Hikayat Malem Dagang – 2

271. Cuco reoh basah ngon badan
Maklum pi tan barang sabda
Bukon bubarang keusang-keusot
Ngon uroe toet peudeh mata

272. Ni phon beungoh kon troih cot uroe
Poteu iem droe hana haba
Saket ate Kuja Pakeh
Guree nyang leubeh ulama raya

273. Ja Pakeh beungeh bukon bubarang
Neugisa geudubang na sihaih mata
Kuja Pakeh that amarah
Mata neumirah ban aneuk saga

274. Wahe aneuk cuco payong ka geumpom
Ka seumpom boh gadong ngon keutila
Ka saleng boh labu ngon boh birah
Ureung han ek muntah darah bek kapeumulia

275. Bek ka takot bek ka malee
Kawoe sajan kee jak udehta
Ohka kuwoe, cuco u gampong
Adak geupuntong hanku seumah raja

276. Oh ka kuwoe, cuco u nanggroe
Adak geugo gajoe han ku seumah raja
Adak jeuet kudong di nanggroe Aceh
Adak han kuweh u nanggroe raya

277. Han get kawoe u nanggroe Madinah
Bak tempat nang mbah keukai baka
Peugot kudoeng di nanggroe Meureudu
Dumnoe laku geu tanyoe geupeujra

278. Oh jideungo meunan areutoe
Bujang dua droe plueng bak raja
Deelat togayu cahi alam
Seumah laman di srupada

279. Neu peumaklum tuanku Ja Pakeh Madinah
Ngon amarah beungeh raya
Meungka neuwoe nyan u gampong
Adak neu puntong han neu seumah raja

280. Laman ka neu woe nyan u nanggroe
Beu tago gajoe han neu seumah raja
Neuyue seumpom boh gadong ngon boh birah
Ureueng han ek mutah darah bek tapeumulia

281. Beukeu teume neudong di nanggroe Aceh
Beukeu han neuweh u nanggroe raya
Han got neuwoe u nanggroe Madinah
Bak teumpat nang mbah kekai baka

282. Peue neudong di nanggroe Meureudu
Dumnoe laku geutanyoe neu peujra
Adak meunan takheun hai bujang
Jak ta riwang bak Ja ulama

283. Jak leh takheun bak Ja Pakeh
Hana jadeh teumeureuka
Tapileh boh gadong ngon boh birah
Ta peu indah Ja ulama

284. Tayue piyoh Ja Madinah
Kareuna Allah han teumeureuka
Ban jideungo sabda meunan
Bujang jak kheun bak Ja ulama

285. Ohsare troih bak Ja Pakeh
Guree nyang leubeh ulama raya
Ji beuot jaroe buju siploh
Jiyue piyoh Ja ulama

286. Jipileh boh gadong jicok boh birah
Ji peuindah Ja ulama
Ja Pakeh piyoh diyub keutapang
Neu meutentang ngon Po Meukuta

287. Peue bulaku Ja teungku droe
Jeh ‘oh uroe gata han teuka
Tujoh uroe kamoe keunoe
Bak uroe nyoe ku ngieng mata

288. Pakri laku gata Meureudu
Kamoe ban laku han tapeuraja
Gata Meureudu hana muproe
That kreueh gigoe ban Si baka

289. Peu bulaku Ja teungku droe
Tujoh uroe kamoe di Simpang
Sidroe pitan keunoe teuka
Adak han mei kukeurajeun
Ta intat lam uteun taboih lam rimba

290. Adak han ek kugeunggam nanggroe
Taboeh geunantoe Jale gata
Ja Pakeh ngo sabda meumeunan
Han meu ban-ban troe ie mata

291. Ampon tuanku Cahi Alam
Nyang mei geunggam alam donya
Bukon tuanku salah kamoe
Cit salah droe Po Meukuta

292. Pakon han taboeh Uleebalang
Si carot nang rijang jula
Nyang han kuboeh peutuwa nanggroe nyoe
Nanggroe ji kamoe Ja ulama

