Hikayat Kisason Hiyawan – Kisah Dunia Binatang

Hikayat

KISASON HIYAWAN

 

*Alih aksara dari Arab Melayu/Jawi/harah Jawoe

ke huruf Latin oleh : T.A. Sakti

 

Bagian 1

 

Bismillahirrahmanirrahim

 

Alhamdulillah kisah lon peuphon

Allah qadiron sidroe lon puja

Seulaweut saleum keu Muhammadon

Rasui Illahon bak akhe masa

 

Nabi Muhammad geunaseh Rabbon

Allah beupeutron rahmat meuganda

Deungon syeufeu’at Rasui geutanyoe

Beu ek keusampoe hajat dihamba

 

Lon keumeung salen saboh hikayat

Lethat ‘ibarat meusoe tem baca

Lam bahsa Aceh ulon meung surat

Mangat muslihat mudah tabaca

 

Bahsai awai phon kureung mustajab

Seubab meusurat bahsa Peursia

Nanggroe Peursia beuna neu tupat

Ngon nanggroe Arab han jeuoh bungka

 

Tajak ngon kapai meueng angen timang

Goh troh sibuleuen trok u Peursia

Nanggroe Peursia makmue hanaban

Raja di sinan ade lagoi na

 

Nama calitra na mudah tapham

Hikayat Nasruwan geurasi nama

Qishashul Hiyawan bahsa Arab nan

Kisah binatang dum asoe rimba

 

Calitra asai Nanggroe Hindustan

Uleh Beurahman ba u Peursia

Beumeuhoe punca na meupat uram

Ulon boh kalam kisah jak mita

 

Ajayeb Subhanallah

Deungon lon kisah sidroe raja

Raja nama Nasruwan Ade

Banyak pike ngon bicara

 

Ngon Beurahman Bazurwiyah

Cit that meugah lisek raya

Bicara pih jroh akai tajam

Cit jeut neupham barang bahya

 

Bak siuroe tanyong Nasruwan

Bak Beurahman guree raja

He Beurahman cuba peugah

Pakriban ilah nanggroe seujahtra

 

Jaweub Beurahman tanyong bak Sulthan

Kitab ajaran wajeb pareksa

Meugah kitab nyan nanggroe Hendustan

Hikayat Hiyawan geurasi nama

 

Bagian 2

Meunyoe meunan wahe Beurahman

Jak le beurijang laju tamita

Beulanja lon brie hadiah sajan

Ireng angkatan rakyat seureuta

 

Insya Allah Po Janjongan

U Hendustan ulon bungka

Oh troh watee reumbang uroe

Laman peutoe bak Meukuta

 

Beurahman beudoh leugat neuwoe

Geunap uroe eue kutika

Uroe pih reumbang buleun keunong

Beurahman tamong ubak raja

 

Lheueh neudeelat raja tanyong

Pajan nyang keunong jadeeh bungka

Deelat Tuanku Syahi Alam

Nyang meugeunggam alam donya

 

Laman kalon Tuanku beuklam

Duaploh nam reumbang kutika

Ulon Tuanku esok hari

Pagi-pagi Laman bungka

 

Raja peutroh ban nyang janji

Rakan neubrie ngon beulanja

Neubrie beulanja meuploh badeurah

Keu hadiah me keu raja

 

Beulanja neujok rakyat neukrah

Keu hadiah jadeeh bungka

Saboh badeurah na tatudum

Asoe maklum seuribee dina

 

Mangat hate rakyat bandum

Beudoh meu-uem leugat bungka

Rakyat ngon areuta raja pulang

Uleebalang neubrie dua

 

Habeh gampong leupah u blang

Lajue tamong teungoh rimba

Padum lawet dalam uteun

Padum buleun dalam rimba

 

Habeh gunong hanle uteun

Troh u mideun nanggroe raja

Lheuh nyan geujok peuseumbahan

Peurjamuan nibak raja

 

Hidang makanan di ateuh teumpat

Ban nyang adat jamee teuka

Bazurwiyah mita sahbat

Nyang leubeeh krab deungon raja

 

Ka meuteumee sahbat sidroe

Nyang hampe toe deungon raja

Beurahman gaseh hana bagoe

Bak siuroe Beurahman kata

 

Lon boh gampong tinggai nanggroe

Lon peutoe keunoe teungku bak gata

Nyang meukeusud han lon peugah

Ngon isyarah pih meumada

 

Kareuna lon deungoe kata Syiah

Lafai neukeubah saboh bicara

Alhurru ya’fiihil isyarah

Wal ‘abdu yudzarribu bil ‘ashaa

 

Meunyoe ureung meudekaan

Kata tuan deungon bahsa

Meunyoe namiet poh ngon tungkat

Ta isyarat han meumada

 

Seuot sahbat seubeunarlah

Hana ubah ban kheun gata

Bak han neukheun bek neupeugah

Neu isyarah lon teupeu bahsa

 

Jeh pih utoh nyoe pih ragoe

Ban dua droe bijaksana

Beunda nyang indah tameung puwoe

Keudeh u nanggroe tamee keu raja

 

Nyang ka dilee hantom peureunah

Nyang phon leumah nibak gata

Kitab saboh tameung pinah

Nibak khazanah milek raja

 

Kheunda bawa nyan u nanggroe

Tuhan sidroe peutroh pinta

Beu Allah brie mangat asoe

Beutroh tawoe ubak raja

 

Paidah sahbat na tatukrie

Teungoh janji kong seutia

Barang rasia hana sunyie

Adak lam peuti pih teubuka

 

Bagian 3

Meusom rahsia keupada sahbat

Nyan keu isyarat sah syedara

Beek peuleumah barang kapat

Nyang kon teumpat beek tabuka

 

Kareuna rahsia miseu nyoe ban

Miseu awan di udara

Watee crebre bak pandangan

Mupakat han bak ta sangka

 

Oh meusapat dalam kawan

Geukheun awan laen hana

Seubab sahbat ta meurakan

Keubajikan hase di donya

 

Krie cit narit Bazurwiyah

Geutanyoe sah si syedara

Janji habeh pakat sudah

Geu peuleumah  kitab geubuka

 

Beurahman salen ngon bahsa droe

Siploh uroe habeh leungka

Lheuh nyan teuma neulakee woe

Neubot jaroe ateuh jeumala

 

 

Teuma page lom teuka dudoe

Idzin kamoe he syedara

Lheuh nyan neupeugot saboh surat

Neuintat peu et keu raja

 

Padum lawet peujalanan

Troh le tuan ubak raja

Oh sajan troh woe Beurahman

Tot meuriam seuen silaksa

 

Tanda horeumat keumuliaan

Kareuna Beurahman guree raja

Oh sare troh le Beurahman

Teumpat geubrie nyang mulia

 

Teuma geubrie le makanan

Peurjamuan dum anika

Beurahman jok kitab neu puwoe

Neu peujaroe ubak raja

 

Nyan keuh neubrie keu bungong jaroe

Ka meusampoe Allah karonya

Lheuh nyan raja buka geudong

Neuyue bulueng dum areuta

 

Dua lhee ploh ureung usong

Neu yue bulueng seudeukah raja

Neubrie salen that barollah

Keu Bazurwiyah guree raja

 

Laen rata dum kafilah

Ban silsilah meunurot kada

Oh sare lheuh habeh geusalen

Kitab yoh nyan geuyue buka

 

Beurahman baca dinab Sulthan

Laen nibak nyan dum seulingka

Uleebalang peudana meuntroe

Laen sinaroe ureung kaya

 

Bandum tahe teukab jaroe

Hantom sa nyoe indah haba

Khalayak rakyat nyang na di sinan

Pujoe Beurahman dinab mata

 

Di Beurahman syuko keu Tuhan

Di Sulthan limpah karonya

Peuleumah geudong neujok kunci

Peutoe beurangrie neuyue buka

 

Han meuceh le dumpeu neubrie

Dum na beurahi hate suka

Bazurwiyah tundok ulee

Meunan lagee ureung wara’a

 

Seubab nekmat le meutemee

Nyan geumalee keu Rabbana

Bazurwiyah peu ek seumbah

Jaroe dua blah ateuh jeumala

 

Nyawong tuboh asoe darah

Cit milek sah di sarpada

Keupeu laen meunyoe tan hajat

Hana minat keu areuta

 

Meung na Tuanku gaseh hadzarat

Habeh leungkap dum peukara

Teutapi na sipeu hajat

Neubrie surat saboh nama

 

Nyang surat nyoe han lon peugah

Ubak khujah neu peureksa

Peugot surat jiseubut nan

Bak hakim nyan neu peureksa

 

Bagian 4

Ubak khujah sabda Sulthan

Surat kaman uleh gata

Khujah peugot surat mudah

Bazurwiyah deungon raja

 

Geuyue Poteuraja keu guree

Seubab meuteumee kitab peungaja

Dumna rakyat mangat jithee

Leubeeh guree nibak raja.

