Ureueng Beu-o

Tango ku peugah ureueng binoe

Haba lon nyoe bek sareng-sareng

Lagi hana jeuet keu upat

Hana meuhat Aceh ngon Kleng

Adat tayue manyum tika

Han jeuet kulaya surang-sareng

Ngom han sabe le cut-raya

Kreueh pi teuma ban go leumbeng

Adat tayue jicop ija

Saket mata roh dhoi kareng

Kalhee uroe hana reuda

Ngon ie mata ta eu meuleng-leng

Diureueng lakoe pile bantah

Narit nangmbah pi ji sareng]]

Adat tayue jak u Keumala

Keudeh lanja jijak u Teubeng

Adat tayue jalan Hareukat

Tayue meupukat jijak meujareng

Barang peue buet hana mufakat

Tayue seumurat jijak bloe kareng

Beukit tayue u Me Geumbak

Keudeh meureumpok u Me Punggeng

Tayue jijak u Malaka

Keudeh ji bungka u Nanggroe Kleng

Tayue u blang jijak meugoe

U gampong jiwoe jijak meuweng

Meunankeu aneuk beurang kasoe

Aneuk geutanyoe get aneuk Kleng

T.A. sakti

Catatan: –

Ca-e Aceh di atas dikutip secara acak dari naskah Tambeh Tujoh Blah( 17 Tuntunan/nasihat), yang ditulis salah seorang ulama Aceh tahun 1306 H.

– Adat = adak = seandainya

– Beukit = jika

– Ureueng binoe = orang perempuan

Dara Malaih  I/ HA/sdh dimuat

Adat tayue ji Puasa

Sungkoh raya jikheun beuteng

Lon saket pruet hate peudeh

Han jeuet lon eh meugeunireng

Adat tayue ji seumayang

Ija pinggang jikheun meuluteng

Han ek tasrhah geunap uroe

‘Iek aneuk nyoe hanatom kreng

Adat tayue ji meurawe

Beuneung han sabe sirong geunteng

Lulon reukeuet gapeuh meuntah

Ragoe susah meutamah gigeng

Adat tayue jijak muntee

Jilieh alee uleh anjeng

Tutop leusong pi hana got

Asee lenglot digeunireng

Adat tayue manyum eumpang

Iboih pikrang miseue ranteng

Karoh tabloe iboih gajah

Jaroe teumirah han-ek tagileng

Adat tayue ramah santan

Iniem pitan na ngon sareng

Ulon ku-U pi meuth’ot-th’ot

Jaroe han get meupaleng-paleng

Adat tayue peu-ek tayeuen

Rhot di rinyeuen gigoe teuheng

Rinyeun bulat meubalek-balek

Pueh that ta-ek palang-paleng

Beukit tayue jak seumula

Han get banja surang-sareng

Teuma lintah pilon takot

Pakri ngen seuluet hitam galeng

T.A. Sakti

Catatan : – Meurawe = bertenun, tradisi perempuan Aceh tempo dulu. Ca-e di atas dicuplik dari kitab Tambeh 17.

– Lulon = lilin = bahan bertenun

– Ragoe = ragam/ reka bentuk kain tenun

– muntee/mutee = menumbuk padi pada Jingki

– Iniem = sabut pada seludang kelapa dibuatkan saringan

Doda Idi I/HA/sdh dimuat

Allahu Allah Allahu Rabbon

Allah qadiron Maha Kuasa

Masa cut Nabi didalam ayon

Rahmat neupeutron uleh Ilahi

Doda idi putik sukon

Didalam on jroh meusundi

Kaeh hai Nyak dalam ayon

Makeuh geutron mita raseuki

Jak ku ayon putik rambot

Simanyak cut beurijang raya

Beu Tuhan bri umu lanjut

Beuna ta peubuet jalan agama

Allah haido doda idi

Boh campli beurijuek seuba

Beuna umu Tuhan neubri

Boh hate beurijang raya

Lom geukheundo doda idang

Bancalang dilaot raya

Beuta gaseh Uleebalang

Adat naprang nasoe sangga

Nyoeku kheundo doda idi

Mirahpati jeh dipara

Wahe aneuk nyang johari

Beu Tuhan bri rijang raya

Allah haido doda idang

Taloe ayon kulet pisang

Kaeh hai Nyak dalam ayon

Poma geutron jak poh linggang

Ijo-ijo naleueng sambo

Nyangget ijo naleueng sira

Bek kamoele hai aneuk E

Nyoeku kheundo jakku doda

Ie dilaot puteh ijo

Peuraho umbak cencala

Gata hai Nyak ulon dodo

E linto ayeuem mata Ma

T.A. Sakti

Catatan : Doda idi adalah nyanyian menidurkan anak Aceh tempo dulu, yang sekarang sudah langka dilakukan.