293. Nanggroe kunyoe ku peubibeueh
Nanggroe wakeueh barang jan masa
Hana Geusyik hana Waki
Hana Tandi kuboeh Peutuwa

294. Ni phon jinoe kon toek ‘an page
Toek ‘an akhe umu donya
Beuta pateh Po Ja teungku
Nanggroe Meureudu dikamoe raja

295. Jampang- jampang hanseb breueh bu
U Meureudu kuyue jak mita
Adak na gaseh Ja ngon sayang
Gata guree prang u Malaka

296.Adak Allah bri umu kulanjut
Kunseutet si ujud meunalee jiba
Keureuna Si Ujud di nanggroe Aceh
Keuheuet jadeh meureubot raya
297. Pakri taba kamoe Meureudu
Habeh ka ta eu peut panca indra
Laman tuanku taba kamoe
Mate ureueng binoe dum tuha muda

298. Ampon tuanku Po junjungan Duli
Pane raseuki lam uteuen raya
Nyampang-nyampang hawa pisang
U Sarah Mancang hansoe mita

299. Nyampang nyampang hawa ji bhoh birah
U Sarah Gajah hansoe jak mita
Nyampang hawa ji jagong
U Gle Puntong hansoe jak mita

300. Nyampang nyampang ji jak u gle
Hansoe keumiweue bak tham rusa
Adak sangkira ji teungoh keudroe
Cula caloe mate lam rimba

301. Meureumpok gajah nyang ngon badeuek
Habeh meuseupeuk sigala rimba
Bek tagundah Po Ja keu ureueng binoe
Nabak kamoe akai bicara

302. Bek ta gundah Po Ja teungku
Na ngon jibloe bu barang ja masa
Limong tahe keu buet jaroe
Mangat jibloe malo ngon sutra

303. Jibloe kasab nyan ngon malo
Ji peusaho ji peugot ija
Barang jan jitron ureueng Meureudu
Peukayan jihu jroh jroh rupa

304. Jampang-jampang Po Ja kuyue tren
Jibri salen ija sutra
Na meung meuri ureueng bibeueh
Ureueng wakeueh nibak raja

305. Kubri ija lhee-lhee kayee
Ku yue bulueng rata rata
Meunan takheun bak ureueng binoe
Saleuem kamoe tuha muda

306. Uroe malam bek tabri ji eh
Buet bak peudeh ji meujaga
Meung tan Po Ja dudoe kutueng
Kupluek kulet rueng geunantoe ija

307. Ja Pakeh neuwoe reujang reujang
Lalu neu riwang pantah sigra
Lalu neucok meuh sinaroe
Neu kheun areutoe dua jirata

308. Wahe cuco tangke ate
Bek kaehle ka meujaga
Kamoe cuco geuba sajan
Hansoe kheun ban nyan keugata

309. Adak kamoe neuba sajan
Tinggai teutuwan dum teurata
Bak sidroe-droe neubi meuh siploh
Nyan peunajoh nibak raja

310. Masa nyan poteu beurangkat
Meuron keu rakyat dum barang na
Rakyat bungka dum meuriti
U Kaca Puri umieng kuala

311. Siuroe simalam Poteu sinan
Jitron yoh nyan ureung Samalanga
Jime teubee meureuribee
Meung boh kayee han teukira

312. Ek keu seumah panglima nanggroe nyan
Nyang jimeunan Maharaja
Deelat tuanku syahi ‘alam
Nyang mei geunggam ‘alam donya

313. Ureueng Samalanga abeh ka jitron
Ho neusuron neu seuraya
Kricit narit Meukuta ‘Alam
Raja ji meunan Iskandar Muda

314. Padum boh kapai digata sinoe
Peugah bak kamoe ureueng keukaya
Kapai tuanku disinoe neu tanyong
Kapai limong disinoe nyang hana

315. Sabda talhom kapai u laot
Ta seutet dilikot Cakra Donya
Beukeuna gaseh teu ngon sayang
Ta peungon kuprang u Juho Lama

316. Meung na Allah bri umu kulanjut
Keu seutet Si Ujut meunalee jiba
Nyang di laot jicok saoh
Didarat brangkat Poteu raja

317. Siuroe si malam Poteu meucre
U Timu le neu meuseunia
Poteu piyoh di bineh blang
Neu seumayang sinanle raja

318. Ban sajan lheueh neu seumayang
Teuka peunyayang narit reuncana
Ampon tuanku meuribee ampon
Seumah ulon laman sarpada

319. Eungkot KruengTimu leumak han sabe
Rapeueng ube be sampan raya
Adak meung saboh ta teumeung pajoh
Nyeum nyeum siploh asoe nyang na

320. Lheuh ji peugah haba meunan
Jibungkale yohnyan sigra-sigra
Sabda beuta seuet kuala nyoe
Meupajoh dikamoe eungkot raya

