tileh hibat, uleh Hadlarat ateueh meutia
Habeh hanco sabab teumakot, jeuet keu laot nyang that raya

Meugulong-gulong jibeudoih bakat, sabab hibat Allah Ta’ala
Meualon-alon ngon geulumbang, miyub-manyang teumakot raya
Teuma meupoh-poh ngon meukab-kab, teubiet asap meunyala-nyala
Teubiet kuboh teuma sajan, lam laot nyan dum cut raya

Nibak asap dum neu peujeuet, asoe langet dum sinan na
Nibak kuboh ie neu peujeuet bumoe, sigala nanggroe cut ngon raya
Kayee batee asoe tanoh, nibak kuboh asai neu peuna
Langet bumoe ka habeh jeuet, lom neu peujeuet cakrawala

Cakrawala sikureueng lapeh, meutindeh ban simu’a
‘arasy Kurusi langet ban tujoh, disinan neuboeh cakrawala
Nyanke meuhat nyoe sikureueng, tacuba bileueng han meuriba
Cakrawala bunta ban kurong, naban meuglong paloh rapana

Hantom teudoh lam meuweng-weng, meupuseng-puseng bagoe jeureukha
Bandum jihnyan geupeunan mbah?, sabab jikeubah bijeh bak Ma
Dibaroeh jih Poteu peujeuet, ‘anaser peuet geupeunan Ma
Proehai neu kheundak peuleumah rahmat, uleh Hadlarat dalam donya

Lalu neugrak phon bak ‘Arasy, rahmat neukeubah seureutanya
Rahmat Tuhan upama bijeh, neukeubah bak cakrawala
Tamse bijeh neukeubah bak Ku, kasrot lalu lam rahim Ma
Di’Arasy srot bak Kurusi, rahmat Rabbi troih keunan ka

Di Kurusi srot bak langet tujoh, seun-seun silapeh rahmat teuka
Teuma srot bak langet seuneulheueh, nyang leumah deuh langet donya
Hingga meusimpom bak ‘anaser, aneuk lahe nalhee bangsa
Peurtama Makdin? Meuh ngon marjan, batee intan ‘akik meutia

Keudua hiyawan nyag meunyawong, miseue insan leumo rusa
Keulhee nabat miseue kayee, nyang meuree-ree dum cut raya
Hase banlhee aneuk ‘anaser, mbah? Jih sabe cakrawala
Bahkeu dumnan lon peugah bacut, le meuruet-ruet panyang haba

Niekmat wujud ‘ohnoe siat, niekmat Amdat jinoe takira
Niekmat amdat beurpanjangan, tulong Tuhan ‘ohka lheueh na
Tulong bantu nibak Tuhan, barang kajan keudum hamba
Hudep mate saket mangat, tulong Hadlarat dum keuhamba

Cit neu tulong jeueb-jeueb watee, hana padee jeuep kutika
Uroe malam neu tulong sabe, hanatom cre sikleb mata
Dumna makhluk dum seukalian, dihadapan Allah Ta’ala
Hantom tuwo hana silab, hana sikeujab nyang na lupa

Teuiem teugrak dum lat batat, laot darat nanggroe rimba
Di ‘Arasy kon ngonlanget tujoh, hingga an troih uyub donya
Jikalee kon ngon tulong Tuhan, han tatujan habeh binasa
Neu peujeuet mata ngon keumalon, na tatuban dumpeue rupa

Neubri geuliyueng ngon tadeungo, bek meulumo dum suara
Neubri hidong ngon tameucom, khieng ngon harom na tabida
Neubri lidah ngon tamarit, na takheun bit peue nysng haba
Neubri babah ngon pumajoh, nabek kurois dum anggeeta

Neu peujeuet pruet upama peutoe,teumpat tapasoe peue tadura?
Nab ngon likot na neuboeh rot, naho teubiet nyangka ceuma
Neubri gaki najeuet tajak, ho nyang galak ta meuhala
Neubri jaroe ngon ceumeucok, peue nyang harok ta meunghila

