Haji Jameun Dilee = Naik Haji Tempo Dulu

HAJI JAMEUN DILEE

Lailaha Illallah, beumeutuwah ureueng tuha
Neubri peurangoe got seureuloe, ureung nanggroe jigaseh na

Bahkeu ‘ohnan dihaba nyan, meuwoe karangan bak Nyak Muda
Sinyak Muda ileumei saleh, lagi leubeh zahed wara’a
Keu Potallah that bakeuti, jakeuet jibri jan toek kira
Ji puwasa ngon seumayang, hantom lapang toek kutika

Rukon limong nyang goh Haji, laen sare cit dumpeue ka
Mita beulanja lhee peuet reutoih, sare kukoh keumeung bungka
Peuhase breueh deungon sagee, lom ngon rujee kanot tima
Peuhase guci tareh taloe, tareh peutoe deungon sara (sira? )

Sare hase dumka leungkap. Kapai ‘Arab pih toek teuka
Teuma lheueh nyan peudieng dabeueh, angen linteueh laju bungka
‘Ohsare toek leupah Silan, upah sinan ladom bak na
Hingga ‘ohtroih nanggroe Makkah, bayeue upah habeh dumna

‘Ohtroih Miqat sinan Ihram, tamong u dalam Makkah muliya
Thawaf Sa’i Wukuf ‘Arafah, srom Jamarah lhee sibanja
Sare cukop Haji ‘Ummeurah, u Madinah lanja bungka
Geujak ziarah Kubah Nabi,buettan Haji ka samporeuna

Ladom hana jak Madinah, jiwoe pantah miet beulanja
Soetan ziarah Kubah Nabi, jiek Haji han samporeuna
Sang pajoh bu tan pajoh eungkot, adat ek ta’uet hana meurasa
‘Ohsare lheueh dum meuwoe-woe, u nanggroe droe ayah bunda

Ladom han woe dong di Makkah, ileumei Allah geukeumeung mita
Sinan geudong meununtut sabe, hingga mate nanggroe mulia
Soe nyang mate nanggroe Makkah, page dijih cit seuntausa
Ladom sunggoh bak geubeuet-beuet, nyang ladom jeuet keu ‘Ulama

‘Ohsare woe geuseumubeuet, ban kada jeuet keu Peutuwa
Ladom jiwoe ‘ohlheueh Haji, jidong sabe tan beulanja
Ladom beuthat nacit nyang woe, jijak meubloe dabeueh pina
Bloe Kupiah bloe ruja Syam, bloe Ie Zamzam boh Kureuma

Bloe ngon kasab ngon ija jroh, sare peunoh peutoe sara
Troih Kuala jicok wase, lam-lam gule dum jimita
Cok keureutah puweh sugoe, buka peutoe bileueng ija
Hanjeuet tasom taleung padok, habeh jicok lam siplohsa

Troih u darat toek geujak tueng, maseng bulueng dum saudara
‘Ohsare troih woe u rumoh, ureueng peunoh dum jak sapa
Assalamu’alaikom Teungku Haji, saleuem gobbri seuot sigra
Ri nyang teuka rakan kawom, jok saboh kom boh kureuma

Ureung gampong dum jak meujrom, bri Ie Zamzam ngon kureuma
‘Oh le teuka geutakot hansep, ie lam gupet jampu sigra
Ladom gebri kupiah puteh, nyang that neu gaseh bri ngon ija
Meunan-meunan ban nyang layak, keu ureueng jak dum mulia

Sok ngon bajee lhee peuet lapeh, jroh that meuceh nibak nyang na
Peuudep janggot nyang tan dilee, sok ngon bajee syureuban raya
Watee neujak meuhayat-hayot, rakan dilikot lhee peuet neuba
Ho nyang neujak gob mumat jaroe, Teungku ban woe Tanoh Mulia

Teum a ‘ohtreb jeuet keu bateue, hansoe tupeue Haji teuka
Bajee pitan syeuruban hanle, Teungku Haji hanale tanda
Ladom sulet ban Baduwi, Teungku Haji sit nan saja
Droe nyan leubeh bak pancuri, taki-maki le bicara

Hanjeuet harap sagai-sagai, peue gob tinggai dum neuhila
Dumnan pangkai neu kahabeh, Datok paleh tan bicara
Nyankeu Haji Syitan tipee, asai dilee niet han beuna
Nyankeu Haji jen peuratee, ka jitipee mangat binasa

Jak Haji kon kareuna Allah, buet phon leumah jen peudaya
Jak Haji kon seubab Syara’, sabab gob jak malee mata
Sabab ka le rame gob jak, jih pih galak keumeung bungka
Kadang rakan jihka leupah, yohnyan gagah jimeung bungka

Han jeuet dongle dalam nanggroe, lam teugoe-goe dalam dada
Digob leupah nyang adoe-adoe, nyum uroe nyoe bak jibungka
Jeuet ceumuru gobka geujak, lon han kujak sang-sang hina
Sira meu’en kalon nanggroe, lheueh nyan lon woe Haji pika

