HIKAYAT NUBUET NABI

HIKAYAT NUBUET NABI

 

 

Mulayi  ulon salen Hikayat Neubut Nab nyoe, uroe Satu, poh 6.00 seupot bak *25 Molod Keuneulheueh 1437/25 Jumadil Awal 1437 H/5 Maret 2016 M. Lon pileh watee  nyoe lon  salen hikayat  nyoe kareuna ulon  tueng   2  seumpeuna:

1)  Teuka  Kafilah Like Molod dari Kec.Beutong, Nagan Raya geujak Meulike Molod bak Asrama Beutong, di  Rukoh Darussalam, Banda Aceh.  Darot 15 meunet goh poh nam seupot, rombongan katrok  ‘et Gunong Geureutee. Syekh Like Molod  Tgk Rusli Ulee Jalan. Meunan haba rot  HP neupeugahle Cut  Bang Pak Jamai Rumoh Teungoh nyang na  sajan  rombongan-kafilah lam muto nyan.

2)  Alhamdulillah, darot poh 11.30 Jum’at baroe, ulon kalheueh mendaftar yudisium ngon wisuda bak Pascasarjana UIN Ar-Raniry. Yudisium teuma bak  uroe  Seulanyan, 14 Maret 2016 dan wisuda bak Seunanyan, 21 Maret 2016

*Alih huruf dari Arab Melayu/Jawi-Jawoe ke aksara Latin
Oleh: T.A. Sakti

 

 

 

 

Empunya Surat

Cut Kandy

 

……………..

 

Beuseulamat donya  dan  akhirat

………………      beusijahtra

 

 

 

 

 

 

BISMILLAHIRRAHMANIRRAHIM

 

Wabihi nasta’in, Allah Ta’ala ‘azza wajalla

Ubak Allah lon lakee bantu, Tuhan ghafuru nyang muliya

Bismillah  poteu  lon kisah, nama Allah nyang muliya

Dudoe nibak nyan nama Rasulullah, dua Kalimah sajan seureuta

 

Nama Allah deungon Muhammad, duwa sangat nyang that mulia

Nyang phon Neu peujeuet Nur Muhammad, leungkap shamad Nur Saidina

Teulheueh nibak nyan sigala umat,  kareuna Muhammad nyang that muliya

Gohlom neu peujeuet sigala ‘alam, Nabi Adam pih gohlom na

 

Mantong didalam maklumat Tuhan, gohlom Neu peutron dalam donya

Yohnyan Neu peujeuet Nur Muhammad,  leungkap shamad  Nur Saidina

Kakeu na zat deungon sifat,  neubri pangkat deungon  agama

Yohnyan  neukeubah saboh teumpat, peurintah Hadharat Tuhan Nyang Asa

 

 

Mantong didalam maklumat Tuhan,  goh neu peutron dalam donya

Yohnyan Neu peujeuet ‘Arasy Kurusi, dumna Nabi nyang that muliya

Teuma Neu peujeuet Loh ngon Kalam, dum seukalian  Ciruga Neuraka

Teuma Neu peujeuet langet ngon bumoe, dumna asoe nyang lam donya

 

Teulheuh Neu peujeuet Nabi Adam,  nyang awai tron lam nanggroe donya

Sinan keu asai kafe Iseulam,  nibak Adam asai mula

Nyang keu Nabi nyang that awai, nibak asai Tuhan karonya

Sinan Neu peutron Nur Muhammad,  peurintah Hadharat Tuhan Nyang Asa

 

Padum natreb bak Nabi Adam,  meusalen yohnyan bak seuneh  muliya

Neu pinah sinan teuma ho laen,  peurintah Tuhan buet Rabbana

Padum zameun meusalen-salen,  suci seukalian teumpat mulia

Hingga troh bak Nabi Ibrahim, meusalen-salen Nubuet mulia

 

Meusalen sinan bak Nabi Ismail,  padum zameun treb ka lama

Dudoe nibak nyan bak Nabi Nyakkoeb, Meukuta Arab asai bangsa   muliya

Aduen ulon bak  na taturi, kheun Syafi’i   Arab bangsa

Neupinah sinan bak Nabi Yusuh, nyang that makruf taeu  rupa

 

Hingga meusalen troh bak cuco,  meusaho katroh bak Musa

Hingga troh bak ‘Isa Ruhullah, sinan neukeubah Nubuet mulia

Hingga troh bak Nabi Sulaiman,  troh bak Adnan nyang mulia

Hingga troh bak  Abdulmanah, sinan neupinah Nubuet mulia

 

Neupinah teuma ho laen, bak  Ibnu Hasyem nyang that mulia

Abdul Muthaleb tingkue Kandongan, peurintah Tuhan buet Rabbana

Padum na zameun bak Abdul Muthaleb,  padum natreb nyan dum lama

Neupinah  sinan bak ‘Abdullah, Poteu Allah nyang thee sibeuna

 

Sinan ka teutap Nubuet Nabi,  Tuhanku Rabbi nyang peulara

Sinan ka nyata jibeudoh trang, bukon bubarang bit that aula

Seulawet neukandong tuboh janjongan, han tatuban peucalitra

‘Ajayeb Subhanallah, tango lon peugah Nubuet mulia

 

Teuma lon kisah Nabi Muhammad, masa diriyeuek(zurriyat) gohlom nyata

Goh meusalen bak ‘Abdullah,  gohlom muminah tuboh mulia

Sinan ka nyata jibeudoh trang,  bukon bubarang indah rupa

Miseue buleuen teungoh reumbang, bukon bubarang limpah cahya

 

Hingga meugah jeueb-jeueb nanggroe,  that samlakoe bit that aula

Yohnyan meugah u nanggroe Cam,  keurajeun Sulaiman asai mula

Disinan na ureueng binoe, rupa sambinoe iloek rupa

Badan seudang that meubagoe,  hana sidroe nyang bandeng sa

 

Miseue buleuen teungoh punoh, manyen manyoh laku rupa

Ngon hareuta that barullah, lom meutamah hamba sahya

Lagi aneuk Uleebalang,  ureueng dampeng deungon raja

Fatimah Cam nama geurasi, rupa nari buleuen purnama

 

Tamse buleuen teungoh punoh, meunan seuneuleuk cahya muka

Lom that ‘alem Fatimah Cam, kitab jipham raya-raya

Yohmasa nyan  alem Taurit, Fatimah bit ka neubaca

Leumah jikalon dalam Taurit, Fatimah bit ka neubaca

 

Meunan leumah jeueb-jeueb kitab, Nabi Muhammad nyang peurtama

Cinta that leubeh Nabi akhe zaman, meunan neukalon lam kitab raya

Habeh neukalon jeueb-jeueb kitab,  Poteu Allah nyang peunyata

Sikati duablah laksa peuet ribee Nabi,  Muhammad Nabi nyang pangka Aula

 

Nyata ubak Tuan ‘Abdullah,  meunan leumah lam calitra

Yohnyan meugah Tuan ‘Abdullah, rupa indah hanatara

Lagi aneuk ‘Abdul Muthaleb, meunan sabet lam calitra

Yohmasa nyan Fatimah Syam ,  rindu deundam hate lam dada

 

Uroe malam gundah hate, hanpeue pike peubicara

Hate mabok bukon bubarang, meugeulumbang ngon ie mata

Bukon bubarang sangat rindu, keundak meujudo  ngon ureueng muda

Neukeundak meujudo ngon ‘Abdullah, di nanggroe Makkah ibu-bapa

 

Sabab nyang that neumeukeundak,  kareuna Nubuet disinan nyata

Kareuna Nubuet bak ‘Abdullah,  disinan leumah cahya muka

Nyankeu ureueng mat gunci Kakbah,  cahya seumuloh sigala donya

Di musyreb kon troh u meughreb,  meusyuhu sabeb hanatara

 

Yohnyan neuyue sidroe ureueng, neuyue jak pandang  u Makkah mulia

Neuyue jak pandang Tuwan ‘Abdullah,  nyo sabeb sah indah rupa

‘Ohsare troh u nanggroe Makkah,  ubak Ka’kbahle jihala

Meutumei sigra Tuan ‘Abdullah,  sangat indah cahya muka

 

Diyub langet diateueh bumoe, hana sidroe nyang bandeng rupa

Di mushyreb kon troh u meugrheb,  sunggoh sabet indah rupa

Sibarang ri gampong sibarang ri nanggroe,  hana sidroe nyang jroh rupa

Habeh jikalon dum neu pandang,  sangat trang mandrang  bulan purnama

 

Jroh that rupa sangat indah, jijak peugah jroh hana sa

Laju jiwoe u nanggroe Cam, teukeudi Tuhan trohle sigra

Teuma jipeugah bak Fatimah Cam, rupa naban buleuen purnama

Ban jideungo meunan peuneugah,  hate dahsyah bit that suka

 

Jibeudoh beureuhi Fatimah Syam,  hate didalam dawok beurcinta

Geunap uroe geunap malam, Neukeubah  lonkandong  neubuet mulia

Ya Ilahi Tuhanku Rabbi, Tuhanku neubri ban lon pinta

Pakrile jalan ulon peulaku, keundak meujudo ngon ureueng muda

 

Lon keundak meujudo ngon ‘Abdullah, dinanggroe Makkah ibu-bapa

Jinoe ulon keundak meukawen,  manyoh meucen Nubuet mulia

Bak siuroe habeh pike, habeh cawe hate lam dada

Teukeudirullah peurintah Tuhan, Fatimah Cam that meukira

 

Neubuka peutoe asoe neucok,  Fatimah Cam po areuta

Teuma neubukale ngon geudong, neucok pingan pakaiyan raja

Jicok dum nyang indah-indah, kayen Indulas musra  diwangga

Laen nibak nyan jeuneh alat,  han teurkhimat dum peukara

 

Jineh ganceng deungon peundeng,  laen lethat meuh peurmata

Padum-padum gleueng ngon subang, lagi incien han teurkira

Peurmata intan pudoe manikam,  meuribee ban taeu rupa

Meuh ngon pirak dum meuhalak, padum khulumbak gahru ceundana

 

Deungon hamparan dum kasturi, harom baruni bak komkomma

Fatimah Cam lethat alat, neu peudieng brat 40 unta

Yohnyan jibungka Fatimah Cam, jiba sajan hamba sahya

Troh sibuleuen nyangka neujak, piasan galak Makkah mulia

 

Padum lawet neucre nanggroe, trohle sampoe Makkah muliya

‘Ohsare troh u nanggroe Makkah, geupeudong khimah u luwa kuta

Neu peudong diluwa Kuta Makkah,  neupiyoh payah dum geurata

Geudeungoran nanggroe Makkah,  ureueng Syam geupeugah lethat teuka

 

Ureueng binoe Fatimah Syam,  seuntok Peureumpuan keunoe teuka h

Neu keundak meujudo ngon ‘Abdullah,  Poteu Allah thee sibeuna

Neume alat han teurkhimat,  meuh pile that han teukira

Peuet ploh unta neu peudieng brat,  neu keundak hajat keu muda bahlia

 

Ban neudeungo meunan peuneugah, Tuan ‘Abdullah hate suka

Meunyan seubab neujak meu’en, sangat ingen teungo calitra

Langkah neujak rab ngon khimah, deuh  leumah jroh that rupa

Rupa indah bukon bubarang, ban buleuen trang teungoh purnama

 

Fatimah Cam sangat rindu, neu eu laku hibat hantara

Lang geumilang bukon bubarang,  miseue buleuen trang teungoh purnama

Neu eu cahya Nubuet Nabi, hate beureuhi dalam dada

Neuyue jak tueng Tuwan ‘Abdullah, bak Mubacarah nyang panglima

 

‘Ohban neuyue Mubacarah, jijak pantah sigra-sigra

Sare meuteumei ngon ‘Abdullah, peutamong lam khimah ya Saidina

Fatimah Cam lakee langkah, Tuan ‘Abdullah hate suka

Ban neudeungo meunan peuneugah,  bak Fatimahle neuhala

 

Lalu neutamong dalam khimah,  geupeu indah hanatara

Yohnyan neuleung peurmadani, neuleueng Lahori indah rupa

Diateueh nyan neuleueng sukhuleut, nanyum h’at-h’ueut tapandang mata

Geuato kurusi diateuh nyan,  peurmata intan meulok-lok cahya

 

