Hikayat Malem Dagang – 3

371. Lhok sumawe geupeunan nanggroe
Keureuna buet jaroe Brahim Bapa
Tujoh boh kadoet neu kuet anoe
Neu pasoele Brahim bapa

372. Tujoh kadoet ka neu tamon
Ulah bangon gunong raya
Asai nyang jeuet neu kuet anoe
Geukheun meunoe Po Meukuta

373. Brahim Bapa teuga han soe
Meugah bunyoe sigala donya
Neucok anoe tujoh kadoet
Jeuet keu laot lhok lagoina

374. Meucuhu gah sigala nanggroe
Troh meubunyoe ubak raja
‘Oh meugah bak raja kafe
Ji bungkale keunoe teuka
375. Ji keumeung jak eu pakri bangon
Meugah geukheun teuga raya
‘Oh troih keunoe raja kafe
Ji teungohle sigra-sigra

376. Sajan ‘oh toek dum u darat
Ditanyong pat Brahim Bapa
Brahim Bapa di Lhok Seumawe
Han jituri ule raja
377. Neu peuleumah anoe neu geu masak
Nyoe keu neubuet Brahim Bapa
Oh ji eu anoe tujoh kadoet
Raja teumakot yo sang geumpa

378. Antara ureueng po nanggroe
Meung buet jaroe teupeungapa
Raja kafe kuyut teumakot
Ji plueng u laot ek lam behtra

379. Nyankeu sabab nyang na meune
Lhok Seumawe geuboeh nama
Lhok Seumawe nama nanggroe
Keureuna buet jaroe Brahim Bapa

380. Nyan peue Po Ja nyang meurandeh
Peue nanggroe jeh geurasi nama
Deelat togayu cahi alam
Nyang mei geuggam alam donya

381. Nyang meurandeh ampon keutahuan
Nyang ji meunan Sawang Peukula
Masa teuka tuan Putroe Leubu
Sinoe jitabu Peukula Jawa

382. Ampon tuwanku meureuribee
Bijeh kayee jime di Jawa
Adak neu tanyong nama nanggroe
Nyan nyang ji meunan nanggroe Samtalira

383. Peue bu sabab ji meunan Pase
Nama asee Brahim Bapa
Neu peu-udep saboh asee
Nyan si Pase geuboh nama

384. Poteu beudoh di Seumawe
Beurangkat le Po Meukuta
Kaneu jeumeurang Krueng Seumawe
Neu halale u Meuraksa

385. Meuron keu rakyat meukeukatoe
Leupaih u Jamboe Po Meukuta
Poteu bungka hana lale
…………………………..

386. Oh sajan troh u Jeumahan
Neu piyoh sinan sikutika
Di Jeumahan rakyat meuron-ron
U Blang Nibong ka neu hala

387. Poteu pi toek u Kuwala Keureutoe
Neu piyoh droe sikutika
Di Kuala Keureutoe neu jeumeurang
Ka u Lapang Poteu hala

388. Neu bungka hinanle neu tujah
U Ceureumen Gajahle neu hala
Poteu bungka di Ceureumen Gajah
U Piyadahle neu hala

389. Neu bungka ninan u Blang Lhok
Leupah u Lhok neu seu meuseunia
Neu bungka ninan ka neu tujah
Ulee Nipahle neu hala

390. Oh sajan troh u Jambo Aye
Neu meupike sikutika
Poteu tanyong bak Ja Madinah
Aulia Allah teugoh seutia

391. Soe mei taboeh keu panglima prang
Siri Uleebalang nyang meubahgia
Saleh taboeh Panglima Pidie
Ureueng nyang khie nibak raja

392. Bah neu taboeh panglima nyan
Nyang ji meunan Maharaja Indra
Teuka cit narit Panglima Pidie
Ureueng nyang khie nibak raja
393. Ampon tuanku meuribee ampon
Seumah ulon namiet hina
Panglima Pidie bek taboeh keu panglima prang
Tan rukon tan wang mit ceedara

394. Hana wali hana karong
Han soe tulong jih panglima
Teukeudi mate bak ji muprang
Tan syeedara wang jitueng bila

395. Mit ureueng cok keu peuneudeh
Hansoe gaseh tan ceedara
Panglima pi mate rakyat jiwoe
Habeh geu kiweue sigala donya

396. Ampon tuwanku tanda get baten
Neu peu ek laen neuboeh panglima
Soe cit jinoe panglima droe
Siri sagoe nyang mei panglima

