Sepucuk Surat dari Aceh: Ie peunaw’a keu T.A. Sakti

IE PEUNAWA KEU TA. SAKTI DI BEULADEH LAOT

Salamu’alikom e bungong giri

Saleum ulon bri bandum keu gata

Gantoe ulon boeh  bungkoh khanduri

Geulantoe lon bri ringget rupia

 

Gantoe lon kirem cempala paki

Geulantoe piti di dalam cintra

Geulantoe peucai sambai teurasi

Geulantoe bakmi keude keumala

 

Lam paya bileh ileh meudodi

Lam paya paki le on meuria

Akan aneukda datang  keumari

Rahmat Tuhan bri le that keugata

 

Hate lon peudeh ban keunong campli

Sabe teuingat keu Te A Sakti

Sabe lam lumpi oh malam jula

 

Gata aneuknda rahmat Tuhan bri

Do’a bak umi le that keu gata

Laot bahrullah laju ta titi

Ilmee ta cari keunoe u Jawa

 

Fakultas sastra gata jak cari

Lam bidang seuni lupah that meusra

Peuhaloh basa kata meutakwi

Leupah that meukri ilmee ta mita

 

Akan lon tuan e bintang pari

Gadoh lam bili di gampong Langga

Uroe pih beungoh oh lheueh jep kupi

Laju lon lari ubak sikula

 

Na dua blah thon di Kotabakti

Allah teukeudi neugrak u Banda

Bak IAIN sambong keulayi

Tingkat peuet geubri geuyue duek lanja

 

Thon lapan ploh lhee ulon mulai

Lon tinggai nanggri lon jak u Banda

Lon tinggai aneuk seureuta ummi

Hana peuduli barang peue saja

 

Aneuk cempala di cong bak panah

I cok le tiwah sayang lagoina

Aleuet lon tuka buhu lon ubah

Supaya mudah nibak tabaca

 

Dari Lammeulo ka trep lon minah

Meuheut sileupah bak jak sikula

Lon tinggai aneuk ma sinyak ceudah

Meudeuek deungon grah peudoli hana

 

Bak tingkat limong cit ban baro sah

Bak Fakultas Tarbiyah meusyuhu nama

Ulon beulaja jurusan lughah

Bahasa Arab sah nyang that lon suka

 

Do’a bak gata aneuk meutuah

Beu ek seuleu-ah bak jak sikula

Kageubri izin le pemerintah

Keu hamba Allah ulon nyang hina

 

Lon tinggai sinyak ngon ma nyang ceudah

Hawa that leupah sambong sikula

Peue lom di gata  nyang mantong meuntah

Reubot beubagah bak cok sarjana

 

E Te  A Sakti aneuk meutuah

Do’a bak nangmbnah han sia-sia

Lansong teurimong oleh potallah

Keusinyak ceudah jantong hate ma

 

Uleh sabab nyan maka lon peugah

Gata that tabah bak jak sikula

Hana peuduli keu deuek deungon grah

Atra meulimpah gata tan suka

 

Han ek di rayu le inong ceudah

Han ek di gagah le buet angkara

Han peuduli seu-i ngon sosah

Hana soe teugah bak tan suka

 

Bak malem nahu le that beurakah

Nyang malem fikah raya that dawa

Lon piyoh siat hek that sileupah

Mata ka mirah malam ka jula

 

Leubeh dan kureung lon lakee meu’ah

Kadang cit salah bak karang haba

Tanyoe meulindong ubak potallah

Bandum taseurah keu Po nyang Esa

 

Wabillahi taufiq serta hidayah

Keu hamba Allah dan Mukmin dumna

Keubandum insan nyang na muetuah

Leumoh dan gagah bandum simua

 

Ramli M. Amin

17 – 7 – ‘84

 

(Catatan: Bapak Drs. Ramli M. Amin  Kp. Langga adalah guree/guru saya sewaktu di  Sekolah Menengah Islam (SMI)  Kota Bakti   tahun 1967 – 1971. Ayah beliau,  Tgk. M.Amin Batee adalah pengarang cae Aceh juga!. Bale Tambeh Darussalam, 20 Puwasa 1431/30 Agustus 2010, pkl 5.03 Wib., T.A. Sakti).

Iklan

2 pemikiran pada “Sepucuk Surat dari Aceh: Ie peunaw’a keu T.A. Sakti

  1. got that nyan tengku…

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s