Hikayat Malem Dagang – 1

Bismillahirrahmanirrahim

1. Ajayeb Subhanallah
Tango kukisah raja-raja
Layeue keurajeuen Meukuta Alam
Raja jimeunan Iskandar Muda

2. Poteu ade amat sangat
Peutimang rakyat ban sagai donya
Meung rukon meuh meuploh kuyan
Han sapeue tan di Sarpada

3. Padum-padum gleueng ngon subang
Meuribee pasang pi hadle na
Padum ija itam puteh
Nyang that leubeh ija Boseuta

4. Jineh keumeukha ngon sukaleuet
Ija sungket han teukira
Jineh hamee ngon Asahan
Laen nibak nyan meuploh nyang gasa

5. Meujeujineh laen nibak nyan
Han sapeue tan di Po Meukuta
Bak masa nyan rame pih that
Peue nyang hajat dum hadle na

6. Nanggroe pih luwah banda pi rame
Han meune-ne keunan teuka
Padum-padum kapai jak meukat
Dumpeue alat pi na jiba

7. Padum-padum kapai di Kleng
Jime bakong beusoe meulila
Padum kapai Meulabari
Ngon Gujarati ngon Beunggala

8. Padum teuma kapai Pigu
Habeh meusaho ngon kuwangkang Cina
Padum gurab nyang di Bintan
Ngon surohan nibak raja

9. Padum-padum behtra di Anggo
Ji peudieng malo ngon keusumba
Padum kapai nyang me cawan
Krikal dulang pingan raya
10. Padum-padum kapai di Keudah
Ija mirah meuneukat jiba
Tunong baroh timu barat
Dumpeue alat pi na jiba

11. Di Aceh kon troh u barat
Meusyuhu that Po Meukuta
Padum lawet neu kheurajeuen
Sapeue pi tan na mumara

12. Amabakdu dudoe nibak nyan
Teuka Putroe Phang geuba keu raja
Troh keu geuba nyan Putroe Phang
Habeh meuguncang alam donya

13. Yohnyan sajan ngon raja Raden
Ureueng got baten teugoh setia
Leugat geutamong nyan u Dalam
Ngadab janjungan Meureuhom Meukuta

14. Kri cit narit Meukuta Alam
Raja ji meunan Iskandar Muda
Neu marit bak ureueng dua droe
Neu tanyong nanggroe neu pareksa

15. Neu tanyong nan neu tanyong biek
Pakri ban teutiek u Pulo Ruja
Lon teumanyong wahe adoe
Pane nanggroe keunoe tateuka

16. Teuma seuot ureueng dua droe
Neu hareutoe neu peuhaba
Tuwanku ampon deelat jeunulang
Di nanggroe Banang kamoe teuneuka

17. Meujeumeurang laot tujoh
Uroe nyoe troh bak Sarpada
Raja Raden nama ulon
Nyankeu tuwan geuseubut nama

18. Syeedara ulon Raja Si Ujut
Nama geuseubut di ateuh donya
Kamoe nyang troh keunoe meujak
Meukeumeung meusyahdat tamong agama

19. Gaseh sayang tuwanku ampon
Bak neutem peu-ulon kamoe dua
Kru seumangat adoe meutuwah
Namiet Poteu Allah geutanyoe dumna

20. Tamong Islam raja Raden
Ureueng got baten teugoh setia
Nyan keu tanda ji Islam
Jibri putroe Phang teuma keu raja

21. Oh lheueh Islam raja Raden
Neu peukawen ngon syeedara
Teuma neu pulang teumpat meuneu’en
Neubri mideun ngon astana

22. Neubri dendayang ngon meuligoe
Bak duek putroe deungon raja
Na padum treb dudoe nibak nyan
Si Ujut keunan teuma diteuka

23. Yohnyan ji teuka di nanggroe jeuoh
Kapai tujoh sajan jiba
Limong boh kapai meubajee beusoe
Barang ri nanggroe ek jirada

24. Dua boh kapai meubajee pirak
Ho nyang tajak tihang suasa
Binteh bukot that meulolo
Meuh seunado dum peurmata

25. Taloe teumirang pirak seuntagi
Ladom jiseundi ngon suasa
Meung keumeudoe that meuhalak
On ji pirak bak suasa

26. Kapai jituwan that meudane
Tujoh boh bale lam gumtia
Limong boh nanggroe sidroe ji geunggam
Lhee are jira hitam rukon peutuwa

27. Sireutoh sikureueng ploh raja dibaroh
Jih nyang boeh-boeh barang jan masa
Kapai jidong karap u lhok
Rab meutajok u mieng kuwala

28. Pihak areh nyan Putroe Phang
Putroe jeunulang ahli bicara
Jiyue rakyat jareueng-jareueng
Jiyue ampeueng ngon bala tantra

29. Neuyue me U deungon teubee
Meung boh kayee han teukira
Nyankeu putroe that gunawan
Meung hidangan meuleulaksa

30. ‘Oh sajan troh nyan geupeurap
Ma geudeelat dum geurata
Lalu geujok ngon hidangan
Jineh makanan nyang cita rasa

31. ‘Oh sajan lheueh ji pemajoh
Lalu geuboeh di ateuh keuta
Lheueh nyan geu peuteungoh keu u darat
Geubri teumpat ji meuseunia

32. Geubri Ladong nyan ngon Peukan
Teuma sajan ngon Krueng Raya
Dudoe geuba u meuligoe
Geupuduek dudoe diateuh keuta

33. Geubri siluweue nyang meujunggi
Bajee di asoe lhee blaih dokma
Geubri ija that meusanjak
Neudong pirak teunun suwasa

34. Geubri bungkoih tapak cato
Deungon bohru meuh bungong gisa
Geubri kupiyah meuh sinaroe
Peuleumah budoe peuneuget rata

