Tambeh Tujoh Blaih

#Transliterasi atau penggantian huruf dari Arab Melayu/Jawi/harah Jawoe ke huruf Latin dilakukan oleh : T.A. Sakti

1 –

Bismillahirrahmanirrahim
Wabihi nasta’in
Tambeh Shabiyin lon calitra
Arti Tambeh lonbri ingat
Peuneusan amanat keu aneuknda

Makna Shabiyin kanak-kanak
Aneuk manyak goh meumiza
Nyang tan ‘akai bandum shabi
Walee meuseuki puteh keupala

Badai lon pulang lapan sagoe
Keu geunantoe bajee meudokma
Geunantoe lonbri kreh meudolang
Badai gleueng subang hamba sahaya

Geunantoe subang mata intan
Badai puwan nyang meuceuntra
Badai peundeng ganceng keurawang
Badai lon pulang unggas dara

Adat lonbri asoe peutoe
Brok cit dudoe sia-sia
Gotkeu bahle jitueng keudroe
Peukaian dudoe nyang han binasa

Meueh ngon pirak lesoe tem jok
Kupang busok le soe pinta
Nyang meusaket meung nasihat
Bitpi le that syiah ulama        – 2 –

Maseng maseng laloe keudroe
Dawok geupujoe Allah Ta’ala
Rembang han neuyue salah han neutham
Uroe malam dalam takeuwa

Aneuk peurumoh han neuhiro
Lale ngon Po pujoe Asa
Alhamdulillah ‘ala kulli haalin
Nyankeu salen keu aneuknda

Geunantoe lampoeh umong diblang
Badai peunulang rumoh raya
Badai keupoek ngon beurandang
Badai meupulang krong meubanja

Geunantoe lonbri bantai suson
Nyoena sion keureutah safa
Subhanallah wabihamdihi
Maha Suci Poku gata

Beureukat Adam entu tuboh
Beuneubri roh lam agama
Beujitem ngui ban nyang kisah
Dhoe jikeubah bak mushalla

Beuphui tuboh asoe mangat
Beuji taat keu Rabbana
Hadist Nabi beuji pakoe
Bajee diasoe jitop keupala

– 3 –

Beuji deungo ban nasihat
Beumufakat ngon syeedara
Beuji gaseh asoe nanggroe
Jeuoh ngon toe cut ngon raya

Ban nyang khaba dalam surat
Beureukat mukjizat beujibawa
Laila haillallah
Beumeutuah dum aneuknda

Beuji geumar suroh Tuhan
Sabda janjongan ateueh jeumala
Suroh guree wasiet ayah
Kalimah thaibah bek jilupa

Beureukat intu Nabi Adam
‘Alaihissalam nyang peurtama
Beureukat Nabi deungon sahbat
Deungon beureukat Asmaul Badar

Muhammadur Rasulullah
Kalimah thaibah ubat deesya
Ya Ilahi waya Rabby
Ya Saiyidi ya Maulana

Tuhanku tabri beuji pakoe
Narit nyoe bek sia-sia
Beumeu sampe payah badan
Wasiet peuneusan keu aneuknda        – 4 –

Miseue wasiet Lukman Hakim
Dalam Quru’an keu aneuknda
Miseue wasiet Syahabuddin
Laen nibak nyan dum ulama

Firman Allah Hadits Nabi
Ulama wali ‘abed taqwa
Sinankeu geutueng qieh ‘Ibarat
Nibak sahbat Muhajir Anshar

Sigala Hadits lon peusapat
Lon tueng beureukat keu aneuknda
Hadits Shaheh lagi muktamad
Riwayat sahbat Muhajir Anshar

Ulon teusurat ngon bahsa droe
‘Arab Jawoe goh biasa
Lonboh lagu sang hikayat
Makna Kitab simumata

Nama kitab Munirul Qulub
Dawauz zunub ubat deesya
Soe leubeh roh meutuah jasad
Sit teuingat hana lupa

Sit jipateh ban nyang suroh
Nyokeu tuboh asoe Syuruga
Tujoh blah Tambeh sinoe lonboeh
Tuhan briroh lam sijahtera
– 5 –

Tambeh nyang phon ikot firman
Ta meuiman keu Haq Ta’ala
Iman keu Tuhan pateh Nabi
Tambeh tsani beuthat taqwa

Takot keu Tuhan sihabeh takot
Beujitem srot ngon ie mata
Tambeh nyang lhee bekna Murtad
Iman meuhat bek binasa

Ureueng murtad jeuet keu kafe
Iman hanle dalam dada
Tambeh nyang keupeuet Umuruddin
Beuthat yakin keu agama

Tambeh nyang limong beuta ingat
Leubeh martabat that ulama
Tambeh nyang keunam Barrul walidin
Nyang that yakin keu Nang Bapa

Tambeh nyang tujoh Adab guree
Beureukat eleumee ngon sababnya
Tambeh nyang lapan Adab isteuri
Keu suami nyang judonya

Tambeh sikureueng Manoe junub
Ulon teuseubut di bawahnya
Tambeh siploh Haqqul jiran
Hak seukalian ureueng lingka        – 6 –

Tambeh siblah tangan murah
Bri seudeukah hana reuda
Tambeh duablah ulon teuseubut
Siraya pruet pajoh riba

Tambeh nyang lhee blah ureueng malang
Tinggai seumbahyang nyang jisahja
Tambeh peuet blah pancuri seumbahyang
Aneuk jalang sulet raya

Tambeh limong blah tinggai Jumeu’at
Sit raya that keunong bala
Tambeh namblah bahya sukreuet
Kisah Jadid Ibnu ‘Atha

Tambeh tujoh blah ‘Azeueb kubu
Deungo Teungku dum teurata
Ban tujoh blah Hadits Nabi
Narit suci sumumata

Wajeb taikot hareuem ta tinggai
Hana keusagai keunong syeksa
Jeuoh ‘azeueb toe ngon rahmat
Soetem ingat khaba Ambiya

Nyankeu iman aneuk keu Nabi
Yakin hate ban nyang sabda
Laila haillallah
Ohnoe khuteubah ka samporeuna

– 7 –

Khuteubah habeh ka keusimpan
Jinoe Iman phon lon mula
Kareuna iman miseue bijeh
Ninan beuneh dum peurkara

Tamse Malakat Nabi Sulaiman
Meunankeu iman lon upama
Sabab iman raya pangkat
Raya martabat dalam Syuruga

Meuteumeung ‘azeueb page dudoe
Barang kasoe iman hana
Tamse iman behtra Nabi Noh
Meunan siteungoh kheun ulama

Nabiyullah masa karam
Lheueh seukalian nyang ek behtra
Nyang hana ek lam behtra nyan
Habeh karam dum binasa

Kata siteungoh Baladul haram
Soe troh keunan ampon deesya
Iman nyan ulee keubajikan
Sah deungon nyan ibadat nyangna

Dalam Nuraka han geupeu teubiet
Malenkan bacut iman jina
Tohroe iman na taturi
Taikot Nabi buet ngon kata        – 8 –

Beutat ikot baten lahe
Lidah ngon hate bekna bida
Miseue neuyue seumbahyang Jumeu’at
Ta meusapat peuet ploh gata

Bekkeu tinggai beurang kajan
Lagi taulan ‘uzor hana
Nyankeu rupa nyangna iman
Laen nibak nyan pile tanda

Ureueng na iman le alamat
Hate sunggoh that bak agama
Beukit jideungo geubeuet Quru’an
Meutamah iman meugeu ganda

Jitawakkal that keu Tuhan
Keu makanan han geukira
Seumbahyang puasa tinggai hantom
Nyankeu mukmin nyang sibeuna

Manyang pangkat that bak Tuhan
Lagi ampon barang deesya
Meungna iman geupeugla mukmin
‘Ainun na’im nyang calitra

Tanda mukmin le alamat
Teugah Tuhan that jipeulahra
Lam jipike nyan keuhai droe
Geunap uroe ro ie mata
– 9 –

Peurangoe jroh saboh alamat
Akai gitthat majeulih bahsa
Lidah paseh hana padan
Le dukaan mitna suka

Le that geumoe nibak geukhem
Lagi lazem geupoh hawa
Hawa nafsu han geuikot
Sabab teumakot keu Rabbana

Nyang mufakat sit ngon Tuhan
Deungon Syaitan sitree raya
Keu inginan dum geuluwat
Geumar akhirat banci donya

Geutop ‘ayed gob barang kajan
Keudroe geutuan hana geukira
Ureueng nyang mukmin nyankeu bagoe
Nabi geutanyoe pocalitra

Arti iman mit lon seubut
Lon boh bacut ngon peujaga
Adat takeumeung keu seuleusoe
Kalon keudroe nyangka nyata

Dalam hikayat Akhbarul Karim
Sideh polem keumah bicara
Laila haillallah
Saboh kisah ka samporeuna        – 10 –

Tambeh Iman ka seuleusoe
Nyang jinoe Tambeh Taqwa (2
Beuta takot that keu Tuhan
Beuro sajan ngon ie mata

Faidah taqwa dua blah bagoe
Ngo he adoe kalam Rabbana
Faidah nyang phon Tuhan pujoe
Barang kasoe nyangna taqwa

Dua neupeulahra nibak sitree
Teuma nyang keulhee neu tulong gata
Nyang keupeuet han neubri sosah
Rizki mudah neu karonya

Keulimong neubri amal shaleh
Tuhan peuleubeh pangkat Syuruga
Keunam deesya habeh ampon
Tujoh Tuhan gaseh keugata

Keulapan thaat Tuhan teurimong
Nyang sikureueng neubri mulia
Nyang keusiploh sukaan that
Teungoh seukreuet geutueng nyawa

