LAMPU SABE LEN – Kisah listrik yang sering padam

LAMPU SABE  LEN

 

Assalmu’alaikom warahmatuhu

Rata penjuru saleuem lon kirem

Teungoh lon tuleh Tambeh meubuhu

Ka mate lampu hanjeut  lon salen

 

Aleh na kontak rusak bak gardu

Aleh di timu sideh bak meusen

Meunyo tapike hate teuh  tunu

Lawet nyoe lampu mate that kayem

 

Meujan-jan malam teungoh pajoh bu

Meujan hanahu payah tet lilen

Citka lagee nyoe nanggroe  ka maju

Hase meutabu lampu sabe len

 

…………….

………………………………

 

Nyan Cek Madya baklon geubri su

Hate that tunu lampu geuh kalen

Sabab karangan ka puntong iku

Meunyo tan lampu tuleh tan mungken

 

Ide karangan ka jipo brabru

Ladom u cong U ladom cong Maken

Dak geupeusaho han diwoe laju

Payah pajoh bu peuet uroe laen

 

Dilon pih nacit hate jeuet tunu

Meusabab lampu kayem beureusen

Kadang cit bak phon kheun “Amma b’akdu”

Ph’ot mate lampu hate that gigeng

 

Nibak saat nyan deungo hai Teungku!!

Hate that tunu meutamah gigeng

Sabab tan sajan jiduek polampu

Hate nyang tunu lon boih ho laen

 

Keureutah lon criek lon tiek u dapu

Pulupen biru lon rhom u sandeng

Ide keunarang jipo u cong U

Jan-jan ji meusu watee lon yue tren

 

Hek  tapeusaho satu-persatu

Wab mate lampu jiwoe “gampong jen”

Jan watee malam teungoh pajoh bu

Kayem dilampu ka mate meusen

 

Tan masaalah teungoh ta’ab bu

Babah hah laju bu cit meutunggeng

Teungoh cok-meucok nyang jadeh tunu

Niet tatamah bu roeh meugeue kareng

 

Cok eungkot payeh teu-eh teudu-du

Meuse sigeutu glah ie meutunggeng

Kadang meusigo sapat pajoh bu

Jeuet ka’a ka’u tunu sirakhem

 

Aneuk deungon Yah rampah-rampah bu

Kr’ang krieng dimeusu camca peh pireng

Teungoh geusuleueng Manyak geubri bu

Meunyo len lampu  karu  that baten

 

Si  Manyak ka ue ie tan disitu

Geuplueng u dapu seupot ‘aloihem!!!

Bit  le  seungsara kayem len lampu

Teungoh pajoh bu meunyo “tapeutren”

 

Ladom geusaba han pajoh laju

Peutoe  u  dapu geujak tot lilen

Jameun peureunoe aneukle Abu

Bek ka pajoh bu dalam seupot klem

 

Euntreuk kah hantroe rijang abeh bu

Sabab jibantu dijak ‘ab le jen!!

Nyang ladom meuh’ob meukr’ob kr’ob laju

Lilen di dapu tan meudhoi kareng

 

Meutamah palak meusipak bangku

Ang  ing  teubiet su; pukeeku hai  jen!!!

Roeh geusyeumarot geudhot po lampu

Meupeb-peb laju sampe trok lilen

 

“Meunyo  bak bayeue sisen milekmu!!

Silap  sigeutu listrek ka gunteng!!”

Abeh han  abeh cae  bhaih  lampu

Meujampu jampu tunu ngon teukhem

 

Meunyo lampu trang garang dum ‘a’u

Di rumoh seru  urusan maseng

Asai  seupot klam ka padam lampu

Aneuk deungon Ku akrab meukhem-khem

 

 

Peugah calitra  haba endatu

Poma geujampu peugah hiem leubeng!!

Sang teuka ubat jan mate lampu

Akrab bersatu duek lam hu lilen

 

Aneuk meuratoeh kheun cae lagu

Bloi  kahu lampu  dok  maseng-maseng!!

Wassalammu’alaikom ulon toep buhu

Keu pasai lampu kaseb lon salen

 

Keu Cek Madya hormat lon tuju

Sms itu  ka panyang bandeng!!!

Cae Bak Jambo beumaju laju

Beu udep  lampu taharap bek len

 

Poh lapan keu  poh siploh bak malam minggu

Wahe polampu jaga beuseutreng!!!

 

T.A. Sakti

 

Banda Aceh, 12 Mei 2010 poh  10.10 malam Hameh singoh pre libur umum

(Catatan: Sms Cek Madya jitamong bak HP lon: 23 Feb 2010, 22:05:53).

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s