Jampok ngon Kra – Saduran dari Hikayat Kisason Hiyawan, yakni satu-satunya FABEL ACEH

Jampok Ngon Kra

Oleh: T.A. Sakti

Ujeuen  cit ban jipiyoh. Bunoe beungoh phon trok teungoh malam bak uroe nyan ujeuen cit hana jipirang-pirang. Ban teudoh ujeuen, reudok pih kagadoh ; cahya buleuen malam peuet blah ngon sigra katrang-bandrang.

“Puk…puk…puuk’, su Jampok dicong kayee bak nihet gle Seulawah Dara. Po Jampok got that seu-u jikalon cahya buleuen ka peungeuh ban saboh rimba. Lhee ploh deupa ngon Jampok nyan, dicong kayee laen na saboh kawan Kra nyang teungoh sijuek meugeudep-geudep. Badan yo meutat-tat, gigoe meukhab-khab ; wab sijuek meukhip-khip nyan. Boeh peuehan lagee nyan, lawet uteuen Gunong Seulawah kayem tutong rab hana meu lheueng thon, lethat bak kayee nyang raya-raya ka mate. Uroe jeh kon, asai ka teuga ujeuen bandum binatang gle lagee Eungkong, Lutong, Reungkaih, Weuk ngon Bue laju jigrob-grob jiplueng meutabee jijak meusilee ubak kayee nyan. Jinoe kayee nyang meujeuhom on lagee nyan hanale ka saffan safa, ka tutong meukeuba.

Lam teugoh teukeuta-keuta sijuek nyan, saboh Kra atawa Bue deueh jingieng saboh cahya, hu lagee apui. “Hai rakan, jak tatron uyub bandum tajak madeueng bak apui jeh!”, kheun Bue nyang ban kalon cahya bunoe. Bek lale, sigra lheueh nibak nyan cr’at-cr’eut jigrob Bue jitron jak layu droe bak cahya nyang jisangka apui nyan. Bandum Bue ka jihudom cahya nyan. Keunan ka dijrom droe, sampe ka meuprah-prah. Na nyang layu rueng dilee, nacit nyang teueng laju paleuet jaroe ateueh cahya nyang teugoh hu meulip-lip nyan. Teuma Bue nyang muda-muda, ka gabhuek bak yub ‘apui’ nyan meutaga-taga.

“Pakon meunoe apui meutuwah nyoe, kahek tayub jiteubiet meuk-meuk lam mata, meutapi han hu cit !”, meunan meukr’op-kr’op saboh Bue muda. “Hai, hanseb ngon meupr’ot-pr’ot khong, beudoh bandum tanyoe jak mita rujee ngat tapeudep apui nyoe!”, kheun Kra nyang leubeh utok lam kawan. “Boeh jak, boeh jak!”, seuot bandum Bue, sira bra-bru jibeudoh jijak mita kayee tho.

Na nyang tron u lhok, na nyang ek u cot. Teuma yang geuransang -geuransang dipanjek-panjek u cong kayee. Mita keunoe mita keudeh, teugom teukok nyoe rinthak ranteng jeh ; meusikrak kayee tho hana meudiyeueng. Bandum ranteng kayee basah meujueh-jueh, sabab ban lheueh jitoh ujeuen. “Pakriban nyoe, mandum kayee basah ?”, tanyoeng Bue putik nyang na beu-o siangen nibak nyang laen. “Hai, bek le that rammeune, ka pangkee laju kame keudeh. Euntreuk tho keudroe, “ohka talayu-tasadeue bak apui!”, jaweub Nek jih nyangka useueng.

Bandum peukateuen Bue nyan, ka meunoekon jisimakle Jampok ngon hireun that. “Pakon awak nyan bangai trok u krak”, kheun Jampok lam hate. “Bah kupeugah kaman, bek payah jih mantong!”, lagee nyan jipikele Jampok ; ka mulai dawok ngon buet gob.

“Hai rakan, pakon kapubuet hai nyang sia-sia. Nyang kayub-yub ka meunoeken phon kon apui, nyang kulat batee!”, Pojampok meusu dicong kayee jipeugah bak Bue nyang teungoh madeueng di miyub. “Hai Jampok bek gadohkah ngon buet kamoe. Pakon deungki that rohkah?”, kheun saboh Bue nyang paleng that meute-te tuboh.

“Nyang lon peugah nyoe haba nyang beutoi. Nyan keubit-bit nyo kulat bana, barangkri kayub han jitem hu”, jitindan peugah lomle Jampok han-ekle jisaba. “Hai Jampok, kah nyoe soe jaktueng tan soe pakat han. Peue pasai kajak peurancak-rancak droe ngon kamoe keunoe”, kheun Bue meunoe ka mulai palak.

Lheueh meutuleh lageh nyan, Jampok pih jipo maken toe ngon Bue. “Bit nyoe, tapeurunoe awak tan akai cit tan meuguna. Lagee taple ie ateueh on leubue”. Kheun Jampok sira jipeurab laju bak Bue madeueng. Wab jikheun tan akai, awak Bue maken ju ‘oh jingieng Pojampok. Dijih teutap hana jithee droe.

“Fhuh….fhuhhhh….fhuuuuhh”, dua boh Kra jiyub laju “apui” ngon cula-caloe. “Hai….. hhaaaiii bek kayuble, peue kayub kulat bateueng nyan”. Jipeugah lomle Jampok sira jijak limong hah treuk ngon Bue. “Pakon deungki that kah Jampok, buet kamoe peue rhob kah ?. Dikah nyo han bulut, buleekah le!. Teuma dikamoe sijuek meugeb-geb teuot ‘oh ujeuen lagee nyoe!”, sambot diBue jipeutimang haba.

“Beukeubit lon, peue nyang ku kupeugah nyoe kon sabab deungki.  “Bit-bit kareuna Allah, lillahi Ta’ala !. Man, pakri tapaban teuman, sabab biek kah hana akai pane ka teurimong haba nasihat lon nyoe!”, kheun Jampok sira jipeutoe lom.

“Krub….,Kriep,….krap…krep”, saboh Kra muda ka jigrob manyang jiteugom Jampok. “Oh roeh lam reugam Bue, Pojampok ka julueh laju le Bue  nyang reungkhom beunoe. Ban jikalon le Bue laen, teuma jumeusunoh-seunoh treuk. Jitarek le Kra nyoe : sira jilueh jibaplueng keudeh, kajeuet keu piasan!, Akhe jih, bulee Jampok kabeh jilueh; bandum ka jiloet. Sayang that Jampok, tuboh jih ka teulhon tinggai meubadan……! (T.A. Sakti).

  • Kisah di atas disadur dari Hikayat Kisason Hiyawan(Kisah Dunia Binatang)  yang bersyair bahasa Aceh ke dalam prosa bahasa Aceh.

