Tambeh Tujoh Blaih

– 81 –

Totup leusong pihana got
Asee lenglot di geunireng
Adat tayue manyum eumpang
Iboih pikrang miseue ranteng

Karoh tabloe iboih gajah
Jaroe teumirah han-ek tagileng
Adat tayue gumpoi sutra
Hanjeuet lon puta pakri lon sareng

Hanjeuet lon mat meunggo sampoe
Hana laloe lam meutunggeng
Adat tayue ramah santan
Iniem pitan nangon sareng

Ulon ku-u pimeuthot-thot
Jaroe han got meupaleng-paleng
Adat tayue peu-ek tayeuen
Rhot dirinyeuen gigoe teuhing

Rinyeun bulat meubalek-balek
Pueh that ta-ek palang-paleng
Bukit tayue jak seumula
Man got banja surang sareng

Teuma lintah pilon takot
Pakri ngon seuluet hitam galeng
Badan jih seulot hana tara
Habeh ija teumeuluteng         – 82 –

Ateueng leumiek pakri ngon gla
Silap mata reubah meupunggeng
Adat tayue beuet hate beunak
Soe me Sinyak soe seumareng

Soe taguen Bu mita dujee
Han meuteumei sikrak ranteng
Soejak madee soe top pade
Tacuba pike nyan tabandeng

Soe srah ija teumpe sinyak
Tduek tajak hansoe ireng
Rab hansoe jok jeuoh hansoe jak
Bitpi tapak banpha gateng

Bak tayue beuet lethat dawa
Su cut-raya miseue su weng
Nyang han sagai jimeudawa
bak leueng tingka ngon lheue kareng

Utoh jihthat bak peulheueh droe
Ureueng binoe miseue bunteng
Miseue bidok lheueh lam bakat
Riyeuek raya that pihan meutunggeng

– 83 –

Adat tayue jiku u brok
Jak hoi Datok jih u Teubeng
Kahoi Maja di Me Geumbak
Kayue geujak ngon Nek ireng

Kayui neujak keunoe rijang
Kahoi Nek blang badan leunteng
Dilon hanjeuet ulon ku-u
Gla keunuku palang paleng

Tayue prah u maken meugriet
Asee keumiet di geunireng
Peuneurah brok bajoe beukah
Ngon jisok klah sirong geunteng

Adat tayue ji keumurui
Saket takue jikheun meugilieng
Saket sapai hanjeuet lon mat
Angen han mangat sirong geunteng

Adat tayue jipot pade
Jikheun hanle kagadoh Kleng
Pade muda Kleng hanale
Saket hate kuthat gigeng

Kuala Batee peukan keuranji
Geukheun le tari inong Lhok Bugeng
Citgot bahsa meungna peue bri
Hansoe turi beuthat aneuk Kleng        – 84 –

Kuala Utue that meuganong
Pulo Bungong uteuen lapeng
Jeuheut nyang lisek got nyang bingong
Ban nyang keunong han jipaleng

Bukon utoh inong samaly
Ji rhat suri ngon beuneng Kleng
Keupeue got rupa meunghan got beugi
Gotkeu tabri keu eumpeuen anjeng

Jak u peukan bloe ie nipah
Puwoe keubah bak ulee sandeng
Meungnyo inong nyang kreuh babah
Kayem meubantah sabab that gigeng

Sikrak ija sanam Banggala
Sikrak ija lhap sanam Kleng
Inong putik agam tuha
Laen bicara maseng-maseng

Hijo-hijo sanam Beunggala
Hancit ek-sa ngon sanam Kleng
Sijeuheuet-jeuheuet ureueng muda
Kulet meucahya hancit na kreng
– 85 –

Cicem peureuleng mirah mata
Laen rata hitam galeng
Meunghan sabe agam ngon dara
Hankeu reuda ji meudeungkeng

Pucok krueng Baro gampong Keumala
Iku jiteuma pasi Lhok Gadeng
Meungta pateh haba peusuna
Aneuk ngon Ma pijeuet sang seng

Binatang nyang tan dawun teulinga
Aneuk hantom na beurang jan bunteng
Narit mufakat hanmei tapaleng

Papeuen seutang taroek keu peutoe
Labang peuet sagoe beugot tapateng
Sabda Nabi meungtatem pakoe
Pito keudroe teusuet ganceng

Bidok Aceh tamong kuala
Riyeuek timpa reuloh reubeng
Meungta pateh narit peurbula
Buket raya pijeuet keu leubeng
– 86 –

Langet tujoh bandum meugisa
Cakrawala hantom meugiseng
Barang peue takheun jeuet keudawa
Takheun dipara jikheun disandeng

Adat tapeugah saket mata
Jijak mita geutah buga Kleng
Bitpi ta eue badan raya
Akai bicara tanbe leubeng

Adat takheun tan bahgia
Keudroe takira maseng maseng
Ngon jiseuot pi meudhot-dhot
Buettan gob peue gata biseng

Reumbang salah pi jidakwa
Ohta tampa meuheng-meuheng
Hanjeuet sikrak ta meututo
Beurang kaho jijak sareng

Adat tacarot kajeuet gabra
Ta teumei bungka u Nanggroe Kleng
Pakon jeungkat roe that gata
Hana reuda gob tarubeng

Adat han taduek jak tabungka
Aneuk taba di geunireng
Ulon teubek gata pilot
Lon ureueng got kon aneuk Kleng

– 87 –

Adat takheun inong paleh
Patka habeh areuta kutunggeng
Patka umong ku peugala
Siri paya ka kupeukreng

Bek that narit teuangka-angka
Hana taba keunoe saboh Kleng
Ditanyoe bacut dijih gabra
Su piraya miseue  suleng

Pakon droe neukheun keukee paleh
Hana habeh saboh kareng
Geunap uroe hate sosah
Maken meutamah hate gigeng

Meunankeu inong nyangle jinoe
Got disinoe got Nanggroe Kleng
Nyankeu aneuk pike beutroh
Nibak putoh bahle geunteng

Nibak tajak sagai Nanggroe
Got ta-iem droe bekta sareng
Beuthat jikheun beurang kapeue
Beuthat rabuetue taniet putoh Kleng

Meungka jitem peulara aneuk
Guroe minyeuk bah jitunggeng
Meungna howoe bekthat sosah
Taniet Binasah tameh bak bugeng        – 88 –

Meungka najeuet ta seumbahyang
Beuthat meunguncang meungbek meutunggeng
Meunankeu mise ureueng binoe
Adat disinoe pageue buga Kleng

Meujeuet bacut ta meusilee
Aneuk panghulee beugot tabandeng
Haba kunyoe keu ibarat
Beuta ingat maseng-maseng

Han-ek meuteumeung nyanggot bahsa
Nibak buta bahle juleng
Meunghan meuteumeung eungkot raya
Meumada ngon ulee kareng

Sitka dilee ulonteu mita
Di Keumala troh u Teubeng
Meunghan meuteumeung kameng gasi
Jeuet bubiri nyanpi dageng

Meunankeu bandum sagai Nanggroe
Di Janthoe sampe  Nanggroe Kleng
Hana sapat kureung leubeh
Hanpeue aleh miseue daceng

Hanpeue kira hanpeue sipat
Hanpeue sukat hanpeue sareng
Sigala donya sit mufakat
Han siurat na meusureng
– 89 –

Banja seunang sang inca blat
Saboh sipat miseue daceng
Kon cit-raya miseue pukat
Meule babat maseng-maseng

Khaba Nabi wajeb taingat
Kheun sahabat hareum tapaleng
Ureueng ‘Alem that teumakot
Ureueng meurebot su meudeungkeng

Suroh guree wajeb taikot
Nangmbah carot hareum tasareng
Nyang ureueng binoe kalon peugah
paleh tuah maseng-maseng

Di ureueng lakoe pile bantah
Narit nangmbah piji sareng
Adat tayue jak u keumala
Keudah lanja jijak u Teubeng

Adat tayue jalan hareukat
Tayue meupakat jijak meujareng
Barang peue buet hana mufakat
Tayue seumurat jijak bloe kareng

Bukit tayue  u Me Geumbak
Keudeh meureumpok u Me Punggeng
Tayue jijak u Malaka
Keudeh jibungka u Nanggroe Kleng         – 90 –

Tayue ublang jijak meugoe
Ugampong jiwoe jijak meuweng
……… ( ada halaman yang hilang ?)
Meunankeu aneuk beurang kasoe
Aneuk geutanyoe got aneuk Kleng

Nibak ramfak maken reugeh
Hate peudeh dawok gigeng
Aneuk ngon Mbah nyan jimuprang
Beuthat teuboih blang timoh bugeng

Nyankeu rayek tanda kiamat
Raja ngon rakyat maseng-maseng
Meung asai jeuet nyan jimuprang
Beuthat teuboih  Blang tan dibandeng

Rakyat habeh deuek sigala Be
Siamaih pade sikhan gateng
Ureueng binoe jimoge breueh
Nyang that weueh jimeukat kareng

Nyangka zameuen hanton meunoe
Ureueng binoe puntang panteng
Jitron u peukan hana reuda
Nyang muda-muda habeh bunteng

Peutuwa Nanggroe nyang that salah
Han jiteugah maseng-maseng
Ta eue jijak dalam peukan
Teulhon badan gob keureuleng

– 91 –

Ulee teuhah mom diluwa
Ngon ija pih surang sareng
geunap buleuen teula geumpa
Khueng han reuda blang habeh kreng

Laila haillallah
Habeh kisah nyang lagee nyoe
Tambeh sikureueng nyoe lon seubut
Lonboh bacut peurintah manoe

