Ulang Tahun ke 5 Teken MoU Dame Helsinki

Teken  MoU Dame Helsinki

 

Alhamdulillah seumangat ramphak

Ho-ho nyang tajak hate tan ta-ti

Aceh lam dame bri  Ilahon Haq

Jinoe hai Cut Kak limong thon lawi

 

Bahle takisah sikrak dua krak

Laju bak pucak  geutanyoe rawi

Dang  teuka  watee  puwasa trok hak!!!

Duek beumeusigak neu nonton Tivi!!

 

Astaghfirullah deesya beumeulhak

Talakee ubak Tuhanku Rabbi

Kisah Helsinki lagi talacak

Jinoe katrok bak nyang paleng inti

 

15 Agustus 2005  yohnyan hai Bapak

Dame geupacak sideh Helsinki

Teken MoU bandua pihak

Di sideh jarak nanggroe Filandi

 

Ka lheueh beurundeng trok limong babak

Tanle na  parak    hate  ka suci

Na tujoh buleuen watee nyang jijak

Sagai hana glak dua delegasi

 

Sabab geuharap hase nyang bijak

Aceh  beuramphak bangket keumbali

Seumangat dame timoh meugrak-grak

Meurinthak – rinthak seumaken tinggi

 

RI dengon GAM sang kayee sibak

Cabeueng jih ramphak reului han sakri

Di rakyat Aceh hate that galak

Baja geutambak do’a bak Rabbi

 

Kisah ta peuwoe bak uboe nyang bak

Delegasi jak lom u Helsinki

Teken  M oU nyang mantong lam pak

Geupreh meusigakle Ahtisaari

 

Arti  MoU hai Teungku  Bapak

Pakat nyang ka hak kalheueh geujanji

Kasep meupakat bandua pihak

Tanle meusikrak lam hate sangsi

 

Kisah lon singkat neu deungo  bek   glak

Rombongan nyan jak trok u Helsinki

Deungon wartawan dum meusak-garak

Media cetak dan televisi

 

Kru televisi  sigra bergerak

Alat geupacak disana-sini

Siaran langsong acara puncak

Cukop meusigak DAME GAM – RI

 

Memang kali nyoe leubeh that ramphak

Rombongan nyang jak meuriti-riti

DPRD Aceh saheh na geujak

Padum droe Bapak PEMDA seundiri

 

Majelis mufakat ulama bijak

Tamah seumarak tokoh adat lagi

DPR Pusat peutamah ramphak

Utusan nibak padum boh fraksi

 

Dum rumeh-rumeh pakaian lagak

Lagee ureueng jak pesta khanduri

Trok geujak ampeueng Dame  mustahak

Konban ureueng jak bak dakwa-dakwi

 

15 Agustus ramphak seumarak

Dum rata sawak meunanti-nanti

Di Tanoh Aceh sang-sang meugrak-grak

Ureueng  jareueng   jak keusana-sini

 

Di Banda Aceh meubulak-bulak

Meuribee geujak bak Rumoh Suci

Mesjid Baiturrahman dum meusak-garak

Tamah meusigak na Menteri-Menteri

 

Seumayang Luho jamaah meusak

Do’a  dum geugrak ubak Ilahy

Rame ureueng weueh inseueh moe – isak

Geumohon pintak DAME  seujati

 

Laen nibak nyan jeueb rata sawak

Nyang paleng ramphak bak Waroeng Kupi

Ladom di rumoh saho tan geujak

Mata meulak –lak  ngieng televisi

 

Keudeh Blang Bintang kisah ta rinthak

Sinan teupacak siap meunanti

Panglima TNI  staf rata phak

Wa KSAD ngon KSAU  dan KSAL lagi

 

Pangdam Iskandar Muda tuan po pihak

Geusambot ramphak Petinggi TNI

Tanda yakin that Dame geugalak

U Aceh jak simak acara Helsinki

 

Presiden Susilo Bambang Yudhoyuno/SBY  ulon kheun sikrak

Neuduek meusigak ateueh kurusi

Di Istana Merdeka ruang meuhalak

Peunoh ngon Bapak rame petinggi

 

Wapres siblah wie lon kureueng nampak

Blah unun meublak-blak  Ketua DPR   RI

Ketua  DPD  sibanja pihak

Menteri   rata  phak dan Nyonya   Ani

 

Bandum bak Tivi mata neu talak

Geupreh-preh nampak  acara  Helsinki

Sidumnan peunteng lagi mustahak

Aceh  geugalak  DAME  aseuli

 

U Stockholm  haba lon sawak

Swedia tan jarak nanggroe Filandi

Hasan Di Tiro lam  “Kompas”  nampak

Teungoh neu simak acara Helsinki

 

Cit sidroe jatoe rakan tan sikrak

Tivi  ateueh Rak  buku meuriti

Kamba   pih ubit barang meusak-sak

Keu lapek tapak na peurmandani

 

Gobnyan dalam GAM  pimpinan puncak

Meuploh thon jarak di luwa  neugri

Teken MoU get that neu simak

Tanda that galak ka neu restui

 

Buhu ta balek titek lon tulak

Ujong lon pakhak konle  ak – ngon – i

Meung lagee sot-sot mit ureueng galak

Sabab ka apak miseue bu basi

 

Subhanallah rahmat meulapeh

Sinoe ngon sideh Tuhan bri sidroe

Teken MoU  laju  lon tuleh

Deungo  beuhabeh wahe rakan droe

 

Sabab Hikayat jinoe ka jayeh

Dum ureueng habeh Tivi peulaloe

Keu budaya gob le ureung  gaseh

Ka jikheun  paleh keu budaya droe!!