Kosa Kata

-  Jampok   = burung pungguk

- Kra = Bue, kera

-          Nih’et gle =  sisi gunung yang menurun

-          Deupa = ukuran panjang : mulai pangkal lengan hingga ujung jari

-          – meugeudep-geudep = getaran lutut akibat kedinginan

-          Meukhip-khip = desiran suara di mulut karena dingin

-          Meujeuhom = rindang, lebat

-          Safan- safa = hampa, tak bersisa

-          Meukeuba = amat banyak, hampir semuanya

-          Teukeuta-keuta = badan bergoyang kedinginan

-          Jihudom = mengelilinginya

-          Dijrom droe = berdesakan, berkumpul amat rapat

-          Meulip-lip = kurang terang, hampir padam

-          Meutaga-taga = sungguh-sungguh, sekuat tenaga

-          Meuk mata = keringat mata, sangat lelah

-          Meukr’op-kr’op = memaki-maki kecil akibat kecewa

-          Khong = hanya itu semata-mta

-          Utok = amat tua

-          Geuransang = kuat, bertenaga dan loncah, tangkas dan lucu

-          Panjek = panjat

-          Meujueh-jueh = basah kuyub, terkandung air

-          Siangen = sedikit

-          Rammeune = banyak alasan, ucapan manis di bibir saja

-          Useueng =  sudah tua bangka

-          Peukateuen = kelakuan, perbuatan

-          Meutuleh-lageh = bantah-membantah, saling mengejek

-          Wab = akibat, karena

-          Rhob = sok peduli

-          Meugeb-geb teuot = lutut bergetar karena kedinginan

-          Pakri tapaban = apa boleh buat, sudah suratan

-          Biek = keturunan, silsilah

-          Piasan = hiburan, mainan

Bak kayee ka jareung, maka boh kayee pih ka kureueng. Akibat jih binatang Bue lam Gle Seulawah jinoe kabeh deuek hanseple makanan. Jinoe tiep-tiep uroe jeuet takalon meukawan-kawan Bue jitron u bineh jalan raya Banda Aceh-Sigli lam rimba Seulawah. Wab kadeuek, Bue-bue nyan ka payah dijak preh dahoh, jiharap makanan bak manusia. Na nyang  tiek pisang, kacang lam plastik atawa keuripek. Bue pih ka gadoh malee sabab deuek. Sangkira mantongle bak kayee, Bue-bue nyan han jitem cit jijak preh “geuleupak gob toep” bak manusia. “Gengsi doonk!”, jikheunle Bue sira meublek-blek mata.

Kata Pengantar Tuwanku Raja Keumala: Ketika Menyalin Hikayat Akhbarul Karim

 


Bismillahirrahmanirrahim

Alhamdulillah sekalian pujoe Tuhan sidroe nyang eumpnya.

Rahmat ngon saleuem ateueh Muhammad teuma keu sahbat keuluarga.

Amma bakdu lheueh khutubah nyoe sipatah kalam hamba.

Narit sikatib na sipatah poh beurakah ngon saudara. Adapun Hikayat Akhbarul Karim, khaba dalam nyan sangat mulia. Haba didalam teurlalu ‘ajab, E hai sahbat kon peurbula. Nyan hikayat roj nyang teupat,  lanja leugat lam syuruga. Nyankeuh keubon Jannatul Firdaus,  jeuneh peunajoh meuhimpon di sana. Nyankeuh taman Jannatu ‘Adnin,  teumpat meu’en meuseusuka. Nyan karangan ureueng shaleh,  tan geusareh disinan nama. Nama geusom hana geuseubut,   kareuna geutakot jeuet keu riya. Karangan ‘ulama nyang ‘alimin,  ureueng nyang yakin lagi taqwa. Nama tuan nyan hana lon tusoe,  jeub-jeub sagoe lon pareksa. Teutapi gob kheun Teungku Seumatang,  Allahu ‘aklam lon turi hana. Nyankeuh hikayat nyang patoet that, beuet he sahbat agam dara. Nyankeuh hikayat karangan dokter, ubat neu hambo peunoh dalamnya. Barangsoe pajoh ubat siteugoek,  puleh ceumeukok di dalam dada. Peunyaket dungee deungon jahe,  puleh sare he saudara. Syarat ta ‘amai ban geuseubut,  meunghan pocut teusia-sia. Miseue ubat geuboh lam bajee,  tan he sampee sagai guna. Meunghan tatem jeb ngon tagusuek,  peunyaket budok hilang hana. Saba bacut prat deungon phet,  supaya peunyaket hilang seumua. Meunan keu tamse pubuet ibadat,  lagee ‘uet ubat pel keunina. ‘lleumei Ushul phon neu seubut, kareuna nyan buet  uboe agama. Ushuluddin atawa makrifat,  atawa tauhid sah lom nama. Atawa takheun ‘illeumei kalam meunan  he taulan kheun ‘ulama.

Nyankeuh ‘ileumei jalan taturi,  Tuhan ngon Nabi dum Ambiya. Habeh neu seubut deungon burhan,  dali na Tuhan beuna Ambiya. “Ajab takalon dalil neu hato, dum meurungkho maseng jina. Tamse keunarang intan juhari zamrud sare meupateng lingka. Yakut nyang mirah dum meutabu hireun ta eu lazat mata. Geuikat teuma deungon meuh meuntah,  akan kupiah mahkuta raja. Kulahkama geurasi nan, hireun teurceungong ‘ohta eu rupa. Hate beureuhi ngon galak hansoe,  takalon meubloi  ji buedah cahya. Lang geumilang ban matahari,  hate beureuhi soe yang eu rupa. Takalon cahya that ceumeurlang,  sang buleuen trang nyum purnama. Saboh-saboh peurmata teurkarang,  hu sang bintang nyan suloh donya. Ureung meulayeue darat ngon laot,  nyan keu panyot hu meunyala. Hanle sisat keudeh keunoe,  hanlam duroele meuraba. Nyankeuh ‘ileumei nyang peureulee ‘ain,  ateuh insan  agam dara. Soe han turi ‘ileumei makrifat dumna ibadat teusia-sia. Ileumei nyan taulan nyang peuteupat, ‘itikeud sisat didalam dada. Jikalau bak kapai geukheun keumeudoe, meunghan meuwoe-woe meugisa-gisa. Meuraba raba keudeh keunoe,  karam adoe akhe masa. Lethat ureueng di dalam nanggroe,  han meurunoe bak ‘ulama. ‘Ileumei makrifat han jituntut,  ji peuseb beuet pura-pura. Jikira meungka jimat keureutah, habeh keubagah surah ngon makna. Han ji teupeue jeub-jeub ‘ileumei,  meung hana guree meuraba-raba. Surah meudeh jeutkeu meunoe,  sisat dudoe akhe masa. Ladom nyang kalon miseue hikayat,  hate jihan rhab di dalam dada. Sabab jikalon bahsa Aceh, jeut keujayeh bak peurasa. Jikira kitab meung bahsa Arab,  Jawoe meuhat nyang keudua.