397. Meuhan tatem peu-ek laen
Lahe baten kuboeh gata
Jakalee taboeh tuwanku panglima prang
Uleebalang nyang meubahgia

398. Tuanku taboeh Malem Dagang
Bak puga prang guna biasa
Malem Dagang that geu takot
Mise ji leubat muka ji bunta

399. Lagi badan that samlakoe
Suara peungaroe meunimbang rasa
Le ngon wali sampee karong
Le soe tulong jih panglima

400. Le ngon aduen le ngon adoe
Le soe gantoe jih panglima
Habeh geukira karong ngon wali
Na lhee reutoh ji nyang sasa

401. Bandum ji santeut dum ji mate
Geudubang han ji cre sajan panglima
Meuseuki uroe meuseuki malam
Watee phon klam watee sinja

402. Meuka jidong ji meuteuot
Hantom ji surot sukee panglima
Nyan keu nyang mei keu panglima prang
Uleebalang meubahgia

403. Lalu meututo Ja Madinah
Aulia allah teugoh seutia
Ampon tuwanku meuribee ampon
Seumah ulon pacai nyang hina

404. Bek taboeh tuanku Malem Dagang
Cucoku seudang teungoh muda
Laman mate cuco samlakoe
Hansoe gantoe laen panglima

405. Adak siribee neupeu-ek laen
Han kusyen meuse panglima
Bek taboeh Malem Dagang
Tapeu upah prang nanggroe Meulaka

406. Hansep siare trok sigantang
Tapeu upah prang u Juho Lama
Allah bek tatham Po Ja jeunulang
Malem Dagang bah jih panglima

407. Meung koen kuboeh Malem Dagang
Han ek soe guncang nanggroe Meulaka
Han ek taprang nanggroe Banang
Na soe teuntang u Johor Lama

408. Han soe prang u Juho Bali
Han soe titi nanggroe Guha
Keureuna Si Ujut that kaya damoh
Mudai Urupah han jituho ba

409. Adak taboeh tuwanku Malem Dagang
Padum boh nanggroe neu pulang jitueng meusara
Padum boh tabri nanggroe
Nyang dijaroe jiteung meusara

410. Bak uroe nyoe beuhabeh janji
Nanggroe siri keu panglima
Adak meunan Ja teungku droe
Meubri nanggroe keu panglima

411. Adak u Timu ‘oh Pasi Puteh
U barat keudeh tanggoe ‘oh Daya
Adak u blang tango meurandeh
Gunong bladeh tanggoe Kuwala

412. Keujih kubri ngon upeuti
Sithon kubri meuh limong bahra
Lom kupulang gunong Meulaboh
Tanggoe u Susoh troih u Tripa

413. Po Ja kapulang nanggroe gampong
Jinoe kupulang Pulo Ruja
Lom kupulang Candopati
Jeunoe kubri Gunong Lingga

414. Po Ja kupeujok nanggroe Aseuhan
Kubri sajan ngon Samtalira
Bahle dikamoe bek tinggai nanggroe
Cuco samlakoe bah jih panglima

415. Bak uroe nyoe Po Ja habeh janji
Nanggroe mubri keu panglima
Jeunoe meututo Malem Dagang
Panglima prang guna biasa

416. Hoka gata wali ngon karong
Tapeurab bak ulon wahe neusa
Tapeurab keunoe karong ngon wali
Taleungo janji haba panglima

417. Beuhabeh dum peutuwa nanggroe
Peuet ploh droe meung panglima
Sare kutanyong soe ek tapanglima prang
Sambot peunulang nibak raja

418. Jeunoe Dalem sambot nanggroe
Uroe dudoe bek meudakwa
Tamupake ta meuseunoh-seunoh
Han kujinoh mita dakwa

419. Jeunoe tasambot dumna rakan
Yoh dihadapan peuneujok raja
Ji metuto karong ngon wali
Lhee reutoh ji nyang sasa

420. Adoe,dilon han kupanglima prang
Tuwah kureueng mit bahgia
Goh martabat nibak Allah
Hana tuwah kupanglima

421. Adoe payong po samlakoe
Sambot jeunoe teungku bak gata
Jeunoe gata panglima prang
Uleebalang dum jiyue gata

422. Nyampang-nyampang bak meusaket
Kudong kuapet kupeungon gata
Pihak na gaseh teungon sayang
Nanggroe ta pulang keu ceedara

