Krisis Moneter

Krisis Moneter

Oleh: T. A. Sakti

Bismillahirrahmanirrahim  awai phon surah

Alhamdulillah pujoe Rabbana

Syukur keu rahmat mangat neutamah

Seunang ngon susah kheundak Ta’ala

 

Miseue lawet nyoe nyang tanyoe peugah

Rakyat lam susah gampong ngon kota

Dum sekalian keuheundak Allah

Sabar bek gundah sambil usaha

 

Krisis moneter nan nyan  gob peugah

Sithon ka leupah geutanyoe rasa

Kareuna jitron nilai rupiah

Kurs jih that kalah ngon dollar Amerika

 

Sinan phon asai pakar nyang peugah

Lheueh nyan jirambah rata tiep punca

Peugawai negeri gaji ube paih

Dum keluh keusah hansep beulanja

 

Kawom peutani mugoe blang luah

Ya Masya Allah mungken leubeh jra

Teutapi droe nyan sabar sileupah

Bandum bak Allah geupulang punca

 

Di ureueng meukat konglomerat gagah

Meulek phe reubah hanale daya

Aneuek sikula mahasiswa kuliah

Cit bandum susah wab krisis landa

 

Neulayan eungkot lam laot luah

Seb keu minyeuk gah hana keulaba

Udep meutukang utoh deungon baih

Cit hana leupah beusep beulanja

 

Allahu Rabbi pakriban kamoe

Nyang meugriet meunoe karab sithonka

Juli 1997 phon musibah nyoe

Mei ’98 jinoe goh lom meuri bla

 

Phon-phon tadeungo rupiah tanyoe

Jitron tingkat droe kurs nibak  dollar (AS)

Barang yum ji ek ka musoe-gamoe

Teugeureuhing nyoe dum ureueng kota

 

Geutanyoe ‘awam bri harapan droe

Oh lheueh Sidang Umum  MPR  nyoe pasti bahgia

Sidang Umum pilheueh Presiden ka meusoe

Kabinet baro nyoe geulantik sigra

 

Teuma di barang goh jituri droe

Yum jih tiep uroe ji ek meuganda

Ureueng  nyang  meukat pih mumang keudroe

Sabab tiep uroe modal meuganda

 

Deungon IMF pemerintah geutanyoe

Beurundeng dudoe soal bri dana

40 miliyar dollar AS janji sabohroe

Jibantu tanyoe “Dewan Moneter Dunia”

 

Michel Camdessus Direktur IMF nyoe

Ngon Presiden tanyoe teken kaleueh na

Bantuan tahap phon mudah jibri roe

Nyang brat meubagoe bri tahap dua

 

Rab troh sibuleuen gohlom seuleusoe

Bit IMF nyoe kriet licik raya

Jiboh alasan ka meudeh meunoe

Bangsa Indonesia nyoe sang-sang di peukra

 

Adak meukon ban nanggroe lam phang-phoe

Bah jicok keudroe bantuan dana

Ginanjar Kartasasmita peumimpin tanyoe

Meu-uroe uroe meurundeng dan saba

 

Menlu Australia Alexander Downer

Bantu geutanyoe ngat jibri dana

Keudeh u Washington ji teureubang droe

Leueh nyan hai adoe u Tokyo teuma

 

B.J Habibie Wakil Presiden tanyoe

Geulantik uroe nyoe,  di Tokyo lusa

Wakil Direktur IMF pih jilibat droe

Stanley Fischer nyoe trok u Jakarta

 

Ohlheueh beurundeng malam ngon uroe

Similiyar dollar roe bri tahap dua

Konle lhee milyar janji sabohroe

Bit-bit IMF nyoe  rab hanmei peurcaya

 

Ngon jiboh syarat limong ploh bagoe

Untong geutanyoe teungoh seungsara

Ji peusalah meudeh ji peulaku meunoe

Ji peugot geutanyoe ban sidalupa


Napeue ta harap payah taiem droe

Ka nibak deuek-troe bahle ji peukra

Meunan keuh nasib meug gasien tanyoe

Ingat rakan droe soe goh lom rasa

 

Himat yoh kaya bek rampuih jaroe

Lam harta tanyoe hak Tuhan beuna

Zakeuet seudeukah keu rakyat Nanggroe

Izin po sidroe bek roh lam papa

 

Nekmat bantuan goh trok lam Nanggroe

Laen lom bagoe teuka seungsara

Ji ek BBM ban keunong gandoe

Peuelom rakan droe ngon listrek pula

 

Barang lam keude dum ka jilinggang droe

Rab han ek tabloe tinggi that harga

Baroekon bawang siribee sikatoe

Jinoe ji peubloe sineuk 100 rupia

 

Harga BBM geupeutron dudoe

Lheueh siploh uroe seleksi harga

5 Mei ’98 ji ek yum ban gandoe

Tanggai 16 roe geupeutron teuma

 

E ya Ilahi Khaliqul ‘Alam

Neubri beuteuntram udep di donya

Bak kamoe rakyat nyang kawom ‘awam

Tan macam-macam meumohon pinta

 

Neubri seujahtra kamoe aneuk Nang

Cukop makanan ngon sandang ija

Beusihat tuboh sungkoh bek datang

Nanggroe beu aman kasep seujahtra

 

Soal politek tarek pimpinan

Dikamoe nyan han meuphom pih hana

Bah urusan gob sikula manyang

Han meutuoh pham ‘awam lagoina

 