Kareuna lazem ateueh beurangri
Keuluar mani wajeb manoe
Got meuteumeng dua khatan
Got ihtilam ta meulumpoe

Nyang ikhtilam hase janabat
Junub meuhat lakoe binoe
Ohka meuteumeung dua khatan
Inzal pihan wajeb manoe

Atawa meungka teubiet mani
Meuseuki tauli deungon jaroe
Atawa lazat ngon pandangan
Teupeh pitan ile keudroe

Salah saboh nibak beurangri
Ohka hase wajeb manoe
Manoe junub bekta syen-syen
Meungka kawen meuhat manoe         – 92 –

Seupeurti ban panton Aceh
Lafai sareh makna meunoe
Menyoe galak teukeulilen
Bek tasyen- syen tacok unoe

Meungnyo galak  ta meukawen
Bek tasyen-syen tajak manoe
Meungnyo galak ta meuseunda
Bekta kira luka  asoe

Meungnyo galak taeh dua
Bek syen gata keumeunanoe
Meungnyo galak ta hareukat
Pileh teumpat nyang bek rugoe

Ohka hase junub janabat
Beudohleugat tajak manoe
Musem timu ta meupakat
Musem barat jeuet tapubloe

Manoe junub hanmei lambat
Bek preh teubiet mata urue
Ureueng han manoe ngolon kheunkri
Meunoe Nabi neu hareutoe

‘Azeueb pithat diakhirat
Peue jeuet mangat yoh disinoe
Calitra Aban aneuk ‘Abdullah
Ngolon peugah he aneuk droe
– 93 –

Masa Basyar aneuk Marwan
Yoh masa nyan meujak kamoe
Mume manyet nyan u jeurat
Leumah meulihat saboh bagoe

Rupa mise saboh kucing
Hitam kureng hibat hansoe
Mata pihu ngon mirah that
Jingieng meuhat ateueh kamoe

Meupeu keujot han jitem plueng
Sit jipandang ateueh kamoe
Ngon tanoh cak ulon tagu
Maken jikunue kaji iem droe

Lheueh nyan teuma meukueh uruek
Kamoe tamuek dua lhee droe
Meukalon jih kalom keunan
Meupoh ngon lham piji iem droe

Teuma mufakat kamoe  sare
Bahle mate kaman mie nyoe
Bah tatanom beuthat mate
Bit tapike hantom meunoe

Lheueh meutanom ureueng mate
Meudeungole saboh bunyoe
Meudeungole mie mamoh tuleueng
Habeh meuplueng bandum kamoe         – 94 –

Apa manyet teuma sudi
Bak isteuri tanyong hareutoe
Beuhabeh tepeugah keulakuan
Pakon meunan kumuen kunyoe

Pakon tuleueng jih mie mamoh
Peue salah toh peugah jinoe
Teuma jiseuot uleh isteuri
Malas mandi beu-o manoe

Sit hanatom manoe junub
Nyan bube buet syeksa jinoe
Nyoe sidroe treuet ngolon peugah
Sidroe Syiah jeumot manoe

Nyan jimeunan Syiah Karnaini
Keu rabbi taqwa hansoe
Bak simalam grak hadlarat
Janabat teuka bak asoe

Lhee ploh tampai ija dibadan
Laen nibak nyan hana sapeue
Teuma neu teubit u krueng dajlah
Sijuek nyum beukah tuleueng ngon asoe

Meunyum keubah ulonteu manoe
Singoh keubah olonteu manoe
Kareuna sabab ie krueng sijuek that
Jeuet meudharat keunong asoe

– 95 –

Lheueh nyan teuma teuka pike
Meukap bibi neu ganceng gigoe
Neugrob lam ie neupet mata
Ngon ija-ija nyang bak asoe

Kakeu basah ija dibadan
Laen pitan ngon neugantoe
Ija basah troh sibulan
Sijuek badan sang geutampoe

Kata siteungoh miseu puree
Nyan lagee sabab neumanoe
Gaki jaroe hingga muka
Meunan rata jeueb jeueb asoe

Dua blah thon hana jinoh
Seupot beungoh lam neurhah droe
Neu peubaro Wudluek sunat
Neu peu’adat geunap uroe

Adat peureudlee hanpeue peugah
Beuthat meudarah luka asoe
Kata siteungoh saket mata
Jeuet binasa bak neumanoe

Teuka Tabib jak peu-ubat
Areuta lethat neu meurugoe
Bukit takeumeung lon peu-ubat
Neu-eh teupat nyan neu iem droe         – 96 –

Tujoh uroe bek keunong ie
Bek meusimie ubak asoe
Ban neudeungo jikheun meunan
Syiah teuma neukheun meunoe

Meungnyo hanjeuet ku ibadat
Bekta peu-ubat mata kunyoe
Adat saket pilon ridla
Adat buta pihana peue

Meunan neukheun Syiah Karnaini
Takot keu Rabbi malam uroe
Riwayat ‘Ali ngolon peugah
Lafai sumpah neukheun meunoe

Deumi sibeunar Rasulullah
Baklon neu peugah saboh hareutoe
Proehai mate sidroe insan
Junub badan gohlon manoe

Ji teubiet bee sangat keuji
Khieng bee bangke brok han bagoe
Asoe Masyar dum jisudi
Pane bangke teuka keunoe

Pane bangke sangat khieng that
Habeh meudlarat dum geutanyoe
Jikheun bak Malek Zabaniah
Jiyue pinah bangke khieng nyoe
– 97 –

Geuseumanoe ngon ie jahannam
Pakon juwam  han jimanoe
Geuboh beuleunggu deungon rante
Geuhue-hue sabe keudeh keunoe

Geupeurasa ‘azeueb peudeh
Sabab paleh that sijih nyoe
Sabda Nabi bak Abi Zaarin
Tango laen lon kheun hareutoe

Soe nyang takkhir manoe janabat
Jipreh teubit mata uroe
Geurat jih bak Abi Zaarin
Tango Abi zar ingat keudroe

Asoe langet mohon laknat
Malaikat nyang hue uroe
Tango ji meuhoi diudara
Hai ceulaka paleh hansoe

Malaikat Hafadlah habeh jiweh
Pakri ngon beungeh marah hansoe
Seurta jikheun ya ‘Abdullah
Pakon kapinah dumna kamoe

Ka puweh lon hana deesya
Deungki raya  aneuk  bisoe
Tuboh najih camar leuta
That ceulaka tuboh keunyoe        – 98 –

Lheueh nyan jipo u udara
Ji seurapa jikheun meunoe
“Allahumma ‘akzibhu
kama ‘azabanaa”

Ya tuhanku neu ‘azeueb sinyan
Gadoh beureukat jeub jeub sagoe
Agam dara hana teurinong
‘Amal han neutueng 40 uroe

Ureueng nyang malas manoe janabat
Gadoh beureukat jeub jeub sagoe
Agam dara hana bida
Gasien kaya beurang kasoe

Beurang peue jimat han meulaba
Seuntok masa dalam ragoe
Adat jimadee jeuet ro pade
Jimeurawe patah sujoe

Adat jipeugot sapeue hanjeuet
Ji seumeuweuet salah ragoe
Jimanyum tingka salah reubeueng
Adat jimadeueng tutong asoe

Jimita dujee teucucok gaki
Jijak u jingki teutop jaroe
Ji meuidang beukah cawan
Jimat pingan srot dijaroe

– 99 –

Jiceumeucop patah jarom
Jiteumeuom keumong asoe
Jitaguen bu leumiek meuntah
Jitaguen kuah masen asoe

Jipajoh ranub leupah gapu
Jipajoh bu teukap jaroe
Jijak maguen tutong ija
Ji-ek u para meuantoek dhoe

Jipeu-ek ie beukah tayeuen
Jipok teupeuen keundo asoe
Ji geumeumpoi meucuet beuneung
Jipuliek pineung teukrot jaroe

Adat jijak saket beuteh
Bukit ji-eh krot kreuet asoe
Bahkeuh dumnan di ureueng binoe
Tango jinoe di ureueng lakoe

Ji seumurat patah kalam
Jiteumeunggam teusie jaroe
Jiteumarah teutak gaki
Jipancuri rijang geutusoe

beurang peue buet hana hase
Jikeumawe potoh taloe
woe u gampong inong carot
U laot patah keumeudoe        – 100 –

Jijak ugle gadoh parang
Meuladang gadoh lham beusoe
Jijak u timu roh u barat
Jijak teupat roh lam duroe

Teubiet u laot laboeh pukat
Meuwoe u darat angen tanpoe
Jipot keureutoe umpeuen ulat
Habeh jagat ban sinaroe

Hana sapeue jeuet keulaba
Jijak meurusa pi jiwoe droe
Allah hai aneuk bukon malang
Galak tamuprang tasyen rugoe

Malas tacrong ie sitima
Nyang na geumar peusumbang droe
Habeh lon kheun saket mangat
Adat tacarot tango keudroe

Dilon Polem lon peungingat
Saket mangat meuhat keudroe
Lon peuingat hana meuhat
Timu barat ban peuet sagoe

Ban 4 pihak tunong baroh
Toe ngon jeuoh beurang kasoe
Kon meung mama deungon kumuen
Kon meung aduen deungon adoe
– 101 –

Kon meung wali sampee karong
Bandum gampong bandum Nanggroe
Oh meungnyangnyo aneuk Islam
Dara agam soe nyang pakoe

Keupeue jingo meunghan jitueng
Aneuk bajeueng gotkeu tuloe
Dumnoe dilon ku mupayah
Aneuk meutuah tasyen keudroe

Bekta haloih narit abang
Miyub manyang mangat seungkoe
Jinoe laen hai aneuk cut
Ulon teuseubut faidah manoe

