Uram Peunyaket

Uram Peunyaket

 

Uram peunyaket bak  Panteue kalam

Ampuh Devayan nyang po calitra

Seunang lam  hate lon bri tanggapan

Cit beutoi meunan bak bantah hana

 

Lam Tambeh Tujoh karya Syekh Salam

Bahle lon reukam meudua banja

Karangan useueng jameun  saboh jan

Dalam hitongan dua abad ka

 

“Asai peunyaket beuna tapham

Makan minom han takira

Nah adak na tabri adat

Han meularat tuboh gata

 

Soehan tuwan jibri adat

Jeuet meularat le that bahya

Tabiat jikreueh beunak hate

Malee hanle na digata

 

Lom jeuet malaih ta ibadat

Meu’ah ’ah that pruet teuraya

Kut seb singoh habeh jinoe

Karam siuroe diareuta”

 

Bak masa jinoe neukalon taulan

Nyang saket badan rab rata rata

Tuha ngon muda hana bedaan

Mungken  makanan nyan asai punca

 

Peunyaket ganaih dumsoe ji lawan

Pangkat jabatan hana jiniet na

Dumho jirabe gampong ngon peukan

Tani neulayan gasien ngon kaya

 

Habeh areuta meujuta kuyan

Peu-ubat badan   mita sijahtra

Lheueh geujeb ubat sihat watee nyan

Habeh ubat nyan saket jigisa

 

Ladom Singapore jak kontrol badan

U Pulo Pinang  han ekle kira

Aceh ka gasien peunyaket kuran

Dinanggroe jiran ka kaya raya

 

Ubak peumimpin lon peu-ek peusan

Neu mita jalan beusigra-sigra

Pakon peunyaket jinoe le that ban

Jameun dilee tan pakon jinoe na

 

Keupada rakyat neubri siaran

Neu informasikan pat asai punca

Supaya rakyat bek sabe mumang

Uram  saket nyan geuraba-raba

 

Rame nyang peugah punca bala nyan

Dalam makanan racon meudoda

Meunan meurantam  dikamoe awam

Peuekeuh bit meunan lam tanda tanya(?)

 

Pade meuseumprot gule sayoran

Buah-buahan dum pestisida

Tanle makanan nyan tan racon nyan

Aleh sabab nyan peunyaket teuka(?)

 

Peumimpin bijak bertindak rijang

Bek jatoh korban  le rakyat papa

Bak jak meu-ubat dum meutang ilang

Tiep uroe peukan meuputa gisa

 

 

T.A. Sakti

Peminat sastra Aceh

 

 

 

Catatan :

– Panteue Budaya = “Uram Peunyaket”  Serambi, 21 September 2008

– Syekh Salam = Syekh Abdussalam bin Salem

alias Leube Muda bin Leube Polem

–  Kitab Tambeh Tujoh disusun tahun 1208 H,

isinya tujuh bab, dua bab diantaranya tentang

kesehatan dan fungsi-fungsi organ tubuh.

–  Tabri adat = ukuran dan waktu yang tetap

– – Kut = bekal/jatah

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s