Denden Meutak-Tham

Denden Meutak-Tham

Oleh : T.A. Sakti

Allahu rabbon illahon ahad

Bandum latbatat Tuhan nyang peuna

Denden Toptupong meujungkat-jungkat

Jidong barangpat sabe yok-yok pha

Si Denden Batak layak that batat

Laen geulakap di Aceh Raya

Nan Denden Rimueng sabab kureng brat

Jumlah jareueng that hana padumna

Denden Atot Trieng raya ngon hibat

Juah rupa that ngon seso mata

Bak Denden Rimueng jareueng leubeh that

Sibuleuen sipat meurumpok hana

Di Denden Sutra haloh leupah that

Kayem dihinggap bak mon-mon tuha

Denden biasa kureng ngon cuklat

Dijih meuteumpat lam naleueng sira

Cok pureh iboeh bak jaroe jimat

Peugot pak bulat leuen rumoh jiba

Jijak theun Denden le sinyak Amat

Watee meukeumat jikhem meubura

Umpung rambideuen jareng peurangkap

Mita beurang pat meulahoih muka

Nacit ngon jaroe bak iku jimat

Oh watee jikap ji peulheueh sigra

Biek Denden pageue cit nyang rame that

Jidong tiep tingkat pageue ngon unja

Kuneng ngen mirah nacit nyang cuklat

Bah that si-iet that sulet meutaga

Watee toe jaroe jipo meuasap

Riwang u teumpat ‘ohlheueh nyan teuma

Aneukmiet nyang drop gigoe meutap-tap

Reuoh sigo brat bak dhoe ngon mata

Jan seupot uroe mirah rot barat

Seu-uem hana that reudok bacut na

Po Denden pageue seu-u ji that-that

Lam blang rame that leuen rumoh pihna

Ji likak-likak sang meu’en silat

Jimeutak tangkap silek jurus sa

Meu’en Meutak-tham nan ladom teumpat

Bak ulon meuhat Meutak Galah nama

Jipo meulayang meunghambat-hambat

Lambong hana that sikurunyong na

Watee tatapih jikilek leugat

Utoh jilumpat tangkas lagoina

Aneuk miet cut-cut hate seunang that

Oh seupot meuhat bak meu-‘en kana

Jak tapih denden di leuen rot barat

Dang preh sahabat meu-’en petpetka

Sira drop Denden jikheun riwayat

Sya-e aneukmiet pusaka Maja :

“Denden pula pisang

Bangbang pula pade

Rangkasoe tan  Semayang

Teuntee rijang gobnyan mate!”

Nibak jameun nyoe hai rakan sahbat

Denden rata pat tiep jeuneh langka

Got Denden ubit, Atot Trieng batat

Meunancit Batak ngon Denden sutra

Theun kawe Denden hantom talihat

Aneukmiet pakat sabe syeedara

Drop Denden ubit ngon taloe ikat

Bak kayee sambat di leuen meudoda

Taloe ji dh’ot-dh’ot timu ngon barat

Jimita pat-pat Denden nyang raya

Jan na Atot Trieng sigra jilumpat

Eumpeuen jitangkap jbapo sigra

Aneukmiet reungkhom ji teugom jimat

Nyang kayem that-that ji teumei hana

Denden batat po keudeh u Arab

Eumpeuen ka jikap siblah ka buta

Buet aneukmiet nyan jinoe tan sapat

Denden langka that rab bandum pahna

Po Denden Pageue rame meupat-pat

Atot Trieng meuhat hana sapat na

Kireman : T.A. Sakti

Banda Aceh

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s