 

Lheuh geusurat geubacakan

Dinab Sulthan Meuntroe Bentara

Sajan habeh geubeut surat

Syah Beudeelat neu meusabda

 

Na tadeungoe dumna rakyat

Ban lam surat beek meutuka

Phon jinoe kon troh aneuk cucoe

Beu lam teuhiroe ta peulara

 

Sajan habeh peusan amanat

Geutop nubat geubaca do’a

Kisah guree oh noe tamat

Nyang mita hikayat nyoe syedara

 

 

Laailaha illallah

Lajue kisah ta calitra

Jinoe meuteuoh haba musang

Saboh binatang le bicara

 

Dum peunyaket cit jiteupeu

Padahai uroe leumah hana

Uroe ji eh malam jijak-jak

Beek meurumpok ngon manusia

 

Kareuna musoh got beujarak

Oh meurumpok meuhat binasa

Ka han mate untong keu jih

Lagee nyan jikieh meunan jikira

 

Kareuna ulon meuhat musoh

Cit jipoh han peu ta sangka

Hana peu syok han peu pike

Adak han mate meuteumee jra

 

Meunyoe sitree wajeb ta takot

Jipoh meuhat beek syok sangka

Meunan di hate jiteusuwe

Jijak eu le binatang dum na

 

Jipeusapat bak si uroe

Bandum bagoe binatang rimba

Rimueng badeuk himbee gajah

Habeh jikrah glueh ngon rusa

 

Bue ngon lutong eungkong sajan

Laen nibak nyan na sirigala

Peulandok mawah bui ngon cagee

Ceurapee ngon mie tikoh meuruwa

 

Keuleulawar naga sudong

Nyan lam gunong asoe rimba

Jiyue meusapat bak saboh blang

Ji keumeung tanyong saboh haba

 

Uroe Jumeu’at beu meuhimpon

Meunan jikheun bandum rata

Uroe nyan beek na nyang meupake

Barangkari ta meusaba

 

Meu’ah barang peukeurijaan

Bak uroe nyan uroe raya

Oh troh janji bak uroe Jumeu’at

Ka meusapat binatang rimba

 

Musang tanyong saboh masaalah

Ta peugah bandum teuh rata

Peu nyang leubeeh peu nyang tatakot

Cuba seubut bandum gata’\

 

Lheuh nyan seuot sibarang datang

Cit meu orang manusia

Kareuna le that akai pike

Le that syawe panyang bicara

 

Geutanyoe jipoh rijang mate

Jeub sagai be jiboh daya

Han sahoe jeut mita raseuki

Keunong taki tipee daya

 

Ji peulintek jitheun taren

Hoe nyang tasyen keunong daya

Meunan akai seukalian

Siribee ban ji bicara

 

Nyang le akai wajeb ta takot

Meunan jiseubot dum ji rata

Lheuh nyan rimueng teuma marit

Haba kon bit pura-pura

 

Dikee insan han ku malee

Cit eumpeun kee ban sineuna

Makanan nyan jitem rhui bulee

Tuto han mee beek tabuka

 

Musang jaweub haba rimueng

Pane ta tueng narit doseuta

Na tom ensan han ta takot

Narit han patot beek tabuka

 

Rimueng beungeh hana bagoe

Leumah sidroe manusia

Jeh leupeu ureung ka hoi keunoe

Ta kheun bunoe han takot gata\

 

Rimueng seuot han ku malee

Beuthat siribee keunoe kaba

Lheuh nyan jihoi ureung teungoh jak

Narit seungkak han le khaba

 

Bagian 5

Bukit han kuja kee han lheuh le

Jinoe pakrie toh bicara

Meung mantong umue hana mate

Meunan pike jijak lanja

 

Oh troh jijak bak binatang

Marit musang sigra-sigra

Meuhoi gata teungku keunoe

Kareuna kamoe ka meudawa

 

Mupakat kamoe takot keu ensan

Di tuan nyan jimalee hana

Ji kheun ensan han jimalee

Beuthat siribee keunoe kaba

 

Seuot ensan hana patot

Rimueng seuot beungeh raya

Beek antara meungkah sidroe

Siploh keunoe ka cuba ba\

 

Meunan jikheun rimueng pindoe

Ureung jak hoi keunoe sigra

Seuot ureung meungka peugah

Euntreuk oh leumah kadang ka bungka

 

Han kuweeh-weeh jak tueng keunoe

Lon di sinoe trok an sinja

Ureung jijak jiriwang le

Teuka pike dalam dada\

 

Bahku riwang lom bak rimueng

Ku tanyong beu habeh haba

Troh geutanyoe teuma ji plueng

Janji beukong dilee mula

 

Rimueng beungeh saket hate

Akai han le ngon bicara

Meungka beungeh hana lagee

Keunong tipee sikleep mata

 

Rimueng marit hana ku plueng

Kee nyoe ureung saboh bangsa

Narit keu nyan hana meuhat

Meung goh kuikat han ku peucaya

 

Meung hana lom keunong taloe

Kee sidroe han kupeucaya

Oh leumah gob kah kaboh droe

Payah kamoe sia-sia

 

Rimueng beungeh leubeeh bak bunoe

Ka peutaloe piku ridza

Han tom kuplueng bak jad majad

Narit saket that beek ka buka

 

Rimueng pih ka jitheun taloe

Ji ikat jaroe gaki bandua

Ji ikat bak peureudee kayee

Meunan lagee keunong daya

 

Binatang laen nyum teumakot

Seun-seun bacut surot lanja

Sira marit sabe keudroe

Rimueng pindoe keunong daya

 

 

Meung ta kalon angap-angeup

Ji peungeut dinab-nab mata

Ji ikat rimueng kong han bagoe

Ji yoyok droe meugrak hana

 

Ji meulawan sare riyoh

Han ek putoh taloe nyang na

Bandum punca habeh seumate

Meugrak han le kong lagoi na

 

Nyan jiikat deungon awe

Lom ji buendi ngon urot raya

Oh sare lheuh ka ji ikat

Ji tanyong pat le manusia

 

Jinoe pakrie ka meulawan

Toh amilan rot ka daya

Teuma ji hoi uleh musang

Jih dicong trieng meubleek-bleek mata

 

Binatang laen habeh gadoh

Seun-seun saboh dalam rimba

Musang jihoi le sigoe-goe

He adoe po ka bloe sahja

 

Ku paban bah kagrak bak Allah

Kareuna babah jeut binasa

Teuma meututo nyan di ureung

Dengan rimueng sabe dua

 

Bunoe kepeu kee kayue woe

Kayue tueng soe lom ho kuba

Bak peunyum kah lheuh ku ikat

Ku woe leugat bak ka sangka

 

Bagian 6

Lheuh ku ikat pane ku woe

Ku keumeung kiloe beek jan ka hoi ma

Rimueng seungab ka ji iem droe

Hana sapeu jibrie dawa

 

Ji pike-pike dalam hate

Kee ka mate seubab that kha

Musang bunoe jeh dicong trieng

Hanya jingieng han sapeu haba

 

Rimueng beungeh hana bagoe

Meutoto asoe hue ngon mata

Teuma jikheun lom le musang

Gata girang that guranta

 

Binatang laen habeh gadoh

Meung aboh hana  sapat na

Manusia teuma meututo

Ku hadu di muka-muka

 

Oh sare ji suet sikin badek

Ka jiculek aneuk mata

Mata rimueng ka jiculek

Ji tarek keunoe u luwa

 

Jicok parang teuma jitak

Teubiet utak ka teupanca

Rimueng pih mate nyan lam ikat

Jiwoe leugat manusia

 

Musang bunoe ka teupike

Ka jisyawe dalam dada

Nyoe keuh ulon han sahoe roh

Jeut keu musoh ngon manusia

 

Meung han kujak pih han sahoe roh

Jeub-jeub keureupoh ku jak meumita

Nyang keuh ulon cit han jeut rab

Seubab kee kab manok dara

 

Oh meurumpok ji let laju

Bak-bak iku teuh jihila

Meungka teujak cit meurumpok

Meuhat jipeucrok han jitaba

 

Meunglam seupot han meuteumee

Ku teurajee lam-lam paya

Ku eh uroe cit seubab trang

Watee malam meudiwana

 

Bah keuh dum nan calitra musang

Bak le panyang malam jula

Cok iktibar ngon teuladan

Wahe ensan mangat seujahtra

 

Udep lam donya beek kreuh ceukang

Jeuoh rakan lawan teuka

Meuen peusak hob hana timangan

Keuhancoran dudoe ta rasa

 

Teulah sithon ureung meugoe

Teulah siuroe ureung meurusa

Peu guna teulah dawok antok droe

Ingat rakan droe yoh goh binasa

 

 

