wajeb iman – nazam Syekh Yakob Padang Tiji 1341 H

 

وا جب  ايمان  دوم  كتايى  ا  كن   نبى  *  واجب فاتيه  فوى يڠ نهكن أوليه نبى
بتا   فاتيه    يڠكوه    داتڠ    نفا   خبر  *  مثال  موت يڠ  تهت سا كية  تافراسا
مثال  نفكه  عذاب  قبور  دسيى  كافر  *  أوراڠ معصية يڠ تن توبة ماتى جاهيل
أورڠ  مؤمين  نبرى   نعمة  دالم   قبور  *  نعمت شر ڬا  توهن  بوكا  كنن  لاجو
بتا  فاتيه  أورى  قيامت   دودى  تكا  *   ينك   أورى  كسوداهن  هارو  هارا
بولن ڠن  أورى فى  كرهنا بنتڠ مهمبور   *  لاڠيت مليڠكڠ بومى مكنجڠ مهو بور٢
سوره توهن اسرافيل يوب سڠكا  كلا   *  هابس ماتى  بندوم سارى صفا  صفا
هايس ماتى بندوم سارى ملينكن توهن  *  لاڠيت ڠن بومى كن لى منى كا كسمفن
عمورفة فوله   تهن يڠ  منن ين صفا صفا  *  تمر  تورون   هوجن  فوتيه  مأ ء الحيا
ها بس   تيموه بندوم توبه كاتدوق٢  *   فكاين تن  بندوم  تلهن  بنيه  أوروق
تمر   نيوب    سڠكا   كلالى    اسرفيل  *   موى  ياواڠ بندوم  تمر  تن  لى  ماتى
تمر كرون كا  كهمفون  أو   فداڠ  محشر  *  دومنا  رعيت كا  كحساب  كفر  كسا
عوه مهمفون دومنا رعيية  كجوك سوراة  *  تمر يڠ چوك ويل ڠن أونن بن يڠ بايت

تمر  يڠ    جوك   دڠن   أونن    مبهڬيا  *  تمر يڠ روه ڠن  جاري  ويل كاچيل كا
تمر   كجيڠ    دومنا    عمل    لم   نراچا  *  كج دڠن جهة فهول دڠن كهون دسنن يتا

يڠ  كهون  عمل    كيجيكن  أسى  شرڬا  *  تمر  يڠ   فهول  دوم  كفالوى  لم  نركا
تمر  تجك  اتس   تيتى  صراط  المستقيم  *  ها لوس فى تهت كفدوق أتس نركا جحيم
فنجڠ  تيتى  سابه   رواية  تلهو ريبو تهن  *  تأيك تاجك أتس فوجق  دڠن  تاترون
تيتى  هلوس  لا ڬي    تاجم   نيك  فدڠ  *  سدومنن هالوس سدوم فوتس اداة ملنتڠ
تمر  يڠ  جك  اتس   تيتى    لابن   بابت *  كرنيا  الله   لدوم   فنتس  نابن   كيلت
لدوم  فنتس  ناكدوم  بن   فاڠين    باوا  *  تمر   لدم    تابن   كودا   كفوه   لاوا
( ٩ )
تمر لدوم بن  أروڠ   فلوڠ  يڠ تهت  چچا  *  تمر  لدوم فنتس باجوة هن  تهت لنجا