Nyang keusiblah neu peujeuoh
Han neubri roh lam Nuraka
Nyang duablah teutap lam Jannah
Han meuminah dalam Syuruga

– 11 –

Ureueng taqwa khairul sa’adah
That meutuah akhe donya
Makna taqwa tatinggai hareuem
Nyang wajeb dum takeureuja

Miseue hikayat Sultan Ibrahim
Ibnu Adham nyang that taqwa
Jikheun uleh aneuk Adam
Taduek sajan lon Maulana

Supaya meutamah keulon eleumee
Lon meuguree  he Maulana
Seuot Ibrahim nyan neujaweueb
Lon peuet peue buet susah raya

Beureukat lon teupeue nyang 4 peue nyan
Bahle sajan lon ngon gata
Toh-toh peuet peue he ya Saidi
Jaweueb neubri nyang peurtama

Teupike lon yoh zurriyat
Yoh geupeujeuet nyawong dumna
Teuma geubagi dua kawom
Seureutha geukheun meunoe kata

Nyawong bandum dua kafilah
Saboh lam Jannah asoe Syuruga
Nyang saboh treut asoe Jahannam
Hana troh pham lon ho geuba        – 12 –

Adat meuhat asoe Jannah
Hanpeue sosah duka cita
Keudua teupike masa geupeujeuet
Yoh dalam pruet Ibu hamba

Oh sare lheueh geuboh nyawong
Malaikat tanyong jaweueb hana
Gata peujeuet makhluk nyoe
Takheun jinoe bahgia ceulaka

Nyanpi dilon hanlon tuban
Bahgiaan ngon ceulaka
Keuteulhee watee geutueng nyawong
Malaikat tanyong dua peurkara

Ureueng mate nyoe hanatroh pham
Saleh Islam saleh hana
Nyanpi jaweueb hana geubri
Dilon pakri saleh teuma

Teuma nyang keupeuet lom geubahgi
Islam kafe di padang mahsya
Nyanpi dilon hana meuphom
Siri kawom saleh hamba

Nyankeu peuet peue ulon teupike
Bak han bahle sajan gata
Nyankeu aneuk beuta ingat
Nyang khairuz Zat sit taqwa
– 13 –

Tambeh taqwa ohnoe tamat
Jinoe Murtad racon tuba              3)
Nibak murtad mangat mate
Amal hanle habeh binasa

Ureueng murtad haroih geupoh
Hana saboh meitueng bila
Sidroe ureueng binoe murtad
Nabi yue taubat sigra sigra

Meunghan jitaubat geupoh mate
Meunan Nabi neu meusabda
Tuan ‘Aisyah poriwayat
Yoh prang Uhud teungoh bungka

Kata Burdah sahbat Nabi
Deungo akhi saboh khabar
Siuroe Nabi lon neusuroh
Neuyue jak poh manusia

Ureueng meukawen deungon Ma Ui
Ji peuhaleue peurumoh Bapa
Kakoh takue jih beurijang
Bulueng limong teuma areuta

Miseue rampasan nibak kafe
Arta nyang hase bahgi lima
Seumanoe bek seumbahyang hanle
Kajeuet keu kafe asoe Nuraka        – 14 –

Bekta tanom sajan Iseulam
Kafe jahnam horeumat hana
Ureueng murtad bateue nikah
Seumbahyang hansah bateue puasa

Islam gadoh nikah hanle
Jeuet keu kafe agam dara
Ureueng murtad proehai mate
Hana meile tatueng pusaka

Kareuna puntong nibak wareh
Gata ngon jih laen agama
Nyankeu aneuk beuta ingat
Lon kheun murtad racon tuba

Bacut keunong ubak badan
Hanjan sumaban mate pahna
Beuta deungo he aneuk droe
Lethat bagoe jeuet keutuba

Nibak lethat ulon teusimpan
Qaulan f’iklan buet ngon kata
Lhee ‘Iktiqeuet dalam hate
Beujroh pike beugot kata

Oh meuhimpon ban lhee bagoe
Hase jinoe peuet ploh lima
Saboh saboh pi ek wafeuet
Got ‘iktiqeuet got ngon kata

– 15 –

Got nyang hase ngon peurbuatan
Ekcit karam Iman gata
Nyanpi meuhimpon seb ngon saboh
Meicit geupoh geutueng nyawa

Jinoe kukheun saboh-saboh
Deungo beujroh aneuk raja
Phon ‘iktiqeuet qadim ‘alam
Bahru Tuhan dilee hana

Nalom Nabi lheueh Muhammad
Nyan murtad ka ban tiga
Sifeuet duaploh wajeb bak Tuhan
Dijih jikheun tan sifeuet hana

Meunan ‘iktiqeuet dalam hate
Tuhanku Rabbi jikheun na rupa
Tuhan ngon insan jikheun Itihaad
Sit meusambat cre neuhana

Atawa jikheun cre ngon insan
Jikheun Tuhan tuboh neuna
Alat manyenan jikheun han hareuem
Atau jikheun haleue bak raja

Atawa jikheun meita deungo
Sitmie haipo eue oek gata
Ji ‘iktiqeuet haleue meureubot
Na jitakot manusia        – 16 –

Ubak raja mei meureubot
Ta peutakot nakong agama
Meungnyo tabri keu asoe nanggroe
Meungbek keudroe ta meuhawa

Syuruga Nuraka ji ‘iktiqeuet tan
Bangket pihan page teuma
Atawa syok ubak hate
Agama kafe saleh beuna

Miseue Yahudi ngon Nasrani
Kafe kitabi nyum beunarnya
Amar Nahi syok bak hate
Miseue janji Syuruga Nuraka

Ji peujayeh huruf Tafse
Hadits Nabi ji peuhina
Atau jayeh hukom Syar’ak
Nyang hana hak ji peuleumba

Haleue zina ngon jeb arak
Haleue tacok wase kuala
Atawa mungkar wajeb Seumbahyang
Laen sibarang Haji Puasa

Ureueng Islam jikheun kafe
Murtad hase deungon kata
Hana kutakot keu Potallah
Hana kugundah keu Nuraka
– 17 –

Uroe kiamat han kutakot
Tuto karot jeuet binasa
Leubeh falak nibak eleumee
Murtad tathee ka binasa

Atawa ji jaweueb tuto insan
Leubeh kuhan ngon kuyue gata
Sabab kuyue gata ‘ibadat
Leubeh pangkat ku-ek raya

Atau jikheun nyan keu rakyat
Ku gaseh that lon keugata
Leubeh nibak aneuk lam jasad
Sulet jithat meung jikata

Atawa cita buet nyang kafe
Hate seu-u hana tara
Atawa jipateh buet nyang gohlom
Miseue kheun Nujum nyang gohlom na

Atawa syok jikheun kafe
Meunan pile saboh bangsa
Atawa han jitem peubeuet
Ureueng meununtut kayem teuka

Atau jikheun euntreut keudeh
Bak teumpat jeh nyan tateuka
Atawa jikheun han kutuban
Arti Iman pakri makna        – 18 –

Atau jikata zina han hareuem
Atau jikheun mei enanya
Meitapoh gob bahle bek salah
Meibri seudeukah barang peue arta

Bahle meuwoe pahla keujih
Mei taseumah patong beurhala
Atau mei peubuet miseue buet kafe
Tali lihe ngon zurana

Nyang hantom na bak ureueng Islam
Bajee macam ureueng Suja
Miseue tajak bak rumoh patong
Agam inong puja beurhala

Seupreuek beureuteh peusaleue abee
Lulon diulee boh kruet pihna
Lam seunangkai jisok sujoe
Aneuk bisoe le bicara

Nyankeu buettan jahiliyah
Buettan salah sia-sia
Nyankeu bandum nyang murtad
Beuta ingat agam dara

Proe hai teukeudi roh murtad
Beurijang taubat bek binasa
Bukit murtad bak buet lidah
Astaghfirullah le tabaca

– 19 –

Beukit murtad bak ‘iktiqeuet
Meungucap syahadat le beusigra
Bukit murtad bak peukeurjaan
Taboihle nyan bekle keureuja

Seurta takheun Astaghfirullah
Meungucap kalimah le bandua
Tambeh nyang lhee kakeu simpan
Beureukat janjongan nyanpo sabda

Tambeh nyang keupeuet jinoe lonboeh     4)
Beule tasuroh bak agama
Sangkira tan eleumee droe
Beuta peutoe bak ulama

Beuta temjak meuseuki jeuoh
Bahle tabloh laot raya
Bukit meulinteueng laot apui
Haroih talangoe meunghan binasa

Keudroe tapubuet gob tasuroh
Toe ngon jeuoh hana bida
Salah tateungah beunar tasuroh
Amar bilmakruf wajeb bak gata

Han beutango sabda Nabi
Ubak ‘Ali nyang murtadla
Lazem bak gata he ya ‘Ali
Buet nyang mungkar teugah beuna        – 20 –

Beuthat meudharat keu gata meuwoe
Tuhan sidroe tulong gata
Beuket han-ek nyan tapeucrok
Ta tunyok-tunyok pi meumada

Riwayat Umar Ibnu Khattab
Neu riwayat khabar saidina
Jebra-i kheun nyan ubak lon
Akhe zameun saboh masa

Ureueng lakoe pubuet jeuhat
Dum jiseutot tuha muda
Hana sidroe nasoe teugah
Buettan salah ji keureuja

Ji eue ngon mata ureueng meureubot
Dum jiturot nafsu hawa
Seumbahyang pitan ngon khianat
Dum amanat ji peutuka