Laa ila haillallah

Habeh kisah musang seungsara

Oh ka habeh calitra saboh

Teuma meuteuoh laen punca

Meung na mantong reudok di gle

Mantong sabe ie raya teuka

Meung na mantong akai pike

Le peu syahe banyak kira

Meung na mantong mangat hate

Lon brie sabe peu nyang hawa

Muhammadur Rasulillah

Po Tallah neubrie bahgia

Beugot akai udep lam nanggroe

Beek le sampoe na huru-hara

Bak buet hana got beek ta galak

Beek le tajak ban geumaba

Ta peulheug gob droe meukeumat

Beuta ingat saboh haba

Haba keuleudee deungon lemoe

Jih saboh weu sapat dua

Ji gaseh that hana bagoe

Malam uroe cre jih hana

Teuma saboh manok agam

Biek gunantan jroh bicara

Ureung po leumoe sidroe syiah

Arief billah hana tara

Bahsa binatang habeh maklum

Habeh meuphom dum peukara

Bagian 7

Leumoe marit bak si uroe

Ji peugah pro saboh bicara

Ji peugah hai bak keuleudee

Ulon lapee han le kuasa

Watee meu’ue meugriet lon that

Oh cot uroe jiploh hamba

Leumpok asoe leumoh urat

Lon meugriet that hana tara

Ulon teumeygriet pakrie laku

Hai teungku neubrie bicara

Keuleudee inseuh teuka sayang

Sabe binatang guna-meuguna

Jibrie bicara nyan keu leumoe

Meunoe laku nyang jikata

He leumoe tapateh kamoe

Peusaket droe pura-pura

Geuboh eumpeun beek ta pajoh

Tapeu seungkoh pruet beuraya

Tapeu tarak pruet peusrui bulee

Meunan lagee ta peurupa

Eumpeun digata ulon tinggai

Cit beek sagai hiroe gata

Habeh haba keuleudee peugah

Geuroe eumpeun dalam raga

Lheuh nyan jirheng pruet leumoe agam

Eh meuleupam pruet ka raya

Rhui ngon bulee mata teupet

Leumoe saket busong raya

Si keumawai plueng jak peugah

Ubak syiah dijak peuhaba

Leumoe teungku ka saket pruet

Pakrie jeh buet meugriet lagoina

Masa keuleudee brie ajaran

Syiah yoh nyan deungoe haba

Narit keuleudee habeh neutupeu

Jeub sagoe weu ji bicara

Meunyoe leumoe ka eu lapee

Ka crab keuleudee nyang na teuga

Singoh beungoh jicrab keuleudee

Leumoe lapee hana jiba

Keuleudee han tom keunong leuhob

Han tom geucrab siumue na

Han jeut dijak meupalet-palet

Takue saket hana tara

Ngon ie babah meukuboh-kuboh

Ta eu tijoh ngon ie mata

Teuma lom tijoh ngon ie hidong

Nyan keuh untong le bicara

Ji peulheuh gob ka meugriet droe

Cula-culoe dalam paya

Oh cot timang uroe geuploh

Keuleudee payah hana tara

Kee meugriet seubab geumaseh

Kee ka paleh banyak bicara

Ku peulheuh gob kee meukeumat

Jinoe geucrab hana reuda

Oh troeh lam weu han ek le eumpeun

Teujeunun sang-sang ka gila

Ji iem droe han sapeu ji kheun

Keu eumpeun han le jikira

Leumoe tanyong pih ji iem droe

Hana sapeu le suara

Hate saket hana pat peugah

Cit seubab kah kee habeh jra

Nyang jikheun nyan hana lahe

Dalam hate droe jih saja

Singoh pih geucrab lusa pih meunan

Keuleudee yoh nyan gundah-gulana

Keuleudee pike parie ban lheuh kee

Mita eleumee nyang seumpureuna

Pike habeh bicara keunong

Leumoe tanyong hana reuda

Pakon ta iem han tapeugah

Ku eu sosah roe ie mata

Seuot keuleudee beek ta tanyong

Nyang ku ceumong cit keu gata

Kareuna gata miseu tuboh droe

Dua geutanyoe saboh nyawa

Ka dua uroe ku deungoe pakat

Hana meuhat udep gata

Bagian 8

Geu keumeung sie seubab saket

Yoh goh lom treb kureung hareuga

Singoh geusie pakrie laku

Adoe teungku toh bicara

Ban leumoe dengoe nariet keuleudee

Ji beudoh le ji tanyong haba

Pakrie laku pakrie lagee

Mate kee tinggai meung gata

Keuleudee kheun meunoe lagee

Ka pateh kee jinoe bit teuga

Beudoh groeb-groeb ka pok tanoh

Ka groeh-groeh ka lila-lila

Oh ka teuga geusie han le

Meunan pike nyang seumpureuna

Leumoe beudoh ka jigroeb-groeb

Ta deungoe bab-bob tumbok dada

Jigrob-grob lagee geulanteu

Jigrob pageu ji lila-lila

Troeh le teuka si keumiet weu

Ji jak eu leumoe jinoe ka teuga

Watee leumoe ji meuteuoh

Teungku Dirumoh deungoe haba

Peu nyang kheun habeh maklum

Teusinyom teungku teutawa

Teungku Syiah khem meuhah-hah

Teungku Dirumoh tanyong sigra

Pakon neukhem peu neukalon

Peu nyang bak lon salah di mata

Seuot Syiah ku khem keudroe

Hana sapeu salah gata

Hana geu khem meung han peu salah

Cuba neu peugah beek neu meuseunda

Hana geukhem meung han peu galak

Kon sinyak lon teupeu bahsa

Beungeh leupah that Teungku Dirumoh

Ta eu ‘eh ‘oh ngon suara

Teungklu maken neukhem laju

Peurumoh Teungku maken subra

Peugah laju pakon nyan lagee

Neu taleuk kee jinoe sigra

Hana teudoh neulakee taleuk

Ka meukuek-meukuek ngon suara

Manok gunantan teungoh keumireuh

Ji deungoe deuh barang peu haba

Bak keuleudee jijak marah

Cit seubab kah Teungku ka subra

Teungku ngon Pocut ka meupake

Jinoe pakrie toh bicara

Ka deungoe keuh sue jeh taleuk-taleuk

Neulakee taleuk hana reuda

Meung neu peugah Teungku mate

Geutanyoe pakrie dudoe nyang jra

Teungku laen hana meunoe

Jroh peurangoe si lagoina

Han neu peugah roh bak taleuk

Geunap thon ta duek dum teuh nyang na

Pocut laen teuma dudoe

Saleh han meunoe jroh bicara

Ngon seubab kah han got akai

Kareuna beubai mit bicara

Jimeu akai ban badui

La me keuji rok-rok mata

Nyan di Teungku saboh lagee

Gadoh han neuthee syaithan daya

Lam meungaji geunap uroe

Peurumoh droe han neuajai

Adak meuneutueng peurangoi kee

Di jeut brie malee na kutampa

Tan jih sidroe na peut laen

Hana kusyem meukreuh jungka

Bacut salah jih nyan keu kee

Ku lot balee han jan jihoi ma

Nyoe di Teungku han jeut poh-poh

Meu droe saboh laen hana

Adak neupoh beek peuturot

Ji takot barang jan masa

Ban Teungku deungoe narit gunantan

Dikee pih meunan ku keureuja

Ku tueng akai binatang nyan

Mudah-mudahan han le subra

Bagian 9

Teungku Dirumoh neumat di jaroe

Le peu that teupeu ku teumee tampa

Neupoh goh troh ka meulagee

Peubuatan kee peu kah kira

Teungku Dirumoh yoe meuthat-that

Neubot tungkat baro neucuba

Teungku neuplueng taloe binteh

Ka neujak eh dalam tika

Teungku neuplueng lam keulambu

Tan le karue gadoh subra

Wahe Teungku han le singo-ngoh

Lon beek neupoh seubab ka seb jra

Seubab neudeungoe haba binatang

Hana jeut prang seungab dawa

Meunyoe akai nyang mupakat

Barang gapat tueng le gata

Peuleupah gob droe teuh lalee

Miseu keuleudee keunong bahya

Adak ji iem le manfaat

Han meularat langue paya

Jibrie akai gaseh keu gob

Ka meuleuhob lam-lam mata

Beutaingat po samlakoe

Barang gasoe le bicara

Meuhat meuwoe u ateuh droe

Barng gasoe agam dara

Laa ila haillallah

Habeh kisah keuleudee jra

Laen kisah jinoe ta sambat

Maken got that nibak nyang ka

Soe nyang saket inan ubat

Miseu hikayat punyie ngon kra

Tanyong Raja bak Beurahman

Pakrie haba nyan cuba kata

Pakrie ek lheuh nibak sitree

Ja jiteumee sajan jiba

Barang peu buet kon ngon pike

Nibak akhe teulah teuka

Ka keuh teulah hapoh ulee

Misee punyie ji peulheuh kra

Kareuna seubab kureung pike

Hana hase ban ji pinta

Saboh pulo di teungoh laot

Sinan le that binatang kra

Jiboh Raja ban nyang adat

Rupa hebat lagi tuha

Bicara le ade han ban

Firdatar nan geuboh nama

Umu tuha lagi la’eh

Jiboh wareh gantoe Raja

Nyan pih ade hana bagoe

Peutimang nanggroe mat neuraca

Bak siuroe Raja beurangkat

Le that rakyat keu bala tantra

Oh sare troh u bineh laot

Ji ek leugat euncong ara

Teutap jiduek dum di sinan

Pajoh buahan dum jirasa

Raja laloe hana bagoe

Rhot di jaroe saboh boh ara

Oh troh bak ie got that bue nyoe

Ji lhom dudoe hana reuda

Raja lale sinan duek sidroe

Lhee peut uroe euncong bak ara

Makanan le lagi lazat

Pot le rakyat joek keu Raja

Di dalam laot raja punyie

Hana jithee sinan le kra

Ri nyang ji lhom dalam laot

Punyie sambot pajoh sigra

Punyie pike lam hate droe

Mit na meunoe manusia

Ulon hana meung jiturie

Jibrie raseuki hana reuda

Sangkira na saleng kasihan

Han meuban-ban ji karonya

Got ulon brie keubajikan

Keubaktian keu raja kra

Ji beudoh le leumah ulee

Meunan lagee le bicara

Bagian 10

He raja kra tangieng keunoe

Ulon teuh nyoe saboh raja

Lon ngon gata heundak meusahbat

Sama adat sabe raja

Gata raja lon pih meunan

Beukasehan geutanyoe dua

Seuot raja kra han peu salah

Ban nyang titah lon karonya

Nibak siuroe maken leubeeh

Meutamah gaseh punyie ngon kra

Kra pih teutap di cong bak kayee

Teutap punyie di yub bak ara

U Pulo han le teuingat

Lale ngon sahbat di cong bak ara

Putroe punyie hate sosah

Raja meugah ka sajan kra

Dum dendayang hate rangoe

Ji eu putroe duka cita

Lheuh nyan jiyue dum dendayang

Jiyue jak tueng poteuraja

Nyang jiyue nyan haba sulet

Putroe saket ka peuhaba

Meuhan neuwoe rijang-rijang

Kadang-kadang tinggai seutia

Sigala rakyat jak teumuteng

Putroe jikjheun teungoh nadak

Oh meutemeung raja punyie

Meunoe lagee jipeu haba

Tuanku Ampon neuwoe siat

Pocut nadak that hana tara

Dilikot kamoe saleh han le

Raja pike roe ie mata

Raja mohon ubak sahbat

Izin siat ulon gisa

Jipeugah putroe pih saket that

Lon woe siat rijang teuka

Punyie jiwoe troh u nanggroe

