DEWAN BEK TAMAK

        Dewan Bek Tamak
Anggota Dewan gaji peuet amak
Meunan akeumak diteupeue rakyat
Maka taharap bekle that  tamak
Bah that Masinyak mantong yue karat!!
Hiro keu  rakyat bandum neujamak
Janji nyang leumak  dimatle rakyat
Janji Pemilu rakyat jisimak
Han peue teukeusyak rakyat lisek that
Rakyat ka carong kon Apa Ta’ak
Konle ban Sinyak ban putoih pusat
Deungon Serambi leupah akeumak
Sabe geusimak politek brat-brat
Janji Pemilu dilee that leumak
Trok aneuk manyak jipreh troih leugat
Supaya Aceh maju meugr’ak-gr’ak
Nanggroe meusyar’ak dan makmu rakyat
Meunye janji nyan neu rhom  lam seumak
Preh teuma ‘ok-’ak dibanci rakyat
Hanle jipileh sabab teugeusyak
Udep ban jangak lam rakyat upat
Dirakyat awam laju jiteunak
Peue cit dum geupr’ak tho laot darat
Cangkoi cap buya dumpeue geusamak!!
Yoh watee geutr’ak sang malaikat!!
Uleh seubab nyan beuget neu simak
Peue nyang akeumak diharap rakyat
Jinoe phon laju bantu beuramphak
‘Ohtoe Pemilu bek neujak daulat
Jak luwa nanggroe meunye bit leumak(?)
Yoh ban dilantek get neu beurangkat
Nibak ‘oh dudoe jak peubloe sangak
Tanle mamfaat keupada rakyat
Kayem that ta eu sulet mat  amak
Bak  geuseuet leumak hana sabe brat
Geuseuet keu rakyat ie diet lam amak
Peunoh meuceug’ak ’oh keudroe meuhat
Phon ban dilantek kayem tasimak
Nyang leumak-leumak keudroe peusapat
Peu-ek gaji droe hantroe peuet amak
Meunan hai Cut Nyak jameuen  talihat
Langsong  keu  rumoh  timoh meuceug’ak
Luah  meuhalak mewah  ngen hibat
‘Oh lheueh nyan muto bako meusanak
Tan  teusuet leumak bloe ngon peng rakyat
Hana geupike hanle geusimak
Rakyat lam ‘ok-’ak timu ngen barat
Peng dum geuhambo kas katho leumak
Keudroe geusamak tan bagi rakyat
Geutimbo  pangkai beujiwoe hai Nyak
Kabeh peuet amak bak rayu rakyat
Watee kompanye rab teusuet leumak
Jinoe keuh hai Nyak geugantoe leugat!!!
Anggaran Aceh tan bereh hai Nyak
Gesahkan  “sanak” rab sabe teulat
Rugoe dum rakyat meuanak-pinak
Anggaran banyak mate meulipat
Watee rab abeh baro grak amak
Buet lam meuh’ak-h’ak meukarat-karat
Lam kas neugara anggaran meucr’ak
Meunan keuh hai Nyak kayem talihat
Bak Dewan baro  beugeutem  “samak”
Beuget akeumak udep ngen rakyat
Rakyat seungsara tuha ngen manyak
Jareueng that leumak hek geuhareukat
Adak anggaran abeh meujeuh’ak
Ureueng syik manyak teuntee le dapat
Peng le meutabu buet dum meugunyak
Meunurot syarak nyan bila rakyat
Uleh seubab nyan  Dewan  bek tamak
Laju teugeusyak ban raya pangkat
Rakyat nyang pileh droeneuh ka leumak
Catok ngen amak beuade neumat!!
Keupada Dewan ulon peusanak
Horeumat banyak bak kamoe rakyat
Ureueng pilehan kon aneuk manyak
Janji siamak peutimang leugat!!!
# T.A. Sakti, peminat sastra Aceh.
*Catatan :  – meuceug’ak = tinggi/besar
– “simak” = dengar,       samak = habiskan, sikat semua
– ’ok-’ak  = susah/menderita;kacau
– meusyar’ak = bersyariat Islam
– geutimbo = gantoe/ganti
Iklan

3 pemikiran pada “DEWAN BEK TAMAK

  1. nyan kabutoi, rata chit muenan muenyo kajuet kue wakie rakyat

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s