لدوم   يودى   معوى   ٢   مسسق   ٢  *  مهيلا   ٢   لم      نركا      كاتسيرك
يڠ سيلامت  أتس  تبتى  جمراڠ  فيتروس *   بك حوض نبى كروڠ  الكوثر دسنن فيوه
بنيه  كروڠ  بن   كندى فيلا   نابن   ينتڠ  *  اسى مهت سيب سيدرى ٢ هن فوى ريواڠ
يڠ جيب  ايرين دق فيهن لى كراه فيهن لى *  كرنيا   حق   هويڠ   كهندق كنن نبرى
تلس  ين  تمر  أورڠ    مؤمن  تامڠ  شرڬا *  سنتوك سابى تبيت هنلى روك٢ مسا
ككل   سنن  جيت  هنا   هد  هنا  هڠڬا *  دالم    لذاه  سنتوك  مابت  جاتى رسا
ڠن بوه   كايو  جيت   متنتو  رسالا  ين *  سى يڠ فاجوه فروة هن سڠكوه لم سو كأن
سنتوك  قليم   لم   تكهيم ٢  هاتى  ماڠت  *  ڠن     مكانن   ڠن  مينمن  لذات ٢
توها  هنلى سا  كيت  هنلى روك ٢ مسا  *  عمور  سدوم  سابى ٢   مودا   بهليا
دسكافر    دوم    تكو  لير   لم    نر كا  *  تتف  سنن جى تبيت  هن روك٢ مسا
فدوم  عذاب   أورى   مالم   هنا   تدوه   *  كمكانن  بواه   زقوم  ين   جى  فاجوه
بوه زقوم ين توتڠ  تهت  تاجم  بن  دورى   *  سى يڠ فاجوه ها ڠوس توبه افوى سنرى
فدوم    عذاب  كلا  لمفن  أولر   فاتهوق   *  لوم ڠن رنتى كبوه فاسوڠ رنتهيق رنتهوك
أورڠ   مؤمن   أومة  نبى   يڠ   مدوشا   *  يڠتن   توبة  بن   في   كتوت   لم   تركا
كيرا ٢   أوبى   دوشا    دومنن   كتوت   *  هن  جيلا لو افوى نر كايك هن فاتوت
لدوم توتوڠ  مڠ عوه كا  كى عوه نن سجا   *  لدوم بتيس  لدوم  هابس  لدوم  عوه فها
لدوم  توتوڠ  مڠ  عوه تا  كوى ا لا دادا   *  تمر   لدوم    هابس    بندوم   ا لا موكا
سنچوة  ٢ عذاب فا  كى  ڠر لن  فكه   *  كاوس  افوى نبك  كا  كى بندوا بله
تولڠ  أوراة   ايسي   أوتق  بندوم  رلى   *  تمر  كبوه  بن  سوة   تمر  عذاب   سابى
بتا ايمان وهى يق جوة دان هى جوة دا    *  ري  چيت  كبيت   يڠ   كفكه  تافراسا
سمبهيڠ   ليمڠ  بى   تانڠڬل  بنا  جا   كا    *  يڠ    كفكه  دهى  تا كبه   بك  مصلا
(  تمت  والحمد لله  رب العالمين)

 

Transliterasi/Alih aksaranya:

Bismillahirrahmanirrahim

Wajeeb Iman dum geutanyoe akan Nabi  * wajeb pateh peue nyang  neukheun uleh Nabi

Beuta pateh nyang goh datang neu peukhaba  * miseue mawot nyang that saket tapeurasa

Miseue neupeugah adeub kubu disikaphe  *  ureueng maksiet nyang tan taubat mate jahe

Ureueng mukmin neubri niekmat dalam kubu  * niekmat Syuruga Tuhan buka keunan laju

Beuta pateh uroe kiyamat dudoe teuka  * nyankeu uroe keusudahan haru-hara

Buleuen ngon uroe pi gurahna bintang meuhambo  *  langet meulinggang bumoe meuguncang meu hubo-hubo

Suroh Tuhan Israfi yub sangkaikala  *  habeh mate bandum sare saffan safa

Habeh mate bandum sare malenkan Tuhan  *  langet ngon bumoe konle menoe ka geusimpan

Umu peuet ploh thon nyang meunan nyan saffan safa  *  teuma turon hujeun puteh Maul Haiya

Habeh timoh bandum tuboeh ka teuduek-duek  * peukayan tan bandum teulhon bineh uruek

Teuma neuyub sangkaikalale Israfi   meuwoe nyawong bandum teuma tanle mate

Teuma geuron geuhimpon u Padang Mahsya  *  dumna rakyat ka geuhisab geupareksa

‘Oh meuhimpon dumna rakyat geujok surat  *  teuma nyang cok wie ngon unun ban nyang babat

Teuma nyang cok deungon unun meubahgiya  *  teuma nyang roeh ngon jaroe wie ka ceulaka

Teuma geuceng dumna amai lam neuraca  *  got ngon jeuheut phui ngon geuhon disinan nyata