Faidah lethat ngo lon peugah
Aneuk meutuah putroe sambinoe
Teulheueh tamanoe tagaro oek
Ta geureutok ie bak asoe

Jeuet keu Malaikat dum ie tijoh
Hana saboh nyang meupaloe
Uroe kiamat dum jimohon
Lakee ampon keu geutanyoe

Seurta  tatueng ie seumbahyang
Deesya leukang dum bak asoe
Adat tatem mengucap syahadat
Mata u langet taleueng jaroe         – 102 –

Ji teubiet lam babah Malaikat
Ngon raya that hibat hansoe
Dua sayeueb u srieb u Meughreb
Jeuet sit dum blet meungta kheun nyoe

Firman Tuhan bak malaikat
Lam laot rahmat neuyue manoe
Jiteungoh ninan basah sayeueb
Ie rata jeueb bulee asoe

Dua sayeub ka jikupru
Ie meuhambo sagai Nanggroe
Jeueb titek ie Malaikat
Balas syahadat takheun bunoe

Jilakee ampon deesya hanle
Boh hate putroe sambinoe
Phon jinoekon troh ‘an page
Meunan sabe geunap uroe

Sabda Nabi ‘alaikhissalam
Ban manikam jampu pudoe
Calitra nibak Abi Hurairah
Lethat faidah ureung manoe

Ie tijoh jeuet keu kifarat
Ampon meuhat deesya dumpeue
Hanle deesya miseue budak
Miseue manyak nyang na bunoe

– 103 –

Manoe junub ngon manoe me
Dua sabe laba rugoe
Wajeb manoe pile babat
Hana meuhat nyang na lakoe

Bak han junub nyan jinoe laen
Hase lazat dalam lumpoe
Laila haillalallah
Habeh kisah faidah manoe

Oh habeh nyan jinoe laen
Sang bakat tren meudoe-adoe
Tambeh siploh Haggul Jiran
Gaseh Keurakan

Beuta gaseh ureung lingka
Dum syedara ureung nyangtoe
Kheun Thabrany bak Ma’awiyah
Rasulullah nyang hareutoe

Ulon tanyong ubak Nabi
Hanlon turi jiran kamoe
Nyangnyo jiran na tatu ‘oh
Peuet ploh rumoh seulingka droe

Tunong baroh timu barat
Ureueng nyang rab disinan toe
Tadeungo he Ma’awiyah
Bek meubantah ngon ureueng toe        – 104 –

Bek meuceungom bek meupake
Sit beuta bri barang kapeue
Meungha mudah ta peujampang
Ta peuuatang jih bek deuek troe

Ohka saket tajak hadlir
Ohka mate ta seumanoe
‘Ayeb jih bekta peuleumah
Bekta peugah bak beurangsoe

Balah keugata meuligoe syuruga
Puteh safa intan sinagoe
Asoe didalam Budiadari
Balaih tabri-bri keu ureueng toe

Kata ‘Ali karamahullah
Bak Rasulullah lon duek siuroe
Wahe ‘Ali tulong mulong
Ureueng gampong nyang peugah droe

Wasiet ulon beuta ingat
Amanat faidah hansoe
Neu wasiet nyan katoe wafeuet
Ulonteu ingat troh anjinoe

Calitra ‘Amar Ibnu Khatab
Sahabat sare peuet limong droe
Troh u Baq ‘ik kubu lethat
Teudong siat bandum kamoe
– 105 –

Meudengo ureueng ‘azeueb kubu
Jikeumundu hana bagoe
Nabi neukheun ‘laita sy’ikri’
Tuhan bri eleumee kamoe

Neu dengo that jigeumundu
Sope kubu roe saleh nyoe
Seot sahbat kubu Anshar
Sahbat gata dilee gobnyoe

Dilikot gata ji seumbahyang
Nyangna reunggang lhee peuet uroe
Ohrap saket katoe mate
Saleh nacre meung peuet uroe

Ban Nabi ngo geukheun meunan
Beudoh janjongan leugat neuwoe
u Madinah neuwoe lanja
Bak rumoh Ansharale neu peutoe

Neujak tanyong bak isteuri
Pakri beugi lakoe teunyoe
Lakoe ulon tangan murah
Na seudeukah geunap uroe

Neu seumbahyang neu puasa
Seulaweuet keugata hana pedoe
Tertapi na bacut salah
Hana meu’ah ngon ureueng Nanggroe         – 106 –

Hana neu teumeung lakee meu’ah
Neu meubantah yoh sabohroe
Ban neundeungo isteuri peugah
Rasulullah neukheun meunoe

……. (nasakah hana trang….)
Lheueh nyan Nabi neukheun hareutoe
Han neu teurimong amai umat
Meunghan got ngon asoe Nanggroe

Meunghan got ngon ureueng lingka
Habeh binasa amai dumnyoe
Seumbahyang seudeukah jijak haji
Thawaf sa’i hanjeuet sapeue

Nabi tanyong bak isteuri
Ngon mupake mantong jinoe
Ya Rasulullah ‘Uqbah Anshary
Gohlom mate rab disinoe

Nabi beudohle neu meupayah
Bak ‘Uqbah neukheun peutoe
Oh sajan troh Rasulullah
Bak U’qubah neukheun meunoe

Hai  U’qbah tadeungo lon
Ta peuampon deessya gobnyoe
Kareuna gobnyoe pika mate
‘Azeueb sabe geunap uroe

– 107 –

Kubri keugata syufu’at lon
Meungta ampon deesya jinoe
‘Uqbah kheun Alhamdulillah
Ka lon meu’ah beurang kapeue

Peue nyang deesya nibak ulon
Habeh kuampon bak uroe nyoe
Dilon keugata ya ‘Uqbah
Syuruga Jannah keuangke jinoe

‘Uqbah ngo Nabi kheun meunan
Ngon janjongan neujak jinoe
Ubak kubu malam Jumeu’at
Mohon rahmat ngon neu meuhoi

Wahe pulan Ibnu  pulan
Nyoekeu rakan teusabohroe
Lonyoe nama ‘Uqbah Anshary
Nyang tapake meu’ah jinoe

Assalamu’alaika wahe taulan
Meu’ah baklon wahe adoe
Teuma lon ngon dalam kubu
Lalu geumeusu meunoe bunyoe

…. (hana trang) …………….
Beu Allah bri sajan kamoe
Beuneu himpon dalam jannah
Beumeusapat oroe dudoe         – 108 –

Teulheueh nyan Nabi Neodong siat
Neungo lam jeurat hanle bunyoe
Hanle ‘azeueb dalam jeurat
Neungo seungab konban baroe

Sangkira kon buettan Nabi
A’zeueb page troh andudoe
Hingga troh bak uroe kiamat
Hana seungab malam uroe

Ngo he aneuk nyang meutuah
Bek meubantah ngon ureueng toe
Bekta ceungom bekta pake
Sit beutabri  beurang kapeue

Barang tuto bekta haloih
Bek meumusoh sabe keudroe
Laila hailalallah
Nyoe lon kisah ureueng sidroe

Abi Huarairah po riwayat
Neubri ingat dum geutanyoe
rab droenyan na sidroe kafe
Biek Yahudi disinan toe

Bak siuroe jijak baklon
Meunoe jikheun ubak kamoe
ya Abu Hurairah lonna hajat
Tulong siat keulon jinoe
– 109 –

Teuma lon seuot meungna lonbri
Teuma Yahudi jipeugah peue
Oh Jipeugah hana lonbri
Jiwoe Yahudi hapiet jaroe

Nyang jilakee pina lontroh
Mankeu naroh teutap jiwoe
Padum uroe seuleueng nibak nyan
Bak janjongan ulon peutoe

Ban neu eue lon Rasulullah
Ya Abi Hurairah pakon meunoe
Pakon maksiet keu potallah
Han tapateh lagoe peutoe

Neukheun keulon dinap mata
Lon eue muka beungeh hansoe
Peue salah lon he ya saidi
Ya Habibi peugah jinoe

Na tatupeue gata salah
Yahudi susah jak peugah droe
Ji peugah dak jibak gata
Yoh jiteuka bak siuroe

Areuta teuna han tatem bri
Jiwoe Yahudi hana sapeu
Kareuna Yahudi ureueng  sigampong
Patot tatulong bek jiwoe droe         – 110 –

Ban neudeungo khaba Nabi
Neujak cokle neujak neujok jinoe
Neujak Intat keu Yahudi
Ka neujak bri rab meupeloe

Abi Hurairah woe bak Nabi
Tron jebra-i teuma jinoe
Jebra-i kheun bak Rasulullah
Abi Hurairah rab meupaloe

Adat meunghan rijang neujok
Han saho toek page dudoe
Page dudoe uroe akhirat
tamong Jannah pitreb didroe

Siribee thon seuleueng baksoe laen
Dudoe nibak nyan neutamong droe
Geupeutamong Abi Hurairah
Meunan tapeugah takheun jinoe

Ban neudeungo khabar jebra-i
Ie mata ile meuteu taloe
Lheueh nyan neumat jaroe Nabi
Meusumpahle neukheun meunoe

Deumi sibeunar gata Nabi
Dudoe page hanle meunoe
Beurang kajan  he ya Saidi
Meungna lonbri beurang kapeue

– 111 –

Muhammadur Rasulullah
Salang Hurairah sahbat nyang toe
Geutanyoe laen beurapa lagi
Ne boh hate meugriet dudoe

Tambeh siploh kakeuh simpan
Siblah taulan deungo jinoe
Jinoe lon kisah ureueng murah
Bri seudeukah geunap uroe

