Kisah PERANG RAJA SI UJUT

Kisah
PERANG RAJA SI UJUT
Geu-useha, lee
= TGK. MUHAMMAD EL
ABDUL MUTALLIB =

RANUB SI GAPU
Assalamu alaikom kaom saudara
Saleuem sijahtra keu gata bandum
Keu umat Islam agam ngn dara
Tuha dan muda kuta dan duson

Keu ureueng Aceh terleubeh aula
Lon kirem doa sireuta saleuem
E Ya Tuhanku beusamporna
Lagee lon cita beu-eek meuteumeung

Kareuna Aceh bijeh mulia
Beu-eek meugisa seumangat jameun
Bek gadoh dasar seni budaya
Pusaka lama beunasit tatueng
Karena Aceh bijeh mulia
Sampou Malaka geumat keurajeuen
Kareuna Bahasa ditunyok Bangsa
Bek taboh kada hai intan buleuen

Bek taboh pirak galak teumaga
Bek taboh sutra galak keu beuneueng
Bek taboh Madrou ohna Ma muda
Wate sengsara tansou peureumeuen

Bek sampou lupot bak ikot masa
Lon takot teuma jiba lam rangkeuem
Peuturot putrou palou ngon raja
Peuturot masa gata luka rueng

Peuturot nabsu jihui lam paya
Peuturot hawa meraba hareuem
Beklee that gadoh peungaroh lua
Cuba pareksa puena meuteumeueng

Laba ngon rugou keudro takira
Dengon Agma puena meulinteueng
Hukom ngon Adat sotupat hana
Hana mehoka resam ngon kanun

Nyankeuh jeut Aceh eleh lagoina
Mesikai dama jinoe tanlee yum
Karena aneuk tanle pateehma
Hana jinietna keu ureueng jameun

Asai kana buet ban heuet keurija
Sabe saudara pih jadeh mekeueng
Seb gob peukaru jihadu domba
Di ureueng lua atrateuh jitueng

E aneuk payong jantong hateema
Keunou tagisa bak gaki rinyeun
Beuthat ka tatron tarawoun donya
Ingat gunama bu teuh geusuleueng

Bak buleuen lapan sangna P.K.A
Tawou u Banda jak eu peukateuen
Mangat tabuka pusaka lama
Takalon puena sinan meuteumeueng

Talob sejarah bagah tabaca
Lethat calitra nyang meyum-meyum
Miseue kisahnyoe jinou ulonba
Atra pusaka bak ureueng jameuen

Riwayat Raja ISKANDARMUDA
Geuprang Malaka bila geujaktueng
Johor dan Bali Banang ngon Guha
Si Ujut geumita nyawong geneuktueng

Dalam SANTUNAN, sinan neubaca
Sambong calitra natieb-tieb buleeun
Lon kirem langsong duson ngon kuta
Keuneubah MAHA rata lon bulueng

Keu, KANWIL DEPAG, hak ta medo’a
Tanyou bersama paleuet talinteueng
Geutem Lestari Seni budaya
Keuneubah lama geutem peureumeuen

Kepada Bapak AZHARI MURTADHA
Lon kirem do’a sireuta Saleuem
Ranub sigapu ka lon peumada
Saleuem sijahtra Pembaca mandum
Banda Aceh/Darussalam
= Tgk. Muhammad el Abd Muttalib =
– 6 Rajab/21 Peb. 1988 M.

 
II. SALSILAH, RAJA ACEH

Dengon Bismillah kisah lon surat
Lontueng beureukat ISIM Zat Esa
ALHAMDULILLAH pujo HADHARAT
Donya akhirat lengkap kuasa

Seulaweuet saleuem lonkheun lom mehat
Akan Muhammad saidil ambiya
Keu pada wareh meceh lom sahbat
Keunan dum mehat rahmat sijahtra

Rahmat ngon saleum lon kheun lom meuhat
Keu rakan sahbat para pembaca
Akan pengarang nadlam Hikayat
Doa selamat saleum sijahtra

Mari bersatu timu ngon barat
Beusapui pakat keurija sama
Tempat ulon nyou nyang jinou si at
Di Peuluiemangat di Jangkabuya

Tegur dan sapa bak rakan sahbat
Sangat lon harab ikat saudara
Wa am ma badu laju lon surat
Ulon riwayat salsilah Raja

Kadang naskah nasalah silab
Dudou taralat ta seutot punca
Bek roh tacela sireuta upat
Nyong ulon harab meu ah beuraya

Reudok meugeudum ujeuen ngon kilat
Pineueng muda klat keubat luka
Asai teumuron deungo lon surat
Raja syah daulat Iskandarmuda

Sultan Juhansyah nyang fon gelakab
Raja syah doulat sangat takwa
Neumat keurajeuen padum treb lambat
Ohdudou mangkat meuninggai donya