35. Padum lawet jih disinan
Sapeue pi tan na mumara
Lheuh nyan teuka teukeudirullah
Neu peutron susah keu Po Meukuta

36. Teuka Si Ujut bak Raja Raden
Ureueng get baten teugoh seutia
Udeh tawoe Dalem u nanggroe
Katroh kamoe meujak tueng gata

37. Dikee han kuwoe adoe u nanggroe
Di nanggroe nyoe leupah seutia
Dalem bek tadong di nanggroe Aceh
Udeh taweh u Malaka

38. Raja Aceh that meuseukin
Raja gasien papa indra
Umu lhee thon tadong di sinoe
Tan lhee katoe meuh ta eu rupa

39. Sangkira tadong Dalem dinanggroe
Si uroe-uroe na limong bahra
Dikee di nanggroe that kaya manyoh
Mudai Urupah han kutuho ba

40. Meung pihak meuh lhee boh geudong
Diyueb anjong meuploh gunca
Meung ija dum meuploh gulong
Meung meuh kupeukrong han teukira

41. Keunaleueng tamehku meuh seuneupoh
Taloe reunyeun kuboeh pirak suwasa
Meung geugaseng meusulu bayong
Saleuek patong labo suwasa

42. Dilee di nanggroe that meu-untong
Daraih meupayong dum permata
Meung lam jurong baleku tujoh
Teumpat peuniyoh jampang kuteuka

43. Meuploh syeedaga kuboeh di Peukan
Kaya-kayaan bak raja gata
Limong boh kapai meubajee beusoe
Barang ri nanggroe ek kuraba

44. Dua boh kapai meubajee pirak
Ho nyang kujak tihang suwasa
Binteh bukoet that meulolo
Meuh sinado dum peurmata

45. Taloe teumirang pirak seuntagi
Ladom kuseundi ngon suwasa
Kapaiku Dalem that meudane
Tujoh boh bale lam gumtia

46. Ku mukawen limong boh nanggroe
Limong droe putroe jroh-jroh rupa
Limong boh nanggroe sidroe ku geunggam
Lhee are jira itam rukon peutuwa

47. Sireutoih 90 Raja di baroh
Dalem,nyang kuboeh barang jan masa
Pakri han Dalem tawoe u nanggroe
Ngon raja nyoe leupaih seutia

48. Nibak kukafe ka ku Eseulam
Han kumeudam dikee ngon raja
Digata galak Dalem ta Esuelam
Meung saboh lham hanle hareuga
49. Nyang get jak tawoe Dalem u nanggroe
That payah adoeteu di usaha
Adoe han kawoe u nanggroe jeuoh
Nanggroe memusoh rok-rok masa

50. Meu bayam kapula han ka teumei pajoh
Nanggroe mumusoh seunantiasa
Gata ta muprang adoe, geunap uroe
Pi-e adoe kareuna buet gata

51. Taduek Dalem ulon muprang
Bak meugeudeubang han kuyue gata
‘Oh teuka musoh jak prang nanggroe
Kumat-mat kudroe kulawan rada

52. Digata tadeuk dalam meuligoe
Dikee adoe teu dong lam kuta
Oh nan lawet kupuga prang
Padum boh geudubang tulong bak gata

53. Nyang get tuwoe Dalem u nanggroe
Hanle ngon adoe ate meudawa
Bek tadongle di nanggroe nyoe
Kuprang dudoe binasa gata

54. Meung kuteumei raja ku peh-peh
Rakyat jih jadeh ku publoe ba
Ladom kuprang ret Pasi Puteh
Ladom nideh kuprang Daya

55. Ladom kuprang ret u Pase
Ladom u Singke ladom u Nata
Ladom kuprang rot Meulaboh
Ladom kuruntoh rot Teuripa
56. Ladom kuprang ret u gampong
Ladom kuprang rot Pulo Ruja
Ladom kuprang ret Asahan
Ladom u Medan ret Samtalira

57. Habeh kuprang ban peut sagoe
Ho jiboih droe raja gata
Habeh kutawan aneuk eseulam
Siat masa nyan kutueng hareuga

58. Nyang han item bloe ngon meuh pirak
Peue nyang galak keu u muda
Mangat reujang nyan jitem bloe
Keu boh panjoe ku peutaba

59. Pakon adoe that teukabo
Han ek keu anco nanggroe Malaka
Hana anco nanggroe dikee
Han sicupak abee di raja gata

60. Pakon adoe ka marit meunan
Ka kira han ek binasa
Peue bu salah raja Aceh
Peue bu leubeh raja Meulaka

61. Meung baro troh gata keunoe
Tango keu adoe kucalitra
Pihak areh,adoe , Putoe Phang
Putroe jeunulang ahli bicara

62. Jiyue tron rakyat jareueng-jareueng
Gata ji ampeueng ngon balatantra
Beureukah teubee meureuribee
Meung boh kayee hanteu kira

63. Adoe teungku meukawen
Meung hidangan meuleulaksa
Oh sajan troh adoe, u laot
Meupasang surot geungadap gata

64. Meung sajan lheuh, adoe , geungadap
Teuma geupeurab dum geurata
Lheueuh nyan geujok ngon minuman
Ngon makanan nyang cati rasa
65. ‘Oh kalheueh, adoe, ta pumajoh
Gata pi geuboh dalam tahta
Geu peu teungoh gata u darat
Geu peujok teumpat bak taraja

66. Geubri Ladong nyang ngon Peukan
Geu yue kheurajeun ngon Krueng Raya
Asoe Peukan dum habeh ka tawan
Rukon makanan habeh ka hila

67. Katarek, adoe nyan ngon pisang
Karinthak meuriwang, reubah po areuta
Padum-padum katarek teubee
Kahila di ulee gob meugisa

