Udep Lam Goga

UDEP LAM GOGA

Oleh : T.A. Sakti

Assalamu’alaikom dum rakan sahbat

Bacut lon surat rakyat lam nanggroe

Udep lam goga sabe meukarat

Lam geurasa brat dalam tiep uroe

Adak kiban kri yakin hareukat

Meugisa pusat teuhah keuripoe

Tapi geuhudep hansep ban hajat

Nyan punca sabab seunang hanatoe

Kon gara beu-o laloe ngon cakap

Dak meunan sikap citka kada droe

Punca jih Teungku laju lon surat

Barang meuh’ai that di Banda sinoe

Nyang duek di gampong hana that arat

Peuelom nyang jeumot na gule rampoe

Tapi keu kaya payah bak harap

Agen rame that nyang kaya dudoe

Barang le agen  yum jih meuh’ai that

Ureueng meularat dum pala-paloe

Pueu saja tabloe yum jih meuningkat

Diphon pisang klat trok bak ram pagoe

Yum breueh pih ji ek yum saka meulipat

Ka putoh ‘cawat’ peugawe nanggroe

Kumisi agen tiep simpang empat

Yum ka meulipat trok bak geutanyoe

Barang di Banda tamong ret Langkat

Bileueng hai sahbat agen padum droe

Boh manok saboh boh kol nyang bulat

Yum jih meulipat di Banda sinoe

Di ureueng meugoe bahthat cit arat

Saba raya that akan nasib droe

Ka nibak meubloe hana geukarat

Peureulee ubat na dilingka droe

Peuelom yum pade kadang meuningkat

Nilam pisang brat meunan cit bagoe

Nyang jeumot-jeumot hana susah that

Lampoh geusambat laen bak meugoe

Bandum geutanyoe patot ta himat

Bek that takarat nibak jak meubloe

Dak jeb ie kupi baroekon lhee pat

Jinoe hai sahbat tacawo keudroe

Peukawen aneuk  leupah meukarat

‘Ohtroh nibak had tan bak se tanyoe

Sabab jeulamee meueh 24 karat

Yum jih leupah brat mumang geutanyoe

Peuelom keurija “walimah” adat

Leumo peutoh pusat han ekle tabloe

Lom ngon reuen-mareuen peukateuen rakyat

Sikada adat ban reusam nanggroe

Aneuk meusikula ureueng syik arat

Beulanja that brat mumang ayah droe

Ngon wang SPP sewa kost meuningkat

Buku ngon kitab meuhai bak tabloe

Aneuk kuliah di kota teumpat

Beulanja arat lam meuso-gamoe

Peue lom ureueng syik kureung hareukat

Teuntee arat that aneuk di ranto

Bukonle sayang syeedara sahbat

Nyang hana ingat keu ureueng syik droe

Bak jak kuliah tiep uroe teulat

Laloe piep asap membaca han toe

Allahu Rabbon tulong bek lambat

Sayang  susah that  rakyat lam nanggroe

Udep lam phang-phoe hek geuhareukat

Barang meuhai that di Banda sinoe

Kireman : T.A. Sakti

Banda Aceh

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s