DISIPLIN NASIONAL

Disilpin Nasional

Oleh: T.A Sakti


Bismillahirrahmanirrahim kalam lon mula

Nibak Rabbana rahmat talakee

Beutrang pikiran ilham beuteuka

Syedara lingka beurijang geuthee


Nyoe rubrik baro mula geubuka

Saboh pusaka budaya dilee

Beuneutem bantu tuleh ngon baca

Mangat peunula teuga peureudee


Wareh ngon sahbat peucinta sastra

Neukarang sigra kirem beuteuntee

Budaya Aceh rab layee rata

Duson ngon kuta ka habeh padee


Tanyoe kabeh dok budaya luwa

Trok dalam kamba dum filem lahee

Hanale soe tham tanle soe sangga

Ulama-Umara meuteukui ulee


Ka talo mandang seumangat goga

Mumang keunira talo eleumee

Sabab that canggih digob seunjata

U dalam kamba jilop meuree ree


Majalah” Santunan” ci beurusaha

Peubangket teuma budaya layee

Muatan lokal tansoe bri dana

Buku jih hana bah yum meuribee


Jinoe meunyo na Micut dan Apa

Sya-e geubaca di jambo madee

Ureueng keumade cuco dikata

Sideukah sigra dijok peumalee


Diunyet meunan Keumuen keu yahwa

Masa keu masa bit teuka malee

Ka meunang Kumuen katalo Apa

Takot dikata ban ureueng seudee


Nasib sastra Aceh meunan keuh rupa

Hikayat phonsa Nadlam Tambeh lhee

Di bahsa Aceh tan jeuoh bida

Dalam sikula tansoe peudatee


Hansoe tem turot lagee di Jawa

Bahasa ngon sastra got jipeulagee

Muatan local” geurasi nama

Dalam sikula that geuperureulee


Dua ploh persen kurikulum beuna

Cit yue Negara padum thon dilee

Di daerah gob ka maju rata

Di Aceh saja sang malee-malee


Sabab tan sunggoh lam pura-pura

Nyan keuh budaya dum habeh layee

Bek lagee Got-Got tanyoe syedara:

Nyang tan tamita nyang geujok tamalee


Kata peungantar bah tapeumada

Sang hana gura le ban on kayee

Neubri beureukat teubiet perdana

Allah karonya beumaju teuntee


Disiplin Nasional beugot seumpeuna

Beubandrang cahya bek reudee-reudee

Para sastrawan Aceh mulia

Neukirem karya bek malee-malee


Alhamdulillah nekmat Allah bri

Sihat ngon seu-i meutuka gisa

Disiplin Nasional jinoe tarawi

Geutanyoe kaji seun-seun sibanja


Thoh ’95 bak 20 buleuen Mei

Kebangkitan Nasional Indonesia

Presiden canangkan secara resmi

Disiplin Diri Nasional Kita


Dalam udep nyoe bek bron-bron seu-i

Seupeunoh hati dumpeue keureuja

Bek coh-coh baplueng lagee keudidi

Sang-sang asli sang pura-pura.


Hana jeuet keubuet nyan meunan akhi

Areuta rugi watee teunaga

Na leubeh jeulas cunto bah tabri

Maseng beumeuri bidang usaha


Nyang meugoe di blang miseue peutani

Bijeh ungguli beugetem pula

Seb that usaha mita raseuki

Idin Ilahi hase meuganda


Nyang ladom rakan sayang han sakri

Habeh bak judi peng hak bloe baja

Pade tan pupoek teuntee han meukri

Paleng  raseuki glah bloe haluwa


Peulom geurawat tanna seukali

Naleueng meuriti trok ‘et uram pha

Ateueng tan geutak meusawak gaki

Tikoh meudodi gusong meudoda


Tanoh habeh crah ie tan ji ili

Sabab di Abi geupeu ek hana

Dale meurawoh jeueb warong kupi

Saweue tan geuci seujak phon pula


Pajan cit teulah oh diet raseuki

Na ngon bloe kupi tan ngon bloe saka

Ngon wang sikula dilakee Nyakni

Allahu Rabbi meugriet seungsara


Beudoh syeedara bandum peutani

Disiplin tinggi tanyoe keureuja

Yakin peubuet-buet bekle that cakri

Bak warong kupi bek laloe raya


Budaya malaih buang lam tuwi

Disiplin diri teukat beuteuga

Mudah-mudahan limpah reseuki

Karonya Rabbi udep sijahtra


Bak pemerintah tanyoe pakati

Nasib peutani yakin geubila

Yum barang gampong hasilan tani

Dak jeuet beusabe yum barang “kota”


Meung jitem meuh’ai barang peutani

Deungon seundiri rajin pih teuka

Hana peue tayue tatham han heunti

Malam ngon hari ingat keureuja


Jinoe peue laen kisah ta cakri

Disiplin tinggi aneuk sikula

Barang kapeue buet meunyo tan meukri

Hase pih akhi hantrok ban cita


Ubak sikula yue jakle Abi

Aneuk meudodi bak Jambo Jaga

Napeng SPP geujokle Ummi

Sinyak Putehdi bloe silop “Bata”


‘Oh watee malam lam ula-ili

Hantom meudici mengulang baca

PR hantom na peugot seundiri

Rapor Sinyak Ti dum nilai “saga”


Meunyo lagee nyan hana keundali

Rugoe di Abi, payah digata

Buesoe han peuja teunaga tabri

meunyesai diri ‘oh watee tuha


Wahe adekcut muda ngon mudi

Keu nasib diri ingat beurata

Bina untoeng droe yoh mantong soebri

Na Ayah-Ummi nyang bri beulanja


Bek sabe lale peuseutot tari

Duek nonton tivi tuwo beulaja

Disiplin peukong diri seundiri

Nasib sendiri di tangan gata


Disiplin Nasional meunan areuti

Ngon yakin hati peue takeureuja

Diphon pejabat guru dan tani

Barang peue akhi bidang usaha


Meuseb keuh ‘ohnoe bak T.A.Sakti

Leubeh lom takwi silakan kira

Disiplin Nasional tamat di sini

Hormat  ulon bri meu’ah pat ceula!!


Sumber: Majalah SANTUNAN no.229/1995

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s