Bahsa Aceh hanjeuet keu kitab,  meunan  sahbat bak jikira. Han jiteupeue bahsa Aceh,  nyang that leubeh bak ‘awam nyang na. Ureueng nyang hanjeuet bahsa ‘Arab, bahsa droe meuhat nyang teur’akla. Kareuna lam kitab peungajaran,  ngon peue nyan tapham nyan nyang aula. Kareuna meukeusud najeuet ta ‘amai,  ban suroh Po rabbul ‘akla. He syeedara agam inong,  jak teumanyong bak ‘ulama. ‘Ileumei Makrifat deungo fiqah,  tajak peusah bak fuqaha. ‘Ileumei tasawuf peurintah batin,  tanyong he Polem bak pandita. Bak ‘ulama nyang shaleh-shaleh,  ta peurkara. Bek teumanyong bak ureung bideu’ah,    jeuet keusalah jalan gata. Ureueng nyang lubha keu donya nyoe,  bek he adoe peurab gata. Kareuna gobnyan ureueng ka saket, gob pakri jeuet peu-ubat dumna. Badan ka habeh ka meusimalu,  ukheue meutabu bak siseun lingka. Bak ‘an geujak geubeudoh han ek,  nyangna tarek cit meung jungka. Ureueng meunan hanjeuet keu guree,  bak ‘ileumei jalan taqwa. Kareuna dokter ureueng nyang pandai, peu-ubat droe dilee mula. ‘Ohka sihat tuboeh jantong, baro peutamong keu ureueng na. Meunan tamse lomboeh sinoe,  pike adoe ngon bicara. Le that ureueng lam nanggroe Aceh,  ji meusunoh pangkat Aulia. Galak teumuntut peurintah baten,  jijak teumanyong pat jingo na. Jiboeh keuguree ureueng nyang ‘awam,  jimita taulan nyang buta mata. Nyang buta mata deungon hate,  habeh meugule ban sineuna. Jidakwa droe Salek, syari’at han dawokle jikira. ‘Ileumei peureulee ‘ain di ateueh droe,  han jipakoe siceulaka. Miseue lam kitab Akhbarul Karim, ‘ileumei peureulee ‘ain ban sineuna. Han ji hireun han jidawok,  sabab that harok pangkat Aulia.

Kareuna kon ‘ileumei haloh,  jitakot hantroh pangkat Aulia. Jitakot dudoe han keuramat,  geupeulheueh hajat bak kubunya. Bahkeuh ‘ohnoe haba sipatah,  jinoe lon kisah nyang keudua.

II

Bagoe nyang dua disinan neupeugah,  ‘ileumei Fiqah he syeedara. Mula neu puphon bhah thaharah keudeh neukeubah shalat nama. Bhah seumbahyang peungabisan,  laen sekalian neu seubut dumna. Peue-peue nyang taklok bak seumbahyang habeh abang neu seubut rata. Habeh neu seubut lahe ngon baten,  ‘ajab takalon ‘ileumei rahsia. ‘Ileumei tasawuf pina neu seubut,  bacut sapat neu calitra. ‘Ileumei peureulee ‘ain teulhee meuhat,  meuhimpon he sahbat sinan dumna. Nyankeu sabab ulon harap beuet beuleugat hikayat mulia. Seureuta tapham maksud di dalam,  supaya han sia-sia. Tabaca beukayem uroe-malam,  pat han meuphom tapareksa. Ta tanyong bak ureueng nyang jeuet,  bekta peuseb sidroe gata. Taba laju bak ureueng ‘alem,  bek he polem iem droe sahja. Supaya meuphom makna ngon surah,  habeh dum crah tapham makna. Tuhanku neubri keu muallif,  teumpat peureuseh dalam syuruga. Neubri teumpat nyang amalan,  Jannatun ‘Adnin nyang teur’akla. Neubri keu gobnyan teumpat peuniyoh,  Jannatul Firdaus sajan Ambiya. Deugon beureukat Teungku nyang karang,  kamoe seukalian neubri bahgia. Neubri meubeuet pagi-peutang,  ‘amal sajan nantiasa. Neu peuampon seukalian,  dara agam mukmin dumna. Neubri meumate ateueh Islam,  teutap Iman dalam dada. Deungon beureukat Nabi Muhammad,  donya akhirat neubri seuntausa. Raseuki beumudah beurang kajan,  bek he Tuhan neubri papa.

Jinoe lon kisah karangan laen,  ureung ‘alem muallifnya. Supaya tamita wahe adoe pat meubunyoe tadeungo  na. Kareuna ‘ileumei  le manfaat, donya akhirat ateueh gata. Siteungoh nibak karangan Aceh,  lon peusareh bak gata nama. Saboh hikayat that bit ‘ajab, ‘ileumei manfaat meuhimpon disana. Nama geuseubut TambihulGhafilin Jalaluddin muallifnya. Gampong Lam Gut teumpat diyamman Dua Plohnam nama sagoenya. Hikayat nyan Teungku cit raya that,  Bab ji meuhat sikureung ploh lima. Nyan hikayat beukai akhirat,  soena hajat keu syuruga. Teurjeumah nibak kitab ‘Arab,  nama meuhat miseue nyangka. Nyan pi saboh laot nyang dalam,  mutiara sinan meuribee rupa. Jeuneh intan  deungon pudoe, dum sinaroe hadlir disana. Beurangsoe beuet hikayat nyan, ‘amai sajan hana ceudra. Nyankeu ureueng ‘ulama akhirat,  jalan ka teupat dalam syuruga. Soe muthala’ah Tambihul Ghafilin,  Tuhan bri rajin bak agama. Neubri galak bak ‘ibadat,  maksiet jarak Tuhan karonya. Ngon beureukat niet muallif, kareuna khalis hate lam dada. Kareuna muallif ureung shalihin,  nyang that yakin keu Rabbana. Kareuna neu ‘amai deungon ‘ileumei,  sabab nyan sampoe beureukat teuka. Nasihat neudum tamong lam hate,  cuba he akhi supaya nyata. Sipatoet ateuh ureung Islam,  inong agam tuha muda. Kareuna sinan ubat hate,  nyangka mate jipohle donya. Hate nyang luka ngon nyan jinoh,  rijang keuseumboeh nibak buta. Narit lon  nyoe beurakat kucuba kalheuh he syeedara.

Siteungoh nibak karangan Aceh lon peusareh jinoe nama. Nashihatul ‘Awam nama hikayat,  Mabahis Rad disinan dumna. Na disinan peutblah pasai,  supaya takeunai dum peurkara. Diawai saboh muqaddimah,  teuma khatimah diakhirnya. Ahlil bid’ah tujohploh dua kawom,  geuseubut bandum sinan nyata. Seureuta geurawi ateueh jeueb kawom,  deungon peudeung nyang tajam mata. Hikayat nyan miseue geulanteu plah,  habeh beukah bid’ah dumna. Peunoh didalam Hadist Firman,  seureuta  taulan nash ‘ulama. Hikayat nyan raya faidah,  ‘iktikeud salah taturi dumna. Miseue kawom nyang peusufi droe,  dalam nanggroe agam dara. Ngon kitab nyan tatupeue salah,  kawom bid’ah ban sineuna. That bit ‘ajab kalam meusajak,  peudueng ngon tak bid’ah nyang na. Nama muallif jinoe lon peugah, Teungku Syekh ‘Abbas geurasi nama. Nama gampong Kuta Karang,  Mukim Sikureung he syeedara. Nyankeu Teungku nyan that ‘alem,  bandum ureung ji teupeue nama. Nama meusyuhu lam nanggroe Aceh,  sabab leubeh bak ureueng na. Nyang na. sipatoet ateuh jeub-jeub Muslim,  Nashihatul ‘Awam dum jibaca. Patot jikeubah digeunireng,  supaya jingieng rijang-jula. Khususan dum rijang meurunggoek, Thariqat Suloek Seunagan nama. Ureueng binoe leumoh hate,  peue nyang dingo ji peucaya. Han ji timang beuna salah,  han jipeusah bak ‘ulama. Ladom tatanyong hanle jipeugah,  ‘iktikeud salah jitroh lam dada. Meunan nyang le ulon teukalon,  baroh tunong tuha muda. Tuhanku neubri pahla  rijang,  Teungku Kuta Karang rahmat gata. Kareuna neu peugot nyan nasihat,  umat Muhammad ngon nyan seuntausa. Beuneu ridha keu gobnyan sidroe,  teumpat geududoe neubri Syuruga.