68. Beungoh seupot ka sukat keueh
Sang ureung wakeueh nibak raja
Padum, adoe ka tamong gampong
Adat po neutueng han soe sangga

69. Takoh kayee peue nyang galak
Nyang meusigak nyan di mata
Hana beungeh ureueng gampong
Kareuna lurong nibak raja

70. Adak bak kayee nyan kalheuh kateubang
Neu bayeue utang le Po Meukuta
Sibak kayee neu bayeue siploh
Bek jidoeng kroh jeub-jueb peutuwa

71. Han jipake han ji gurantang
Pihak lurong nibak raja
Sajan geuba adoe u meuligoe
Peukayan di asoe geusalen gata

72. Neubri sileuweu nyang meujunggi
Bajee di asoe lhee blaih dokma
Geubri ija nyang meusanjak
Neudong pirak teuneun suwasa

73Geubri bajee nyang daidari
Tangkulok geubri siglong nyang raya
Geubri bungkoih tapak cato
Deungon bohru meuh ban peuet punca
74. Geubri kupiyah meuh sinaroe
Peuleumah budoe peuneugot gata
Dilee kangui kulet babi
Jinoe raja bri yum sibahra

75. Si Ujut deungoe meunan hareutoe
Si aneuk bisoe beungeh raya
Si Ujut beungeh ngon amarah
Mata ji mirah ban aneuk saga

76. Digata galak di nanggroe nyoe
Habeh ngon binoe ka geutuka
Geutueng di gobnyan Putroe Phang
Keu gata geu pulang nyang ri meruwa

77. Geutueng gobnyan nyang sambinoe
Teuma geugantoe nyang sang waba
Lahna geutem bri putroe Aceh
Teuriseh-riseh gata ngon raja
78. Pakon adoe ka marit meunan
Ka kira han ek binasa?
Bekle ka marit hai tuha asee
Kah han malee kah cilaka

79. Pakon adoe kee, kacarot
Han katakot keu neuraka?
Jinoe kukheun bek ka maritle
Kupoh mate si cilaka

80.Saket keu ate Raja Raden
Meunoe jikheuen keu syedara
Kapreh keu kah aneuk bisoe
Singoh uroe kuyue sula

81. Raja Raden neu bungka neu woe
Aneuk bisoe meukeukira
Si Ujut jikheun meunoe ajaran
Ubak rakan dum barang na

82. Hatle dale geutanyoe rakan
Ta seumimpan udehta bungka
Talhom ngon bidok rakan u laot
Udehta surot dumteu rata
83. Si Ujut ji teuhbiet ka u laot
Jijak meureubot han ban publa
Asoe Peukan dum habeh jireubot
Ladong ka jitot ngon Kreung raya

84. Padum na Poteu ji peumalee
Rumoh siribee kawai raja
Lapan boh pukat dilaot ditawan
Limong ploh rakan sajan ji ba

85. Dua droe Pawang jipoh mate
Digantung bangke dimieng kuala
Ladom jiboh kawe di rueng
Ladom ji rukueng cawiek jungka

86. Buet Si Ujut hana cakap
Jiboh lam glap ji peuseksa
Ohban jideungo areutoe meunan
Keudeungaran bak Kujruen kuala

87. Keujruen jitamong le u Dalam
Ngadap junjungan bak Po Meukuta
Ampon tuanku Syahi Alam
Seumah laman Duli Sarpada

88. Allah Allah po Keujreun droe
Toh saleh proe peue bu haba
Tuwanku Si Ujut ka u laot
Ji meurubot han jan publa

89. Asoe Peukan habeh ji reubot
Ladong jitot ngon Krueng raya
Padum tuwanku jipeumalee
Rumoh siribee kawai raja

90. Lapan boh pukat ka ji tawan
Limong ploh rakan sajan jiba
Dua droe Pawang jipoh mate
Ji gantueng bangke di mieng kuala

91. Ladom ji boeh kawe di rueng
Ladom di rukueng cawiek jungka
Allah Allah po Keujruen droe
Toh saleh proe ngon bicara

92. Poteu deungo meunan hareutoe
Lalu neumoe tro ie mata
Allah Allah po Keujruen droe
Toh saleh proe ngon bicara

93. Jak leh tatron Keujruen u pasi
Jak ta ili u Kuala
Ta peusapat sigala rakyat
Ta meurok pakat bak jeub Peutawa

94.Tabri haba keudeh u Ladong
Kuta ji peukong beutrok Krueng raya
Poteu neujak bak Raja Raden
Ureung get baten teugoh seutia

95. Ban sajan troh u leuen meuligoe
Neu dong sidroe ateuh kuta
Na sijameung Poteu sinan
Teuka gunangan jak peunyata

96. Gunangan jiek u meuligoe
Jijak peugoe putroe muda
Ampon tuanku pocut putroe
Kamoe peugoe duli srupada

97. Lalu teukeujot nibak pangsan
Neu tanyong yohnyan sigra-sigra
Pakon tapeugoe ulon teu sidroe
Toh saleh proe siri sabda?

98. Pocut neutron u seuramoe
Jeh pat aduen droeneu preh gata
Hantom puroe neu beurangkat
Siri pakat ngon Sarpada

99. ‘Oh neu leungo haba mumeunan
That geumaran putroe muda
Tuan putroe tron u seuramoe
Neumat di jaroe puwan suasa

100. Na teu keunoe tuwanku ampon
Jak saweue lon pacai nyang hina
Nabu kamoe hai adoe droe
Nabu kamoe wahe neusa

101. Lalu neucom nyan di teuot
Poteu surot neubri mulia
Jak leh taek, adoe u meuligoe
Jak tapeugoe raja Malaka
102. Ku keumang tanyong bak Raja Raden
Na sibaten jih ngon syeedara
Tuan Putroe ek u meuligoe
Lalu neu pugoe Raja Meulaka

103. Sajan neutamong dalam keu lumbu
Neu peugoe laju le putroe muda
Sajan neu duek teuntang teuot
Ceupet urot neu peumeusra

104. Lalu teukeujot raja nibak pangsan
Neu beudoih yoh nyan raja Meulaka
Pakon ta peugoe tuan putroe
Toh saleh proe peue bu haba?

