Menyambut Hari Ulang Tahun Kemerdekaan Republik Indonesia Ke- 72
****************************************************************
Kamis, 17 Agustus 2017
KRU SEUMANGAT!
ACEH KA DAME
-Tajaga Beurame!
Disusun Oleh :
T. A. Sakti
Mhd. Kalam Daud
* ****************************************************************
Bismillahirrahmanirrahim
Peuneuphon Haba
Assalamu’alaikom kawom syeedara
Dosun ngon kuta baroh ngon tunong
Lon keuneuk suson saboh calitra
Bak peunyum hamba sang sang meukeunong
Kisah keu nanggroe nyang that lon cinta
Nyang katrep masa hudep lam khem-khom
Sabe lam karu hana tom reuda
Jan-jan di kuta kadang di gunong
Teudoh lam pasi ganti lam desa
Rakyat seungsara hana peue tanyong
Aman di gampong tutong blang raya
Ureueng seumula bak plueng beukah thong
Peue-peue tapubuet jeuet keubuet hana
Hate lam liya teumakot keunong
‘Oh tam tum beude kuntak seunjata
Plueng ngon meutaga peusiblah nyawong
Kadang bak plueng-plueng jeuet salah sangka
Ka ‘ohnan kada mesiu tamong
Meunan keuh nasib rakyat jeulata
Bandum meurana baroh ngon tunong
Nyang pula capli Tuwi Lampoh Ja
Campli ka raya meudan meubungong
Hanjeuetle saweue karu meubura
Campli meukeuba jeut eumpeuen sidom
– 1 –
– 2 –
Nyang pula bawang dalam Blang Kula
Beungoh ngon sinja sibu ngon ie mon
‘Oh karu sinan soe peutoe hana
Bawang ka raya bandum habeh kom
Nyang jak u Kanto hate pih goga
Geutakot teuka sweping keunong
Tuwo KTP karoh lam bala
Sayang teuh raya teubingong-bingong
Nyang buet bak CV Toke swasta
Nyan pih leupah jra meuseumong-seumong
Sabab digobnyan lethat beulanja
Beungoh ngon sinja gob tanyong-tanyong
Guru ngon Teungku bandua lam jra
Sabab beulanja nyang phon na tamong
Teuma di Teungku beulanja hana
Wab na wibawa punca jeuet bingong
Meujan yum barang meuhai meutaga
Sabab armada hana ji tamong
Barang di Medan tan trok u Banda
Jitakot bala Muto jeuet runggong
Hubungan putoih Sembako hana
Habeh meurana agam ngon inong
Teuma di rakyat tan putoih asa
Geumita cara jalan nyang keunong
– 3 –
Ban teuka isu laju siaga
Biasa teuka bak ureueng inong
Jak borong barang bak keude subra
Geupeuwoe sigra di rumoh tamon
Meujan roh teulah dikawom hawa
Isu baroesa hanya bohongan
Nyang keuh akibat nanggroe lam bala
Got that dit laba rugo meutamon
Nyang leupah sayang tutong sikula
Mulai kuta trok dalam gunong
Meuribee murid putoh sikula
Ladom na tenda LSM peudong
Leupah le rugoe ureueng seumuga
Kumpoi beulanja geu peubloe umong
Saboh nihet gle nilam geupula
Geuharap laba minyeuk meuton-ton
Ban karu bacut di bineh rimba
Larangan teuka bek ek u gunong
Nilam ka watee ujong usaha
Rugoe meujuta ureueng po bingong
Dum keubon kupi pineung ngon pala
Jeuet uteuen raya seumak meujuhom
Sabab hanjeuetle ureueng po teuka
Jeuet sia-sia pangkai nyang geulhom
– 4 –
Bak nanggroe karu cit meunan rupa
Rata peukara udep tan keunong
Ban saboh donya tan jeuoh bida
Got di Indonesia atau di Hongkong
Meunan di Aceh saheh calitra
Ka 30 thon ka meuseumong-seumong
Rakyat meupiret bit phet meutaga
Rusak areuta kadang cit nyawong
Uroe ngon malam do’a tan reuda
Ubak Ta’ala sabe geumuhon
Aceh beuaman E Ya Rabbana
Beudame sigra pihak meuceungom
Do’a goh teudoh kiroh goh reuda
Teuka lom bala soe rasa hantom
Geumpa meuguncang tsunami teuka
Habeh teubungka peue-peue nyang teudong
Aceh teupuro hanco meuleu-a
Sang-sang sirasa keunong bom atom
Meureutoh ribee ureueng binasa
Hareuta beunda han ek tahitong
Rasa Kiamat ka dinab mata
Peue lom ngon geumpa meuseumong-seumong
Ureueng meurateb galet meudo’a
Beujeuoh bala geumpa beuteudong
-5-
Aceh habeh phak luyak ban sira
Mulai kuta sampe u gunong
Rata dum ureueng lam meundeurita
Rab rata-rata bala na keunong
Hana teupeh droe keunong syeedara
Dum kawom lingka ka habeh nyawong
Uleh seubab nyan tanle teunaga
Aceh geupuga hanle soe tanyong
Musibah di Aceh jeuet keu beurita
Ban saboh donya meudeungong-deungong
Tivi ngon Koran meulumba-lumba
Bak layeue kaca ureueng meutamon
Donya teukeujot jipot beurita
Ban sigom donya teuceungong-ceungong
Turki Arab kajab ngon duka
Jeupang Amerika trok Sirra Leon
Di dalam nanggroe meutampoe haba
Aceh lam bala naf’ah dum teudong
Presiden SBY geutanggap sigra
Aceh bencana tingkat nasional
Trokle bantuan meumacam rupa
Ban saboh donya u Aceh meujrom
Peunoh Blang Bintang peusawat teuka
Rot darat pihna ladom jitamong
– 6 –
Allahu Rabbi Ilahon Ahad
Aceh meularat leupah that sayang
Donya jiba-E timu ngon barat
Sang aneuk jasad udep lam malang
Bantuan ile curam meudrap-drap
Siat tan seungap siang dan malam