Siteugoh nibak karangan Aceh,  Tambeh Tujoh Blah geurasi nama. Nyan pi saboh karangan ‘ajab,  sigala nasihat meuhimpon disana. Sajak kalam that balaghah,  tanda ceudah muallifnya. Nama neu Tuan tanlon tusoe,  meuroe neusom droe miseue nyangka. Nyan pi patoet lom tasurat,  keu peuingat dum syeedara.

Siteugoh nibak karangan Aceh,  Mawa ‘Idhul Badi’ah geurasi nama. Hikayat yang taulan haba that haloh,  ngon tasuloh baten gata. Nyan pi karangan ureung dilee,  nan he sampee lon turi hana. Nyan pi saboh patot tacari,  ‘ileumei teurbuni disinan nyata.

Siteugoh nibak karangan Aceh,  ‘ilemeui haloh lagi rahasia. Nan geurasi Hikayat Hikam,  makna jidalam surah ji leungka. Nyan pi patoet that takeubah,  kareuna peunajoh ureueng tuha. Laen nibak nyan pile macam,  nadham taulan meujeuneh rupa. Karangan ureueng nyang dilee-dilee,  ureueng nyan guree dum ‘ulama. Siteugoh nibak nadham-nadham,  ‘Aqidatul ‘Awam geurasi nama. Neu teurjeumah nibak Abda-U uleh Teungku di Tiro nama. Nan geurasi Muhammad Amin,  Dayah Cut taulan teumpat neuna. Nyankeu guree Teungku Syekh Saman,  nyang peukong prang lawan Beulanda. Nadham nyan taulan Bahrul Rashad,  takheun mangat payah hana. Bhah ‘iktikeud neuboh sinan,  hingga seumbahyang neu calitra. Rukon Iman Rukon Islam,  habeh bandum neu peukhaba. Nyan pi patoet that tahafai,  jeutkeu beukai nanggroe baqa. Siteungoh bak nadham tango lon peugah,  Isyarah Rumuz Haraf geurasi nama. Karangan Teungku Zainul ‘Abidin

,  Teungku di Cot Plieng nyangpo ayahanda. Neu puphon  deugon Alif Allah keudeh neu sudah bak Ya nyata. Bahrur Rajaz neuboeh wazan, miseue taulan nadham nyangka. Siteungoh bak nadham nyang that meulagu,  Teungku Pante Kulu muallifnya. Nanggroe Pidie Mukim Titeue,  sinan geukheun teumpat Syaikhuna. Nyan pi nadham Bahrur Rajaz neu peuingat geutanyoe nyang na.

Supaya bek tinggai seumbahyang,  tapateh Syaitan Salek dusta. Sidroe ‘ulama di Mukim Tujoh,  nan geu-uroh Nyakkoeb nama. Teumpat Teungku nyan Pante Ceureumen,  Indatu neudum cit ‘ulama. Syekh nyan lethat karangan,  buhu pile ban neuboeh rupa. Siteugoh nibak karangan Teungku nyan,  Maulod janjongan panghulee Ambiya. Siteugoh nibak kasidah neu karang,  Fadlilat Ramadhan buleuen mulia. Fadlilat Rajab deungon Syakban,  droenyan karang he syeedara. Saboh syair that juhari kata ‘Ali phon neumula. Sinan teurseubut Fadlilat Seulaweuet, keu ureueng beuet raya pahala. Siteungoh nibak karangan Syiah, makna Burdah keu syeedara. Meugantung diyub matan ‘Arab,  that bit ‘ajab hanatara. Makna Abda-U pi droenyan karang,  meunan abang gob calitra. Makna Zubad meunan citlom ta eu meugantung diyub maknaanya. Laen nibak nyan pile macam, karangan taulan ureueng tuha. Hana ekle ulon teuseubut kareuna lanjut le calitra. Lon boeh bacut teumpat taingat,  kadang taminat dudoe ‘oh tuha. Tuhanku neu balah dum keubajikan, keu nyang meungarang nasihat mulia. Neubri Syiah Tuhan bri leupah nibak mara. Neubri lon jak Ahlussunnah,  jalan bid’ah jeuoh dumna. Neubri kuat bak ‘ibadat,  deungon beureukat dum Aulia. Untong kamoe neubri beushafi,  aneuk istri keuluarga. Neubri seunang lam donya nyoe,  mangat meupujoe Po nyang kaya. Neubri seunang meubu mudah,  bek that payah meu-usaha. Neubri mufakat ngon asoe rumoh,  beuji pateh nasihat agama. Hana ekle lon seumurat,  keureutah singkat uroe ka jula. Kareuna roeh buleuen Ramadhan,  ayoeng-ayoengan peuning keupala. Plok daweut lontop kalam lon keubah,  Astaghfirullah Rabbal Baraya. Neu peuampon narit nyang leubeh, neu peumeu’ah ya maulana. Amin Ya Maulana Amin,  kabui mukmin lakee do’a. Deungon meugah Saidil Mursalin,  Tuhan ampon barang deesya. Tammat.

Inilah

Akhbarul Karim yang

Menulis dan nyang punya hak

Tuwanku Raja

Keumala

Di Kampung Keudah,  Kuta Raja,  Aceh Besar,  Sanah 1337 H.

Perkataan Orang yang Surat :

Nyoekeuh kitab bahsa Aceh

Lafai sareh makna nyata

‘lleumei Makrifat keu potallah

‘lleumei Fiqah seumbahyang puasa

Ileume Tasawuf pina bacut

Ka geuseubut  sinoe nyata

Wajeb ateueh dum Muslimin

Akhbarul Karim jibeuet rata

Kareuna dalam nyan peureulee ‘ain

Ateueh mukmin agam  dara

Ureueng binoe nyang  that patoet

Beugoh seupot beuet bek reuda

Ho nyang jijak jiba sajan

Na jeuet jingieng ‘oh jan lupa

‘Amal teuma ban di sinan

Supaya han sia-sia

Peurunoe gob teuma lheueh nyan

Pahla  bak Tuhan han ek hingga

Deungon sabab  bahsa Aceh

Bek peujayeh adoe raja

Kareuna asoe nyan di dalam

Sekalian mutiara

Catatan: Hikayat Akhbarul Karim, dengan   dua jenis huruf dalam satu buku, yakni huruf  Arab Melayu /Jawi/Jawoe dan huruf Latin ini – hasil transliterasi T.A. Sakti –  telah diterbitkan Dinas Kebudayaan, Provinsi Nanggroe Aceh Darussalam, tahun 2002. Bale Tambeh Darussalam, 18 Mei 2011, poh 5.00 Wib., T.A. Sakti.