105. Tuanku neutron nyan u seuramoe
Jeh sibang droneu ka teuka
Hantom puroe neu beurangkat keunoe
Bak uroe nyoe peu saleh haba

106. Ban neuleungo haba mumeunan
Neutron yohnyan bak Po Meukuta
Na teukeunoe tuanku ampon
Jak saweue lon pacai nyang hina

107. Na bu kamoe wahe adoe
Na bu kamoe wahe neusa
Com di teuot seumah meulaku
Neumoe meu ‘u’u sang ureueng rugha

108. Pakon tuanku neumoe meu’u’u
Kukalon laku mise ureung duka
Nyang troih kamoe adoe keunoe
Ta deungoe keu nyoe ku calitra

109. Raja si Ujut ka u laot
Ji meureubot han ban publa
Asoe peukan habeh jireubot
Ladong ka jitot ngon Krueng raya

110. Padum tuanku jipeumalee
Rumoh siribee kawai kuta
Lapan boh pukat nyangka jitawan
Limong ploh Rakan sajan ji ba
111. Dua droe Pawang jipoh mate
Jigantung bangke di mieng kuala
Ladom ji boh kawe di rueng
Ladom di rukueng jicawiek jungka

112. Buet Si Ujut hana cakab
Jiboeh lam glab ji peuseksa
Adoe, kutanyong tanda kusyen
Na sibaten jih ngon gata

113. Meunalee nyoe ku kheundak tuntut
Buet Si Ujut na tasereuta
Sangkira meunan wahe adoe
Hanle dikamoe jih keu raja

114. Ku kheurajeun diphon seudang
Hantom na prang dilee nyangka
Siuroe nyoe nanggroe ku ji prang
Putroe Banang kuniet ka ji ba

115. Ampon tuanku siribee ampon
Hana ulon ku seureuta
Tuanku, Si Ujud tapoh mate
Dikamoe hanle mumeusyeedara

116. Didonya kon troh u akhirat
Kaphe laknat bek kungieng mata
Pakri ban kuprang adoe jinoe
Han kutupat nanggroe han kuturi rimba

117. Adak tapateh haba kamoe
Meupeurunoe Po Meukuta
Tuwanku neukrah ‘Alem ngon faki
Sigala wadi ngon ulama

118. Tuanku neukrah ban dua blaih karong
Beuhabeh jitron ban sineuna
Tayue jimudek dum meureuribee
Jijak koh kayee suson behtra

119. Jikoh seurampi bak sirikoi
Papeuen pengapet meudang ara
Tayue jikoh papeuen suson
Adak tan laen meudang jeumpa
120. Tuanku, neu krah lom ngon tukang
Nyang jeuet keumarang jisuson behtra
Tukang,tuanku nyang meugah-meugah
Lagi peurintah guna biasa

121. Sikureueng reutoh limong ploh tukang
Uroe malam tayue keureuja meujaga
Tukang nyang meugah bak meurapat
Kayee lukat bek meuri jangka

122. Ladom utoeh bek meu-uke
Bungong pi hadle dum ji peuna
Ladom utoih bak keumalok
Jeuneh pucok dum lam rika

123. Jinoe tuanku tapeuhase beusoe
Tayue jak bloe meung limong behtra
Bek lale tuanku tayue beurijang
Neuyue peh labang meung meuploh bangsa

124. Labang payong labang peungikat
Nyang keubeh that labang peungila
Ta peugot kapal meung tujoh reutoh
Jeumeurang aroih taprang Meulaka

125. Meung tuanku taprang Banang
Keu panglima prang beu Sarpada
Beukeuhan tateumee jih di Banang
Dudoe taprang u Juho Lama

126. Bakeuhan tateumei di nanggroe Juho
Bahle taseutet u nanggroe Guha
Bakeuhan meuteumei ampon duli
U Juho Bali taseutot lanja

127. Bakeuhan tateumei ban peuet nanggroe
Sira tawoe taprang Meulaka
Habeh narit Raja Raden
Ureueng get baten teugoh seutia

128. Ji muduek Bujang dua blaih karong
Jipeh mong-mong ji seuranta
Jitron keu rakyat baroh tunong
Meuhimpon dum meuleulaksa
129. Hana saboh tinggaile di gampong
Nyang jeuet sandang beuliyong habeh geuba
Ladom tujoh uroe baro meukawen
Meung ija salen pi gohlom na

130. Ladom lhee malam gaca di jaroe
Hanle di nanggroe ka habeh geuba
Ladom ji mampleue euntreuk malam
Basi andam linto ka geuba

131. Ladom baro troih ‘oh seuramoe
Geupeutron jinoe lanja geuba
Ladom ji baro troih meung ‘oh rambat
Geupeutron leugat mampleue geuba

132. Bu ngon gule habeh basi
Ulama faki sajan geuba
Ureueng binoe ji mampleue keudroe
Ureueng lakoe ka habeh geuba

133. Jijak keu rakyat dum meuree-ree
Seun siribee seun silaksa
Jeueb-jeueb gunong jeueb-jeueb paloh
Jeueb-jeueb grugoh jeueb-jeueb data

134. Gajah ngon baduek habeh jiboih droe
Aneuk nanggroe peunoh lam rimba
Tujoh uroe rakyat lam uteuen
Geupeutron papeuen han teukira

