Taga Pekan Kebudayaan Aceh Tiga

Taga Pekan Kebudayaan Aceh  3

Oleh : T.A. Sakti – Taman Pelajar Aceh Yogyakarta

 

Assalamu’alikum tanglong hekeumat

Meukru seumangat bandum syeidara

Samboot saleum lon ngon hate mangat

Gantoe duek sapat tapoh-poh cakra


Kisah di Aceh lon deungo mangat

Kareuna sahbat karab PKA

Hate that seunang jadeh trok rahmat

Lon karang surat di Yogyakarta


Surat lon kirem dengon  Pos Kilat

Supaya siat cit trok u Banda

Keu bandum rakan wareh ngon sahbat

Keu masyarakat Aceh sineuna


Geutanyoe Aceh katrok syeupeu’at

Allah bri rahmat meuganda-ganda

Jalan kabeh got ngat makmu rakyat

Seulawet geumat le Bapak I. H. ( = Ibrahim Hasan)


Allah teungku E syuko keu rahmat

Bek jeuet keu laknat bak laen masa

Meunyo tasyuko neutamah leugat

Meujan ka bangsat  Tuhan bri bala


Meumacam cara peumakmu rakyat

Tanyou meupakat keureuja sama

Peumimpin Aceh krab that ngon rakyat

Kayeem meusapat di desa-desa


Akan hai jinoe keu PKA lhei

Patot hai sampei keureuja sama

Tabri bantuan peue nyang peureulei

Ban laku nyang mei ube  na daya


Budaya Aceh neuk boh teureujei

Nyang layei-layei peuleuhu teuma

Ibarat layang geuboh teurajei

Dipo meutabei lam awan  miga


Ka limong blah thon meu’en lam abei

Yoh nyan keuh watee PKA 2 (1972)

Baro keuh jinou na PKA lhei

Rakyat that teuntei seunang lagoina


Budaya Aceh peutari lagei

Supaya ji thei dalam ngon luwa

Le that geutanyoe jinoe meulagei

Tuwo peureudei sisat lam kota


Baro ’et Langsa sithon meusilei

Meubalek  lagei reusam meuhaba

Ngui bahsa Aceh sang-sang ka malei

Takot  ‘oh gob thei kulot leupahna


Carong bahasa tujoh-dua lhei

Asai sep  ulei got that meuguna

Pakek bak meupat  ‘oh jan peureulei

Bek ngon-ngon  Himbei takheun ” khamsia!”