Nyoekeh tuempat keududukan, tamse seuneulek  dum peukara

Teuma neuyue duek Tuan ‘Abdullah, neuduek pantaih sigo di tika

Yohmasa nyan Fatimah Syam,  neu beuot makanan peuena neuba

Yohnyan geubri keu ‘Abdullah,  makanan manisan cati rasa

 

Neucok beebeewan na sigeutu, harom bawu nibak komkomma

Lheueh ‘Abdullah pajoh makanan, neu pinah idang pantah sigra

Teuma teubiet Tuan Fatimah,  neujak peuindah ureueng muda

Nejok ranub saboh karah, meuh meutatah dum peurmata

 

Neujak meuteumeung ngon ‘Abdullah, dendayang papah tuha muda

Nam tujoh droe diwie diunun, neujak meuteumeung pantah sigra

‘Ohsare lheueh geumeuteumeung, dum dendayang hate suka

Dumna dendayang jiduek   hadap, jihoreumat jipeumulia

 

Teuma marit sidroe inong, jaroe jiseuon ateueh jeumala

Tadeungo kamoe Tuwan  ‘Abdullah,  tango sipatah meucalitra

Sitroh langkah bak nanggroe nyoe,  dumna kamoe jak bak gata

Fatimah Cam neujak keunoe,  bak nanggroe nyoe neu peuteuk

 

Geucre gampong geutinggai nanggroe, dumna kamoe sajan neuba

Habeh meume meuh ngon pirak, han teukhimat meureutoh laksa

Laen nibak nyan dumna alat, han teurkhimat meuribee laksa

Geuganda geubri keu Abullah, meunan peuneugah lon deungo nyata

 

 

Keundak neugaseh Tuan ‘Abdullah, neu keundak meunikah deungon gata

Kareuna sabab rindu deundam, uroe malam hate suka

Makeusud Fatimah keundak meunikah, insya Allah ulon ridha

Teuma bacut nyang na salah, tajak peugah bak ayahnda

 

Intu kamoe Nabi Ibrahim, kawom nyang karim asai mula

Nabi Ismail Nek dikamoe, tango jinoe ulon calitra

Beurang kakri buet deungon ijazah, nibak ayah deungon bunda

Ulon meutanggoh meusijameung, lon jak tanyong bak ayahnda

 

Cit patot meunan Tuan  Abdullah, hana salah ban kheun gata

Tuwan ‘Abdullah laju neuwoe,  neulakee droe ureueng muda

Neulakee droe bak Fatimah Cam,  neuwoe yohnyan u rumoh tangga

Tuan Aminah  lalu neuheut droe,  yohnyan neu meungui hanatara

 

Neungui pakaian ngon  beebeewan, hana lawan indah rupa

Yohnyan neupadan Tuan ‘Abdullah, Tuan Aminah hate suka

‘Asyek beurahi Tuan ‘Abdullah,  lalu  neu peurab bertemu dua

Droebit   ngon teukeudirullah, yohnyan Aminah teuma beurcahya

 

Neupinah bak rahim Tuan Aminah,  keunan neukeubah Nubuet mulia

Yohmasa nyan Tuan ‘Abdullah, lalu meuubah wareuna muka

Miseue buleuen teungoh awan toep,  leungkap   seupot padam cahya

Kareuna Nubuet ka meuminah, Tuan Aminah teuma beurcahya

 

Miseue buleuen  trang bukon bubarang,  lang geumilang limpah cahya

Teutap disinan Tuan Aminah,Tuan ‘Abdullah teuma takira

Teulheueh neumanoe Tuan ‘Abdullah, neu meulangkah ubak ayahnda

Bak ‘Abdul Muthaleb ‘Abdullah sampoe, neu peugah jinoe hajat pinta

 

Tango kamoe wahe ayah,  keundak peugah khaba rahsiya

Sidroe ureueng teuka keunoe, bak nanggroe nyoe he ayahnda

Ureueng binoe dinanggroe Cam, Fatimah Cam geuboeh nama

Jime hareuta meuh ngon pirak,  that meuhalak meureutoh laksa

 

Laen nibak nyan dumna alat, ji peudieng brat 40 unta

Keu suwami beujeuet kamoe, jibri sinaroe harta jiba

Teuma neu seuot “Abdul Muthaleb,  neukheun narit jaweueb kata

Bak hate kamoe saleh han meukri,  saleh hanjeuetle keugata

 

Kricit narit Tuan  Abdullah,  ubak ayah lom neu meupinta

Neubri keu idin wahe ayah, lon meunikah ngon ureueng muda

Adat meunan wahe ‘Abdullah,  ban peurintah nyan kuridha

Yohnyan neu peukeue Tuan ‘Abdullah, bak Fatimahle neuhala

 

Uluwa kuta katroh neu langkah, lalu meugah bak ureueng teuka

Tuan ‘Abdullah katroh geuwoe, bak uroe nyoe ubak gata

Fatiah Cam  teumanyong reujang, bak ureueng nyan peugah haba

Pakri rupa Tuan ‘Abdullah, hana ubah rupa nyangka

 

 

Jaweueb  ureueng nyang seumeugah,  Tuan ‘Abdullah hanale cahya

Ban neudeungo narit meunan,  beurtangisan hanatara

Fatimah Syam geupoh-poh droe, ri  geumanoe ngon ie mata

Geupoh-poh droe bukon bubarang,  rasa hilang teubiet nyawa

 

Wahe  ayah  kupaban bah,  hana tuwah aneuk digata

Kureueng untong hana Allah bri, lon that keuji diateueh donya

Nyang lon keundak hana lon teumei, peue untong kee meuraba-raba

Hanale nafsu Tuan ‘Abdullah, hanale tuah lon ateueh donya

 

Meunye citna   Tuan ‘Abdullah, bekle talangkah keunoe gata

Kareuna hanale lon meujudo,  hanale nafsu lon bak gata

Kareuna hanle nyang nafsu kamoe, jak udeh tawoe u rumoh tangga

Ban nafsu kamoe ka taubah, hanale gaseh ulon bak gata

 

Tuan ‘Abdullah ngon ka neumoe, lalu neuwoe duka cita

Tuan ‘Abdullah sangat malee, khaba dilee bak ayahnda

Teutap Fatimah neu beurangkat, ‘Abdullah teutap bak ayahnda

Teuma lheueh nyan Fatimah Cam, neuwoele yohnyan ngon balatantra

 

‘Oh sare troh u nanggroe, seudeukah neubri faki  ulama

Jikhanduri jibri seudeukah, areuta barullah Fatimah bawa

Hareuta hajat keu ‘Abdullah, jibri seudeukah dum barang na

Geusie ngon kibaih nam tujoh ploh, Tuan Fatimah neu meukeurija

 

Teulheueh khanduri Fatimah Cam,  teutap yohnyan dirumoh tangga

Tuan ‘Abdullah jinoe lon peugah, haba Fatimah sepdum nyangka

Teutap dirumoh Tuan ‘Abdullah, jinoe Aminah ulon calitra

Umu lhee buleuen mume  Aminah, Tuan ‘Abdullah dang kira-kira

 

Kri cit narit Tuan Abdul Muthaleb,  neukheun narit bak aneuknda

Taleungo kamoe he Abdullah,  kareuna Aminah hamel  jika

Tajak gata u nanggroe Sirbi, tamita ubat jeura haliya

Tamita makanan kureuma zabet, jeuneh ruti gandom  keutila

 

‘Oh neudeungo narit ayah, Tuan Abdullah bungka sigra

Ngon lasyeuka tujoh beurjalan, seureuta sajan muda bahlia

Padum-padum perjalanan,  sampoe tuan ho neuhala

Keundak Allah khalikol alam, Tuan  Abdullah hilang nyawa

 

Habeh raseuki Tuan Abdullah, tinggai Aminah dirumoh tangga

Teuma geutanomle disinan,  kubu janjongan nyang mulia

Geupuwoe haba u nanggroe Makkah, ubak ayah deungon bunda

Geupeugah hanale Tuan Abdullah,  Tuan Aminah duka cita

 

‘Abdul Muthaleb pihka neumoe, ri geumanoe ngon ie mata

Lom saudara lam dukaan, that geusosah jiboeh rasa

Tuan Abbas pika neumoe, saudara sinaroe dukacita

Tuan Hamzah ngon Abi Thaleb,neumoe meureb-reb  ngon ie mata

 

Geubri seudeukah ngon khanduri,  geunap hari dum saudara

Teuduek haba Tuan Abdullah, Tuan Aminah jinoe takira

Tuan Aminah lam dukaan,  geunap bulan tron ie mata

Neubri seudeukah ngon khanduri,  geunap hari  neulakee do’a

 

Neulakee do’a keu ‘Abdullah,  keundak Allah nyang that mulia

Neu keumeung jak kunjong kubu Abdullah,  kareuna susah budak gohlom na

Padum lawet geunap buleun,  teukeudi Tuhan budak gohlom na

Duablah buleuen Rabiul Awai, malam Seunanyan pada thon Ha

 

Yohmasa nyan budak keuluwa,  habeh meugeumpa sigala donya

Di musyreb kon troh u meughreb,  troh u langet habeh gabra

‘Arasy Kurusi Loh ngon Kalam,  dum seukalian suka cita

Yohnyan habeh meungucap teuseubeh,  meugeurupoh sare gubra

 

Pinto langet tujoh lapeh, bandum habeh ka teubuka

Budiadari nyang dilanget,  leungkap shamad dum simua

Raja Nasrun yohnyan mate,  keundak Rabbi neu peunyata

Nyankeu raja nanggroe kafe,  that bit jahe raja raya

 

Meuligoe jidum habeh runtoh,  habeh reuloh ngon astana

Deungon raja pika mate,  hana soele seumah beurahla

Meunan teukeudi Tuhan Hadlarat,  sabab Muhammad nyang that mulia

Dalam Kakbah beurahla patong, panteng panteung ban sineuna

 

Patah lihe tinggai badan, meunan  lagee  sagala  donya

Ureueng  binoe  hamel sajan,  peuetploh inong diateueh donya

Keuluwa sajan ban 40 droe,  ureueng lakoe ban siseun na

Geuboh ngon nan bandum Ahmad, kheundak Hadlarat Tuhan Asa

 

Ban 40 droe sahbat Nabi,  dudoe jadi   ‘oh jeuet  raya

Meunan keundak Tuhan sidroe,  meutuah dudoe disinan nyata

(Buket Tursina pika beukah, teukeuirullah  tilek deesya)

Nabek susah malaikat,  bak Hadlarat Tuhan Nyang Asa

 

Ya Tuhanku Po dikamoe, meungadu droe nibak gata

Dumna kamoe hantroh ‘ileumei,  geutanyoe peue barang keureuja

Lahe baten awai akhe,  habeh lahe ubak gata

‘Arasy Kurusi Loh ngon Qalam, dum meuguncang peue kareuna

 

Pinto langet tujoh lapeh,  teubuka habeh peue kareuna

Peue alamat wa Ya Rabbi,  peue keundak bri  uleh gata

Tron fireuman nibak Tuhan,  Malaikat deungo sibarang na

Ka deungo he Malaikat, panghulee umat kupeunyata

 

Meusyuhu  Umat geunaseh kamoe,  goh leumah jinoe ulam donya

Ya Tuhanku toh geunaseh Rabbi,  jinoe tabri Ya Rabbana

Firman Tuhan bak Malaikat, Tuhan Hadlarat neu meusabda

Ka deungo he Malaikat,  leungkap shamad dum barang na

 

Nyoekeu Nabi  Muhammad, panghulee umat dum barang na

Jak kapandang ateueh ‘Arasy, ka tilek bak deueh  dum rata

Lalu ji pandang dum Malaikat,  leumah seunurat nyang that mulia

Lailahaillallah Muhammadurrasulullah,  meunan leumah Allah peunyata

 

Nyan ku gaseh Nabi Muhammad,  na meusapat Haq Ta’ala

Ku peutron teuma nyan u bumoe,  bak malam nyoe u dalam donya

Teumpat lahe di nanggroe Makkah,  meunan peurintah Tuhan nyang Esa

Tadeungo he dum Malaikat,  jak kunjong Muhammad u dalam donya

 

 

Asoe ‘Arasy asoe Kurusi, jak bak Nabi nyang that mulia

Malaikat tron tujoh ribee, nyang panghulee dum barang na

Bak sidroe-droe jitron pahlawan,  70 ribee pasukan jiba

Laen nibak nyan han teukhimat, asoe langet tron u donya

 