135. Kayee di gle mantong ijo on
Kapai geususon tujoh ploh dua
Tujoh buleuen rakyat di gle
Tujoh reutoh le hase behtra
136. Tujoh blaih buleuen neuyue meukayee
Kapai siribee hase ka leungka
Taeu lam nanggroe hanle keusukaan
Di dalam uteuen banda raya

137. Meuseujid raya timoh beurinyong
Meujampu trueng ngon bayam tuba
Soh keu mideuen jeuet keu uteuen
Timoh beuraleuen bube-be pha
138. Bujang ji mudek ka u tunong
Jipeh mong-mong ji seuranta
Habeh ka jiwoe dumna rakyat
Woe u teumpat dum jirata

139. Oh sare jiwoe nyan u nanggroe
Han jitusoe ule nisa
Pane, Ma ureueng teuka keunoe
Ubak kamoe sang rupa kra

140. Pakon bu aneuk nyan ka mungki
Bak Allah bak Nabi kah meudeesya
Han kateupeue ureueng baro digle
Peunyaket sabe hana reuda

141. Ladom teuka peunyaket deumam
Ladom pitam hana reuda
Ladom bahya meurumpok digle
Le that mate nyang peutuwa

142. Le that mate aneuk rakyat
Mate le that han teukira
Masa nyan Poteu buka geudong
Meuh geubulueng ban sineuna

143. Sidroe-droe mate neubri meuh siploh
Areuta neuyue boeh gasien ngon kaya
Lom ngon gaphan sidroe si kayee
Jeuneh hamee nyan ngon gasa

144. Neubri tutue lhee kayee
Meunan meuteuntee bandum rata
Tujoh buleuen jiwoe di gle
Lheueh bak mate lheueh bak mara

145. Nyang na tinggai dum di nanggroe
Ureueng binoe meuseumpeuna
Ya ilahi wa ya Rabbi
Bak Allah bri kabui pinta

146. Bak bek jadeh neuprang Banang
Bah keuh seunang hate raja
Lheueng goh Poteu neuprang Banang
Ie keukurangan rugoe raja
147. Sangkira jadeh Poteu muprang
Leubeh nibak nyan rugoe raja
Laman mate dalam nanggroe
Ta mumat keudroe ta peulara

148. Laman mate bak Poteu muprang
Geutiek yub sampan pawoh seuba
Umu sithon lheueng nibak nyan
Teuka keu rindang saboh di guha

149. Teuka rindang nibak si Ujut
Kapai jipeugot ji keumeung peu leungka
Baro jipeugot meung-meung seurampee
Rindang jikajee u nanggroe raja

150. Rindang teusareung diateuh pusong
Di pante krueng di mieng kuwala
Rindang teudu keu dipante
Ban aneuk gle meunan keuraya

151. Bukon bubarang mu panei-panei
Nuyum-nyum han mei taeu rupa
Teungku ampon hayut ta kalon
Meung eumpeun tirom han ban publa

152. Bukon bubarang ta pandang ghareb
Deungon triteb han teukira
Teungku ampon larab meu jupheuek
Timoh siseuek sideupa-deupa

153. Bak jikalon ule tukang
Seurampee panyang peuet ploh deupa
Dumna rakyat han jijeuet teuntang
That kreuh ganong kayee teuka

154. ‘Oh jikalon uleh rakyat
Habeh teumakot ban sineuna
Keujruen jitamong keu u Dalam
Ngadap junjongan Po Meukuta
155. Deelat tuwanku syahi ‘alam
Seumah laman duli srupada
Peue buhaba Keujruen teuka keunoe
Takheun bak kamoe sigra-sigra
156. Tuwanku han meutune saboh Rindang
Di pante krueng di mieng kuwala
Rindang tuwanku teudu di pante
Bube aneuk gle meunan keuraya

157. Dumna rakyat han dijeut teuntang
That meuganong rindang teuka
Adak meunan po keurajeun droe
Bah kutron kudroe u kuwala

158. Jinoe jitron dum ulee balang
Meujak eu rindang pane teuka
Bak masa nyan poteu beurangkat
Tron ngon rakyat u kuwala

159. Poteu neutron hana meusaket
Payong beurapet dua geuba
Sigo tum beude si go grum geundrang
Gajah jilinggang grang-gring geunta

160. Beudoh gunangan tujoh blah droe
Sam-sambinoe ngireng raja
Lalu ji bungkale ngon Bujang
Arak ngon geundrang u kuwala

161. Poteu neutron that meu bineh
Ngon geudrang meuh geundrang suwasa
Ngon geundrang meuh geundrang pirak
Neu keumeung arak rindang teuka

162. Neu giduek gajah meubalohan
Ji aleh ban manusia
Geunta di rukueng ban kanot dang-dang
Gajah jilinggang ban meunta raja

163. Sajan geuyub ngon nafiri
Gajah jititi langkah tiga
Poteu pih troh nyan u pusong
U pante kreung di mieng kuala

164. Oh sajan troh poteu bak rindang
Ji sapa yoh nyan sigra-sigra
Poteu tanyong pane rindang nyoe
Saleh toh nanggroe rindang teuka
165. Teuma jiseuot ule rindang
Nanggroe meu tuwan di Juho Lama
Adak takheun jeuoh nanggroe
Peue buet keunoe ta peuteuka

166. Kamoe tuwanku nyang troh keunoe
Kango jinoe meucalitra
Masa SI UJUT kamoe jiteubang
Ngon keumueng prang nanggroe gata

167. Sangkira lheueh di peugot kamoe
Talo nanggroe nyoe siklep mata
Kamoe tuwanku Jen Iseulam
Han meudam-dam ngon Po Meukuta