Ureueng lakoe nyan kon umat lon
Amal jidum ka binasa
Meunankeu sabda ‘Alaihissalam
Ingat polem nyang bahgia

Meungka ta eue buet nyang salah
Han taubah ta sereuta
Gadoh bak hate sulus iman
Saboh katan tinggai dua
– 21 –

Barang kapeue buet nyang salah
Tateugah bek malee mata
Meunghan meunan ingat keudroe
Page dudoe keunong syeksa

Firman Tuhan Hadits Qudsi
Ubak Nabi neu calitra
Hanku kalon ureueng nam droe
Page dudoe han kukira

Kubri keujih ‘azeueb peudeh
Phon nyang paleh Seumbahyang hana
Keudua ureueng darohaka keu nangmbah
Teulhee nyang mubantah ngon syeedara

Nyang peupatoh silaturrahim
Keupeuet nyang makeuen Malul Yatama
Nyang pajoh arta aneuk yatim
Limong nyang dhalem meureubot raya

Keunam jeunamei nyanghan jibri
Inong jitaki ji enanya
Nyankeu nam droe banci kuthat
Di akhirat ku peusyeksa

Riwayat Umar Ibnu Khattab
That bit ‘ajab saboh calitra
Ulon teudeungo nibak Nabi
Bek Allah bri ji meudo’a        – 22 –

Limong droe ureueng do’a lon takot
Miseue ribot tajam do’a
Tujoh lapeh langet leupah
Uyub ‘Arasy teurheunti do’a

‘Arasy peuseumbah ubak Tuhan
Meunoe jikheun bak Haq Ta’ala
Ya Tuhanku ji meulakee
Sit patot mei takaronya

Firman Allah ubak ‘Arasy
Ka-iem dikah hanle geunta
Deumi ‘Izzatku ngon beusaran
Sidhalem nyan jinoe kusyeksa

Meunghan kusyeksa sidhalem nyan
Nyokeu kaman dhalem raya
Seuot Nabi Umar tanyong
Do’a ureueng geu-enanya

Keudua do’a aneuk yatim
Baleh gohlom mate bapa
Teuma nyang keulhee do’a nangmbah
Uyub ‘Arasy keudeh lanja

Teuma nyang keupeuet do’a Alem
Meukabui polem do’a ulama
Keulimong ureueng hafai Quru’an
Meukabul hanjan sikleb mata

– 23 –

Limong ureueng nyan beuthat tatakot
Geuteumeung carot meuhat binasa
Nyankeu hak gob beuthat tatakot
Nabi Dawod saboh masa

Calitra Wahab bin Munnabah
Droe nyan kisah Nabi mulia
Nabi Dawod bacut salah
Sujud bak Allah padumna lama

Hanco kulet luroh asoe
Leumah tuleueng dhoe neu ulawa
Mingga ampon nibak salah
Firman Allah wahyu teuka

Wahe Dawod peubeudoh ulee
Meu’ah bak kee kaku ridla
Ya Tuhanku gata ampon
Nyang salah lon nibak gata

Nyang salah lon nibak insan
Pakri padan ya Rabbana
Lon lakee meu’ah pihan patle
Jih kamate trebka lama

Firman Tuhan jak bak kubu
Jakleh ngadu muhon ridla
Nabi Dawod jak bak jeurat
Muhon syafaat neulakee ridla        – 24 –

Bak ureueng lam kubu wahyu Tuhan
Ka ji izin kaji ridla
Teulheueh nyan neuwo troh u teumpat
Lom hadlarat neu meusabda

Wahe Dawod hana khusus
Sit hana deueh lakee gata
Ta riwang lom tajak lakee
Bek ban dilee umum kata

Beuta peugah buet nyang salah
Lakee meu’ah beumeupeue deesya
Teulheueh nyan Nabi lamjak lakee
Neupeu teuntee salah nyangka

Oh jideungo neukheun meunan
Mar jikheun han meu’ah gata
Teuma Nabi peugah bak Tuhan
Hanle jiizin ya Rabbana

Teuma Nabi sujud bak Tuhan
Troh peuetploh thon bak geukira
Lawet that Nabi sujud bak Tuhan
Tron fireuman bangket keupala

Kaku ampon deesya dikah
Bekle gundah hate lam dada
Bak gata Po lonka meu’ah
Nyang salah bak manusia
– 25 –

Nyang jih pika ku peumeu’ah
Kubri keujih lethat pahla
Na tatupeue salah Nabi
Ngo lon kheun kri asai mula

Nabi Dawod teungoh neujak
Jih meureupok dirot raya
Teungeuet dirot jih teupipoe
Nabi peugoe hana jaga

Teuma neu cukeh ngon ujong gaki
Ji beudohle lalu jaga
Nyankeu salah Nabiyullah
Bak Potallah han neuridla

Beuthat meu’ah sabe insan
Nibak Tuhan han neuridla
Poku Tuhan tueng peuneudah
Sabab neugaseh that keu hamba

Adat tapoh luka asoe
Padumna seungkoe bak Rabbana
Adat mate han neutem rugoe
Diet neupasoe siribee dinar

Siribee dinar limong katoe
Nyan sidroe-droe neuboh hareuga
Bek meupake sabee insan
Ingat taulan nyang bahgia        – 26 –

Adat meudakwa konna hukom
Bekcit khemkhom ta meudawa
Tambeh nyang peuet ka seuleusoe
Limong jinoe lon calitra

Saboh habeh saboh meugantoe
Meunggoh seuleusoe mantong lanja
Na tamse ban riyeuek bicah
Miseue ulah bade teuka

Jeh goh leupah nyoeka laen
Ban ujeuen tren di udara
Meungna mantong reudok digle
Mantong sebe ujeuen teuka

Meungna mantong peungeueh hate
Jeuetkeu sabe kira mira
Tambeh limong nyoe         5)
Leubeh fadlilah that ulama

Laila haillallah
Jinoe lon peugah pangkat ulama
Ureueng nyang mukmin leubeh pangkat
Leubeh martabat nyang ulama

Seupeurti ban sabda Nabi
‘Abed ngon wali leubeh ulama
Tuntut eleumee sileubeh thaat
Nibak sunat Seumbahyang gata

– 27 –

Calitra Anas aneuk Malek
Ngo he adek khaba Saidina
Takeumeung eue ureueng meurdehkaan
Ureueng nyang han keunong Nuraka

Eue bak ureueng nyang meununtut
Ureueng nyang beuet bak ulama
Jijak meununtut saboh langkah
Saboh madinah mideuen Syuruga

Beungoh pi ampon seupot ampon
Malaikat kheun ka meurdehka
Sabda nabi ‘alaihissalam
Lethat insan tamong Syuruga

Ji tamong Syuruga mantong mantong
Sahbat tanyong soe Maulana
Jaweueb Nabi nyan neu peuceh
Soe nyang gaseh keu ulama

Na bube drah gaseh lam hate
Teuma page masok Syuruga
Lom meusabda Po janjongan
Lethat insan masuk Nuraka

Ji tamong Nuraka mantong mantong
Sahbat tanyong miseue nyangka
Teuma neukheun uleh Nabi
Ureueng nyang banci keu ulama        – 28 –

Saboh hadiah keunan tabri
Dua blah Nabi meungka eksa
Siuroe simalam siribee rahmat
Neu peutron keu umat nyanglam donya

Sikureueng reutoh 99
Nyan nyang bulueng di ulama
Teuma nyang saboh keusoe laen
Jeueb uroe tren hana reuda

Meunan keusabda panghulee Nabi
Beuthat bakeuti keu ulama
Khabar Sulaiman ibnu Dawod
Tango bacut lon calitra

Raja Sulaiman neu beurangkat
Lethat rakyat marga satwa
Neu beurangkat ateueh kurusi
Angen peume sagai donya

Cicem teureubang jeuet keu payong
Ji peunawong Nabi mulia
Binatang uteuen jen ngon insan
Wie ngon unun ireng raja

Teuma teuka sidroe ‘abed
Jidong dinab Nabi mulia
Teuma jikheun keu Nabi Sulaiman
Raya keurajeuen neubri keugata
– 29 –

Nabi Sulaiman neungo narit
Teuma lom ‘abed ji meukhaba
Saboh tasbeh bak ureueng ‘alem
Leubeh nibak dum keurajeuen gata

Kheurajeuen neubri keu aneuk Dawod
Hana bacut tinggai dum pahna
Nyang teuseubeh han-ek hilang
Meungna mantong kitab ulama

Na teurseubut saboh hikayat
Lam Kitabul Barkat sinan nyata
Sidroe ureueng uroe kiamat
Tuhan hisab ‘amal nyangna

Brat that amai keujahatan
Neuyue ba sijih nyan lam Nuraka
Teungoh jiba firman Hadlarat
Peudong siat cuba tanya

Natom jiduek bak teumpat ‘alam
Pakri na jitem peurab ulama
Meungna jiduek yoh sabohroe
Bahle jinoe ku ampon deesya

Bak ureueng ‘Alem jitueng syafa’at
Bekka intat lam Nuraka
Jebra-i tanyong bak ureueng nyan
Teuma jikheun siblet nyangna        – 30 –

Jebra-i kheun gata nyang thee
Troh eleumee siblet jiduek na
Cuba tanyong lom ubak jih
Na jigaseh keu ulama

Jebra-i tanyong nyan jikheun tan
Lom fireuman Allah Ta’ala
Cuba tanyong na jimakeuen
Sajan ‘alem yohlam donya

Jebra-i tanyong nyan jikheun tan
Saleh saboh nan cuba tanya
Bukit sabohnan jih ku ampon
Teuma jikheun lon laen nama