Ji eu putroe hana haba

Raja tanyong bak asoe meuligoe

Saket putroe peu kareuna

Krie cit narit dendayang sidroe

Tuan putroe nadak raya

Putroe saket hana ubat

Untong mawot pomeukuta

Ban raja deungoe narit meunan

Han meuban-ban hate rugha

Ban raja deungoe meunan jipeugah

Seugra geukrah tabib dumna

Tabib ka troeh keunan datang

Raja tanyong ngon seuksama

Wahe tabib ta brie ubat

Tuan putroe that keunong bala

Keu peunayah beek ta tanyong

Sirasa nyawong ulon tuka

Teuma seuot tabib sidroe

Han meutupeu pomeukuta

Kareuna saket ureung binoe

Ubak kamoe pueh that nyata

Meulainkan sabe ureung binoe

Nyang na teupeu asai punca

Teuma geutanyong bak dendayang

Jaweub rijang meunoe haba

Ubat nyang na ulon tupat

Meusaket that pomeukuta

Beuthat meusaket pih tapeugah

Kamoe ilah ngon bicara

Nyang jeut tuanku ubat putroe

Cit tan sapeu meung hate kra

Seuot raja kheun dendayang

Pat meuteumeung cok hate kra

Seubab jikheun nyan keu ubat

Putroe khianat keu raja kra

Ngon seubab kra lakoe jeuoh

Meung han neupoh dudoe duka

Meung raja keu kra neusyen

Neu meukawen han peu sangka

Meunan pakat sabe keudroe

Dendayang putroe ban sineuna

Haba pakat teutap oh nan

Meuwoe karangan punyie ngon kra

Bagian 11

Punyie pike dalam hate

Pakrie syawe ku peungeut kra

Nyang jeut keunoe kuba dilee

Putroe lakee pakrie kudaya

Punyie langoe rijang-rijang

Jipeu seunang u yub ara

Oh sajan troh na sikeujab

Peugah hajat keu meukuta

Jilakee meuteumee jicoem jaroe

Saket putroe that nadak

Jikeumeung kalon mumat jaroe

Putroe keumeung woe Nanggroe Baqa

Nyan jipeugah oh troeh kamoe

Laen han sampeu le suara

Ban kra deungoe punyie peugah

Teuhah babah han le haba

Raja marit teuma sipatah

Toh pakrie bah kamoe taba

Kareuna kamoe ureung uteun

Peulayaran tan biasa

Keu nyan tuanku beek neutakot

Nyang buet laot kamoe biasa

Tuanku neuduek ateuh rueng kamoe

Ulon peulangoe sikleep mata

Hana riyeuk hana bakat

Troeh le siat u Puloe raya

Nariet ulon beu neupateh

Nyoe kon neugaseh neukheun hamba

Seuot raja kra soe lon ikot

Meung han lon turot tutoe gata

Oh lheuh haba punyie peugah

Kra pantah groeb u ateuh nyan

Raja kra groeb nyan ateuh rueng

Jibaplueng pantah ban guda

Lheuh nyan teuma bacut-bacut

Kra pih keunyuet hat lam dada

Teujak teudong pantah han le

Leumah lam pike nyan raja kra

Kareuna kra that ji inseuh

Jiteuka weuh di dalam dada

Bukit raja kra jinoe mate

Sahbat han le nyang sibeuna

Bukit han kupoh mate putroe

Pakrie jinoe ku bicara

Kra jikalon buet tan punyie

Hana lagoe ban jikata

Tuto meugriet buet peuleuheun

Han ban jikheun bak hie rupa

Jitanyong bak raja punyie

Sangka jithee keunong daya

Wahe sahbat nyang that gagah

Nyoe tapeugah sipatah haba

Ta kheun meugriet buet peuleuheun

Ban nyang ta kheun sang-sang hana

Jinoe ta peugah ban nyang teupat

Ban nyang hajat ka troeh pinta

Bukit na hudep lon sang mate

Barang gakrie hana daya

Ulon ka troeh u teungoh laot

Ku plueng han jeut jadeh binasa

Punyie pike biet nyoe meunan

Got keu kaman ku calitra

Nyang jeut lon plueng han le pantah

Lon that inseuh nyan keu gata

Kareuna gata lon tueng keu ubat

Putroe saket that teungoh nadak

Meunyoe na ubat putroe han mate

Ubat ji yue nyan hate kra

Ban kra deungoe punyie peugah

Allah Allah tumbok dada

Allah Allah he panghulee

Pakon han dilee tapeu haba

Keupeu keuh jeut ulon peugah

Buet ka leupah keupeu guna

Adak meung na tapeugah dilee

Ka meuteuntee meuteumee kira

Pakrie jinoe ulon peugah

Le that sosah han samporeuna

Ulon hana kumee hate

Tinggai di gle lam istina

Bagian 12

Di gata hana na ta tupeu

Majeulih kamoe nyoe ban sineuna

Meunyoe meujak sajan sahbat

Hate meuhat hana meuba

Sangkira na meuba hate

Han meuwoe le ubak tangga

Hate sajan peu ta ingat

Seuntok mangat dalam suka

Di ateuh istana saboh teumpat

Hate le that tuha muda

Ban nyang ta kheun tameu teuoh

Ta peugah toh agam dara

Hate nyang ka geutueng keu ubat

Beumupakat agam ngon dara

Saket agam agam keu ubat

Inong meuhat sabe dara

Meunan kudeungoe tabib peugah

Meunyoe jiubah sia-sia

Allah Allah wahe sahbat

Taba leugat lon beusigra

Na tajak cok hate keu ubat

Taba meung siat lon eu mata

Raja punyie teuma seuot

Peu makeusud ulon peuba

Nyang makeusud ubat putroe

Sajan kamoe hana taba

Got keu dilee bah le ta riwang

Jak cok rakan hate beusigra

Mangat jeut mudah beek meularat

Dum nyang hajat kamoe peuna

Nyang nyoe jeuoh ta jeumeurang

Dudoe ta riwang cit meung gata

Dilon meung lheuh lon mumat jaroe

Dudoe tawoe cit bandua

Di raja punyie jilakee puwoe

Di kra nyoe leugat jimaba

Punyie sangkat bit tan hate

Bak jipike keubiet jimaba

Lheuh nyan teuma kra ji iem droe

Punyie jipuwoe ucong bak ara

Oh troeh leumah ji eu darat

Preut jilumpat ucong bak ara

Allah Allah wahe sahbat

Bayek sangat hate gata

Nyan ta gaseh dilee ubebe

Hate ta beunci dalam dada

Pakon raja ubah janji

Pat beureunti sumpah seutia

Gata tuan hana ban kheun

Miseu jameun saboh haba

Ta tem deungoe jinoe lon peugah

Saboh rubah nan sirigala

Jikheun keuleudee hana hate

Pakrie lom lagi geulinyueng hana

Punyie seuot cuba peugah

Pakrie rubah jikheun hana

Meunyoe meunan deungoe jinoe

Yoh saboh roe saboh masa

Saboh rimueng timoh kude

Pruet han sabe ngon ta peusa

Bak tapak timoh han jeut jijak

Pruet han meugrak ube raya

Saboh rubah khideumat rimueng

Teumpat ji tueng akai bicara

Rimueng mariet ubak rubah

Ka jipeugah bak sirigala

Saket ulon peu ta peunab

Pakon ubat han tamita

Ulon han ek lon beudoh le

Ubat pakrie cuba mita

Seuot rubah jata rimueng

Meunan nyang keunong nyoe bicara

Kareuna peunyaket han jeut peunab

Mita ubat le beusigra

Meung tan ubat meutamah saket

Ho maken treb laju teuka

Adak meunan wahe rubah

Mita ulah uleh gata

Nyang na lon deungoe ubat lapee

Hate keuleudee ngon teulinga

Bagian 13

Jijak keudeh jijak keunoe

Meurumpok le ngon Baniyara

Leumah keuleudee saboh jingieng

Teungoh geupeudieng balot ija

Keuleudee brat peudieng kayen

Baniyara putron bungkoh ija

Lheuh nyan keuleudee jijak meurot

Jipot nyang got naleung muda

Nibak silangkah leupah silangkah

Meuteumee rubah di rot raya

Rubah ngon rimueng habeh janji

Haba jibrie ngon teulinga

Asoe nyang laen got lon pajoh

Rubah sunggoh jak meumita

Oh meurumpok ngon keuleudee

Ji mariet le ban aulia

He keuleudee sangat beubai

Hana akai badan raya

Beungoh seupot lam geu peudieng

Hana tangieng rugoe laba

Luroh ngon bule di ateuh rueng

Lam ta rayueng bungkoh ija

Peu paidah nyang na ta tueng

Cit saket rueng nyang na tarasa

Lagi kayem gata deuk-deuk troe

Dawok laloe meukat ija

Badan pijuet han le asoe

Baniyara nyoe geulet kaya

Adak ta pateh nariet kamoe

Han le meunoe geupeu hamba

Beek taduek le gata sinoe

Geunap uroe meuteumee jra

Seuot keuleudee sibeunarlah

Pakrie ilah toh bicara

Meunyoe ta tem ban lon peugah

Udep minah dalam rimba

Gata kub bak saboh gunong

Sinan naleung na ‘oh ‘oh pha

Naleung lakoe jampu keunueng

Beudoh mameung jinoe kuba

Kuba nibak gunong kasturi

Naleung sare dum komkom ma

Tanoh batee meu anikam

Keuleudee keunan jikheun jiba

Krueng piheuning ngon teureujon

Sang geupeutron lam syeuruga

Keuleudee deungoe nariet rubah

Jijak pantah ngon sirigala

Jiba leugat ubak rimueng

Keuleudee bajeung akai hana

Dijih rimueng han jiturie

Jipeurab le keunan lanja

Rimueng drob le ka jireupah

Keuleudee glah jiplueng lanja

Rimueng pijuet hana kuat

Han ek jimat keuleudee teuga

Rubah tahe jikheun meunoe

Lapee-lahoe tan kuasa

Adak kuthee hana kuat

Peu manfaat ulon teuba

Rimueng jaweub kata rubah

Sigoe treuk payah ta usaha

Siseun treuk ta ba keuleudee keunoe

Gaseh keu kamoe beusamporeuna

Lheuh nyan rubah peurab bak keuleudee

Sireuta jimee lom ngon haba

Keuleudee timplak nyan kheun rubah

Ban ta peugah kusangka na

Seuot rubah hana lalee

Sah nyoe bit-bit kon pura-pura

Nyang mat gata pih keuleudee

Nyan pih lapee namiet Baniyara

Kira ulon ta meusapat

Na meusahbat gata nyan dua

Jeh pih pijuet hana asoe

Jimat bunoe jimeu seunda

Gata latah ka teukeujoet

Plueng teumakoet sangka bala

Keuleudee rimueng han jiturie

Han tom ji eu siumue na

Bagian 14

Keudeh jinoe jak kalon toe

Barang krie beek hiro gata

Keuleudee beudoh jijak leugat

Ka meusapat ngon rimueng tapa

Oh meurumpok keunan ka rab

Jidrop le jimat jiwiet dua

Keuleudee mate rubah tipee

Hana jithee keunong daya

Lheuh nyan rimueng apoh-apah

Teusuet lidah jih meureula

Jimat keuleudee sangat payah

Pakrie ngon grah silagoina

Teuma jikheun ubak rubah

Ulon payah hana tara

Ulon siat ku jak manoe

Ta keumiet nyoe uleh gata

Leupah rimueng jijak manoe

Rubah peutoe sigra-sigra

Ji pajoeh hate ngon geuli’ueng

Rimueng di krueng goh lom teuka

Oh troeh rimueng jitanyong le

Ho ka hate ngon teulinga

Seuot rubah jikheun mise

Cit tan hate geuli’ueng hana

