Ganu-Gana MTQ Nasional ke 12 di Banda Aceh

  1. GUNA-GUNA MTQ NASIONAL XII DI BANDA ACEH

Mukadimah

 

Assalamu’alaikum Warahmatullah

Jaroe dua blah ateuh jeumala

Lon sapa rakan rata daerah

Na saboh kisah lon keumeung rika

 

 

Alhamudillah syukur keu Allah

Rahmat meulimpah neubri keu hamba

Seulaweut saleum  keu Rasulullah

Hormat arwah Syuhada dumna

 

 

Wabakdu kalam lon mula kisah

Saboh seujarah karangan haba

Keu MTQ nyang  keu XII

Nyang geu seuleuah sinoe di Banda

 

 

MTQ Nasional cit katreb  meugah

Le pemerintah nyangpo usaha

Tanda horeumat Agama Allah

Lagei geu peugah lam Pancasila

 

 

MTQ Nasional nyang kalheuh si XI

Berpindah-pindah rata jeub kuta

Keunong giliran meunurot tuah

Nyang keu XII jatoh di Banda

 

 

Tuah di Aceh numboi XII

Pakri paban bah sidumnan  kada

Kada geutanyou Seuramou Mekkah

Numboi XII iku lagoina

 

 

Seubab  ‘ohlheuh nyan le ureung peugah

Giliran Daerah ka habeh masa

Ka  gautop buku le Pemerintah

Tiep  thon geu peugah sideh Jakarta

 

 

Hormat lagei nyan adoe  meutuah

Bak pemerintah tanyoe meupinta

Supaya beuna rata Daerah

Oh lheuhnyan jeut teutap Jakarta

 

 

Dua ploh tujoh jumlah Daerah

Tamah limong blaih ‘oh lheuh di Banda

Nyan baro geukheun ade si leupah

Han jeut fiteunah bak akhe masa

 

 

Sabab Agama sensitif leupah

Meung salah tingkah Tuhan meureuka

Han jeut tathok-thok Agama Allah

Sabab Po Tallah hana neu ridha

 

 

Indonesia cit sangat luah

Nyang mayoritas Islam Agama

Patot geuhiro geujaga deuek grah

Bek sagai geuprah angkara murka

 

 

Meunan meukeusud bacut lon peugah

Got meutuah meusou tem ridla

Indonesia keubit that indah

Cinta si leupah rakyat ban dumna

 

 

Bak pi-e cinta jitem rho darah

Peutheun maruah Nanggroe MERDEKA

Belanda-Ceupang geureupang bagah

Kaphe penjajah jiplueng wou bak Ma

 

 

Ummat Islam nyan le that reubah

Lawan penjajah Ceupang- Beulanda

Meuribeei-ribeei Pahlawan meugah

Meuprang that gagah kareuna Agama

 

 

Kon sabab laen geutem ro darah

Beulanda geuplah Ceupang geusula

Cit yue  Agama lawan penjajah

Agama Allah leungkap seugala

Kon hanya sembahyang Haji u Mekkah

Agama Allah jih seumpit hana

Lam buet sosial serta siasah

Politik bebas peutheun Negara

 

 

Cinta Tanoh le ban IMAN si blah

Di Rasulullah na nemeu sabda

Nyang keuh Pahlawan seu uem that darah

Beulanda geucah sang naleung sira

 

 

Patot geu ingat jasa dan tuah

Keu Ma dan Ayah Indonesia

Ummat Islam got that jra  payah

Bak peukong daulah Indonesia

 

 

Si barang kasou tan turi nangbah

Bunda nyang papah seujak lam pruet Ma

Allah han seunang sou meunan langkah

Keu Mukaddimah seb ohnou saja

 

 

LOB ARAKATA

Leupah that mangat lincah boh bajek

Nyang putik tasek boh campli sira

Kisah lon samboeng ujoeng lon balek

Baca hai adek seun-seun si banja

 

 

Lam  Arakata baca lam bilek

Laju tatilek sejarah lama

Bak MTQ Aceh kalheuh ek

Padum go tarek padum go hana

 

 