Pimpinlah kamoe bak ridha Tuhan

Bek di donya tan akherat hanna

Beklah neutipee rakyat  nyang ‘awam

Meunan harapan ikhlas dan percaya

 

Susah lawet nyoe hana meuban-ban

Sabab yum barang meuhai that harga

Adakle pade hase meukuyan

Jeuoh bandengan yum barang kota

 

Yum dasar gabah ji ek meutindan

Bah that beumeunan han that meuguna

Beuleuen Februari 19 sikureueng lapan

Sibeuleuen lheueh nyan  1  April teuma

 

Yum dasar gabah likot yum barang

Lam  sabe meunan ka meuthon-thon ka

Yum dasar pade cit soe pakek tan

Wab yum di pasaran leubeh lom harga

 

Akhe bak akhe tacok keusimpulan

Ureueng meugoe blang udep sabe jra

Bandum hasil tani yum that reundahan

Ureueng kantoran nyang boeh hareuga

 

Sinaleh pade peutblah kilogram

Meujak u peukan ta peubloe sigra

Sikilo saka situmpok ikan

Bloe bakong si ons  kabeh beulanja

 

Ban lheueh keumeukoh pula tanaman

Na timon Taiwan bawang seulada

Sabab nyang pula rame kon wayang

Ka leubeh barang jatoh hareuga

 

Nibak peumimpin talakee jalan

Bek geusia-siakan jeumot rakyatnya

Meunyo   lam Nanggroe seumpit pasaran

Tulong bri jalan eksport u luwa

 

Subhanallah lon pujoe Rabbi

Neubri ya Ghani jeuoh seungsara

Nasib breueh Catu  peugawai negeri

Baroekon geubeunci jinoe mulia

 

Sabe geutuka bak keude “Budi”

Geukheun meuriti gutee-batee na

Seulawet krisis geutueng geulayi

Tampoe buet Ummi, gutee  aneuk mita

 

Rumpuen lingka rumoh hansoe padoli

Jinoe tan henti ureueng guliga

Lam sabe geubloe bak keude Bang Ali

Wab harga tinggi keudroe geumita

 

Aneuk kuliah dara ngon tari

Rumpeun tiep pagi jipot jilingka

Sang malee-malee ngieng kanan-kiri

Rumoh  Kost putri ji puwoe sigra

 

Cara berhemat ureueng geucari

Mangat bek tinggi anggaran beulanja

Baroekon lhee go bak warong kupi

Jinoe seukali sikhan glah saja

 

Peukawen aneuk bak buleuen Haji

Geu-ubah janji ka payah tunda

Yum meueh simanyam 300 ribee rupi

Jeulamee Cut Ti han sanggop geuba

 

Nyang peugot rumoh di Teungku Gapi

Susah han sakri ka hansep biaya

Yum seumen ngon seng  iheng that tinggi

Geutanggoh janji mampleue di Dara

 

Yum ungkoh Moto jinoe ka tinggi

Got Labi-labi bah Moto raya

Hanle siat-siat jak ula-ili

Ohna khanduri woe u gampong Ma

 

Nyang leupah sayang nyang jak  tan heunti

Putra ngon putri pelajar- mahasiswa

Banda Aceh-Darussalam jak ngon keumbali

Ek  Labi-labi siribee beuna

 

Geutanyoe muhon ubak Ilahy

Saket ngon seu-i neubri bek teuka

Sabab yum ubat meuhai han sakri

Tabib ban jadi maju meugara

 

Kadar saket pruet mumang ngon seu-i

Gambe tupong kanji ramah on luna

Dum ubat gampong lagot geulayi

Baroekon akhi soe cukeh hana

 

Nyang pula gule leupah that meukri

Harga tinggi gule peue nyang na

Boh reuteuek boh pik eumpeuek on sawi

Cit le raseuki  nyang tem seumuga


Alhamdulillah syukur keu Rabbi

Bak krisis ekonomi neupubla sigra

Geutanyoe hamba ikhtiar bek heunti

Tuhanku Rabbi peuleupah mara

 

Susah ngon seunang insan di bumi

Na dalam takdir Allah Ta’ala

Di dalam susah seunang meunanti

Firman Ilahy lam Qur’an mulia

 

Krisis moneter ngon ekonomi

Bak T. A. Sakti ‘etnoe sikada

Do’a talakee peutang ngon pagi

Beuaman neugri makmu beusigra!!!

 

* Penulis : Drs. Teuku Abdullah SmHk alias T. A. Sakti

** Bagi pengetahuan redaksi :

  1. Jika baris syair terlalu panjang, boleh di cetak ke bawah seperti contoh pada halaman 7 bait 2.
  2. Juga halaman 7. seumuga adalah bahasa Aceh lama, artinya pekerjaan berkebun dengan menanam sejenis tomat, cabe, jahe, kunyit dan lada.
  3. Penulisan identitas saya seperti di atas cukup penting, agar karangan Syair Aceh ini dapat dipakai menjadi bahan usulan memperoleh KUM/kredit kenaikan pangkat.

Rumoh Blang,

Aleuhad, 20 Sa Usen 1419

17 Mei 1998

T. A. Sakti

Iklan

2 pemikiran pada “Krisis Moneter

  1. duuuuuhhhhh menone ga ngerti kat2nya hehehehehehehehe…..

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s