Timang-timang  I/HA/sdh dimuat

Allah haijak kutimang prak

Jeh pirak sijudo dua

Wahe aneuk puteh meuprak

Hate galak lon ngieng gata

Lomku kheunprak kutimang prak

Boh cicak di dalam bara

Buet nyang karot bekta galak

E hai budak bijeh mata

Jakku timang putik langsat

Cut Amat muda bahlia

Beule aneuk rakan sahbat

Jan meularat nasoe sangga

Jakku timang putik rambot

Beungoh seupot lon peulara

Beule aneuk ureueng ikot

Bek meudhot-dhot narit gata

Jakku timang putik langsat

Cut Amat muda samlakoe

Beujeuet aneuk ka Hareukat

Laot darat pawang keudroe

Allah haijak kutimang be

Jeh ceupe peuneugot Cina

Meung na mantong umu sabe

Boh hate tamat neuraca

Jaklon timang bungong geutoe

Keunong uroe layee rata

Beumutuah posamlakoe

Bila Nanggroe mat neuraca

Jaklon timang putik bugeng

Cut leunteng rupa samlakoe

Beule aneuk ureueng ireng

Bek meudeungkeng ngon rakan droe

Jakkutimang kutimang bot

Jeh boh rambot diteupin para

Beule aneuk ureueng ikot

Bek na karot buet digata

T.A. Sakti

Catatan :  Timang-timang aneuk di atas dicuplik dari hikayat Banta Keumari, ketika putri Rakna Keumala mengambil Banta Saidi dari ayunan. Agar tidak menangis lantas ditimang-timangnya. Naskah yang semula berhuruf Jawoe itu telah saya salin ke aksara Latin.

Aneuk Adam/HA

Apabila mate dum aneuk Adam

Putoeh amalan sinoe di donya

Malengkan nyang na Poma ngon Ayah

Beuna neukeubah meulhee peukara

Nyang peurtama phon seudeukah jariyah

Bak jalan Allah meuna neutem bri

Teuma keudua ‘ileumei meunafaat

Peuteunyok umat bekroh lam jahe

Aneuk nyang shaleh teuma nyang keulhee

Lam jeueb-jeueb watee meudo’a sabe

‘Oh lheueh seumbahyang do’a jilakee

Pahla meuteumei bak Allah sabe

I

Amin amina

Ya Rabbal ‘alaminaa

Istajib do’a ana

Kullanaa ajma’ina

II

Trang hate lon trang

Buka kandang he nurani

Cahya teudong rot teureubang

Tueng peunulang ubak Nabi

Nabi neudong lam cahya dat

Beumeusapat lon ngon Nabi

T.A. Sakti

@Peminat sastra Aceh

Catatan : Like anak-anak Aceh ini biasa dibacakan tempo dulu secara beramai-ramai setelah selesai pengajian di rumoh Teungku atau di Bale Seumeubeuet  menjelang tidur.

Tuhan Kami/HA

Allah Tuhan nabi kita Muhammadu

Nini kita Siti Hawa Adam jaddu

Dan agama nyang neu ridla Islamu

Innadina ‘indallahil Islamu

Islam kita masa neukheun alastu

Birabbikom nyang keu masa zurriyatu

Soe nyang seuot yoh masa nyan qalu bala

Nyakni gata Tuhan kami Rabbul ‘Akla

Malaikat

Malaikat siallazi hana mawang

Hana makan minom tidur dum sibarang

Hana teungeut hana syuhut meukawen tan

Hana aneuk Ma pihana Du neuh  pihtan

Sallatan

Sallatan summan salaman

‘Allaman Ilahir Rahman

Tammatan takriman-takriman

Wa ‘ala saiyidil insan

Muhammad wa alihi

Wa ashabi zil insan

Ho kadum ureueng nyangka dilee

Hanale bandum ka padee

Lam uruek geuseubee

Hanale ka geusimpan

Dalam kuburan

T.A. Sakti

@Peminat sastra Aceh

Catatan : Like aneukmiet Aceh di atas biasa dilagukan bersama

selesai mengaji di Meunasah atau di Bale Srumeubeuet.

C’ieng Udeueng/HA

C’ieng-c’ieng udeueng

Bulee keueng na ‘et teuot

Bulee janggot na ‘et ki-ieng

Peurumoh na sikureueng

Ban sikureueng han saho roh

Meukon lhee ploh han meumada

II

Tok-tok Beuragoe

Boih aneuk mita lakoe

Lakoe di Beureu-eh

Lakoe paleh han jitem woe

III

Doda idi

Peuraho bungka u Idi

Jiboeh layeue itam ijo

Luho-luho yrok u Idi

IV

Tateh, Sinyak dijak u Aceh

Keubeue ka jiwoe

Taloe tinggai di Aceh

V

Titlamtahit

Rumoh raya pinto ubit

Hai Abi bek meukawen laen

Beuna neusyen kamoe ubit-bit!