Aneuk jaroe ngon meureugam, gukee tajam niekmat raya
Ngon tacutiet garo gatai, hantom tinggai niekmat teuka
Faroj zakar ngon meuceudieng, na tamse trieng timoh bak mata
Neubri asoe tuleueng ngon urat, mangat kuwat dum anggeeta

Neuboeh atot dum jeueb-jeueb pat, na jeuet talipat dum anggeeta
Meunan-meunan niekmat Tuhan, neubri keu insan agam dara
Neubri utak teumpat pike, neubri hate ngon keumira
Ngon sabab nyan jeuet tatupeue, sah ngon bateue salah beuna

Niekmat teunyan hantom gadoh, bekta boh-boh bak buet deesya
Neuyue pubuet puerlee sunat, haleue pih that Tuhan ridha
Adat tame bak buet haroih, hancit neuboh gata meureuka
Ingat-ingat he adoe Po, beuta bubo niekmat dumna

Bandum geutanyoe geuyue ibadat, sabab niekmat neu karonya
Han neu idin tapubuet salah, niekmat neuboh nyankeu saja
Tuhan peujeuet sabab ibadat, kon ho hajat galak gata
Seupeurti ban fireuman Tuhan, tadeungo teelan agam ngon dara

……….wama khalaqtul jinna, illa linyak budun
Hana ku peujeuet jen ngon insan, dum seukalian agam dara
Malengkan bandum jiseumah kee, jeuep-jeuep watee kutika
Deungo bandum fireuman Allah, soehan seumah teumeureuka

Kon neu peujeuet jen ngon ensan, keurakan na jeuet neubaba
Kon neu peujeuet nabek sungue, konneu meungyue pat alang na
Nasoe tumpoeh pat nyang han ek, nasoe balek teuka bala
Nyang nyan bandum tan neu hajat, keu ‘ibadat nyang na sahja

Tanda lahe keubesaran, nyang laen tan hana neu hawa
Nyang neu peujeuet jen ngon ensan, agama Islam bek binasa
Tuhan neuyue peulahra sabe, hingga mate dalam agama
Jikalee meunan ibadat sunggoh, bekta piyoh jeuep kutika

Tuhan bri niekmat sigala tuboeh, bekna tapeuroh bak buet deesya
Pomata bek ngieng nyang hareuem, nyang neutham dum bek tahawa
Miseue tangieng peurumoh gob, ngon aneuk miet muda bahlia
Geuliyueng bek deungo nyang larang, miseue geundrang ngon beeula

Seurune tambo panton hareubab, geudumbak upat manusiya
Polidah bek marit salah, miseue tapeugah sulet raya
Ta upat gob ta pujoe droe, gon rok uroe taceureuca
Tadawa gob mangat talo, sare a-o kuwat meuseunda

Poh beurakah lalat mirah, lom tapeugah inong jroh rupa
Dipruet pih bek pajoh karot, miseue reuboet pajoh riba
Pajoh areuta cue atawa taki, lom han jibri ta enanya
Nyang jeuet riba utang riyeue, jan jibayeue bakna laba

Bloe barang meuh yum jih pirak, sinan pih hak jeuet keu riba
Syarat bekna sinan tanggoeh, sinan taboeh bekcre dua
Bloe meuh ngon meuh pirak ngon pirak, syarat layak sinan bandua
Saboh syarat jih bak sadum, leubeh kureueng jeuet keu riba

Keudua syarat bekta tanggoeh, tameu boeh-boeh dikeue mata
Hanjeuet jarak meung sipade, meungnyo kacre jeuet keu riba
Bloe peunajoh ngon peunajoh, meungnyo tanggoeh jeuet keu riba
Nyang kon sibiek bandua si, miseue pade bloe ngon sira

Syarat tajok wie ngon unun, meungkon meunan jeuet keu riba
Meunyo sibiek dua jih nyan, syarat sinan meuhat dua
Saboh jok wie-unun, lom bak sadum jih bandua
Miseue pade tabloe karah, bloe patisah? Jeuneh jiba

