HIKAYAT NABI YUSUF

HIKAYAT NABI YUSUF

( Bagian I )

#Alih Aksara/Transliterasi dari huruf  ‘Arab Jawi/’Arab Melayu ke huruf Latin

Oleh : T.A. Sakti

Salen phon Hikayat Nabi Yusuf,

Seulasa,29 Haji 1428/8-1-2008,

Poh 4,33 WNAD, TA Sakti

Alhamdulillah Rabbil`alamin

Pujoe seukalian keu Rabbana

Seulaweuet saleum ateueh Muhammad

Panghulee umat diateueh donya

Nyan panghulee sigala Nabi

Jinoe lon peugah saboh calitra

Arasy Kurusi langet donya

Jinoe lon peugah saboh  calitra

Asai mula bahsa Arab

Lon peusapat karang haba

Mangat muphom ahli wareh

Mangat habeh jeuet neubaca

Nyoe calitra keu Rasui Tuhan

Lam Quru`an sinan nyata

Dalam kitab kisah Nabi

Wahe akhi tapareksa

Calitra Nabi na disinan

Dalam Quru`an asaimula

Ngon Bismillah awai mulaan

Jinoe lon karang saboh haba

Saboh calitra keu Nabi Yusuf

Nyang that ceudah dalam donya

Lon lakee tulong nibak Tuhan

Lon keumarang beu ek sampoerna

Beulam sihat dilon badan

Lakee bak Tuhanna kuwasa

Trang ngon hate beuteutap Iman

Bekna rintangan Blang Padang Masya

Kaseb dumnan nyan khotubah

Ngon tulong Allah beu-ek samporna

Amma bakdu teuma dudoe

Karangan meuwoe Nabi mulia

Nabi Nyakkob duwa peurumoh

Bapa di Yusuf nabi muliya

Bak Mak tuha aneuk na siploh

Nama geuboh maseng jeumba

Peurumoh muda aneuk duwa droe

Yusuf sidroe nama nyang tuha

Adoe Yusuf Buniyamin

That neu sayang uleh bapa

Hansoe sayang aneuk hana Nang

Neu sayangle Kuk aneuk nyan duwa

Aduen tuha deungo lon seubut

Nama patot lon kheun nama

Keu phon Rubil dua Samaun

Keu lhee geukheun nama Yahuda

Keu peuet Naquba limong  Lakim

Keunam Rilan tujoh Sapu…

Lapan … sikureueng Asim

Siploh polem Ba…Muliya

Nyakkob ade aneuk lam jasad

Neubri tungkat bandum rata

Aneuk siploh hana tom cre

Ji meurabe lam padang raya

Rabe kameng geunap uroe

Aneuk siploh droe meunan keureuja

Meudiwana dalam padang

Jiba makanan bandum rata

Beungoh jijak seupot jiwoe

Bak rumoh droe maseng jeumba

Maseng-maseng rata tungkat

Yusuf meuhat sidroe hana

Nabi Nyakkob duek di rumoh

Sayang keu Yusuf aneuk hana Ma

Bunda Yusuf awai kamate

Tinggai boh hate aneuk hana Ma

Nyakkob that leubeh keunan neugaseh

Watee neu-eh aneuk lam neuwa

Lam neucom-com geunap uroe

Aneuk duwa droe geutingaile Ma

Hanjeuet jarak meusipade

Hana tom cre meusideupa

Bak siuroe neu meu-en bak leuen

Yusuf kalon tungkat aduen ba

Nabi Nyakkob dua peureumoh

Bapa di Yusuf Nabi mulia

Peureumoh tuha aneuk na siploh

Sabab Yusuf hana tungkat

Laen meuhat bandum rata

Pat neulakee han jitem bri

Sayang ta eu aneuk hana Ma

Yusuf neumoe meusok meusok

Peugah bak Kuk ureueng hina

Wahe ayah Abu lon tuwan

Dilon pakon tungkat hana

Ureueng laen rata tungkat

Dilon meuhat sidroe hana

Yusuf neumoe Nyakkob neumoe

Meuteu taloe ngon ie mata

Galak neu that keu kayee nyan

Beurang kajan neujak mita

Firman Tuhan bak Jebra-i

Tungkat neume lam Syuruga

Rupa pih jroh hana bagoe

Neu peujaroe bak Ambiya

Meunoe neukheunle Jebra-i

Wahe Nabi lonka teuka

Aneuk gata nyoepat tungkat

Bak Hadlarat Allah Taala

Nyoe tungkat nyoe na  faidah

Deuek deungon grah ek jikira

Meunyo taglong ateueh bumoe

Jeuet bak kayee boh pirata

Laju meueng on ngon meucabeueng

Boh di sinan mameh rasa

Ohtee tacok mat bak jaroe

Miseue bunoe tungkat rupa

Tuwan Jebra-i lheueh bri tungkat

Neuwoe leugat bak Rabbana

Nabi Yusuf kana tungkat

Hate mangat hana  tara

Uroe beungoh tron nibak leuen

Neujak meu-en ngon saudara

Neucok tungkat glong bak bumoe

Neucok tungkat glong bak bumoe

Tungkat baroe Jebra-i ba

Ka meucabeueng on deungon boh

Laju pajoh mameh rasa

Dum saudara ka teuceungong

Oh jikalon tungkat mulia

Tungkat neumatle Nabi Yusuf

Cabeueng ngon boh hanale nyata

Tungkat bulat tan meusagoe

Neumat bak jaroe miseue nyangka

Dum syeedara ka meusapat

Ji meupakat meubicara

Meunoe jikheun dalam pakat

Hana patot buet dibapa

That neugaseh Yusuf sidroe

Dum geutanyoe tan neuniet na

Keupeue geubri tungkat kayee

Troh bak bumoe tan sapeue na

