Cicem Dalam Blang

NASIB EUNGKOT LUENG

Oleh : T.A. Sakti


Subhanallah hate teuh seudeh

Dum aneuk bileh kabeh dalam lueng

Dak tajak sawok han glah keupayeh

Meungbuta bileh hanapat tatueng


Bak masa dilee meung saboh payeh

Meunyo di bileh tan meuceh lam lueng

Lamblang tasawok pat-pat ie tireh

Lhee peuet boh payeh sabe meuteumeung


Aneukmiet cut-cut me bruek meutapeh

Dikawe bileh jidong bak ateueng

Watee peunoh bruek jiduek yub bak jeh

Ohlheueh jipeugleh jitot lom madeueng


Nasib engkot lueng meunancit wareh

Jareueng kalipeh lam lueng dalam krueng

Iet deungon kruep seungko keupayeh

Bace ngon ileh meunancit udeueng


Suw’iek deungon gro si euntok jayeh

Bieng teubai-lipeh seurta keureulieng

Adak jan hawa oh saket reugeh

Meusaket that wareh jinoe eungkot lueng


Inyap deungon jeue teullhat bak binteh

Mandrong drop ileh kawe hansoe theun

Ureung keumukueb theun plong bieng lipeh

Hantom na rumeh oh geuwoe di lueng


Ureueng theun ramet nyamok klok beuteh

Bubee Cut Areh hantom jingieng lueng

Nyang kambam kawe ngat  jikap ileh

Ngon hatee seudeh payah tumpang keueng


Yoh masa awai nibak jameun jeh

Eungkot tindehpeh lamlueng deungon krueng

Meujan ie raya teuka ie ngon peh

Ureueng meubareh ta eu meuplueng-plueng


Eungkot teungoh lueng lam blang teueh-eh

Seungko ngon ileh bace ngon udeueng

Nyang leumiek leumon glah namboh payeh

Nyang areh-areh seb sikhan buleuen


Geukueh mon eungkot pat na teureubeh

Teumpat melapeh umong deungon lueng

Peuet buleun sigo mon nyan geupeugleh

Ie mon peuabeh ngon amak pineung


Dalam pacok trieng eungkot dum jieh

Geusintbong keudeh dalam jeue beuneung

Lam paruek situek lheueh nyan geutindeh

Puwoele keudeh geuweuek diyub seueng


Ureueng keumeukueb theun inyap meuceh

Meujan ie lipeh diet ie dalam krueng

‘Oh peunoh paruek geugusuek beuteh

Woe gampong keudeh geubulueng-bulueng


Meugle raseuki ureueng geumaseh

Geubri keu wareh wable eungkot lueng

Teuma watee nyoe kagadoh gaseh

Eungkot krueng wareh jareueng meudiyeueng


Pakon eungkot krueng jinoe ka lipeh

Konban uroe jeh lethat  ban seukeuem

Peue nyoe wab racon tuba peuhabeh

Meung droeneuh areh neu jaweueb siseuen!!!

