PA’E: Lingkungan Hidup

PA’E

Assalamu’alaikom rihon bungong me

Ca-e keu Pa’e jinoe lon rika

Di ureung jameun gantoe jeum Pa’e

Dimeusu tet te laju geukira

Laju geubileung padum  go tet te

Sinan meuteumee poh padum kana

Meunyo lampoh soh na kreh-kroh Pa’e

Geupeugah jamee jeuoh troh teuka

Meunyo dimeusu bak akhe meugre

Nyan tanda rame rombongan teuka

Beudoh syedara peulara Pa’e

Mita eleumee nibak   pak TA

…………..

…………………………

Nyan bacut ca-e pince bit meune

Atra angen me sms nyang ba

Bak Cek Madya punca “ rammeune”

Bak lon geutr’e-tr’e sambong calitra

Alhamdulillah kuah ka neume

Peuleumak boh me reubong bak kala

Ureueng pajoh bu su karu tunye

Nyang pajoh rame wab barang langka

Teurimong gaseh payeh yub sange

Hormat ka geumele Cek Madya

Lon hidang simban timphan beureune

Dilon toe Lhok Me gampong meuria!!!

Subhanallah  dilon tan mah’e

Kisah keu Pa’e payah bak rika

Tanyong   wie unun bak ureueng rame

Hanseb sigo me hana padum na

Bah that beumeunan  lon ci yub rune

Tan meune-sane bantuan teuka

Nyang bantu beule info beurame

Calitra Pa’e beumaken gura!!!

Meunyo yoh malam kiyam su Pa’e

Uroe meut’et’e singoh leupah kha

Meunan geupeugahle Utoh Ma’e

Le that rammeune bak peugah haba

Adee-meuadee teuntee beurame

Pade beureune bajee ngon ija

Pineung ngon teupong janeng ngon sange

Dumpeue jeut tame sabab uroe kha

Aneukmiet bek toe pat jiduek Pa’e

Jirudah  ngon  gr’e  plang-plang bak muka

Ulee jeuet keupong hidong meup’ep’e

Geulinyueng  teusy’e leupah that bisa

Aneukmiet dilee ji takot Pa’e

Asai rammeune bak ureueng tuha

Han ji peukaru jan meusu Pa’e

Takot han ek me peunyaket teuka

Paleng ji uru kiban su Pa’e

Lam kawan rame na sidroe dua

“Tet t’e tet t’e plok gapu lhu Pa’e!!

Tet te-tet te plok bakong punggong Pa’e!!!

Yoh masa dilee jareueng deuh Pa’e

Jiduek meuw’ew’e lambong leupah na

Pucok bak Iboih – Bayu bak Mane

Hana tatune ji meusuara

Aneukmiet agam  awam that Pa’e

Han that jituri ji pandang hana

Sira jikhem-khem bandeng na jime

“Nyan dikah Pa’e dalam lungkiek pha!!!”

Peue lom jitakot geudhotle Cut ‘E

Soe reuloeh Pa’e keunong  seurapa

Meunyo jirudah ‘oh marah Pa’e

Buta meusane keunong bak mata

Jareueng meudiyeueng budueng that Pa’e

Jih hana rame hanya sa dua

Hingga dit bak lon eleumee Pa’e

Adak bit tame hanseb bak glah Sa!!!

Jinoe meubalek ceureudek Pa’e

Umpung ka jime bak rumoh tangga

Kon bandum rumoh jitem duek Pa’e

Sareng na jime lheueh ji pareksa

Ureung nyang bijak galak di Pa’e

Tan kayem p’ap’e sabe meudawa

Sabab binatang sayang keu dame

Meung riyoh  ‘a’e jiweh dibungka

Ladom peucaya,  ladom kheun pane!!!

Rumoh na Pa’e teuntram sijahtra

Aneuk geularang dijak prang Pa’e

Kheun Teungku Mane pusaka kaya!!!

Nyang ladom galak bileueng  su Pa’e

Maken le tet te maken geumbira

Peng le jitamong tan meune-meune

Rumoh duek Pa’e le ureueng hawa!!!

Watee jimeusu geulinyueng tunye

Dak jeuet bak Mane tarhom geulawa

Tapi han sampe hate han jime

Udep ngon Pa’e sang na bahgia!!!

Nyang leupah gura beurita Pa’e

Aleh cit pane phon-phon jiteuka

Jipeugah meuhai jinoe yum Pa’e

Keu eksport jime nanggroe Korea

Ji peugah ubat ngat “batat  Pa’e”

Bek rijang linye jeumot keureuja

Bek  that neu pateh nyan reunteh lakh’e

Haba  tan meune  han lon peucaya

Geutanyoe Aceh ileh tan pup’e

Peue nyang na gob me getthat mulia

Nyang na  nibak droe jeuet meukur’et’e

Gadoih angen me kagob po jeumba!!

Pusaka Aceh saheh bit meune

Hana meucuw’e deungon agama

Lam Tajon Mulok le “ubat Pa’e”

Bukon rammeune ulon meucakra!!!

Lon kheun dua krak simak beurame

Bek jak ‘uet Pa’e hanaho geuba!!!

Majun Turuki tungang  ban sane

Keudua  nam’e   : Sultan Malaka

Alhamdulillah kisah rab lakh’e

Haba  keu Pa’e ka lon peumada

Keu Cek Madya hormat ulon me

Nyang peuphon tet te nyangka lon rika

Phon Januari trok bak buleun Me

Ingat keu Pa’e kisah gohlom na

Jinoe ka leungka hate lon s’ew’e

Wab kisah Pa’e   kureueng  that rasa!!!

Lon lakee meu’ah bak ureueng  rame

Kalah rammeune talo keunira

Silakan sambong untong get mah’e

Nibak lon do’e:  beuleubeh gura!!!

Banda Aceh, 11 Mei 2010

( Catatan:  1.  Sms Cek Madya Hus jitamong bak HP lon: 17 –Jan-2010, 18:47:11.

2. Nan-nan ureueng lam kisah nyoe hanya nan khayalan ngat meupakhok Ca-e       mantong!!!).

Kireman: T.A. Sakti

Banda Aceh

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s