Meunyo han jeuet ta peusadum, jok peng keu yum han jeuet riba
Dipo jaroe bek mat nyang keuji, miseue judi padoek panta
Lom bek tamat nyang kon peurumoh, lom bek tapoh manusia
Lom bek tamat aneuk miet jroh, peuneu jeuet Allah bek tapeujra

Dipo hate bek ingat keu maksiet, tameung pubuet darohaka
Miseue niet jeuheut ta meureubot, atawa kasad tameung meuzina
Riya teukabo ‘ujob deungki, tameung taki manusia
Lom bek hate gob tabanci, pogaki bek jak bak deesya

Miseue judi sabong tajoe, bek tapeutoe piasan donya
Leumo meupok peu meu’en biduen, bek tahireun sipak raga
Lom bek tajak bak Raja dlalem, rakyat kayem ji enanya
Tajak keunan bandum han got, zakar faroj bek meuriba

Bandua nyan peuneujeuet Tuhan, neuyue meukawen agam dara
Na mangat le umat Nabi, uroe page di Padang Masya
Ureueng lakoe ureueng binoe, dum geutanyoe bek meuzina
Habeh paleh dumna ureueng, sabab bajeueng aneuk gata

Aneuk nyan pih meuaneuk lom, habeh bandum tan Syureuga
Aneuk bajeueng limong seun salen, hana jicom bee Syuruga
Sare kalheueh limong lapeh, han meusaboh nyang na Syureuga
Meseuki ‘alem ngon saleh that, nyang teumpat han lam Syuruga

Tuhan peujeuet saboh teumpat, antara Jannah ngon Nuraka
Nyankeu teumpat Tuhan neu balah, sabab tan nikah Ku deungon Ma
Meujan mangat meujan peudeh, sabab paleh Ku jih ngon Ma
Beuta ingat dum geutanyoe, bit that rugoe soe meuzina

Aneuk teuna taba han jeuet, tameung peulob dalam Syuruga
Teuduek haba ‘ohnan siat, haba niekmat taulang teuma
Lom pih niekmat tulong Tuhan, neu peujeuet badan teuthat teuga
Adat saket neu peujeuet ubat, jak bak tabib tanyong peuena

Adat meusalah yue jak urot, mata seupot ceureumen kana
Neubri ceureumen mangat peungeuh, na leumah deuh dum peukara
Adat ka rumpong neubri cubek, pike adek niekmat dumna
Neu peujeuet rumoh bubong ngon binteh, watee jan taeh mangat seuninya

Asoe rumoh cawan ngon pingan, kanot beulangong tayeuen ngon tima
Guroe guci aweuek ngon cinu, niekmat Tuhanku han ek tahingga
Ija bajee alat peukayan, neubri Tuhan dum keu hamba
Lampoh umong ujeuen ngon khueng, laot ngon krueng panton paya

Dum neubri han tateupeue satnyareng pukat anggok gisa
Binatang nyang haleue laot darat, jeuep-jeuep teumpat leumo rusa
Meunan-meunan dum meutindeh, han ek habeh lon calitra
Adat tasurat niekmat Allah, hanseb keureutah on kayee rimba

Tho ie laot hanseb keu daweuet, nyang niekmat han habeh nyata
Lom pih neubri aneuk peurumoh, nameuung bek soh ‘alam donya
Taeu neu peuduek dumna rakyat, dum meusapat agam ngon dara
Meukawen-kawen meubisan-bisan, han sapat tan jeuep sagoe na

Neu peuduek rame dum meutumpoek, mangat landok bak agama
Lom pih hanjeuet keu teumakot, sabab meusapat tuha muda
Soe nyang alang meubantu-bantu, buet Tuhanku hantok juga
Neu peujeuet raja ngon uleebalang, nasoe peutimang rakyat dumna

Neu peujeuet Teungku deungon Syiyah, nasoe peugah rot agama
Nasoe brithee laba rugoe, dum geutanyoe agam ngon dara
Lom pih niekmat Tulong Tuhan, neubri rakan tuha muda
Neubri wareh rakan ngon sahbat, neubri mufakat han meudawa