Nyang ba makanan pakaian leungkap
Ladom ba jasad sukarelawan
Peusaho manyet keureuja leugat
Ladom geukarat bak peugleh jalan
Dum ureueng luwa keunoe meusapat
Ngon Aceh akrab sang-sang saboh Nang
Peumimpin asing rame jak lihat
Nyang paleng hibat trok Kofi Annan
Sekjen PBB digobnyan pangkat
Aceh nyang kajab hate lom keumang
Di konflik Aceh ka seungap meukhab
Seunjata meukap pih jeuet takheun tan
Sabab watee nyan ka saho hadap
Aceh beusihat beupuleh pansan
Hikmah tsunami bayang rab meupat
Rahmat Hadlarat gohlom jeuet tapham
Pihak berkonflik hate reuloh that
Geukalon rakyat rame that korban
– 7 –
Gob luwa bantu, ureueng po meukap
Sang hana cakap waras pikiran
Digob ji sayang Aceh beusihat
Tanyoe ta meukap lagee kon insan
Bantuan teuka teurseundat-seundat
Meunyo bak teumpat mantong karu prang
Dum ureueng luwa hati-hati that
Geutakot silap salah sasaran
Meunyo lagee nyan teuntee susah that
Bagi dum rakyat di peudalaman
Hanya di kota bantuan dapat
Bak teumpat-teumpat resiko ringan
Jaminan keuamanan teuka beuleugat
Got that geuharap nyang po bantuan
Meunyo ka aman pikeran mantap
Hoho geuhadap tanle rintangan
Nibak saat nyan timoh peundapat
Aceh nyang kajab beuteuka aman
Seruan teuka timu ngon barat
Aceh beusihat lajule keumang
Ka grak teukeudi nibak Hadlarat
Konflik beuseungap bekle beurkeumbang
Dalam ngon luwa ka sapeue pakat
Tanggai ka meuhat uroe ka meujan
– 8 –
Grang-gring telepon laju siat-at
Geutanyoe rakyat teuntee tathee tan
Bandua pihak dame geuhajat
Peuwoe martabat Aceh nyang guncang
Hikmah Ie Beuna kameuri sipat
Bak tanyoe rakyat ka mulai trang
Alhamdulillah rahmat le that-that
Aceh beuteutap aman beurijang
RI – GAM Beurundeng Lom
“Pat ujeuen nyang han pirang
Pane prang nyang han reuda”
Meunan geupeugahle entu moyang
Nyan peungalaman jameun dilee ka
Geumpa Ie Beuna Aceh that guncang
Lagee nyum sang-sang Kiamat donya
Mungken bala nyan Tambo bak Tuhan
Kajeuet piyoh prang bekle meudawa
Bandum farikah keubah beulakang
Jak mita jalan ukeue bahgia
Seb ube nyangka peusak angkatan
Boeh keutimbangan hate lam dada
Peusak kreueh ceubeueh kalheueh tajalan
Meubacut pihtan teuka sijahtra
Nyang na cit paloe rugoe meukuyan
Nyawong meulayang ngon harta beunda
– 9 –
Blah noe pih rusak blah deh pih karam
Nyang leupah sayang ureueng tan deesya
Karoh meubalot lam seupot hitam
Gobnyan koreuban that sia-sia
Tunong ngon baroh dum jatoh korban
Yatim nyang malang rame lagoina
Hansoe hirole bu peundidikan
Hilang harapan dum aneuk bangsa
Geumpa tsunami Tuhan peh canang
Puta haluwan mita sijahtra
26 Desember 2004 jeuet peringatan
Sebka berjuang ngon ta peusak kha
Jakarta – Stockkholm kuntakle rijang
Telepon geumgam haloih suara
Geutanyoe rakyat gohlom ta tuban
Sabab wate nyan mantong rahsia
Ulon nyang tuleh boeh peurkiraan
Nyang thee beunaran nyang po keureuja
Indonesia – “Swedia” maken sipaham
Aceh nyang karam bangun bersama
Pakat ka jadeh saheh ikhlasan
Mita titian peunghubong haha
Martti Ahtisaari jatoh pilihan
Le peungalaman bak publa dawa
– 10 –
Yoh masa karu wilayah Balkan
Gobnyan cit padan jadeh prang reuda
Presiden Finlandia Martti ka mantan
Jinoe pimpinan saboh lembaga
Crisis Management Initiative Ketua gobnyan
Ka meusyuhu nan sabab le jasa
Kuta Helsinki teumpat rundengan
Ka keumah padan pihak ban tiga
Bak tanyoe awam gohna bocoran
Di dalam Koran jisiar hana
Wakil Presiden nyang phon umumkan
Akan na rundengan di Finlandia
Bak phon tadeungo sang haba wayang
Aceh baro ban Ie Beuna timpa
Maken siuroe laju maken trang
Gigeh kon wayang Pak Jusuf Kalla
Hamid Awaluddin pimpinan utusan
Gobnyan Menteri HAM Hukom seureuta
Sofyan Jalil Meunteri “khabaran”
Asai digobnyan Peureulak – Langsa
Delegasi Indonesia beurangkat rijang
Keudeh tujuan u Finlandia
Januari 2005 watee masa nyan
Deungon harapan Aceh sijahtra
– 11 –
Jinoe tapeugah tim perunding GAM
Nibak Gerakan Aceh Merdeka
Phon Malek Mahmud PM dalam GAM
Zaini Abdullah teuman nyan Meuntroe Luwa
Bachtiar Abdullah bri peuneurangan
Jikheun lam Koran juru bicara
Beudoh di Swedia laju teureubang
Deungon tujuan cit Finlandia
Trok u Helsinki dua rombongan
Ka geupeutimangle panitia
Awak CMI ka siap sinan
Crisis Management Initiative nama nyang leungka
Rombongan piyoh yoh bantroh sinan
Hek perjalanan teureubang lama
Ngon musem sijuek dijuthuek badan
Ureueng ban datang leupah geurasa
Lheueh puleh payah glah ngon pikiran
Peusiap bahan rundengan mula
Rotnoe ngon rotdeh pakat sipadan
Lam perundingan geumaju sigra
Martti Ahtisaari gabhuek kon wayang
Ngon staf gobnyanpeuhase dumna
