Surat u gampong-mengenang 27 tahun musibah kecelakaan di jalan raya Klaten-Yogya

SURAT U GAMPONG

Assalamu’alaikom hai Ummi payong

Sambot saleuem lon aneuk di Yogya

Aneuk meukhaba lam syae panton

Gantoe jak kunjong duek peugah khaba

 

Neu niet ka lon woe keunoe u gampong

Katrok lon kunjong Ummi mulia

Nyang keuh meukeusud  surat lon suson

Gantoe badan lon keunoe trok teuka

 

Deungon idin Po Tuhan ghafuron

Lam sihat dilon sideh di Yogya

Harap meunan cit Ummi di gampong

Brile Ghafuron sihat sijahtra

 

Lon kira-kira lon hitong-hitong

Leubeh dua thon ulon di Yogya

Jak tuntut ilmee Sikula lambong

Lon tinggai gampong di Pulo Ruja

 

Bah tinggai siat rumoh dileuen Krong

Aneuk kumuen Butong ka tanle Apa

Lon tinggai Ummi dan Cutbang Beutong

Lon cuba  arong di Tanoh Jawa

 

Saket ngon mangat supaya meuphom

Leupie ngon tutong mangat lon rasa

Cit sidroe jatoe jak meukat untong

Beu Allah tulong jarak ngon bahya

 

Bacut lon rawi kisah dua thon

Kriban nasib lon di Tanoh Jawa

Saket ngon mangat bandum meuhimpon

Ban Jingki ek tron top pade aka

 

Meujan-jan  jiek  meujan-jan jitron

Meusinthob punggong saket lagoina

‘Oh watee jiek lam awan lambong

Teuseunyom ulom seunang leupahna

 

Meujan-jan pijuet meujan-jan tumbon

Naban boh rom-rom watee puwasa

‘Oh watee pijuet tijoh ie idong

Dipruihle Lutong  teugeng lam paya

 

Meunan umpama kisah nasib lon

Lawet duwa thon di Yogyakarta

Meutuka gantoe sijuek ngon tutong

Umpama bakong dalam ceureupa

 

Le that peue bagoe hantomle lon com

Leubeh duwa thon hantom lon rasa

Watee Puwasa tan boh meurom-rom

Tan timphan balon jan Uroe Raya

 

Apam Timphan Iem Leugok Tumpoe phon

Karab trok lhee thon meulon ngieng hana

Beulacan uriek Beureukiek tumbon

Kuwah on  Murong di Jawa hana

 

Bulukat tuhe Tape breueh Grong-Grong

Ticah boh Jantong sang mangat raya

On mulieng reundang phek pisang glang cron

Leumang meusarong pihtan di Yogya

 

Ungkhui dan payeh beureuteh apom

Tantoe ngon ulon geuleupak geumpa

Khanduri atot dan malod bak thon

Pheh peunoh dilon hantom lon rasa

 

Buhu lon balek titek lon ubah

Meusambong kisah seun-seun sibanja

Meunyo lagee sot hanagot surah

Bahle meupayah peucanek haba

 

Keuhai teumon bu bacut lon peugah

Leupah that sosah di Yogyakarta

Eungkot that jareueng dilob lam babah

Laot bahrullah jarak lagoina

 

Nyang kayem that-that singgah lam babah

Boh manok teuplah dan tahu tempa*1

Bak warong padang jan-jan lon langkah

Na sie meugapah dan eungkot buta

 

Teuma watee nyoe teukeudirolllah

Masok lam babah peue-peue nyang teuka

Bu hana eungkot lagot ka keumah

Trok lhee go tamah gohlom meurasa

 

Meunan keuh bagoe hudep ‘Abdullah

Seunang ngon sosah lawet di Jawa

Beuthat beumeunan di Mi bek gundah

Si aneuk lidah dalam bahgiya

 

Ureueng di ranto cit meunan ulah

Seunang  ngon sosah patot jirasa

Ngat batat bacut bek leumiek leupah

Raya faidah keu pangkai tuha

 

Adak tan wasiet bak Mi meutuwah

Jadeh peuwoe sah si dara Jawa

Atawa Bali tari dum ceudah

Khaba jipeugah bahsa Indonesia

 

Nyan bacut khaba tutop beurakah

Meuneu’en lidah kegura-gura

Simantong hudep meugrak-grak langkah

Wasiet  Ummi sah teutap lon jaga

 

Di lampoih Tanjong timoh Kumili

Di Padang Tiji asrama tantra

Surat lam syae laju lon rawi

Meuganti-ganti kon lagee  nyangka

 