Hana ade Kuk geutanyoe

Yusuf sidroe neu peumuliya

Lheueh nibak nyan jak meurabe

Habeh sare dum syeedara

Nabi Yusuf ek u rumoh

Jak bak ayah hate suka

Buniyamin hanatom cre

Sinan sabe sajan ayahnda

Duek lam lumueng balek-balek

Rupa cantek tanglong donya

Rupa Yusuf lon peugah bacut

Hana ngon jeuet meuta peusa

Miseue buleuen meujeureulang

Han ubah ban dien lam kaca

Kulet kuneng mirah sajan

Muka naban buleuen purnama

Meusalang cicem teungoh teureubang

Oh jipandang srot u donya

Bahkeu dumnan rupa lon peugah

Nabi Yusuf sajan ngon bapa

Bak simalam teukeudi Allah

Nabi Yusuf leumah rasiya

Yohnyan neu eh dalam pangkee

Bungong keumbee neu uemle bapa

Laju leumah dalam lumpoe

Meunoe bagoe lon kheun nama

Neu lumpoe meu-en bak saboh padang

Bandum sajan ngon saudara

Neuba tungkat rata bandum

Trohle angen bade raya

Tungkat saudara habeh angen poet

Srot lam laot tungkat saudara

Hana saboh nyang na tinggai

Habeh dumhai angen bawa

Tungkat Yusuf laju panyang

Oh tapandang troh lam hawa

Yusuf teukeujot bak meulumpoe

Meugeunta asoe miseue geumpa

Yo meupot-pot ngon teumakot

Nabi Nyakkob pika jaga

Nabi Nyakkob teugom badan

Laju neucom bijeh mata

Meunoe neukheunle Nabi Nyakkob

Sira neu kucoeb neu pareksa

Wahe aneuk jantong hate

Peue tapike badan meugeumpa

Pat toh saket aneuk badan

Peue tapandang leumah bak mata

Teuma seuot po samlakoe

Peugah lumpoe bak ayahnda

Wahe bapa ayah di kamoe

Lon meulumpoe leumah rasiya

Sang lon lumpoe lon jak meu-en

Bandum sajan ngon saudara

Rata tungkat dum bak jaroe

Bandum kamoe sisaudara

Teuka budueng angen ribot

Jicok tungkat bandum saudara

Jicokle angen jiba u laot

Angen bapot lam laot raya

Nyang na tinggai tungkat ulon

Laen bandum angen bawa

Tungkat ulon mat bak jaroe

Ceudah han bagoe takalon rupa

Tungkat panyang troh u langet

Meujeureulang leumah cahya

On deungon boh le han bagoe

Lon mat bak jaroe leukang hana

Meunan macam baklon lumpoe

He bapa droe hana dusta

Nabi Nyakkob laju hareutoe

Beuna nyang lumpoe bijeh mata

Wahe aneuk gata lumpoe

Gata sidroe jeuet keuraja

Dum saudara jeuet keu namiet

Bandum turot haba gata

Bekta peugah bak ureueng laen

Jeuet beunciyan dum saudara

Meunan hareutoe nabi Nyakkob

Hate mangat dalam dada

Umu Yusuf ka limong thon

Bak masa nyan leumah rahsiya

Padum natreb lheung nibak nyan

Yohmasa nyan leumah rahsiya

Nabi Yusuf eh lam pangkee

Peuduek ulee ubak bapa

Nyang siblah wie Buniyamin

Yusuf blah unun uemle bapa

Malam Jum`at teungoh malam

Bak masa nyan leumah rahsiya

Neu lumpoe buleuen deungon uroe

Jitron u bumoe peumuliya

Laju ji sujud dalam lumueng

Uroe ngon buleuen sajan seureuta

Bintang siblah jitron dilanget

Laju sujud cut ngon raya

Bandum sujud ubak Yusuf

Meunan leumah lam rahsiya

Jaga Yusuf bak meulumpoe

Meugeunta asoe miseue geumpa

Yo meutattat ngon teumakot

Nabi Nyakkob pika jaga

Teugom aneuk neuwa bak badan

Laju neucom bijeh mata

Sira neu kucoeb laju neu tanyong

E aneuk pakon badan meugeumpa

Cuba peugah aneuk panghulee

E bungong keumbee keumala donya

Teuma seuot posamlakoe

Peugah lumpoe leumah rahsiya

Wahe ayah ABU dikamoe

Lon meulumpoe leumah rahsiya

Lon lumpoe duwa buleuen ngon uroe

Sujud bak kamoe sajan banduwa

Siblaih bintang sujud lam lumueng

Sujud bandum bintang meucahya

Meunan macam baklon lumpoe

Pakri bagoe wahe E bapa

Nyankeu meunan leumah baklon

Lehpeue balasan wahe E bapa

Teuma seuot nabi Nyakkob

Lumpoe teurseubut neuboeh makna

Lumpoe gata aneuk meutuwah

Jroh sileupah balasan teuka

Siblaih bintang sujud lam lumueng

Siblaih droe ureueng saudara gata

Bandum sujud bak gata sidroe

Singoh oh dudoe gata keuraja

Arti buleuen mata uroe

Kamoe duwa droe Kuk deungon Ma

Bandum sujud bak boh hate

Beuthat beurangri saudara gata

Bekta peugah bak ureueng laen

Jeuet banciyan saudara gata

Meunyo tapeugah gata jipoh

Bandum beungeh saudara gata

Laju deungo uleh gundek

Nabi Nyakkob peugah haba

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s