Adak meuna hate keuleudee

Pakrie kumee keunoe keu gata

Jitem jok droe nyan keu musoh

Dari jeuoh sahja jiteuka

Adak na geuli’ung ka jideungoe

Han pungo jijak bak gata

Na gob peugah jideungoe-deungoe

Keubeu leumoe peugah keu gata

Ban rimueng deungoe narit rubah

Han jeut bantah mate dawa

Lon he punyie bukon keuleudee

Na ulon mee dua peukara

Hate pih na geuli’ueng sajan

Ku tupeu ban keumeung daya

Ji iem punyie han le narit

Ji kheun sabet ban kheun gata

Teutapi ulon nyang ka salah

Cit ka teulah han le guna

Hate reuloh han le ubah

Buet nyang jeuheut leumah nyata

Habeh haba punyie meusahbat

Meuwoe riwayat cicem ngon raja

Jinoe laen bacut meuteuoh

Haba nyang jroh cicem ngon raja

Raja tanyong bak Beurahman

Dua droe ensan jimeu seutia

Lheuh nyan teuma jeut meusohle

Antara dua nyan sitree raya

Teuma dudoe jeut lom sahbat

Barang syarat mee peubeuna

Seuot Beurahman tanyong Sulthan

Po Janjongan hanpeu peucaya

Sangkira jeut meupoe tangkaih

Teureubang leupah u udara

Barang peu dikheun hanmee pateh

Beuthat saleh ta eue rupa

Keu khianat han jeut han jitroh

Meuhan dipoh diinaya

Miseu ureung tapoh ta carot

Ngon tareubot tatueng areuta

Atawa tapoh wareh na nisab

Lheuh nyan tameurab sahbat raya

Beuthat jibrie peukayan indah

Oh jibalah cit ta thee na

Miseu hikayat burong fatarah

Cicem indah bijaksana

Pakrie hikayat cuba peugah

Beurahman pantah neupeu haba

Deelat Tuanku Syahi Alam

Diyueb kidam horeumat mulia

Tuanku saboh cicem indah

Burong fatarah Tuanku nama

Jimeu eumpang bak pucak meuligoe

Bak saboh nanggroe sidroe raja

Padum lawet sinan beureunti

Tuhan teukeudi aneuk jih na

Bagian 15

Jimeu aneuk Tuanku saboh

Rupa that jroeh hana tara

Raja cok leugat le neupuwoe

Ubak putroe neuyue peulara

Raja pih na aneuk sidroe

Rupa samlakoe hana tara

Geunap uroe burong peureugi

Mita raseuki keu aneuknda

Keu aneuknda saboh jibrie

Saboh lagi keu aneuk raja

Raja gaseh hana bagoe

Miseu aneuk droe hana beda

Maken siuroe maken leubeeh

Meutamah gaseh hana tara

Teukeudirullah peurintah Rabbbi

Bak sihari teuka bala

Jarak jak aneuk burong fatarah

Siat leupah cre ngon Banta

Banta beungeh pih that sangat

Jidrob jimat cicem rimba

Teuma jiseumpon ubak tanoh

Sigra jipoh mate pahna

Aneuk cicem pih ka mate

Ibu troeh le woe lam rimba

Ji kalon jieu ka mate

Meujimoe le hana tara

Seureuta jikheun sira jimoe

Wah geutanyoe ureung hina

Teuma sahbat ngon ureung meugah

Rijang ubah janji seutia

Hana jiturie ureung khideumat

Soai martabat jithee raya

Barang gadum peurangoe teuh got

Bak pihak cut leumah hana

Guna sithon ingat tan le

Pihak keuce that di mata

Teutapi ulon hana teukeuse

Aneuk lon mate geu enanya

Aneuk lon geupoh hana seubab

Hana sapat di meudeesya

Jikheun meunan sira jipoh droe

Jipoe jinoe ubak Banta

Aneuk mata Banta laju jicoh

Tuengbila dipoh mate aneuknda

Meugah bak raja Banta han le

Ka mate cicem coh mata

Raja neumoe putroe ba-e

Meurakyat le hate rugha

Dumna dendayang ka jipoh droe

Meuguncang meuligoe miseu geumpa

Lheuh seumanoe geuboh lam kafan

Teuma geutanom sigra-sigra

Jinoe raja sangat gundah

Burong fatarah neuyue mita

Burong jiduek bak pucok meuligoe

Raja peutoe sigra-sigra

Neu keumeung drob neupoh mate

Marji poe le dalam rimba

Teuma jipiyoh bak saboh buket

Rot meusaket hana tara

Raja seutot burong fatarah

Neu ek pantah ateuh guda

Raja seutot mameung-mameung

Meuteumeung euncong kayee raya

Neu keumeung drob hana dapat

Raja marit pantah sigra

Wahe fatarah peurab keunoe

Ubak kamoe ta tron sigra

Ulon teuh nyoe beek ta takot

Han khianat lon keu gata

Teuma seuot burong fatarah

Seubeunarlah sabda raja

Mee that ikot sabda Tuanku

Han sigeutue na meutuka

Ulon tuan ureung cut that

Lon meusahbat ngon Meukuta

Bukit na aneuk hansoe marah

Hansoe teugah barang dum deesya

Hana sidroe soe jeut pake

Barang kabe jimeung deesya

Bagian 16

Harap tawakkal hana sabe

Yakin hate simata-mata

Dumna ulon teukhideumat

Hana sapat jeuheut guna

Aneuk lon neupoh hana sayang

Mee lon riwang beek bicara

Tamse ban kata Arab

Lafai cakap deungon makna

La yamba’il mukminu fikhirin marratain

Jinoe lon brie deungon makna

Hana patot ureung budiman

Lhom droe lam mon ngon jisaja

Teutapi bak lon nyang sipatot

Hanmee turot kheun Paduka

Meunan leumah keubajikan

Bayek Janjongan got neugisa

Kareuna leumah dalam hate

Neupoh mate lon na deesya

Kareuna lon poh aneuk Janjongan

Cit han jeut han seubagoe tuengbila

Narit Tuanku hanmee pateh

Panee gaseh dumna bahya

Sabda raja hanle ubah

Balah meubalah sama padra

Bukit han tawoe gata u nanggroe

Jeuheut that kamoe sigala donya

Burong fatarah seuot meunoe

Han le lon woe Pomeukuta

Meunyoe ureung nyang budiman

Keujahatan han geumita

Kareuna geuthee keujahatan

Patot tuan geu peulara

Han patot na le keubaktian

Keubajikan keu Sri Paduka

Seubab aneuk lon ka mate

Seupo hate nyang han luka

Tamse ban kata sya-e

Burong kheun le lafai makna

Lauha batirrihi bi qalbihim

La sami’ul buka ‘alan khazan

Bukit jipoh uleeh angen

Ateuh ensan nyang lam donya

Meuhat jideungoe beutangisan

Peureucintaan hate lam dada

Dalam saba na keubajikan

Meung jeuoh han keunong bala

Meunyoe ureung nyang budiman

Nyang sitree kheun han keuh beuna

Han geuturot dum peureubuatan

Di dalam nyan raya bahya

Bak buet nyawong nyan keuh sitree

Ngon eleumee tipee daya

Ulon teuh nyoe meung han ilah

Mate neupoh uleh raja

Sabda raja meunoe neukheun

Ureung budiman that seutia

Hana ek cre nibak sahbat

Kareuna that hate suka

Burong fatarah ka jimarit

Tuanku bit ban nyang sabda

Ureung deungki teumakot that

Barang peu buet han peulara

Mita ilah beek rab sitree

Han geuteumee keunong daya

Ureung kaya seutia kureung

Ureung budueng akai hana

Miseu apui dalam batee

Pueh tateumee sangat suka

Soe troeh deungki dalam hate

Na keuh biseu uleu bisa

Bukit han jicoh sangka jicob

Meunan teungoh ta peucaya

Seuot raja wahe fatarah

Teukeudirullah dum peukara

Sangkira kon teukeudi Tuhan

Ka lon teupeu dum peukara

Nyang got jinoe beusajan kamoe

Keudeh tawoe u istana

Ulon Tuanku han le lon woe

Ka lon teupeu dum peukara

Bagian 17

Miseu dilon keu aneuk weuh

Meunan inseuh di Paduka

Ka ulon thee saket hate

Meuen lahe bayek phon kata

Burong fatarah lom jimarit

Tuanku bit bukon meuseunda

Barang gasoe nyang na hayat

Wajeb ingat peut peukara

Areuta meuhat hanmee pajoh

Hanmee ta troh keu beulanja

Meung goh jibrie keu hak Allah

Murka Allah pungoe gila

Keudua inong pateh lakoe

Beuta tupeu tan bahgia

Keulhee aneuk han pateh nangbah

Peu nyang ta suroh ji meudawa

Peu geulakee hana jibrie

Ta keutahui tan bahgia

Keupeut raja laloe keudroe

Keu asoe nanggroe hana geukira

Keubaktian hamba Allah

Hana leumah ji eu nyata

Keubajikan gob hana deuh trang

Le puga prang keumeung gila

Wahe raja deungoe kamoe

Bak uroe nyoe cre ngon gata

Sangkira dudoe na taingen

Ubak angen lon yue tanya

Bukit jipeugah keubajikan

Seumbah salam lon keu raja

Burong fatarah ji teureubang

Raja neuriwang u istana

Seudang cicem binatang uteun

Nyang musoh kheun han jipeucaya

Teuma geutanyoe nyang le eleumee

Keunong tipee hana reuda

Laa ilaaha illallah

Burong fatarah ka samporeuna

Jinoe ulon kheun hikayat rimueng

Guree jitueng bak rubah tapa

Sabda raja bak Beurahman

Hikayat nyan neuyue calitra

Ampon Tuanku sialam deelat

Bit ajaeb that rubah tapa

Saboh sirigala nanggroe Hendustan

Padum jameun dalam tapa

Marsaboh raja Po Janjongan

Bueh jih han ban ngon tapeusa

Binatang laen cit hanjeut rab

Habeh jikap dum binasa

Sangka-sangka jih han mate le

Tan jipike nyan keu deesya

Umue habeh hana hiroe

Sangka laju meutamah na

Uroe singoh beek ta harap

Beek sangka rab toe ngon gata

Uroe nyang ka gata sajan

Keubajikan di sinan na

Meunyoe hana buet keubajikan

Umum teuh nyan sia-sia

Tamseu lagee ban kata sya-e

Makna lahe lafai hana

Pubuet amai keubajikan

Masa tuan na kuasa

Kuasa han meuhat keukai

Untong ajai gadoh nyawa

Sirigala han jideungoe sapeu

Ji pubuet miseu ngon umpama

Keubajikan donya miseu kilat

Ta eu siat han meuhoe ka

Miseu kilat lam awan itam

Siat tajam peungeuh nyang na

Lheuh nyan itam miseu dilee

Ka ulon thee beek le haba

Dum sirigala habeh seungab

Teuma marit rubah tapa

Dum geutanyoe lam donya nyoe

Siat di sinoe keukai hana

Guna di sinoe got nyang teuingat

Teuma nekmat sikleeb mata

Bagian 18

Nekmat donya nyan dum ubah

Akhirat sah keukai baka

Guna nyang got cit geuteu-oh

Nyang geusuroh rok-rok masa

Bukit ta keumeung beu le nekmat

Beek khianat miseu nyang ka

Beek ta pajoh le binatang

Ta duek seunang got ta tapa

Beek le ta turot hawa nafsu

Lagi na umue han meumada

Kareuna nafsu hate jih tan

Hingga tuan gadoh nyawa

Ta deungoe he hamba Allah

Nafsu amarah beek seureuta

Meuhan mupakat hukom syara’