168. Adak neutem neu peusayang
Na jidong rindang di nanggroe gata
Adak neutem peugot kamoe
Talo nanggroe hoe tarada

169. Tadong keu sinoe raja rindang
Ku yue tukang dipeugot gata
Hoka gata dumna tukang
Ta peugot rindang jinoe sigra

170. Tukang tapeugot rindang kunyoe
Dua ploh uroe ta peulengka
20 uroe jipeugot le tukang
Hase ngon tihang cukop gumtia

171. Geuboh tihang meuseu sanjak
Ladom pirak ladom suasa
Taloe teumirang pirak seuntagi
Meuhambo meuh meupeurmata

172. Bineh bukot that meulolo
Meuh sinado meu peurmata
Gumtia di iku that bit indah
Ceureumen geukubah di pinto gumtia

173. Habeh dum hase dumna seukeulian
Ngon ampelan kuta mara
Saleh sapat rindang ku nyoe
Di hate kamoe bak ri rupa
174. Pat busalah tuanku ampon
Mumeuhon ampon barang deesya
Bukot bek ta peuget beursalahan
Layak rindang taboh geunta

175. Adakmeunan tuanku droe
Neu yue pande beusoe peugot geunta
Poteu yue peugot beumeu teunte
Geunta ji lhee raya raya

176. Di ulee saboh di iku saboh
Di teungoh saboh bak tihang raya
Nyang di ulee Akidatoi Umu
Geuboh di iku Tulak Mara

177. Geuboh diteungoh Kasira Khoiran
Ka keusimpan ban lhee geunta
Poteu meusabda bak Ulee Balang
Peue kuboh nan hai syedara

178. Deelat tuwanku syahi ‘alam
Tuwanku nyan pham bak boeh nama
Adak ta pateh narit kamoe
Nan rindang nyoe Cakra Donya

179. ‘Oh sare lheueh geuboeh nan rindang
Dum Ulee Balang suka cita
Ulee Balang dum ji galak
Geunta ji hayak Cakra Donya

180. Siseun geunta ji hayak droe
Troh lhee uroe tango suara
Hoka gata Ulee Balang
Di dalam blang ureueng kaya

181. Bek tameulale bek tameungieng-ngieng
Ta pumeudieng rata-rata
Poteu neuwoe ma u Dalam
Syahi ‘alam deelat hana

182. Hana geulham kapai nyang laen
Meunggoh jitren Cakra Donya
Ni phon beungoh kon toek cot uroe
Tan meugrak droe Cakra donya

183. Bujang jitamong leugat u Dalam
Ji peuseumah yoh nyan u bak raja
Deelat to gayu syahi ‘alam
Nyang mei geumgam sagai donya

184. Tuwanku ampon meuribee ampon
Han jitem tron Cakra Donya
Rakyat jitarek bicah ngon jaroe
Tan jigrak droe Cakra Donya

185. Ensya Allah bah kutron keudroe
Ku ili jinoe u kuwala
Poteu neutron ka u pasi
Ka neu ili u kuala

186. Hoka gata Ulama ngon syiah
Ta Fatihah ta lakei do’a
Ta beuet do’a Teungku Pakeh
Ureung leubeh Ulama raya

187. Ladom beuet do’a ladom leung Amin
Kabui mukmin lakei doa
Poteu gusuek di ulee di iku
Jitron meu u’u Cakra Donya

188. Meutum beude ji meusu keudroe
Nyum-nyum tuloe alam donya
Lanja ji teubit nyan u laot
Laen jilikot Cakra Donya

189. Poteu neuwoe lanja u Dalam
Syahi ‘alam deelat hana
Poteu ek u meuligoe
Neu meuhoi putroe lam astana

190. Hoka gata posambinoe
Ta tron keunoe sigra-sigra
Pakon tuanku neu meuhei kamoe
Toh saleh proe siri sabda

191. Hantom tuanku neuhei kamoe
U meuligoe lam astana
Peue teukeudi bak uroe nyoe
Neuhoi u seuramoe putroe hina

192. Nyan keumeuhei tuan putroe
Meukeuhendak lakei droe meubak gata
Adak na untong nibak Allah
Meukeumang meulangkah u Joho Lama

193. Adak Allah bri umu ku lanjut
Ku seutot Si Ujut meunalee jiba
Baro uroe nyoe ‘oh neu beurangkat
Neumeurok pakat ngon putroe hina

194. Yoh dileekon han neu peugah
Kareuna tan Nang mbah kamoe teuka
Teugoe tan sampee hana karong
Hana soe tulong putroe hina

195. Teugoe tan Nang mbah ulon disinoe
Han soe peureunoe han soe aja
Ampon tuanku deelat inoe
Han soe peureunoe putroe hina

196. Hansoe kheun ban hansoe kheun kri
That meusampe putroe hina
Poteu deungoe meunan areutoe
Neu meusabda jinoe Po Meukuta

197. Meung kon putroe bek ta peutulak
Hareum han kujak nanggroe Malaka
Hareum gata ahli hekeumat
Meu tamah kuat ta meujaga

198. Kareuna gata areh billah
Utoih ta seuleuah eleumei rasia
Na ban takheun han muminah
Putroe meu tuwah cit troih mata

199. Ku bungka u laot meu woe u darat
Han meupakat deungon gata
Nibak keji uroe dudoe
Bah le jinoe ta bicara

200. Adak tuanku tajak puga prang
Tango Putroe Phang peucalitra
Padum penyaket ta prang Banang
Nyang ji meunan peunyaket raya
201. Han meu tudum tuan putroe
Saboh nanggroe hantom meubungka
Beukeuna gaseh ngon tasayang
Ta kheun beurijang ule gata