Kulat pak di Meulaboh

Kulah goeh di Keumala

Ureueng toe han meuteumei pajoh

Ureueng jeuoh meuteumei rasa

T.A. Sakti

@Peminat sastra Aceh

Catatan : Nyanyian anak Aceh di atas dilantunkan mereka ketika sedang main-main.

Pulo Pinang/HA

Le ureueng Aceh jinoe di Penang

Tiep uroe Tuhan rame geuteuka

Geujak meu-ubat ngat sihat badan

Hanle geusayang habeh areuta

Toke, peutani, guru, karyawan

Geujak u Penang meulumba-lumba

Mulai digle sampe neulayan

Gampong ngen Peukan rab rata-rata

Beulanja abeh meujuta kuyan

Aceh katho krang Penang ka kaya

Wahe peumimpin neu mita jalan

Bek sabe meunan Aceh jeuet papa

Peue pasai sideh puleh that rijang

Pakon layanan ramah dan sigra

Peue jeuet di Aceh hana lagee nyan

Aceh ngen Penang sangat le bida

Dum rumeh-rumeh geuwoe di Penang

Ka sihat badan troih cita-cita

Dilee meuthon-thon peu-ubat badan

Saket tan hilang abeh areuta

Peue sabab geuboeh nan Pulo Pinang

Bacut lon karang kheun ureueng tuha

Dum Toke  Aceh ba pineueng keunan

Barang dagangan bak dilee masa!

Woe Toke Aceh di Pulo Pinang

Peng peunoh eumpang; Aceh jeuet kaya

‘Oh woe pasien di Pulo Pinang

Peng kasoh eumpang; Penang ka kaya

Mantong na beukaih kaya peng Penang

Digampong Turam na rumoh tuha

Bak jurong teungoh rumoh di sinan

He sejarahwan  jeuet jak pareksa

Nacit nyang laen kaya wab Penang

Bapak Adnan baklon calitra

Leumo meukawan ba Pulo Pinang

Ayah digobnyan syeedaga raya

Watee tapike  sabe  tatimang

Aceh ngen Penang katreb syeedara

Yoh prang Beulanda na Dewan Lapan

Di Pulo Pinang geubila bangsa

Dum ureueng Aceh jinoe ka carong

Ek jeuet geupeukong beule syeedaga(?)

U Pulo Pinang bek meukat sahong

Tapi dagangan barang dum geuba!!!

T.A. Sakti

4-9-2007

Catatan : – katho krang = miskin, papa

– syeedaga = saudagar, toke

– meukat sahong = berlalu-lalang  yang merugikan

– Gampong Turam, Pekan Bilui, Aceh Besar.

Jampok/HA

Dengo lon peugah khabaran jameun

Masa kheurajeuen nabi mulia

Masa keurajeuen nabi Sulaiman

Nyang mat hukoman ban sigom donya

Nibak siuroe nabi jak meu’en

Sare ngon angen sajan seureuta

Nabi neuduek ateueh kurusi

Angen bapotle ngon siklep mata

Hingga troh bak saboh teumpat

Neu piyoh siat neu gantoe raja

Nabi neu tanyong ubak dum cicem

Toh siri katemlon boeh keuraja

Ji seuot Jampok tuwanku ampon

Nyoe pat Si Gam lon neuboeh keuraja

Sabab Si Gam lon rupa ceudah that

Lagi that hibat ngon bulee mata

Mata jih bulat babah meukuwet

Cit get that sabet neuboeh keuraja

Teuma ji seuot Beurijuek Balee

Han kutem dikee Jampok keuraja

Teuma ji seuot Toktok Beuragoe

Hana meusoe-soe taboeh keuraja

Seudangkan dilon kupiyah beusoe

Hana siuroe lakee keuraja

Ka teuka malee di cicem Jampok

Gob kawak-kawok jidong dilingka

Teuma ka seungap po cicem Jampok

Teuduek teuseupok meublek-blek mata

Teuma di dame uleh Keudidi

Po Rajawali taboeh keuraja

Kleueng puteh ulee jeuet keu pulisi

Po Mirah pati kanto wedana

Cicem Beuruwak jeuet keu Ma Bidan

Sabab digob nyan geukuw’a-kuw’a

‘Etnoe sikada kisah po Jampok

Cicem nyang dawok pujoe droe saja!

T.A. Sakti

#Peminat sastra Aceh

Catatan : Syair Aceh di atas  adalah salah satu judul kasidah yang amat digemari warga Aceh(Pidie?) tempo dulu yang disenandungkan setelah acara mengaji Al Qur’an juz pertama secara bergiliran pada berbagai jenis kenduri di malam hari. Tradisi mengaji “meucok-cok ayat” ini sekarang sudah punah,

yang digantikan baca Qul-hu sekitar 20 menit.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s