Cinta keu Nanggroe Termasuk Iman

Cinta Keu Naggroe Termasuk Iman

Oleh; T. A. Sakti


Sambungan PUAN NO. 40

golongan carong ureueng meupukat

golongan meukat dan kawom kuli

di kawom buruh roh keunan meuhat

peutani jeub bab keunan geuasi

 

tugas MPR jinoe lon sambat

dengo Nyak Ayat ulon peugah kri

ube teuingat cit ulon surat

laen tasasat keudroe teuh Nyak Ti

 

bagi adek cut nyang na hafai that

SMP tamat atawa SMI

nyang hana meuphom beuthat pih singkat

tabaca leugat meurunoe lagi

 

beudeh takalon geuhon deungon brat

beungkok  ngon teupat beuta teu’oh kri

jampang geutanyong le Nek rot barat

beujeuet ta jawab bek teuhing gusi

 

le that takalon masa nyoe siat

kureung peuingat aneuk miet kini

ban lheuh ji deungo cit tuwo leugat

saleh nyoe sabab wab nonton Tivi?

 

di aneuk inong meukeunong that-that

dale bak meucat peumirah bibi

keu peulajaran hana ji ingat

pane teuingat watee gob uji

 

watee ta tanyong di jaweub leugat

dilon Mawa that hana meungerti

lon lakee meu’ah beurayek that-that

di kamoe sabab tan meupeulajari

 

meunan keuh bagoe jinoe rame that

rugoe ta intat sikula tinggi

gadoh meucewek si bu ek kaplat

gadoh bak meucat di kawom putri

 

 

Allah dek payong tanglong hekeumat

jaroe lon angkat u ateuh dahi

beurayek meu’ah e rakan sahbat

karoh meuloncat haba lon rawi

 

karoh meujampu kulu pisang klat

karoh meusapat sira ngon campli

ban gado-gado dumpeue meusapat

meunan keuh sahbat ulon meurawi

 

keureutah puteh pulupen lon mat

daweuet pih meuhat jitron meunari

lon tuleh laju panton hekeumat

tabeue ngon mangat tan lon teu’oh kri

 

jinoe ta gisa bak punca muhat

ta balek ayat meulaen lagi

buhu ta balek titek ta sambat

ujong kon meuhat mate at ngon i

 

Taloe lueng beutong ureueng seumula

di dalam paya geukambam kawe

tugas MPR lon sambong sigra

deungo syedara bandum teuh sare

 

tugas di gobnyan ban ureueng tuha

ureueng seumeubla watee jeuet pake

kon na takalon di gampong gata

ureueng seb rasa baten ngon lahe

 

pat-pat na pageue salah glong unja

ureueng nyang publa bek jadeh pake

nyang keuh seb sidek bak pileh anggauta

bek roh silubha deungon si jahe

 

bek roh si jeungkat jeuhat lam dada

cit pruet droe saja nyang na geupike

keu soal rakyat peuduli hana

asai gobnyan na saboh kurusi

 

asai geuh kana sedan Toyota

rumoh nyang raya betee meu-uke

ka seungab sinan di apa ta’a

rakyat jeulata hana geupike

 

 

tugas pertama wahe syeedara

aturan Negara dum geupeulahee

presiden wakil geupeu ek tahta

seubagoe raja pimpinan ade

 

MRP pileh geupe ek tahta

ureueng geumita nyang ek seumike

ureueng nyang cakap mat pancasila

undang-undang teuma geupateh sare

 

tugas nyang laen keudroe pareksa

sinoe syeedara hana lon kheunle

nyang gohlom muphom peugah le gata

tuhan bri pahla elemee ta lahee

 

jinoe ho laen puteng meugisa

deungo calitra po ceudieng pade

ulon keumarang lagee croh bada

balek beurata bek angoh crebre

 

ureueng top teupong buleuen ramadhan

geupeugot timphan buleuen puasa

jinoe lon kisah keubhah pilihan

dalam Iseulam peukeuh meuguna

 

peukeuh na geuyue dalam Islam

kiban atoran dalam agama

peue jeuet  beurangkri pileh pimpinan

ureueng atasan nyang mat neuraca

 

peue jeuet meupolitek dalam Iseulam

peuekeuh seb rakan hanya meudo’a

hanya ibadat uroe ngon malam

peureumeun pih tan bacut keudonya?