HIKAYAT TEUNGKU DI MEUKEK

( Hikayat Teungku Di Meukek,  sengaja saya selesaikan penyalinannya bersamaan harinya dengan Hikayat Ranto, yakni  Selasa, 25 Ramadhan 1430 H/15 September 2009 hari ini, dalam rangka memperingati seperempat abad//25 tahun musibah lalulintas yang saya alami pada  Sabtu, 25 Ramadhan 1405 H/15 Juni 1985 M  di sekitar Kalasan, lebih kurang 8 km sebelah timur kota Yogyakarta. Saat itu, saya serta  konvoi mahasiswa Universitas Gadjah Mada, Yogyakarta  dalam perjalanan pulang terakhir, setelah menyelesaikan tugas Kuliah Kerja Nyata (KKN-UGM) di kabupaten Boyolali, Jawa Tengah. Saya, T.Abdullah Sulaiman serta beberapa teman ditempatkan di desa Guli, kecamatan Nogosari. Begitulah,…sekejap setelah melintasi Candi Prambanan pada siang yang panas dan mulai musim “mudik Lebaran”, serta  dalam suana ‘puasa tua’ sekitar pukul 13.11 WIB , sepeda motor HONDA saya yang dikemudikan Joko Supriyanto ditabrak mobil colt barang/tivi. Akibat tabrakan itu, sendi lutut kaki kanan saya lepas, tulang tempurung pecah tiga dan luka bakar di betis hangus sampai ke tulang. Walaupun tidak sembuh total, namun saya dengan dukungan keluarga serta berbagai pihak telah berobat hampir dua tahun.Yaitu; 44 hari di sebuah RS Swasta Yogyakartta, lima  setengah bulan di RS Khusus Patah di Solo, empat bulan pada  lima orang tabib di Sragen dan Yogyakarta dan setahun penuh (April 1986 – April 1987)  pada seorang  tabib terkenal di kecamatan Beutong, Aceh Barat; yang untuk ke sana saat itu harus melintasi enam rakit pada enam sungai besar. Barulah kemudian, saya kembali ke  Fakultas Sastra UGM Yogyakarta buat menyelesaikan Skripsi, dan disidangkan 11 November 1987. Walaupun sudah amat terlambat; saya mengucapkan terima kasih kepada berbagai pihak yang telah membantu serta bersimpati kepada saya dalam menghadapi musibah itu, termasuk kepada 273  para pengirim surat/telegram yang sempat terkumpul ,dan yang datang langsung ke tempat kost saya, karena  menanggapi surat pembaca saya di sejumlah koran-majalah yang mempertanyakan: Kemana Saya Berobat Lagi? — T.A. Sakti).

#Alih aksara dari huruf Latin ejaan Belanda ke ejaan EYD oleh: T.A. Sakti

BISMILLAHIRRAHMANIRRAHIM

Adapun perkataan banda Meulaboh dan segala  Uleebalang enam belas

Taleungo sahbat! Lon peuhaba.