 

Aceh ka DAME hikayat lon tuleh

Kadang ek puleh “saket” rakyat  nyoe

Keu   AcehTV  teurimong gaseh

Ubat  trok habeh ban saboh nanggroe!!

 

Meu’ah   e  sahbat lon roeh meurinteh

Sabab lon seudeh  keu budaya droe

Jinoe ta riwang bak punca keudeh

Bareh sibareh hingga seuleusoe

 

15 Agustus 2005   seulanyan  meuceh

Meusapat sideh watee karab toe

Bida na  4 jeum sinoe  ngon sideh

Meunan hai wareh koran hareutoe

 

Uroe Aleuhad bacut lon pileh

Akrab sihabeh dua delegasi nyoe

Makan bersama  geuduek meutindeh

Ahtisaari  areh undang ureueng nyoe

 

Rab   poh   12 jeum di nanggroe jeh

Gla-glo dum habeh geupeusiap droe

200 wartawan teumpat ka meuceh

Geuliput habeh kirem u nanggroe

 

Wartawan sigom donya dum geujak keudeh

Aceh got lareh lheueh tsunami  tampoe

Kaseb jituri  sinoe  ngon sideh

Aceh  ji  gasehle  luwa nanggroe

 

Balai Pertemuan Finlandia teumpat geupileh

Bak ruwang nyang gleh timang meusagoe

Bandum nyang hadir geudong meulapeh

Teuseungeh-seungeh geupeu  seungab droe

 

Duek bak kurusi ureueng teurpileh

Lhee droe tan leubeh meja sinan toe

Hamid Awaluddin nyang phon hai wareh

Di teungoh meuceh diplomat usoe

 

Nan  Martti Ahtisaari gob turi habeh

Keunoe ngon keudeh peudame nanggroe

Teuma sidroe treuk lontuan  peuceh

Malek Mahmud Haytar rame gob tusoe

 

Staf CMI beudoh di sideh

Naskah meutuleh ka gujok sampoe

Naskah MoU hai Teungku Puteh

Tujoh on lipeh peunteng that asoe

 

RI deungom GAM  sipakat habeh

Sinan geutuleh yoh buleuen  baroe

Hanle geumuprang rotnoe ngon rotdeh

Aceh geugaseh bekle lam phang-phoe

 

Bak poh 12 watee nanggroe jeh

Geuteken urehle ureueng lhee droe

Hamid Awaluddin rot RI pileh

Malek Mahmud Haytar rot GAM peujaroe

 

Martti Ahtisaari sidroe treuk kabeh

Ureueng nyang areh peudame nanggroe

Maka sudah sah MoU meutuleh

Meusoe nyang langgeh jadeh meupaloe

 

‘Ohlheueh geuteken pulpen sak lam keh

Beudoh sibareh geumumat jaroe

Ban lhee droe ureueng jaroe meutindeh

Tanda bit khaleh pake seuleusoe

 

Nibak saat nyan  naban  beureuteh

Geumbira habeh rata jeueb sagoe

Di Indonesia  sampe u Inggreh

Amerika keudeh Eropah  tanggoe

 

Kata sambotan rotnoe ngen rotdeh

Hana lon tuleh  neu mita keudroe!!!

Meukru Seumangat  alamat keudeh

Teurimong  gaseh keu ureueng  3  droe

 

U Banda  Aceh haba lon aleh

Watee meutindeh geumumat jaroe

Mesjid Baiturrahman ureueng meulapeh

Mata geuh keudeh bak lhee boh jaroe

 

Ladom takeubi nyang ladom seudeh

Riyoh sihabeh ureueng prok jaroe

Hate that seunang muka  teukhem gleh

Duek dong meuseupeh  siploh ribee  droe

 

Ban saboh Aceh seunang sihabeh

Teurimong gaseh  kheunle  hate droe

Keu  RI  ngon GAM  nyang katem pileh

Prang  geupeuhabeh  DAME  keu  gantoe

 

Seb ‘ohnoe dilee kisah lon reunteh

Do’a hai wareh malam ngon uroe

Lakee bak Tuhan nanggroe seuliseh

Taduek  ngon  ta-eh   bekle  lam   phang-phoe; Aminn!!!.

 

Sumber bacaan: Hr. Serambi Indonesia, Hr.Kompas, Hr.Republika,

Hr. Media Indonesia, Koran Tempo, MetroTV,Jakarta dll.

(Catatan : Lebih lengkap, yang disertai terjemahan bahasa Indonesia; dapat dibaca dalam buku

***Dalam acara “Cae Bak Jambo” ACEHTV Sabtu, 14 Agustus 2010/3 puwasa 1431  pukul 12.oo s/d 13.30 Wib., cae ‘Teken MoU Dame Helsinki’ telah disenandungkan oleh seniman Aceh Medya Hus.

 

“ACEH DAME – Nazam Perdamaian di Nanggroe Aceh Darussalam”,  terbitan Aceh Recovery Forum, Majalah Aceh Magazine, dan Tim Sosialisasi Aceh Damai (TSAD); dengan penulis T.A. Sakti, Sulaiman Gani, Nurman Syamhas, dan Hilmi Hasballah. Cetakan I, Juli 2006. Namun, sayangnya, tidak semua bait syair di atas terekam dalam buku itu, karena tergesa-gesanya panitia saat mengambil bahan tulisan dari saya. 2 Ramadhan 1431 H/12 Agustus 2010 M, T.A. Sakti).

Iklan

2 pemikiran pada “Ulang Tahun ke 5 Teken MoU Dame Helsinki

  1. semoga tetep jaya

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s