Padum go kalah reubah lam parek

Peue keuh na lisek bak jaga NAMA

Tapi di sinou ulon hoi tabek

Kalheuh lon kurek gohlom seumpurna

 

 

 

 

Ka padum Kanto kalheuh ulon cek

Bahan lon sidek jak mita data

Kanto MTQN Blang Padang dua seun lon ek

Ka geuhoi tabek geupeugah hana

 

 

Kanto SANTUNAN teuma lon balek

Meuteumeung adek tan seumporeuna

Tan lincah u groh culok boh bajek

Jinou ulon sek pajoh le gata

 

 

Indonesia Nanggroe Republek

Agama baek got that geujaga

Geubri bantuan han tom geuasek

Asai buet baek peukong AGAMA

 

 

Keu MTQ meunan cit adek

Sabe geu peu ek geubri beulanja

Thon nam  ploh lapan mula geutarek

Tingkat Republek Musabaqah kana

 

 

MTQ Nasional nyan phon geulantek

Bandira jiek sang peunoh kota

Di ujung Pandang beuet Firman Khalek

Qari nyang tarek sinan berlomba

 

 

Kali keudua di Bandung cantek

Kota nyang peu ek Asia-Afrika

Di Banjar Masin nyang keu lheei adek

Leubeh menarek nibak sa, dua

 

 

Peuet kota Medan harapan baek

Limong geutarek keudeh Jakarta

Keunam Mataram- Palembang balek

Bileung hai adek tujoeh go kana

 

 

Tasamboeng laju buhu tabalek

Kureung meunarek menyo seurupa

Meunyo meunoukon sanjaknya A/EK

Jino tabalek menjadi  AT/A

Nyang kalheuh tujoh lapan  tasambat

MTQ tempat di Surabaya

Di Jawa Timu kubu BERJIHAD

Pahlawan lethat gugur di sana

 

 

Teuma sikureung tabileung leugat

Geupileh teumpat di Samarinda

Utusan Aceh saheh mendapat

Dewasa tingkat bak lumboi dua

 

 

Juara harapan di Aceh lethat

Ji ek martabat kontigen kita

Seuramoe  Mekkah tuah meuningkat

Ka geurasa brat le ureung lua

 

 

MTQ siploh guroeh maken brat

Aceh mendapat lageei geucita

Kota MENADO katahe teukap

PIALA NYANG BRAT JIWOU U BANDA

 

 

Juara NASIONAL Hasanuddin mat

Seuluroh rakyat hate gembira

Katreb meuthon-thon sabe geuharap

Pajan keuh dapat Aceh numboi SA

 

 

Kateutop maleei masa nyang lewat

Kayem gop upat kapadum lama

Peu guna Aceh Agama kuat

Sigo han dapat meunang juara

 

 

Bak beuej Al Qur’an mantong roh cacat

Peue lom tapakat bak meu‘en bola

Pat cit na carong bak bidang  “meukap”

Plah APAM bulat deungon Thok DADA

 

 

Meunan sindiran meunyum saket that

Goh lom na ubat ngon toep WIBAWA

Trok HASANUDDIN jak surung ubat

Saket nyang kabrat puleh le sigra

Rakyat lam Nanggroe hate jih mangat

Meu teumeung rahmat Allah karonya

Tamah  geuransang garang seumangat

Jiwou MARTABAT ACEH MULIA

 

 

Saboh sejarah kalheuh tercatat

Daerah teumpat Sulawesi Utara

Agama Kristen di sinan kuat

Aceh cok PANGKAT pih roeh di sana

 

 

MTQ si XI teuma beurangkat

Semarang teumpat di Teungoh Jawa

Teuku Iskandar aneuk miet cut that

Sinan meudapat cit numboi dua

 

 

Juara umum keu Jawa Barat

Lheei, dua meuhat Jatim, Jakarta

Juara HARAPAN keu Aceh le that

Hase keunarat Qariah kita

 

 

MTQ XII rumoh drou teumpat

Geutanyou harap beuteumeung JUARA

JUARA UMUM BEU EK TAKARAT

Bek sampe tungkat patah keudua

 

 

 

 

 

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s