SEUMANGAT INDONESIA

SEUMANGAT INDONESIA

Oleh T. A. Sakti

Assalamualaikum Kawon Iseulam

Inong ngon agam aduen ngon adek

Saleum sijahtera keu bandum rakan

Dua blahtangan  jaroe lon tabek

Na haba bacut meuheuet lon reukam

Haba pilihan keubhah politek

Kisah seujarah bangsa droe taulan

Miyub ngon manyang ngon keundo-tarek

Alhamdulillah syuko keu Tuhan

Nyang peujeuet ‘Alam itam ngon burek

Allah Ta’ala kuasa hanban

Nyata bak alam konka tatilek

Lheuh nyan seulaweuet keu Muhammadan

Rasul pilihan nyang leubeh tarek

Nabi nyang leubeh ban sigom alam

Tanyoe Islam ureueng pomilek

Keu ahli wareh Rasul janjongan

Sahabat sajan saleum lon peu-ek

Muhajirin Anshar pembela Islam

Arab ngo ‘Ajam ulama tarek

Neubri Ya Allah bandum ureueng nyan

Dalam lindongan droeneueh Ya Khalek

Di dalam kubu neubri beuaman

Beujeuoh Jahnam Uroe Neutilek

Ammabakdu laju lon reukam

Tapi hai rakan ujong teubalek

Meunyo lageesot hanagot reumbang

Kureueng geuransang  watee tatilek

Miseue peunajoh geuboh lam hidang

Meubagoe ragam manok ngon itek

Ureueng peumajoh pihle  cit macam

Nyang ladom deundam nyang ladom hak-ek

Adak seunicah meunan cit reusam

Inong ngen agam hana saban ek

Nyang ladom harok culok boh mamplam

Nyang ladom deundam lincah boh putek

Ladom keu pliek-u rindu kon wayang

Ladom geuransang putik boh bajek

Nyang ladom galak keuboh timon phang

Ladom boh mancang hana payah sek

Meuseb keuh ohnoe peumbuka kalam

Jinoe tujuan laju tatilek

Masa katalo Nippon biek Jeupang

Nyang mat pimpinan bangsa droe adek

Soekarno-Hatta dua ureuneg nyan

Nyang mat pimpinan nanggroe Reupublek

Umum merdeka keu seuluroh ‘Alam

Keu biek jahannam hanpeuele tabek

Kaphe Beulanda Heiho biek Jeupang

Hanpeue kheun tuan tanyoe hai adek

Masa dileikon pane na meunan

Beulanda Ceupang haroh tatabek

Meunan keuh bagoe nanggroe jajahan

Gobmat pimpinan nyang tulak tarek

Ban dipeurintah le kaphe suwang

Geutanyoe rakan hanjeut taasek

Ureueng dewasa bandum keunong Wang

Beulasteng geupeunan wahe E Nyak Dek

Soe han-ek bayeue  paloe kon wayang

Kadang hai rakan umong jitarek

Keurija Rudi (rodi) upah jibritan

Geutanyoe rakan uteuen yue reulek

Diyue sek naleueng ngon peugot jalan

Masanya taulan hansoe jeuet asek

Ureueng nyang salah bagah dikeukang

Laju lam sampan rijang dipeu-ek

Diboih u Beutawi Cilacap Irian

Nyang ladom sayang tan teumeung balek

Tinggai ngon aneuk inong ngon agam

Meulintee tuan aduen ngon adek

Tinggai peurumoh gampong halaman

Tinggai lampoh blang paya ngon tasek

Muenan keuh bagoe nanggroe masanyan

Ureueng Nederland akai that burek

Yoh masa Nippon pih saboh macam

Bacut lon karang sinoe hai adek

Banban jiteungoh si Nippon suwang

Ureueng guransang geudeumpek-deumpek

Geupeugah katrok ureueng tulong prang

Katroh Cut Abang jak bantu adek

Haba jitabu sidadu Ceupang

Kamoe hai rakan seutia bayek

Asia Timur-Raya bersatu rijang

Untuk puga prang let kaphe burek

Ureueng geutanyoe peucaya rijang

Bandum mat cekyang kaphe geureulek

Ohtalo kaphe hanle jiriwang

Pulitek Jeupang laju mubalek

Laju peugot Posjaga rata jeueb simpang

Peugot beurandang duson ngon tasek

Pade lam gampong meugunca kuyan

Mandum keu Ceupang haroih tapeu-ek

Ureueng B.D.K peusapat rijang

Diyue le Jeupang pade jitarek

Ureueng lam gampong habeh soh eumpang

Keu breuehbu Ceupang lam prang Pasifek

Peurangoe Jepun gothat kreueh ceukang

Ureueng jireupang nyang meupolitek

Jipasoe lamtong lam laot jilham

Bandum jibuang meunyo ceureudek

Ureueng lam naggroe le nyawong hilang

Nyang leupah sayang puga Blang Putek

Diyue peugot Tren kapai teureubang

Uteueng diyue cang urot bak rubek

Masa watee jak dum garang-garang

Watee geuriwang bandum pruet tarek

Nyang ladom teuma nyang leupah sayang

Tan teumeung riwang kunoe u bilek

Rakyat lam gampong meung ija pihtan

Habeh jisimpanle Jeupang burek

Han ek na ija bajee ngon pinggang

Ta eu bak badan gutee dum ji-ek

Ngon kude buta rata bak badan

Sabab ija tan seb nyamok culek

Pijet ngon gutee jipangkee rijang

Ureueng masanyan dum burek-burek

Saka lam nanggroe soe rasa pihtan

Gula meulisan bek tanyong adek

Bandum barang nyan keuneubah Jeupang

Keubah keubahan lam Prang Psifek

Bak U bak pineung dum diyue pancang

Diyue glong lam blang kuta ngon tasek

Nabek jeuet jitron kapai teureubang

Musoh nyang datang ngat payah ji-ek

Meunan keuh bacut kisah bhah Ceupang

Susah kon wayang masanya adek

Sang hanle talo si kaphe suwang

Payah gon lawan jih gotthat tarek

Takdirullah keuheundak Tuhan

Di bangsa Ceupang ka gadoh tarek

Buet Amerika dua bom dilham

Katalo Jeupang payah bot tabek

Di nanggroe tanyoe Ceupang kaguncang

Bandum diriwang lam kapai ji-ek

Kahabeh jiwoe u nanggroe Japan

Ladom keunong cang mate lam parek

Tanyoe Merdeka Indonesia geubohnan

Mulai Sabang sampe u  Murek (Merouke)

Geubeuntuk laju pemerintahan

Kon keurajaan tapi Republek

Republik Indonesia ceudah geupeunan

Kalheueh sarengan pilihan bayek

Nanggroe merdeka konle jajahan

Nyang mat pimpinan biek droetueh adek

Nanggroe merdeka geupeuna Parlemen

Ngon Undang-undang Dasar thon ‘45

Dasar negara Pancasila nan

Deungon Presiden Wakil lom teuma

Di Jakarta pusat geuduek pimpinan

Yoh phon masanyan Soekarno-Hatta

Tiep-tiep daerah geubri pimpinan

Di Aceh teuman di Koetaradja

(Banda Aceh sekarang)

{ Sumber: Majalah Santunan no. 232 halaman 50/Rubrik Budaya -Nazham Aceh, terbitan Kanwil Depag . Aceh – T.A. Sakti}

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s