50 Thon Indonesia Merdeka

  1. 50 THON INDONESIA MERDEKA

 

Oleh: T.A. Sakti

 

Assalamu’alikom lon angkat jaroe

Sambot rakan drou hormat mulia

Lon saweue wareh jeuoh dengan toe

Jinoe ta meuproe Indonesia Merdeka

 

Kagrak teukeudi bri Tuhan sidroe

Nanggroe geutanyoe katreb Merdeka

Ka 50 thon jinoe ka sampoe

Patot geutanyoe ingat beurata

 

Wajeb ta syuko bandum geutanyoe

Sigra ta pujoe Allah Ta’ala

Talakee do’a malam ngon uroe

Indonesia nyoe sabe sijahtra

 

Nanggroe meusyuhu makmu sinaroe

Rakyat bek phang-phoe jeuoh ngon mara

Reuseuki mudah limpah jeueb sagoe

Pemimpin tanyoe beujroh usaha

 

Nanggroe lam aman seunang beurangsoe

Udep tiep uroe teuntram bahgia

Bekle na karu peukru ie ceukoe

That aman Nanggroe Tuhan neuridha

 

Beumeunan tanyoe do’a tiep uroe

Ohlheueh seulesoe seumbahnyang rata

Tuhan Yang Esa yakin ta pujoe

Lheuh nyan rakan droe jeumot usaha

 

Rampineung ijo jidong cong teubee

Beurijuek balee jinoe that langka

Rajin keureuja  bek sia watee

Bekdok rab ratee  ngon parabola

 

Duek Warong kupi laloe kreh singkee

Gadoh peh batee  buet sia sia

Tanle teuingat sunat peurelee

Breueh bu u juree hanasoe mita

 

Ohwoe u rumoh peurumoh tunggee

Peumeu’en palee ngon peucon muka

Anuek ka karu podu sang ratee

Akibat lale beu-o usaha

 

Boeh neuci kalon Teungku panghulee

Bah jameuen dilee ‘an jinoe masa

Ureueng nyang  beu-o jadeh lieh singkee

Dum seudee ratee  ‘oh watee tuha

 

Soe-soe nyang jeumot tan teuboih watee

Oh tuha teuntee ladom ka kaya

Adak han kaya pajoh ka teuntee

Hanpeue geumade bak ureung lingka

 

Beudoh syeedara bekle meusilee

Tasilak bajee rajin keureuja

Yoh mantong muda teuga ban cagee

Gunong Geureutee sang ek tahila

 

Meuyo ka tuha hanale lagee

Sang breueh siare han ekle taba

Sadar  ‘oh tuha ka liwat watee

Tagaro ulee teulah lagoina

 

Cempala paki jinoe jareung that

Kabeh roh lam jrat ka jipeubloe ba

Di pomeurintah sunggoh geukarat

Rata peuringkat bantu usaha

 

Ureueng meuseukin gasien meularat

Pangkai geuh singkat peudong usaha

Deungon IDT geubantu leugat

Supaya rakyat makmu sijahtra

 

Pangkai  usaha jinoe ka meupat

Geutanyoe sahbat beudoh keureuja

Peugot peue patot meunurot bakat

Bak jeut hareukat mita beulanja

 

Nyang duek bineh gle geupula coklat

Tinggai di darat reuteuk ngon pala

Udep toe laot eungkot peusapat

Geujak bloe pukat pangkai usaha

 

Watee luah blang kacang geukarat

Bawang on mangat lethat hareuga

Sawi ngon campli bayam dan tomat

Gule beurangpat lagot meubura

 

Peulara leumo di Cuma Ayat

Eumpeuen geuintat yakin geumita

Oh watee rayek geupubloe leugat

Seunang geuh that-that sabab le laba

 

Di Cuma Hendi laen riwayat

Itek geurawat gobnyan peulara

Oh watee beugoh boh geupeusapat

Geupubloe leugat keude Bang Baka

 

Sayang Bosnia kahabeh crebre

Serbia jahe akai that keuji

Beugot tahiro nyan peng IDT

Beuk-ek beusampe lagee tajanji

 

Citna sidroe droe paloe bak akhe

Ngon peng IDT meujeb- jeb kupi

Sapeue usaha hana geupike

Dok meu’en gaple dan ‘meukhanduri”

 

Ta bayeue  pulang pangkai keu “Toke”

Laba ngon hase tanyoe po akhi

Mangat geubri lom sabab na hase

Kadang boh hate meuganda geubri

 

Menyo  lagee nyan hana meusampe

Sayang bukonle rugoe han sakri

Bak watee ukeue han geutem brile

Sabab that jahe janji geu-ungki

 

Di Cutlem Suman di gampong Pande

Wab peng IDT lethat raseuki

Keu pangkai muge bloe publoe pade

Bang Suman Tuke jinoe gob rasi

 

Laen lom teuma di Cutda Bate

Ngon peng IDT mulieng geubeuli

Guepeh keureupuk taktuk bukonle

Publoe keu Tuke keudeh u Sigli

 

Meumacam ragam ramphak dum sare

Lawet IDT pomeurintah bri

Gasien meuseukin lam gampong digle

Syuko lam hate ngon pujoe Rabbi

 

Kleueng puteh ulee jitakle Tiwah

Tieukeujot Gajah beudoh jak publa

INDONESIA nanggroe meutuah

Karonya Allah beulam sijahtra

 

Orde Baro nyang mat peurintah

Rakyat geuarah rajin usaha

Disiplin Nasional rakan mentuah

Peukuat bagah beukong lam dada

 

PJPT II ngat maju langkah

Tanyoe bek ugah  beu-o keureuja

Pangkai hareukat jinoe that mudah

Kredit dipeuhah pinjamle gata

 

Dumnan  geugasehle pomeurintah

Pakon meutuah hantem usaha

Bak warong kupi laloe beurakah

Mata meutangah bak parabola

 

Indonesia merdeka Alhamdulillah

Jinoe nyang ka sah 50 thon ka

Lam pembangunan rab 30 thon sudah

Rata daerah duson ngon kuta

 

Desa terpencil lam rimba Allah

Le pomeurintah hana geubida

Teutap geubangun seun- seun silangkah

Rakyat dum geukrah bantu bersama

 

Sikula dalam gle bermasaalah

Guru “geuupah” gaji geuganda

Sabab sinan  brat le jeurih payah

Guru bek gundah hate lam dada

 

Totok beuragoe jipo cong sawo

Cicem Prak Ike jicoh boh liki

Kale that jasa Orde Baro

Ingat rakan E soe pajoh budi

 

Cit hana patot ulon boh ato

Ulon Teungku E kon politisi

Seucara adab ta uko-uko

Patot ta “Syuko” jasa soetem bri

 

Bak T.A Sakti seb ohnoe tuto

Meunyo leupahle han meukri sakri

Selamat Merdeka Nanggroe ta syuko

INDONESIA “baro” 50 thon lawi!!!

 

(Sumber: Majalah PUAN no. 43/1995

halaman 24-25 dan 43.Majalah PUAN

diterbitkan BP – 7 Pemda Aceh).

 

Iklan

Satu pemikiran pada “50 Thon Indonesia Merdeka

  1. Bereh puisinyoe tgk.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s