Sabang Lon Sayang – nasib pelabuhan bebas Sabang

Sabang Lon Sayang

Oleh:  T.A. Sakti

Sabang lon sayang malang bukonle

Seudeh lam hate jeuet  bak  meucuca

Na Undang-Undang hana meusampe

Sabab tan PP ngon peulaksana

Peraturan Pemerintah geusingkat PP

Padum go Pade geupreh tan teuka

Undang-Undang Lheetujoh sabe lam caye

Saka lam PP deungon wot hana

Kawasan Perdagangan Bebas tan jadeh hase

Pelabuhan Free Port tinggai meunghaba

Harapan rayek lam lhok meugule

Dum calon Toke meublek-blek mata

Karab  siploh thon Sabang lam yang-ye

Meusaboh cupe hase tan teuka

Keu import-eksport peuelom tapike

Kapai RRC – Jeupang tan teuka

Jinoe teuka lom haba nyang singke

Dalam SERAMBI na ulon baca

Haba makeusud bacut lon ca-e

Meng jadeh hase  “Sabang”  binasa

Lam RUU-KEK meucunggek tangke

Na pasai bakhe Sabang  jihila

Pasai peuetploh limong ancaman mate

Asoe geutafse ayat sa-dua( 1- 2 )

DPR RI teungoh peu-ase

Sideh Peutawi kota Jakarta

Teungoh meupakat deubat peureute

Meng jadeh hase “Sabang”  hanle na

Illa pasai nyan geucabot sare

Yoh goh sah-hase program negara

Uleh seubab nyan rakan boh hate

Do’a bek pre-pre lakee sijahtra

Meunye cit Sabang jadeh lom “ mate”

Buet nyang teukeuse na dua go ka

Thon lapanplohan phon keunong rante

Asai ngon hase cit hana bida

Yohnyan pih Sabang tan soebri PP

Undang-Undang caye hana meuguna

Thon lapan limong nyawong teubietle

Sabang pih   “mate” kali pertama

Watee taingat tapike-pike

Ek sampe hate lam buet meucuca

‘Oh kalheueh geubri pakon geucungke

Ban laku pi-e ureueng meuseunda

Aneukmiet jimoe pisang geujokle

‘Oh ji-iem sare  geurungkhom teuma

Sayang aneuk cut maksud tan sampe

Do’a lam hate beuikhlas Poma

Alhamdulillah do’a sang hase

Dalam SERAMBI lom-lom lon baca

Ultimatum Wapres tegas  bukonle

Seminggu beuhase PP ubena

Nibak RUU-KEK  beuawai “sipade”

Watee hanale jeuet tunda-tunda

Geutanyoe rakyat han ek tapike

Bak Rabbol Kade talakee do’a

Peumimpin Aceh beusaboh hate

Rakyat neu rabe makmu sijahtra

Aman ngon dame di kota dan gle

Sabang bek “mate”  beumaju jaya!!!

Catatan : Sumber : Harian Serambi Indonesia tgl. Kamis, 28 Mei 2009 halaman 1 – 11, dan Selasa, 9 Juni 2009 halaman 1 – 11.

# RUU-KEK = Rancangan Undang-undang Kawasan Ekonomi Khusus.

# PP = Peraturan Pemerintah. RRC = Republik Rakyat Cina.

# Undang-undang Lheetujoh = UU No. 37 Tahun 2000.

Kireman : T.A. Sakti

Banda Aceh

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s