Beek neu galak ke syeedara

Barang gasoe tinggai buet syariat

Page meuhat lam nuraka

Nyan geubalah oh uroe akhirat

Deungoe sahbat nyang mubahgia

Masa sirigala brie ajaran

Dum binatang di sinan na

Rimueng pih na di sinan sajan

Jideungoe peuneusan rubah tapa

Ji tamong troeh u dalam hate

Jipeutoe le keunan sigra

Ulon teuheundak musyawarat

Ubak teumpat nyang seunia

Sajan troeh bak saboh teumpat

Raja marit sigra-sigra

Kudeungoe gata wahe rubah

Taat keu Allah dalam tapa

Sigala rakyat datang seumbah

Jijak peugah ubak hamba

Oh lon deungoe peugah ajaran

Rindu deundam lon keu gata

Hate ku mangat hana bagoe

Teuma jinoe meuribee ganda

Seujak masa mangat hate

Nyum-nyum beek cre lon ngon gata

Heundak ulon tueng eleumee

Lon meuguree ubak gata

Sirigala deungoe narit meunan

Jaweub yoh nyan meunoe kata

Bukit ta yue sidroe ureung

Nyang reumbang bayek bicara

Nyang han ridha ubak hate

Nyan tan hase han samporeuna

Bit pih lon kheun narit meunan

Peungajaran bukon hamba

Kareuna tuanku ureung rayek

Cit hajat trok peu neupinta

Teuma seuot raja rimueng

Pakon ta kheun meunan haba

Barang peu ta kheun lon han jeuoh

Ulon sunggoh ikot gata

Seuot rubah jikheun meunoe

Hana sunyoe dua peukara

Ubak raja jipeurab droe

Na meung sampoe nafsu hawa

Nyan keuh seubab keunan jipeutoe

Teuma bagoe nyang keudua

Ureung keumeung poh nyang hak mate

Teuma jiplueng le ubak raja

Harap keu udep nyum han mate

Miseu pi-e kamoe hamba

Ulon teuduek bak saboh teumpat

Mohon rahmat keu raja-raja

Hana patot ulon sajan

Ulon meurakan deungon raja

Barang gasoe khideumat Sulthan

Di bawah nyan cit na bala

Keunong fiteunah cit han jeut han

Po Janjongan sitree nyang na

Barang gasoe na sitree sajan

Udep teuh nyan han seuntausa

Beuthat tujoh pangkat meuligoe

Dalam rugoe hana laba

Sabda raja ubak rubah

Beek ta gundah barang bahya

Bagian 19

Kareuna rakyat dum kuturie

Nyang got beugi dan nyang hana

Sabet tuanku sibeunarlah

Barang nyang titah di jeumala

Sangkira jeut beek jak sajan

Bahle Janjongan dalam tapa

Ulon beut do’a uroe malam

Keu Janjongan ulon cinta

Bek cit Tuanku neu meuguree

Page meuteumee lon meureuka

Meuhat ulon keunong fiteunah

Akhe neupoh saboh masa

Kareuna seubab manyang pangkat

Manyang martabat guree raja

Raja rimueng deungoe narit reundah

Maken meutah neu peumulia

Ho maken treb maken leubeeh

Meutamah gaseh teungoh seutia

Lheuh nyan raja peujak keurajeun

Habeh reun-meureun bala tantra

Oh rab raja deungon rubah

Teuka fiteunah shalli’ala

Uleebalang meuntroe-meuntroe

Jimita proe boh reuncana

Habeh pakat teugoh pike

Jimeuhoi le namiet raja

Jiyue som nyan dageng-dagengan

Keu keusangan rimueng raja

Beek ka jak ba bak uroe nyoe

Ka troeh sie nyoe bak sirigala

Bak rumog sirigala ka jak keubah

Teuma dikah jak meumita

Di sirigala beek na jithee

Meunan lagee boh reuncana

Sare teukeujot raja rimueng

Eu dagengan tan di sana

Raja beungeh hana lagee

Hantom dilee meunan nyangka

Masa dilee oh teukeujot

Dageng jibot unab raja

Bak uroe nyoe dageng han le

Raja sudi peu kareuna

Raja pih deuk hana bagoe

Jula uroe han sapeu na

Sirigala binatang han le keunan

Meusajan ngon rubah tapa

Lheuh nyan mupakat dum kafilah

Jijak peuseumbah ubak raja

Deelat Tuanku Sialam Deelat

Sie ka meupat Pomeukuta

Habeh meumita ngon meusidek

Sideh lam bileh Teungku Tapa

Bak raja deungoe seumbah meunan

Pangge kaman Teungku Tapa

Ribah tapa troeh le siat

Laju meunghadap Deelat raja

Oh lheuh ji Deelat raja sudi

Ho ka tamee makanan hamba

Seuot rubah ka ulon brie

Bak mandari Pomeukuta

Ulon Tuanku sajan kawan

Lon eu pih tan Pomeukuta

Lheuh nyan raja sudi rijang

Ka jak rijang ka peunyata

Bujang jijak ta eu meehmoh

Ubak rumoh Teungku Tapa

Meuteumeung sie ka jipuwoe

Keubah u keu dinab raja

Teungku Tapa hireun teuceungong

Tahe mantong hana haba

Krie cit nariet rimueng buloh

Bak jih phon troeh reuncana donya

Ureung meudeesya patot tapoh

Singoh-singoh beek biasa

Ureung laen pih teumakot

Han keuh jijeut singoh lusa

Bangian 20

Teungku Tapa jipulop lam glap

Bukan ajab hana tara

Teutap sinan lhee peut uroe

Teuka sidroe wazi raja

Oh sare trok bak raja rimueng

Jiyue jak tueng Teungku Tapa

Pakon Tuanku hana sasat

Peukeunong had ureung tapa

Bukit meunan wahe meuntroe

Meuhoi jinoe uleh gata

Barang deesya ulon meuah

Bube khilaf kamoe raja

Jak le ta tueng guree keunoe

Barang gapeu ampon deesya

Ureung raja yoh nyan jijak

Tan meurumpok ngon sirigala

Na sikeujab ka troe jiwoe

Maken seungkoe jimee haba

Maken meureuka nibak dilee

Hana jithee buet peusuna

Padum lawet meureuka guree

Teuma geuthee bak ma raja

Putroe pike ubak hate

Hanjeut lale kubicara

Dalam lale le that rugoe

Maken siuroe maken meuganda

Kareuna le that ureung fiteunah

Akhe jipoh Teungku Tapa

Putroe rimueng jijak rijang

Jipeu seunan bak aneuknda

Oh sajan troh bak aneuk droe

Wahe samlakoe peu bicara

Pakon aneuk meureuka keu guree

Peu na meuteumee jeut keulaba

Saleh teulah uroe dudoe

Samlakoe hana pareksa

Barang peu buet aneuk beek tasom

Na soe kalon dum keu raja

Peumeuah deesya aneuk keu rakyat

Manyang pangkat bak Allah Ta’ala

Miseu aneuk ureung binoe

Ateuh lakoe dum peukara

Barang salah buet isteri

Bak suami meu’ah sigra

Miseu aneuk jok bak ibu

Meu’ah bak ku dum peukara

Lagee ban kata Arab

Ji kheun al-walidi surul aba

Aneuk ji kheun bit nyoe ibu

He Teungku han le meureuka

Jinoe ka tueng sirigala keunoe

Dinap kamoe ta pareksa

Kareuna sirigala ta keumeung poh

Rot sagoe toh jimeu deesya

Makanan gata han ji pajoh

Sinan saboh ji peumulia

Ji pajoh rubah on-on kayee

Seubab jimalee that keu gata

Ngon gata han peusabe droe

Malam uroe lam ji tapa

Keu gata that ji khideumat

Lama ji ta’at rok-rok masa

Bak peunyuem lon aneuk meutuah

Gob jak keubah dageng rusa

Dijih dageng han ji pajoh

Keupeu jitroh han ho jiba

Gob meudeungki jijak keubah

Na meusah nibak gata

Ban raja deungoe tuto ibu

He ma Teungku nyoe sibeuna

Lheuh nyan geupangge dum binatang

Trok le rijang ngon sirigala

Sabda raja bak binatang

Dum sibarang asoe rimba

Nyang ku pangge data keunoe

Masalah nyoe ku pareksa

Bagian 21

Supaya leumah keubeunaran

Keubajikan nyang samporeuna

Lagee ban kata sya-e

Makna lahe lafai hana

Bukit tamita sidroe rakan

Cuba teelan dilee mula

Oh lheuh cuba mee meurakan

Bit pih meunan ta pareksa

Raja tanyong ubak ibu

Pakrie laku jalan pareksa

Sigala ureung ta kumpoi sare

Yue peureugi keunoe sigra

Oh mehimpon dum meusapat

Lheuh di deelat seumbah raja

Putroe marit meugeurantang

Ta deungoe bandum lon meuhana

Jinoe ban buet nyan ta peugah

Barang salah han ku peudeesya

Lheuh nyan teuma ji peugah droe

Dum na kamoe troh rahsia

Putroe marit bak aneuk droe

Samlakoe peumeu’ah deesya

Kareuna aneuk lon meujanji

Jinoe ta brie ban lon pinta

Meu’ah pih lheuh marit putroe

Samlakoe deungoe narit ma

Nyang le teuboh ureung meugah

Kareuna fiteunah ureung hina

Lom he aneuk beu ta ingat

Barang nekmat beek ta lupa

Keubajikan gob barang gasoe

Samlakoe ingat beurata

Lapan peukara cit ta ingat

Nyang phon nekmat beek ta lupa

Keudua beek rijang marah

Beek that pantah peumeureuka

Keulhee beek boih umue lanjut

Beek ta pubuet darohaka

Keupeut sitree beek peumudah

Banyak sosah rijang raya

Keulimong beek ta meusitree

Aneuk panghulee beuta publa

Keunam beek peuturot hate