Malaikat bak 7 lapeh langet,  bandum jijak bak Saidina

Jijak kunjong Nabi Muhammad, asoe langet ban sineuna

Meunan lagi deungon mukjizat, bak Muhammad neu peunyata

Na 400 mukjizat neu peutron sinan, bak malam nyan uleh Rabbana

 

Tron bak Tuan Siti Aminah,  lalu leumah saboh cahya

Teuka awan tron dilanget, keunan leugat laju cahya

Lalu teuka berpasukan,ngon bunyian han teukira

Dum bunyian that ‘adhimah, Tuan Aminah suka cita

 

Galak pithat teumakot hansoe, hantom meunoe neu eu rupa

Bak ureueng laen hana leumah,  bak Aminah nyang na nyata

Hana? Sidroe yohnyan Malaikat, ureueng lethat sajan seureuta

Meung Aminah nyang na tuban, peurintah Tuhan ‘aza wajalla

 

Saboh riwayat meunan seubutan,  adoe aduen sajan seureuta

Dumna kawom pidi sinan,  bak Aminah sajan dumna

Teuma teuseubut saboh riwayat, hana mupakat bak bicara

Tuan Aminah sidroe dirumoh, laen hanasoe manusia

 

Hana sidroe ureueng laen, Aminah yohnyan dirumoh tangga

Neu eu awan lethat bangon, han tatuban peucalitra

Dalam awan nyan Malaikat, barullah that hanatara

Ngon suara amat sangat, yue minah rakyat umat lam donya

 

Meutron deungon peurintah Allah, meujak kunjong Neubuet u donya

Ban neu deungo narit Malaikat, sangat hibat ngon suara

Tuan Aminah sidroe dirumoh, laen han saboh manusia

Tuan Aminah teumakot hansoe, kareuna hibat deungo suara

 

Lalu neu beudoh pantah rujang, Amiah pasangle peulita

Panyot pilheueh neu pasang sudah, neu eu leumah Malaikat teuka

Yohnyan neukalon angen awan, meuribee ban bangon rupa

Malaikat tron bak Aminah, peunoh rumoh han sapat bla

 

Yohmasa nyan Malakat, neume alat  dalam jaroenya

Lalu jileueng  deungon hamparan, meuribee ban tangieng  rupa

Bee jiharom nibak kheuleumbak, teumpat Ahmad nyang that mulia

Lalu jiba ie Kalkausar, ngon peumanoe Ahmad muda

 

Bee jiharom bukon bubarang,  hana lawan diateueh donya

Malaikat han teurkhimat,  neujak mat budak baro na

Ladom Malaikat com gaki Nabi,  dum jisare meunan keureuja

Malaikat comle pusat Nabi, Aminah lihat meunan keureuja

 

Ladom bak jaroe ladom bak ulee,  meunan  lagee ji peumulia

Yohnyan hireuen  Siti  Aminah,  jieu peurintah Malaikat dumna

Malaikat meubagoe-bagoe, meuribee syoe ladom rupa

Laen nibak nyan han teupeugah, lethat ulah lagee rupa

 

Yohnyan uroe pika siyang, Malaikat teureubang u andara

Tinggai Ahmad bak Aminah,  lalu leumah deungon cuaca

Yohmasa nyan lalu meugah, Tuan Aminah aneuk neukana

Lalu meugah bak Tuan Abdul Muthaleb,  budak lam pruet Tuhan peunyata

 

Nyankeu aneuk Tuan ‘Abdullah, mate tinggai bunda

Nyankeu cuco Tuan Abdul Muthaleb, that bit ajayeb indah rupa

Lang gumilang bukon bubarang,  ban buleuen trang teungoh purnama

‘Abdul Muthaleb neujak pantah, bak Aminah cuco neukana

 

Teungoh neujak bak Aminah, u jeuoh leumah meucahya-cahya

Ngon bebeewan  bukonbibarang,  hireuen neu pandang budak barona

Lalu neu tamong dalm rumoh,  cahya seumeuloh hanatara

Neu eu cuco that samlakoe, ban mata uroe seumeuloh cahya

 

Bibi dua nyan pi meugrak-grak,  Abdul Muthaleb galak eu rupa

Neu peurab geuliyueng ubak bibi,  neu peulahe peue jikata

Teubiet suara dalam mulot,  leumoh leumbot hana teuga

Meunoe suara Nabi Muhammad,  neu seubut keu umat nyang lam donya

 

Ummati ummati ‘amalal husaini , neu deungo menan teubiet suara

Lalu hireuen Abdul Muthaleb,  hantom aneuk miet meunan suara

Pihak leubeh deungon mukjizat, saleh Muhammad nyoeka nyata

Saleh nyoekeu Nabi akhe zameun, bak ri bangon lagee rupa!

 

 

Bak bicara Abdul Muthaleb,  cuco geusabeb that mulia

Tuhan peunyata bak uroe nyoe,  Ahmad sidroe geuboh nama

Saboh calitra jikheun Muhammad, Abdul Muthaleb nyang boeh nama

Meunankeu Tuan lam riwayat, maseng ‘ibarat bak ulama

 

Tuan  Aminah pidi sinan, that sukaan hanatara

Kricit narit Tuan Aminah, lalu neu peugah neu calitra

Neu peugah bak Abdul Muthaleb,  dumna rame deungo suara

Aneukku nyoe cit indah that, Malaikat dum peulahra

 

Malaikat tron dilanget,  han teurkhimat keunoe teuka

Ladom jime jeuneh pakaian, han sapeue tan lam syuruga

Malaikat tron meubagoe-bagoe, meuribee syoe sinoe rupa

Lalu hireuen Abdul Muthaleb,  dumna rakyat hate suka

 

Neu deungo caltra Tuan Aminah, teukeudirullah nyang peulara

Duaploh uroe keuluwa manyak,  Aminah jak kubu mulia

Neujak bak kubu Tuan Abdullah, sajan kafilah dum saudara

Nam uroe jak u nanggroe Syarbi, ngon Makkah bumoe mulia

 

Neujak kunjong kubu ‘Abdullah, Tuan Aminah deungon saudara

‘Ohsare troh ubak kubu,  duek meulingka tuha muda

Neubeuet do’ale Teungku  Ciyah,  lingka kubu maha mulia

Tuan Aminah beurtangisan, lalu pansan  sikutika

 

Padum uroe treb disinan,  Abdul Muthaleb sajan seureuta

Teukeudirullah keu Tuan Aminah,  habeh langkah diateueh donya

 

Tuan Aminah teupangge rahmat,  ngadap akhirat tinggai donya

Abdul Muthaleb that dukaan,  yohmasa nyan meugrak rasa

 

Muka? Rakyat bukon bubarang,  that dukaan hanatara

Lalu neumoe Abdul Muthaleb,  neumoe meureb-reb  deungon ie mata

 

Wahe cuco kupaban bah, mate ayah deungon bunda

Ahmad neucok neupasoe lam lumueng,  bukon bubarang sangat duka

Geucok laju geupumanoe,  aduen adoe dum seureuta

Bandum rakyat beurtangisan,  han meuban-ban tron  ie mata

 

Teulheueh geupumanoe geupeugafan,  pasoe yohnyan dalam keureunda

Neume geuputron ngon jeunazah, rab ‘Abdullah  kubu dua

Geutanom dilikot Tuan ‘Abdullah,  Tuan Aminah nyang that mulia

Teulheueh geutanom Tuan Aminah,  Teungku Ciyah lakee do’a

 

Abdul Muthaleb bri seudeukah,  barang nyang mudah Allah karonya

Neu muwoe dum u nanggroe, maseng woe dum u tangga

Abdul Muthaleb neuwoe u rumoh,keu Tuan Aminah neulakee do’a

Habeh neuwoe dum u teumpat, nibak jeurat nyang mulia

 

Lalu neu puwoele ngon manyak,  Abdul Muthaleb rusak  hate lam dada

Kakeu geuwoe nanggroe Syarabi,  troh meuhatle u Makkah mulia

Ahmad pitroh nyan geupuwoe,  sirang neumoe ngon ie mata

Wahe cuco tangke hate,  ayah tanle deungon bunda

 

 

Sinan droe peuetploh uroe,  troh u nanggroe Makkah mulia

Abdul Muthaleb neumueng sinyak,  Tuhan Hadlarat nyang peulahra

Padum lawet dalam susah,  toh pakribah cuco raja

Pakri keuban ku peutimang,  sabab tan nang susu tanna

 

Tamita ureueng nyang meulaku,  jibri susu Ahmad muda

Soena Tuan tem meupayah,  kubri upah nyan digata

Yohnyan geubrile ngon susu,  neuhapiet ulee keumala donya

Neubri susu nyankeu Ahmad,  kheundak Hadlarat han neuridla

 

Ka neu kucoeple ngon bibi, ka teukeudi Tuhan Nyang Asa

‘Oh hanjeuet nyan neubri laen,  maken han neutem hana  neu ridla

Han neukabui pi meusidroe,  sigala nanggroe ureueng teuka

Ureueng peumom meulaksa laksin,  maken han neutem neupet ngon mata

 

Nyum that gundah Abdon Muthaleb, geumoe meureb-reb deungon ie mata

Wahe Ahmad pakri ku ilah, toh pakri bah jeuet kudaya

Nyang na neuphiep  ibutangan, teubiet disinan niekmat  Ciruga

Padumna di sinan lazat, lethat niekmat Tuhan karonya

 

Ladom jikheun siteungoh rakyat, jikheun Ahmad tan bahgiya

Kareuna sabab jitulak nangmbah,  lom meutamah mate bunda

Meunan jikheun siteungoh rakyat,  hana meuhat nyan jikata

Abdul Muthaleb gundah sangat,  kareuna Ahmad susu jihana

 

 

Hana neupajoh nyang laen susu,  hana meulaku bak geukira

Kadang-kadang hanpeue harap,  peurintah Hadlarat hantroh juga

Yohnyan gundah bukon bubarang,  tamong ileuham dalam dada

Droe cit kangon teukeudirullah, Poteu Allah nyang peunyata

 

Lheueh nyan geukheun ubak kawom, ureung nyang peumom taseuraya

Tamita ureueng nyang hana meuaneuk, nyang dlahet that diateueh donya

Cucoku nyoe ureueng teuleubeh,  susu nyang han teupeh babah dumna

Hana neuridla nyan bumeunan, tamita tuan dipat nyang na

 

Nyang na meunan Tuan Halimah,  susu ji siblah lagi ka tuha

Pat bunanggroe ureueng binoe nyan,  dipat tuan rumoh tangga

Nama nanggroe nyan Banu Sakdiah, meunan peuneugah kudeungo nyata

Hana that jarak nanggroe Sakdiah,  deungon Makkah bumoe mulia

 

Limong ploh uroe peurjalanan,  hingga keunan bak ureueng tuha

‘Adat meunan dumna gata, ku seuraya  jaktueng sigra

Laju geujak u nanggroe Sakdiah,  bak Halimahle geuhala

Padum uroe peurjalanan, meuteumei dijalan Halimah muda

 

‘Oh geujak meuteumeung bak ret, neukheun narit sigra-sigra

He Halimah lon kheun jinoe,  tango kamoe kheun bak gata

Sidroe aneukmiet dinanggroe Makkah,  keumeung peuupah ubak gata

Geuyue peumom bak gata susu, peu taboeh dum dudoe geubri keu gata

 

Ban neudeungo meunan peuneugah,  han sipatah neubri dawa

Droe cit kangon teukeudirullah,  neujak yohnyan ureueng tuha

Teuma geugiduek unta nyang syik,  masa nyan get puteh safa

Padum uroe Halimah neujak,  trohle leugat Makkah mulia

 

Troh Halimah u nanggroe Makkah,  neu tamong pantah ureueng tuha

Abdo Muthaleb pi disinan, horeumat yohnyan neubri mulia

Na sijameung neuduek disinan, neu peugah yohnyan pantah sigra

Beuhabeh tadeungo narit kamoe, cuco kunyoe tapeulara

 

Tabri susu nyan keu Ahmad,  laen lethat han jiridla

Ureueng binoe laen ka meuribee, han sidroe mei bak Ahmad muda

Saleh na untong neubrile Tuhan,  bak gata taulan jitem ridla

Teuma seuot Tuan Halimah,  lalu neu peugah neucalitra

 