Hai Jebra-i ka tanyong lom
Roh jih kawom ngon ulama
Jebra-i tanyong jikheun meunoe
Kawom kamoe kon ulama

Beuket meunan he Jebra-i
Jakleh kame lam Syuruga
Ku ampon jih sabab sijeh
Sebab jigaseh keu ulama

Muhammadur Rasulullah
Ohnoe kisah khabar ulama
Bacut bacut lon meuteuoh
Meungbek gadoh janji nyangka

– 31 –

Makanan bacut keunyang mangat
Meungka lethat hana guna
Untong untong jeuet meudlarat
Meungka lethat hanle hareuga

Han taingat keunong cueale
Han soeme jeueb jeueb kuala
Ohka jime dalam gampong
Eungkot ikat beunteueng jikheun rata

Tamong jurong nyoe teubiet jurong jeh
Eungkot paleh nyoeho jiba
Hai Lem meukat bek tame keunoe
Hana soebloe eungkot gata

Meunan keudum sit jeueb jeueb pat
Cuale lethat tan meuguna
Masa yohmiet nacit soebloe
Ohle dudoe hanle hareuga

Nyankeu lonboeh paneuk kisah
Bek that payah bak tabaca
Mit pileubeh soehan galak
Le pihan glak soe nyang geumar

Dilon londong peurteungahan
Mit pisitkon le pihana
Bacut sapat lon peuhimpon
Miseue geususon papeuen behtra        – 32 –

Dilee keurapat papeuen cut-cut
Bube najeuet ohka leungka
Meunankeu mise hikayat lon
Teungku ampon bekle khaba

Tambeh limong ohnoe simpan
Patot nyang nam jinoe tamula
Tambeh nyang keunam Barrul Walidin
Nyang that yakin keunang bapa

Rap ngon Tuhan taikot Nabi
Soe bakeuti keu ayah bunda
Teulheueh bak bahya ‘azeueb akhirat
Lagi beureukat areuta donya

Badan ‘afiat saket gadoh
Soe nyang satoh ibu bapa
Khideumat nangmbah sit wajeb that
Umu beureukat lagi kaya

Dalam donya nyan faidah
Tapak nangmbah pinto Syuruga
Ngo he aneuk saboh hikayat
Nabi Muhammad nyang calitra

Kata Yafi’i rahmatillah
Bak Rasulullah neungo sabda
Masa keurajeuen Nabi Sulaiman
Tron fireuman keupadanya
– 33 –

Ka deungo he aneuk Dawod
Jak kateubit u kuwala
Kumeung peuleumah saboh peurusahan
Mantom kakalom dilee nyangka

Kango pitan ka eue hantom
Ili bandum deungon teuntra
Nabi Sulaiman neu beurangkat
Ireng rakyat marga satwa

Jen ngon insan ireng sajan
Binatang uteuen asoe rimba
Sigala cicem han teurkhimat
Padum rakyat han teurkira

Nabi Sulaiman troh u pasi
Neuyue euele lam-lam bangka
Peue meuteumeung tame keunoe
Beuta puwoe ku eue rupa

Ubak kamoe firman Tuhan
Neu kheun piasan disinoe na
Habeh jiluem lam-lam bugeng
Lam umpung bieng jijak mita

Habeh sagoe dum neuyue cah
Habeh lam nipah neuyue mita
Hana sapeue na meuteumeung
Jiwoe rijang peudeh mata        – 34 –

Ya Nabiyullah ka meulihat
Hana sapat na meugala
Habeh meukalon lam-lam rubek
Habeh meusidek lam-lam bangka

Habeh meulop peureudee geutue
Hana sapeue he Maulana
Ban Nabi ngo narit meunan
Neu meuhoi yohnyan sigra sigra

Wahe ‘Afriet cuba seunom
Jak takalon uleh gata
Ta eue beujab dalam laot
Jak beuleugat jinoe lanja

Peue meuteumeung tame keunoe
Beuta puwoe ku eue rupa
Jen ‘Afeuret ikot suroh
Lalu jibloh laot raya

Hana sapeue na meungantoh
Lalu jibeudoh jak peukhaba
Ya Nabiyullah hana sapeue
Ulon teuwo peudeh mata

Teulheueh nyan neuyue ‘Afeuret laen
Cuba seunom uleh gata
Beutreb tawoe beujeuoh tajak
Peue meureumpok keunoe taba

– 35 –

‘Afret seunom ban saboh laot
Jiplueng eungkot sare subra
Nyanpi hana sapeue meuteumeung
Jiwoe rijang jak peukhaba

Miseue narit ‘Afeuret bunoe
Hana sapeue ji eue nyangna
Lheueh nyan neuyue panglima Ashfan
Nyan that ‘arif bin Barkhiya

Wahe Ashfan wazir nyang meugah
Cuba ilah uleh gata
Kareuna gata ahli hekeumat
Lagi keuramat pangkat aulia

Sabab ta’amai Ismul ‘Adhim
Karonya Tuhan pangkat mulia
Teulheueh nyan Ashfan neubloh laot
Troh bak pusat laot raya

Seuntreut meuteumeung saboh qubah
Sangat indah hana tara
Meuteumeung saboh kubah gafo
Puteh meulo-lo miseue miga

Rupa miseue geurok peutoe
Peuet sagoe pinto teurbuka
Pinto ji peuet indah hanban
Nyang phon intan dua meutia        – 36 –

Teulhee yakut warna mirah
Rupa indah hana tara
Nyang peuet teuma papeuen pinto
Zaburjad hijo gotthat rupa

Bitpi bandum pinto teuhah
Ie leupah u dalam hana
Teuduek bak pusat laot bahrullah
Dalam Burzakh antara dua

Antara ie tabeue masen
Hantom troh jen manusia
Han jitupatle ‘Afeuret
Ka dua blet jijak mita

Dua blet sunom laot teumboih
Han-ek troh bak muda balia
Panglima Ashfan katroh sampoe
Neucok jinoe kubah mulia

Lalu neujok ka neu puwoe
Neu peujaroe ubak raja
Neu peuduek dinab Nabi Sulaiman
Indah hanban tamse Syuruga

Sigala rakyat tahe keudroe
Teukap jaroe manusia
Nabiyullah teuma neu tamong
Neu eue teudong muda bahlia
– 37 –

Neu eue teudong lam Seumbahyang
Teungoh bimbang keu Haq Ta’ala
Rupa indah nibak pudoe
That samlakoe hana tara

Seubayek insan sineujroh umat
Meunasabat bintang kala
Nabi Sulaiman meubri saleum
Lalu teuseunyom muda bahlia

Assalamu’alaikum muda nyang indah
Soejak keubah u laot raya
Wa’alaikum salam warahmatullah
Gaseh Allah meuteumeung gata

Nabi Sulaiman lom neusudi
Soe salehme keunan gata
Ngon sabab peue nanggroe teuhpat
Pakon seubab geuboih gata

Pane makanan nyang tapajoh
Tatop tuboh pane ija
Lalu jiseuot muda samlakoe
Cahya gigoe ban suasa

Suara mangat sang hareubab
Lagham ‘Arab juru bahsa
Phon neukheun Ya Nabiyullah
Nanggroe Basrah he Maulana        – 38 –

Bahlon peugah phon silsilah
Takdirullah saboh masa
Ulon teusidroe tuanku tinggai
Hana sagai dilon syeedara

Abi lon lape tuanku droe
Umi kamoe seupot mata
Tujoh ploh thon ulon teukhadam
Uroe malam lon peulahra

Mita rizki sagai nanggroe
Ulon teupuwoe he Maulana
Rezki habeh umu sampoe
Umi kamoe dilee bungka

Lheueh matee Ma tinggai Abu
Keulon tuanku neu tinggai do’a
Meunoe neu kheun teungoh sukreuet
Lon ngo neubeuet he Maulana

……..
……..   ,  ,
Ya Tuhanku deungo kamoe
Aneuk meunyoe ta peulahra

Tabri umu beulanjut that
Beutreb taat jih keugata
Neu kheun pilheueh ajai sampoe
Woe u nanggroe keukal baka

– 39 –

Padum lawet lheueng nibak nyan
Saket teuma Abi hamba
Abi pina do’a keulon
Meunoe neukheun he Maulana

……    …….   (hana trang)
……    ……….
…….   ……… …… ……..
………….. ………  …….