He boh hate nyan narit ma

Keutujoh beek pubuet lalem

Meuna soe tem meuseutia

Keulapan pubuet ban ta peugah

Beek beurakah banyak kata

Nyan keuh lapan he aneuk droe

Barang gasoe beek ta lupa

Nyang lapan treuk teumon bunoe

Samlakoe ingat wasiet ma

Phon beuhase keubajikan

Syuko keu Tuhan boh hate ma

Keudua seutia aneuk ngon tuto

Binasa nyang le seubab kata

Keulhee ureung nyang meuakai

Beek na sagai aneuk peuhina

Bukit meurumpok barang gapat

Ta brie adat tapeumulia

Keupeut nyan beek rab ngon sitree

Aneuk panghulee ta peulara

Limong aneuk buet nyang hase

Deungon pike ta bicara

Keunam tangan teuh beumurah

Hamba Allah beek putoh asa

Keutujoh buet ban nyang hukom

Ban nyang maklom bak ulama

Ureung jeuheut beek meurakan

Nyang keulapan  he aneuknda

Lheuh raja deungo tuto ibu

Raja syuko keu Rabbana

Jinoe pi teungku nyang dilee

Miseue puroe dilee nyangka

Tuanku ampon bekle sinoe

Behle bak droe sideh tangga

Bagian 22

Sabda raja neu kheuen bek cre

Hudep mate sajan hamba

Teutap rubah teuma sinan

Hingga tuan ajai teuka

Laa ila haillallah

Hikayat rubah ka samporeuna

Oh habah nyan leumah laen

Tamee jitren badee teuka

Na tamse buet uleebalang

Tamse buet prang han ek reuda

Nyang buet dilee gohlom meu’oh

Nyoe goh keumah jeh ka lon ba

Jeh meueng baro meueng geukadang

Sinoe ka prang peugot kuta

Sinoe ta deungoe rusak mate

Meunan pi-e akhe donya

Meunan bagoe hikayat nyoe

Hana sue nyoe leumah lanja

Oh lheuh kisah rimueng ngon putroe

Lom nyoe rimueng ngon aneuknda

Sabda raja bak Beurahman

Nyan pi kaman ta calitra

Pakri rimueng peulara droe

Barang gasoe ji enanya

Got ngong jeuheuet bida jih tan

Hukom Tuhan jipeu landa

Ji sangka hana soe balah

Buet deungon kreuh seubab teuga

Tuanku Ampon bak saboh gunong

Saboh rimueng aneuk dua

Bak siuroe lam peujalanan

Bak peuburuan paroh rusa

Jarak bacut leupah  ibu

Teuka Teungku ureung meurusa

Ji eue aneuk rimueng cabak

Teungoh dijak di lila-lila

Jipeu busu bleuet jipoh mate

Kameu gule lam beuluka

Jipluek kulet ban dua droe

Lanja jiwoe ureung meurusa

Gob pileupah inong pih woe

Kajipoh droe han ban publa

Ngon jideumpek bukon bubarang

Teuma datang saboh sirigala

Ji eue rimueng moe meusok-meusok

Ulee jantok hana reuda

Wahe rekan wahe teelan

Pakon dukaan peue kareuna

Rimueng peugah keulakuan

Aneuklaman ji elanya

Aneukku ka jipluek kulet

Hateku saket hanatara

Sirigala deungo haba meunan

Jikheun na’am sigrta-sigra

Beuttan mat hana salah

Mahkluk Allah ajai citna

Teutapi nyang got saba tellan

Akai meunan nyang samporeuna

Beuta saba nyangka gadoh

Bek ta teuoh nyangka hana

Beuta ridla nyangka takeudi

Meuseuki banci nibak kata sya e

Hana ta deungoe kata sya-e

Makna hase lam kitabnya

Hana tangieng keubajikan

Keujahatan gata keureuja

Nyangkoh pade meuhat cit dore

Ureung nyang meugoe po areuta

Seupeurti ban kata Arab

Lafai cakap ulon nyata

Kullama tandium syutanu

Makna teungku deungo nyata

Dum nyang hutang bayeue meuhat

Bek taharap ek glah gata

Lheuh nyan sirigala jiteu manyong

Ubak rimueng ji pareksa

Bagian 23

Ulon tanyong wahee taulan

Padum zameun umue gata

Seuot rimueng bak peunyuem lon

Sireutoh thon dum nan lama

Dalam umue sireutoh thon

Peu makanan teuh digata

Seuot rimueng dageng binatang

Dum sibarang nyang meunyawa

Laen nibak nyan na meujan-jan

Dageng ensan manusia

Seuot sirigala sibeunarlah

Nyang ta pajoh hana bangsa

Pakri tan ma pakri han ku

Hansoe karuu balah gata

Pakri jeut han saket hate

Han ta pike dilee mula

Miseue digata hate that weuh

Meunan inseueh gob keu gata

Peu nyang ta pubuet ateuh ensan

Meuwoe han jan sikleb mata

Meung goh bila han lom mate

Sabe teupike keu aneuknda

Ban rimueng deungoe narit meunan

Taubat yoh nyan cit nashuha

Ban nyang yakin sibeunarlah

Han jeuet bantah tuto gata

Jinoe han le pajoh dageng

Makeun ranteng daun rimba

Ulon pajoh boh-boh kayee

Peu meuteumee boh-boh ara

Sirigala kheun ubak rimueng

Jinoe tatueng eleumee tapa

Jinoe gata beuta khaluet

Gata tueng buet ta puasa

Baro keuh gata got bak dilee

Hana sidroe mee kheun keu gata

Deungoe he ureung nyang budiman

Deungoe he rakan nyang bahgia

Seudang binatang nyang peut gaki

Ji turi rugoe ngon laba

Teuma geutanyoe rupa sangpari

Akai deungki narit han beuna

Mata seupot geulinyueng tuloe

Beek sangka droe peugeuh mata

Peu nyang gob kheun han ta pakoe

Le akai droe bak ta sangka

Seudang binatang jitem turot

Nyang sipatot han meudawa

Teuma digata han ta ikot

Gob tareubot ta elanya

Salah beuna han ta hiroe

Miseu rabo nyang ie timpa

Meuka ta pubuet barang gahoe

Sampoe ngon po hana bida

Wahe aneuk uleebalang

Bukon sayang po bentara

Han ta tem deungoe narit abang

Talo meunang rugoe laba

Meueng han teulah po samlakoe

Areuta rugoe jeuheuet nama

Akhe teulah hana bagoe

Sangkee sidroe tan bahgia

Meueng bak buet gob bek peuroh droe

Beutaht rakan droe buet syeedara

Meuhan geuyue tagalak

Peuleumah rancak jeuet binasa

Ban ulon kheun meuhat bit trok

Miseue jampok saboh masa

Siuroe simalam ujeun seuntok

ji peurab jampok bak kawan kra

beu pideumam sujuek badan

leumah candawan hu menyala

Bahsa geutanyoe geukheun kulat

Didalam seupot dijih meucahya

Bue pi ji eue dum jak soseue

Disangka apui hu meunyala

Bagian 24

Dijak madeung me ngon rujee

Hana jithee kulat bana

Ji pangkee ngon rujee basah

Apoh apah peudeh mata

Ji yueb-yueb na han jitem hu

Jampok meusue ji kheuen gila

Beek kauble han jitem hue

Kulat batu nyan meucahya

Bue ji seuot peu gadoh kah

Dikee basah yoe anggota

Buet kee pakon kah peuduli

Pakon deungki peu kareuna

Dikah han basah bulee keueh le

Di kamoe yoe miseu geumpa

Bue yueb kulat cula-caloe

Jampok meuhoi hana reuda

Beek ka yueb nyan tan paidah

That bit sosah akai hana

Meueng tan akai le that rugoe

Jampok peutoe bak kawan kra

Ji peurab le pantah-pantah

Jijak teugah peubuatan kra

Beek kayueb le tan paidah

Peu subok kah beut teu hamba

Buet geutanyoe jih peuduli

Jimeu deungki han got bahsa

Kon keu deungki kareuna Allah

Buet nyan payah sia-sia

Ban jideungoe jampok peugah

Bue ka marah hue ngon mata

Jidrob jampok jilueh bulee

Peubuatan kee keupueu kah kira

Kee meuhoi tan pubuet kajak

Terancak-rancak hanatara

Jampok ji iem hanle tuto

Jipike ro ngon ie mata

Sabab naritku teukeudi

Lon pikeuji keunong syeksa

Beuta ingat aneuk teungku

Meukeumat iku pueh tahila

Bek misee bue jak suet bajoe

Meukeumat droe hansoe hila

Soe yue pihan ngon galak droe

Aneuk bisoe rab binasa

Bitna hudep sirasa mate

Iku hanle ka binasa

Nibak siuroe bue berujalan

Jeub seuruan habeh data

Ji eue geuplah papeun geureufai

Dua sagai ureung tuha

Kayee geuplah dua bajoe

Utoh jiwoe sinja

Kayee geuplah hana beukah

Bajoe ji keubah di ateuehnya

Saboh bajoe mantong meukeumat

Jiwoe leugat utoh bandua

Na sikeujab kaleupah jiwoe

Teukale bue keunan sigra

Geupasang kayee gok-gok bajoe

Iku geunyoe hana geukira

Teusuet  bajoe meuseupet iku

Kliek meu’u’u hanatara

Ji keumeueng peh nuga jarak

Ji keumeueng jak ka meugrak hana

Simalam seuntok jimeu ngadu

Jihoi bantu hansoi publa

Nyang kon buet beek ta peulaku

Bah di situ maseng kada

Buettan utoh kon buet tanyoe

Beuta teupeue maseng jeumba

Maseng-maseng peubeut buet droe

Beuthat geuhoi le geumaba

Nyang han patot bek peulaku

Miseue tulo hukom guda

Guda teungoh jimeu seutot