 

peue seb kaluet-kaluet lam guha klam

duek mita ilham di dalam tapa

lale ngon “ boh it” uroe ngon malam

geutiek urosan bandum buet donya

 

jinoe adoe cut lon cuba reukam

mita atoran hukom sibeuna

ulon meudo’a uroe ngon malam

neubri le Tuhan keulon karonya

 

 

beuneubri peungeueh hate di dalam

bek salah lon pham bandum peukara

neubri trang hate wahe e Tuhan

gadoh kreuh ceukang meukeudo dada

 

deungon syafeu’at bak Muhammadan

sahabat sajan bandum ulama

beureukat dua kalimat syahadat

seurta beureukat bandum syuhada

 

beurang kapeue buet dalam Iseulam

geuyue hai rakan musyawarah na

han jeuet lagei kheun saboh golongan

beusapeue padan tiep-tiep peukara

 

konna ta deungo nyangka gob kheun-kheun

kheun ureueng jameuen bak dilee masa

“meunyo ka meupakat –lampoh jeurat tapeugala”

“meunyo kong unja pageue –leumo keubeue han ek jihila”

 

jinoe ulon boh fireuman Tuhan

ayat Quru’an surat Asysyuraa

ayat meuteuntee bak lhee ploh lapan

beudoh hai rakan kalon le gata

 

wa  amruhum syuraa bainahum

makna muphom dum teurata

beurang kapeue buet bek roh H’am H’um

beusapeue kheun dumna gata

 

lam ayat nyan munoe tapham

ureueng Islam han jeut meudawa

roh kadang na salah paham

taba rijang bak ureueng tuha

 

tayue timang ban nyang reumbang

bek hai rakan meucang gata

bek peurayek buet be jeundrang

dudoe alang telah teuka

 

teuka teulah dudoe teuman

sabab pih han jak bak tuha

hana tayue gob  peutimang

oh ka jeuet prang kepueue guna

 

 

rot noe mate rotdeh pansan

lop tahanan nyang tan ceudra

keunong kutok nibak tuhan

meung lagee nyan ta keureuja

 

meunan syarekh bacut rakan

be sanggopan nibak hamba

ube na jeuet di lontuan

roe teunuban  ‘et lagoena

 

kalon keudroe ayat Tuhan

mat di tangan tafse raya

bak ulama jak tanyong ban

pandangan Islam teutang negara

 

lheueh nyan tacok hadits janjongan

pakri padan lam agama

buet Negara beuta tuban

beudoh jak pham kheun Maulana

 

shaheh Bukhari Muslem sajan

dumpeue padan di sinan na

di sinan na hukom ahkam

boh pimpinan mat neuraca

 

“hubbul wathan minal iman”

rasul munan neu meusabda

‘cinta keu nanggroe termasuk iman’

nabi meunan neu calitra

 

cinta keu nanggroe gaseh keu bangsa

dum tanda-tanda bak tanyoe insan

udep lam aman sabe sibangsa

jeumot usaha meuncari makan

 

taat ibadat pujoe Rabbana

duengon teutangga bek muka masam

Indonesia merdeka 48 thon ka

ta lakee do’a beumakmu aman, Amiin..

 

 

Banda Aceh, 17 Agustus 1993.

T. A. Sakti

Sumber: Majalah PUAN no. 41/1995 halaman 25 s/d 27). Majalah PUAN terbitan

BP – 7  Propinsi Aceh, Banda Aceh.

 

 

 

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s