SIDOM BAET

SIDOM BAET

Oleh: T.A Sakti

Assalamu’alaikom saleuem lon peu-et

Disyeb u Mugreb trok lungkiek gunong

Ca-e Bak Jambo apui beu-udep

Meungkayee hansep bah tatot runong

Paleng meut’iet-t’iet jikap lam Baet

Umpung jililet lingka bak bungong

Cit payah syen-syen bak peutheun saket

Geupiret -piret mangat bek keumong

Pat nyang sidom kab tagaro beutreb

Bisa lam Baet hanapepe tanyong

Citna peupatah ‘et saboh bayet :

“Sidom Baet sipat jikab lhee pat saket”

Ladom aneukmiet beureughek sulet

Jihoi Si Wahed teungoh cok reunong

Ji peugah Cicak teungoh meulet-let

Ladom Bonbon phet pura jok keu Ngon

Rakan ka dijak jidong meu-apet

Umpung lam Baet sinan meutamon

Gaki ka jikab laju ji cupet

Di Agam sulet jiplueng u Tunong

Pat saja mantong jiduek lam Baet

Umpung ban buket meuseumong-seumong

Peuelom musem khueng ujeuen tan siblet

Umpung lam Baet dileuen ban gunong

Umpung jih panyang meuliwet-liwet

Lagee Seunapet Seulawah Inong

Jan-jan jireuloh uleh Si Mayed

Hana padum treb lom-lom jiseumong

‘Oh musem ujeuen dileuen meulep-lep

Sayang lam Baet dum habeh bingong

Payah meungungsi mita  Cot -Buket

Barang meutrep-trep rayueng deungon Ngon

Umpeuen deungon boh jime u buket

Nyang saket syiret reumatik keumong

Cit lam seutia seunang deungon phet

Meunan lam Baet akai that keunong

Diyub Moh jidom dum sidom Baet

Mirah ban Pijet yub rumoh inong

Meung Rumoh Aceh  hanthat meupiret

Sayang leupah phet “Rumoh Beulangong”

Rumoh bak tanoh kajeuet peunyaket

Meunye lam Baet sinan meunawong

Peuelom ‘oh jikab that saket-saket

Garo beutreb-treb babah meungom-ngom!!

Na aneuk manyak umu goh lawet

Meuliwet-liwet jak baroh-tunong

Jiklik siat-at buet sidom ceupet

Leumbam meutiriep bak badan keumong

Kap saboh-saboh palak hana trep

Nyang leupah saket jikap meutamon

Peuelom di Cuda laloe meupetpet

Soe publa pih treb dang trok Nek Tunong

Jiklik kaseb gleuen di leuen Pang Mayed

Hoi Tabib Taleb bisa geujak H’ong

Lagee boh bajek keureutuet kulet

Keu suai saket hanapeue tanyong

Ka geutot suwa Ayahwa Mayed

Geulhiet peulilet pat-pat na Sidom

Habeh keurikeb tutong lam Baet

Sidumnan saket hate ceumeungom

Na cara laen use lam Baet

Hana that saket tan gadoh nyawong

Ngon bubok kupi tabu talilet

Pat jiduek Baet umpung meutamon

Deungon “seumaloe” bee bubok nyang phet

Jiweh lam Baet hanjan seun limong

Sampe dua thon sidumnan lawet

Trok lom lam Baet ‘oh gadoh meuhong

Meungka teuka lom bek sagai peutreb

Tabu bubok phet beuleubeh keunong

Meunyo watee phon seb deungon lhee blet

Jinoe bek peuseb meunggoh trok limong

Jiweh lom Sidom habeh kom phet-phet

Meuthon-thon lawet hanle jitamong

Rumoh ka sihat tanle peunyaket

Da tameurateb khusy’uk lam nyawong

Serambi Indonesia dilee di Baet

Haba gob peu-et baroh ngon tunong

Peuekeuh gampong nyan asai LAM BAET

Sidom that saket kab ureueng keumong(???)

Kireman : T.A. Sakti

Banda Aceh

Iklan

Satu pemikiran pada “SIDOM BAET

  1. Alhamdullah allah l0n puj0e.
    Mant0ng geutany0e umu geubrena.
    Keu tgk A.sakti ul0n d0akan.
    Beusehat badan tub0h angg0ta.

    Wate l0n baca hate that seunang.
    Ca’e di dren nyan cuk0p l0n suka.

    Alhamdulillah ulun ucapkan.
    Puj0 l0n tuan keu Allah y eusa.
    Krna na mant0ng sidr0e sastrawan.
    Le tem peu anyam seuni budaya.

    Dumna dum ureung d dalam nanggr0e.
    Hana padum dr0e peud0ng budaya.

    Budaya atjeh harus ta puj0e.
    Ata geutany0e pusaka bansa.
    Hate that girang l0n baca bun0e.
    D0a ul0n keu T.A SAKTI. .

    Wassalam

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s