ANGGARAN BEUTIMANG – Kurang Tanggapnya DPRA terhadap Peradaban Aceh

Anggaran Beutimang

Oleh: T.A. Sakti

 

Anggauta Dewan pilehle rakyat

Supaya mangat nasoe peutimang

Kana soe pike laot ngon darat

Rakyat lam rahmat makmu ngon seunang

 

Teuma lon kalon sampe ‘etnoe hat

Na sipeue cacat bak boeh rancangan

Pembangunan fisik sabe leubeh brat

Tamaddon rakyat  kayem  that ringan

 

Jalan, jeumatan, peugot lueng teupat

Nyan sapeue pakat anggauta Dewan

Tapi tamaddon budaya – adab

Dewan kheun leugat  hana anggaran

 

Dak Eksekutif usul lam “rapat”

Dewan tan silap geucoret rijang

Nyan ‘peungalaman’ ulon katreb that

Bidang Hikayat lon perjuangkan!!

 

Sabe lagee nyan Dewan bersikap

Saleh peue sabab ta pertanyakan!!

Pakon budaya cinta kureueng that

Aceh meugah that dilee bidang nyan

 

Peradaban Aceh saheh that hibat

Leubeh peuet abad umu that panyang

Bandum rab hanco hansoe tem rawat

Tapreh jan meuhat tinggai tok-tok nan

 

Sideh Krueng Raya KUTA  meugah that

Kabeh kamue kap soe padoli tan

Ulama jameun dum hibat-hibat

Tan meupat jeurat soe rawat pih han

 

Peue lom karangan dum kitab-kitab

Di nanggroe Barat le kaphe simpan

Soleutan Aceh meuploh droe meuhat

Kubu tan meupat leupah that sayang

 

Pahlawan Aceh saheh riwayat

Dum bangsa barat diangkat tangan

Tapi kuburan le that tan meupat

Hana soe rawat wab beulanja tan

 

Karya pujangga kitab-hikayat

Lethat hai sahbat dilee saboh jan

Ulama dilee bit hibat-hibat

Neu karang kitab meureutoih macam

 

Jinoe rab tanle habeh kamue kap

Bak Jambo teulhat atawa rangkang

Nacit gob peugah teuntang hikayat

Di Beulanda lethat get that disimpan

 

Wahe Pak Dewan bek sabe silap

Anggaran “beujab” keu Peradaban

Yoh gohlom habeh hanco ban asap

Dudoe ‘oh teulat ‘rakyat’ kap tangan

 

Bak gob nyang dongeng sang-sang keubit that

Sabab dirawat ngon gaseh sayang

Bak tanyoe seujarah sang-sang ileh that

Sabab tan meupat bukeuti pih tan!!!

 

Dada Meuraxa kisah geucatat

Seujarah kitab le that geukarang

Nibak internet ban ulon lihat

Di Australia teumpat sideh gob simpan!

 

H.M. Zainuddin pujangga cakap

Aceh nyang hibat le gobnyan karang

Jinoe rab tanle tamita tan pat

Hansoe tem pakat ta cetak ulang!

 

Hai DPRA peutimang rakyat

Jinoe neu pakat anggaran timang

Lahe ngen baten beu sideurajat

Aceh bermartabat bit kon dongengan!!!

 

#T.A. Sakti – peminat sastra Aceh

(Sumber: Majalah “the CHIEK”  edisi II/Maret 2010)

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s