Nyan juru dame lagee jeumbatan
Peulancar jalan pihak meudakwa
-12-
Meunyo kong tutue liwat meunyeubrang
Selamat jalan aman seuntausa
Meung titi tan kong patah meutihang
Ureueng meunyeubrang kadang patah pha
Do’a talake bak sidroe Tuhan
Tutue CMI nyan beukong lagoina
Beubit-bit dame RI deungon GAM
Aceh beuaman adil seujahtra
Bacut taceukot kawom wartawan
Meuhimpon keunan dalam ngon luwa
Wartawan tivi tabloid koran
Dum ka troh keunan liput beurita
Tsunami di Aceh cit baroesa ban
Manyet lam kubang mantong sa-dua
Jinoe beurundeng RI deungon GAM
Nyankeuh wartawan rame that teuka
Subhanallah Wal hamdulillah
Bandum peurintah nibak Ilahy
Dua rombongan ka puleh payah
Seureuta sudah turi-meuturi
Jinoe CMI laju meulangkah
Lagee peurintah Martti Ahtisaari
Hameh Jum’at Sabtu lhee sudah
Ka geugrak langkah le Ahtisaari
27 Januari tanggai nyang ceudah
Ka sibuleuen paih ohlheueh tsunami
Kota Helsinki sang leubeh indah
Ban geucok langkah rundeng GAM – RI
– 13 –
Geunap lhee uroe meutulak kisah
Bandum geubahasle delagasi
Pat-pat nyang sangkot rijang geupeuglah
Mangat bek beukah ceulah geulisi
Bit juru dame cangklak sileupah
Carong bri ilah ngon diplomasi
Buet Ahtisaari seureuta staf
Phon-phon geulangkah Tuhan bri rasi
Hase nyang bulat cit gohlom leumah
Tapi deuh ramah nyang dakwa-dakwi
Peurundingan phon Alhamdulillah
Lheueh nyan geupeugah bak Februari
Gohlom deuh hase hanjeuet keu teulah
Buet katrep leupah payah atasi
Kana 30 thon lam meufarikah
Pakri beu-ek glah lam tiga hari ?
Jinoele leugat ta sambat kisah
Rundingan teuhah lom Februari
Helsinki satu kalheueh lon peugah
Gohlom got teuhah pinto meugunci
– 14 –
Delegrasi RI katrok lom langkah
Laju geusinggah kuta Helsinki
Hana geuhiro keu hek ngon payah
Meunan dua blah lagee meujanji
Keu juru rundeng hanpeue lon kisah
Mantong nyang sudah cit bandua si
Fasilitator hana cit ubah
Lembaga meugah nama CMI
Seulanyan Lasa Rabu ka sudah
Dua ploh sa paih buleuen Februari
Musem seu-uem phon yohnyan Eropah
Meunan ji peugahle televisi
Geunap lhee uroe ploh masaalah
Nyang meucuet peuglah ngon hati-hati
Rotnoe na geujok rotdeh na geuseurah
Punca farikah laju geulisi
Rotdeh geulakee rotnoe geutadah
Le masaalah caye geulayi
Baroekon beuku ban batu cadas
‘Oh watee bicah bee minyeuk wangi
Bandua pihak hate ka teuhah
Sabab musibah teuka tsunami
Aceh nyang phang-phoe meupinyo reubah
Beurijang bagah BANGKET KEUMBALI
– 15 –
Bacut sapat treuk punca goh teuhah
Nyan masaalah nyang inti-inti
Giliran ukeue teuma geubahas
Lanja berpisah dua delegasi
Le keumajuan meunan geupeugah
Tapi nyang jeulah goh teupeurinci
Rakyat di Aceh seunang sileupah
Geuteunyum bit sah dame terjadi
Helsinki keu lhee laju ta peugah
Tanggai 12 April mulai
Babak nyang keu peuet buleuen Mei geuprah
Hase meulimpah meutamah meuri
Bandua pihak sipakat sudah
Geutoeb farikah kisah nyang lawi
Dawa nyang dilee geuseubee bagah
Martabat marwah geujunjong tinggi
Keupala teugak tan pihak kalah
Meunang tan siblah, talo tan sasi
Pakat ka bulat tekad ka geusah
Punca kabeh glah rujuek keumbali
Keudeh Helsinki ukeue geubahas
Watee ka geusah bak buleuen Juli
12 – 17 tanggai meutuwah
Le masaalah nyang brat teurjadi
– 16 –
Dalam watee nyan rencana paraf
Tanda ka sudah geuikat janji
Oleh seubab nyan dumpeue beujeulas
Supaya singoh bek dakwa-dakwi
Bak babak limong kheundak Potallah
Saboh seujarah sinan mulai
Tuntut merdeka buet GAM geukeubah
Geuakui sah nyan NKRI
Utusan RI geumbira leupah
Alhamdulillah that geusyukuri
Sang-sang hanale rintangan langkah
Tinggai geuparaf tanda kong janji
Tapi mantong na nyang brat sileupah
Pihak dua blah meuglong-glong gaki
Bhah Partai Lokal tarohan tuwah
Hantem meungalah rusak geulayi
Martti Ahtisaari yohnyan seuleuah
Yue piyoh payah dum delegasi
Bandua pihak kuntakle bagah
Maseng-maseng “Yah” pimpinan tinggi
Helsinki – Jakarta saleng bri hujjah
Meunan cit ulah Stockholm – Helsinki
Dudoe nibak nyan sipakat sudah
Laju geupeusah le Ahtisaari
– 17 –
Reuncana Sabtu bak Minggu sudah
Yohnyan geuparaf geuikat janji
Seukali-kali hanle meu-ubah
Perundingan sah ka geuakhiri
Tapi na janji nyang kuat leupah
Bek peugah-peugah bah barang kakri
Yoh goh geutiken ngon daweuet basah
Asoe naskah MoU rahsia mati
15 Agustus 2005 pakat ka sudah
Teken naskah Pemerintah RI
Rundingan informal geubri istilah
Baroekon gohsah gohlom reseumi
‘Oh lheueh geuteken tanggai 15
Nyan baro keuh sah kajeuet resmi
Geutanyoe awam payah tapilah
Nyang peunteng bagah dame mulai
Utusan RI pikeran teuhah