Adat ka dawa deungon kawom, neuyue hukom bak ulama
Nyankeu lon kheun niekmat sabe, gadoh pike ngon bicara
Hana putoih keumudahan, buneubri atauhsn dum keu hamba
‘Ohka mate baro habeh, bak naseubah niekmat donya

Teulheueh nyan lahe niekmat akhirat, hana siat nyang na reuda
Adat kabla teuka rotnoe, rotdeh meuwoe niekmat teuka
Beurang kajan citna niekmat, cit rahmat Tuhan karonya
Hingga gata puntong jaroe, teulhoh gigoe buta mata

Kadang ngon lom puntong gaki, niekmat Rabbi mantong raya
Adat meutamah keumong ngon pruet, lidah teusuet guyang jungka
Lom meutamah he adoe po, kadang ngon klo lom ngon luka
Adat leubeh lom bek an dumnan, niekmat Tuhan mantong raya

Hingga kajeuet mate kaphe, baro hanle niekmat teuka
Meunyo mate dalam iman, niekmat Tuhan hantom reuda
Bahkeu ‘ohnoe dilee siat, soetem ingat ka mumada
Nyoe sigeutu lon bri ingat, raya ubat agam ngon dara

Geutanyoe dilee hana sagai, hana asai bak neupeuna
Nyang na dilee Tuhan sidroe, laen dumpeue droenyan peuna
Neu peujeuet nyawong deungon tuboeh, miseue lon boeh bunoe nyangka
Mata geuliyueng jaroe gaki, dumpeue neubri nyan keugata

Neubri hate pruet ngon babah, miseue lon peugah dilee nyangka
Alat peukayan deungon raseuki, dumpeue neubri hana nyang bla
‘Ohsare na seuleungkapan, Fireuman Tuhan bak dum hamba
Alastu Birabbikum, deungo bandum lon boeh makna

Nyoekeu Ulon Tuhan kah dum, seuot bandum ngon lafai Balaa
Kah nye namiet Kee nye Po kah, meuroe dumkah ka Kee peuna
Jinoe ka pubuet nyang Kee yuekah, nyang kutham kah bekka hawa
Nyan dum di Tuhan keu geutanyoe, pike adoe bekta lupa

Alat pangkai dumka neujok, dumpeue katok sileungkap na
Neuyue hareukat dum geutanyoe, neuyue puwoe keu Po gata
Miseue raja neubloe namiet, neuyue jak buet agam dara
Neubri peunajoh neujok pangkai, beuliyong langai ngon usaha

Neubri umong leumo ngon bijeh, neubri lam poih bak peumula
Neubri eleumei neu peuruoe, na ji tupeue dum peukara
Supaya jeuet ji hareukat, pangkai alat bek siya-siya
Watee toek jan Raja pangge, peuwoe pade dum biaya

Peuwoe riyeue ngon boh kayee, pangkai dilee sajan ngon laba
Laba pitan pangkai habeh, alamat paleh meureuka Raja
‘Ohsare troih jiwoe bak Po, peu-ek laju ateue sula
Nyoe pih meunan wahe sahbat, peuwoe ibadat keu Po gata

Tuhan neubri meuribee bagoe, bah meung sipeue? Peuneuwoe gata
Watee tawoe nanggroe akhirat, peuwoe ‘ibadat meungnyan sahja
Laen nibak nyan dum milek droe, usaha geutanyoe troeh padumna
Ibadat pihtan lom ngon salah, bit that paleh tan bicara

Peue nyang geuyue han tahiro, ta peuwoe keu Po darohaka
Tangui tapajoh areuta Tuhan, ibadat tan tapubuet deesya
Pakri han salah wahe rakan, peuwoe keu Tuhan sigala deesya
Nyan dum-dum buet he adoe jroh, pakri han geuboeh lam Nuraka

Nyanlah Tuhan got peurangoe, adat geutanyoe han ek tasaba
Habeh donya tahancole, saket hate darohaka
Nyoe di Tuhan neupreh ta teebat, nyan dum get that Allah Ta’ala
Lom pih niekmat tulong Tuhan, neu peukawen Kuteu ngon Ma