Yoh keurajeuen Teuku Shyik Itam, nanggroe han seunang haro-hara

Bitpi meunan adek meutuwah, Uleebalang nam blaih sajan seureuta

Ampon meu’ah adek sahbat, bah lon surat haba raja

Nyang peuget han lon peugah soe, gobnyan adoe ureueng hina

Hina di donya meuh pirak tan, hina bak Tuhan amai hana

Hina lontuwan cit dua pat,donya akhirat keu Nuraka

Keureutaih puteh daweuet pucat, lon seumurat hana biasa

Kheuet lontuwan cit hana get, bek taupat he syeedara

Assalamu’alaikom adek sahbat, nyoekeu surat cintaguna

Gata sapat lon siseun nanggroe, nyoe surat lon takalon rupa

Keu gantoe ranup sigapu, mangat adek eu reujang jula

Nyoe keu gamtoe tamudakarah, bale lon kisah saboh prang raja

Lila Peukasa Raja Meulaboh, gohnyan nyang suroh yue peuhaba

Mupakat mandum Uleeblang, adek mutuah bukon seunda

Amabakdu lheueh khoteubah, tango lon kisah sidroe Syoekuna

Nyang jimeunan Teungku Di Meukek, geudubang tarek aneuk Rawa

Nyang keu ureueng keubai lagoe ek, mei taculek lam-lam mata

Yoh masa prang nanggroe Meukek, mubalek-balek dalam paya

Sinankeu adek phon meucuhu, barat ngon timu cit geuthee  na

Gampong Rundeng ka geupeulaku, sinan Teungku geupeuget kuta

Nanggroe Rundeng kuta ka kukoh, kon adek beh wayang seunda

Ngon ureueng kuala kejeuet musoh, sinan phon kiroh mula-mula

Sinan keu adek teudoh-meudoh, jadeh meuseuntoh ngon Lila Peukasa

Di Teungku disino hana kiroh, troh di jeuoh kunnuri gob ba

Ureueng Woyla ngon ureueng Bubon,keunan meuhimpon bak Syaikuna

Nyang lodom adoe me bu leukat, jak peulheueh hajat bak Syaikuna

Ladom sahbat jak intat sabi, hana khali jeueb kutika

Timu ngon baroh timu ngon barat, keuunan meusapat kaoy ngon nada

Teungku meucuhu bokon bubarang, talok jajahan Lila Peukasa

Nanggroe Rundeng kakeu aman, nyang nanggroe nyan ka kong agama

Agamapi kong kutapi kukoh, gobnyan musoh ngon Ulanda

Ka geupeudong kuta siruentang, seutot bineh blang meubanja-banja

Nanggroe Meulaboh kageusagang, teubee ngon pisang han geubri jiba

Ranup ngon pineung hanjeut jimele, saket keu ate ureueng po atra

Ret Padang Seurahet han jeuetle jijak, disinan he nyak geujaga-jaga

Bit meunan  jimita ilah, asai beuluepah u kuala

Han jeuet ret darat jijak ret laot,asai beulagot meuneukat nyang di ba\

Na padum treb nyang mumeunan, beugehkeu yoh nyan sigala Raja

Sabab jeut beungeh dum Uleebalang, krueng geusagang ngon kuala

Nanggroe Meureubo ka geusagang,  Tok Janggot han geuniet Raja

Ret krueng Cangkoh han jeuetle ili, habeh keuji sigala Raja

Nanggroe Rundeng han ek ungki, bak rupari kong lagoina

Bahkeu teuduek kisah keu Teungku, nyoe saboh laku laen calitra

Ajayeb subeuhanallah, leungo lon kisah Raja Beulanda

Raja Beulanda ateji susah, jikeumeung pinah sinan Syaikuna

Jimupakat sabe keudroe-droe, tapangge jeunoe Raja-Raja

‘Oh ka tapangge dum Uleebalang, dudoe tayue prang bak jih teuma

Meunankeu pakat di Gompeuni, ban narit jibri ka ubak Raja

Nanggroe Rundeng, jakleh taprang, beulanja tuwan ulon peuna

Hanseb siribee dua lhee ribee, bek ka malee kaprang lanja

Peue meusaket ata Gompeuni, jeunoe kubri keu beulanja

Nyankeu teuku cuba pike, ubat beude ulon peuna

Habeh haba bak Gompeuni, narit jibri jrunoe keu Raja

Teumabujang jijak laju, jingadu jipeugah haba

Habeh bandum haba jipeugah,Raja susah hana tara

Teuma geuhoi Teuku Paneuk, geumeusanteut ngon Teungku Panglima

Wahe aneuk batee ulee, pakri lagee bijeh mata

Keureuna narit bak Gompeuni, jeunoe pakri nyang meurasa

Keureuna geutanyoe jiyue muprang, pakri pikeran nibak gata

Teuma seuot Teuku Paneuk,  duageu santeut ngon Teungku Panglima

Meungnye Gompeuni jiyue muprang, talakee seunampang bandum beurata

Seunampang  aneuk cit ka jibri, jeunoe pakri nibak gata

Meungnye ka jibri beude seunampang, peue jipulang keu musara

Keu nyan aneuk hana lon tukri, bak Gompeuni tapareksa

Meunyo meunan Meukuta nanggroe, tahoi meuntroe ngon pang lima

Lheueh  nibak nyan teuma dudoe, teupangge meuntroe ngon pang lima

Pangge keu bandum Uleebalang, keusyik Saman seuneutet Raja

Ka teupangge Sidi Ucut, nyankeu aneukgeu nyang tuha

‘Oh troih keunan bandum meuhimpon, jaroe jiseuon ateueh jeumala

Teuma marit Peurdana Meuntroe,  ampon kamoe Po Meukuta

Kamoe nyoe bandum ka meusapat,  saleh peue hajat Po Meukuta

Tronkeu sabda teuma di manyang, tango tuwan dumna gata

Nyang jeuet lon yue tueng Teuku dum keunoe, keureuna kamoe ka teuka bahya

Teuma jiseuot dum Uleebalang, kamoe sajan Po Meukuta

Saket ngon mangat laba ngon rugoe,  bandum kamoe nyoe hukom Meukuta

Adat nyoe meunana dum  Uleebalang, Rundeng jiyeu prang pakri bicara

Teuma diseuot dumji sare, meuka na beude Po Meukuta

Meuka na alat dum sikeulian, barang gadaian jitron paksa

Tuanku teutab lam meuligoe, kamoe sinaroe Syaikuna

Teuma geuseot raja keudroe, beude lon yue bloe u Ierupa

Meunana keuh narit jakleh tawoe, oh ase kamoe mupangge gata

Lheuehnyan jiwoe dum u  teumpat, maseng-maseng rakyat di woe u tangga

Ama bakdu kumudian, nyoe laen padan lon peutron lagee

Kon ban dilee lon bri atoran, di sinoe rakan laen lagee

Di Teuku Syhik Itam jeunoe lon seubut, deungon Ucut saboh lagee

Seureuta deungon Teuku Paneuk, lheegeu santeut ka meuteuntee

Peuetgeu deungon Panglima Dalam, sapeue padan wahe sampee

Yohnyan geutamong bak Gompeuni, geutanyong janji habeh dilee

Teuma jiseuot di Keumeundan, ban atoran ulon bri thee

Meugnyo ka neutem Teuku muprang, beude seunampang ulon peuteuntee

Dumna nabsu Teungku peugah, neuteurimong pantaih dua lhee ribee

Teuma seuot Lila Peukasa, nyankeu Raja dalam nanggroe

Adat meunan wahe tuan, tanggoh laman dua lhee uroe

Gompeuni seuot tidak meungapa, jak tagisa Teuku tawoe

Lila Peukasa ka geuriwang, deungon rakan dum sinaroe

Oh troh geuwoe nyan u teumpat, meusyeewarat ubak meuntroe

Jakleh tateung Teungku HajI Ben, Uleebalang laen dum sinaroe

Beusajanngon Datok Ranto Panyang, saleuem lon taun tapeuhareutoe

Beusajan ngon Datok Janggot, ureueng nyang patot di dalam nanggroe

Nyankeu narit jakleh tapeugah, takheun seumah dum sinaroe

Bujang jileungo haba mumeunan, jimudek tuan singoh cot uroe

Oh sare troh u Ranto Panjang, jikheun saleuem Meukuta nanggroe

Habeh bandum kalheueh jipeugah, habeh djigisa lheueh nyan diwoe

Teutabkeu bujang diwoe u teumpat, geumeusyeewarat jeueb-jeueb sagoe

Phonkeu meurah Teungku Haji Ben, Uleebalang laen dum sinaroe

Habeh meusapat bandum keunan tok, lodom bee bubok, ladom bee uroe

Jidongkeu di leuen peurakna seumbah, junjong kalipah Meukuta nanggroe

Ampon tuanku meuribee ampon, jaroe lon seuon ateueh jeumala

Kamoe nyoe bandum ka meuhimpon, ho neusuroh Po Meukuta

Yohnyan seuot Uleebalang, lon geupeusan ule Raja

Singoh geutanyoe tak ili, keudeh u pasi ubak Raja

Enca Allah Meukuta nanggroe,  singoh uroe kamoe meuteuka

Habeh narit rakyat ka jiwoe, peukeumaih droe bandum rata

Bahkeu teuduek haba nyoe siat, ureueng seumurat lon hareutoe

Yoh awai phon hana lon kheun nan, jeunoe he rakan  na tatusoe

Nyang karang hikayat Teungku Malem,  geumeukawen di Peunaga

Teutapi gobnyan ureueng Trumon, ka jeuet keu teumon Lila Peukasa

Bahle lon boeh nyoe panton lagee, dang-dang sampee peugah haba :