‘Ohlheueh geuparaf janji Helsinki
Di dalam nanggroe s ‘eh-s’ oh sileupah
Sabab goh jeulas asoe dum janji
Pro deungon kontra laju meusanggah
Raya beurakah bak televisi
Elit Jakarta takalon bicah
Ladom kheun salah, ladom kheun asi
Di ureueng Aceh nyang troe musibah
Lakee bak Allah rahmat beuneubri
Keu gob meudawa bah kuwut babah
Nyang peunteng bagah aman Tuhan bri
– 18 –
Teken MoU Dame
Astaghfirullah deesya beumeulhak
Talakee ubak Tuhanku Rabbi
Kisah Helsinki laju talacak
Jinoe katrok bak nyang paleng inti
Kalheueh beurundeng trok limong babak
Bandua pihak ngon hate suci
Na tujoh buleuen wate nyang dijak
Sagai hana glak dua delegasi
Sabab geuharap hase nyang bijak
Aceh beuramphak bangket keumbali
Seumangat dame timoh meugrak-grak
Meurinthak-rinthak seumaken tinggi
RI deungon GAM sang kayee sibak
Cabeueng jih ramphak reului han sakri
Di rakyat Aceh hate that galak
Baja geutambak do’a bak Rabbi
Di Jakarta na cit ureueng glak
Aceh tan galak dame keulayi
Meumacam cara geuguyak-guyak
Aceh beulom phak beude meunari
Ladom alasan RI tan bijak
Le that geubri hak Aceh mandiri
Nyang ladom geukheun ka tipee lantak
Mie-ong nyang gob sak di dalam guni
– 19 –
Memang yoh rundeng bak limong babak
Bandua pihak ka geumeujanji
Asoe MoU bungkoih dalam pak
Han jeuet meusikrak ureueng keutahui
‘Ohlheueh getiken resmi meusigak
Kajeuet ploh kutak geubuka isi
Uleh seubab nyan na elit palak
Meutamah layak nibak geucaci
Watee tasidek talacak-lacak
Na nyang deuh utak nafsu pribadi
Gobnyan keu Aceh sayang tan sikrak
Haba geuh beuhak cinta neugeri
Teuma lagi lom geuduek pih jarak
Su beude lantak hantom geuturi
Di Jakareuta gobnyan geulikak
Aceh phak luyak tantom geusaksi
Nyankeuh jeuet hate inseuh tan jijak
Gohlom Neu kheundak uleh Ilahy
Ateuh manyet gob geunari likak
Nyang leubeh nampak keupentingan pribadi
Tanyoe meudo’a hate bek palak
Tuhan beuneugrak insaf keumbali
Umu beupanyang pangkat beuramphak
Mangat treb bijak udep berbakti
– 20 –
Kisah ta puwoe bak uboe nyang bak
Delegasi jak lom u Helsinki
Teken MoU nyang mantong lam pak
Geupreh meusigrakle Ahtisaari
Arti MoU hai Teungku Bapak
Pakat nyang kahak kelheueh geujanji
Kaseb mupakat bandua pihak
Tanle meusikrak lam hate sangsi
Kisah lon singkat neubaca bek glak
Rombongan nyang jak trok u Helsinki
Deungon wartawan dum meusak-garak
Media cetak dan televisi
Kru televise sigra bergerak
Alat geupacak di sana-sini
Siaran langsong acara puncak
Cukob meusigak DAME GAM-RI
Memang kali nyoe leubeh meusigak
Rombongan nyang jak meuriti-riti
DPRD Aceh saheh na geujak
Padum droe Bapak PEMDA seundiri
Majelis Mufakat ulama bijak
Tamah seumarak tokoh adat lagi
DPR Pusat peutamah ramphak
Utusan nibak padum boh Fraksi
– 21 –
Dum rumeh-rumeh pakaian lagak
Lagee ureueng jak pesta khanduri
Trok geujak ampeung Dame mustahak
Kon ban ureueng jak bak dakwa-dakwi
15 Agustus ramphak seumarak
Dum rata sawak meunanti-nanti
Di Tanoh Aceh sang-sang meugrak-grak
Ureueng hana jak keu sana-sini
Di Banda Aceh meubulak-bulak
Meuribee geujak bak Rumoh Suci
Mesjid Baiturrahman dum meusak-garak
Tamah meusigak na Menteri-Menteri
Rab poh 12 jeum di nanggroe jeh
Gla-glo dum habeh geu peusiap droe
200 wartawan teumpat ka meuceh
Geuliput habeh kirem u nanggroe
Balai Pertemuan Finlandia teumpat geupileh
Bak ruwang nyang gleh timang meusagoe
Bandum nyang hadir geudong meulapeh
Teuseungeh-seungeh geu peuseungap droe
Duek bak kurusi ureueng teupileh
Lhee droe tan leubeh meja sinan toe
Hamid Awaluddin nyang phon hai wareh
Di teungoh meuceh diplomat usoe
– 22 –
Nan Martti Ahtisaari gob turi habeh
Keunoe ngon keudeh peudame nanggroe
Teuma sidroe teuk lontuan tuleh
Malik Mahmud Haytar rame gob tusoe
Staf CMI beudoh di sideh
Naskah meutuleh ka geujok sampoe
Naskah MoU hai Teungku Puteh
Tujoh on lipeh peunteng that asoe
RI deungon GAM sipakat habeh
Sinan geutuleh yoh buleuen baroe
Hanle geumeuprang rotnoe ngon rotdeh
Aceh geugaseh bekle lam phang – phoe
Bak poh 12 watee nanggroe jeh
Geuteken urehle ureueng lhee droe
Hamid Awaluddin rot RI pileh
Malek Mahmud Haytar rot GAM peujaroe
Martti Ahtasaari sidroe treuk kabeh
Ureueng nyang areh peudame nanggroe
Maka sudah sah MoU meutuleh
Meusoe nyang langgeh jadeh meupaloe
‘Ohlheuh geu teken pulpen sak lam keh
Beudoh sibareh geumumat jaroe
Ban lhee droe ureueng jaroe meutindeh
Tanda bit khaleh pake seuleusoe
Asoe MoU RI-GAM
Meupeuekeuh hase dalam duek pakat
Le waki rakyat di kuta Helsinki
Nota kesepahaman MoU geusingkat
Hase duek rapat awak GAM ngon RI
Na nam pokok inti geusurat