Ya Tuhanku tabri aneuk lon
Beuji seuon sabda gata
Bak teumpat nyanghan troh Syaitan
Takeubah sinan Ya Rabbana

Ma pimate Du pikatan
Nyan janjongan dilon pusaka
Lheueh lon tanom bandua droe
Bak siuroe lonjak ulawa

Ulon teupike tinggai sidroe
Ulon teumoe ro ie mata
Ma pimate Du pikatan
He janjongan meugrak rasa

Teuma ulon jak u pasi
Ulon ili u kuala
Ulon teukalon saboh kubah
Rupa indah hana tara        – 40 –

Dinab lon teudong pinto teuhah
Mate lon dahsyah menyen mata
Ulon teutamong teuma u dalam
Lon eue macam pakri rupa

Teukeudirullah peurintah Tuhan
Lon dalam nyan he Maulana
Malaikat cok kubah gapu
Geume laju u laot raya

Di pusat laot lon geukeubah
Ya Nabiyullah teutap hamba
Lom neu tanyong Nabiyullah
Pajan geukeubah muda bahlia

Padum natreb gata keunan
Dumna zameuen siri masa
Nabi Ibrahim masa geutroh lon
Ohnan zameuen cuba kira

Nabi Sulaiman buka tarekh
Nue peusareh neu eue daftar
Na siribee peuet reutoh thon
Dumna zameuen keunan gata

Rupa mise kanak-kanak
Mantong budak gohlom tuha
Lom neutanyong uleh Nabi
Pane rezeuki muda bahlia.
– 41 –

Tuanku makanan sitka meuhat
Cicem intat jeueb kutika
Cicem hijo me dibabah
Siulah-ulah saboh qariba

Raya jiban ulee insan
Jeuneh makanan di dalamnya
Makanan mameh rasa lazat
Madu zabet ngon khureuma

Laen nibak nyan dumpeue sare
Lethat bagoe makanan Syuruga
Ulon teumakeuen nyan lon pajoh
Mangat tuboh ladat nyawa

Hantom tutong sijuek badan
Teungeuet pitan najih hana
Hana teumakot dalam hate
Bitpi sunyi ngon lon hana

Habeh khaba muda samlakoe
Nabi jinoe lom meusabda
Soegot taduek sajan kamoe
Ngon tawoe u laot raya

Ya Nabiyullah bahle bak sot
Neuyue intat he Maulana
Wahe ashfan jakleh puwoe
Keubah jinoe baksot nyangka        – 42 –

Hana galak muda samlakoe
Sajan geutanyoe nekmat hana
Jak takeubah Barrul Walidin
Nyang that yakin keunang bapa

Barrul Walidin ohnan tamat
Ingat sahbat dum teurata
Nyankeu faidah Tuhan neubri
Soe nyang bakeuti mubahgia

Umu lanjut mate treb that
Sabab beureukat do’a nang bapa
Laen nibak nyan rezeuki mudah
Tango lon peugah saboh khaba

Syaikhul Islam poriwayat
Soe ingat pusaka kaya
Sidroe kawom Bani Isra-i
Katoe mate umu tuha

Aneuk jilhee ureueng lakoe
Bak siuroe saket bapa
Areuta pina kaya han that
Ban nyang babat ala kada

Oh saket Du lhee jisapat
Lalu marit aduen tuha
Na tadeungo adoe Teungku
Tabri Du bahlon peulara

– 43 –

Areuta pihan lon meunafsu
Adoe Teungku tueng keugata
Areuta nyan ta meubulueng
Adoe tatueng bagi dua

Padum lawet ji khideumat
Tinggai rahmat ajai teuka
Du jimeta dalam jaroe
Malam uroe tro ie mata

Areuta habeh adoe jitueng
Ji meubulueng bagi dua
Di Teuku nyoe hana sibreueh
Sit hana weueh keu areuta

Adoe makmu kaya limpah
Tuan nyoe sah dalam papa
Geunap uroe inong carot
Lam meupot-pot ji seurapa

Uroe malam sit jitimplak
Habeh tapak digata areuta
Arta tabri dum keu adoe
Pajoh jinoe tungoe bangka

Seuot lakoe bek that gundah
Harap keu Allah Tuhan kaya
Neubri laen keu geutanyoe
Tuhan gantoe siribee ganda        – 44 –

Inong seungab ka ji-iem droe
Hana sapeuele meukhaba
Meunankeu yakin dalam hate
Potallah bri leumah rahsia

Bak simalam ji meulumpoe
Teuku sidroe manusia
Geupeu leumah saboh teumpat
Sinan meuhat na peudana

Tacok disinan dinar siribee
Sit meuteuntee geucalitra
Meupat teumpat meuri sagoe
Suboh uroe lalu jaga

Teuma ji peugah bak ureueng binoe
Ban nyang lumpoe leumah rahsia
Lalu ji seuot ureueng binoe
Pajoh lumpoe nyan digata

Inong beungeh nibak baroe
Agam iem droe hanle khaba
Euntreuet malam pilom leumah
Geujak peugah siribee dinar

Bak malam lhee lom jilumpoe
Tajak adoe kueh peudana
Kalhee malam meuteuturot
Malam nyang keupeuet jijak mita
– 45 –

Ohban jikueh meuteumee guroe
Peunoh asoe ji eue dinar
Teuma jipuwoele u rumoh
Singoh beungoh laen bicara

Suboh uroe jak u peukan
Jibloe ikan siseun dua
Jibloe dua boh eungkot pukat
Jiwoe leugat u rumoh tangga

Teuma jijok bak isteuri
Ji peusiengle jiplah dua
Meuteumeung lam pruet intan dua neuk
Rayek-rayek ban boh angsa

Lalu teupike ubak hate
Intan nyoe bahle kutueng hareuga
Jime u peukan jijak publoe
Ji peujaroe bak syeedaga

Teuma ji marit asoe peukan
Hantom intan bubenoe raya
Rupa pigot hana lawan
Ulah-ulahan intan dara

Adat meupakatdum geutanyoe
Han-ek tabloe beuhabeh areuta
Jiweh dipeukan hana soebloe
Jime jinoe ubak raja        – 46 –

Raja yue seutot asoe peukan
Jinoe intan neuyue hareuga
Hareuga tuanku neuyue khusus
Lhee ploh geudong meueh pomeukuta

Saboh intan nyangka jeuet bloe
Yum jipuwoe meureutoh bahra
Seulheueng nibak nyan padum uroe
Neu lakee bloe lomle raja

Jibohle yum leubeh baksot
Intan nyoe got lagi raya
Namploh geudong meueh mei tabloe
Nibak baroe jroh lagoina

Sikureueng ploh geudong meueh hase
Kaya han sabe ateueh donya
Amma bakdu teuma dudoe
Ureueng lakoe leumah rasia

Ji lumpoe teuka Aulia Allah
Geujak peugah saboh rahsia
Nyankeu balaih that bakeuti
Tuhan neubri keugata kaya

Miseue kata Abi Hurairah
Rasulullah peucalitra
Neukheun baklon Rasulullah
Do’a nangmbah lethat pahla

– 47 –

Barang kasoe Seumbahyang peureudlee
Teuma jilakee do’a keu Poma
Seureuta ngon do’a keu Ayah
Aneuk meutuah ampon deesya

………(do’a nyoe hanatrang fotocopy)
……….    …………    …………
………..     ……..     ……………
…….   …………..  ……………

Nyankeu do’a tabeuet jeueb watee
Aneuk panghulee ampon deesya
Han beutango wasiet Nabi
Keu Tuanteu ‘Ali nyang Murtadha

Limong peue ta eue wahe ‘Ali
Tuhan neubri peungeueh mata
Peurtama tangieng ubak K’akbah
Tuhan tamah cahya mata

Keudua teumpat sujud Seumbahyang
Tuhan bri trang cahya mata
Keulhee ta pandang muka nangmbah
Mata peungeueh neu karonya

Keu peuet tangieng muka ‘Alem
Ta eue kayem muka ulama
Keu limong kayem ta eue ie ile
Tuhan peuhase cahya mata        – 48 –

Syuruga diyub tapak nangmbah
Nabi neu peugah he aneuknda
Nyankeu laba posamlakoe
Nyoe nyang rugoe pobentara

Nyang that rugoe hai aneuk cut
Soe nyang seuot Ibu bapa
Carot bangmbah jeuet keu ubat
Tamse geumat ubak luka

Miseue peunawa ubat racon
Tamse ie mbon diudara
Peue nyang neuyue beuta seuon
Peue nyang neukheun bekta dakwa

Bekta bantah saket hate
Barang kakri droe nyan duwa
Peue tapubuet beuta peugah
Hankeu salah bijeh mata

Ohka neutham ta minahle
Bek weueh hate keunang bapa
Hai aneuk bek tadong sabe
Beuta pike keuhai gata

Niphon cutkon neu peutimang
Niphon seudang troh ‘anraya
Uroe malam neu meupayah
Peue faidah nabak gata
– 49 –

Bukit tanpeue bri neujak geumade
Gata neume beurang ho neuba
Malam neutop bek jamok kab
Peue manfaat na bak gata

Bukit saket seu-uem asoe
Dawok neumoe ro ie mata
Mita ubat sagai nanggroe
Payah rugoe han neukira

Adat rayek neu peukawen
Hana neusyen keu areuta
Bukit mate neukiloe droe
Lhee peuet uroe pungo gila

Digata peue ta meurugoe
Siri sagoe jeuet tadakwa
Nyankeu aneuk pike keudroe
Soemei jinoe balah guna

Soe ek balah guna nangmbah
Cuba peugah kungo nyata
Allah hai aneuk talawan Nang
Bukon sayang bijeh mata

Han tatakot keu Potallah
Talawan Mbah darohaka
Ku eue keulakuan aneuk jinoe
Hana sidroe na bahgia        – 50 –

Ma ngon aneuk han taturi
Ji meupake hanban publa
Beungohseupot meukoh ulee
Kon salah kee salah gata

Pakon dilee gatai asoe
Teuma jinoe lepeue kira
Meunan jikheu aneuk laknat
Ji peudapat Ku jingon Ma

Nyankeu aneuk paleh bulat
Hana sapat na bahgia
Nang ngon aneuk ji meusitree
Ji meutunggee bukit roh arta

Beuthat mate Ma jideuek troe
Meungna didroe nyan jikira
Hanmei leupah meungsikai breueh
Ohta eue weueh tro ie mata

Han jiingat yoh lam teumpe
Ma geumade sagai donya
Adat meungta thee meunan bagi
Ka tauli yohgoh raya

Bahle taboih untong di ie
Bahle tabri geutah ara
Bahle taboih yoh dibijeh
Bek meudaleh katoek tuha

– 51 –

Laila haillallah
Seuot nangmbah raya bala
Seuot nangmbah watee sukreuet
Kalimah hanjeuet nyan jibaca

Masa Nabi ngo lon peugah
Nan ‘Alqamah kawom Anshara
Tango kukisah tuan tuan ‘Alqamah
Seuot nangmbah darohaka

