Musem Khueng

Musem Khueng

Oleh:  T.A. Sakti

Alhamdulillah rahmat hantom lheueng

Bahthat musem khueng mantong sijahtra

Ujeuen tan jitoh leubeh  sibuleuen

Ie mon deungon krueng karab tho mata

Aleh peue sabab kon lagee jameun

Musem khueng – ujeuen meuato hana

Peudoman “Keuneunong” jameun geubileueng

Ujeuen deungon khueng sinan geutanda

Bak musem tujoh Asee meukhung-khung

Musem sikureueng baro khueng teuka

Jinoe keuneunong ka rusak bandum

Watee tabileueng hanpaih cuaca

Sabab bak kayee di dalam uteuen

Kabeh lam baluem konglomerat kaya

Nayankeuh  phon sabab rame gob kheun-kheun

Seuhingga ujeuen jareueng jiteuka

Laen nibak nyan ilmuwan nyang kheun

Donya ka seu-uem mata uroe panca

Na lobang ozon bak  “awan”  ruhung

Meutamah lom dum wab rumoh kaca

Musem EI Nino donya lam h’amh’um

Bak tanyoe seu-uem nanggroe gob ie raya

Cit sidroe Allah nyang teupeue mandum

Hamba nyoe teujunun hana kuasa

Bak tanyoe awam tathee ‘oh meunyum

Oh wate seu-eum apoh-apah  jra

Ujeuen tan jitoh meubuleuen-buleuen

Ta rasa seu-uem beukah ulee Buya

Nyang meu-’ue lam blang Luho han ek theun

Sabab tho reukueng leumoh anggoeta

Dakna geujeb ie, reuoh ban ie krueng

Ka tinggai tuleueng reugeh tan daya

Nyang beut di kanto pih lagee madeueng

Reuoh taloe rhueng jitron seutot pha

Nyang buet meupande hana peue  takheun

Ngon musem seu-uem apui pih siya

Nyang buet di rumoh meunyo watee khueng

Reuoh meujreuen-jreuen bak keueng ngon mata

Bak buet rah ija atawa maguen

Cit hana kureueng seu-uem meutaga

‘Oh watee malam sang tagrob lam Krueng

Hugob ngon  seu-uem luar biasa

Sayang aneuk cut ka jimoe ngon gleuen

Cit han ek jitheun rubuekh lagoina

Rumoh di gampong binteh na reuhung

Angen meutaleum rahmat tarasa

Nyang rumoh batee  binteh tan ruweueng

Angen teungoh plueng sinan meusangga

Angen tan jilop meukurong seu-uem

Aloh-alah dum troh malam jula

Teugeuet han jitem reuoh taloe rhueng

Kipah dum keng-keueng  “tot jagong”  muda

Pula tanaman meurana mandum

Sabab tan ujeuen musem khueng raya

Pade dalam blang rayek jih meutheun

Sabab ie lam lueng hansep beurata

Kayem tadeungo bak masa jameun

Ureueng meuglueng-glueng pasai lhop Daka

Bak meusunoh ie lam blang musem khueng

Kon hanya meuglueng nyang meutak pihna

Nyang pula kacang Reuteuk deungon Trueng

Meunyo musem khueng brat that usaha

Bawang ngon Campli sibu bek kureung

Hase ‘oh jeuet tueng hana padumna

Di nanggroe Riau bala gara khueng

Ka tutong uteuen meuribee hekta ®

Apui jilumpat u wie ngon unun

Meubuleuen-buleuen han ekle publa

Asap ka jipo rab rata ruweung

Phon dalam uteuen trok kota-kota

Nanggroe ka seupot meusagop bandum

Naf’ah  meukeumeureueng ngon bilaih mata

Dum alat canggeh hase hanpat tueng

Geupeugot ujeuen sititek han teuka

Jinoe bak Allah dum lakee ujeuen

Hana  uroe lheueng Semayang Istisqa’

Allah bri rahmat sagai tan leu-eueng

Beurijang ujeuen jinoe jiteuka

Mudah-mudahan do’a bekna lheueng

Gadoh musem khueng ujeuen troh teuka!!!

Amiinnn…., Ya Allah Po Nyang kuasa!

Kireman : T.A. Sakti

Banda Aceh

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s