321. Uleebalang dum saket ate
Mata mirahle ban aneuk saga
Uleebalang dum ji keumaih
Ji yue cob amak nyang raya-raya

322. Ji cok beuliyong nyan nyan ngon galang
Kayee ji teubang lhee lhee go wa
Yoh masa nyan ji peulaku
Ji pluek bintang hu keu amak raya

323. Dum ji mita kulet teugoh
Saboh-saboh asoe si gunca
Dicob amak na lhee reutoh
Poteu suroh seuet kuwala

324. Mita keu taloe dum nyang teugoh
Geupeu saboh dum geukeumba
Poteu neutron Ule Aron
Rakyat meuhimpon meuleulaksa

325. Yoh masa nyan neu yue makeuen
Geupeuget neuheuen geulhob kuwala
Geucok blipayong nyan ngon galang
Jinoe geuteubang kayee nyang raya

326. Poteu neu yue lhob bukon le guntoe
Geu peurampagoe peuet punca indra
Yoh masa nyan geupeulaku
Kayee geupeudu na peuet-peuet deupa

327.Geuboeh jeuneurob jareueng-jareueng
Geutheun ie paseung jampang teuka
Na lhee reutoh meung saloran
Neu yue padan Po Meukuta

328. Jinoe Poteu neuyue padan
Geupileh rakan nyang sasa
Rakyat jidong sare kukoh
Jimat siploh saboh punca

329. Neuyue dong nyang cangklak-cangklak
Nyang meugumbak jipoh-poh cakra
Sajan jidong sare kukoeh
Ayoh-ayoh ji meudoda

330. Lhee uroe lhee malam geu gruncang
Tho seumatang saboh kuala
Di kuala kon katho tok u pucok
Teumalee teukhok le sigala donya

331. Masa nyan buya mate le that
Ji eue u darat sang meuruwa
Padum-padum mate lam abeuek
Ji meureuek-reuek sama rata

332. Sajan geudrob eungkot lam krueng
Meuteutamon ‘oh-‘oh dada
Nyang u laot lhee ploh sampan
Neuyue euntat keu rakan Po Meukuta

333. Eungkot geubulueng dum meusahoe
Dua boh sapo nyang raya-raya
‘Oh sajan lheueh geupumajoh
Neu bungkale yoh nyan Po Meukuta

334. Nyang di laot geucok saoh
Di darat berangkatle Poteu raja
Poteu beudoh teuma ninan
Neu piyoh keun nyan u Peudada

335. Poteu piyoh keu di sinan
Rakyat sajan meuleulaksa
Lheueh ji manoe rakyat meukatoe
Bungka jinoe Po Meukuta

336. Troih keu rakyat dum meukeuboek
U Krueng Kukoek Po Meukuta
Di Krueng Kukoek dum meuron-ron
U Jamei Mon neu meuseusuka

337. Bungka ninan dum meuron-ron
Uyub jitron neu meuseuniya
Rakyat piyoh dum meuriti
Di Blang Juli meuseusuka

338. Poteu meusabda bak Ja Pakeh
Guree nyang leubeh Ulama raya
Hoka gata Ja Madinah
Aulia Allah teugoeh seutia

339. Soe krajeuen dilee nanggroe nyoe
Ta peugah jinoe Ja ulama
Ku eu PoJa meusigak that
Nyoe keu teumpat raja-raja

340. Bukon keurajeuen tuwanku sinoe
Teumpat piyoh droe Raja Deureuma
Yoh neu meukawen ngon Siti Bangsawan
Anak-anakan Meureuhom Peudada

341. Sideh gampong di Peusangan
Neu meukawen keunan bak Meureuhon Peudada
Nyampang-nyampang tuanku neu woe
Sinoe piyoh droe Raja Deureuma

342. Neu krajeuen tuanku ampon
Sideh di Tambon teumpat astana
Masa krajeuen Po Ja raja nyan
Ija tuan padum hareuga

343. Ija geumeukat tuanku limong haih simaih
Hana lepaih geutueng laba
Adak meunan Po Ja teungku droe
Bah dikamoe muboeh ganda

344. Di kamoe mumeukat tujoh haih simaih
Han kubri leupaih jitueng laba
Nyampang-nyampang jibloe le ureueng gasien
Bak jeut ji kuwien aneuk jidua
345. Habeh haba Poteu sinan
Neu bungka yoh nyan Poteu raja
Poteu beudoih niyub Jiton
Rakyat meuron-ron meuleulaksa