Tujoh-ploh-sa ayat meunyo tarinci
Nyang nam pokok nyoe dilee tacatat
Nam krek kalimat dilee lon rawi
Nyang pertama phon beuna taingat
Pemerintahan rakyat atoran geubri
Peuekeuh Undang-undang cara ngon ikat
Partisipasi siasat politek geuungki
Meunan cit ekonomi geubri hak rakyat
Bek sampe khianat teuka ngon deungki
Atoran Undang -undang alat ngon tambat
Bek sampe meuilat hukum ngon janji
Teuma kedua haba lon sambat
Disinoe geupeutupat keu hak asasi
Teuma nyang keulhee ureueng teulibat
Beujibri leugat meu’ah amnesti
Laen nibak nyan jibri amanat
Keu ureueng teulibat beuwoe keumbali
Beugeutem meunyatu geuwoe bak teumpat
Deungon masyarakat kawom family
– 23 –
– 24 –
Teuma nyang keupeuet kisah lonradat
Keuamanan beukuwat atoran beukawi
Disinoe geuato keupada aparat
Keu ureueng teulibat teuntra-polisi
Teuma nyang keulimong wahe e sahbat
Monitoring nyang sehat geubentuk misi
Nanggroe geutunyok meunurut hemat
Bek saleng meuhujat peureulee keu saksi
Akhe nyang keunam inti loncatat
Keu hase lam rapat beda areuti
Meutohkeuh jalan rot ueh geuliwat
Bek saleng meugugat dawa ngon dawi
Han ek tarawi tujoh-ploh-sa ayat
Meusikrak sapat loncok keupati
Keu rakyat Aceh geubri hak deelat
Tapi bek lewat ngon Konstitusi
Geubri hak ato keudroe di rakyat
Legislatif keu pusat sinan duek waki
Dewan hukom nyoe pilihan rakyat
Geutanggong amanat peukara geukaji
Geuato Undang-undang teumpat tamumat
Qanun ngon adat sampe bak Wali
Keu Wali Nanggroe deungon peurangkat
Leungkap ngon pangkat laqab reuseumi
– 25 –
Laen nibak nyan hai putik langsat
Atoran tamumat lam ekonomi
Hase di Aceh bek abeh u Pusat
Keudroele leugat jeumba ngon bagi
Hase lam nanggroe laot ngon darat
Lam tanoh padat mandum geuungki
Geutanyoe meudagang bek sampe jiceugat
Bek sampe dihunyat deungon jitaki
Luwa ngon dalam beujeuet tameukat
Beujeuet tabeurangkat nanggroe beurangri
Meunancit pajak bekle keudeh ta intat
Beutarasa nikmat di Aceh sendiri
Sampoe bak kayee lam uteuen leubat
Bek gob peusapat rot laot ji ili
Tujoh-ploh persen beugot ta ingat
Takuasale leugat keudroe keumbali
Keukuasaan hukom nyang ka muktamat
Tauko tasipat ban lhee teori
Tatarek rambu ban lhee beuteupat
Bek sampe meulumpat deungon meulhanglhi
Peuradilan di Aceh bek sampe meuriwat
Bek lagee teulhat angen peunari
Tapi beuteudong sulu ngon teupat
Gaki beukuwat deungon mandiri
– 26 –
Keupala Polisi miseue jiangkat
Sabe cit meuhat ngon Jaksa Tinggi
Ngon Wali Nanggroe beuna sipakat
Ngon cara mangat rot ueh jilisi
Teuma hak udep beujitem horeumat
Istilah ka jimat ngon hak asasi
Geuato hak insan pat-pat nyang hajat
Miseue siasat ngon ekonomi
Di Aceh geubeuntuk lam watee singkat
Pengadilan peunghujat leungkap bukeuti
Geubeuntuk komisi tugaih cukop brat
Tapreh troh saat aleh cit pakri
Teuma keu meu’ah ureueng teulibat
Lam laen loghat geukheun amnesti
Nyang lam peunjara geupeutubiet leugat
U dalam masyarakat geupuwoe keumbali
Geulakee tanoh keu nyang meularat
Sibagoe teumpat mita raseuki
Geulakee beujitueng tamasok aparat
Bak cukop syarat teuntra-polisi
Beujitem bantu meunurot hemat
Keu peutunyok alamat KTP beujibri
Bak mita keurija bek sampe jihambat
Bek sampe jiceugat hana jiasi
– 27 –
Jinoe keuamanan laju lonsurat
Keupada aparat teuntra polisi
Peuekeuh awak GAM walee tan mupat
Atawa aparat siblah rot RI
Bandua pihak bek saleng takat
Bek teuka seumangat bak buet ka basi
Jinoe beudame jaroe tamumat
Meu’ah le leugat saleng meuturi
Teuntra awak GAM bek pakek pangkat
Ngon bandum peurangkat tasom bak sunyi
Taseurah seunjata lagee lam pakat
Tapi ngon syarat monitor keu saksi
Aparat organik teutap bak teumpat
Nyang jaga rakyat dame lestari
Sedang di teuntra tugaih bek sapat
Ella jigugat le musoh RI
Nyang non organik tatarek beuceupat
Leungkap ngon alat tawoe le lanti
Tatarek bandum lagee lam rapat
Bek sampe teulambat taubah janji
Teuma keu saksi beumeusoe ngon mupat
Ladom awak Barat nyang tem padoli
Ladom di ASEAN jiran sahabat
Geuduek lam pakat geubeuntuk misi
– 28 –
Misi monitoring jibri ngon mandat
U Aceh beurangkat jijak teuliti
Jijak pareksa lagee lam rapat
Meusoe meuilat u keue jikaji
Miseue seunjata teuntra peusapat
Jipeusaksi le leugat keudeh bak misi
Seunjata jipeuanco lam koran jicatat
Rot laen peusawat pasoe lam tivi
Sampe jiato keu anggota jiangkat
Meusoekeuh rawat bila jih seu-i
Meutoh layanan medis darurat
Geubeban amanat keu pihak RI
Teuma keu seuliseh hase duek pakat
Bek meutulak-takat bak boh areuti
Masaalah geuproh cara meutingkat
Jalan nyang teupat dilee geucari