Buet nyang sunat pijeuet meugriet
Ureueng nyang kriet kikir jaroe
Tango kukisah sidroe Nabi
Murah han sabe lam donya nyoe

Areuta neutan meungbube drah
Neubri seudeukah neupuleo droe
Nabi Nidlir ‘alaihissalam
Tango taulan ulon hareutoe

Bak siuroe neujak u peukan
Meureumpok sinan fakir sidroe
Ubak peukan Bani Isra-i
Neu peureugi neujok sidroe

Meureumpok ngon sidroe makatab
Nabi jimatle dijaroe
Ya janjongan tulong fakir
Seudeukah tabri beurang kapeue        – 112 –

Kareuna Allah keulon siblet
Beulanja hanseb lon teuboih droe
Lethat balas di akhirat
Peutroh hajat ureueng peugah droe

Gaseh keulon he ya saidi
Teupike Nabi lam hate droe
Bukon that dak hanpeue lonbri
Sayang faki jipeugah droe

Areuta kutan meusi busok
Peuekeu kujok keufakir nyoe
Jilakee pingon kareuna Allah
Pakri ilah lon peulheueh droe

Meudeh meunoe ka neupike
Gotkeu bahle kupeubloe droe
Wahe fakir hanpeue kubri
Lon nyoe tame tajak publoe

Jak tapubloe lon u peukan
Neubot tangan neujok jaroe
Teuma jiba Haidlir Nabi
Keu Nasrani jijak publoe

Peuet reutoh dirham jitueng harga
fakir bungka leugat jiwoe
Nabi tanyong bak Nasrani
Peue buet tabri lonka tabloe
– 113 –

Seuot Nasrani han kuyue buet
Ku eue sifeuet teusamlakoe
Ku eue rupa miseue Syiah
Hanpeue salah pakon teugoe

Adat meunan ka talakee
Angkot batee jak tapinah
Batee lethat jak tapinah
Nafsu rumoh peudong

Nabi beudoih pinah batee
Lhee peuet ribee angkot sidroe
Hanjan siat habeh simpan
Adat soelaen troh peuet uroe

Meungna siploh nyang teuga-teuga
Didroe nyan teuma hanjan siuroe
Malaikat bantu troh meulaksa
Peue han teuga siat sampoe

Nasrani eue ‘ajab sangat
Pakri teuga that ureueng muda nyoe
Lagi amanah han khianat
Saleh pithat war’ak hansoe

Teuma Nasrani ji keumeung bungka
Jikheun khaba bak muda nyoe
Ulon jinoe kheundak bungka
Tinggi gata nyan disinoe         – 114 –

Seuot Hidlir lon han taba
Peue Keureuja lon disinoe
Adat Meunan ta meulabo
Tatop gapu taturap nyoe

Leupah Nasrani ka jibungka
Hidlir meujaga malam uroe
Neutop gapu neu teumurap
Malaikat dum peungon droe

Nasrani woe troh u pinto
Teudong tahe teukap jaroe
Teuma jitanyong ubak Hidlir
Gata pane peue beuNanggroe

Ku eue ‘ajab that buet gata
Hana eksa ngon beurangsoe
Adat gob peubeuet han-ek leungka
Ureueng nyang teuga meung 10 droe

Digata lheueh ngon sikeujab
Nanggroe teupat nama teusoe
Ulonteu Hidlir na taturi
Nyang peureugi sagai Nanggroe

Nyobit Hidlir kareuna Allah
Beuta peugah muda samlakoe
Deumi Allah ulonteu Hidlir
Deungon teukeudi ulonteu keunoe

– 115 –

Sabab meureumpok ureueng keumade
Jilakee raseuki ubak kamoe
Ulonteu meungbri ubak kamoe
Lonyoe jiba lon jipubloe

Lon eue fakir teuka inseueh
Meunyum that weueh hana bagoe
Sagai Nanggroe mita raseuki
Jiguemade jitheun jaroe

Meungsi geumade peuekeu meungriet
Han jikeumiet bah jijak woe
Meungna mudah bahle tabri
Hankeu toekle bak publoe droe

Teuma Hidlir kheun bak nasrani
Buettan fakir meugriet dudoe
Meungnyo tatulak sigeumade
Han tatem bri tayue jiwoe

Areuta teuna han tatembri
Meugriet page uroe dudoe
Meungnyo jilakee kareuna Allah
Firman Allah tron tayue bak kamoe

Uroe page di akhirat
Ngon syeksa that malee hansoe
Teudong dinab Tuhanku Rabbi
Muka hanle kulet ngon asoe         – 116 –

Tinggai keutuleueng ruhung-ruhung
Nanyum taplueng sagai Nanggroe
Ban jideungo khaba Nabi
Ubak gaki jilungkop droe

Ya Nabiyullah hana lonthee
He panghulee meu’ah jinoe
Ulonteu lakee meu’ah ampon
Areuta lon lom ngon droe-droe

Areuta ngon aneuk hukom gata
Ulon piteuma kupeujok droe
Gata han patot lon peuhamba
Ka meurdehka nibak kamoe

Ulon pijinoe Ku Islam
He janjongan neu peurunoe
Lheueh Islam dinap Nabi
Dirham jibri siploh katoe

Islam pilheueh tronle wahi
Wahe Hidlir deungon kamoe
Lhee peue hase kakeu gata
Ku karonya bak suroe nyoe

Peurtama kafe tapeu Islam
Keudua dirham siploh katoe
Teulhee gata ka meurdehkaan
Teulhee peue ngon nyan balas siuroe
– 117 –

Nyankeu balas murah teuthat
Hana sapat dihob meunoe
Nyankeu aneuk beuthat murah
Beuna seudeukah geunap uroe

Areuta Tuhan bek takriet-kriet
Meungle teubiet le meugantoe
Bricit Tuhan konsoe laen
Bekta syen-syen he aneuk droe

Bak geutanyoe neu peusinggah
Milek Allah posamlakoe
Neubri siat neucok hantreb
Siklab sikleb habeh meuwoe

Nyang raya that meugah kheurajeuen
Nabi Sulaiman yub langet nyoe
Nyankeu raja Nanggroe Baghdad
‘Alem pithat hana bagoe

Eluemee Kimia jih pimate
Meueh neu peugot geunap uroe
Teuma nyang kafe raja Fir’un
Dua ngon Karun aneuk bisoe

Areuta tinggai jih pimate
Habeh gobme sagai Nanggroe
Habeh jitueng keu pusaka
Nameung syeksa keujih meuwoe         – 118 –

Adat meunggot ji padoli
Zakeuet jibri ohtroh gantoe
Sabab han got ji peurintah
Tuhan marah page dudoe

Zakeuet fitrah han jitemboeh
Kifarat tuboh han jipasoe
Nafajah aneuk ngon isteuri
Upah haji laen dumpeue

Peugot mesujid ngon binasah
Jijak peu-upah beurangkasoe
Arta digob jih hantem bri
Jaroe gaki geutot dudoe

Nan beutango kisah Karun
Ngon Fireu’un bandua droe
Fir’un karam karun bumoe ‘uet
Nyan ube buet kaya sinoe

Laila haillallah
Pahla seudeukah lethat bagoe
Harah peuet boh lafai seudeukah (صد قه)
Shad dal ngon qaf peuet ngon ha nyoe

Faidah shad makna ji shun (صو ن)
Bahaya dum han keunong asoe
Faidah dal meununjuk rot
Jalan nyang got page tawoe

– 119 –

Rot nyang teupat lam syuruga
Makna dal faidah nyoe
Faidah qaf nyan qarabah
Hampir ngon Allah malam uroe

Faidah ha hidayah Allah
Amal saleh balas dudoe
Syuruga manyang raya pangkat
Balas harah peuet yoh disinoe

Kata Syiah Abu Hafash
Rahmatullah bandua droe
Neungo bak Nashir Samarqandy
Gaseh Rabbi hana padoe

Sidroe ureueng lakoe mate
Tinggai isteuri aneuk dua droe
Areuta pina ban sikada
Aneuk dua ureueng lakoe

Arta tinggai pingan talam
Sireutoh dirham bukit tapubloe
Ji seuole ka jiangkot
Jak meukat bak saboh Nanggroe

Teulhee boh ruti keu beulanja
Aneuk dua ngon jih lhee droe
Bandlhee ruti jibri seudeukah
Ji isyarah jih banlhee droe        – 120 –

Saboh jiniet keu aneuk tuha
Teuma nyang dua saboh didroe
Saboh jiniet keu aneuk tuloet
Ban teulhee lagot hanle sapeue

Jiteungoh gle tamong panton
Rimueng kalon ureueng lhee droe
Ban jikalon leumah raseuki
Ji peurable jicok sidroe

Ka jibaplueng lon aneuk tuha
Tinggai dua ka jipoh droe
Wahe aneuk ka rimueng me
Ma teupakri hokeu jinoe

Tajak gata lon tatinggai
Dua sagai ngon aneuk nyoe
Adoe teupi cut teungoh alang
Bukon bubarang Ma that rugoe

Wahe aneuk boh hate nang
Ma teusayang tinggai sidroe
Dalam huteuen sinoe meulang-lang
Hansoe peuriwangle u nanggroe

Wahe aneuk putoh asa
Lam rimba tinggai Ma sidroe
Yoh tajak lhee tinggai dua
Allah hai raja apon jaroe
– 121 –

Allah he anek jantong hate
Saleh mate Ma disinoe
Areuta bacut hana sampe
Ayeb mate ban teulhee droe

Hana lale ceumong ba-e
Jimoe laju jiantok droe
Tingkue aneuk jijak lanja
Habeh data troh bak sungoe

Meuteumeung saboh jalo puntong
Peusak untong jijak sidroe
Jihpi jiek toek ie raya
Anyot lanja bandua droe