Sultan Mahmudsyah bagah geu angkat
Seunang that rakyat gobnyan mat raja
Sultan Firman yohnyan pih mangkat
Geugantou mehat laenlom raja

Sultan Mansursyah bagah geu angkat
Raja nyong taat dalam Agama
Dudou nibaknyan gobnyan pih mangkat
Geugantou mehat laem lom raja

Alauddin Juhansyah bagah geu angkat
Raya martabat pangkat pih ala
Ohwafeuet gobnyan komdian mehat
Geuganto leugat laen lom raja

Sultan Huseinsyah bagah geu angkat
Gobnyan pih mehat meninggai donya
Sultan Riayatsyah bagah geu angkat
Gobnyan keuh nyong mat tampok kuasa

Gobnyan pih dudou sampou kamangkat
Laen geu angkat geuboh keuraja
Sultan Salahuddin yakin ibadat
Nyankeuh geu angkat geuboh keuraja

Wafeuet rajanyan komdian mehat
Laen geu angkat mehat lom raja
Sultan Ala uddin peumimpin geumat
Gobnyan pih meuhat meninggai donya

Sultan Pariyaman lheuhnyan geu angkat
Gobnyan keuh doulat nyangmat kuasa
Nan Pariyaman nyan nama teumat
Kareuna sabab sinan judonya

Nyan pih oh achee hanalee hayat
Laen lom meuhat geuboh keu raja
Sultan Janal ta kenal meuhat
Gobnyan mehat nyong matkuasa

Gobnyan pih sigra hingga ka mangkat
Mansorsyah mehat geuboh keuraja
Sultan Buyong nama geulakab
Kareuna sabab kinayah nama

U Pagaruyong gobnyan metempat
Sinan keuh mehat tempat judonya
Gobnyan oh ache hanalee hayat
Laen geuangkat nobat keuraja

Ala uddin Ri’ayatsyah bagah geu angkat
Nyong nyan pih mehat mangkat lom teuma
Laen geugantou dudoulom meuat
Radhiyah syah doulat nyongmat kuasa
Hingga padum treb laweet komdian mehat
Yohnyan ka mangkat raja wanita
Keu raja geukireem surat
Geunkheuen ka mangkat hanalee raja

Dudou pih bagah geubalah surat
Baro geunobat laeenlom teuma
Raja nyang meugah bagah geu angkat
Nama geu lakan Iskandarmuda

Po teumereuhom nyong peukong adat
Hukom lam kitab bak syiyahkuala
Raja that adee bukon leehebat
Seunang that rakyat duson ngon kuta

Masanyan keuh prang garang ngon hebat
Senjata geu angkat lawan Belanda
Lheeploh thoun leubeh Aceh lamgawat
Jikeuneuek gogat Aceh muliya

Beurangdum tareek han eek digogat
Deungon beureukat Iskandarmuda
Seuramou Mekkah metuah that-that
Sapui han jilhab pengaroh lua

Dengon Ulama ka sapui pakat
Hukom ngon Adat getthat geu jaga
Han eek jipikee lee kafee kaplat
Han eek jikarat nakmat kuasa

E adeek Bungsu mekru semangat
Cuba ta ingat sejarah lama
Supaya mefom bahlee lon surat
Sigetu sapat lon teu oh haba

Aceh lhee sagou keubit bakothat
Yohmasa doulat Iskandarmuda
Kaom Muslimin yakin berjihat
Karena sabab peutheun Agama

Geupeutheuen nanggro bekkuto bejat
Peutheun Martabat Nusa dan Bangsa
Geupeu theuen Hukom bek sirong Adat
Geupeutheun Rakyat bekgob inanya

Geupeutheun Aceh bijeh keuramat
Geuprang sangkilat kafee Belanda
Belanda talo hanco dum ranab
Han eek ji ingat lethat binasa

Sitna bukti dali talihat
Le that-that jeurat kafee Belanda

Di Banda Aceh bineh jalanrab
Watee talewat Meulaboh – Lhoknga
Jalan Uleelheue peukeue u barat
Uwie talihat kubu Beulanda

E adek bungsu meukru seu mangat
Cuba taingat sejarah lama
Supaya meuphom deungo lon surat
Sigeutu sapat lon teoh haba
1. Raja Wilhilmina nama jimeuhat
Jikirem alat dum bala tentra
Di Amsterdam di sideh teumpat
Menuju leugat u Puloruja

Kapai lam laot seupot dum sarat
Leungkap ngon alat meriyam lila
U Pulo Jawa mula jitakat
Keunan jikarat fon jiprang kuta

Jawa pih talo hanco lee siat
Sidum nan kuat tantra Belanda
Di raja Solo kayo geuh that that
Jaroe geu angkat letak senjata

Jawa menyerah kalah siasat
Belanda meuhat jireubot kuta
Di Pulo Jawa kuasa jimat
Ngon cara mangat jiduek Belanda