Yohnyan harok hanjeuet tinggai, mita pangkai dum beulanja
Adat tan pangkai mita ilah, asai leupah jih jibungka
Mung goh Haji kupiah haji, dum geutukri nanggroe mulia
Meungnyo meunan han sakon jeuet, syaitan peungeut asai nama

Ta eu jakeuet hantom jiboeh, jikheun han troih meugoe hana
Pade jeueb thon meureutoih-reutoih, hancit jiboeh jakeuet areuta
Sabab tan meugah ureueng boeh jakeuet, di Haji jeuet bako mulia
Areuta habeh mulia tan, ngon sabab nyan mit soe geuma(r )

Umong jih le nyang gob meugoe, bijeh keudroe si usaha
Dijih umong jikheun bungkai, han sagai bijeh bak jih na
Meungtan jibri bijeh pade, jakeuet sabe bak jih hana
Sabab jakeuet ji seutot bijeh, kawoi saheh meunan haba

Teutapi zakeuet meuseutot bijeh, bekna daleh ngon ilah gata
Tatem ilah nibak lahe, han tapike keu le pahla
Meuseuki Hukom meunan bit-bit, bek ta isib walee beuna
Bijeh tabri nameung ek toek, beuthat harok keu le pahla

Nibak jakeuet tailah bek bri, teuma di Haji tailah bak na
Nyan Haji kon kareuna Tuhan, mita got nan ngon mulia
Haji galak ke zakeuet han, jih dua ban sisyaudara
Nyan alamat jen peuratee, ji tipee mangat binasa

Meungnyo tailah nibak lahe, dumkri hase tabicara
Ngon Potallah bekta meuhom, ‘ohneu hukom di Blang Masya
Diseumayang pihna ilah, rot bek payah takeureuja
Kareuna seumayang jeueb-jeueb watee, bak ureueng seudee wajeb hana

Tapeulahe droeteu pungo, hansoe hiro seumayang gata
Teuma puasa pina ilah, ureueng leumoh wajeb hana
Tapeulahe droeteu saket, lom pih ciret ‘oh lhok mata
Teuma jakeuet pihna ilah, meungtan bijeh wajeb hana

Tapeulahe bek bri bijeh, ta ilah bek rugoe atra
Meungnyo bit han ek tabri bijeh, sabab ringkeh tan sapeue na
Meungnyo meunan nyankon ilah, bak Potallah han meureuka
Meungkon meunan peue tapeugah, mita ilah lheueh bak donya

Ngon Potallah bah tapeuhom, nyankeu kawom biek meureuka
Eu bak umong le meuriti, bijeh pade patot hana
Miseue leumo ka ek tabloe, patot taloe han ek tapeuna
Nyankeu ilah rot bek rugoe, ta peulheueh droe meung bak donya

Nyan muektamat kawoi nyang sah, kon ngon ilah ta peubeuna (r )
Di Haji jeuet cit tailah, wajeb dijih nyang kuasa
Tuboh teuga areuta pih le, kandran Jalo upah pihna
Meunan syarat wajeb Haji, tapeulahe tan kuasa

Takheun leumoh beulanja tan, lon jak ‘ohnan saket lam pha
Troih u laot muntah ak-uek, takheun mabok hana reuda
Hukom Haji soe nyang meunan, wajeb jihan meungkon teuga
Nyankeu Tuhan tan tapeubrat, nyang jeuet takarat sabab mulia

Nyankeu Haji hana tailah, sabab meugah lom got nama
Nyankeu Haji jen peuratee, asai dilee niet han beuna (r )
Nyankeu Haji iblih yue jak, keujih layak hana pahla
Pangkai habeh haji han sah, page balaih lam Nuraka

Lailaha illallah, Haji nyang sah beuta geuma (r )
Soe ek Haji niet ikheulah, kareuna Allah kon keu Donya
Haji neutueng dijih meuhat, di akhirat jeuet keu Raja
Bahkeu dumnan dihaba nyoe, karangan meuwoe bak Nyak Muda

(Cuplikan jiled 2 Nazam Akhbaron Na’im karangan Tgk DI Cucum halaman 24 – 28. Teungku Di Tucum alias Syekh Abdussamad alias Teungku Do alias Teungku Muda lahe di Mukim Lam Rabo, gampong Tucum, sinan maklum rumoh tangga. Kitab Akhbarul Na’im lheueh neu karang, 26 Muharram 1274 H )

*Bale Tambeh, 12 Haji 1437/ 12 Zul Hijjah 1437 H/13 – 14 September 2016 M, pkl 0955 wib.

-Gara-gara han teungeut wab seuuem-ngon dang-dang preh woe aneuk agam phon, beudoh darot poh 11 malam jak salen kitab nyoe sampe poh 12.15 trok bak bareh: “Sabab jakeuet ji seutot bijeh, kawoi saheh meunan haba”, baris-baris selanjutnya disalin di pagi besoknya. (T.A. Sakti ).

– Nadham ini pernah disenandungkan oleh Medya Hus pada acara “Cae Bak Jambo” ACEHTV Banda Aceh.