Peue Ma neukheun hana neu ikot
Beungoh seupot kayem subra
Droe nyan ‘alem le ijtihad
Lethat taat Seumbahyang Puasa

Seudeukah pile hana padoe
Beurang kasoe jamei teuka
Padum lawet dalam rahmat
Sit lam mangat hate suka

Hantom peuneng pimeung ulee
Hantom layee neu ie muka
Teuma saket bak siuroe
Neupoh-poh droe hana tara

Peurumoh neuplueng pantah-pantah
Bak Rasulullah neujak peukhaba
Sabda Nabi ubak shahbat
Jak peuingat nyan syeedara        – 52 –

Neuyue tamong lhee droe sahbat
Nyang phon meuhat nan ‘Umara
Keudua Bilal keuteulhee Shuhib
Tamong bektreb tajak sigra

Tajak peuingat kalimah Syahadat
Na seulamat nibak bahya
Teuma neuyue kheun Laila Haillallah
Teutap lidah tan suara

Hana meugrak geu-geu bibi
Ubak Nabi geujak peukhaba
Pakri laku keu ‘Alqamah
Han jeuet kalimah nyan beubaca

Han jeuet neukheun kalimah Syahadat
Pakri mangat he Maulana
Neu tanyoengle Rasulullah
Mantong ayah Ibu bapa

Mantong Ibu he Habibi
Ayah mate trebka lama
Teutapi tuha Ibu neuthat
Sit meudlarat keunoe taba

Jakleh tatueng keunoe rijang
Bukon that sayang ureueng naz’a
Bukit han-ek neujak keunoe
Bahle kamoe keudeh taba
– 53 –

Bileue beudoh jaktueng Ibu
Ban nyang laku yue Saidina
Wahe Nekpo E Nek Teungku
Tajak laju bak Saidina

Aneuk naz’a apoh apah
Neuyue meulangkah keudeh gata
Meunghan tajak sajan kamoe
Nabi keunoe neu peuteuka

Ponek beudoh neucok tungkat
Neujak leugat bak Saidina
Oh sajan troh ubak Nabi
Neu sujudle bak Saidina

Tadeungo he Ma ‘Alqamah
Beuta peugah nyang sibeuna
Pakon meunan aneuk teunyan
Peue peurusahan dilee nyangka

Pakon hanjeuet jikheun kalimah
Peue na salah nyang thee gata
Ya Habibi hana salah
Lethat seudeukah aneuk hamba

Seumbahyang pile peureudlee sunat
Banyak zakeuet ngon puasa
Sit geunap thon jijak Haji
Thawaf Sa’i hana reuda        – 54 –

Teutapi na bacut salah
Kayem meubantah deungon hamba
Dijih peurumoh nyang jipateh
Ji peujayeh kamoe tuha

Peue nyang lon kheun sit jijaweueb
Lon lam ‘azeueb hate luka
Ban neudeungo ponek peugah
Rasulullah Neu meusabda

Nyangkeu sabab di ‘Alqamah
Kreueh babah sabab lawan Ma
Nyankeu hanjeuet seubut kalimah
Ceukang lidah kuat meudakwa

Jinoe hai Bileue himpon kayee
Angkot dujee dum barangna
Teuma marit Ma ‘Alqamah
Ya Rasulullah dujee ho taba

Ku keumeung tot aneuk teunyoe
Bekle dudoe keunong syeksa
Ya Nabiyullah bek meumeunan
Hai janjungan han-ek lon saba

Bukit salah jih nibak lon
Ku peuampon he Saidina
Meunghan ta ampon aneuek teunyoe
Habeh bateue ‘amal nyang na

– 55 –

Puasa zakeuet han faidah
Seumbahyang seudeukah hana guna
Gadoh pahala thawaf sa’i
‘Umrah haji sia-sia

Sabda Nabi lom bak Bileue
Tajak jinoe lom ajaran
Bilal pitroh bak ‘Alkamah
Laila Haillallah neuyue kata

‘Ulkamah kheun Laila Haillallah
Taman kalimah gadoh nyawa
Tuan ‘Ulkamah kakeu mate
Neu tamong Nabi sigra-sigra

Geupeu manoe geuboh kafan
Seumbahyang sajan ngon Saidina
Teuma geume u bineh uruek
Nabi neuduek Neu meusabda

Tadeungo he dumna sahbat
Ku peuingat dumna gata
Beurang kasoe peuleubeh peurumoh
Teuma nangmbah ji peuhina

Meuhat keujih laknatillah
Malaikat bahrullah neu seurapa
Asoe langet asoe bumoe
Hana sidroe nyang han seurupa        – 56 –

Malenkan taubat ubak Allah
Beuji seumah Ibu bapa
Ridla Ibu ridla Allah
Meung amarah meuhat ceulaka

Laila Haillallah
Beumeu tuah aneuk hamba
Beuji ikot ban nyang kisah
Bek seuot Mbah geunap uroe

Wahe aneuk tangke hate
Bek Allah bri seuot kamoe
Tambeh nyang Nam Alhamdulillah
Tambeh tujoh tango jinoe        7)

Adab guree sinoe lon peugah
Leubeh bak Nangmbah geutanyoe
Ikot suroh peujeuoh teugah
Buet nyang salah bekta peutoe

Adab lethat han lon seubut
Malenkan bacut lon boh sinoe
Teutapi sinoe ulon teusimpan
Lahe baten dua bagoe

Adab lahe beuta ikot
Peue neuyue buet bek tacok droe
Meuseuki jeuoh bekta bantah
Beuthat payah bahle rugoe
– 57 –

Peue neulakee bekta syen-syen
Teuka laen Allah gantoe
Bukit taduek di hadapan
Teurtib simpan mueng ngon jaroe

Eh bek sapat makeuen meunan
Ban atoran cok kada droe
Bek talalu di hadapan
Malenkan panyot di jaroe

Bek santeuet seueh Seumbahyang sunat
Bek tamarit beurang kapeue
Meunggoh neu tanyong ta-iem sabe
Walee meuseuki troh lhee uroe

Khem beurakah sit hareum that
Beuta ingat he aneuk droe
Peurumoh guree hareuem nikah
Murka Allah page dudoe

Miseue dinab ta peumulia
Dilikot teuma bek kheun lepeue
Hate guree wajeb peulara
Ohta teuka tacom jaroe

Beurang peue buet talakee idin
Oh meukawen ngon bloe publoe
Miseue tajak barang kaho
Meuseuki haipo rijang tawoe         - 58 –

Adab lahe bahle dumnan
Adab baten deungo jinoe
Bek jeuheuet dlan bakbuet Teungku
Ta peulaku beurang kapeue

Meuseuki khilaf nibak Syar’ak
Bek kheun hai Nyak han meupeue-peue
Beurang peue neupeugah uleh Teukung
Hantom jingo bek takheun roe

Leubeh hak guree nibak nangmbah
Meungka salah meuhat rugoe
Salah bak guree meungka mate
Han ubahle he aneuk droe

Adatna aneuk keunan ta taubat
Mengtan meuhat dalam rugoe
Siya ‘amai tan manfaat
Nuraka teumpat page dudoe

Bahkeu dumna adab guree
Le kadilee lon hareutoe
Lam hikayat Akhbarul Na’im
Keudeh Polem kalon keudroe

Tambeh nyang Tujoh kakeu simpan
Tambeh nyang lapan deungo jinoe     8)
Tambeh lapan adab suami
Ngo he Poti putroe sambinoe

– 59 –

Beugot tango he boh hate
Na taturi laba rugoe
Laba tatueng rugoe taboih
Hankeu teulah uroe dudoe

Firman Allah Hadits Nabi
Narit suci hana bagoe
Narit indah hana padan
Leubeh bak intan meutia pudoe

Calitra ‘Umar nibak Nabi
Kheun Tarmizi guree geutanyoe
Lheueh neu pujoe Allah ngon Nabi
Lheueh neu zikir malam uroe

Lheueh neu ajar dumna insan
Lom janjongan neu hareutoe
Hana tathee wahe sahbat
Wasiet amanat faidah hansoe

Ta peurunoe dumna Nisa
Beuta ajar ureueng binoe
Neungham jipateh jih tacungom
Bek tadom-dom teulhee uroe

Troh lhee uroe han jipateh
Tapoh jih bek luka asoe
Ta cungom jih pisalah that
Nyang leubeh had bak lhee uroe         - 60 –

Ureueng binoe nyang darohaka
Han jiteuka lakoe meuhoi
Ban nyang geukheun han jipateh
Han jitem eh sajan lakoe

Malaikat hoi di udara
Hai ceulaka jalang bisoe
Uroe malam jiseurapa
Hana reuda malam uroe

Dum jirata santeuet binget
Asoe langet asoe bumoe
Meungka teudoh jiseurapa
Oh jiteuka ubak lakoe

Calitra Anas aneuk Malek
Ngo he adek posamlakoe
Soe ek saba marah isteuri
Pahla neubri lethat dudoe

Miseue pahala keu Nabi Aiyub
Leubeh bacut keu gata nyoe
Ureueng binoe nyang ek saba
Jiseurapa uleh lakoe

Pahla neubri miseue Asiah
Tuhan tamah meubagoe-bagoe
Sidroe shufi ngo lon peugah
Inong marah geunap uroe
– 61 –

Jikheun keu Shufi dinap mata
Teungku ho taba ureueng binoe
Pakon han taboih inong jalang
Teungku digeucang uroe

Geunap uroe lam ji carot
Lam meupot-pot hana padoe
Seuot shufi ngo he intan
Ulon kheunban hai sambinoe

