Daruet Kleng -Kisah tangkap Jengkerik jelang pagi!

Daruet Kleng

Oleh: T.A. Sakti

Alhamdulillah kisah rab mireng

Kajeuet lhom tabeng eh di Seuramoe

Jinoe hikayat peugah Daruet Kleng

Deungon Peureuleng nyang su meuhumoe

Cicem Peureuleng jih hitam galeng

Jidong meujandreng dheun Jeumpa sagoe

Pajoh boh Jeumpa sira meukhem-khem

Riyoh Peureuleng sang geunta nanggroe

Karu aneukmiet geudhotle Polem

“Lagee Peureuleng kr’a-kr’ie silagoe!!”

Cong Pineung mate eumpung Peureuleng

Ulat dicong Rheng eumpuen jipuwoe

Leupah lom gura kisah Daruet Kleng

Rab maseng-maseng cit naroh tanyoe

Masa ubit-ubit meukeubeng-keubeng

Jak luem Daruet Kleng tan manoe-manoe

Sabab itam t’ot geukheun Daruet Kleng

Udep dalam blang umpung lam bumoe

Eumpeun on Sumpueng kadang on Lapeng

Jan ulee puseng Campli ji eumpoe

Seuboh ngon seupot meusu Daruet Kleng

Sit leupah meujen ji meupeurangoe

Aneumiet cut-cut ji salob Tabeng

Bra-bru dum jitren ngon cula-caloe

Lam reuneum Seuboh dijak meu-ireng

Umong U Gadeng keunan ka sampoe

Ka jibagi droe wie-unun-sampeng

Tapak jigiseng bek geunta bumoe

Ji kunok-kunok meukh’ok Trieng teugeng

Cit hanjeuet khem-khem, hana jeuet moe-moe!!

Meungbacut karu meusu gon teukhem

Laju Daruet Kleng ji peuseungab droe

Jiluem jitakat pat su Daruet Kleng

Trok u geunireng jigom ngon jaroe

Karoeh lam jakhoeb Sinyak Koeb Teubeng

Jidrob Daruet Kleng jikhem ngon tuloe

Mita peurincot gege geunireng

Meusu Daruet Kleng laju peukha droe

Oh tatiek lawan laju jibanteng

Talo si Bireng meunang si Usoe

Jicok nyang talo jipuseng-puseng

Loet oek keuriteng geunantoe taloe

Ladom oh mumang meukap lom jitem

Kadang lom teugeng nacit meunang  roe

Han sanggop peugah kisah Daruet Kleng

Tujoh keulileng meumacam bagoe

Meumada bacut bek putoh-geunteng

Laen hai Dalem cit meuphom  keudroe

Miseue tuwo beuet badan meuluteng

Dok drob Daruet Kleng u rumoh tanwoe

Geuseutotle Yah geuba  Trieng ranteng

Geucok Daruet Kleng seumpom  lam duroe

Citle that gadoeh pasai Daruet Kleng

Geutanyoe maseng ka rasa keudroe

Ta peugah jinoe aneukmiet jikhem

Turi Daruet Kleng tanle meusidroe!!!

Kireman : T.A. Sakti

Banda Aceh

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s