Neu meuaneuk kana adoe, tago jinoe lon calitra
Niekmat teuka yoh gohna kon, hingga troih an kana gata
Hingga kana masa putik, hingga an syik tuha gata
Hingga mate ka geutanom, niekmat hantom nyang na reuda

Bahlon peugah peuraturan, phon manyak kon troih an tuha
Lon peugah nyoe kon sidroe-droe, beurang kasoe sama rata
Tango lon kisah wahe Polem, masa meukawen Ku deungon Ma
Teulheueh meukawen Ma deungon Ku, got that rindu hate bandua

‘Ohtreb bak treb ‘oh meukawen, kaneu meushyen gobnyan bandua
Saboh disreb saboh meugreb,’ohtreb bak treb jeuet keu geuma
Masa dilee hantom neu eu, jeuet keu rindu ‘oh biasa
Kaneu jeuet marit meukhem-meukhak, hate galak suka raya

Hanle malee ngon teumakot, lam seulimbot neujeuet meuseunda
Hingga neu-eh sajan-sajan, dimuda kon troih an tuha
Ladat niekmat bak meueh-eh, teuka gaseh droe nyan dua
Teukeudirullah buet Tuhanku, bijeh bak Ku kasrot bak Ma

‘Ohji tamong dalam rahim, Malikul karim yohnyan teuka
Neujak keunan Malaikat rahmat, ka neupeurab bak rahim Ma
Yohnyan neucok ka neu reugam, ma’anikam nyang dalam pruet Ma
Lheueh nibak nyan neu peuseumbah, nibak Allah Po Nyang Asa

Ya Ilahi wa Ya Rabbi, wa Ya Saidi Ya Maulana
Citka lahe lam ileumei, habeh neuthee lam rahsiya
Jikalee neu peujeuet nyan keu insan, neu peugah nan bahgia ceulaka
Jeuet keu inong atawa agam, kaphe Iseulam neu peunyata

‘Alem jahe pasek saleh, dum neu sareh Ya Rabbana
Na ‘oh langkah dipat peuteumuen, neucuba kheun lon ngo nyata
Ngon peue mawot dipat teumpat, tohpat jeurat Ya Maulana
Fireuman Allah bak Malaikat, neu peugah hat dum peukara

Meutuwah paleh ‘alem jahe,meudum raseuki meuho jak mita
Meupat mawot meupat jeurat, dumpeue meuhat han meuriba
‘Ohlheueh neu deungo Malaikat, neujak intat lam rahim Ma
Teutap sinan di maknikam, dalam rahim nyang lam pruet Ma

Sare teutap mani sinan, jih geupeunan nuthfah nama
Ie nyang caye ka meubeuku, buet Tuhanku han ek juga
‘Oh geunap uroe jihka peuet ploh, nan jih geuboeh ‘Alaqah nama
Yohnyan kajeuet darah sigeumpai, hantom tinggai atorannya

Geunap sireutoih duaploh uroe, neuboeh asoe jeuep anggeeta
Tuleueng urat kulet asoe, kakeuh meusoe agam ngon dara
Agam inong ka meusifeuet, Poteu peujeuet ban maklumnya
Panyang paneuk hitam puteh, gagah meuceh yohnyan rupa

Ban nyang kheundak nibak Tuhan, bak badan nyan ka samporeuna
Nyoeta deungo saboh Tambeh, beuta pateh dum saudara
Surat Yusuf soe nyang surat, taikat bak pruet sidara
Dalam mume yoh peuet buleuen, taikat phon bak buleuen tiga

Khasiet neubri beugot tapham, aneuk agam indah rupa
Lom soe surat surat Qulhu, Qul a’uzu nyan bandua
Teuma Alham ngon kalimah, Lailaha illallah sajan seureuta
Lom ngon saleh peubuet ibadat, sigala maksiet hanho jiba

Lom soe pajoh safarjal, bekta tinggai bak buleuen dua
Lom buleuen lhee ngon buleuen peuet, aneuk jih jeuet indah rupa
Teuma jijeb nyang meusantan?, dalam bulan peuet ngon tiga
Tasurat bak cawan sabon, yoh jijeb phon get samporeuna