Meunyo han seuleusoe keureuna meukarat
Masaalah jiangkat bak keupala misi
Meunyo cit parah keureuna cukop brat
Geupeu-ek lom leugat bak dewan tinggi
Dewan Direktur nama lonsingkat
Masalah nyang brat geupike ngon jeuli
Bak geucok keuputosan teuntee kon mangat
Tapi mengikat keudua posisi
– 29 –
Nota kesepahaman kasep lonsurat
Bah bacut sapat makna lonrawi
Teuma ‘oh lheueh nyan geutuleh nan teumpat
Di nanggroe Barat kuta Helsinki
Ukeue nibak nyan tanggai geucatat
Duaribee-limong geusurat lam thon Masehi
Bak uroe limong-blah geucok beureukat
Buleuen lapan ka lewat habeh tsunami
Malik Mahmud rot GAM ka meuhat
Awaluddin meusoe that siblah rot RI
Keudua pihak geuteken le leugat
Jaroe geupumat le Ahtisaari
Faedah Nanggroe Dame
Geutanyoe Aceh wahe Teungku droe
Beudame jeuep sagoe taboh keunira
Masyarakat geutanyoe lapesan meubagoe
Bandum tahiro aman sijahtra
Masyarakat umum rakyat lam nanggroe
Tamse ban unoe rame leupah na
Inong ngon agam lakoe ngon binoe
Aneuk sinaroe lam rumoh tangga
Bandum na keurija meunyo tamuproe
Ella ka usoe umu ka tuha
Ella aneuk miet umu goh sampoe
Nyankeuh e adoe nyang tan keurija
Rame nyang keurija nibak buet meugoe
Tanaman meubagoe geulhom geupula
Ladom bak bot geupeutimang keumudoe
Laot geulangoe eungkot geumita
Teuma nyang laen peugawe nanggroe
U kanto tiep uroe geuduek bak meja
Laen nibak nyan ureueng peureunoe
Aneuk miet meugumoe di rumoh sikula
Meunancit ulama ileumee geupakoe
Ureueng nyang hiro bak buet agama
Teuma peumimpin ureueng po sagoe
Geupeutimang nanggroe gampong ngon kuta
– 30 –
– 31 –
Nyankeuh lapesan masyarakat geutanyoe
Meumacam bagoe meunurot keurija
Meunyo ka dame wahe samlakoe
Adak lam duroe pih teuka laba
Tiep-tiep lapesan lonkisah jinoe
Tabaca e adoe tapham ngon makna
Meunyo ka dame geumumat jaroe
Akibat jeuep sagoe pakri keuh rupa
Keu peutani dilee haba lon peutrang
Nyang meugoe lam blang dilee loncae
Bila nanggroe ka dame wahe e Cut bang
Hana teuhalang meuho geusambe
Miseue geumeu’ue sideh dalam blang
Lam luhop meugeunang geupula pade
Hingga ka kuneng geukoh le rijang
Hana soe hadang jak lake wase
Meunyo nanggroe karu hate meulanglang
Ureueng seumula lam blang hate meusuwe
Geudeungo su beude lagee teuka prang
Langkah geulinggang geuplueng ngon cre-bre
Miseue geupula campli ngon kacang
Timon ngon bawang kajeuet cok hase
Hana teuka ureueng ka jime parang
Bak lheueh binatang peunula jirabe
– 32 –
Hana soe peukaru ureueng meuladang
Hana soe tantang gop nyan jiuse
Geupula tanaman luhu kon wayang
Tansoe ba parang jicang ngon reule
Ureueng ek u gle pih hana teuhalang
Hana soe tantang ureueng meu-awe
Ureueng pot kupi geuharong jurang
Hate geuh teunang hana meusuwe
Ureueng ek pala langkah geutimphang
Ngon reunong geugawang geuchot bak tangke
Pala geupuliek pasoe lam eumpang
Tanna soe seurang jime ngon beude
Ureueng meuneuh’eun geupeuron deungon jang
Eungkot meukandang dalam ie caye
Geusawok ngon reuleue raga geupasang
Tan soe meuayang raga jiruge
Ureueng meulaot geujak ngon pawang
Pukat geureuntang kadang ngon kawe
Eungkot geuteumeung geupuwoe le rijang
Hana soe hadang dibineh pante
Ureueng meusira geucreueh le lancang
Dalam uroe trang anoe geuruge
Ie geutaguen geusayong ulang
Geupubuet ngon teunang hate tan dige
– 33 –
Keu aneuk sikula jinoe tameuproe
Dame lam nanggroe meupeukeuh laba
Aneuk sikula jijak ngon jiwoe
Hana soe goe-goe bak jalan raya
Jitamong lam glah teumpat meureunoe
Tan meudeh meunoe lapang lam dada
Keureuna bak jalan hate tan soe-moe
Keureuna hana soe tupuek ngon tampa
Meunyo lam karu di jalan meupaloe
Na ureueng tan meusoe dipreh meucula
Laju jitanyong meudeh ngon meunoe
Jahila bak jaroe jipoh hana bla
Jijak sikula rata tiep uroe
Kadang jimeubloe soe peung’eut hana
Kadang jimeu-en sabe keudroe-droe
Hana soe peuceukoe jime peusuna
Meunancit Guru sagai tan laloe
Ureueng peureunoe aneuk sikula
Aman bak geujak seulamat bak geuwoe
Tan jimat bak jaroe jicok keureta
Hana soe ancam meumacam bagoe
Hana soe kiloe deungon jipaksa
Peng seulamat lam taih geupasoe
Tan balek-baloe hate lam dada
– 34 –
Meunyo tan dame teuka tan meusoe
Bak keupala jipeutoe jilakee beulanja
Sikula jitot meunyoe tan geuhiroe
Gop nyan jitampoe hana jitaba
Jirampaih ngon gaji sideh ngon sinoe
Tan peue geupuwoe u rumoh tangga
Aneuk peurumoh kadang ka jimoe
Ngon peue tameubloe sapeue teuh hana
Meunyo dame d idalam nanggroe
Teumpat meureunoe aman sijahtra
Aneuk teuh carong pikeran hana dhoe
Bak Ujian jiujoe luloih ube na
Meunyo ka dame maju le jinoe
