Allahyarham Dr. H. Hasballah M. Saad, MS

                 Allahyarham Dr.H. Hasballah M. Saad,MS

                       

                           Oleh: T.A. Sakti

Alhamdulillah ta syuko rahmat

Buleuen keuramat ujong   rab  teuka

Mudah-mudahan bandum seulamat

Meuteumeung niekmat Lailaton Kada

 

Dalam Serambi ban nyoe dimuat

Beurita hangat trok di Jakarta

Geuwoe bak Allah Hasballah Saad

Nyang kalheueh geumat Menteri Negara

 

Soe katrok ajai beukai ka tamat

Walau si saat cit tanggoeh hana

Tanyoe meudo’a talakee rahmat

Hasballah Saad beulam  bahgia

 

Niet ulon kisah mudahan mangat

Nyang na mamfaat keu ureueng muda

Dum aneuk Aceh beukong seumangat

Hasballah Saad boeh keu neuraca

 

Tacok keu cunto saboh meuneumat

Ngat kong seumangat udep lam donya

Jeuet lon kheun meunan  bit na alamat

Hasballah Saad ureueng udep jra

 

Bah pih ‘oh rayek   pangkat dum  geumat

Tapi kon mangat yoh phon useuha

Lam meut’ie tu’ie hantom na mangat

Namun seumangat sebe meunyala

 

Seumangat juang pantang khianat

Udep lam himat tan putoih asa

Bak pihak gasien hansep ‘geuranat’

Bunda geuintat bak Tuke kaya

 

Yue bantu-bantu meukat bu mangat

Asai ek tamat  bak jak Sikula

Bak Hasan Raden Warong  meugah that

Lam Meulo teumpat toe ngon Keumala

 

Bak Warong Bu nyan tantrep geumumat

Sabab meukarat bak jak Sikula

Warong Bu Tuke Sen leubeh geuminat

Hasballah Saad pinah keureuja

 

Sinan  Nyak Ballah trep that meukeumat

SMP   tamat na  lhee thon  lama

Ban poh peuet malam tugaih ka geumat

Taguen ie leugat ku U seureuta

 

Sabab warong nyan kagob  thee mangat

Bu Guri meuhat ngon bandeng hana

Bu Guri beungoh rame  nyang hajat

Hasballah Saad ku U tiep masa

 

Ie seu uem kaju   sue U ka lumat

Santan kasep that siploh boh U na

Sinyak Hasballah jak manoe leugat

Lheueh  nyan  beurangkat  ubak Sikula

 

Meunankeuh sabe tanpre tiep  saat

Hasballah Saad jeumot lagoina

Guru  geusayang sabab carong that

Tuke geuangkat lagee aneuknda

 

Tamat SMP  lom SGB sambat

Mantong di teumpat Lam Meulo juga

Hanya lam  lhee thon SGB tamat

Lheueh nyan diangkat guru Sikula

 

Jeuet Guru SD  padum thon meuhat

Bak saboh teumpat nan Gampong Langga

Ngon gampong Lameue hana jeuoh that

Meunyo ta sipat limong batee na

 

Sayang   ‘oh ujeuen jalan rhub sangat

Gari han liwat bhan tan meuputa

Nibak siuroe cit na lon lihat

Hasballah Saad payah jak ngon pha

 

Geusadeue  Gari Keude Cut Amat

Langkah geuangkat  u gampong Langga

Lon murid SD di Lameue teumpat

Glah nam rab tamat yohnyan Sikula

 

Teukeudirollah bak saboh saat

Tuhan bri rahmat keupada hamba

Dipeugot kursus keu guru leugat

Lam Meulo teumpat nan jih KGA

 

Kursus lhee buleuen hana trep tamat

Hasballah Saad luloih lumboi sa

Tugas belajar laju  meundapat

Kuliah meuhat keunoe u Banda

 

Trok   Banda  Aceh  lanja  terlibat

Ketua Senat bak FIP ngon  sigra

Nibak HMI nyan pi that hibat

Laju meucrab-crab maju lagoina

 

Sekretaris DEMA  bak akhe pangkat

Lheueh nyan padum  at  tamong penjara

Teubiet totopan Dosen diangkat

Aktif giat that   meumacam rupa

 

Ban Reformasi   maju leupah  brat

Meuteumeung pangkat meuganda-ganda

Anggouta KPU lom DPR    Pusat

Hasballah Saad duek di Jakarta

 

Buet Presiden Gusdur teuma geuangkat

Menteri HAM  geumat phon-phon baro na

Seb ‘ohnoe dilee ka lon peutamat

Jeuet cok ibarat hai aneuk muda!!!

 

Neubri Ya Allah meuribee rahmat

Hasballah Saad   beulam Syuruga

Wahe  rakan lon timu ngon barat

Mohon beule that neu lakee do’a

Amiinn!!!

 

*Keterangan: – Harian Serambi Indonesia, Rabu, 24 Agustus 2011 halaman 1 – 11.

–  Dr. Hasballah Saad berpulang kerahmatullah tgl. 23 Ramadhan  1432/23 Agustus 2011 jam 00.45 wib., di RS Mitra Keluarga,Bekasi, Jawa Barat. Dikebumikan di Lameue, Kecamatan Sakti, Pidie, Aceh, malam Rabu, 23 Puasa 1432 jam 11 malam.

** Pada, Sabtu, 27 Ramadhan 1432 sekitar jam 12.35 wib., cae di atas  dilantunkan oleh Medya Hus di  ACEHTV dengan penjelasan ringkas dari saya sendiri. Hari Minggu, 28 Agustus 2011, cae ini dimuat dalam rubrik ‘Budaya’ Harian Serambi Indonesia, halaman 2. Besoknya, Senin, 29 Puasa 1432 saat saya sekeluarga takziah(jak kunjong) ke rumah almarhum di Lameue, ketikan asli dan yang dimuat Serambi syair Aceh ini saya serahkan kepada Kak Dar, isteri almarhum. Setelah berbincang dengan keluarga beliau, barulah saya tahu, bahwa tempat pertama Bapak Hasballah Saad  bekerja di Warong Bu Hasan Raden, baru kemudian di Warong Bu Tuke Sen. Akibatnya, syair ini pun mengalami sedikit perbaikan setelah pemuatannya dalam “Serambi Indonesia”.

– SGB = Sekolah Guru Bantu      

 – KGA = Kursus Guru Atas

 – FIP  = Fakultas Ilmu Pendidikan Unsyiah

– KPU = Komite Pemilihan Umum

– HAM = Hak Asasi Manusia

– DEMA = Dewan Mahasiswa

    **Bale Tambeh Darussalam, 25 Puasa 1432/ 25 Agustus 2011 poh 00.20 wib., Singoh poh 13.00 adalah Uroe Ultah keu  27 ulon dipokle muto(ditabrak mobil)  di Kalasan, lk 8 km di sebelah Timur kota Yogyakarta.   Sebab hari naas itu,  Sabtu, 25 Ramadhan 1405 H  bertepatan 15 Juni 1985.  Syukur Alhamdulillah, saya masih diberi hayat oleh Allah Swt!, T.A. Sakti

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s