Kireman :  T.A. Sakti

Banda Aceh


JAK LHOEH DARUET

Oleh : T.A. Sakti

Di gampong Bucue lethat bak buloh

Trok ureueng baroh makmeugang jakbloe

Daruet ngon cangguek pih tanle kiroh

Jan ujeuen jitoh seungab sinaroe


Musem luah  blang dan ujeuen jitoh

Ureueng seumeloh riyoh jeuep sagoe

Geujak lhoh daruet ngon panyot suloh

Lam pacok geuboh ladom lam kom dhoe


Peengeueh saboh blang hu suwa buloh

Meujan-jan kiroh Geuenteut peudeuh droe

‘Oh peunoh kaca malam poh siploh

Gisa u baroh manbandum geuwoe


Peusohle daruet lam tika iboeh

Nyang ladom geucroh reuboih sibagoe

Na daruet inong daruet t’uet haloh

Canggang minyeuk roh cangkadek duroe


Nyan kuah daruet wahe teungku beh

Tunong ngon baroh mangat silagoe

Meunyo kabeh bu bek kiroh-kiroh

Jeb kuah taboeh pih mangat tuloe


Kisah haba nyan hai teungku utoeh

Bit sunggoh-sunggoh dilee sabohroe

Bak masa jinoe cit katho reuloh

Kuah daruet beh  meusaket adoe


Meung keubit hawa dada sang putoeh

Lueng putu sunggoh di Pidie nyangtoe

Na kuah daruet sinan ‘oh shuboh

Dilee gob peugah baklon hai adoe


Pakon di cangguek nyang duek dalam coeh

Lam uteuen lampoh ka abeh paloe

Meunan cit daruet lamblang Puloloeh

Jareueng meureumpok malam ngon uroe


Haba gob peugah barat ngon baroh

Sang seumprot pade punca seumaloe

Geuseumprot gusong geuracon tikoh

Cangguek daruetkok bandum habeh bhoe


Soe meu’ue lam ngom dilee rakan beh

Mawa Ni baroh seutot cak sidroe

‘Oh disyen cangguek dalam reugam roh

Daruet geusampoh lam pacok pasoe


Keu aneuk Itek geubri jipajoh

Ngat puleh seungkoh rayek seureuloe

Bak saat jinoe dum Itek riyoh

Hek jipreh dang troh lhok nyang geujak bloe


Oh ujeuen jameun tadeungo kiroh

Cangguek meunujoh seurta meudike

Ladom meusya-e ladom meuratoh

Rata sagoe coeh P’E P’O bukanle


Sang-sang rapa-I  dikasyuk utoh

Sang nyum su ratoh Meunasah sagoe

Simalam beungoh tan putoh-putoh

Reuda jipiyoh watee cot uroe


Cangguek watee nyan lethat boh jitoh

Uroe meureutoh malam meukatoe

Ceh aneuk abiek meuribee meuploh

Iku jih putoeh ’oh lagee Ma droe


Mekr’ek-kr’ek cangguek keutanda geuboh

Bu sawo pajoh imsak karab toe

Ureung theun bace mangat rijang roh

Cangguek cit geuboh beupanyang taloe


Daruet ngen cangguek jinoe  rab putoih

Lam blang dalam loih tanle meupeudoe

Pakon lagee nyan hai Teungku utoeh

Lontuan han troh bak lon pham sidroe!!!


Kireman : T.A. Sakti

Banda Aceh


CICEM LAM GAMPONG

Oleh : T.A. Sakti

Asslamu’alaikom lon buka pinto

Ca-e lon ato bak AcehTV

Kisah binatang  cit gohlom kundo

Nyangka le  mundo lam donya ini

Yoh ubit tanyoe ho nyang tatajo

Cicem meujudo meusu-meunari

Riyoh yoh beungoh subra ‘oh Luho

Di lampoh sawo Cempala Paki

Tapi lawet nyoe cicem ka talo

Tan meupat awo aleh ho lari(?)

Keu cicem jameun kisah ta ato

Aneukmiet baro mangat ji tukri!!

Bineh Blang Pante nabak trieng teulo

Dilampoh Tuho timoh keumili

Keu cicem gampong  laju   ta ato

Simak rakan E beuhati-hati

Nyang paleng tari Rampineung Ijo

Nyang paleng beuhe Sirajawali

Geupeunan Tiwah tangkas bak tajo

Jitak Prak Ike ulee meusundi

Beurijuek Balee dicong teubee tho

Teungoh meututo riyoh han sakri

Jikheun po inong keu teungku linto

Sabe tan ako suami istri

Di Beurijuek Breuh kayem sijudo

Dong po pih saho umpeuen boh liki

Jitheun peulintek ka uleh Sido

Karoh ditajo meupak bak kaki

Na umpung Got-Got cong pineung ijo

Kayem bri kode ban beungoh hari

Riyoh jimeusu tanda ujeun ro

Bek jadeh Nek e neu adee kupi

Minyeuk Got-Got jeuet keu ubat baho

Patah tuleueng tho Tabib peugah kri

Aneukmit gampong sya-e diato

Deungo rakan E pusaka NINI

“Got-Got panyang iku

Geuleungku panyang mata

Nyang tabri han  dipajoh

Nyang tatroh dijak mita”

Cempala Paki dicong bak jok tho

Dikucie tahe disyen that tari

Umpeuen jih daruet ngon Ulat Ijo

Di Banda Aceh hallo “Ceumpala Taksi”

Dikucie shuboh mantong lam kaso

Sang-sang meututo aneuk ngon ummi

Jikheunle aneuk deungon su tilo

Bah tanyoe ato ji seuot ummi

“Ma kee ka jaga

Ka beudoh han jeut

Ma …keee ka jagaaaa!!

Ka beudoh hanjeut!!