Rata jeuep sagoe rahmat jiteuka
Geutanyoe pih ako sabe keudroe-droe
Tan saleng meukiloe sabe syeedara
Meunyoe jamee luwa jiteuka keunoe
Jitem pakoe deungon peucaya
Jitem bantu pat nyang rugoe
Jitem gantoe pat nyang cupa
Meunancit peugawe meunyo tapeutrang
Geuwoe-riwang geujak keurija
Meunyo lam dame naf’ah geuh teunang
Dada pih lapang geuduek bak meja
– 35 –
Tapi lam karu jiwa geuh teugang
Ureueng tan geuundang teuka jak ronda
Teuka ancanam bak tan geubayang
Kadang bak geulinggang di dalam kuta
Jilakee dompet jicok meutayang
Jisuet dileukang aleh peue jimita
Jilakee KTP aleh keu wayang
Ka jicok e Cutbang barang meuhareuga
Kadang bak geujak gob nyan jihadang
Jilakee rijang meupeue nyang geuba
Kadang bak geuwoe ka meutang-ilang
Keureuna meuhalang kontak seunjata
Kadang swiping ‘oh troh bak simpang
Ladom teuceungang hana geuduga
Kadang kajimat Honda bak seutang
Moto jihalang jilakee deunda
Kadang dikanto gob nyan jitantang
Beude jigawang u ateueh muka
Meunyo hana peng nyawong teureubang
Ngon su jih garang mirah ngon mata
Meunyo keupala pangkat ka manyang
Ngon peng pih kadang kon le meujuta
Teuka le ureueng nyang tan geuundang
Seunapan jigoyang jilakee jeumba
– 36 –
Sampoe bak Hakim udep tan gampang
Ulee geuh mumang keu sidang peukara
Kadang jipaksa supaya curang
Kadang jihadang jime seunjata
Meunyo nanggroe dame ngon aman
Mudah cit jalan bagi ulama
Geuseumeubeuet di Bale hana halangan
Kitab geuh sajan mudah geubuka
Mudah geutafse ayat Quruan
Hadih pih saban bak geuboh makna
Kitab geupeubeuet syarah ngon matan
Bak cukop alasan meusoe jak sangga
Geujak bak dakwah geupeugah surohan
Geuteugah larangan amanah agama
Meusoe jak bantah hujjah geuh sajan
Curiga geuh pih tan musoh pih hana
Aneuk-beuet geuh rame deungon ikotan
Geupeutroh ajaran salah ngon beuna
Hana soe tudoh peugot komplotan
Ka salah jalan nibak negara
– 37 –
Kadang di Meuseujid geumat peuranan
Jama’ah geuh sajan limong kutika
Dalam geuibadat hana gangguan
Dame ngon aman khusyuek lam dada
Ngon Popeurintah ulama pih rakan
Keureuna sijalan ban kheun agama
Hana soe fetnah jiba tudohan
Sehingga awak nyan saleng curiga
Dalam agama dame ngon aman
Cit peurintah Tuhan keupada hamba
Maka le Nabi geupeutroh fireuman
Hai ureueng meuiman beudame sijahtra
Wajeb tajunjong keumaslahatan
Tatulak keumeularatan leubeh utama
Bak buet suroh gata beusajan
Bak buet larangan sipakat bekna
Meunyo nanggroe dame wahe e taulan
Pane keuseumpatan musoh peucuca
Hana rot jilob jime tudohan
Teutop saloran jih ba peusuna
Beusaleng tawasiet tapeutroh peusan
Ubak keubeunaran tabah ngon saba
Bak hukom peureulee saboh peugangan
Bak sunat han saban hate beurela
– 38 –
Meunyo rakyat dame hai bungong Asan
Bak adat pakriban jinoe lonrika
Bacut sapat loncok tamselan
Supaya bek bosan wahe peumbaca
Tamse tacok nanggroe tan aman
Miseue undangan nibak keurija
Teungoh troh jamee ato hidangan
Ka su seunapan geuplueng meubura
Geuintat Linto seureuta arakan
Malam masa nyan ka meunan biasa
Tapi bak watee le that rintangan
Uroe e taulan undangan geumaba
Meunan cit bagoe macam peasan
Meumacam tarian malam geupuga
Ka meunan dilee mandum tontonan
Geucok rancangan malam geupeuna
Miseue rapa-i seudati saman
Peunoh lapangan ureueng jiteuka
Simalam beungoh hana gangguan
Dame ngon aman bah seupot buta
Pidato molod meunan cit saban
Malam masanyan sampoe ‘oh jula
Lam masa karu le that cobaan
T ’am-t ’um seunapan ureueng ka subra
– 39 –
Yoh masa dame idin pih tan
Tan le rintangan acara tapeuna
Tapi yoh karu pakri tapaban
Le that urusan bacut acara
Meunyo nanggroe dame laen nibak nyan
Tapeugot urosan mudah han sakri
Keu Popeurintah pucok pimpinan
Bak peugot bangunan miseue tarawi
Tanoh ka mupat lengkap rancangan
Geuangkot le bahan keunan meuantri
Semen ngon bata kayee lom teuman
Aman di sinan hana soe deungki
Tamse geujak bak teumpat kunjongan
Tan payah angkatan geuato meuriti
Keureuna di sinan hana ancaman
Teumpat pih aman hana nyang anti
Hase mupakat miseue geusahkan
Tabaca lam koran ta-eu lam tivi
Hana soe caci teuka rongrongan
Paleng na kritikan bak nyang teuliti
Hana soe demon peugot baresan
Hana tantangan cukop jikaji
Meupat hana paih geujak le padan
Geulakee tanggapan dalam diskusi
– 40 –
Meunyo acara jijok undangan
Geujak le keunan hate tan sangsi
Watee geupidato hana halangan
Musoh cit katan hate hana gli
Bila tajak meuhadap ragu geuh pih han
Got that sambotan geutem padoli
Mudah geuteurimong peue na masokan
Geutimang ngon pemikeran le staf ahli
Surat meunyurat mudah hana ban