Nyoe beu neu kheun Abdol Muthaleb, kamoe la’eh maken tuha

Lontuan saleh raya salah, teukeudirullah ie pi  Hana

Tango lon kheun ya Halimah, kuasa Allah hantroh jiduga

Cit yoh lam ileumei Tuhan,  gata tuan nyang peulara

 

Yang laen bandum han jipajoh, jinoe susu roh ubak gata

Bak lon deungo Nyoe pi meunan,  yohmasa nyan hana dawa

Manyak neucokle neu julang,  puduek lam lumueng Ahmad muda

Droe cit kangon teukeudirullah, Tuan Halimah susu kadua

 

Mom nyang buta Ahmad  cucui, lalu teubiet ban ie nira

Deungon muekjizat Nabi Muhammad,  ie nyan lethat mameh rasa

Mangatkeu hate Abdul Muthaleb, nibak Ahmad susu kana

Yohnyan keuphon hanle gundah,  Tuan Halimah pika muda

 

Naban umu namblah tahon, bak ri bangon laku rupa

Lon ngon tuboh puteh kuneng,  ngon kilat mieng buleuen purnama

Deungon urat taeu hijo,  indah laku hanatara

Bee pi harom hana lawan,  lagee padan gahru ceundana

 

Sang-sang putroe peurumoh Solutan,  neuduek yohnyan deungon cahya

Deungon beureukat nibak Ahmad,  rupa neuget hanatara

Sabab neubri ie susu keu Nabi,  kangon teukeudi Allah Ta’ala

Ka Tuhan bri meunan tuwah,  yohnyan Halimah pi ka muda

 

Abdo Muthaleb hate mangat,  hudep Ahmad bak neukira

Yohnya uroe pika peutang,  neu keumeung riwang Halimah muda

Abdo Muthaleb pi disinan, yohmasa nyan neu meukira

Yohnyan neutuka unta nyan syik,  kheundak bri nyang get keu ureueng muda

 

Tuan Halimah hana neukabui,  bahle areuta lon po meukuta

Yohnyan neuwoe  Tuan Halimah,  teukeudirullah Tuhan Nyang Asa

Unta saboh kajeuet banyak,  kheundah Hadlarat Tuhan Nyang Asa

Deungon mukjizat nibak Ahmad,  meusyuhu that diateueh donya

 

Na umu sithon Tuan Halimah,  teutap dirumoh deungon aneuknda

Unta pile ji meuaneuk, sabab mukjizat Ahmad muda

Rakyat hireuen jieu Ahmad,  deungon mukjizat leumah nyata

Di mushreb kon troh u meughreb,  meusyuhu sabeb diateueh donya

 

 

Lalu meugah u nanggroe Meuliran,  Panghulee Makkah cuco neukana

Nyankeu cuco Abdo Muthaleb,  lahe muekjizt  diateueh donya

Teuma meugah bak Jamurul Hakim,  baklaku? Jameun ka tanle mata

Yohnyan  neupeugah bak aneuk cuco,  dum meusaho dengo nyata

 

Taintat keulon bak Abdul Muthaleb,  meunan narit ureueng tuha

Taba keudeh u nanggroe Makkah, tanoh leubeh diateueh donya

Teuma jitanyong pakon meujak intat,  peue na hajat gata nyang raya

Janji kamoe citka dilee, hana sidroe thee dalam rahsia

 

Raja Basiron culek mata kee,  diprang Nanggroe kafe mereuka

Agama kuikot jih kujajah, sabab nyan sah jiculek mata

‘Oh jiculek mata kunyoe, Tuhan sidroe bri rahsia

Aneuk ‘Abdullah cuco Abdul Muthaleb, nyankeu  Muhammad  nyang that mulia

 

Nyankeu  jinoe ulon u Makkah,  meunan peuneugah ureueng tuha

Ubak Ahmad aneuk ‘Abdullah, Poteu Allah nyang peunyata

Mata  kunyoe  ji peuubat,  guna muekjizat disinan nyata

Droe cit kangon teukeudi Tuhan,  mukjizat Ahmad meuwoe mata

 

Ban jidungo neukheun meunan,  ji intat yohnyan laju sigra

Jijak intat bak Abdul Muthaleb, bak Ahmad aneukmiet muda

‘Ohsare troh u nanggroe Mekkah, lalu meugah bak ureueng teuka

Bak Abdul Muthaleb trohle sampoe,  rakyat sinaroe sajan seureuta

 

Tuanteu Abbas pi disinan,  yohmasa nyan suka cita

Jamurul Hakim geupumanoe,  geuuet asoe pat nyang leuta

Limau gepeukruet geupeubeudak,  geuboeh kheuleumbak gahru cendana

Jamurul Hakim lheueh pumanoe,  teuma dudoe neu marit sigra

 

 

He Abdul Muthaleb tango kamoe, peutamong jinoe lon bak Ahmad muda

Ahmad geuba bak pinto Kakbah,  sinan geukeubah muda bahlia

Jamurul Hakim tundok ulee,  meunan lagee meuubat mata

Yohnyan geucok gaki Ahmad,  neupeulop meuhat bak mata buta

 

Droe cit kangon peurintah Tuhan,  lahe mukjizat Ahmad muda

Mata nyang buta ka meugantoe,  ngon samlakoe hanatara

Naban aneuk umu 14 thon,  meunan bangon lagee rupa

Meunan muekjizat nibak Ahmad,  dumna umat suka cita

 

Rakyat pandang seukalian,  bandum hireuen tuha muda

Abdul Muthaleb  neupuwoe Ahmad, laju u teumpat u rumoh tangga

Jamurul Hakim neulakee droe, neuwoe u nanggroe dum barangna

Abdul Muthaleb lale ngon cuco, Ahmad sidroe Tuhan peulara

 

Dawok lale deungon Ahmad,  aneuk miet cut peugawe donya

Hana geupadoli keu piasan,  gaseh tuan keu Ahmad muda

Padum lawet dudoe nibak nyan,  teukeudi Tuhan Poteu Nyang  Asa

Ho siuroe laen simalam bukon,  bak ri bangon maken raya

 

Bak sibuleuen bak sibuleuen, Ahmad neukalon laen bicara

Ubak sithon ubak sithon,  indah bangon laku rupa

Teukeudirullah peurintah Tuhan,  Abdul Muthaleb saket neurasa

Yohmasa nyan Abdul Muthaleb, geumoe meureb-reb deungon ie mata

 

 

Sabab gaseh nyan keu Ahmad,  kamoe saket hansoe peulara

Adat mate ulon nyoe sidroe, saleh hansoe peulara gata

Yohnyan neumoe bukon bubarang,  basah ngon mieng neu bandua

Wahe aneuk cuco boh hate, saleh pakri untong digata

 

Ayah bunda teuka mate, saleh hansoele peulara gata

Sangat neumoe yohmasa nyan,  ‘Abbas keunan hadle teuka

Pakon neumoe wahe ayah, cuba peugah pakon duka

Peue tatakot peue tagundah,  cuba peugah bak aneuknda

 

Hana kutakot hana kugundah, peue kupeugah aneuk bak gata

Hana kutakot aneuk keumate, adat jinoele pi kuridla

Sabab kamoe taeu gundah, Ahmad saboh hansoe peulara

Tabri bak kamoe wahe ayah, insya Allah ulon peulara

 

Kricit narit Abdul Muthaleb,  hana jeuet aneuk gata peulara

Kareuna gata ureueng peurniagaan, Ahmad hanjan gata peulara

Gata lale bak tameukat, tinggai Ahmad hansoe peulahra

Kricit narit Mama Hamzah, phalawan meugah that mulia

 

Neubri bak kamoe wahe ayah,  kamoe peurintah meupeulahra

Tango kamoe wahe Hamzah, phalawan meugah hanjeuet bak gata

Gata pahlawan Uleebalang,  pat nyang na prang ka tajak gata

Kareuna gata that amarah,  patna musoh taprang lanja

 

Hana ulon bri bak gata cuco,  hanjan tahiro aneuk gata

Abi Thaleb peu-ek seumbah, ubak ayah neu meupinta

Tabri bak ulon wahe ayah,  peulara Allah Ahmad muda

Kareuna Allah wahe ayah, bekle gundah duka cita

 

Yohmasa nyan geubri keu Abi Thaleb, kubri sabeb cucoku bak gata

Tango kamoe he Abi Thaleb, kubri Ahmad gata peulara

Kareuna gata that geumaseh, lagi leubeh that gata peulara

Gata tagaseh keu aneuk piyatu, meunan laku dilee nyangka

 

Peue dikeundak uleh Ahmad, tapeutroh hajat uleh gata

Peue nyang hajat beuta turot,  cuco kunyoe meubahgia

Ahmad geupuwoe bak Abi Thaleb,  kheundak Hadlarat nyang peulara

Ahmad teutap bak Abi Thaleb,  yakin sabab neu peulara

 

Padum uroe lheueh nibak nyan,  teukeudi Tuhan katroh masa

Yohnyan mate  Abdul Muthaleb, tinggai Ahmad ubak Mama

Tinggai Ahmad bak Abi Thaleb, sinan rayek neu peulahra

Teuma dudoe lheueh geutanom,  dumna kawom lakee do’a

 

Tuan ‘Abbas phon khanduri, geunap hari neulakee do’a

Tuan Abas bri seudeukah, sigala syiah ngon ulama

Tuan Hamzah dudoe khanduri,  deumikian lagi dum saudara

Padum lawet nyan bumeunan,  troh ubak thon laen pula

 

 

‘Ohlheueh mate Abdul Muthaleb, padum na treb jeuoh masa

Nibak Ahmad teuka aneukmiet,  bandum aneukmiet silayeue na

Teuka aneukmiet nyang na sajan,  40 aneuk nyan nyang sigo na

Sigo nyata ngon Muhammad yatim,  malam seunanyan pada thon ha

 

Jeuet keu taulan deungon Nabi  Muhammad, nibak sahbat mula pertama

Hana sidroe pi nyang na cre, meunan teukeudi Allah Ta’ala

Uroe malam pi hantom cre,  teumpat hase Tuhan karonya

Bak siuroe teukeudi Allah,  dilakee langkah Muhammad muda

 

Yohnyan jimaba oleh rakan,  jime tuan bak ayahnda

Wahe Ahmad tadeungo kamoe, ta meulangkah jinoe ubak ayahnda

Tajak  pajoh buah-buahan,  jineh makanan zabet  kurma

Ubak ayah kalon lakee idin, kamoe bandum ireng gata

 

Tajak pajoh buah-buahan,  jineh makanan zabet kureuma

Inca Allah wahe rakan,  lon jak peugah dilee bak Mama

Wahe Mama lon peugah  jinoe,  neubri izin lon rakan maba

Yohnyan neu kheunle rijang-rijang, neubrile yohnyan hana dawa

 

Abi Thaleb ngon ‘Atikah, duek dirumoh ngon saudara

Neudeungo Ahmad lakee izin,  jak he kumuen sabe muda

Siploh diwie siploh diunun, dilikot pi meunan  hadapannya

Meunan teukeudi nibak Allah, ji tupeue peuindah keumala donya

 

Nyankeu rakan aneukmiet cut-cut,  santeut santeut siseun nyata

Manyang Ahmad siteungoh baho, meunan laku Allah peunyata

Lalu bungka Ahmad yohnyan,  dumna rakan sajan seureuta

Teuma teuka awan mupayong,  ji peutudong keumala donya

 

Padok uroe padok ujeuen, bungka yohnyan Muhammad muda

Padum-padum ngon pakaian, karonya Tuhan Allah Ta’ala

Suka jipandang Ahmad muda,  that samlakoe hanatara

Dum aneukmiet suka jipandang,  sira meu’en muda  bahlia

 

Ladom deumpek ladom surak, aneukmiet galak meusuka-suka

Lalu jijak bak ulee gampong,  ret lam jurong ureueng tuha

Nyankeu aneuk raja Makkah,  nyan bahrullah diateueh donya

Sare leupah nibak jurong, troh u gampong bak ayahnda

 

Lalu jitamong dalam keubon,  jieu buahan dum barang na

Jipot kureuma deungon zabet,  jibri keu Ahmad dum barang na

Jipot boh kayee han teurkhimat, ri nyang mangat boh deulima

Yohnyan jipajoh buah-buahan,  meugah yohnyan bak ureueng kaya

 

