Simantong – Tiyong

Simatong- Tiyong

Oleh:  T.A. Sakti

Keureupuk Mulieng nyangle di Pidie

Asai jiputie ‘ohtrok u Medan

Simatong ngon Lhong seureuta Luntie

Eumpeuen jisimie buah-buahan

Jinoe ka langka han glah eumpeuen M’ie

Ka umpama Tie  langka lam jeundrang

Dilee watee jai Lhong deungon Luntie

Langsat Nek Pidie habeh jikuran

Boh Rambot Mamplam masam ngon geunyie

Hansep keu Luntie ‘oh watee malam

‘Oh taboeh Pakpak ngon Reughak teusie

Di Lhong ngon Luntie ji padoli tan

Su Lhong ji meukap di malam leupie

Meuseunoh putie Tufah boh Kumbang

Simalam beungoh karu meukrie-krie

Ban saboh Pidie tadeungo kiyam

Teuma Simatong beephong ngon beekhie

Umpung dirundie lam pucok pisang

On pisang geushot boeh Apam Pidie

Meuasap bu-ie jih ji teureubang

‘Oh meughreb jipo seso unun-wie

Brabru ji teubiet lam pucok pisang

Jibapo Pijet jikandet blah wie

Pat-pat jiputie rhotle disinan

Lam pucok pisang ceh aneuk teublie

Rhot dicokle M’ie ji timang-timang

Ji peugrob-peugrob jiklik meukrie-krie

‘Oh kahek jisie jeuet keu makanan

Keu ubat Seunak cok hate Luntie

Kheun Tabib Lanie gampong Beulawan

Teuma nyang ladom peugah boh punyie

Nyang leupie-leupie nacit nyang peusan

U dalam rumoh ji tamong meus’ie

Simatong bee khie Pijet ba sajan

Jikilek tajam ‘oh tapoh tratrie

Nyang nacit ta-tie keunong sigo tan

Ka geudhotle Yah hai Agam jawie

Bek poh ngon Sulie ngon Rujee katran

Ka beungeh Poma geusyarot kha-khie

Wab kanot peuet ndie ka beukah lapan

Sep ohnoe dilee kisah Simatong

Peugah keu Tiyong langka lam nanggroe

Peuelom po Bayeuen lam uteuen nibong

Tinggai nan gampong-jalan geulantoe

Di Kampus Darussalam na saboh jurong

Nan jalan Bayeuen Inong Balee toe

Si cicem Bayeuen pakri ban untong

Gob peugah bak lon bandum habeh bhoe

Dalam hikayat kayem geusinggong

Raja ngon Bayeuen sang aduen-adoe

Bijak seutia bala ji arong

Deumi jitulong Raja ngon Putroe

Rupa di Bayeuen cit cicem burong

Rayek ban Tiyong bulee le bagoe

Di Rumoh Teungoh Meulaboh Beutong

Geupeugah bak  lonle ureueng sidroe

Bayeuen mantong na kheunle Kuk Sarong

Sinoe gampong lon nanjih geugantoe

Nan Tiyong Batee umpung cong rambong

Awak drop rawon rame nyang tem bloe

Haba meugisa keu cicem Tiyong

Peulara sithon ka leupah ragoe

Jeuet peugah haba : “Assalamu’alaikom!!”

‘Oh tahoi “Sarong” laju ji meuproe

Jeuet jikeumalon lhoh nasib untong

Nyang gadoh pawon nyang gadoh lakoe

Meunan meusyuhu turon-teumuron

Teuma diulon hantom eu keudroe

Jameunkon langka dicicem Tiyong

Jinoe rakanlon hanpeue hareutoe

Mungken dalam gle tanle lam gampong

Peulara Tiyong mantong sidroe-sidroe

Rupa that indah po cicem Tiyong

Teuma ngon bakong hanjeuet sagai toe

Jameun na saboh Tiyong di Mi lon

Ji pajoh bakong mate teupipoe

Di Keumala Dalam yoh raja Aceh meugampong

Peulara Tiyong leupah that ragoe

Dicokle Musang hanasoe tulong

Bantu meu-ong-ong dihoi “Cuk Nyak” droe

Kireman : T.A. Sakti

Banda Aceh

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s