Beucukop alas an sireuta bukeuti
Hana soe tiree peutron tekenan
Hana sogokan rot yup kurusi
Meunyo nanggroe dame ngon aman
Bandum lapesan udep sirasi
Tapi meunyo karu le that tantangan
Le that ancaman jipreh meuantri
Peuneutop haba
Awai ngon akhe kabeh meusurat
tinggai amanat jinoe meurawe
Awak GAM ngon RI jaroe ka mumat
Aceh meugah that jinoe ka dame
Bekle tahayon deungon tahunyat
Tragedi ka liwat bekle tacungke
Pat nyang taduek bekle taupat
Tuto sipakat bekle ta seunde
Karu ka dame bekle tagugat
Keubit teuh bangsat meunyo taruge
Bekle tatroh deundam keuseumat
Bekle tacupat weueh lam hate
Ie mata nyang karo bekle tasukat
Bekle ta sipat lhok-dheue teukeuse
Bekle ta timang sosah meularat
Be le taintat kumeun bak bangke
Narit nyang ka rhot bekle taradat
Bekle tapeusapat tarangkai cae
Meunyo han tapateh haba peuingat
Peunyaket pih kumat lidah pih singke
Tuboh teuh reugeh gaki keurawat
Keuieng meulipat hana mustahe
Meunankeuh e Teungku lonboh ibarat
Meunyo teusirat makna neupike
– 41 –
– 42 –
Beudoh e Poma katroh bak sa’at
Ureueng ka sipakat nanggroe ka dame
Aneuk teuh tinggai cit na siurat
Nyang laen tan mupat tsunami peuhile
Beutajok Sikula sampe bak tamat
Beuteupat harakat jibeuet tapheuse
Nanggroe tawareh kuasa beujimat
Beujicok manfa’at jiniekmat ngon hase
Beudoh e Teungku ka troh bak sa’at
Ureueng ka sipakat nanggroe ka dame
Lampoh na tinggai nyankeuh cit sipat
Nyang laen ka lumat tsunami peureule
Lampoh tauko rambu beuteupat
Bataih ka mupat bek jeuet keu pake
Jambo tapeudong sinan le leugat
Tapula le tomat watee lheueh pade
Beudoh e aneuk katroh bak sa’at
Ureueng ka sipakat nanggroe ka dame
Gata cit sidroe syeedara tan mupat
Hana ngon jeurat ka ie peucaye
Gata bek beuo jaroe meulipat
Bek teuka buet jahat nibak niet jahe
Peue nyang tapubuet bek sampe meuilat
Bek carong meuupat tabi’at teuh bakhe
– 43 –
Gata bek teungeut lam lumpoe mangat
Bek sampe ladat nibak buet ganje
Gata beujeumot carong ngon hebat
Beuteuka horeumat bak ureueng rame
Geutanyoe ban-bandum ukeue taingat
Langkah taangkat sireuntak ngon sare
Bandum beuna buet reoh tacupat
Makmu tatingkat rata ngon ade
Aceh beumaju beujeumot hareukat
Udep beusehat beugleh ngon hate
Geutanyoe beugleh bek teuka lalat
Bek sampe jiluwat walee le kaphe
Geutanyoe bek tuwo bak buet ibadat
Syuko Hadharat sigolom mate
Akhlak teuh beugot deesya ta taubat
Akan Geubri Syafa’at di Uroe Page
Geutanyoe bersatu timu ngon barat
Laot ngon darat makmu ngon dame
Saban ngon beda sabe lam pakat
Tapeudong Syari’at beu-ek meusampe
Meu’ah meulakee kisah ka tamat
Rela meuralat pat na teukeuse
Wahe ya Allah Neulimpah rahmat
Beujicok manfa’at le ureueng rame
Amin . . . ya Rabb!
Tamat
– 44 –
*Sumber Bacaan Calitra Hikayat ini ialah :
– Hr. Serambi Indonesia, Selasa 18 Januari 2005
– Hr. Serambi Indonesia, 7 Juli 2005
– Hr. Serambi Indonesia, Kamis, 14 Juli 2005
– Hr. Serambi Indonesia, 16 Agustus 2005
– Hr. Serambi Indonesia, 17 Agustus 2005
– Media NAD, 12-18 September 2005
– Hr. Media Indonesia, 23 Agustus 2005
– Koran Tempo, 16 Agustus 2005
– Hr. Republika, 16 Agustus 2005
– Hr. Kompas, 17 Juli 2005
– Hr. Kompas, 18 Juli 2005
– Hr. Kompas, 16 Agustus 2005
– Hr. Kompas, 23 Agustus 2005
– Metro TV, Jakarta
– dan dari berbagai sumber lainnya.
– 45 –
Biodata Penyusun Hikayat :
– T. A. sakti, yang bernama lengkap Drs. Teuku Abdullah, SH.,MA
Lahir di Pidie, 13 September 1954.
Sejak Tahun 1992 telah memfokuskan diri di bidang sastra
Aceh, khususnya Hikayat Aceh. Tiga judul hikayat berjiwa/
nuansa lingkungan hidup telah diterbitkannya, yaitu :
1. Lingkongan udep wajeb tajaga (1999), 2. Wajeb tasayang
Binatang Langka (2001). 3. Binatang Ubit Kadit Lam
Donya (2001). Selain itu juga telah me-latinkan ( transliterasi )
36 judul Hikayat/Tambeh/Nazam Aceh, (semula berhuruf Arab
Jawoe ); yang sebagian teramat sedikit telah diterbitkan.
Penghargaan : 7 Maret 2001 “Berprestasi Unggulan Peraih
KEHATI Award 2001” dari Yayasan KEHATI (Keanekaragaman
Hayati Indonesia), Jakarta. Yayasan ini dipimpin
Prof. Dr. Emil Salim.
Tanggal 14 Agustus 2003 memperoleh Bintang Budaya Parama
Bharma, yang disematkan Presiden Megawati Soekarnoputri
di Istana Negara Jakarta .
Tanggai 19 September 2003 memperoleh Penghargaan Sebagai
“Penulis Karya Terbaik Sastra Aceh 2003” dari Dinas
Kebudayaan Provinsi Nanggroe Aceh Darussalam.
Selasa, tanggal 10 Agustus 2009 menerima Anugerah Budaya
“TAJUL ALAM” dalam rangka Pekan Kebudayaan Aceh (PKA V)
dari Pemerintah Aceh di Anjong Mon Mata, Banda Aceh.