Cempala Ekbam nyang leupah kuto

Tumpok ek leumo sinan meunari

Laen nibak nyan bangai ngon beu-o

Tan jeut jihiro umpung seundiri

Le Titlantahit boh jih proh jijho

Jikarom jinoe boh Titlantahit

Teuma watee ceh lomlom jihiro

Cempala Ekbam nyoe dipeungeuet bit bit

Dum Syekh beeula teugeuso-geuso

Cit hana tuwo lagu aneukmiet

Sira jinari jipeuko-peuko

Ka jikisah nyoe keu Titlantahit :

“Titlantahit

Rumoh raya pinto ubit

Hai Abu bek neumeukawen

Beuna neusyen kamoe ubit-ubit”

Kayem ’oh geupa geutop geuleupak

Khanduri ubak arwah lam kubu

Jinoe tapeugah keu cicem Ak-ak

Bulee that lagak itam meululu

Meunyoe u gampong ka teuka Ak-ak

Ureung le palak geurhom geutagu

Peunyaket manok jiba le Ak-ak

Meunan geurawakle Nek rot timu

Mate teudu-du teukeupak-keupak

Ta’uen bak Ak-ak gotthat meusyuhu

Aneuknmit cut-cut hate that palak

Jikheun keu Ak-ak ngat jiweh laju :

“Ak-ak mateMa ho kajak

Kajak ugle

Ku seubude bak tangkurak

Kajak bak kee

Ku seubee ngon  tanoh cak”

Citkon di gampong umpung di Ak-ak

Dari gle dijak ban turis lalu

Siblet-blet u gampong jilikak-likak

Digandoe bak utak ka jipo meupru

Su Kleueng jiklip-klip cong kayee ramphak

Peugah na awak nyang lob lam kubu

Jisama-sama sayeuep jikeupak

Kalon aneuk manok jeuoh ngon ibu

Kleueng Puteh Ulee bulee jih lagak

Kleueng Batee galak ukee that tincu

‘Oh jidrop Tupe jiklok bak utak

Meunyo Tiwah tak baro jih kuyu

Na sya-e Aceh leupah meusigak

Dianeuk manyak cit jeut keulagu

Kleueng Puteh Ulee kisah dua krak

Toe deungon jarak deungo hai Teungku  :

“Kleueng puteh ulee

Keulabee mirah mata

Jipo jeuoh-jeuoh

Jipiyoh di gampong Jawa

Gampong Jawa pihka tutong

Jak bloe bakong keu keureuja

Keureuja hana  jadeh

Linto weh malam jula

Pakon kaweh dikah Linto

Jeulamei le han lonba!!!

Kireman : T.A. Sakti

Banda Aceh


CICEM DALAM BLANG

Oleh : T.A. Sakti

Cakeuek dalam blang watee ceumacah

Syehdin dipeugah sira jinari

Puteh ngon ijo bulee that indah

Cong rangkang teuhah kayem beurheunti

Jinoe jareueng that Cakeuek meutuwah

Tanle jisinggah bak rangkang Cotpi

Gadoih hiburan ureueng ceumacah

Peupuleh deuek-grah toet matahari

Cicem Keudidi bantu ceumacah

Bak ateueng patah sabe jinari

Keuphot-keuphot droe tanoh han bicah

Sang jih lam susah han harap keu bumi

Tarhom tanoh cak jipo silangkah

Dong ateueng patah lom-lom jinari

Jinoe ka langka Keudidi lincah

Alehho langkah euntah habisi

Meunan cit Tektek cicem blang bilaih

Hantom meurimbaih lam rumpun padi

Jipo meulet-let meu’en takgalah

Jisurak indah su jih sang bangsi

Jidong toe Nuring tatarek bagah

Jipo jisinggah umong Nek Hendi

Hai nyang lagee nyan cit tinggai kisah

Tektek nyang bilaih euntee han meukri

Sayang Ngang Dama raya ban gajah

Itam puteh klah bak takue jihna

Deungon Tang-Iriek cit meufarikah

Umong gob cacah jih nyang meudawa

Meuseunoh Linong Uleue ngon Seupah

Meureupah-reupah Cangguek dan Kala

Kuek bulee puteh meunan cit ulah

Mita nafakah lam blang rap pula

Meukawan-kawan takalon indah

Jan-jan nyang susah jibloh peunula

Ngon ureueng meu’ue si-iet sileupah

Di ikot langkah jan Keubeue geuba

Rame aneukmiet galak sileupah

Keu Kuek nyang indah puteh buleenya

Jikalon Kuek po aneukmiet tangah

Laju jikheun sah ca-e pusaka :

“Kuek saree-saree

Han kaweuek mate ban lhee

Kuek saruek saruek

Mate Ma pat kaduek(?)

Kaduek cong Jeuraloh

Katoh boh saboh paruek!”

Allahu Rabbi Ilahon Ahad

Lethat latbatat jinoe hanle na

Tang-Iriek langka Ngang Dama tanpat

Kuek mata bulat  sangat jareueng na

Alehka musnah buet beude takat

Ji minah teumpat takot keu tuba

Sabab dalam blang “ie seumprot” lethat

Mate latbatat kon ulat saja!