202. Ampon tuanku han meujeut peugah
Meu takot salah bak Po Meukuta
Bek ta gundah posambinoe
U bak kamoe ta calitra

203. Tuwanku 3 boh peunyaket bak taprang Banang
Nyang ji meunan peunyaket raya
Saboh peunyaket nyan ji meunan
Ie ji tajam han teupeungapa

204. Ie jih tarek nibak aroih
Beu ek putoih hana meusangga
Meung ta jeumeurang ie teungoh nyurong
Habeh teupankong lam-lam Bangka

205. Saboh peunyaket troh di nanggroe Asahan
Sinan keu lawan mula-mula
Adak na tuah teujeut keu gah
Beukeu han tuah seb dum nyangka

206. Adak ta teumei tawoe u aceh
Adak han ji pehle Raja Muda
Meukeu han meusoe panglima prang
Han ek taguncang Raja Muda

207. Ureueng meuri panglima prang
Ek ta guncang barang ri donya
Soe mei kuboh keu panglima prang
Takheun beuseunang peugah beusigra

208. Ampon tuanku meuribee ampon
Seumah ulon pacai nyang hina
Kamoe meu-udep ureueng binoe
Han jeuet sinoe meuboeh panglima

209. Han meu peugah tuwanku meu peulahe
Muboeh mise ta mita makna
Dilei taboh Panglima Pidie
Ureueng nyang khie nibak raja

210. Dilee taboeh panglima nyan
Nyang ji meunan Maharaja Indra
‘Oh han jitem Panglima Pidie
Ji yue peusie laen panglima

211. Ampon tuwanku tanda get baten
Neu peu ek laen neuboeh panglima
Adak meunan deelat meukatoe
Jiboeh geunantoe laen panglima

212. Meungkon jiboeh panglima laen
Lahe ngon baten jih panglima
Ri nyang jiboeh keu geunantoe
Beurangkasoe jih panglima

213. Ureueng nyan nyo panglima prang
Ek jiguncang barangri donya
Saboh treuk peunyaket tuanku Banang
Tango Putroe Phang peucalitra

214. Oh troh tuwanku keunan u laot
Beude bek neutot pomeukuta
Adak tatot ta mupiasan
Patah meukhan jeut keudua

215. Pakon meuna tuan putroe
Peue peumaloe peugah sigra
Nanggroe Banang tuwanku that meutuwah
Aulia Allah sinan na dua

216. Saboh meurandeh saboh meuranoe
Ureueng po nanggroe asai mula
Adak tuanku neu beurangkat
Neu keubah pat putroe hina

217. Meunggoh mupat tuanku meukeubah
Karena Allah han ku bie bungka
Ampon tuanku deelat meukatoe
Kumat di jaroe bek neu bungka

218. Tuanku tabungka rot meudarat
Tamita rakyat sidroe dua
Musoh jibungka rot meu laot
Geutueng di likot putroe geuba

219. Adak meunan tuanku meujak sajan
Bek gadoh nan putroe hina
Adak meunan tuan putroe
Tango jinoe kucalitra

220. Gata kupeujok ubak Allah
Sinan kukeubah bak asai mula
Gata kupeujok ubak Tuhan
Awai phon sinan ujud gata

221. Meunyo ta peujok lon bak Allah
Han lon theun langkah bahle ta bungka
Leupaih tuwanku neujak puga prang
Putroe Seumayang meulakee doa

222. Jeub-jeub watee lon seumayang hajat
Lakee syupeu’at keu Po Meukuta
Adak tuanku neu keumeung beurangkat
Putroe peu intat u mieng kuwala

223. Bek ta intat posambinoe
Bahle oh noe seb digata
Gata nyang kutroh dalam meuligoe
Tuan putroe bek gob eu rupa

224. Tuwanku bek neutham bek neularang
Geukheun Putroe Phang tan seutia
Dum ureueng binoe habeh u baroh
Hana tudoh u kuwala

225. Maseng-maseng jak euntat judo
Rakyat meuro-ro u kuala
Habeh jitron banda duson
Ji ikat ayon lam-lam Bangka

226. Hana teudoh meurandeh meuranoe
Si manyak moe di kuala
Pakri neutham pakri neu larang
Geuthei Putroe Phang tan mubasa

227. Sabab tan nang mbah di sinoe
Han keu na soe nyang bri aja
Adak na ate tuanku mukmin
Neu bri idin oh pinto raya

228. Dua ploh tujoh beuleun Dokaidah
Poteu meulangkah prang Meulaka
Neu beurangkat han meusaket
Payong peungapet geuba dua

229. Geuseupot gong ngon kudangdek
Poteu neu ek ateuh guda
Geupoh canang nyan ngon geundrang
Bukon bubarang meuseusuka

230. Gong ji seupot deungon geudumbak
Rakyat meubulak poteu bungka
Masa nyan poteu beurangkat
Putroe euntat ‘oh pinto raya

231. Poteu pi toek ‘oh babah pinto
Teudong tahe sikutika
Ampon tuanku syahi alam deelat
Neudong siat na peue haba

232. Jinoe tuanku neujak puga prang
Tinggai Putroe Phang lam astana
Padum lawet neucre nanggroe
Tinggai putroe lam astana

233. Ensya Allah beusilamat
Talakee syupa’at bak Haq Ta’ala
Dak na untong syufa’at neubri
Limong seun Aji limong seun puasa

234. Poteu bungka ret meudarat
Neu mita rakyat dum barang na
Rakyat di laot peulayeue leugat
Nyang ret darat poteu raja

235. Nyang di laot geucok saoh
Di darat pi riyoh lanja geubungka
Siuroe simalam poteu meucre
U Pidiele neu meuseunia

236. Poteu pi toek u nanggroe Pidie
U peukan Sigli neu meuseunia
Siuroe simalam poteu sinan
Rakyat pi jitron meuleulaksa

237. Ek neu seumah Panglima Pidie
Ureung nyang khie nibak raja
Ek keu seumah ureueng nanggroe
Nyan nyang ji meunan Maharaja Indra

