Cinta Keu Nanggroe Termasuk Iman

  1. Cinta Keu Nanggroe Termasuk Iman

Oleh: T.A. Sakti

Assalamu’alaikum hai bohru pirak

Saleum meusigak sambot nibak lon

Trok lon saweuelom  aduen ngon Cutkak

Lam nadham rancak kisah lon suson

 

 

Nanggroe geutanyoe bri Ilahon Haq

Tamah meusigak nibak thon keu thon

Dum pembangunan rata jeub sawak

Pat reuloh  rusak geupeugot rampong

 

 

Jalan lam gampong rata ka lagak

Oh muto dijak hanle seungkoe lhong

Muge bloe- publoe trok meusak garak

Ba ija sawak jibloe boh jagong

 

 

Di muge mulieng meuron-ron dijak

Pineung ruek-masak lagot  meukeupong

Pisang meumu-mu boh u riek cong bak

Hantom le apak pade lam karong

 

 

Asai phui tuleung hareukat galak

Pula pisang wak timon ngon jagong

Peue saja lagot yum pih meusigak

Rakyat dum rancak rumeh dan tumbon

 

 

Nibak peumimpin geutanyoe ajak

Beuna geutem jak tamong lam gampong

Rakyat lam gampong seumangat neugrak

Ngat maken ramphak neubantu tulong

 

 

Boeh neu cikalon hai Bapak-bapak

Miyup teuratak yum barang gampong

Yum barang “keude’ ji ek meugrak-grak

Yum barang ‘awak” rab sabe jitron

 

 

 

Gampong Pisang Bucue Paloh Jeurala

Jalan Keumala rhot u Tongpudeng

Haba ka rancong lon sambong sigra

Tapi syeedara ujong meulaen

 

 

Ulon keumarang hantom biasa

Tapi teucoba lon bareng-bareng

Seuen seuen sigeutu lon ija-ija

Kadang syeedara panyot di lon len

 

 

Sira lon duek-duek lon kira-kira

Dang malam jula oh jeuet lhom tabeng

Loncok keuretah nyang na di para

Pulupen sigra daweut lon peutren

 

 

Kisah keu Nanggroe nyang that lon cinta

INDONESIA bukon Nanggroe Kleng

Naggroe that luah indah lagoina

Leubeh 3.000 na pulo meujandreng

 

 

Pulo nyang luah ulon calitra

Nyang phon Sumatera- Jawa geunireng

Ngon Kalimatan luah that raya

Irian Jaya pulo keu tabeng

 

 

Sulawesi Ceram Maluku teuma

Bali Madura Lombok di sampeng

Bangka Belitung Timur Sumbawa

Flores Sumba Tidore canden

 

 

Roti Ternate Buru seureuta

Keunan dum geuba PKI deungkeng

Dum biek PKI sinan geusingkla (dulu-red)

Geuyue keureuja deungon diseuplen

 

 

Han ek lon kisah wahe syeedara

Kalon lam PETA keudroe Dek canden

Sabab gothat le kon dua tiga

INDONESIA luah that polem

Jumlah penduduk wahe syeedara

185 juta kureueng tan mungkin

Nyang paleng rapat sideh di Jawa

Jummeulah jiwa hana ngon bandeng

 

 

Di dalam Nanggroe meumacam agama

Kristen Budha Hindu dan laen

Agama Islam nyang that mulia

Peumeluk jih na meujuta lusen

 

 

Sayang Tongpudeng uteuen raya that

Le that boh langsat di Indrapuri

Bah laju haba jinoe  lon sambat

Dang-dang hai sahbat masak ie kupi

 

 

Seujak Meurdeka Nanggroe beurdaulat

Urusan geumat le Menteri-Menteri

Meunan keuh bagoe meutingkat-tingkat

Meunurot babat akai Tuhan bri

 

 

Tingkat Propinsi Gubernur nyang mat

Miyup nyan meuhat mat le Bupati

Di Kecamatan Urusan Camat

Tiep Gampong meuhat Keuchik & Waki

 

 

Nyang peutheuen Nanggroe sibagoe alat

Tantra meupangkat deungon Polisi

Tantra udara laot ngon darat

Ureueng nyan siap peutheun neugeri

 

 

Kanto DPR duek waki rakyat

Sibagoe adat nanggroe demokrasi

Bandum ureueng nyan peutimang rakyat

Ureueng peuteupat kanan ngon kiri

 

 

Buet Undang-undang kanun ngon adat

Ureueng nyan meuhat teuma awasi

Ureueng nyan lisek ceureudek geuthat

Peutimang rakyat rata jeub seugi

Seubagoe  cunto lon boh si ayat

Nyangka talihat keudroe teuh akhi

Undang-Undang perkawinan jinoe  hai sahbat

Kajeut keu adat seuluroh neugeri

 

 

Hukom meukawen jinoe meuceh that

Haroh beuteupat han jeuet beurangkri

Agam nyang jumoh peurumoh le that

Ka payah that-that tipee ngon janji

 

 

Han jeuet meukawen rata jeub teumpat

Ban dilee meuhat hana soe sudi

Pat nyang deuh Dara boh mieng meukilat

Kenan geucawat geutinggai Nyak Ti

 

 

Na padum lawet di sinan teutap

Leumah lom leugat nyang mirah bibi

Nyang puteh kuneng hidong mancong that

Gigoe meukilat langgoi be guci

 

 

Keunan le laju Teungku geupeurap

Meusyen geuthat-that keu inong tari

Teuma di sinan hana treb lambat

Hana jan siat teumaleuek lagi

 

 

Taleuek teumaleuek kri-kri nyang hajat

Aneuk rata pat jeuoh ngon wali

Tinggai keuh aneuk dalam mengriet that

Pajoh hareukat Ma sidroe nyang bri

 

 

Ma nyang bri bu keu aneuk jasad

Di ayah kaplat seutot beurahi

Let kuwah leumak di ayah leugat

Geutiek le siat meunyo ka basi

 

 

Kon ka takalon baroekon sahbat

Rab rata teumpat meunan teurjadi

Nibak masa nyoe hanjeuet le meuhat

Jadeh geuikat meunyo ta ungki

Taleuek ngon pasah  pih ka payah that

Syarat sigo brat baro geurasi

Ngat teuka inseueh hate beuteutap

Bek roh mudah that cre suami-istri

 

 

Babandum hai nyan E wareh sahbat

Untuk muslihat tanyoe seundiri

Di Pomeurintah kaseb geusasat

Kon maksud jahat tanyoe geutaki

 

 

Meunan keuh cunto kalheueh lon surat

Le laen meuhat hana lon rawi

Dum peraturan laot ngon darat

Nyang sidang meuhat DPR akhi

 

 

Geuduek DPR wahe hai sahbat

Propinsi Pusat tingkat Bupati

Di tingkat satu buhu lon sambat

Urosan geumat tingkat propinsi

 

 

Seuluroh Nanggroe laot ngon darat

DPR Pusat ureueng awasi

Meunan keuh ragam meutingkat-tingkat

Meunurot babat ban bak posisi

 

 

DPR Pusat teuma meurangkap

Saboh treuk meuhat Lembaga Tinggi

Geukheun MPR geuduek di Pusat

Ureueng nyan keuh mat tingkat tertinggi

 

 

Anggota MPR le peue meusapat

DPR Pusat dan laen lagi

Utusan daerah keunan meurangkap

Golongan meuhat rata jeub seugi

 

 

(Sumber: Majalah PUAN no. 40/1994 dalam

Rubrik “Ranub Sigapu” halaman 33-34).

 

 

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s