Yohnyan meugah bak  Abu Jeuhai, ureueng beubai tan agama

Meugah Ahmad jijak ret jurong,  aneukmiet saban dum barangna

Peuetploh aneukmiet jijak sajan, aneukmiet nyan sama-sama

Ban jideungo narit meunan, beungeh yohnyan hu ngon mata

 

Yohnyan beungeh ubak aneukmiet, hana jiniet kamoe tuha

Pakri jijak ret lam jurong,  jayeh jithat (keu) kamoe tuha

Hana jipike keu ureueng meugah, kareuna jih  sah ureueng hina

Jijak ret nyoe ji meusurak,  hana layak ji meusubra

 

Kareuna jih ureueng gasien,  aneuk yatim duek bak Mama

Hanthee keudroe Muhammad Yatim,  kamoe Sulotan ji peuhina

Yohnyan jikheun ubak kawom, tadeungo bandum gata ban nyang na

Adat jiwoe nyan keunoe ret,  beuhabeh taseupot tapeurata

 

Beuhabeh tapoh kawom Muhammad,  supaya jiingat droe jihina

Supaya jithee lon ureueng meugah,  jih tan nangmbah duek bak Mama

Kamoe meugah bak nanggroe nyoe, mangat jithee meungka tapeujra

Teuma jideungole ureueng sidroe,  sayang hansoe keu Ahmad muda

 

Sayang jih that keu Ahmad sidroe, jijak peugah proe bak Ambiya

Droe chiet kangon teukeudirullah, jijak peugah sigra-sigra

Ureueng nyan kawom Abu Juhai,  harap tawakai hana binasa

‘Ohsare troh ubak Ahmad,  jikheun leugat nyan rahsiya

 

Wahe Ahmad tango kamoe, meukheun jinoe ubak gata

Kudeungo narit Abu Jeuhai,  meunan akai jipoh gata

Adat jiwoe Ahmad ret nyoe, tapoh jinoe tapeurata

Oh watee jiwoe dum aneukmiet,  taseupot bak got tapeurata

 

Kareuna jijak rame-rame,  jipeujayeh  nama raja

Yohnyan Ahmad ka geuiem droe, hana sapeue neu meudakwa

Kareuna cit bandum rakan,  bandum taulan Muhammad muda

Pakon meunan Abu Juhai, han got akai ureueng tuha

 

 

Pakon jitham Muhammad sidroe,  dum geutanyoe keupeue cit guna

Ureueng laen jijak rot nyan, pakon han jitham dum beurata

Jiroe chit kangon teukeudi Allah, Tuhan peurintah aneukmiet muda

Yohnyan aneukmiet ji mufakat, jikheun bak Ahmad tanglong donya

 

Wahe Ahmad jakleh tawoe,  dumna kamoe keupeue cit guna

Tawoe jinoe ret jurong nyan,  nabek hinaan Muhammad muda

Bahkeu tawoe rot lam jurong,  ban nyang untong Tuhan karonya

Peue nyang kheundak ubak geutanyoe,  Ahmad sidroe hana meudawa

 

Patot   jipoh cit talawan, dumna rakan sajan seureta

Pakat pikeumah jime ngon alat, sikada dapat maseng rata

Yohnyan jiwoe ret lam jrong,  leumah jakalonle rakyat dumna

Yohnyan jikheunle Abu Jeuhai,  bekna sagai ngon soksangka

 

Ladom tasrom ladom tapoh, bek meusaboh tinggai nyang na

Bek tapeusee kawom Ahmad,  meuseuki patah ka peuluka

Meuseuki patah meuseuki mate,  dum beusare beksok sangka

Bek takira wahe kawom,  tamuprang mandum ngon Ahmad muda

 

‘Ohsare lheueh jikheun pakat, leumahle Ahmad nyangka teuka

Leumah angkatan kawom Ahmad,  dempek surak hanatara

Abu Jeuhai kalon kawom Ahmad,  jikheun bak ingat beksok sangka

Ulon bekna sinoe sajan,  bahle meuwoe kamoe tuha

 

Rakyat meuwoe dalam jurong,  neuwou u gampong ureueng tuha

Kakeu geucok dumna alat, kalon rakyat lam jurong raja

Yohnyan aneukmiet pika cakap, sajan Ahmad 40 seunjata

Cabeueng kayee dumna alat,  bube  oek peulupeuk kuruma

 

Ladom na bube inong gaki,  kayee geukoh  cabeung ceundana

Ladom jisurak ngon ji deumpek, ladom jilumpat hanatara

‘Ohsare meuteumeung dua pihak,  reuntak surak  sangat gabra

Masa nyan kawom Abu Jeuhai,  kayee batee dum jirata

 

Padum jisrom padum jipoh, hana saboh na binasa

Hana binasa kawom Ahmad,  aneukmiet cut Tuhan peulara

Jipoh ngon jisrom hana peujam,  hana keunong Malaikat publa

Jipoh aneukmiet keunong ateueh droe,  meunan keuproe tuha muda

 

Jisrom pi meunan  pi meuriwang, batee meuulang ubak muka

Darah meujoh-joh dalam babah,  that bit gundah ureueng tuha

Deungon beureukat nibak Ahmad,  lahe muekjizat Allah peunyata

Yohnyan  talo kawom Abu Jeuhai, habeh jiplueng ureueng tuha

 

Padum patah padum capiek,  kawom ureueng syik le binasa

Lalu jiplueng bak Abu Juhai,  aneukmiet huse ban sineuna

Yohnyan beungeh Abu Jeuhai,  pakon jihuse geutanyoe tuha

Yohmasa nyan jimupakat,  dumna rakyat dumna gata

 

Jiyue suroh  dumna kawom, jikheun ulon malee raya

Hana digob na dikamoe, aneukmiet use ureueng tuha

Jinoe pihak   saboh padan, dumna tuan bak habeh teuka

Adat na jijak teuma lom keunoe,  tapoh sinaroe tapeupahna

 

Jinoe bak get geutanyoe lawan,  lethat rakan ka binasa

Jih aneukmiet hana jithee, buet jaroe kee  ku peurasa

Abu Jeuhai jikheun meunan,  ‘oh jipreh jan Muhammad teuka

Jinoe taputalo Muhammad yatim,  bek seubutan asoe donya

 

Meunan jikheun Abu Juhai,  habeh jithee dum cut raya

Meunan jikheun dumna  kawom, Muhammad Yatim geuboh nama

Meunan jikheun Abu Jeuhai,  Ahmad neuwoe troh bak Mama

‘Ohsare troh bak Abi Thaleb, sajan aneukmiet dum barangna

 

Maka cit marit aneukmiet yohnyan,  nibak Ahmad nyan neukata

Tango kamoe wahe Ahmad,  kamoe sangat lapar dahaga

Dumna kawom Abu Juhai,  payah ta use ureueng tuha

Tabri makanan wahe Ahmad,  tabri niekmat kamoe dahaga

 

Yohnyan neulakee bak Abi Thaleb, niekmat neubri wahe Mama

Kareuna kamoe keulaparan,  dumna rakan kamoe dahaga

Yohnyan neujok dua boh ruti,  lalu neubri pantah sigra

Ruti dua boh ureueng 40,  padumna jipajoeh jibagi rata

 

Yohnyan jilakee lom ka neubri, dua ruti laen pula

Ruti peuet boh bacut sapo, ‘oh meusaho tan padumna

Lom jilakee ubak Ahmad,  neubri niekmat ke kamoe dumna

Kareuna kamoe gohlom keunyang,  payah muprang kamoe dahaga

 

 

Lom neulakee uleh Ahmad, nalom niekmat wahe Mama

Wahe Muhammad nyoe cit siblah, aneuklon keubah nyoe keugata

Bek takira Mama keu kamoe,  tabri keunoe  nyoe beusigra

Jinoe ruti nyoe cit siblah, pakri ilah toh bicara

 

Lom jilakee yohmasa nyan,  gohlom keunyang kamoe dahga

Ban neudeungo gohlom keunyang,  beurtangisan Ahmad muda

Yohnyan neumoe bukon bubarang, teuoh keu untong tan ayahnda

Adat na hudep ayah kamoe,  hana meunoe leumah papa

 

Wahe ayah kupaban bah,  kheundak Allah katroh masa

‘Ohjan geuteuoh nyan keu untong, meugeugulong ngon ie mata

Sampoh ie mata teusrieb ie idong,  teuoh keu untong sangat hina

Teuma neusampoh ubak kayee tho,  meunan laku Allah peunyata

 

Na sibak kayee sinan teudong,  bak kayee nyan neusampoh ie mata

Kayee katho kajeuet udep,  meunan lagee lahe nyata

Teukeudi Allah deungon mukjizat, kayee tho bak udep teuma

Teubiet tarok meugantoe pucok,  on pile that bak pi raya

 

Ngon beureukat ie mata Nabi, buah jadi masak dum rata

Boh pihle masak yohnyan,  mameh hanban cati rasa

Aneukmiet cut pajoh boh kayee,  ladat meuteuntee hanatara

Boh kayee nyan sangat ladat,  meutamah kuwat nibak nyangka

 

Yohnyan keunyang bandum sare,  mangat hate dum jirata

Lalu jimarit sabe keudroe-droe,  dumna geutanyoe that peurkasa

Sabab tapajoh boh kayee nyan,  mangat badan dum jirata

Adat meuteumei lom ngon lawan,  beurang kajan pi taridla

 

Ngon kheundak (Allah) beureukat Muhammad, beurang kapat pih tangaza

Abu Jeuhai nyang that beureuhi, ka teutahe han teukira

Sahbat 40 nyang kheun meunan,  beureukat janjongan Muhammad muda

Meuji  kalon kayee mate, teubiet pucokle meuboh sigra

 

Aneukmiet cut sajan Ahmad, hana saboh neu peucre dumna

Padum lawet cre  nibak nyan,  sapeue pitan na mumara

Teukeudi Allah bak siuroe,  teuka sidroe aneukmiet muda

Yohmasa nyan jijak bak Ahmad, jimaba Ahmad bak ayahnda

 

Tajak pajoh kureuma zabet,  soe(toh) nyang mangat boh deulima

Laen nibak nyan dum buahan,  jineh makanan gandom kutila

Hanpeue salah Ahmad seuot,  ulon ikot bankheun gata

Kareuna geutanyoe dum geunaseh,  inca Allah bek soksangka

 

Adat meunan wahe sahbat,  ulon jak peugah ubak Mama

Lalu neuwoe bak ‘Atikah,  geujak peugah ubak Mama

Wahe Mama tadeungo lonkheun, kamoe tuan rakan maba

Hanpeue salah wahe Muhammad,  jak bak sahbat kumuen raja

 

Yohnyan neubungka sajan sahbat,  Muhammad beurangkat dum barangna

Lalu jiteuka awan meupayong, jipeutudong peugawe donya

Lalu neubungka troh u gampong, ret lam jurong miseue nyangka

Ret lam jurong Abu Jeuhai,  teukeudi  hai  cit meubahya

 

Lalu neujak leupah jurong,  troh u gampong bak ayahnda

Lalu neu tamong dalam keubon, pajoh buwahan zabet kureuma

Habeh jibri dum keu Ahmad, ri nyang mangat cati rasa

Lalu jipotle ngon bungong, hanpeue tanyong peue nyang suka

 

Lalu meugah bak Abu Jeuhai, ureueng bubai tan agama

Meugah Ahmad jijak ret nyan,  yohmasa nyan beungeh raya

Hoka gata dumna rakyat, dumna alat peucukop sigra

Ta peuhase kayee batee,  tapileh kayee nyang gasa-gasa

 

Ta peucukop dumna alat, tapoh Ahmad ta peurata

Bak uroe nyoe tatueng balaih, adat patah tapeuluka

Adat capiek bek tagundah,  bahle patah kamoe raja

Areuta ku le bek tagundah, meunan jipeugah sitan agama

 

Yohmasa nyan dumna rakyat, jimupakat dum jirata

Bak uroe nyoe bekna tilek, tapoh bak capieik dum jirata

Tapoh bak ulee ngon bak gaki, adat mate sudi tanna

Ji pilehle  kayee nyang kreueh-kreueh,  cabeueng rangkileh ngon krak bangka

 

Laen nibak nyan han teukhimat,  jipoh Ahmad dum jirata

Rakyat lethat meuribee-ribee, kayee batee dum jirata

Teukeudirullah nibak Ahmad,  geujak bri ingat pantah sigra

Wahe Ahmad muda samlakoe, tango kamoe keumala donya

 