238. Keureuna rakyat ka habeh jitron
Ho neu seuron neu seuraya
Rakyat jitron meureuribee
Jime teubee ngon u muda

239. Padum boh kapai nyang ka hase
Takheun jinoele kungo sigra
Nyang di Pidie tuanku na limong
Nyang ka hase ngon bala tantra

240. Talhom kapai u laot
Ta seutot dilikot Cakra donya
Beukeuna gaseh teu ngon sayang
Ta peungon kuprang u Juho Lama

241. Kapai ji teubit dum u laot
Ji seutot dilikot Cakra Donya
Geucok saoh kapai di laot
Di darat beurangkat pomeukuta

242. Lhee uroe lhee malam neujak laju
U Meureudu neu meuseunia
Poteu pi toek u Meureudu
Neu piyoh le u Simpang Tiga

243. Poteu piyoh nyan di simpang
Diyub keutapang meuseunia
Poteu neu dong that meupadan
Peunanggahan ngon bala tantra

244. Tujoh uroe poteu sinan
Ureueng Meureudu tan saboh teuka
Ureueng Meureudu tan di nanggroe
Dum jiboih droe dalam rimba

245. Ureung Meureudu keulukeusah
Di jak ceumeucah jeueb-jeueb rimba
Masa nyan gohlom rame nanggroe
Hana sidroe lom peutua

246. Ureueng Meureudu that saket untong
Sang glang tutong peudeh ji rasa
Meuse glang lam uroe tarek
Tutong lagoe ek han teupeungapa
247. Ladom leupah u Sarah Mancang
Ladom u Meugang ka jihala
Siteungoh leupaih u Sarah Gajah
Jijak ceumeucah sigala rimba

248. Ladom leupaih jijak cok awe
Jijak keumiweue jitheun rusa
Tujoh uroe poteu di Simpang
Ureueng Meureudu tron dum jitara

249. Ri nyang jitron di Gle Puntong
Ji peutron jagong ngon keutila
Ladom nyang tron di Sarah Mancang
Ji gulam plang dum ji rata

250. Ladom nyang tron di Sarah Gajah
Ji gulam boh birah bube-be pha
Siteungoh ri jitron bak keumiweue
Leumo keubeue le that jiba

251. Ureueng Meureudu konle tunyie
Parang diwie ceukok mata
Ureueng Meureudu troh di gunong
Ija pinggang dum jirata

252. Ban sajan troh Ujong Pante
Ji meuduekle tuha muda
Ka ji piyoh na saboh at
Ji meurok pakat ngon bicara

253. Hai lem payong aduen teungku
Toh bulaku tatron bak raja
Saleh geutanyoe geupoh mate
Han tatukri ngadap raja

254. Geutanyoe Meureudu tahe gante
umpama Mante tron di rimba
Tapaban bah dalem payong
Teumakot untong tron bak raja

255. Adak sangkira geupoh mate
teuma pakri, bek tatron bak raja
adak meunan lem teungku droe
Na bak kamoe saboh bicara

256. Geutanyoe dalem ureung leumoh
U Dayah Tanoh keudeh tabungka
Bah tameulangkah jareung-jareung
Tabungka u Keunaleung bak Ja Ulama

257. Beukeuna gaseh deungon sayang
Neu peungon u Simpang neutron bak raja
Udehta jak bak Ja Madinah
Aulia Allah teungoh seutia

258. Beukeuna neu keumang peurame Meureudu
Neu peulaku tron bak raja
Keureuna geutanyoe baro masok
Geutanyoe bantrok dalam rimba

259. Habeh geukira ureung lam nanggroe
Sireutoh lhee ploh droe tuha muda
Ureung barang jan nyang kiraan
Nanggroe geunyan saboh peutuwa

260. Oh sajan troih bak Ja Madinah
Ulon Allah teugoh seutia
Kuja Pakeh di Meunasah
Teungoh neu perintah hukom raya

261. Oh sare troih u Meunasah
Teungku Syiah neu seumapa
Wahe cuco cuco payong
Ho tame boh gadong ngon kutila

262. Ho bukame cuco badan
Pat ucapan siri keurija
Bukon mume keu ucapan
Peursembahan keu Po Meukuta

263. Adak na gaseh Teungku ngon sayang
Ta peungon u Simpang meutron bak raja
Tujohurpe ka Poteu keunoe
Baro uroe nyoe kamoe teuka

264. Saleh Po Ja geupoh mate
Han meuturi ngadap raja
Adak meunan cuco badan
Kutron sajan jak udehta

265. Bek katakot bek ka malee
Bukon na kee dakwa raja
Leubeh didroe nyan neu keurajeun
Dikee keusukaan leung agama

266. Leubeh didroe nyan neupham adat
Hukom Allah that kee raja
Kon meung raja nyoe dikee ku ngadab
Biasa ku deelat yoh masa muda

267. Peu kutakot peue ku malee
Meug silayeue kee n a peuet boh raja
Adak meunan Po Ja badan
Jak cok peukayan jak udeh ta

268. Neucok ija ngon kupiah
Bajee jubah seureuban raya
Neucok tungkat ngon seumambu
Sunte abu di dalam mata

269. Bit Ja Pakeh kon that tunyie
Geudubang di wie na sihaih mata
Ja pakeh tron ka u Simpang
Diyub keutapang neu ngadab raja

270. Ja Pakeh yohnyan neu muhoi ampon
Jaroe neu seuon ateuh jeumala
Na sijamong neu beuot jaroe
Poteu iem droe hana haba

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s