Meunyan keuh tanda budaya layei

Ka teuka malei ka gadoih bangga

Takot bayang droe sang-sang jen purei

Meusom lam  “abei” budaya luwa


Ureueng moderen kon ban nyan lagei

Manoe ngon abei budaya luwa

Bukit cit carong ngon rancak ulei

Tacok ileumei bak bangsa luwa


Lam GBHN meunan geubri thei

Geuyue pruih abei cok  Kulahkama

Meung ek lagei nyan that ceudah sampei

Indonesia teuntei bit maju teuma


PKA lhei nyou teupat that watei

Budaya layei peukong lom sigra

Teungoh mumang brat trooh ubat ulei

Ple bak peureudei pupok budaya


Di Lhokseumawe na PT. Aron

Ija Patek krong pabrek di Yogja

Nadham Aceh nyou laju meusambong

Meugantoe suson buhu meutuka


Taga PKA jinou sagai doon

Ujoong keu ujong ka tampok haba

Meuphon di Banda –Meulaboh-Beutong

Teumieng meusambong troh kuta Langsa


U Tapaktuan-Singkil-Teureumon

Laju meusambong Bireuen-Cot Jeumpa

U Lhokseumawe meuwe-we langsong

Keudeh meusinthong Aceh Tenggara


Sinabang Janthou tanggou trooh u Lhoong

U Kumbang Tanjong-Sigli-Keumala

Keudeh Lammeulo lagei geusinthong

Lueng Putu-Tanjong na sang geupula


Ban saboh Aceh saheh ka meuphom

Gampong ngon jurong kabeh troh haba

Di Banda Aceh jadeh bak nyou thon

PKA langsong bit-bit teuntei na


Uluwa Aceh meugah ka jitron

Kayeem disuson lam surat haba

Lam Indonesia jeuet kheun ka muphoom

Meunan cit kawoom di naggroe luwa


Brunei Darussalam Malaysia Semenanjong

Katrooh ditaom taga PKA

Yogya-Jakarta-Medan ngon Bandong

Cit keudroe geutroon keutua PKA


Masyarakat Aceh sideeh geu kunjong

Geulakei tuloong bri kira-mira

Meupikee-pikee rugoe ngon untong

Nyang beujeuet langsong sukses PKA


Peumimpin Aceh  patot tajunjong

Rakyat geuhitoong lambuet PKA

Uleh seubab nyan syeidara kaoom

Tanyou mamandum dukoong PKA


Wahee  E  Teungku duson ngon gampong

Bek salah muphom keu hai PKA

Tanna di sinan buet langga hukoom

Atawa meuisrong ngon yue agama


Seubab nyan Teungku patot neutulong

Tuloong bri muphom rakyat bandum na

Tiep-tiep  Meunasah watei meuhimpoon

Hai   Teungku  tangloong peugah PKA


Di Jabal Ghafur ateueh bukeet cot

Meugah sinan got sikula tinggi

PKA tiga nyang geumeung peugot

Aceh geuseutot punca aseuli


Peurangou nyang brook taboih lam urot

Pileeh nyang got-got keu akhlak budi

Barang gapeu buet pikee brook ngon got

Bek jeen peuwot-wot lam ku’eh deungki


Su meugr’oh-meudhot ban lumo bak rot

Bingkeng seumilot iblieh nyang taki

Bandum atra nyan peurengou tan got

Jeuet teumakoot gob intat raseuki


Pariwisata Aceh peutimang beugot

Turis beusijot dijak kalon kri

Meutatem satoh beujroh ta peugot

Aceh ek seutot wisata Bali


Aceh beumaju e panyot culot

Akai akai sot tatiek lam tuwi

Lalee meurawoh dawok meuwot wot

Geuleupak gob top bek preeh hai akhi


Peurangoe burek beureughek kulot

Gadoh meuwot wot lam warong kupi

Bandum sifeuet nyan hanmei  ta seutot

Perbuatan kulot bek le ta asi


Rumpuen Pase remmeune Nagan

Lagee meulisan mameh suara

Ureueng lam hate le gaseh sayang

Rijang na rakan ho ho geuteuka


Geuhala ugle meureumpok Makwang

Geutajo ublang meuturi Kuya

Geujak u laot sambot le Pawang

Tamong lam peukan sajan Syeedaga


Mameh deungon su peurangoe sopan

Raseuki Tuhan cit jilet gata

Asai phui tuleueng bek ban ateueng blang

Mantong meukubang  troh watee dhuha


Tinggai di pasi jumot meusampan

Pukat geureuntang neuheuen usaha

Tinggai di gampong rajin meugoe blang

Pula tanaman nyang got hareuga


Nyang toe deungon gle keubon peutimang

Nilam ngon lawang beugot peulahra

Maseng bak buet droe peubuet beureumbang

Karonya Tuhan raseuki pih na


Nibak peumimpin geutanyoe peusan

Barang pertanian yum jih bek goga

Yuem barang gampong yuem barang dagang

Beuna seuimbang pekriban cara


Supaya jumot ureueng meugoe blang

Nyang pula nilam hatee ngat suka

Nyang beu’o seuiet rajeen pih datang

Imbang yuem barang dusoon ngon kuta


Peugot PKA meunan tujuan

Lam jangka panyang meunan syeidara

Aceh beumakmu nibak saboh jan

Ngon sifeuet insan maju teubuka


Hudep lam lalou urou ngon malam

Lale peh rantam beungoh ngon sinja

Pajan keuh maju meunyo lagei nyan

Uleeh sebab nyan beudoh keureuja


Keu jangka panyang meunan tujuan

Geupeuna Peukan PKA tiga

Lam jangka paneuk bak buleun lapan

Thoon lapan-lapan teumpat di Banda


Di Banda Aceh nyang Darussalam

Neulangkah rakan tuha ngon muda

Keureucih tan geucok tamong Blang Padang

Meunan keutrangan Bulletin PKA


Likok di Manggeng puseeng Peulumat

Suara mangat di Samadua

Taga PKA ka loon peutamat

Han ekle karat malam ka jula


Meukeusud taga muphoom bak sahbat

Indonesia meuhat artinya gema

Hana loon pandang ngon mata jasad

Uloon seumurat sideeh di Yogya


Beurayeek meu’ah salah ngon silap

Maklum hai sahbat jeuooh ngon Banda

Asou kisah nyou supaya meupat

Uloon peusapat bak tiep beurita


Bak T.A.Sakti bah ohnou siat

Jarou loon angkat ateueh jeumala

Assalamu’alaikum kawom keurabat

Do’a seulamat sukses PKA!!!


Catatan:  – Telah dimuat dalam Majalah PUAN No. 17/1988 halaman  36 s/d 38 pada rubrik  ‘Ranub Sigapu’. Majalah PUAN terbitan BP – 7  Propinsi Aceh, Banda Aceh. Honor Rp. 25000,-

–          Sebagian tulisan ini telah saya edit, tapi sebagian lainnya tetap seperti   ejaan bahasa Aceh yang dipakai redaktur majalah PUAN. Arsip dari tulisan asli tidak saya jumpai lagi.

Bale Tambeh Darussalam, 11 Haji 1431

11 Zulhijjah 1431 H

18 November 2010

T.A Sakti


Iklan

Satu pemikiran pada “Taga Pekan Kebudayaan Aceh Tiga

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s