Troh ulaot hanasoe cok
Jibeudoh riyeuk angen tampoe
Keunong riyeuek jalo karam
Bandua lham capoe-capoi

Jikeumeung loet papeuen sangga
Roh jiraba bak keumudoe
Aneuk gadoh han meuhoka
Hanle bandua tinggai Ma sidroe

Bitpi karam dalam laot
Kon jeuoh that bineh sittoe
Adat agam hanpeue langoe
Ie pisit deue leumah anoe         – 122 –

Bak ureueng binoe teumakot that
Nyum buya kap kayee tampoe
Lheuh nyan riyeuek peuek u darat
Teungoh leugat lalu jiwoe

Jijak sidroe ji beurjalan
Troh bak peukan saboh nanggroe
Leugat jijak ji peureugi
Mita raseuki jikeumeung bloe

Troh bak ureueng meukat ruti
Leumah ji euele sang aneuk droe
Oh jipeurap ji peunyata
Jicok jiwa lom ngon jimoe

Wahe aneuk nyoeho gata
Ma teumita kalhee uroe
Ma tatinggai sidroe dilaot
Gata peuebuet soema keunoe

Teuma jikheun simeukat ruti
Konhe poti aneuk kamoe
Gata ngon lon kajeuet dawa
Udeh kuba gata jinoe

Udeh poti jak meuhukom
Beudoh tatron tajak keunoe
Beunar salah sideh meuri
Dinap kadli nyangpo nanggroe

– 123 –

Tingkue aneuk jak u Bale
Unap Kadli bot ngon jaroe
Teungku ampon ka meudawa
Kamoe dua aneuk sidroe

Nyang aneuklon dijih jikheun
Jidakwa lon ureueng lakoe
Meunankeu agam ngadu dawa
Qadli gisa bak ureueng binoe

Wahe poti cuba peugah
Takheun beusah seupo aneuk nyoe
Sangkira nyo aneuk gata
Pakri soeba troh bak gobyoe

Teuma jiseuot Teungku ampon
Dua jaroe lon neu eue keunoe
Ulonteu peugah asai punca
Nyang jeuet geuba aneuklon keonoe

Teungku ampon asai dua
Sideh lonba Teungku keunoe
Ulon nanggroe blahdeh gunong
Meulinteueng krueng rotjak keunoe

Ohtroh bak krueng lon ek jalo
Anyot laju bandua droe
Troh ulaot jalo karam
Aneuk lonlham tinggai lon sidroe        – 124 –

Areuta ngon aneuk hankeu nale
Troh u keude lon uue bak gobnyaoe
Teuma loncok aneuk ulon
Digob nyoe geukheun pi aneuk droe

Nyankeu narit Teungku ampon
Nyo aneuk lon neukheun jinoe
Kadli tanyong teuma lagi
Neu sudi bak ureueng lakoe

Na tadeungo haipo meukat
Digata pat tatueng aneuk nyoe
Teungku ampon teuma jiseuot
Aneuk anyot lonme keunoe

Ka meuteumeung meungbek mate
Ulonteu me nyan meupuwoe
Jinoe Teungku ban nyang meuphom
Ban nyang maklum neukheun jinoe

Hana peue kheun kon digata
Got tagisa jakleh tawoe
Hukom putoh bicara keumah
Ka leupah agam nyan jiwoe

Inong teubiet lom u peukan
Jiba sajam ngon aneuk nyoe
Meureumpok ureueng  pasang guda
Leumah dimata sang aneuk droe
– 125 –

Jiplueng leugatle jilumba
Jidrob guda mat ditaloe
Wahe Teungku nyang hue guda
Ho teumeungba aneuk kamoe

Teuma seout ureueng po guda
Kon digata aneuk kamoe
Nyanpi kajeuet lom keudawa
Tron bandua miseue bunoe

Nyanpi jitron jak meuhukom
Meunang citlom miseue bunoe
Troh bak Kadli ngadu dawa
Phon jimula jiboet jaroe

Dua seuen ngon nyoe peu-ek dakwa
Ka biasa utoh rague
Teungku ampon ka meudawa
Kamoe dua aneuk sidroe

Seuot Kadli neu meuseunda
Meungkon dua hanjeuet aneuknyoe
Gata putik gobnyoe muda
Nyo keudua aneuk teunyoe

Teungku ampon kon suami
Hanlon turi salehpat nanggroe
Adat meungnyo hanjeuet dawa
Nyoe meungnama hanlon tusoe         – 126 –

Teulheueh nyan teuma neukhem Kadli
That beurani ureueng binoe nyoe
Rupa pigot indah rambuni
Jigrak bibi jibot jaroe

Teungku ampon ngolon peugah
Asai silsilah aneuk meunyoe
Teungku ampon lon jeuoh that
Bukon teumpat kamoe sinoe

Ulon teujak maniaga
Ngon areuta lonne keunoe
Lonme areuta peurdangan
Lonba sajan aneuk dua droe

Ohtroh ugle sitka mate
Meuteumeung bala rimueng pindoe
Jicok aneuk lon dibawa
Lon eue mata api uroe nyoe

Bak sangka lon sitka mate
Mantong raseuki tuah kamoe
Nyankeu lonkheun kaban seunang
Wajeb neupulang aneuk lonnyoe

Hareuem neuba hareuem neutroh
Hareuem neu suroh keudah keunoe
Deungon do’a Teungku Kadli
keulon neubri nalon jakwoe

– 127 –

Kadli deungo jipeu-ek dakwa
Inong muda that bit ragoe
Meusambot buet deungon rupa
Syarat dawa dum jiteupeue

Syarat jinam bagoe pinam
Bukom ‘ajam mitna meunoe
teuma neu aleh Teungku Kadli
Neusudi bak ureueng lakoe

Tadeungo he muda seudang
Pane tatueng aneuk miet nyoe
Teungku ampon ulonteu peugah
Bak Allah bek salah kamoe

Bek teukeuse lon bak Tuhan
Bek ‘ayepan ateueh bumoe
Kamoe Teungku ureueng duson
Peurburuan geunap uroe

Bak siuroe teukeudi Tuhan
Teungoh laman peuet limong droe
Ba ngon asee me ngon nyareng
Tumbak leumbeng miseue puroe

Meuteumeung saboh bakat rusa
Ateueh data meuri bak anoe
Saboh saho lon yue linteueng
Mubee rimueng troh bak kamoe         – 128 –

Teuma lon lheuh asee peunyari
Ji humoele rimueng pindoe
Rimueng teubiet dalam uteuen
Leumah meukalon budak lam jaroe

Ban meuakalon jime manyak
Teuma meupeucrok bandum kamoe
Meucang rimueng meusong gabung
Ulam aroeng ka jitiek droe

Tinggai manyak hana jiba
Hana luka bacut asoe
Hana meuteumeung uroe nyan rusa
Meucok meuba Manyak meupuwoe

Nyankeu narit Teungku ampon
Hana baklon laen nibak nyoe
Jinoe Teungku ban nyang meuphom
Ho nyang maklum neujok jinoe

Tadeungo he pawang rusa
Kon digata nyo digobnyoe
Hukom putoh hanle khaba
Ureueng muda troh samlakoe

Teuma Kadli neu meuseunda
Gata dua intan ngon pudoe
Peu-ek dawa sabe timang
Baklon reumbang beujeuet malamnyoe
– 129 –

Teungku ampon bahkeu dilee
Lon meulakee woe u nanggroe
Kadli neukhem raya-raya
Beudoih bandua mumat jaroe

Lheueh meuteumeung seumah Kadli
Maseng peureugi woe u nanggroe
Sira jiwoe rot u peukan
Jibloe ikanle jipuwoe

Jibloe dua eungkot raya
Ikan leulumba ngon Tang Iroe
Troh u rumah jiplah eungkot
Meuteumeung lam pruet saboh pudoe

Kata siteungoh geukheun meutia
Yum sibahra adat geupuloe
Nyang saboh treuet siribee dinar
Sit bandua eungkot meusoe

Deureuham nyang rhot pimeulaba
Meuteumeung dinar keu geunantoe
Nyankeu balas ruti tiga
Biet bahgia ureueng binoe

Jihpi banlhee lheueh bak bahya
Lom ngon kaya hana bagoe
Laila haillallah
Pahla seudeukah lethat bagoe         – 130 –

Lheueh lon kisah haba poti
Jonoe poni lon hareutoe
Ban nyang lagee tuha muda
Ban nyang kada meuaduen adoe

Dilee putik dudoe tuha
Ureueng muda lesoe peutoe
Tango kukisah sidroe ‘ajut
Masa Dowod dilee sabohroe

Masa keurajeuen Nabi Dawod
Sidroe ‘Ajuz tuha hansoe
Dua gantang gandom neume
Neujak u Jingki bak sabohroe

Neuma beukai lhee boh ruti
Meureumpokle ureueng geumade
Lalu jipeurap ubak’ Ajuz
Ji sujud ngon jibot jaroe

Wahe Nek Ponek meutuah
Bri seudeukah Nek keu kamoe
Tujoh uroe deuek lon puasa
He Nek raja bri beurang peue

Ban neudeungo khaba faki
Neujok ruti hanle didroe
Jinoe di Nek neupuasa
Ruti ban tiga neu peujaroe

– 131 –

Neujak leugat jaktop teupong
Me u leusong jaktop keudroe
Oh lheuh neutop pasoe eumpang
Neucok neujulangle neupuwoe

Oh troh u rot angen bapoet
Jireubot Poni ka rugoe
Jinoe Poni ka meupoeet-poet
Bak Nabi Dawodle neu peutoe