423. Nanggroe tajok kupeulaku
Kutueng usui ku euntat keu gata
Ku peujeuet droe upama gilang
Kutueng geumilang di nanggroe gata

424. Kru seumangat Dalem payong
Adak bit ulon sirasa gata
Bit pi kamoe mumat nanggroe
Sirasa nyum droe ceedara

425. Peue bu meujab kamoe pirak
Asai bak galak gata ceedara
Jeunoe meututo Po Ja Pakeh
Guree nyang leubeh ulama raya

426. Cuco teungku Malem Dagang
Ta panglima prang po bak gata
Bek tatakot bek ta malee
Na sajan kee lakee do’a

427. Peue katakot cuco teungku
Na ku guru kalon kutika
Uroe malam cuco tan teudoh
Quru’an lhee ploh dikee kubaca

428. Peue ka takot ulee balang
Ka puga prang jalan agama
Peue katakot kaprang Yahudi
Nibak Nabi asai mula

429. Peue katakot kaprang sabi
Ureueng meu_ungki keu agama
Masa neu prang kafele Nabi
Tuan teu ‘Ali neuboh panglima

430. Bak siuroe nyoe raja muprang
Malem Dagang neuboh panglima
Cuco ka kheun droe ubak Nabi
Beuna ngon suci bek talupa

431. Beureukat do’a Tuanteu Ali
Tuhanku neubri kuat kuasa
Masa kuteuka di nanggroe Madinah
Allah peuleumah saboh rahsia

432. Masa kucre nanggroe Meureudu
Poteu Allah bantu Nabi peulahra
Beudoh cuco Malem Dagang
Poteu Allah peutimang Nabi peulahra

433. Geuboh panglima di Jambo Aye
Rakyat sare meuseusuka
Sajan geujak Malem Dagang
Meuseunoh gulam dum geurata

434. Poteu pi neu ek u lam Gurab
That meucakap meuseusuka
Layeue ulee ka jitarek
Ka geupeu-ek ngon layeue raya

435. Ka jitarek ngon taloe klat
Gurab pi leugat u laot raya
Ka jiboeh layeue teungoh
Angen pi jroh santeuet paksa

436. Yoh masa nyan Poteu meulayeue
Angen pikheue keunong paksa
Jitron angen seupoi-seupoi
Meugeu gasui jiplueng behtra

437. Ladom keulasi ji teumimbang
Siteungoh dagang lakee do’a
Ie diulee sang bungong meulu
Kapai meutabu di laot raya

438. Lhee uroe lhee malam peulayaran
Peujam daratan saphan-sapha
Oh sajan troih sama teungoh laot
Nanggroe seupot glab gulita

439. Neu ngieng u laot nanggroe seupot
Neu ngieng u darat saphan-sapha
Ie laot dak mise apam
Nanggroe han meupat donya

440. Poteu Meukuta Alam meunyum teumakot
Raja kuyut manoe ie mata
Neu meusabda bak Po Ja Pakeh
Guree nyang leubeh ulama raya

441. Ho geutanyoe Ja teungku droe
Siri nanggroe saleh angen ba
Ampon tuwanku cahi alam
Nyang mei geumgam alam donya

442. Bek tagundah bek ta takot
Pakon kuyut dihadlirat mulia
Ulonteu eu dalam Surat
Hana sapat nyang na cidra

443. Mu teumanggoh umu lhee uroe
Katroih geutanyoe ho nyang tahala
Adak meunan Po Ja Pakeh
Kupaban bah preh tanggoh gata

444. Adak jameung meukheundak woe
Han meutupat nanggroe han meuho donya
Kudong pi mate kuplueng pi mate
Get keu sare sajan gata

445. Yoh masa nyan Poteu meulayeue
Angen pikheue keunong paksa
Lhee uroe lhee malam pelayaran
Troih u Aseuhan po meukuta

446. Masa nyan kapai ka jibaroh
Geulhom saoh di mieng kuala
Poteu meusabda bak Ja Pakeh
Guree nyang leubeh ulama raya

447. Peue nanggroe nyoe Po Ja teungku droe
Nyoe peue nanggroe geurasi nama
Tuanku nyoe ji meunggla nanggroe Aseuhan
Raja ji meunan Raja Muda

 

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s