Geulanggang meurak diyub bak kayee

Buket Gureutee singet u Daya

Lah ka geuyue sipu malee

Han get lagee lon meudawa

Bak tualang timoh di gunong

Kayee meuganong meudang ara

Lon surat hanjeuet, kheuet han keunong

Kamoe ngeuet bingong hantom biasa

Pat nyang salah adek kikeh

Pat nyang leubeh adek boeh tanda

Di ateueh ulee jaroe lon siploh

Beu ek adoe beh surat beuleungka

Uteuen seumak gunong manyang

Di yub keutapang ureueng poh panta

Lon surat hanjeuet jaroe lon ceukang

Nanggroe teungoh prang ate lon goga

Teuduek ’ohnoe ureueng keumarang, kisah kuriwang sigala Raja

Ama bakdu beungoh ngon uroe, rakyat jeunoe ka jiteuka

Habeh meusapat dum sikeulian, lheueh nibak nyan teuma geubungka

Ka jiili ureueng Ranto Panyang, jiireng tuan Poji Raja

Kakeu ili Datok Janggot, rakyat katok bandum bak Raja

Leuen ka peunoh Dalam ka arat, laen teungoh jak dang-dang teuka

Teudongkeu dileuen peurakna seumah, jaroe duablah ateueh jeumala

Ampon tuanku meuribee ampon, kamoe neusuron ka meuteuka

Saleh peue na buet Tuanku badan, kamoe neupeusan sidroe ngon dua

Tronkeu teuma sabda di manyang, dum Uleebalang jileungo rata

Sabda lon pangge Teuku dum keunoe, keureuna kamoe ka teuka bahya

Adat na gaseh Teuku ngon sayang,neonate prang wahe syeedara

Nibak udeb bahle mate, ’ayeb keuji Teuku dumna

Lheueh neu euntat ulonteu u blang, neuriwang teuma neugisa

Nyankeu haba Teuku lon peusan,gaseh sayang he syeedara

Lheueh nyan seuot Teungku HajI Ben, Uleebalang laen seungab dum rata

Enca Allah Meukuta nanggroe, sajan ngon kamoe Po Meukuta

Meumantong na udeb ulon sidroe, Teuku sinoe teutab lam kuta

Treb that Tuanku ka neupeu umpeuen, bah meung siseun neukalon rupa

Bek Tuanku neuteubiet keudroe, kamoe sinaroe keu peue guna

Siri gampong nyang meusugang, toh siri blang tan musara

Toh siri lhok nyang tan wase, toh siri gle tan musara

Kamoe Tuanku hana peue pike, cit ka ase Po Meukuta

Nyang na bacut na meuseuke, hana beude alat sinyata

Raja seuot teuma meunoe, na bak kamoe alat sinyata

Yohnyan beudoh dum Uleebalang, tamong sajan deungon Raja

Ka geutamong keudeh u benteng, bak Raseuden geupeugah haba

Janji dilee wahe tuan, pakri padan jeunoe bak gata

Bak ulon nyoe hanpeue pike, ‘oh ka ase nibak gata

Nibak ulon peue ka tanyong, kateurimong alat sinyata

Lheueh nibak nyan jiyue bri beude, cit ka ase dum peukara

Lheueh cok beude teuma geuwoe, sabe keudroe-droe geumubicara

Teuma geujok ban nyang babat, ladom he nyak ban nyang jeumba

Na nyang siploh na nyang limong,  hanpeue tanyong maseng jeumba

Teuduek keu haba siblah rambat, jeunoe lon sambat nyang keudua

Ama bakdu teuma dudoe, u Rundeng jeunoe lon calitra

‘Oh jileungo dum Uleebalang,jikeumeung prang ule Beulanda

Maken sunggoh nibak dilee, han ban lagee jipeukong kuta

Kuta pasi bineh krueng Dang, nyanpi tungang kha lagoina

Nyanpi sidroe han jipajoh,kon adek boeh lon museunda

Kuta Sijaloh Panglima Nyak Asan,bak jimeucang meuse cempala

Nyanpi sidroe han lut beusoe, mei takiloe  lam-lam mata

Kuta bineh krueng Imuem Meulaboh,  a sireutoh nyang sasa sasa

Na dua lhee thon nyang ka jimeukukoh, jipreh musoh ureueng kuala

Kuta bineh blang Waki Nyak Him, nyang that yakin keu Rabana

Teungku Krueng Kale di Kuta Pasi, ngon Teungku HajI sapa dua

Teungku Kale di bineh laot, han geutakot barangsi Bahya

Kuta Asan nyan that meulaku, Panglima Nyak Abu disinan jitapa

Waki Nyak Abaih di Kuta Gampong, wali ngon karong sajan seureuta

Kuta mMuseugit Teungku Syeh Dawot, hana jitakot barangri bahya

Nyankeu ureueng nyang geutusoenyang mei takiloe lam-lam mata

Di ureueng Bubon saboh kawan, si Nyak Bantan keu panglima

Di ureueng Woyla saboh sukee, leumbeng lhee-lhee sihaih-haih mata

Nyankeu ureueng nyang keumeung muprang, jikeumeung lawan Lila Peukasa

Cakap ngon alat dum di jaroe, jikap-kap gigoe jibleut ngon mata

Oh ji leungo prang gatai that asoe, nyeum jitiek droe ateueh junga

Oh jileungo bit jipagap, yohnyan  jipeurrab  bak Syaikuna

Lheuehnuyan jitamong keudeh bak Teungku, jitanyong laku pakri bicara

Geutanyoe Teungku jadeh geuprang, dum Uleebalang sajan seureuta

Uleebalang krueng nyoe han mei  taharab, gobnyan kabrat keu Lila Peukasa

Nyankeu narit pakri nyang mangat, adat han dapat udehta bungka

Teungku leungo haba mumeunan, mirah padam ngon ie muka

Cahya muka mise apui,jibeudoh srui bulee ruma

Hokeu aneuk takeumeung jak,  malaikat na soe peulahra

Bek katakot bek kamalee, talawan sitree ureueng kuala

Adat mate dalam bahya nyoe, Tuhan bri dudoe teuma syeuruga

Adeueb kubu aneuk han keunong, soe teumee tamong prang cahida

Leubeh leumak nibak dadeh, leubeh mameh nibak saka

Uroe akhirat teuma dudoe, reujang geupasoe lam syeuruga

Hana geuhisab nibak midan, hana jimeurang Titi Nuraka

Di Padang Masya uroe han tarek, Rabon Malek nyang kuwasa

Sigala kawom bandum jirui, sabab reului bubayang gata

Bandum kawom jirasa mangat sabab nekmat le bak gata

Nyankeu aneuk ho takeumeung jak, hana galak keu sceuruga

Oh jileungo haba teungku  , ateji seu’u mirah ngon muka

Na nyeum -na nyeum beugeujeuet prang, gatai that badan hana tara

Teuduek haba jeunoekeu Teungku, disinoe bak Teuku surat ka teuka

Geuboh haba didalam surat, saket ngon mangat japeurasa

Seumah saleuem seureuta taklem, dan teukeurem sajan seureuta

Haba lam surat han le lon seubut, jeuet bacut meung keu tanda

Teunambak beumanyang kuta beukukoh, ujeuen jitoh bade jiteuka

Oh ban geuleungo narit lam surat, maken beungeh that hu ngon mata

Yohnyan Teungku neuhei rakan droe, neuYeu jeunoe jipeukong kuta

Oh jileungo haba mumeunan, jicokle parang jitubiet lanja

Di Rundeng ka gameh-gamoh, ladom keuh tanoh jitambak kuta

Buloh jikoh jiglong keu pacang, ladom rakan jicui suda

Ladom adek peuget peuleuntek,nyang lisek-lisek gadoh bicara

Seunambak manyang kekeu kukoh, jipreh musoh Lila Peukasa

Teuduekkeu haba keu ureueng Rundeng, haba meriwang keunoe keu Raja

Lila Peukasa geumeukeumah, keudeh bak ayah Teuku Teuripa

Rakyat katok sobeuhanallah, han ek tapeugah mise ie raya

Lheueh nibak nyan geumeuduek sapat, geumupakat nyang sijahtra

Teuma geutanyong bak Uleebalang, soe tem rakan meuseutia

Keureuna Teuku Syik ija hanle, peue na pike Teuku dumna

Bitpi udeb rasa ka mate, jeunoe pakri nyang meurasa

Teuma jiseuot dum Uleebalang, kamoe sikeulian geunantoe ija

Beuphet kuletbeumangat asoe, Tanglong nanggroe Keumala donya

Bek Allah bri reubah bulee, neupeusilee nibak bahya