 

Bekle tawoe ret lam jurong, Abu Juhai jipoh gata

Ban neudeungo narit meunan, Ahmad  teusinyom suka rasa

Kricit narit dum aneukmiet, neutanyong pakon peue guna

Laen ureueng jijak ret nan, pakon han jitham he peugawe donya

 

Bekta takot keu Abu Jeuhai,  hana get akai ureueng tuha

Saleh dilee hana tatakot,  ureueng laknat deungki   jina

Masa dilee ka talawan, jinoe pi taulan bek soksangka

Beureukat Muhammad tulong Tuhan, geutanyoe rakan kuwat raya

 

Bak uroe nyoe bah tamuprang, tapeu teuntang ngon ureueng tuha

Jinoe talawan Abu Juhai, harap tiwakai keuhak Ta’ala

Kricit narit Muhammad sidroe, udeh tawoe dum simuwa

Yohnyan jiwoe dum aneukmiet, sahbat Muhammad dum barangna

 

Lalu jijak ka meuron-meuron, sipeurti ban kawan geureuda

‘Ohsare troh dalam jurong, yohnyan meuteumeung  jeuet prang raya

Abu Jeuhai  ‘alaihi laknat, muprang ngon  Ahmad peugawe donya

Padum rakyat meuribee-ribee, jimat kayee dum simuwa

 

Yohyan  jipoh bukon bubarang,  aneukmiet seudang han binasa

Jisrom jipoh hana keunong, Allah tulong Malaikat publa

Adat jipoh pihan saket, beureukat Muhammad peugawe donya

‘Ohban jipoh rakan Muhammad, meuriwang meuhat ubak muka

 

Jipoh aneukmiet keunong ateueh droe,  darah meureuet-reuet  ureueng tuha

Lom jitamah uleh aneukmiet, maken meugriet ureueng tuha

Habeh jipohle sahbat Muhammad,  patah lethat rakyat raja

Ladom  capiek ladom reubah, subhanallah tango jikata

 

Laen nibak nyan that barullah, timplak Allah keujih teuka

Habeh jiplueng kawom ureueng nyan, kawom Muhammad that guranta

Abu Juhai pina sajan, leumah neupandang  Muhammad muda

‘Ohmeu leumah ka meuteuntang, neuplueng rijang ureueng tuha

 

Meusong habong jiplueng jinoe, aneukmiet kiloe ureueng tuha

Kakeu jiplueng jinoe u gampong, aneukmiet keupong ureueng tuha

Muhammad meunang bak uroe nyan, bukon bubarang hate suka

Lalu meugah bak Abu Jeuhai, aneukmiet huse ureueng tuha

 

Yohmasa nyan maken that malee,  neutundok ulee tron ie mata

Masanyan  that saket hate,  sangat malee poteu raja

Yohnyan marit jikeu Ahmad, sajan teuingat nyang lam donya

Ahmad sidroe ku peutaloe, beurang kaho jih kumita

 

Meukusud kee kupeutaloe jih,  lon that keuji diateueh donya

Kareuna jih aneuk yatim, kamoe tuan-tuan aneuk panglima

Jih tuan ureueng gasien,  kamoe tuan ureung kaya

Muhammad yatim hanthee keudroe,  hanale Nang ayah bunda

 

Hanthee keudroe jih gasien that,  dikamoe meuhat le areuta

Patot jikiloe kamoe meugah,  gadoh leupah nama raja

Bukonle malee dumna kamoe,  aneukmiet kiloe kamoe raja

Jakalee bit leubeh Muhammad,  bahle meureupah sama dua

 

Dihadapan dumna rakyat, meunan pakat ureueng kaya

Meunan jikheunle Abu Juhai,  geumita pangkai bak panita

Jinoe kujak bah ahlul nujum,  kuyue peumaklum ileumei donya

Kuyue peurunoe ileumei hikeumat,  areuta ku lethat kupeubeulanja

 

Laju jijak troh bak guree, jikheun jih malee bak panita

Habeh jihuse uleh Ahmad,  malee sangat kamoe raja

Sirang neu peugah sirang neumoe,  neu tulong kamoe he teungku panita

Ulon jinoe tapeurunoe,  tabri keukamoe ilmei donya

 

Kubri jinoe meuh sikatoe, ta peurunoe ileumei peurkasa

Jinoe takheun soe nyang meunang,  cuba neupandang  teungku panita

Tadeungo he Abu Juhai, hana sagai meunang gata

Gata talo leumah dalam kitab, bek taharap meunang gata

 

Meunyo talawan gata talo,  meutamah laju malee gata

Meunyo tatakot gata keu malee, meunang teuntee Ahmad muda

Han ek talawan Muhammad yatim, gaseh Tuhan lagi ambiya

Adat meunan he teungku droe,  ta peurunoe ulon beusigra

 

Abu Jeuhai teutap disinan,  Ahmad yohnyan teutap bak Mama

Ahmad teutap sajan sahbat,  peutploh meuhat sajan seureuta

Hanatom cre uroe malam,  padum zameun bak calitra

Bak sibuleuen bak sibuleuen, soe ngieng hireun hanatara

 

 

Ubak sithon ubak sithon,  hana lawan indah rupa

Badan pigot sangat jeunjang, miseue intan mata dua

Tuboeh neugot cit meutrieng blang, keuieng  bidang keumang u dada

Tuboh Nabi sangat indah, siulah-ulah buleuen purnama

 

Bulee keunemg got that leubat, nyang leuntek that bulee mata

Mata unun hansoe tuban, wahe  tailan  peucalitra

Gigoe nyang suci geulima makah,  peunoh limpah jiplueng cahya

Suara neu mangat mameh ranom,  teusinyom-sinyom watee beurkata

 

Ka teuduek haba Muhammad yatim, jinoe laen lon calitra

Jinoe lon kisah tuan Khadijah, ureueng Mekkah diateueh donya

Tuan Khadijah benti Hawailah, ureueng that meugah lagi mulia

Hareuta pile that barullah, namiet pi mudah han teukira

 

Rupa pi indah bukon bubarang, ngon peukaian hanatara

Lagi ‘alem Tuan Khadijah, kitab barullah Taurit neubaca

Lom ngon rupa that sambinoe,  ngon meubudoe got ngon bahsa

Lom kawom nibak Kureh, lom geumaseh murah tangannya

 

Sithon dua  seun neubri seudeukah, areuta barullah han teukira

Neubri keu faki  ngon miseukin, laen nibak nyan haji ulama

Neubri makanan ngon minoman,  neubri peukaian jineh ija

Padum-padum hamba teubosan,  rupa neutuan jroh hanasa

 

Nacit meulakoe nyangka dilee, jinoe ka balee ureueng muda

Neuduek balee niphon seudang, cit lam bimbang peutimang areuta

Buet beurniaga ngon bloe-peubloe,  hana padoe neutueng laba

Dua droe lakoe nyang ka mate,  meunan teukedi Allah Ta’ala

 

Adat na untong neubrile Tuhan,  meuteumei peutumuen ngon Ahmad muda

Bak siuroe Tuan Khadijah,  kitab barullah dum eubaca

Lheueh nyan neubeuet kitab Taurit,  teuseubut Muhammad disinan nyata

Nameu lumah dalam kitab, Nabi Muhammad disinan nyata

 

Nyankeu Nabi akher zaman,  gaseh Tuhan nyang that mulia

Nyang pomilek Ciruga ngon niekmat, karonya Hadlarat Tuhan Nyang Asa

Sikati duablah laksa 4000 Nabi, Muhammad Tuhan bri pangkat teur-ula

Cit that leubeh deungon mukjizat, dilee Ahmad geuboh nama

 

‘Oh rayek bacut umu lapan thon,  geubalek nan Muhammad muda

Meunan leumah dalam Taurit, Nabi indah sangat hanatara

Nyata ubak Tuan Abdullah,  bak Aminah sinan keuluwa

Yohnyan beureuhi Tuan Khadijah,  pakri kuilah ngon kudaya

 

Padum lawet lheueh nibak nyan,  that sukaan Khadijah muda

Pakri bak jeuet keu suami, Tuhan ya ghani neu peutroh pinta

Kareuna Muhammad that samlakoe,  ho siuroe that jroh rupa

Mangken rayek mangken samlakoe,  hana sidroe bandeng rupa

 

Pakriban keu untong keu suami,  hana geutukri peubicara

Yohnyan teupike Tuan Khadijah, Poteu Allah nyang bri bahsa

Lalu teuingat dalam hate,  geuyue jak tueng Mama bunda

Nyankeu Mama Muhammad yatim,  ureueng salihin that takeuwa

 

Neuyue jak tueng Tuan ‘Atikah,  saudara ‘Abdullah geunantoe Mama

Abi Thaleb ureueng lakoe,  nyan pi sidroe  podu Mama

‘Ohsare troh Tuan ‘Atikah,  Khadijah peuindah neu peumulia

Padum natreb neuduek disinan,  that sukaan hanatara

 

Khadijah peubeuet Tuan Atikah,  sepeurti jumulah Ureueng kaya

Tuan Atikah yohnyan meuguree,  tuntut ileumei nyang that mulia

Khadijah peubeut Zabur Taurit, bit meu ileumei khadijah muda

Neu peubeuet Taurit surat hikam, bit that ‘ajam ureueng muda

 

Lheueh nyan ‘Atikah nibak meungaji,  neu kheundak riwang ureueng tuha

Neulakee droe bak Khadijah,  neuwoe pantah u rumoh tangga

Yohnyan neuwoe bak Abi Thaleb, neuwoe  bak  Ahmad nyang that mulia

Ahmad teumanyong yohmasa nyan,  pane tuan tajak gata

 

Ulon teuka bak Khadijah,  kamoe disuroh beukayem teuka

Abu Thaleb pidi sinan, keu sukaan hanatara

Yohmasa nyan Abi Thaleb,  kheundak Rabbi Tuhan peunyata

Padum natreb teutap disinan,  hana sapeue tan mumara

 

Tuan Fatimah isteuri Abi Thaleb,  sangat raghib sukacita

Droe citka ngon teukeudi Allah,  hamel Fatimah Tuhan karonya

Yohnyan Fatimah di dalam brat, bunteng sangat gohlom keuluwa

‘Ohjan neuwoe Ahmad  u rumoh, Fatimah mehmoh beudoh sigra

 

 

Umu tujoh buleuen Fatimah kandong,  cit lam mantong neu peumulia

Abi Thaleb yohnyan neu pandang, lalu teumanyong neu pareksa

Pakon tabeudoh he Fatimah, ‘ohjan leumah Ahmad muda

Kareuna Ahmad aneuk geutanyoe,  hankeu namei bak takira

 

Maka neuseuot Tuan Fatimah,  lalu neu peugah sigra-sigra

Tadeungo judo ureueng lakoe,  budak lam pruet peumulia

Bukon nafsu bukon kheundak, teuka Ahmad meugrak dada

Leumah Ahmad teuka dijeuoh,  kareuna jipok ulee dada

 

Nyankeu sabab neueu meubeudoh,  nyum ka reuloh ulee dada

Ban neu deungo narit meunan,  lalu hireuen sukacita

Pihak leubeh deungon mukjizat,  budak dalam pruet jibri mulia

Kareuna budak Muhammad teunyoe,  nyan geukheun  ‘Ali Murtadla

 

Bameu meugah bak Khadijah,  mangken gundah nibak nyangka

Pakri ilah kutueng Ahmad,  supaya dapat peubicara

Rupa Ahmad mangken meulaku, ho siuroe jiek  peuet ganda

Neuyue surom lom  bak Atikah, bak Khadijah neu peuteuka

 

‘Ohsare troh bak Khadijah,  neu peuindah neu peumulia

Neubri makanan ngon minuman,  laen nibak nyan sianika

Teulheuh makeun neu pinah hidang, neuduek yohnyan meuseuninya

Yohmasa nyan neubeut Zabur, Taurit Injil lhee peukara

 

Meunan keumise  Tuan Khadijah, laen pi mudah hanatara

Padum lawet nyan bumeunan,  teukeudi Tuhan nyang peulara

Bak siuroe teukeudi Hadlarat,  geutanyong Ahmad keumala donya

He ‘Atikah jinoe lon tanyong,  takheun bak keunong uleh gata

 