Cicem Beureukiek teutiek mangat that

Han meuho bakat tanpat tamita

Ureueng theun jareng puseng ulee brat

Hanpat hareukat beungoh ngon sinja

Meunye baroekon gampong lon meuhat

Nyang na jareng jrat dua-lhee droe na

‘Oh Asa uroe ka geuduek pakat

Beureukiek geutangkap Blang paya mana

Yoh gohlom meughreb citka beurangkat

Seumayang meuhat bak ateueng data

Jikaple nyamok hanjeuet peunghambat

Ujeuen ngon kilat geulantoe suwa

Kadang ngon Burong meukong meuhadap

Ureueng ka batat yo keu Jen hana

Jan-jan Pancuri ili saho that

Bak jak meudhab-dhab sinan geutanda

Beureukiek popo lam blang luwah that

Meunyo ka mawot lam jareng teuka

Asoe sie Beureukiek meugah that mangat

Jinoe hai sahbat paleng that langka

Warong Bu Seulimeum jameun dimeukat

Dum Timu-Barat ureueng bloe teuka

Bak masa jinoe bahpih hawa that

Sie Beureukiek mangat hana sapatna

Ladom daerah deungo hai sahbat

Beureukiek mangat geuakui hana

Geuingat mantong ka teuka luwat

Sabab geulihat Glang-Ie jiseuba

Laen lom Ara cicem nyang kleuet that

Meuneu’en sapat lam blang rab pula

Kadang peunula jiphuk-phuk ngon jab

Bingkeng leupah brat ureueng po atra

Theun jareng Ara jareueng mustajab

Ara sulet that ceureudek raya

Baktreb-treb siblet jitem trok hajat

Roh lam peurangkap po cicem Ara

Rupa ban Itek mata jih bulat

Sie jih pih mangat rab sama rasa

Nasang ban lumpoe han meupat sasat

Dumnan langka that dicicem Ara

Tinggai nan gampong Mukim keu bakat

Geurasi teumpat Buloh Blang Ara

Sideh toe Bireuen lokasi teumpat

Ie Tarek jroh that kayem ie teuka!!

Kireman : T.A. Sakti

Banda Aceh


CICEM LAM PADE

Oleh : T.A. Sakti

Alhamdulillah syuko keu Rabbon

Rahmat Ilahon rata dum sare

Kisah keu cicem laju tasuson

Binatang burong udep lam pade

‘Oh dara pade dilee meuthon-thon

Piti geujak ron lam blang geurabe

Piti Ceurape ngon Canie tummbon

Batee dalam Kom geugrok-grok sabe

Teukeujot Meunom ngon on keureusong

Lam jareng jikong ka meukeumatle

Rangkubee, Bakoh, dan Sya’eut, lambong

Meunyo get untong cit jitem roh H’e

Ureueng theun Piti jinoe rakan lon

Hantom takalon lam blang meurabe

Sabab roh Piti han glah keu bakong

Wab seumprot racon le Piti mate

Jareng Beuruwak pih payah gulong

Sabab cicem nyan jeuet kheun hanale

Suleng hoi Beuruwak su jih meualon

Lam Blang Sidondon hanasoe yuble

Ureueng tiyeuep Tie aneukmiet gampong

Hanale ang-ong ‘ohlheueh koh pade

Sirakoh jeundrang dilee tiep-tiep thon

Dum meusong-gabong jilet Tie sare

Dalam tanoh crah Tie ji meulindong

Aneukmiet langsong han jituhole

Jisyeb-syeb jeundrang lingka jikurong

Kayem tan untong meuteumeung hanle

Tulo ngon Miriek dicong U lambong

Digle ngon gampong sabe geu-use

Geuikat Nuring pehtem deungon tong

Ka jipo  burong peuabeh pade

Meunyo dileekon dalam blang ang-ong

Karu sagaidon tadeungo Ha-He

Siureueng-ureueng Nuring geusambong

Geukuk meuglong-glong let Miriek jahe

Tulo Ek-Asee batat ban Lutong

Tulo Breueh langsong ji teureubangle

Di Tulo Ijo beuho bineh gampong

Dicong Trieng lambong dum dimeusya-e

Teuma  Tulo T’ot keuphot cong nibong

Kuneng bak punggong itam bak lihe

Cit saboh-saboh meujudo jitron

Batat rakan lon ban euntok bace

Tulo puteh ulee meuribee kawom

Lam jeundrang jitron  ‘ohlheueh koh pade

Roh lam peurangkap ata Tu Sabon

Geupubloe langsong u Keude Tangse

Teuma di Miriek dicong U lambong

Umpung meugantung ban panyot kande

Karu sang Miriek hana thee untong

Sinde geusinggong keu aneuk bakhe

Tulo Ek-Asee cong pineung lambong

Umpung jisuson naleueng on pade

Jitheun Beunaloet aneukmiet gampong

Buet nyan naroh lon yoh watee keuce!!

Kireman : T.A. Sakti

Banda Aceh

Cicem

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s