Bak Ummi payong ulon peugah kri

Bacut lon rawi keu bhaish Sikula

Kuliah kabeh nyang nan teori

Tinggai Skripsi dan jak lam desa*2

 

Bak Cutbang Butong  neuci neusudi

Peue nan areuti nyang lon calitra

Lon peunyuem-peunyuem lon hitong hari

Nam buleuen lagi gohlom cit gisa

 

Bak mita bahan peugot Skripsi

Lon ula-ili Solo dan Jakarta*3

Hansep sigo jak ban gob peugah kri

Gohlom ulon ci alehnyo beuna

 

Mudah-mudahan ngon do’a Ummi

Bekna nyang deungki akan aneuknda

Beutrang pikeran lapang ngon hati

Peugot Skripsi rijang seunia

 

Meujan teuseureh di dalam hati

Pakon treb lawi tamat Sikula

Umpama Tupe ka lape gigi

Han ekle nari leumoh anggeeta

 

Bahthat beumeunan ngon idin Rabby

Beu ek lon ili beutrok bak punca

Umpama ureueng geupula campli

Tinggai pot biji pasoe lam ija

 

Sang kaseb ‘ohnoe kisah lon rawi

Panyang sikali ka gadoh makna

Gantoe ulon woe pajoh khanduri

Bak Malod Nabi dan Uroe Raya

 

Gantoe Makmeugang pajoh sie sapi

Nyoe surat ini keu tanda mata

Lon lakee meu’ah  sujud   t’akdlimi

Keupada Ummi nyang that mulia

 

Beuna lam sihat sabe Allah bri

Meureumpok nanti deungon aneuknda

Wassalamu’alaikom kalam intahy

Ka habeh cakri ‘Abdullah Yogya

 

Yogyakarta, 1 Jamadil Awal 1404

dto

‘Abdullah bin Sulaiman

 

#Keterangan:

–        Syair ini diposting ke dalam blog “Bek Tuwo Budaya”,   dalam rangka memperingati ULTAH ke 27 ditabraknya saya di Yogyakarta; yang jatuh pada hari   Kamis tanggal 25 Puasa 1432 bertepatan 25 Agustus 2011,karena musibah itu terjadi hari Sabtu, 25 Ramadhan 1405 H/15 Juni 1985 M.

–        Naskah asli surat ini dalam huruf  Arab Melayu/Jawi/Jawoe, karena Ummi saya tak bisa membaca dalam huruf Latin warisan penjajah Belanda itu.

–        Hal-hal yang kurang jelas, saya  uraikan  dengan huruf Latin ( langsung di sisi bait  syair huruf Jawoe )  seperti berikut:

*1  Tempe dan tahu dibuat dari kacang kuning( sebelum kampanye besar-besaran terhadap TEMPE yang dilakukan pemerintah   RI yang  dipimpin Menteri Penerangan HARMOKO di tahun 1984, tempe belum akrab dengan masyarakat Aceh).

*2  Skripsi dan KKN (Kuliah Kerja Nyata). KKN = 3 bulan

*3  Solo – Jakarta. Yogya ke Jakarta jaraknya 12 setengah jam naik Kereta Api. KA di Jawa larinya seperti bis. Yogya ke Solo = 60 batei.

Catatan:    

  1. Tiga lembar atau 14  bait awal dari syae ini ( ketika masih dalam huruf Arab Melayu alias  Jawi atau Jawoe) pernah saya dendang ulang pada Workshop Pedoman Penulisan Arab Melayu yang diadakan Pusat Penelitian dan Pengkajian Kebudayaan Islam (P3KI) IAIN-Ar Raniry,  Darussalam, Banda Aceh, Rabu 27 Juli 2011 karab poh 12 siang bertempat di Asrama IAIN Darussalam. Keterkaitannya, karena naskah surat itu tertulis dalam huruf Arab Melayu atawa Jawoe.
  1. Sengaja saya posting pada hari ini dalam rangka menyambut ULTAH ke 27 saya dipokle moto (ditabrak mobil) di Kalasan, lk 8 km sebelah timur kota Yogyakarta, sewaktu pulang dari tugas KKN-UGM. Sebab hari naas itu adalah Sabtu, 25 Puasa 1405/15 Juni 1985. Syukur Alhamdulullah, saya masih sehat dan dapat bekerja seperti biasa !
Iklan

4 pemikiran pada “Surat u gampong-mengenang 27 tahun musibah kecelakaan di jalan raya Klaten-Yogya

  1. meutuwah that hikayat. lon galak. saleuem pak TA sakti

  2. that payah ka tamita ureueng tuleh hikayat,kalale ngen tivi ureueng jinoe

    saleuem pak

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s