Cuplikan Karya Teungku Di Cucum Buat Para Anak Cucu!

Sekilas pengantar: Sejauh ini baru tiga karya yang saya ketahui pernah ditulis oleh Syekh Abdussamad alias Tgk. Dicucum. Ketiga karangan yang ditulis dalam huruf Arab Melayu/Jawi/Jawoe itu  ialah:
1. Karya yang belum diberi judul, sehingga saya beri judul sementara “Tambeh Gohna Nan”(Tambeh belum bernama).
2. Akhbarun Na’im ( 1269 H )
3. Tambeh Tujoh Blaih ( 1306 H )
Dalam menyambut Hari Raya ‘Idul Adha 1435 H serta mengenang 10 Tahun Bala Tsunami Aceh ( 15 Zulqa’idah 1425 H – 15 Zulqa’idah 1435 H ), berikut adalah cuplikan beberapa bait Tambeh Gohna Nan itu:

Alhamdulillah sudah rab sampoe
Bandum kamoe harap bak gata
Kamoe kala’eh umu ka lampoe
Do’a dikamoe bandum keugata

Bokonle dhiet dum Meuligoe
Teutapi putroe tan nyang ceudah
Pajan-pajan mate kamoe
Yue seumanoe laju bagah

Lheueh seumanoe boehlam gafan
Yue seumbahyang ateueh jeunazah
Lheueh nyan teuma ba u jeurat
Ta intat seuon jinazah

Watee katoek dalam jeurat
Keue u Kiblat peuduek beuceudah
Papeun sion nyang got-got that
Lam lieng leuhat kamoe takeubah

Teuma lheueh nyan kajeuet seubee
Ie diulee ple si tima
Pula nawah gaki ulee
Dang na batee taboeh tanda

Lheueh takubu yue teuleukin
Keu Mukmin beuna keuh do’a
Meuna riyeu bri seudeukah
Meungna mudah nibak gata

Meutan riyeu peuelon peugah
Ta seuleuah beule tado’a
Lheueh seumayang jeueb-jeueb watee
Talakee keu kamoe do’a

Daktan laen he samlakoe
Seulaweut lhee go beuta baca
Taniet pahla jok keu kamoe
Rateb lhee go beusabe na

Tajak u gle ta meuladang
Taba parang uteuen tacah
Meungna taweueh ngon tasayang
Beuna tabang ateueh jeunazah

Meutan inseueh ngon tasayang
He intan pulang bak Allah
Kadang kamoe na lam utang
Beuta sayang tajak peuglah

Sibu ranup seupot beungoh
Na jeuet leumoh on jiteuma
‘Ohtan kamoe uroe singoh
Bek meuseunoh ngon saudara

Daleh pitan meusihah tanoh
Peue meuseunoh laen bak haba

Jak u pasi takoh nipah
Ta beureukah dum ek taba
Hareuta lontan peue lon keubah
Bri Potallah hana kaya

Digob laen harta meutamah
Bri Potallah le usaha
Digob laen hareuta bobah
Bri Potallah rijang kaya

Dilon hana kaya limpah
Bri Potallah dum kong ija

Musem Timu geumupukat
Musem Barat jakbloe publoe
Adak pina lon hareukat
Dum glah ie klat keu cot uroe

Tanna lon bloe meuh ngon pirak
Tanna sikrak ija got ragoe
Tanna lon bloe bajee keu lagak
Tanna lon jak keudeh-keunoe

Tajak ublang talho pade
Ta tinteuengle taboih jumpung
Hana umong bak meupade
Boh hate meupeue keuh tatueng

Jak meulampoih pula timon
‘Oh teuka ngon tayue pajoh
Tanna keude deungon umong
Tan lon tamon ngon bloe lampoeh

Teubiet ublang tapoet pade
Tapilehle nyangka tuha
‘Ohtan atra he boh hate
‘Oh mate hana pusaka

Teubiet ublang jak keumawe
Jikap bace sep sigo croh
Lon hareukat sabe-sabe
He boh ate dum sep pajoh

Teubiet ublang jak keumawe
Tan jikaple peue keuh tacroh
Lon hareukat sabe-sabe
Hana hase peuekeuh lon troh

Tuboh saket sihat hana
Kayem hana mangat tuboeh
Meunan untong bri Rabbana
Pakri teuma he aneuk beh!

