Surat dari Bandung

 

 

 

 

Bandung,  26 Januari  ‘85

 

Keu Adoe lon nyang meutuwah, nyang lon harap sabe beuna dalam lindongan seureuta Rahmat Allah di Jogyakarta.

 

Assalamu’alaikom adoe lon sayang

Sipatah kalam aduen peusampoe

Sambot adoe e ngon dua tangan

Ngon ate seunang saleuem aduen droe

 

Keureutah puteh daweuet jih itam

saleuem bak cut bang meuhat keu adoe

padum lawet treb ate lon deundam

lon preh-preh pajan teuka teuka cut adoe

 

Han ek lon theuen le ate nyuem leukang

Lon preh-preh datang keunoe Cut Adoe

Adoe uroe jeh janji ngon Cut Bang

Akan ta datang keunoe bak kamoe

 

Saleh salah lon han ek lon peutrang

Meu peue salahan ta peugah jinoe

Meuah keu aduen beu rijang-rijang

Bek le meusarang lam ate adoe

 

Ji likot moh timoh kudangsa

Kupula jawa cdeuen hana le

Padum treb lawet lon preh-preh teuka

Akan adinda geunaseh ate

 

Meubiet pih meunan wahe adinda

Kadang pih agata teungoh meu ase

Teungoh teumuleh peulheueh sikula

Supaya sigra gisa kombali

 

Lon harab sabe beuba ji gata

Rajin meumbaca tuleh  skripsi

Jeumot diskusi deungon beulaja

Supaya sigra laen tapike

 

Sideh di Aceh gob preh-preh teuka

akan adinda geunaseh hate

Tawoe adoe e po bijeh mata

Aceh tabila bangun keulayi

 

Meukon geutanyoe jinoe oseuha

Nibak gob teuma han peue ta sudi

Mate kon lakoe rugoe kon atra

Aceh lheueh papa ji jih peureugi

 

Meunyo na umu neubri le Tuhan

Jumade awal aduen keumeung woe

Tanggai 31 abeh ujian

Teuma oh lheueh nyan gisa u nanggroe

 

 

Rapat keureuja sideh di Padang

Akan Cut Abang ingin peuroh droe

Bak awai Maret meu izin Tuhan

Singgah lon tuwan sira ulon woe

 

Hate that rindu meujampu deundam

Ingat dek badan, teumuda adoe

Saweue aneuk miet seureuta bunda

Gob nyan ka tuha tinggai pieh sidroe

 

Meunyo adinda langkah u Bandong

Dalam harap lon beusigra sampoe

Sabab di Cut Bang akan kumunjong

Urusan untong rakan disinoe

 

Rame rakan lon kabeh beulanja

Bak jak sikula Pasca Sarjana

Nyan keuh sabab jih lon tuan bungka

U Jakareuta cari bantuan

 

Kadang pih sideh gaseh beulanja

Soe-soe nyang kaya geubri sumbangan

Meunyo han meunan keubiet ceulaka

Han lheueh sikula paduem droe rakan

 

Kareuna ulon jibet Ketua

Payah useuha nasib ureueng nyan

Meunyo han meunan ka hana gura

Rugoe Keutua nibak Cut Abang

 

Lon harap adoe bak tem medoa

Agar supaya ek na sumbangan

Nasib rakan lon cukop meurana

Hana le doa meunyo kon meunan

 

 

Boh ka beh, suai jih rindu that ulon teumuleh lam basa droe teueh. Lon harap lon goh  lom le tuwo akan tata bahasa Aceh, meunan cit adoe lon. Pajan teuma jadeh tajak u Bandong, sabe lon preh-preh gata teuka. Sabab le hai lonkeumeung bicara, suai keureuja gata, suai darabaro, seureuta suai sikula.  Lon seunang that ate meunyo adoe lon tatem boh pikeran bacut keu bhaih nyan, meuseuki oh lheueh sikula teuma.

Meu nyo na meureumpok rakan-rakan, Pak Alfian, Teuku Iskandar, Pak Jamaluddin, Pak Ir. Syammaun Ali, Taufik, ta peuet saleuem lon keu gob nyan bandum.

 

Wassalam,

dto

Hasballah, MS

 

Catatan mutakhir:  Surat ini saya ketik ulang sambil menunggu waktu yang pas saya berangkat ke bandara SIM Blang Bintang untuk turut menunggu tibanya jenazah almarhun DR. Hasballah M.Saad dari Jakarta. Sebenarnya  sudah lebih enam bulan lalu saya mohon izin pada Bapak Hasballah, MS agar saya boleh memuat surat-surat beliau kepada saya kedalam blog saya. Beliau menyatakan setuju, tetapi karena menunggu habis pemuatan surat-surat UU.Hamidy, maka pemuatannya tertunda.

Bale Tambeh: Selasa, 23 Puwasa 1432/ 23 Agustus 2011 poh 15.02 wib., T.A. Sakti

 

 

 

 

 

 

 

 

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s