Dijih ngon got dijak publa

Bagian 25

Jipo pantah le dijak tham

Guda agam nyan diaja

Beu seumeutot teungoh cot uroe

Ureueng binoe han kuasa

Digob laen dum geupiyoh

Meueng tho reuoh siklep mata

Teulo jidong bak babah pinto

Guda agam tahe han le haba

Kaweh keudeh bek le tuto

Kupeutajo mangat ka rasa

Teulo pikreuh han jitem weh

Jinoe jadeh ka binasa

Ji peutajo leupah lam pruet

Nyan keudum buet cuba kira

Geutanyo dum hanthee keudroe

Nyankeu adoe le binasa

Cok kada gob boh kada droe

Saba adoe akai hana

Dibue meunoe pakri jeuet lheueh

Pakri leupah nibak bahya

Simalam seuntok jipike pike

Alla brile leumah bicara

Uroe beungoh troh pokayee

Bak jih dilee buka haba

Teungku piyoh ohnan siat

Lon bri ingat bacut haba

Bekta peurab dilee keunoe

Te deungo jinoe saboh bicara

Padum lawet taneu kayee

Peue na eleumee pantang rimba

Meueng na tatupeue eleumee pantang

Hana rijang jeuet binasa

Utoh seuot nyan ji kheun hom

Hana meuphom kamoe dua

Bukit katem cuba peugah

Kareuna kah asoe rimba

Lheuh nyan jiseuot aneuk bisoe

Pantang bajoe nyang that raya

Bajoe hanmee peudom-peudom

Cit beutasom beek deuh nyata

Nibak bahya ek seulamat

Beu ta ingat beek ta lupa

Ulon kalon sinoe baroe

Lon eu bajoe teusuet hana

Ulon that-that sayang keu droe

Lon suet bajoe ku useuha

Ulon teusuet gok-gok lajue

Meukeumat ikue silap hamba

Ulon teuduek simalam suntok

Untong goh trok teuka bala

Seubab buet ngon kareuna Allah

Meusiblah ulon bak bahya

Jinoe ta peurab ta boh bajoe

Peulheuh kamoe nibak mara

Oh peurab ban dua droe

Ji boh bajoe sigra-sigra

Allah got narit nyan jipayue

Adak han Teungku han le nyawa

Keupeu jeut lheuh iku ka lipeh

Keupeu areh ka lheuh ceudra

Barang peu buet pike dilee

Menyoe ka malee keupeu guna

Ureung meuangkee nyang phon inseuh

Seubab that weuh keu syeedara

Oh han hase teuman taulan

Oh ka payah sosah raya

Lheuh nyan bayeu ngon areuta droe

Nyan keulhee peu hase nyang na

Nyang peuduli pih cit meunan

Nyang phon tuan inseuh teuka

Na ureung plueng teungoh ta woe

Untong dudoe keunong bala

Adak ta peugah rot meuteuntee

Geutanyoe dilee nyang jiyue ba

Saboh kisah deungoe boh hate

Hikayat pande ngon ureung meurusa

Bagian 26

Sabda raja bak Beurahman

Pakrie haba nyan cuba calitra

Cuba peugah he Beurahman

Keubajikan ureung saba

Ureung nyang ek ji theun hate

Keubajikan hase rakan keureuja

Sangkira na ureung nyang meunan

Sajan laman ji meuseutia

Peu ji lakee cit ulon jok

Allah peutrok peu ji pinta

Lagee ban kata ureung dilee

Nibak sukee raja nyang raya

Masa yoh nyan ulon brie pham

Dua macam hase cita

Ta peurayek hase meugah

Ta peureundah hase hina

Meunan lahe nyang ka leumah

Hakikat bak Allah dum peukara

Barang peu buet bak Allah teumpat

Na manfaat kheun beusigra

Keubajikan hase sinan

Atawa han cuba kata

Seuot Beurahman Tuanku Deelat

Bak kon teumpat hana guna

Cit buet Tuhan meungka ek had

Meunan itikeud nyang sibeuna

Keudeh harap ubak Tuhan

Kon keu ensan simata-mata

Lagee umpama tabib meu ubat

Beu ji tupat asai punca

Datang peunyaket beu ji tune

Supaya hase dijih sigra

Raja ngon rakyat meunan miseu

Beu ji turie di bawahnya

Kareuna ensan dua sifeut

Got ngon jeuheut guna meuguna

Nyang tem balah guna ensan

Nyang keuh taulan nyang samporeuna

Lagee ban sabda nabi

Deungoe sare teungku raja

Khairunnas man yanfa’unnas

Wa syara lana mayyadhumuhu

Meunan sabda nabi he teungku

Makna tentu deungoe nyata

Nyang got ensan brie manfaat

Akan sahbat balah guna

Teuma nyang jeuheut brie meularat

Keu sahbat han balah guna

Nyang han balah guna rijang

Got binatang bak manusia

Salah binatang pajoh naleung

Guna ureung han ji lupa

Ji balah le deungon siat

Miseu hikayat Pawang Rusa

Deelat Tuanku si Alam Deelat

Cit ajayeb that ureung meurusa

Bak siuroe na peuburuan

Troh beurjalan bak saboh guha

Ji eu Tuanku sidroe ureung

Lhee binatang dalam guha

Peutama bue keudua rimueng

Keulhee seudong nyang that bisa

Han jeut teungku ji teungoh le

Pawang pike nyang seujahtra

Adak ku peulheuh ureung peut nyan

Nibak Tuhan raya pahla

Meunan leumah dalam hate

Marji lhom le taloe raya

Bue jimumat le bak taloe

Teungoh keudroe jikeulua

Lheuh nyan seudong deungon rimueng

Tinggai ureung mantong lam guha

Leupah ban lhee ka u darat

Nyang phon marit binatang kra

Raya gaseh teungku keu kamoe

Tuhan sidroe balah guna

Bagian 27

Di kamoe jan ek meubalah

Potallah cit nyang Kuasa

Kareuna nanggroe meuhat jeuoh

Na lheung tujoh gunong raya

Lheuh nyan rimueng teuma marit

Sibeuna bit tuto gata

Dilon teumpat dalam uteun

Peu jeut lon kheun sapeu hana

Hana sapeu na di sinoe

Na keu uroe singoh lusa

Lheuh nyan uleu peugah teumpat

Dilon jeuoh that dalam guha

Di sinoe peu ulon teubrie

Na keuh krie-krie dudoe teuma

Meunyoe na umue ngon raseuki

Potallah brie balah guna

Bukit neutem neujak bak kamoe

Balah seuen nyoe dum kuasa

Nyang guna nyoe cit meuikat

Seulama goh maot umue mantong na

Nyoe na saboh teungku neuingat

Guna manfaat teungku raja

Bukit neupateh narit kamoe

Ureung nyan sidroe beek neukeulua

Gob jeh pande nyan biek ureung

Bangsa kureung tan seutia

Barang gadum keubajikan

Jibalah han peu neusangka

Beuthat jibalah guna neuh nyan

Keujahatan meuhat cit na

Pawang pike salang binatang

Dum sibarang jipham bahsa

Han geudeungoe haba binatang

Ji lhom rijang taloe raya

Teuma Pande Meuh mumat bak taloe

Teungoh keudroe jikeulua

Oh sajan troh nyan u darat

Woe u teumpat maseng tangga

Padum lawet teuma dudoe

Teuka bue bak Pawang Rusa

Jimee boh kayee indah-indah

Han tom leumah taeu rupa

Meubagoe-bagoe jeuneh le that

Mameh lazat ta cie rasa

Leumak mameh hana peu kheun

Boh kayee uteun han tom ta rasa

Dua lhee seun ka ji intat

Rimueng lihat teungoh ji ba

Rimueng pih ka teuka malee

Pakrie dikee han sapeu na

Di bue ji jak geunap uroe

Hana padoe balah guna

Dilon ku ba peu keuh jinoe

Bah ku jak u nanggroe singoh sigra

Lheuh nyan rimueng jak u nanggroe

Ji peutoe bak anruk syeedaga

Jidrob aneuk ureung lakoe

Peukaian di asoe meuh suasa

Teuma jiba plueng u dalam uteun

Ji makeun aneuk syeedaga

Peukaian aneuk nyan that meubulak

Meuh ngon perak deuh meubahra

Jeuneh gleung gaki ngon gleung jaroe

Intan pudoe euncien meutia

Saboh-saboh mata euncien

Ureung gasien pih ek kaya

Bukit ta publoe saboh neukue

Lhee peut boh weue keubeue ek na

Bandum alat ji peusapat

Ji intat keu Pawang Rusa

Rimueng jiwoe dalam uteun

Pawang hireun sikutika

Pawang pike na sijameung

Teurjununen hate lam dada

Alat nyoe hana jeut leumah

Keunong fiteunah saboh masa

TAMAT

Bagian 28

Got keuh ku jak ubak sahbat

Ku yue biat jisom punca

Ka yue bicah saboh bagoe

Ta publoe ta tueng hareuga

Meunan leumah nyang ka peungeuh

Bak Pande Meuh ji jak sigra

Oh sare troh ubak Pande

Marji kheun le juru bahsa

Peukaian nyoe ulon publoe

Brie keu kamoe ban hareuga

Alat nyoe dum beu ta bicah

Beek leumah kamoe binasa

Pande sambot rijang-rijang

Pawang riwang woe u tangga

Pande Meuh hana got hate

Ji pike laen bicara

Peukaian nyoe ka ku tune

Pawang mee areuta syeedaga

Areuta aneuk syeedaga mate

Kaman bah le ku peuhaba

Bah le kaman ku meupayah

Ku jak peugah bak syeedaga

Keu kee jibrie areuta le that

Hate jih mangat di syeedaga

(Catatan : Hikayat ini belum tamat!!!- T.A. Sakti).

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s