Ekna sunggoh ta hareukat
Ekna mangat dak tapajoh
Tuboeh saket hana mangat
Lam meu-ubat hana teudoh

Padum teuga lon hareukat
Na keu ubat hana keu pajoh
Peuelom laen lon bloe meuhat
Meu-ubat meujan hana boeh

Meunan neu brile Hadlarat
Saket mangat disinan troh
Nyankeuh aneuk pike beuna
Sangkira na meuhat lon troh

Daleh pitan teumpat dua
Baklon gisa lon duek piyoh
Sangkira na teumpat duwa
Sangka gata teuntee na lon troh

Nyankeuh aneuk pike beuna
Ngon saudara bek meujioh
Meungna udep bandum gata
Ngon saudara tameutroh-troh

Meunan wasiet ubak gata
Ngon saudara bek meuputoeh
Jampang-jampang Uroe Raya
Saweue sigra beuthat jioh

Jampang-jampang peue na mara
Saweue sigra beurijang troh
Jampang-jampang na jeuet dawa
Dame sigra beurijang troh

Jampang-jampang na seungsara
Bandum sigra ban-ban nyang roeh

Tajak ugle tatheun taron
Takalon pat bakat rusa
‘Oh tuha Ma bungong siron
Jak kalon bek putoh asa

Treb-treb sibletle jak kalon
Bungong siron jak peunyata
Kadang saket tansoe kalon
Pakon-pakon peue saleh na

Beukayem na saweue kalon
Meungna mantong udep neuhna

Taplah bak U peugot rinyeun
‘Oh tatheun beugot tasadeue
Treb-treb siblet saweue siseun
Lam ruweueng beuna ta eu-eu

Bungong puteh pula dileuen
Bak kuyuen pula bineh weue
Jampang-jampang woele siseun
Lam ruweueng tasaweue-saweue

Lingka rumoh tasampoh broeh
Boih bak jioh bek tiek dileuen
Kadang-kadang tanpeue pajoh
Intat beutroeh peue ek makeuen

Lingka rumoh bek pula Iboih
Teumpat piyoh dum beurahla
Kadang gata gampong jioh
Peu-ek beutroh peue mudah na

Peuelom nyang toe woe bek putoeh
Saweue beutroh bekna lupa
Meutan meunan he aneuk beh
Gata luroh gasien papa

Meunan cit guree saweue beutroeh
Walee jioh deungon gata
Meungnyo nyang toe jakle beutroh
Meungnye jioh saleum beuna

Takzim keu guree teuka ijazah
Takzim keu Nangmbah seunang jiteuka
Takzim keu Nabi neubri syufu’at
Takzim Hadlarat neubri Syuruga

Bukonle dhiet blang ‘Arafah
Got that tampah keunong uroe
Bukonle dhiet dum amanah
Lon wasiet keu aneuk cuco

Bak siuroe bri Potallah
Lon duek dahsyah tahe sidroe
Ingat keu untong that beulisah
Aneuk lidah na padum droe

Mantong ubit jih goh mudah
Gohlom leupah peumeu’en adoe
Peue taaja ubit leupah
Peue tapeugah teuntee tuwo

Leumah lam se bri Potallah
Bak keureutah lon boeh sinoe

Bukonle dhiet tanoh Mekkah
Sinan payah udep peunula
Tanda gaseh keu aneuk lidah
Lon keubah geunantoe atra

Harta ngon woe u nanggroe luwah
Nibak Allah nanggroe seujahtra
Sideh keuh teumpat putroe nyang ceudah
‘Ainal Masdhiyah deungon Syuruga

Bukon sayang tangieng kipah
Guruek leupah go meugisa
Wasiet lon nyoe bak keureutah
Sinan lon keubah bandum keugata

(Sumber: Tambeh Gohna Nan, karya Syekh Abdussamad alias Teungku Di Cucum, halaman 121 – 125. Bale Tambeh, 21 Beurapet 1435/ 21 Zulqaidah 1435 H/ 16 September 2014 M, pkl. 10.30 pagi, T.A. Sakti).

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s