Ahmad jinoe peue buatan,  neuduek ngon rakan peue keureuja

Peue na tuan tateumei makanan,  keu aneulmiet nyan dum barangna

Saleh hate han  tatuban,  makanan sikada dumna

Tango kamoe Tuan ‘Atikah, adat na mudah Tuhan karonya

 

Meung na mudah tabri keurakan,  beukeubit tan pakri daya

Kareuna Ahmad sangat miseukin,  lagi yatim tan Nang Bapa

Nyang get pakri tamupakat,  saleh cit meuganda laba

Proehai tabri nyan keu taulan,  tayue  jak  u Syam beurniaga

 

Tadeungo kamoe Tuan Khadijah,  pakri tailah ta maniyaga

Ureueng nyang meukat beuetbloe-peubloe,  panyang akai le bicara

Kricit narit Tuan Khadijah,  bekta gundah he saudara

Adat hanjeuet nyan tameukat,  meubri namiet nyang jeuet keumira

 

Barang kadum  neu kheundak peumubloe, nabak kamoe Allah karonya

Hingga seupotle ngon uroe,  ‘Atikah woe u rumoh tangga

‘Ohsare troh bak Abi Thaleb,  troh bak Ahmad nyang that mulia

Yohnyan neubri peukaiyan keu Ahmad,  seuleungkapan indah rupa

 

Yohnyan Ahmad neu teumanyong, pane he Nang tajak gata

Kamoe meujak bak Khadijah, kamoe jisuroh bak kayem teuka

Peubuet neujak bak Khadijah, jinoe neu peugah wahe bunda

Hana sapeue wahe Ahmad, kareuna sabab ji meucinta

 

Geunap uroe jiyue peureugi, teuma meungaji sipatah dua

Geuyue tanyong he Muhammad,  tatem meukat beurniaga

Adat tatem jibri mudah,  jibri pangkai tatueng laba

Ban neudeungo narit meunan,  teusinyom yohnyan keumala donya

 

Padum natreb nyan bumeunan, ji seuruhan hana reuda

Bak siuroe meucawe hate,  ka geukheunle ubak bunda

Adat na gaseh bak Khadijah,  saleh na langkah wahe bunda

Sira meujak kalon nanggroe,  meujak kalon proe laku rupa

 

Meunan neukheun uleh Ahmad,  kheundak Hadlarat Tuhan Yang Asa

Lalu meugah bak Khadijah, mangken gagah neuyue lanja

Meunyo neujak u nanggroe Syam, meubri dagangan nyang mulia

Neuyue bukale deungon geudong,  geucok dagangan meuneukat geuba

 

Dilee neuyue cok mutu maknikam, teuma pualam zamrut meutia

Teulheuh  nyan neucok nilam pualam,  neujok ya’kud  jeuneh meutia

Jineh ija deungon  sukhalit,  ‘aifil binat  makwa diwangga

Laen nibak nyan keu ija seundusen,  padum meuhimpon han teukira

 

Kakeu hase dum meuneukat, geupeudieng brat 40 unta

Peuet ploh unta geupudieng brat, geubungka rakyat dum barangna

Hadhir teudong dum kafilah,  syeedaga  Makkah nyang kaya-kaya

Kricit narit Tuan Khadijah,  Mubasyarah deungo sigra

 

 

Neujok keureutah kalam daweuet,  lalu jisurat sigra-sigra

Tango kamoe Mubasyarah, jinoe kupeugah ubak gata

Adat na gaseh gata keu kamoe, Ahmad sidroe ta peumulia

Barang kaho Ahmad neujak, bek sitapak jarak ngon gata

 

Peue nyang nafsu beuta turot,  beuta ikot uleh gata

Taniet tajak kon tameukat,  taireng Ahmad gata dumna

Adat habeh areuta ji buwang,  bek talarang uleh gata

Meunyo taubah ban lon peugah, wajeb salah gata kudra

 

Mangka seuot Mubasyarah, inca Allah ulom ridha

Ban nyang narit Tuan Khadijah, hana ubah silama-lama

Yohnyan meuhimpon dumna rakyat, sajan Muhammad muda bahlia

Lalu neu bungka u nnggroe Cam, rakyat sajan ireng Saidina

 

Padum lawet neucre nanggroe, trohle sampoe hana mumara

‘Ohsare troh u nanggroe Syam, rakyat sajam dum barangna

Lalu geupiyoh  geupeudong khimah,  that barullah han teukira

Yohnyan meugah bak saudaga Cam, geuba dagangan nyang mulaba

 

Meugah saudaga teuka di Makkah,  meuneukat barullah han teukira

Ureueng surohan bak Khadijah,  meuneukat indah dum peurmata

Lethat teuka saudaga Cam, geujak tanyong meuneukat geuba

Meuneukat geuba jineh maknikam, nilam puwalam yakkut meutiya

 

Ban jideungo narit meunan,  that sukaan hanatara

Saudaga Makkah piyoh lam khimah,  geupiyoh payah dum sineuna

Saudaga Cam jiwoe u gampong,  maseng-maseng woe u tangga

Ureueng Makkah piyoh lam blang,  ngon bunyian sare gabra

 

Kalhee uroe piyoh disinan,  that sukaan hanatara

Teukeudi Allah peurintah Tuhan, raja meu’en Uroe Raya

Geunap lhee uroe raja maen, meunan kayem meurok-rok masa

Jime khanduri deungon tanglong,  u teungoh blang mahajana

 

Jitot tanglong diteungoh blang, miseue bintang di indra

Lalu neujak panghulee Makkah, dum kafilah  Ahmad muda

Yohmasa nyan dumna rakyat, ireng Muhammad ublang raya

‘Ohsare troh blang u jeuoh, dien ngon tanglong padam cahya

 

Yohnyan jingieng uleh rakyat,  beureukat Muhammad loen simua

Kareuna kande habeh padam,  ujeuen pitan hantom nyangka

Dilee nyangka hantom meunoe, peue bahya nyoe keunoe  teuka

Yohnyan raja Cam sangat gundah,  seumpom kupiyah dikeupala

 

Teuma teumanyonglr raja Cam, pakon ka jinoe peue keureuna

Peue alamat nyang jeuet meunan,  takheun tuan dumna gata

Angen pitan ujeuen pihan,  kande padam peue kareuna

Yohnyan neuseuot Uleebalang,  hantom meunan dilee nyangka

 

Hantom meudeungo hantom meukalon,  hana meukon pahdam cahya

Tajak tanyong bak ahli nujum,  saleh na maklum Tuhan peunyata

Meuhan jipeugah bak uroe nyoe, kukoh takue dumna gata

Yohnyan gundah dumna rakyat,  raja pithat duka cita

 

Kricit narit Rahet sidroe, na bak kmoe saboh bicara

Nabak kamoe ureueng sidroe,  guree kamoe sangat tuha

Bak Rahet nyan saleh na maklum.  Kareuna nujum ‘alem raya

Jinoe seumbah bak raja Cam, jiyue jaktueng sigra-sigra

 

Yohnyan jijak rujang-rujang,  lalu ji jaktueng Rahet tuha

‘Ohsare troh nyan u gampong, lalu ji usong pantah sigra

‘Ohsare troh bak raja Cam,  seumbah laman pomeukuta

Syah Alam deelat tuanku,  nyoekeu Nujum nyang troh mata

 

Raja peugah ubak Rahet,  kande  lethat padam cahya

Jinoe tapeugah wahe Rahet,  peue alamat keunoe teuka

Nyan neu pugah wahe Rahet,  padum zameun meunoe hana

Kareuna droe umu lawet,  masa Nabiyullah Musa

 

Tango kamoe pojanjongan, padum zameun meunoe hana

Nyangka dilee hantom meunoe,  dumna kamoe nyangka tuha

Ubak uroe nyoe keunyataan, bak janjongan jinoe kana

Wahe Rahet peue alamat, takheun beumeuhat tapeunyata

 

Alamat tuanku cit meupeugah,  bek gundah pomeukuta

Ureueng mulia teuka keunoe,  bak nanggroe nyoe Allah peunyata

Nyankeu ureueng di nanggroe Makkah. Leubeh tuwah diateueh donya

Sabda raja ubak Rahet,  neu pugah pat neu peunyata

 

 

Bak uroe nyoe tapuleumah,  bahle tapoh tapeupahna

Bahle tapoh dumna kawom,  meunan hukom dilee nyangka

Tango kamoe meukuta nanggroe,  meukheun jinoe meukuta donya

Hanjeuet tapoh ureueng meutuwah,  Poteu Allah neu pumulia

 

Nyan neu peujeuet dumna makhluk,  nyang na maujud leumah nyata

Seubab neu peujeuet dumna umat,  kareuna Muhammad neu peunyata

Nyankeu museubab ureueng meutuwah,  laen pileumah disinan nyata

Pakri tapoh pojanjongan,  geutanyoe sinan dum geupeuna

 

Adat meunan wahe Rahet,  pakri nyang get bak gata dumna

Kukeumeung peutamong ureueng meutuwah, p akri  ilah toh bicara

Tango kamoe pojanjongan, ta peurjamuan ureueng nyan dumna

Ta peutamong keunoe u dalam, tabri makanan pomeukuta

 

Ban neudeungo Rahet peugah,  neuyue kafilah jaktueng sigra

Bujang jijak bak kafilah,  bak ureueng Makkah nyang mulia

Tango kamoe dumkafilah,  neu meulangkah ubak raja

Jinoe raja kheundak peujamei, bek sidroe mei tinggai gata

 

Yohnyan habeh dum meulangkah, ureueng Makkah tamong bak raja

‘Ohban sare troh jidong hadap,  seumbah deelat poteu raja

Yohnyan habeh raja pandang,  lalu neu tanyong neu pareksa

Wahe Raheb jinoe tapeugah,  ta pulumah toh ureueng mulia

 

Tuanku gohlom keunoe sampoe,  saleh tinggai droe sajan unta

Ahmad yatim ngon Mubasyarah,  ureueng Khadijah sangat mulia

Raja tanyong tanyong narit, neuyue jaktueng pantah sigra

Yohnyan Rahet peu ek seumbah, bak khalifah poteuraja

 

Tango kamoe pojanjongan,  majeulih reusam neu peulara

Teuma neuyue jak ureueng dua droe, neuyue jak meuntroe ngon panglima

Ban sare troh ubak khimah,  teuma leumahle ngon cahya

Yohnyan meuntroe lalu teudong,  katroh geujak ngon panglima

 

Jikalon rupa that samlakoe,  dalam nanggroe tan sabohsa

Lang geumilang bukon bubarang,  sang buleuen trang tungoh purnama

Miseue buleuen teungoh peunoh,  meunan seunaleuk peurumpama

Yohnyan meuntroe neu tundok ulee,  that geumalee meuhadap muka

 

Tango kamoe panghulee Makkah, raja yue peugah saleum bak gata

Neuyue meulangkah Tuan u Dalam,  manyoh deundam poteuraja

Inca Allah tuan Meuntroe,  meujak jinoe ubak raja

Lalu neujak ngon Mubasyarah,  neu meulangkah ubak raja

 

Teuma teuka awan meupayong,  ji peutudong Ahmad muda

‘Ohsare troh u leuen Meuligoe,  neu eu jinoe poteuraja

Diyub awan ureueng 4 droe,  teumanyong jinoe poteuraja

Tuanku bit jroh ban neu pandang,  ureueng nyang panyang nibak nyangna

 

Raja neukalon leumah neupandang, bukon bubarang indah rupa

Wahe Rahet pakri hai kamoe,  peugah jinoe uleh gata

Jinoe tuwanku neutron u bumoe,  neujak meuteumeung pomeukuta

Yohnyan raja neutron u bumoe,  neujak meuteumeung neucom tangannya

 

Sare teulheuh neu mumat jaroe,  neupeu ek jinoe u astana

Troh u leupur laju u Dalam, neu eu gambaran habeh binasa

Patah takue tinggai badan,  putoh meukhan dum beurhala

Teulheuh nyan Ahmad neume u dalam,  sigala dum rakyat neupeurap raja

 

Sajan Rahet duek disinan, sigala kawom rakyat dumna

Geubri makanan peurjamuan,  dalam hidang nyang mulia

‘Ohlheueh makeun pinah hidang,  peurap hadapan ya Saidina

Duek hadapan tuan Ahmad, Imum Rahet buka haba

Wahe Ahmad neusuet bajee,  kamoe lakee kalon rupa

Tuan Ahmad lheueh suet bajee,  raja lakee com peugawe donya

 