Troh bak Nabi ka neupeugah
Ya Nabiyullah lon ka reugoe
Teungoh lon woe teuka bala
Eumpang jihilia bak ulee komoe

Hanlon tune angen deungki
Lon jitaki teungoh lon woe
Jinoe tuanku lon neuhukom
Beupulang dum teupong kamoe

Nabi pike peue meuneu’en
Ngon angen neuyue hukom droe
Nibak ngon angen kuhukom Ni
Bahle kubri meuh sikatoe

Bahle kubri siribee dirham
Bek tham kiyam Ni neujok woe
Deureuham neujok Ni neuriwang
Meureumpok ureueng dirot sidroe         – 132 –

Meureumpok ngon Nabi Sulaiman
Pakri hukom nyan geuseuleusoe
Lon ngon angen han neuhukom
Neubri keulon deureuham nyoe

Hai Poni bek tatueng dirham
Jak riwang lom lakee jinoe
Ohtroh Poni bak Nabi Dawod
Lom neutuntut miseue bunoe

Ya Nabiyullah neuhukom lon
Nyan deureuham pulang keudroe
Hai Poni bek talakee hukom
Direuham lom kubri jinoe

Siribee dirham lom ka neubri
Beudoih Poni lom neujak woe
Meureumpok lom dorot Nabi
Kalheueh hukom Ni ku eue tawoe

Hukom hana neutem kira
Neubri areuta lebak bunoe
Hai Poni bek tatueng areuta
Meugriet gata teuma dudoe

Singoh jireubot ija dibadan
Meunggoh simpan lom hukom nyoe
Han kujeuetle tamong keunan
Nabi Sulaiman tamong jinoe
– 133 –

Pakon hukom han neutem bri
Sayang Poni dawok neumoe
Neulakee nyang wajeb nebri nyang sunat
Nyang jroh that neuhukom jinoe

Teulheueh nyan Nabi neuhoi Khazin
Nyang pruh angen sagai nanggroe
Wahe Khazin teupong Maja
Ka angen ba pulang jinoe

Seout Khazin hanlon turi
Bak jebra-i lon yue jinoe
Ya Jebra-i pakri meuphom
Pakri hukom takheun jinoe

Jebra-i yue bak Mika-i
Hancit hase hukom Ni nyoe
Di Mika-i ubak Tuhan
Tron fireuman teuma jinoe

Firman Tuhan bak Jebra-i
Geukheun bak Nabi Ni han rugoe
Teupong Ni kajime u laot
Behtra beusoet tampai ngon nyoe

Bahtra beusoet tikoh peuruhung
Ie jitamong hana teupong bagoe
Adat meungkon teupong Poni
Habeh mate han lheueh sidroe         – 134 –

Jinoe jak kheun bak Nanghuda
Jibri areuta Nek bek rugoe
Asoe Behtar neuyue bulueng
Hudep nyawong sabab Ni nyoe

Oh neudeungo uleh Nabi
Ureueng neubri teuma dudoe
Neuyue kheun bak pawang behtra
Miseu haba dilee bunoe

Pawang pihan jibri dawa
Bagi 3 saboh di Nek nyoe
Oh lheueh geuweuek bagi tiga
Di Nek jeuma siribee katoe

Nek kaya that hana tara
Ruti tiga pangkai bunoe
Nyankeu pahla bri seudeukah
Nabiyullah nyang hareutoe

Nabi neukheun bak Poja Ni
Faidah ruti Tuhan gantoe
Laila haillalhah
Faidah seudeukah ngolom jinoe

Nyang di Dawod jinoe Sulaiman
Tango kaman lom hareutoe
Kata Wahab bin Munabbah
Droe nyan peugah saboh hikayat

– 135 –

Masa kheurajeuen Nabi Sulaiman
Taklok seekalian dum latbatat
Troh bak angen nyang han sifeuet
Binatang cut sidom lalat

Bak siuroe neuhukom ureueng
Teuka inong kleueng peugah meudlarat
Jipeu-ek seumbah ban manusia
Sayeuep dua nyan jiangkat

Geulantoe jaroe dua sayeuep
Ta eue ‘ajab that jidaulat
Seumbah binatang tuanku ampon
Ulon lhee thon lam meudlarat

Dicong kayee lon peugot eumpung
Kon lon tinggong han meupat-pat
Kayee pikon kayee meuboh
Ulonteu piyoh sinan barat

On han lonpat cabeung hanlon creue
Hana sapeu na meudlarat
Aneuk ulon jicok laju
Musem timu musem barat

Cuco kutan hai panghulee
Puteh ulee tuha kuthat
Neukheun bakpo hai tuanku
Bekle laju jicok leugat        – 136 –

Nyan hajat lon tuanku ampon
Neu eue jaroe lon dua kuangkat
Habeh haba di klueng inong
Po neuyue tuengle sigra that

Neuyue angen narijang troh
Jijak pantas mise kilat
Troh angen bak ureueng pokayee
Haba meuteuntee troh rijang that

Troh pokayee ubak Nabi
Neu tanyongle pakon jeungkat
Pakon kacok aneuk kleung inong
Hana keunong hareuem jithat

Nyang raya deesya na katuri
Ureueng nyang bri keugob meudlarat
Aneuk kleueng inong kacok laju
Musem timu musem barat

Teuma seuot ureueng po kayee
Panghulee nayang bri keugob meudlarat
Raya kasiet that aneuk kleueng
Ulon ureueng ahli hakeumat

Teuma neukheun uleh Nabi
Aneuk gob mate bukon that mangat
Jinoe pibek kacok-cokle
Buettan deungki ngon khianat
– 137 –

Menghan jeuet cok wahe Saidi
Kleueng bek tabri jiduek meungsiat
Teulheueh nyan beungeh Nabi Sulaiman
Pakon meunan kah that jeungkat

Han peue jeungkat hai panghulee
Mate kayee habeh meudlarat
Meungnyo kayee meu-umpang Kleueng
Reungkah cabeueng hanjan siat

Meunan jikheuen pokayee
Jimeuteumei jiwoe leugat
Leupah jiwoe pokayee nyan
Nabi Sulaiman neu mufakat

Ka deungo he jen ‘Afeuret
Jakleh kawiet kayee sijeungkat
Oh lheueh kawiet kaplah dua
Ka geulawa timu barat

Meungnyo jicok aneuk Kleueng lom
Hana peuekheun peutrok syarat
Padum lawet teuma leu-eueng
Meuseutot Kleueng Ma diangkat

Lheueh jitoh boh jikaromle
Mangat hate ka seulamat
Aneuk picehle ban laku
Adatkon timu musem barat          - 138 –

Jicok puriehle ji sadeue
‘Afeuret eue jinoe meuhat
Teungoh jimeung-ek lalu lape
Troh Geumade jimat tungkat

Ohsajan troh ureueng keumade
Jibeuetle do’a seulamat
Teungku pocut teuma jikheun
Jaroe jitheun nyan hareukat

Diwie rinyeuen toe ngon tameh
Mata u rumohle ji angkat
Ban jideungo ureueng keumade
Jicok ruti peutron leugat

Ruti siblah teumon jipajoh
Kanle jitroh jibri leugat
Oh jijok keu ureueng keumade
Jisambotle hate mangat that

Ji eue ruti pisit siblah
Jazakallah khairan jikheun that
Lheueh nyan jipeurap ubak kayee
Purieh dilee kong jiikat

Ji-ek pantas miseue geuplueng
Jicok aneuk Kleueng jitron leugat
Jen “Afeuret tahe keudroe
Jimeung grak droe hanle kuat

– 139 –

Hankeu ekle kayee jiplah
Jijak peugah jiplueng leugat
Tuanku aneuk Kleueng kajicok lom
Meukeumeung teugom jaroe lon geumat

Dua Malaikat mat bak jaroe
Lape kamoe teuga gobthat
Jaroe lasa ulon ghareb
U Syreb Meugreb geutiek kuat

Jibri seudeukah siblah ruti
Sidroe faki jipeutroh hajat
Pahla seudeukah siblah ruti
Kamoe lape hanle kuat

Ban neudeungo jikheun meunan
Nabi Sulaiman ‘ajab neuthat
Salang bacut sagai jibri
Adat meungle beurapa pangkat

Nyang khaba Kleueng ngon Sulaiman
Bahkeu ohnan dilee siat
Jinoe laen lon peukahaba
Ulon kira jalan hareukat

Hankeu payah tuboh anggeeta
Meuteumeung laba diakhirat
Laila haillallah
Hanlon peugah lagee nyoele          - 140 –

Meungnyo mantong lagee-lagee sot
Babah kuwut saket hate
Bacut sapeue ulonteu boeh
Meungbek putoh srot bak tangke

Soehan that syen keu areuta
Dudoe teuma pahla hase
Na faidah ta meurareuta
Payah teuma pi meusampe

Miseue ta Meujeue ngon meupukat
Miseue ta Mubleuet ngon keumawe
Miseue digle ta meuladang
Miseue meu’ue blang taboh pade

Tabloe publoe pi hareukat
Maseng babat keunong dihate
Ladom hareukat bak meujudi
Ladom pancuri pi kayale

Nyang that sayang ureung meumadat
Badan pucat areuta hanle
Saboh bangon ureueng meutajoe
Tuah jiteupeue jih sang bace

Ija sikrak nyang na diki-ieng
Oh tangieng nyum reuloh hate
Nyang that meugah Tokpang Beureuleueng
Droe nyan geutueng dumsagaibe
– 141 –

Gasien pitan kaya pihan
Meunan-meunan troh anmate
Juara laen dum meus’ah-s’ah
Ohta eue that saket hate

