UBAT GAMPONG: Lingkungan Hidup

Ubat Gampong/SI

 

Oleh : T.A. Sakti

 

Keu ubat gampong bacut takisah

Lon meubeurakah meudua banja

Ubat endatu watee  ka sudah

Hansoele papah jameun ka bida

 

Jinoe ka canggeh ubat that mudah

Hana that payah bak tajak mita

Asai beuna peng nyang on-on mirah

Meuh’ei sileupah ubat kiminya

 

Di ureueng gampong sabe lam susah

Seureuba salah ‘ohtee geukira

Ubat that meuh’ei; pade that  murah

Peunyaket jajah hana bak tunda

 

Siare pade hansep pel siblah

Bit popeurintah geukira hana

Yum barang gampong sabe lam murah

‘Oh akhe sudah soe meugoe hana!

 

Sy’ob hai katuwo keu uram kisah

Lon peuwoe bagah u punca teuma

Proe ubat gampong; boh gadong tuwah

Kumili, birah paleng utama

 

Endatu tanyoe meunan geupeugah

Boh gadong,birah,kumili tiga

Lam sithon sigo tasak lam babah

Ube na wabah meusiblah dumna

 

Dumpeue peunyaket Tuhan peusiblah

Ngon Insya Allah teukabo bekna

Gule bak leubue tataguen kuwah

Lam sithon beusah siblet tapeuna

 

Geukrut putik U peh lada siblah

Tipek beubagah nibak dhoe gata

‘Oh saket ulee sang-sang ka beukah

Deungon Bismillah mustajeueb beuna

 

Jan saket batok khak-khok sileupah

Mita beubagah on rabon muda

Ramah deungon ie peujeb sikhan glah

Ngon Insya Allah pulehle teuma

 

Kadang saket pruet na angen mirah

Gambe cok siblah tabicah sigra

Ta upa bak pruet ngat diruet bagah

Ab-‘eb bak babah t’ang-t’eung lungkiek pha

 

Ngon boh keumeudee pih teuntee leupah

Le angen mirah pruet ureueng tuha

Keumudee masak syulok keu lincah

Bahthat bee babah geuntoet that subra

 

Kadang na kurab lungkiek pha beukah

Meunye na mudah on drang neumita

Ngon gapu ranub neupeh beubicah

Neu intho bagah dalam luengkiek pha

 

Meunye na teuceue wable seumeurah

Gambe nyang mirah laju neu upa

Ngon on sikleueng-kleueng pih  mustajabah

Sayang sileupah bak jih ka langka

 

Dum kayee ubat langka sileupah

Dilee  Unsyiah  na geuci pula

Jiteukale khueng panyang sileupah

Lampoih nyang luwah ka “talo” sigra!!!

 

T.A. Sakti

#Peminat sastra Aceh

Iklan

3 pemikiran pada “UBAT GAMPONG: Lingkungan Hidup

  1. on sikleueng-kleueng nyan on peu abua?
    dalam bahasa indonesia peu nama on nyan abua?

    • hana mmeuceh beumeupeue lam bahsa Indonesia.Cok dilee ba laju bak labor,trep-trep meupeue keudroe. Nan Aceh pih hanjeuet keu halangan!.

  2. on drang nyan on peu abua dlm bahasa indonesia??

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s