Ahmad neubri raja lakee com, neumat jaroe Ahmad raja ucap kalimah duwa

(Asyuhadualla ilahaillallah, wa Asyhaduanna Muhammadar Rasulullah)

Imum Rahet  neu ek saksi, Muhammad Nabi Rasul Ta’ala

Imum Rahet duek dilikot Ahmad,  neu eu alamat saboh tanda

 

Wasiet ayah Imum Rahet,  dilee yoh hudep saboh tanda

Tanda Nabi akher zameun,  rupa sang cumuet timoh saboh tanda

Khatimul Nabi timoh bak rueng,  antara glieng2 baho dua

Tamse cumuet teubiet nanoh,  bee hilam ban Ciruga

 

Ban zabet ngen setanggi, bee lahori kheulumbak jeumpa

Jicom Rasul ngon beebeewan, uroe malam meubee sama

Deuh neukalon Imum Rahet, ban nang wasiet bandum kana

Teuma neulakee kheun riwang Cahadat,  jaroe neumat tangan Saidina

 

Neulakee keulon ya Muhammad,  beuseulamat lon bak neuraka

Nabi neuseuot ampon bak Allah,  alhamdulillah jinoe ampon ka

Teulheueh nyan Ahmad neulakee droe, neukheundak woe u Makkah mulia

Imum Rahet bri seudeukah,  areuta barullah han teukira

 

Peuet ploh unta geubri deureuham,  peuetploh pakayan bajee ija

Laen nibak nyan alat peukayan,  raja seudeukah keu Saidina

Yohnyan Ahmad neulakee droe,  gisa u nanggroe Makkah mulia

Unta pi lheuh Ahmad beurjalan, rakyat bak kandran ateueh unta

 

Ahamd neujak deungon tapak,  hana neutem  neu-ek   unta

Lhee uroe Ahmad neujak, saket tapak neu  bandua

Ahmad neujak ngon Mubasyarah,  laen jeumulah droe bandua

Gob laen ateueh kandran,  jijak bagah deungon unta

 

Tuan Ahmad ngon Mubasyarah,  neujak ngon gaki dua

Gaki saket tapak pi meunan,  ek neujak bak neu peurasa

Tron Firuman bak Hadlarat, Malaikat tron u dalam donya

Tron Jebra-i ubak Ahmad,  geujak neugoet urat donya

 

Kareuna sabab jeuoh jalan,  yohnyan geupeu keuot urat donya

Mubasyarah ireng sajan,  Ahmad beurjalan jeuoh safa

Padum-padum perheuntian,  rakyat sajan ireng sama

Bak siuroe Tuwan Ahmad,  qadla hajat dalam safa

 

 

Mubasyarah jijak sajan,  ngon hampiran sidroe saja

Lheuh meusuci Tuan Ahmad,  bee pi mangat ban khleuleumbak jeumpa

S  U  K  A   G  A  L  A  K,   R  A  K  Y  A  T    D  U  M  N  A

Ladom jikheun bee ie mawo,  jineh gaharu ngon komkomma

 

Yohnyan hireun Mubasyarah,  hantom jieu dilee nyangka

Mubasyarah dum neusurat, dum amanat nyangka nyata

Diphon awai meunan akhe, ji suratle boeh lam angka

Jiboeh lam buku dum ji keubah,  suroh  Khadijah dum yue kira

 

Yue Khadijah boeh lam surat,  haba ngon buet dum areuta

Limong uroe troh u Makkah, rakyat barullah hireun raya

Digob dilee geujak u Syam, troh lhee buleuen jak nyang teuga

Nyan limong uroe peurjalanan, troh u nanggroe Mekkah mulia

 

Hireun ji eule asoe Makkah,  Ahmad neuwoe toe nibak nyangka

Nanyum neuwoe uroe malam,  bak jipadan  jeub kutika

Ahmad dilee ngon Mubasyarah, ureueng laen gohlom teuka

Mantong dilikot rakyat teungoh jak,  ladom katroh u astana

 

Teulheueh nyan neuwoe tuan Ahmad, bak Abi Thaleb Mubasyarah mama

Yohnyan Abi Thaleb that sukaan,  deukalon ban Ahmad teuka

Mubasyarah  jilakee droe, lalu jiwoe pantah sigra

‘Ohsare troh bak Khadijah,  Mubasyarah buka haba

 

Jijok keureutah deungon daweuet,  kalam mameh bak tuan saja

Jijok surat bak Khadijah,  teubiet pantah sigra-sigra

Ban neukalon haba lam surat, indah sangat hanatara

Dum mukjizat nibak Ahmad,  ngon seulamat Tuhan karonya

 

Lheueng lhee uroe neuwoe Ahmadd,  trohle rakyat sajan unta

‘Oh meuteumeung seumbah khadam,  surat yohnyan jijok sigra

Khadijah sambot yohnyan surat,  geubaca leugat that bit suka

Lheueh neukalon haba la surat, lahe muekjizat Ahmad muda

 

Droe  citka ngon teukudi Allah, jiwoe  kafilah sajan unta

Padum-padum ngon piasan,  ngon bunyian han teurkira

Yohnyan meugah  ureueng woe di Syam,  that sukaan lethat laba

Abu Jeuhai meupot-pot leugat, banci keu Ahmad hanatara

 

Areuta lethat geupuwoe di Cam,  yohmasa nyan hana teukira

Meuh  ngon pirak han teukhimat,  geupudieng brat 40 unta

Khadijah bri dum keu Ahmad,  neuyue intat dum barang na

Bak Abi Thaleb neuyue intat,  areuta Ahmad 40 unta

 

Habeh geuintat areuta barullah, suroh Khadijah ureueng kaya

Areuta geukeubah bak Abi Thaleb,  yohnyan Ahmad marit sigra

Areuta Khadijah peubuet keunoe,  jak kapuwoe dum barangna

Jak tapuwoe areuta nyan,  bak Khadijah keudeh teuma

 

Rakyat puwoe bak Khadijah, lalu neumarah sinan pula

Pakon tapuwoe milek Ahmad,  jak taintat bak poareuta

Beudoh rakyat  geujak intat,  ubak Ahmad lom meugisa

‘Ohsare troh ubak Ahmad,  amarah that nibak nyangka

 

Areuta nyan kon dikamoe,  pakon tapuwoe keunoe teuma

Nyang pomilek di Khadijah,  tango meupeugah dumna gata

Laba pangkai kon dikamoe,  tango jinoe lon calitra

Laba pangkai di Khadijah,  Mubasyarah beurniaga

 

Bitna meujak  u nanggroe Syam,  mejak me’en kalon donya

Nyang dilon pasai upah, hana lom meuphom lam keunira

Leubeh bak upah keulon geuboeh,  ngon peunajoh leubeh bak ganda

Masa dilee janji yoh phon,  geulakee lon geubi unta

 

Unta hantom lon mat taloe,  dilon laloe duek lam tahta

Iek deungon ek lon gob basoh,  bu lon pajoh dum gob bawa

Beungoh seupot bu lam hidang,  upah lon han bak lon kira

Eh bak kaso bu lam hidang,  saket badan gob usaha

 

Pangkai lon tan musigupang, pane jalan meutemei laba

Nyankeu sabab kon areuta kamoe,  jak tapuwoe pantah sigra

Jak tapuwoe bak Khadijah,  bekta bantah dumna gata

Meunan neukheun uleh Ahmad,  ubak rakyat nyang ba areuta

 

Padum uroe nyang bumeunan,  riwang ulang rakyat bawa

Teuma teutap  bak Khadijah,  Tuan ‘Atikah neuyue teuka

‘Ohsare troh Tuan ‘Atikah,  areuta neuyue keubah ubak gata

Ureueng Makkah habeh hireuen,  sabab han neutueng dum areuta

 

 

Tuwan Khadijah that sukaan,  neulakee bak Tuhan bak samporna

Bak jeuet Ahmad keu suwami,  bak Tuhan bri kabui pinta

Uroe malam neuleueng jaroe,  meujan neumoe tron ie mata

Tuan Khadijah bri peukayan,  peursalenan Ahmad muda

 

Ija bajee deungon makanan, sileumgkapan Khadijah kira

Teuduek haba Tuan Khadijah,  ngon Tuan Atikah teutop haba

LAILAHA ILLALLAH, meuwoe kisah keu Ahmad muda

Meuwoe kisah Ahmad ngon rakan,  peutploh sahbat lon calitra

 

Sira lon kisah Abu Jahai, narit ka tinggai padumna  lama

Bak siuroe teukeudi Allah,  Ahamd beurjalan sidroe saja

Sahbat tinggai hana sajan,  neu beurjalan bak rot raya

Teuma meureumpok ngon Abu Jihai,  sidroe sagai ngon pihana

 

Teuma marit Abu Jeuhai, kureueng akai ureueng tuha

Wahe Ahmad pane tajak,  treb ka jarak ho kabungka

Masa dilee yoh meupake,  gohlom dame ‘ohnoe masa

‘Ohlheueh kapoh rakyat ulon, lheueh nyan kaplueng kajak bungka

 

Bak uroe nyoe kutueng balah,  kacuba meureupah gob peuhina

Adat ek kupoh kah, kutueng balah kee poteuga

Adat kugagah jinoe kupoh kah, gata pi malee bak ureueng donya

Kapreh sinan wahe Ahmad, kucuba mat ku peurasa

 

Ahmad seuot  bek hai Abu,  hana soe eu gob peuhina

Adat mate ulon tapoh, hana saboh soe tueng bila

Adat mate gata lon cang, malee hanban gata raja

Hana raja mate sidroe, rakyat lam nanggroe jieu hana

 

Roe hi gata ureueng syik, ulon putik aneuk gata

Deungon peue seubab tadeungki ulon,  peue ulon bri ateueh gata

Pakon ulon takeumeung poh,  sabab nyang toh peue kareuna

Abu Jeuhai seuot pantah, jinoe kupeugah sabab kareuna

 

Sabab kajak rot lam jurong,  surak meukeupong kah that raya

Kah ba rakan troh bak 40, ka peukiroh miseue raja

Han thee keudroe kah tan nangmbah,  bu kapajoh meuala kada

Lahna gaseh Abi Thaleb,  ek keu udep geupeulara

 

Geubri gandom sijumpet-jumpet,  jeuetkeu udep  ‘ohnoe masa

‘Ohka rayek hanthee keudroe, ka keumeung gantoe kamoe raja

Miseue ulon na meurakyat, rakan sahbat sidroe dua

Dikah pi meunan wahe Ahmad,  mangat gob lihat laku rupa

 

Kaba rakan dua lhee ploh, ka keumeung kukoh ateueh donya

Ka keumeung raja di nanggroe Mekkah, ka keumeung pinah kamoe raja

Pane kubri kah keurajeuen,  meuna mantong udep lon na

Meunan narit Abu Jihai, seuot Rasul Nabi kita

 

WAHE Abu lon tan hajat, hana lon minat kumeung raja

Ulon dagang aneuk piyatu, hana Maku lon ngon bunda

Kana Abu raja Makah, nama meugah Hasyem  bangsa

Ulon nyoe bak bangsa ‘abeudi, bangsa Habeusi geupubloe ba

 

Ulon namiet bak ABDUL Muthaleb,  pane dapat ulon raja

Jinoe Abu ulon meutanggoh,  uroe tujoh Abu teuka

Neukrah rakyat bak habeh troh,  keunoe u mideuen sigala donya

Jijak kalon ta meureupah,  soe nyang pantah soe nyang teuga

 

Teuga gata leumoh ulon,  jeuet gob kalon deungon mata

Nyang ka meuhat ulon talo,  kareuna baro umu muda

Meunang gata Abu meuhat,  kareuna kuwat lagi tuha

Seupeurti ban Mama Hamzah,  kuwat ngon pantah lagi peurkasa

 

Gata pi meunan wahe Abu,  cit meukuru sukee teuga

Tujoh uroe tanggoh ulon,  uroe Seunanyan Abu teuka

Abu Jeuhai seuot pantah, han peue salah ulon ridha

Ahmad neuwoe bak Abi Thaleb,  neu peugah sabet ubak Mama

 

Neu peugah bak Saidina Hamzah,  Saidina Abas hadle disana

Ahmad peugah bak Khadijah,  bak Atikah sahbat dumna

Hingga sampoe bak Khadijah,  Ahmad meureupah deungon raja

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s