Tuah manok jikheun duablah
Tadeungo jipeugah mutawate
Ohta kalon meudeh piroh
Tajoe gohtroh jihka mate

Jikheun na tuah lagee geundrang
Jroh timang sabe duasi
Jeh duablah nyoe duablah
Juara peugah ngon linto tahe

Bak saboh tuah duablah bagoe
Sisek jiteupeue bulee jituri
Ohta himpon meusapat tuah
Sireutoh peutploh dumnan hase

Nyandum tuah ji keutahwi
Jih rudi bukon tapike
Adat meungsaboh tuah tatueng
Hankeu kengkeung ruya-raye

Nyanpi jikheun jalan hareukat
Siploh seun lipat kaya teule
Hana meungsigo jiteumeung pilat
Habeh gobmat tinggai bace          - 142 –

Saboh bangon ureueng meumadat
Puleh siat-at asoe hanle
Ta eue hanatom tumbon badan
pakri jikheun puleh sabe

Dilon sayang lon hanaban
Bukit tatham saket hate
Saboh babat ureueng meukawet
Beungoh seupot jiboih sabe

Jikheun dijih gob jikawot
Habeh gob reubot tinggai meungple
Bukon sayang dumna rakyat
Habeh sisat syaitan rabe

Di ureueng binoe pisit maklum
Meunan keudum hanpeu bohle
Ka dilee lam Faratan Salam (فراتن سلا م)
Lethat macam sambinoe meurawe

Kalheueh sideh lon peukhaba
Sinoe teuma hanlon bohle
Laila haillallah
Tambeh seudeukah ka samporeuna

tambeh duablah ulonteu seubut
Ureueng raya pruet pajoh riba
Areuta riba na taturi
Meueh nyang jibri jitueng laba

– 143 –

Bukon jiteung meuneukat
Sit meueh teupat ji peulaba
Jibri peutblah jitueng sitahe
Ladom yum pade jitueng siwa

Jipubloe pade yumpi tanggoh
Meueh pi jioh lom ngon siwa
Ladom tanggoh ladom sajan
Yum dua ban pade jisa

Murah sajan meuhai nyang tanggoh
Bahle bekroh jitueng siwa
Nyanpi riba he aneuk cut
nyankeu beugot ta peulara

Bak bloe publoe jeunah makanan
Le disinan jeuet keu riba
Tabloe makanan sabe makanan
Meungnyo tanggoh nyan jeuetkeu riba

Miseue eungkot tabloe ngon pade
Tabloe campi tabloe sira
Tabloe teubee tabloe pisang
Bloe timong phang tabloe gula

Tabloe ie joek bloe manisan
Laen nibak nyan boh mangusta
Nangsat rambot drien ngon mancang
Laen sibarang boh duelima          - 144 –

Meungnyo makanan sabe makanan
Meungnyo yum sajan jeuetkeu riba
Keudua makanan sabe makanan
Sijeunah nyan saboh bangsa

Miseue bloe pade keuyum
Sukat beusadum timang sama
Syarat lombek tanggoh manggoh
Yum Beutaboeh goh cre gata

Meungka jarak meung sitapak
Hareuem mutlak jeuet keuriba
Areuta haleue hareuem kajeuet
Kon tapeungeuet tabri hareuga

Adat tareubot hana rugoe
Sa cit nyoe nyangna hareuga
Nyankeu riba dua teumpat
Peulahra beuthat aneuk raja

Ngo he aneuk ureueng binoe
Bak bloe publoe lazem gata
Meungkon na yum bekna tanggoh
Ingat tuboh teubinasa

Peue jeuet sinoe gleh kalang diasoe
Keupeue peujom droe sikleb mata
Keudeh page lawet ‘azeueb
Keupeue na jeuet sinoe got rupa
– 145 –

Treb that umu teunam ploh thon
Leubeh nibak nyan jareueng nyangna
Uroe akhirat sitthat lambat
Sikhan uroe jeuet siumu donya

Phon bak Adam troh kiamat
Uroe akhirat sikhan saja
Tujoh ribee thon umu sinoe
Sikhan uroe page teuma

Nyankeu aneuk beule tapike
Meungka mate hanle guna
Asoe nyang jeuet nibak hareuem
Nuraka Jahnam page jiseuba

Meunghan haleue pajoh makanan
Do’a teuhan  Tuhan teurima
Meung hanagot peulara makanan
‘Amal seukalian habeh binasa

Han beutango khaba Zubad (        )
Nadlam nyanggot lafai makna
Ureueng nyang taat pajoh hareuem
Miseue geukheun lahe nyata

Miseue rumoh peudong ateueh ie
Jitem hase cuba bicara
Meung jeuet tapeudong rumoh sinan
Mei tamakan areuta riba          - 146 –

Meunghan payah ta ‘ibadat
Ka riba ‘uet dumna pahla
Nyankeu riba page raya pruet
Habeh ji’uet bandum pahla

Laila hailallah
Jinoe lon peugah nyang pajoh riba
Masa Nabi mi’ikreuet bak Tuhan
Neu eu insan lethat bagoe

Di ateueh langet reudok geulanteue
Kilat soseue peugeueh hansoe
Leumah keu ureueng pijuet-pijeuet
Raya meung pruet aneuk bisoe

Ubebe rumoh pruet jiraya
Ulee ngon kala peunoh asoe
Uleu dalam pruet meungkuweueng-kuweueng
Nabi tanyong seupo kawom nyoe

Nyankeu kawom pajoh riba
Ji peulaba meueh sabohroe
Meunan neupeugah uleh Jebra-i
Ubak Nabi neu hareutoe

Neu eue oh jidong reubah reuboh
Hana teudoh cula caloe
Hana lale pruet meuruah
Beuteh patah pruet meurere

– 147-

Teuma meuwoele miseue sot
Na siat got lom meugule
Neuseue abeue sagai bubee
Kh’ieng bee bangke hana bagoe

Hana teudoh meung sikeujab
‘Azeueb jithat malam uroe
Kata ‘Abdullah aneuk bin Salam
Hadih citlon neu hareutoe

bacut tapajoh areuta riba
Tujoh ploh dua deesya meuwoe
Nyan hase bak saboh riba
Nyangle teuma kira keudroe

Saboh-saboh deesya riba
Leubeh bak zina he aneuk droe
Saboh dirham riba tapajoh
Kereuengsa peuetploh deesya meugantoe

Nyankeu balaih pajoh riba
Gasien kaya ingat keudroe
Nyankeu aneuk ingat beurata
keunong syeksa ngon areuta droe

Hana butango khaba Bukhari
Nibak Nabi phon hareutoe
Ulonteu buklam lon eue teuka
Baklon dua ureueng lakoe          - 148 –

Nyum ulon jak u Baitul Muqaddeh
Jijak ngon jih bandua droe
Teuma meuteumeung saboh krueng darah
Teudong dibineh ureueng sidroe

Ji peunab batee ube gajah
Teuma leumah lam krueng sidroe
Ureueng dalam krueng teungoh udarat
Batee jimat dalam jaroe

Jisrom meuhat keunong dimuka
Meugeulawa baksot meuwoe
Lom jiteungoh lom jitadi
Teumanyong Nabi soe sijihnyoe

Nyangkeu ureueng pajoh riba
Geuyue rhom buet aneuk bisoe
Nyankeu muka pika hitam
Ngon leumbam sang kulet paroe

Muka jiban jantong geutot
Nyan balah buet aneuk bisoe
Wahe aneuk nyang bahgia
Areuta riba sitbek meungtoe

Nyang pajoh riba hanmei peurab
Calitra sahbat deungo jinoe
Muhammadur Rasullulah
Tango kukisah Habib sidroe
– 149 –

Tango kukisah habib ‘Ajamy (عجمي)
Kaya han sakri yoh sabohroe
Akhe umu neurasa papa
Han that kaya miseue puroe

Sabab nyang jeuet kaya neuthat
Utoh hareukat jeuet bloe publoe
Lisek pithat kaya rijang
Neu peu-utang ureueng nanggroe

Ureueng gampong neu peuhutang
Meueh geuintat geunap siamaih meuwoe
Laba neutroh ngon neupajoh
Pangkai neutroh hana rugoe

Hana payah neu peuhutang
Meueh geuintat geunap uroe
Padum zameun nyang meumeunan
Teukeudi Tuhan bak siuroe

Neujak tunggee ureueng meu-utang
Hana meuteumeung ureueng lakoe
Teuma teumanyong Habib ‘Ajamy
Hai poti ho keupah lakoe

Hanlon tuho ka geutebiet
Geujak meugriet lon eue sidroe
Adat meunan hai positi
Peue na jeuetbri keulon jinoe          - 150 –

Ban jideungoe neukheun meunan
Seuot yohnyan ureueng binoe
Hana sapeue na geukeubah
Gobnyan leupah saleh treb geuwoe

Nyang na Teungku nyan disandeng
Sit meudageng saboh taloe
Adat jeuet nyan nalon jakcok
Meung dang-dang toek geuwoe keudroe

Nyanpi sit jeuet menoe rijang
Uroe manyang ulon jakwoe
Jijok dageng Habib riwang
Neuwoe seunang u rumoh droe

Ohtroh u rumoh neuyue taguen
Inong jikheun teuma meunoe
Neuyeu taguen ngon peue pajoh
Ruti saboh han neujak bloe

Dujee pitan ruti pihan
Keupeue sie nyan teuma dudoe
Habib teubiet jakbloe teupong
Neu usong dujee dijaroe

Teuma neujok bak isteuri
Athbakhi taguenm jinoe
Tataguen sie hai Positi
Teupong ruti pika lon bloe