Nyanghan kuboih na tatuban
Ku takot nyan teuboih dudoe
Roh jimeukawen ngon agam jeungkat
Geuteumeung seupot geunap uroe

Dilon meuhat eklon saba
Beuthat jirapa hana padoe
Beuthat jitupuek ngon jitampa
Tuhan kira uroe dudoe

Riwayat Ahmad nibak Anas
Rasulullah nyang hareutoe
Ubak insan hana patot
Seumah sujud bak sabe droe

Nyang na patot meung isteuri
Seumah suami sujud bak lakoe
Beuthat lakoe capiek buta
Beuthat luka gaki jaroe         - 62 –

Beuthat meunanoh ngon meudarah
Wajeb ji seumahle ureueng binoe
Nyangkeu aneuk wasiet Nabi
He boh hate pike keudroe

Ureueng binoe teuhah ulee
Hareuem tathee syeksa dudoe
Malaikat han neu-ek keunan
Bak inong nyan malam uroe

Malaikat that neu beunci
Neu eue kanji diateueh dhoe
Hareum ta peumom aneuk beurangri
Meunghan jibri uleh lakoe

Tangieng inong gob hareum that-that
Beuthat manyet beurang kasoe
Page jipajoh aneuk mata
Uleue dua jitalak droe

Uleue nibak apui Jahannam
Ingat Polem syeksa dudoe
Jan geubangket si darohaka
Putoh asa geusurat bak dhoe

Han jiteumeung rahmat Tuhan
Hareum bee-beewan aneuk bisoe
Bee Syuruga han jiteumei com
Inong nyan som page dudoe

– 63 –

Meunggoh ji eue lom Nuraka
Hanlom pahna jalang bisoe
Nabi neukheun bak Fatimah
Aneuk meutuah deungo jinoe

Ureueng lakoe hoi isteuri
Ji peureugile ji peutoe
Tuhan boihle keujahatan
Keubajikan ngon neu gantoe

Deesya ampon miseue geusinthong
Miseue lam sarong uleue suet droe
Jingieng suami muka masam
Muka hitam page dudoe

Paleh inong gadoh tuah
Sabab kreueh babah seuot lakoe
Lidah teusuet na namploh haih
Page teulah jisai-sai droe

Peureumpuen nyangna ji ‘ibadat
Lagi pithat peulahra droe
Bak ureueng lakoe nyangkon muhrem
Hankeu jitem peuleumah droe

Jitop ulee bajee jisok
Hantom ji eue oek malenkan lakoe
Page dudoe Syuruga neubri
Ta tamong ri nyang galak droe         - 64 –

Nyankeu balah inong malee
Nyang top ulee bajee diasoe
Sabda Nabi bak Fatimah
Ngo ku peugah he aneuk droe

Lethat bangon asoe Nuraka
Nyangle bangsa ureueng binoe
Saboh bangon geugantung bak oek
Utak seuntok tutong rangoe

Geugantong bak Mom saboh bangsa
Ngon ie Nuraka geuseu manoe
Ladom geuikat gaki u takue
Ateueh ulee dua jaroe

Ngon uleue coh kala seungat
Bisa pithat hana bagoe
Saboh lagee dalam Jahannam
Uroe malam pajoh sie droe

Saboh bangon budok luka
Tuloe buta puntong jaroe
Saboh bangon ta eue meurante
Nibak gaki geuboh taloe

Geugantung bak lidah Nuraka
‘Azeueb syeksa hana bagoe
Saboh bangon muka hitam
Uroe malam pajoh pruet droe
– 65 –

Saboh miseue rupa babi
Nyang that keuji nibak beurangsoe
Ulah badan miseue keulide
Han lele ‘azeueb jinyoe

Miseue anjeng saboh rupa
Ie Nuraka geuseu manoe
Geuple di ulee teubiet u punggong
Hangoh tutong hana bagoe

Cokmar apui badan geupoh
Hanco tuboh habeh rangoe
Saboh bangon teuduek mantong
Siurat beuneung han bak asoe

Siblah jaroe oek jepeugot
Siblah faroj top ngon jaroe
Oh ji eue lon jideumpek that
Ya Muhammad tulong kamoe

Ulon tanyong bak Jebra-i
Ku eue that keuji seupo umat nyoe
Jebra-i kheun umat gata
Lon top muka deungon jaroe

Malee ku that bak Jebra-i
Umat lon keuji hana bagoe
Tuan Fatimah tanyong bak Nabi
Ya Habibi pakon le bagoe         - 66 –

Lethat bangon lonngo ‘azeueb
Peue salah buet lam donya nyoe
Sabda Nabi bak Fatimah
Aneuk meutuah tango jinoe

Deungo lon kheun he aneuk jroh
Saboh-saboh lon hareutoe
Nyang geugantung aneuk bak oek
Sabab seuntok peuleumah droe

Bak ureueng lakoe nyangkon Muhrem
Hankeu jitem nyan jisom droe
Geugantung bak Mom saboh bangsa
Ngon ie Nuraka geuseu manoe

Ji peumom aneuk manusia
Idin hana nibak lakoe
Nyang geuikat gaki u takue
Ateueh ulee dua jaroe

Ngon uleue coh kala seungat
Sabab meuroh that aneuk bisoe
Jitueng ie seumbahyang barang kakri
Ija pihanyi hana bagoe

Nyang pajoh droe saboh bahgi
Inong tari peugot-got droe
Soek ngon bajee sawak ija
Boh ngon baja nibak gigoe

– 67-

Ngui bee-beewan boh clak mata
Inong ceulaka peulagot droe
Adat hana bak droe areuta
Jijak siwa bak ureueng nanggroe

Watee jijak jroh that keumah
Inong ganah hanthee keudroe
Bak lakoe droe jeuet beurangkri
Beuthat hanyi kalang di asoe

Beuthat khieng-khob hana hiro
Droe meujakaho ngon ie liki (?)
Nyankeu balaih page jirasa
Lam Nuraka pajoh sie droe

Uroe malam ‘azeueb syeksa
Balaih gaca gaki jaroe
Lethat bangon ji peulagee
Kadang balee hana lakoe

Inong balee roh ngon tari
Allahu Rabbi han-ek hareutoe
Nyang brok busoek khieng bee bangke
Puntong gaki puntong jaroe

Geugantung bak lidah Nuraka
Inong ceulaka carot lakoe
Nyankeu inong nyang kreueh babah
Kuat meubantah deungon lakoe         - 68 –

Nyang hitam inong lepo
Ngon meuho-ho sagai nanggroe
Haleue hareuem han jisidek
Soe nyang tarek han jicok droe

Nyankeu balah hitam muka
Lam Nuraka pajo pruet droe
Teuma nyang rupa miseue babi
Miseue keulide badan jaroe

‘Azeueb bak tuboh hana reuda
Inong peusuna pupake lakoe
Nyang miseue asee kuat meupake
Ngon beurang ri asoe nanggroe

Beungoh seupot meukoh ulee
Sang asee gabra jeueb nanggroe
Nyankeu geuple ie Nuraka
Sabab gabra hana bagoe

Malaikat poh hana lale
Sabab banci asoe nanggroe
Teuma inong nyang duek mantong
Siurat beuneung han bak asoe

Siblah jaroe jitop faroj
Siblah treuet ateueh ulee droe
Apui lingka jih diteungoh
Hana teudoh dawok jimoe
– 69 –

Nyankeu inong nyang meusye-sye
Bak meuba-e hana bagoe
Geutop ulee su meuheuek-meuheuek
Teuoh keu aneuk teuoh keu lakoe

Teuoh keu Maha ingat keu kumuen
Teuoh keu aduen ingat keu adoe
Habeh ji teuoh karong wali
Ingat beugi guna sabohroe

Miseue jikheun yohna Teungku
Mudah breueh bu nasoe puwoe
Meueh ngon pirak lesoe temjok
Kupang busoek ayeuem jaroe

Yohna gata Allah hai raja
Dum peukara teuka keudroe
Jinoe tan gata pakri daya
Meung ija tuha hansoe puwoe

Yohna Teungku dumpeue mudah
Hanpeue ilah teuka keudroe
Ohtan Teungku jinoe sohsah
Neung ranub mirah hansoe puwoe

Allah hai aneuk boh hate nang
Ma teusayang tinggai sidroe
Keusoe kubri jinoe gleueng subang
Keusoe kupulang ikai meuduroe         - 70 –

Allah hai aneuk tinggai guna
Tinggai keu Ma bahsa ngon budhoe
Kusoe kubri jinoe peue nyangna
Bajee meudokma ngon lapan sagoe

Meunan jikheun meualeuet-aleuet
Jipike jeuet sira jimoe
Jitop muka ngon punca ija
Teuma ie mata hana sapeue

Khaba ba-E han-ek ta peugah
Kuwut babah keuboih jaroe
Leubeh nibak nyan pijeuet tapeugah
Nyang meusalah meuhat ji dudoe

Uroe akhirat nyankeu balah
Sabab ceudah that di sinoe
Tamoe mantong hana salah
Meungbek tapeugah lepeue jehnyoe

Moe ban teupat bekle bangon
Bek meupanton bek meunyanyoe
Tamoe sitmei keu ureueng mate
Bek tarawe guna ngon budhoe

Bek antara geutanyoe umat
Nabi Muhammad pina neumoe
Hingga teumanyong dumna sahbat
Neukheun rahmat panghulee geutanyoe

– 71-

Nabi Adam sireutoh thon
Sit dalam con malam uroe
Sabab sidroe aneuk Neumate
Jipohle Qabil posamlakoe