Tuhan peujeuet aneuk saleh, lom leubeh han keunong bala
Sare cukob sigala badan, teutab sinan dalam pruet Ma
Meunan peurintah Tuhan sidroe, dum geutanyoe agam ngon dara
Nyankeu niekmat nibak Tuhan, bandua ban hana nyang bla

Niekmat Wujud niekmat Amdad, lam meusapat jarak hana
Nyankeu lon kheun bek teukabo, bak le syuko keu Rabbana
Niekmat wujud nyan ban bangon, dilee cittan han sapeue na
Teuma Tuhan neubri wujud, seureuta kajeuet ban kheundaknya

Teuma neutulong nabek reuloih, nabek gadoih ube kana
Nyan geupeunan niekmat amdad, hsntom siat tan neukira
Jikalee meunan hana putoih, hana teudoh barang jan masa
Hana siat nyang tan hiro, hantom tuwo sikutika

Adatkon niekmat nibak Tuhan, asai dum nyan mani nyang hina
Nyang jeuet keu mani ngo lon peugah, peunajoh Nangmbah asoe donya
Peunajoh nangmbah beuna tathee, on boh kayee binatang rimba
Asai dumnyan dilee bak tanoh, teuma timoh bak kayee dumna

Mubalek bak tanoh jeuetkeu kayee, meunan lagee buet Rabbana
Deungon sabab peungeuh bintang, lom meupuseng cakrawala
Meubalek kayee jeuet binatang, lagi naleueng dum jiseuba
Dikayee jeuet eumpeuen binatang, ngon meulinggang cakrawala

Binatang jeuet peunajoh insan, beurang kajan bri Rabbana
Kajeuet rupa nyan keu ureueng, asoe binatang nyan jiseuba
Nyanban? Meuhue? phon bak tanoh, hingga peunoh jeuep anggeeta
Nyankeu lon kheun bek jeungkat that, tanoh meuhat asai gata

Tabi’at tanoh dalam gob gilho, asee leumo toh ek ceuma
Taingat asai dum geutanyoe, bek sangka droe that mulia
Nyang mulia cit meung Tuhan, geutanyoe insan bandum hina
Adat na mulia ladom rakyat, ji syuko niekmat wajeb bakna

Sabab mulia tan bak ato,wajeb syuko keu Po Nyang Asa
Sabab tan khut ka tapeukhut, wajeb jisujud keu Rabbana
Asai tanoh jeuet keu tuboeh, bahlon peugah meung sibanja
‘Ohji pajoh uleh insan, dum makanan dalam donya

‘Ohji tamong troih la rukueng, cit meubulueng haloh gasa
Nyang gasa-gasa jeuet lhee bulueng, maseng jiplueng ho nyang jeumba
Nyang gasa titek? dalam pruet, sinan kajeuet keu ek ceuma(r)
Teuma nyang haloh titek? Bak hate, sinan sabe lom meubida

Bak hate nalom buet sinan, meubida lom haloh ngon gasa
Nyang gasa-gasa jeuet lhee bulueng, maseng-maseng plueng ho nyang padra
Saboh bulueng titek? Bak phet, sinan kajeue keu dlafara?
Sinyang nyan peuseu-uem darah, pruet dum jisrah ‘ohlheueh hingga

Sibulueng bak limpa titek, sinan kajeuet jih keu sauda
Sinyan nyang bri peunajoh tuleueng, sinyan suleueng ‘ohlheueh khan ka
Bak tarakhad? sibulueng titek, ka jeuet keu ek ban simua
Teuma nyang haloh titek bak urat, sinan pih jeuet lom meubida

Nyang gasa titek bak asoe, hantom laloe jipeusa rupa
Ureueng hiam ji peuhitam, puteh pih meunan ji pubida
Sinyan tampai dum seukalian, badai badan nyangka ceudra
Teums nysng hsloh sareh bak shulbi, jeuet keu mani Tuhan karonya

Dumnoe jeuet bak makanan, nyang neu makeuen uleh Ku ngon Ma

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s