346. Bungka keu rakyat meukeukatoe
Peusangan nanggroele neu hala
Poteu pitoek u Peusangan
Neu piyoh sinan di Gampong Raja

347. Si uroe si malam Poteu sinan
Ureueng Peusangan habeh teuka
Dumka jitron jareueng-jareueng
Poteu ji ampeueng ngon bala tantra

348. Nyan ngon teubee meuribee
Ngon boh kayee han teukira
Kricit narit panglima Peusangan
Yoh masa nyan ji peu-ek sabda

349. Deelat tuanku syahi ‘alam
Nyang mei geumgam alam donya
Ureueng Peusangan ka habeh jitron
Ho neu suron neu seuraya

350. Padum na kapai di gata sinoe
Ta peugah bak kamoe sigra-sigra
Kapai tuanku lahka neu tanyong
Kapai limong di sinoe nyang na

351. Sabda talhom kapai u laot
Ta seuteet dilikot Cakra Donya
Adak na gasehteu ngon sayang
Ta peungon kuprang u Juho Lama

352. Kricit narit peutuwa nanggroe
Ureung mat sagoe meuhon bak raja
Ampon tuwanku syahi alam
Seumah laman duli srupada

353. Kamoe bek neuba tuanku bak Prang Timu
Bek neuba u Johor prang Meulaka
Kamoe tuanku sinoe neukeubah
Meudrob-drob gajah keu Po Meukuta

354. Poteu deungo haba mumeunan
Neu kheun yohnyan bak peutuwa
Adak meunan gata jinoe
Bak siseun nyoe han kamoe ba

355. Gata sinoe nyang meukubah
Tadrob gajah keu kamoe raja
Adak ta teumei tadrob gajah
Gadeng ji siblah keu kamoe raja

356. Niphon jinoe kon toek ‘an akhe
Toek ‘an page umu donya
Ji peu-ek lom seumah peutuwa nanggroe
Bah dikamoe mumeu sutra

357. Adak meunan di gata jinoe
Tinggai teu sinoe han kamoe ba
Gata meukeubah disinoe di teumpat
Ta peu-udeb ulat ta sareng sutra

358. Na ta tudum adat tabri
Aji bak Aji sitahe sipha
Niphon jinoe kon troih ‘an akhe
Troih an page umu donya

359. Habeh keu haba peutuwa nanggroe
Poteu jinoe neu meusabda
Hoka gata Ja Madinah
Aulia Allah teugoh seutia

360. Peue nanggroe nyoe Ja teungku droe
Peuebu nanggroe geurasi nama
Adak neu tanyong tuwanku bak kamoe
Nyang meuranoe Gampong Raya

361. Nyan peue tuwi nyang meurandeh
Peue pante jeh geurasi nama
Nyang meurandeh han meujeuet peugah
Malee babah kamoe ulama

362. Adak Po Ja malee babah
Kamoe peugah rasi nama
Na tateupeue nyang meurandeh
Pante Meuse Jeh geurasi nama

363. Pante Peusangan nanggroe uteuen
Ji meunan ‘oh nan tuha muda
Niphon jinoe kon troh an page
Meuse Jeh Pante geurasi nama

364. Habeh keu haba bak masa nyan
Brangkatle yohnyan Po Meukuta
Poteu jeumeurang Krueng Peusangan
Leupah u blang Siti Manja

365. Neu bungka ninan u Blang Reuncong
Rakyat meuhimpon meuleulaksa
Di Blang Reuncong neujak laju
Rakyat meu’u’u meuribee laksa

366. Oh sare troih u Lhok Seumawe
Neu piyohle sikutika
Poteu bungka di Mon Geudong
Laju u pPsong neu meuseunia

367. Na sijamong neu piyoh sinan
Yoh masa nyan neu meusabda
Hoka gata Po Ja Madinah
Aulia Allah teugoh seutia

368. Peue nanggroe nyoe Ja teungku droe
Peue nanggroe nyoe geurasi nama
Ampon tuwanku meuribee ampon
Seumah ulon pacai nyang hina

369. Adak tapateh haba dikamoe
Seumawe nanggroe geurasi nama
Pakon geupeunan nyan Seumawe
Po Ja pane asai mula

370. Ja Pakeh seuot pantah-pantaih
Meunoe salasilah asai mula
Meunoe tuwanku nyang na lon thee
Ureueng dilee peucalitra

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s