– 151-

Ji taguenle hana lale
Sikeumade teuka sidroe
Jitamong bak Habib A’jamy
Lakee raseuki manyang uroe

Habib A’jamy han neuseuot
Ka jisurot leugat jiwoe
Leupah jiweh sigeumade
Neungo isteuri jikheun meunoe

Ban jipeurap ubak dapu
Sie nyoe ji eue ka meupaloe
Ji eue sie kajeuet keudarah
Jinoe marah ureueng binoe

Sabab tatulak sigeumade
Hokeu tame jinoe sie nyoe
Hireuen Habib ka neupike
Neumeu ucaple taubat jinoe

Teuma neujak bak Hasan Basri
Neu peureugi Habib sidroe
Habib A’jamy neujak leugat
Meureumpok aneuk miet meu’en keudroe

Ban jikalon Habib ‘Ajamy
Ji maritle sabe keudroe
Na tadeungo wahe keudroe
Weh dijalan surot ninoe          - 152 –

Surot dirot jeh Habib jak
Bektroh dhoi tapak bak geutanyoe
Bek keunong dhoi tapak Habib
Akhe meugriet dum geutanyoe

Habib deungo meunan kata
Neutop muka deungon jaroe
Troh Habib bak Hasan Bashri
Neulakee idinle tamong jinoe

Neu dengo Hasan beuet Quru’an
Qari hanban mangat bunyoe
Meuphom bak ayat Hasan baca
Pakri daya kee siuroe nyoe

Hate kukreueh hana padan
Keurugian paleh dudoe
Sabab areuta kee jeuet paleh
Kuboih beuhabeh areuta nyoe

Habib ‘Ajamy ka neutaubat
Neuwoe leugat bakrot bunoe
Aneuk miet jeh mantong baksot
Lom jimarit miseue bunoe

Habib jinoe ka neutaubat
Surot bacut rot Habib woe
Bitpi taubat hana keumah
Haqqul Naas mantong lam jaroe
– 153 –

Areuta gob goh neupulang
Taubat wayang hana tanggoe
Habib kheun Allahu rabbi
Dua kali ‘ayeb ngon nyoe

Meunghan kupulang areuta insan
Barang kajan ulonteu meunoe
Neuyue seutot soe nyangna hak
Beutroh jijak bandum keunoe

Kumeung bayeue nyangna utang
Nyang na kureugam laba sabohroe
Laba nyang neutueng habeh neupulang
Papale rijang ngon siuroe

Neubri gleueng gaki ngon keuruncong
Habeh neubulueng incien dijaroe
Habeh untuek ‘azimaty peundeng
Habeh ganceng ikai meuduroe

Asoe rumoh pingan talam
Habeh keurandam hanle rampagoe
Habeh ija bajee syureuban
Habeh peukayan tinggai diasoe

Ureueng lakoe gleh ureueng binoe gleh
Kakeu habeh hanle sapeue
Nyangna tinggai ija top tuboh
Makanan neupajoh ohseb siuroe          - 154 –

Teulhueh nyan neuteubiet u Binasah
Seumbah Allah malam uroe
Droe nyan dawok seumah Allah
Isteuri sosah hana bagoe

Jak hoi Habib u Binasah
Neu meulangkah Teungku keunoe
Pakri neuduek Teungku lale
Pat bu-gule ulonteu nyoe

Neu teubiet dilee jaktueng upah
Neu seulangkah bak asoe nanggroe
Habib tanyong peuet limong ho
Soena peu-upah sinoe

Teuma jiseuot hana sapat
Neu beudoh leugat lanja neuwoe
Ohsare troh u Binasah
Seumbah Allah miseue baroe

Ohtroh keunan Habib ghaleb
Ohlheueh meughreb Habib neuwoe
Troh u romuh inong tanyong
Peuena meuteumeung neujak bunoe

Na meuteumeung ureueng seumupah
Ji meutanggoh umu lhee uroe
Troh lhee uroe upah jibri
Ji meujanji deungon kamoe

– 155-

Inong ji eim hanle khaba
Eh bandua deuek malam nyoe
Singoh pi neujak u Binasah
Seumbah Allah hana sunyoe

Watee meughreb lheueh seumbahyang
Neuwoe rijang u rumoh droe
Inong teu-iem hana kiroh
Preh tanggoh janji lhee uroe

Uroe nyang keulhee pisit meunan
Seumbah Tuhan hana bagoe
Seupot nyang keupeuet katroh janji
Habib ‘Ajamy susah hansoe

Katroh tanggoh ban nyang janji
Jinoe poti tunggee kamoe
Susah hate neu hanaban
Ubak Tuhan neupeugah droe

Ya Tuhanku jinoe pakri
Peue ulon bri keu ureueng binoe
Oh jilakee peue ulonbri
Kareuna janji pika tunai

Isteuri ulon han-ek  saba
Pakri teuma ngon lhueh kamoe
Woe ugampong tahe gante
troh bak pinto Habib iem droe          - 156 –

Troh bak hidong bee makanan
Neu-ek yohyan Habib jinoe
Leumah Habib beudoh isteuri
Ji tanyongle jikheun baksoe

Baksoe Teungku neutueng upah
Cuba peugah lonngo jinoe
Habib tahe teuhah babah
Lom jipeugahle ureueng binoe

Ulonteu duek lheueh seumbahyang
Pike keu untong deuek lhee uroe
Londuek teulheueh seumayang ‘Asha
Lon eue teuka ureueng lhee droe

Nyang dua droe lon eue brat that
Bandum meuhat tima bak jaroe
Saboh tima minyeuek sapi
Saboh lagi ie madu unoe

Eumpang dua saboh teupong
Saboh dageng sie geupasoe
geupeuduek dinap lon seumbahyang
Gobnyan teudong bandua droe

Teuma marit kanak-kanak
Marit budak nyang samlakoe
Na tedeungo hai Da Poti
Bak ‘Ajamy takheum meunoe
– 157 –

Nyankeu upah ka ulonteu intat
Peunayah buet na lhee uroe
Ban neudeungo kheun isteuri
Habib ‘Ajamy ka neupoh droe

Meuhambole ngon ie mata
Tumbok dada neu kiloe droe
Seureuta neukheun ya Tuhanku
Hana nafsu upah kamoe

Bitna lonkheun pura-pura
Lon mueseuda ureueng binoe
Ulonteu peubuet kareuna
Pakon upah neubri jinoe

Neuhoi teuma ureueng peu-utang
Jime umpang neuyue pasoe
Ladom baluem ladom rajoet
Peue nyang patot jime jinoe

Oh habeh troh teuka keunan
Habib bak Tuhan neupeugah droe
Ya Ilahi wa ya Rabbi
Tuhanku neubri keulon jinoe

Gata nyang ek peuglah utang
Rajoet eumpang dum tapasoe
Habib meulakee simalam beungoh
Uroe suboh eumpang meuasoe          - 158 –

Rajut peunoh baluem arat
Ban nyang babat utang tunai
Habeh glah bandum utang ‘Ajamy
Poku Rabbi bayeue sidroe

Sabab sunggoh that neu taubat
Gaseh Hadlarat Habib sidroe
Laila haillallah
Taman kisah pajoh riba

Muhammadur Rasulullah
Aneuk Meutuah bekta lupa
Tambeh lheeblah tinggai seumbahyang
Pagi peutang watee lima

Beurang kasoe tinggai seumbahyang
Kafe rijang sikleb mata
Calitra Umar sahbat Nabi
Aneuk bahle lon peukhaba

Siuroe lon duek ngon Nabi
Kawom Anshari sidroe teuka
Bantroh teudong dinab Nabi
Ya Habibi deungo hamba

Sidroe Anshar teungoh nadak
Ji meukheundak that keugata
Ban neudeungo meunan jipeugah
Lalu neu beudoh sigra sigra

– 159-

Ibnu Umar sajan Nabi
Neu tamong bak ureueng naz’a
Nabi yue seubot kalimah thaiyibah
Laila haillallah neuyue baca

Lidah han meugrak bibi tan mumet
Nabi yue seubut lom neukata
Lheueh nyan neukheun lam geuliyueng
Ji iem mantong tan suara

Oh neubeudoh nibak neus’ah
Nekheun pantah Lahaula walaa
Nekheun teuma uleh Nabi
Bak isteuri cuba tanya

Peue beu’amal lakoe teunyoe
Pakon meunoe han suara
Pakon lidah dijih ceukang
Saleh seumbahyang hana tomna

Peue beu’amal lakoe binoe
Sibeuna Rasul ya Maulana
Suami lon murah tangan
Hana neu syen keu areuta

Si suep makanan han neupajoh
Meungkon naroh keu fakira
Meunggoh neubri keu seudeukah
Han neupajoh he Saidina          - 160 –

Teutapi na bacut malang
Tan seumbahyang he Maulana
Meujan-jan neutueng meujan-jan tinggai
Nyankeu sagai salah nyang na

Ban neudeungo Rasulullah
Inna lillahile neubaca
Wainnaa ilaihi raji’uuna
Seureta neukheun lahaula walaa

Quwata illabillahil ‘aliyil ‘adlim
Habitha ‘amaluhu wahuwa fil akhirati
Minal khaasiriina
‘Amai jinyan dum binasa

Lom meusabda ‘ainun na;im
Mu’asyiril muslimin deungo nyata
Teuma neukheun ubak sahbat
Lon amanat ubak gata

Saboh seumbahyang ji peutuwo
Kon ngon ‘uzo ngon jisahja
Sajan mate hanle sayahadat
Lalu geusurat jih ceulaka

Nyankeu Hadih Rasulullah
Aneuk meutuah bekta lupa
Padum lawet seuleueng nibak nyan
Lom janjongan neu keulua

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s