Abo Lam Paya – Kisah binatang langka

Abo Lam Paya

Oleh : T.A. Sakti

“Kruep meukutuep-Bace meukeute

Abo hoi sare yub sange raya!!”

Dalam hikayat kayem geusya-e

Watee ka hase hidang keu raja

Jinoe di Abo lam paya tanle

Hansoe mitale ‘oh khueng jiteuka

Jameun watee khueng riyoh bukonle

Ureueng hoi sare Abo geumita

Geubloh lam paya Paruek ka hase

Parang tan tangke nyang cumeh mata

Pat-pat na meukr’eh laju geucungke

Geuhue geurabe ban saboh paya

Jan peunoh Paruek teungoh bak pante

Geupuwoe hase u rumoh tangga

Di Cutda Isah ho laen pike

Di Cupo Bate laen keunira

Ureueng ek pajoh cungke peuhase

Ka geutaguenle geupeh ngon lada

Mangat nibak sie Rusa gle Tangse

“Abo hoi sare yub Sange raya!!”

Nyang saket ki-ieng Beusee meu-uke

Puleh lajule mustajab raya

Meunan geupeugahle Cupo Bate

Gobnyan kahase puleh tuleueng pha

Nyang han ek pajoh bacut tasya-e

Abo geucungke ngon sikin tuha

Jok aneuk Itek tiep beungoh tan pre

Ub-ub rayekle puleh capiek pha

Abo lam paya mungken hanale

Wab seumprot pade ile lam paya

Jinoe ka teuka Abo nyang bakhe

Ji pajoh pade kuneng wareuna

Nan Keyong emas indah bukonle

Akai ban kaphe awak Beulanda

Meunyo katok had lam blang jirabe

Bak bijeh pade phon-phon jiseuba

Lheueh nyan peunula jireupang sabe

Pucok hanjanle meugeuneh muda

Uroe ji meusom lam luhop caye

Malam meurabe trok beungoh teuka

Seupot takalon ijo jroh pade

Beungoh hanale ka Abo cuca

Si Abo kuneng payah that mate

Seumprot han hase ngon pestisida

Ladom geujak kueb geucok geurabe

Ladom geukawe ngon  on putek muda

Abeh nyang rayek saruek ka ban gle

Boh ceh lajule aneuk meuganda

‘Oh lheueh keumukoh ie umong tanle

Abo kuneng han mate lam tanoh tapa

Jan taceumatok pula Pik-Jahe

Khap-khip keunongle ka beukah dua

Pajan meu-ie blang niet pula pade

Ka ji beudoihle Abo lam tapa

Meungkabeh akai lawan han ekle

Bak Rabbol Kade tanyoe meudo’a

Kireman : T.A. Sakti

Banda Aceh

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s