Nabi Nyankkob shahibul Akhzan
Lam dukaan malam uroe
Padum zameun peurcintaan
Ngon sabab tan muda samlakoe

Hingga seupot mata-mata
Hana reudha sitlam neumoe
Aneuk sikureueng neupoh mate
Adat hanle Yusuf sidroe

Seulang Nabi hate suci
Beurupa lagi di geutanyoe
Mate aneuk hanpeue peugah
Mate beukah geunap uroe

Oh teuingat miseue kilat
Seupot seupeuet nyum lham nanggroe
Silama hudep meugah mate
Meunan sabe geunap uroe

Lonkeu sidroe nyangka peurasa
Tujoh nyangka jitinggai kamoe
Bandum cut-cut teungoh galak
Teungoh budak ayeuem jaroe         - 72 –

Tujoh aneuk dilon ka mate
Beukah hate mate nyang dudoe
Kareuna rancak nibak nyang laen (?)
Timue meucen geunap uroe

Laila haillallah
Kakeu leupah kalam kamoe
Sabab hate ji meurawoh
Bacut meuteuoh sikrak bunoe

Miseue aneuk miet jakpot kulat
Jijak siat jula jiwoe
Meunankeu ureueng karang hikayat
Meujak leugat kalam dijaroe

Jinoe meuriwang bak darabaro
Angkara keu linto putroe sambinoe
Bahlon peugahsaboh mise
Yohna Nabi panghulee geutanyoe

Kata Anas sahbat Nabi
Kon han meune khaba lonnyoe
Sitka janji lam khuteubah
Kitabullah sijatoe-jatoe

Siuroe lonjak sajan Nabi
Bak ureueng mate neuba kamoe
Ohtroh neujak u rumoh nyan
Pojanjangan lalu neumoe
– 73 –

Ulon teutanyong pakon dukaan
Ureueng binoe nyan didroe nyansoe
Naroh kawom ngon ureueng mate
Bak han pakri gata tamoe

Seuot Nabi tanyong sahbat
Darohaka that ureueng mate nyoe
Nyankeu inong darohaka
Teumeureuka jih bak lakoe

Nabi peurab bak lakoe simate
Seurta neu kheunle khaba meunoe
Peurumoh teunyan lethat deesya
Ubak gata ureueng lakoe

Nyangka leupah bule khilaf
Ta peumeu’ah bak suroe nyoe
Kareuna jih pika mate
Hankeu jeuetle lakee keudroe

Ya hibibi ngo lon peugah
Lon jimarah geunap uroe
Padum rugoe lon ngon payah
Jak beulisah sagai nanggroe

Lon hareukat mita razeuki
Keujih lonbri nyan puwoe
Troh u rumoh lon jipakee
Saket hate lon han bagoe          - 74 –

Bek neulakee he janjongan
Bahle meunan aneuk bisoe
Bekle meunan ta peumeu’ah
Sayang sosah ureueng binoe

Ya habibi bek neu sayang
Lon ji geucang geunap uroe
Beungoh seupot lon jicarot
Bahle geutot jalang bisoe

Ta peumeu’ah barang salah
‘Azeueb lidah hana bagoe
Lidah teungoh ulat pajoh
Jak tapeudeueh kalon keudroe

Ngon uleue coh hana reuda
Peumeu’ah deesya jih uroe nyoe
Bek neulakee Ya habibi
Reuloh hateku han bagoe

Lom meusabda nibak Nabi
Tadeungo he ureueng lakoe
Tuhan kaya meusifeuet rahim
Neugaseh dum beurang kasoe

Digata pakon han peumeu’ah
Han tagaseh keu ureueng binoe
Ya Rasulullah bahkeu dumnan
Bekle takheun ubak kamoe

– 75-

Oh han meu’ah sagai deesya
Ku ji ngon Ma maken that moe
Bandua geukheun bak Rasulullah
Talakee meu’ah aneuk kunyoe

Neulakee ampon he panghulee
Bah jipohkee bak uroe nyoe
Nabi lakee hana jibri
Tron jebra-i teuma dudoe

Jebra-i kheun Ya Muhammad
Saleuem Hadlarat kuba keunoe
Neuyue jak kheun khaba sipatah
Neyue peugah bak ureueng binoe

Hana ridla Tuhan keujih
Meunghan jigaseh uleh lakoe
Tuhan keujih neu seurapa
Meungji dakwa bahkheun lakoe

Ban neudeungo kheun Jebra-i
Tanyong Nabi teuma munoe
Pakri roe untong nyang darohaka
Dumna bahya peugah jinoe

Ban neudeungo tanyong Nabi
Neumoe Jebra-i hana bagoe
Ya Muhammad talakee laju
Meungtroh lam kubu hanle sunyoe         - 76 –

Tujoh ploh droe Malaikat
Bandum tungkat mat dijaroe
Oh jitamong dalam kubu
Sit jipalu hancu asoe

Lheueh nyan jiboh teuma ‘azeueb
Sitna jeueb jeueb maseng bak droe
Maseng azeueb sitna sajan
Sidroe-droe nyan tujoh ploh bagoe

Ban neudeungo uleh Nabi
Bak suami lom neu peutoe
Hai ureueng lakoe ta peuampon
Sayang that lon keu ureueng binoe

Ya Rasulullah ya habibi
Bahle lonbri meu’ah jinoe
Ohlheueh ampon bak suami
Teukhem Jebra-i hanle neumoe

Ban neukalon khem Jebra-i
Neu tanyongle pakon meunoe
Kareuna buet hana lazem
Natom geukhem teungoh geumoe

Jebra-i kheun ya Muhammad
Hantom na mangat dum uroe nyoe
Malaikat woe dum keumbali
Mangat hate hana bagoe
– 77 –

Ureueng binoe han keunong ‘azeueb
Deungon mukjizat gata sidroe
Sabab gata lakee meu’ah
Ta seuleuah ubak lakoe

Laila hailallah
Jinoe lon peugah lagee laen
Kareuna dustur dihikayat
Mangat ayat meulaen-laen

Meung saban mitsoe meunafsu
Untong Teungku hansoe laen
Reubah kayee timue ukheue
Keu bajoe weue krak bak maken

Khabar bit-bit konlon peukeue
Sikrak tabeue sikrak masen
Kareuna nafsu hana saban
Ngui peukayan meulaen-laen

Miseue rupa kureueng leubeh
Ladom rumeh ladom ceuken
Tango kupeugah ureueng jinoe
Khaba nyoe bek sareng-sareng

Lagi hana jeuet keu upat
Hana meuhat Aceh ngon Kleng
Roh aneuk gob roh aneuk droe
Sit roh keudroe meunggot bandeng         - 78 –

Roh nyang gasien ron nyang kaya
Akai jisa peurangoe maseng
Adat tango ji meukhaba
Sabe kaya ji meubiseng

Beuthat mufakat ji meukhaba
Buet ji teuma maseng-maseng
Adat ta meuhoi nyan jiseuot
Suara meudhot ngon meudeungkeng

Adat inong sawak ija
Lhong diluwa sang aneuk Kleng
Ji sanggoi oek pi meugisa
Konban punca u geunireng

Teuma kanji ateueh mata
Bungon langa dum jipateng
Jijak pihan teupat banja
Ta eue meugisa miseue gaseng

Adat jimarit meukeunyot-nyot
Nyum taseupot ngon go leumbeng
Ji pajoh ranub kunyeh manyoh
Ta eue lileh miseue kuceng

Adat ji meungieng hana teupat
Mata jigot ji peujuleng
Nyankeu inong miseue cangguek
Nyum ta tupuek beumupaleng

– 79-

Miseue cangguek teungoh keunongsa
Tango subra miseue peureuleng
Miseue peureuleng pajoh bohnga
Aneuk ngon Ma jimeudeungkeng

Tuha muda hana meuri
Nyum tatadi ngon go jareng
Adat tayue ji Puasa
Seungkoh raya jikheun beuteng

Lon saket pruet hate peudeh
Manjeuet lon eh meungeunireng
Ditanyoe bit-bit dijih seunda
Bunyum dipha jih tagileng

Maken beungeh jikhem lanja
Nyum tatampa beumupaleng
Adat tayue ji seumbahyang
Ija pinggang jikheun meuluteng

Man-ek tasrah geunap uroe
‘Iek aneuk nyoe hanatom kreng
Adat tayue bri seudeukah
Meueh siamaih meujak bloe kareng

Teuka jamei hanpeue tabri
Teutap keuji meutamah teuheng
Adat tayue jipoek ija
Saket lam pha jikheun bireng         - 80 –

Timoh bireng bak uram pha
Hana reuda lam meugiseng
Adat tayue ji meurawe
Beuneung han sabe sirong geunteng

Lulon reukeuet gapeueh meuntah
Bagoe susah meutamah gigeng
Adat tayue menyum tingka
Hanjeuet kulaya surang sareng

Ngom han sabe le cut-raya
Kreueh piteuma ban go leumbeng
Adat tayue ji Seumeujoe
Saket jaroe jikheun meukeng

Gapeuh reukeuet bulee paneuk
Ngon meuaneuk hanjeuet jiweng
Adat tayue jicop ija
Saket mata roh dhoi kareng

Kalhee uroe hana reuda
Ngon ie mata ta eue meuleng-leng
Adat tayue ji teumeuboet
Angen bapoet gapeueh u sandeng

Ulon teubat hansoe lulat
Jaroe keurukuet han jitem kreng
Adat tayue jijak mutee
Jilieh alee euntreuetle anjeng

TAMBEH TUJOH BLAH

Ubah huruf Jawoe
Ke Aksara Latin

Oleh:

T.A. SAKTI
Dosen FKIP Unsyiah
Banda Aceh

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s