Nyang geuhon amai keubajikan asoe Syuruga  *  teuma nyang phui dum geupului kam Nuraka

Teuma tajak ateueh titi Sirathal Mustaqim  *  haloih pi that geupeuduek ateueh Nuraka Jahim

Panyang titi saboh riwayat lhee ribee thon * taek tajak ateueh pucak deungon tatron

Titi haloih lagi tajam nibak peudeueng   *  sidumnan haloih sidom putoih adat meulinteueng

Teuma nyang jak ateueh titi le ban babat * karonya Allah ladom pantah naban kilat

Ladom pantaih na keudum nyan angen bawa * teuma ladom naban guda geupoh lawa

Teuma ladom ban ureueng plueng nyang that caca * teuma ladom pantah bacut han that lanja

Ladum budoe? meu-eue meu-eue meuseuk-meuseuk * meuhila-hila lam Nuraka ka teusireuk

Nyang silamat ateueh titi jeumeurang pi troih  * bak hudh Nabi krueng Kalkausa disinan piyoh

Bineh krueng nyan kande pi le naban bintang  *  asoe meuhat seb sidroe-droe hanpeue riwang?

Nyang jeb ie nyan deuek pi hanle grah pi hanle  *  karonya haq ho nyang kheundak keunan neubre

Lheueh nyan teuma ureueng mukmin tamong Syuruga  *  seuntok sabe teubiet hanle rok-rok masa

Keukai sinan cit hana had hana hingga  *  dalam lazat seuntok mangat cati rasa

Ngon boh kayee cit meuteuntee rasa le ban  *  soe nyang pajoh pruet han sungkoeh lam sukaan

Suntok kayem lam teukhem-khem hate mangat  *  ngon makanan ngon minoman lazat-lazat

Tuha hanle saket hanle rok-rok masa  *  umu sadum saban-saban muda bahliya

Di sikaphe dum teugule lam Nuraka  *  teutap sinan ji teubiet han rok-rok masa

Padum adeub uroe malam hana teudoh  * keu makanan buah zakom nyang ji pajoh

Boh zakom nyan tutong that tajam ban duroe  *  soe nyang  pajoh hangoh tuboeh apui sinaroe

Padum adeub kala limpeun uleue pathuek  *  lom ngon rante geuboeh pasong   rinthiek-rinthuek

Ureueng mukmin umat Nabi nyang meudeesya  *  nyang tan taubat nyan pi geutot lam Nuraka

Kira-kira ube deesya dumnan geutot  *  han jilalu apui Nuraka bak han patot

Ladom tutong meung ‘oh gaki ‘ohnan saja  *  ladom beuteh ladom habeh ladom ‘oh pha

Ladom tutong meung ‘oh takue illa dada  *  teuma ladom habeh bandum illa muka

Sineucut-neucut adeub page ngo lon peugah  *  kawoh apui nibak gaki bandua blah

Tuleueng urat asoe utak bandum reule  *  teuma geuboeh bansot teuma adeub sabe

Beuta Iman wahe Nyak Cut dan he Cut Da  *  roe cit keubit nyang  geupeugah ta peurasa

Seumbahyang limong bekta tinggai beuta jaga  *  nyang geupeugah dhoe takeubah bak mushalla

 

( Tamat, wal hamdulillahi Rabbil ‘alaminn)

 

Catatan: Alhamdulillah, setelah  saya dan putra tertua belajar cara mengetik huruf Arab dan huruf Arab Jawi/Jawoe selama lk 2 jam pada Drs.Mohd Kalam Daud, M.Ag;  sekarang secara tertatih-tatih saya sudah dapat mengetik komputer huruf Arab. Orang pertama yang dapat menulis pada “kursus kilat” menjelang bulan Puasa 1437 H ini adalah putra saya, kemudian saya belajar lagi padanya. Inilah hadiah hidangan  pertama saya kepada para pembaca blog Tambeh. Posting ini bersempena Ultah ke 32 musibah lalin saya di Kalasan, Yogyakarta pada 25 Ramadhan 1405 H atau 15 Juni 1985 M. Semoga Allah Swt senantiasa menolong saya sekeluarga dan segenap kaum Muslimin, Aminn!.

 

 

 

 

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s