Jipeukong kuta rata jeueb tempat
Dan jipeukuat alat senjata
Ato baresan angkatan darat
Jineuk beurangkat Pulo Sumatra

Yohnyan jiteuka Sumatra Barat
Keunan jitakat tantra Belanda
U Pagar Ruyong nyong fon jikarat
Jiprang dum rakyat ji reubot kuta

Padang katalo hanco lee siat
Kajiduek teutap tantra Belanda
Sampoe u Singkee kafee beurangkat
Jibangon alat dum balatentra

2. Ngon raja Bujang jineuk meusahbat
Ji peuduek pakat keureuja sama
Raja han neuteem neupaleng leugat
Ngon kafee kaplat peue meu saudara

Oh dudoe jiprang raja nyan meuhat
Sinan fon sabab prang ngon Belanda
Phon dari Singkee kafee ji karat
Hingga merambat troh Kuta raja

Nibak masa nyan muprang that hebat
Yoh masa doulat Iskandar Muda
Dalam pu prangan padum treb lambat
Raja pih meuhat meninggai donya

Peunyaket Ta’un keunong lee leugat
Yohnyan ka mangkat Iskandar Muda
Hingga meugantaou dudou lom mehat
Geuboh keu daulat Mughai syah raja

Wafeut beliau dudou geu angkat
Aneuk Syah doulat Iskandar Muda
Sapiya Tuddin nama geulakab
Muprang that hibat dengon Belanda

Raja binou nyou bako that hibat
Bak pimpin rakyat di Aceh raya
Sapiya Tuddin lheuehnyan mangkat
Geuboh keu doulat laen lom raja

Nan raja Sayed panggelan singkat
Nama nyang lengkap laen lom teuma
Fiqiya Tuddin yakin ibadat
Nurul zaman hat ujong nyan nama

Oh lheueh nibaknyan gobnyan ka mangkat
Laen lom mehat geuboh keu raja
Sultan Inayah Syah megah berpangkat
Ujong meusambat Qaha latuddina

3. Wafeuet beliau dudou geu angkat
Raja Kemalat lon singkat nama
Syaziatuddin ujong mesambat
Menan riwayat dalam calitra

Wafeuet beliau dudou lom mehat
Laju geuangkat laen lom raja
Badrul Alam Sultan Doulat
Syarif Hasyem, hat lakab ujongnya

Jamalul laila nama pih mehat
Nama panyang that rabna sibanja
Wafeuet beliau dudoe lom mehat
Laen geu angkat mehat lom raja

Syaref Ibrahim ujong nyan mehat
Jamalul alat, hat Badrul miza
Dudou geumuprang ngon Pocut Muhammad
Bak laen hikayat na geu calitra

Wafeuet raja nyan laen geu angkat
Juhue Alam, meuhat geurasi nama
Nan imanuddin nyan pih geulakab
Raja Syah daulat panyang that nama

Ima Nuddin nyou dudou pih mangkat
Geu gantou meuhat laen lom raja
Syamsul Alam, nan raja nyan mehat
Sibuleuen lambat geumat kuasa

Alauddin Ahmad Syah bagah geuangkat
Kuasa geumat ganto ayahanda
Nyan keuh Selutan pikiran cakap
Bak pimpin rakyat that bijak sana

Nanggrou pih aman senang that rakyat
Laot ngon darat gangguan hana
Bandum geutampung ureueng melarat
Teumpat ibadat bandum geu bina
4.Gobnyan pih dudou geuwou akhirat
Laen geu angkat nyang mat kuasa
Alauddin Juhan Syah bagah geuangkat
Gobnyan keuh mehat nyang mat kuasa

Wafeuet beliau wou u akhirat
Laen geu nobat angkat keu raja
Sultan Mahmud Syah bagah geuangkat
Raja nyan mehat Eleue mee pih na

Maha Raja Leube tentee geulakab
Badan pih tegab lanjut usia
Walaupun meunan gobnyan pih mangkat
Tammat riwayat silsilah raja

Masalah rambu sigeutu sapat
Mangat taralat taseutot punca
Nyata lam Buku Buku hikayat
Dalam seunurat keuneubah maha

Lon cok kemenyan lon hoi ngon asap
Puwou seumangat sejarah lama
Teuduek haba nyou oh nou sikejab
Mewou Riwayat laen calitra

( Disalin dari majalah Santunan no. 138 halaman 46 – 47)
Penyalin: T.A. Sakti, sambil menunggu saat berbuka puasa, 19 Ramadhan 1433 H bersamaan 7 Agustus 2012. Disalin selama tiga hari, yang pada hari kedua turut dibaca/dikte oleh T. Amalul Arifin, putra bungsu saya. Bale Tambeh, 18.48 Wib. T.A. Sakti.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s