Teungku Haji Ben purok padan, ho ret taprang jeumba bak gata

Teuma jipeugah jipeuteuntei, kamoe jamei ret kuala

Di Teungku Haji geuprang ret tunong, geusambe nyawong geubantu Raja

Di Teuku Raja ngon Teuku Paneuk, duageu santeut sapeu bicara

Di Teuku Teuripa dua ngon Ucut, gobnyan santeut sajan dua

Teuku Panglima ngon Teuku Haji, habeh janji sumpah seutia

Keumaihkeu pakat dum Uleebalang, jadeh geuprang u Rundeng sama

Masa geupeubeudoih prang wahe tuan, nam hari bulan geuteung kutika

Kutika jroh uroe keunong, geupeh mong-mong geuseuranta

Mula phon beudoih [Tueku] Panglima Dalam, sajan ngon rakan ba ngon tantra

Yohnyan beudoih Teungku HajI Ben, boudoirh nyang laen sigala pang lima

Ka jibeudoih Panglima Nyak Yeb, nyang peonage peungarab Raja

Pang lima Muda jibeudoih dudoe, gatai that asoe aneuk miet muda

Jihambo ngon oek nibak ulee, jihkeu dilee teubiet u luwa

Lheuehnyan jiteubiet Panglima Nyak Amin, jimat ngon sikin puteh ngon mata

Nyanpi sidroe wahe rakan, nyang ka girang ban uleue bias

Yohnyan jibeudoih bandum rakyat, ka jisurak mise ie raya

Lheuehkeu beude mise tupheun, mise ujeuen aneuk keu luwa

Ka lheuehkeu beude nyan di Rundeng,  jadeh meusandeng deungon pang lima

Uroe teungoh trang ka jeuet keu seupot, asab beude pot ka peunoh donya

Lheuehkeu beude nyan jareueng-jareung, mise geuampeueng nyan jamei teuka

Lheuehkeu beude di Kuta Nibong, sinoe gentling bak Syaikuna

Ka meujampu su meureuyam, nyeum ka karam nyan ‘alam donya

Kayee lam uteuen dum habeh patah, badeuek ngon gajah ka jibungka

Yohnyan teubiet bineh krueng Dang, duaji sajan ngon Teuku Woyla

Ka jiteubiet Imeum Meulaboh, keudeh bak musoh ka peurab lanja

Ka jiteubiet Panglima Nyak Man, ka jilumpat Panglima Banta

Ka jiteubiet nyan bandum u blang, ka meutunang sabe pang lima

Nakeu siat sinan jimeucang, seudong ngon birang museum bias

Nakeu siat prang eunuch, nyoe di Meulaboh Bantu ka teuka

Kakeu teubiet nyan Teuku Paneuk, duageu santeut ngon Teuku Raja

Ka jibeudoih Panglima Nyak Akob, han jisurot aneuk miet muda

Ka jibeudoih Panglima Asan Puteh,jiek keudeh u aki kuta

Ka jibeudoih nyan Haji Sarong, tangkulok siglong ateueh keupala

Jitob tangkulok asai Meulayu, mirahji hu mise keuseumba

Ka jiteubiet Teungku Doraman, keubilangan geubileueng sa

Ka jibeudoih Ceh Datok Dagang, ngon Teuku Nyak Doraman nyan sajan dua

Lheueh nyan jiteubiet bandum u blang, jak tulong rakan di dalam bahya

Ret Padang Seurahet di gobnyan geuprang geumeucang  nyan that gura

Ngon jisurak jihoi sare, su beude han putoih taga

Lheueh di lua  lheueh di dalam, uroe teungoh trang seupot jiteuka

Ni phon beungoh troih cot uroe, keudeh keunoe sabe padra

Hana geuriwang geuprang sabe, hingga hampe tok ‘oh sinja

Teutab sinan geumeukukoh, u Meulaboh han geugisa

Beungoh uroe wahe adek boeh, maken kiroh leubeh bak nyang ka

Sabab Ucut geubeudoih yohnyan, ngon Teuku Agam sajan dua

Di gobnyan geuprang ret ie teungoh,nyanpi saboh uleue naga

Panglima prang tango lon kheun soe, nyang that seureuloe peukab siny]ata

Nyak Usen Panjang nama sidroe, nyanpi adoe beuhe raya

‘Oh ka jiek hanle jisurot,han jitakot Po Panglima

Pusa Aye teungohkeu geuprang, dua sajan ngon ureung Teuripa

Sinankeu prang nyang that meugucoh, hana pioh meusiklep mata

Yohnyan geuprang ban peuet sagoe, Rundeng nyan jeunoe ka harohara

Jiprang ret timu jiprang ret barat, jadeh geupagab tanglong agama

Lheuehkeu beude barat ngon timu, meu’u-‘u han putoih taga

Lhee uroe lhee malam meunan sabe, soe po ate nyang hana lia

Phon-phon talo nyan Kuta Nibong,,talo gampong Teungku Syaikuna

Lheuehnyan talo Kuta Asan, panglima sinan ka jibungka

Di Padang Seurahet kuta ka geutueng, rakyat ka jiplueng bak Syaikuna

Lheuehyan geuprang Kuta Sijaloh, kuta nyan jiboih hana beulanja

Tujoh uroe nyan geuprang sabe, nakeuh sabe kiamat donya

Teuduek siat nyoe haba prang, lheuh nibak nyan geulakee doa

Geusie ngon keubeue peiusijuek ngon bude, bandum sare sajan seureuta

Lheueh kanuri geubri seudeukah, sajan kapilah ban sineuna

Teuduek keu haba Raja nanggroe, kisah lon pawoe keu Raja Blanda

‘Oh ban jeuet prang wahe adoe, jeueb-jeueb nanggroe jimita bicara

Teuma jitanyong bak raja Peutawi, jitanyong pakri nyang sejahtra

Sahbat geutanyoe ka geumuprang, pakri reumbang jeunoe bak gata

Adat han tabantu han meulaku, guna Teuku han takira

Teuma jiseuot raja Peutawi, mei han pakri jeunoe bak gata

Nibak kamoe tuwan nyang  reumbang, tatulong prang Lila Peukasa

Adat meunan wahe rakan, jakkeu  tuan bak Tuan Beusa

Keudeh tajak u nanggroe Aceh, tapeusareh janji nyang ka

Habeh haba sinan kasimpan, jibungka yohnyan u Aceh Beusa

Ka jibungka ret kapai apui, meudeurui-deurui di laot raya

Peuet uroe peuet malam peulayaran, tokkeu tuan ho jihala

Jilhon sambok jiteungoh leugat, jipeugah hajat bak Tuan Beusa

Jikheun narit bak jeundran Peutawi, jeunoe pakri tuan bak gata

Lila Peukasa ka geumuprang, pakri pikeran geutanyoe dum na

Tuan beusa kheun teuma meunoe, udeh geutanyoe tulong Raja

Nyokeu meunan cit han jeuet han, tapeungon prang Lila Peukasa

Habeh haba deungon pike, jibungkale raja Blanda

Bak kapai itam jipeudieng sidaduPigo ngon Hindu Cati pi na

Bak kapai puteh jipeudieng meureuyam, Inggreh Marikan sajan jiba

Bak kapai hijo jipeudieng seunampang, that analan Raja Blanda

Cakap ngon alat dum ka ase, jibungkale ban sienna

Kajitarekle ngon saoh, apui pi jiboh ruda jigisa

Jipot ngon angen ka seupui-seupui, kapai apui ka jitron paksa

Kapai apui jak meugisa nanggroe, reujang sampoe ho jihala

Di lhok Meulaboh kapai ka sampoe, jipioh jeunoe ka sikleb mata

Bak kapai itam peudieng boh bareh, bak kapai puteh peudieng boh uka

Bak kapai ijo peudieng sidadu, bak sampok apui jilila-lila

Jitarek alam jipeu ek peutron, jibeidoh alon on kayee muda

Pat han reumbang tuanku ampon, keureuna lon eleumee hana

Leubeh ngon kureueng salah ngon khat, bek tak upat he syeedara

Lheueh nibak nyan teuma dudoe, meureuyam jipasoe tingkab jibuka

Keudeh u darat teungoh sidadu, jiprang Teungku Tanglong Agama

Jipeh ngon tambo jiyub surumpet, prang jipe-ek Raja Blanda

Bak kapai apui jipeulheueh meureuyam, u Rundeng tuan mate boh lila

Ka jipeulheueh boh beureutoh, seun-seun sireutoh seun-seun silaksa

Suara meuse gkanteue pumeulah, soe han ubah ngon ie muka

Ureueng Museulimin hana ugah, seubut kalimah jipeumeusra

Di laot meureuyam di darat dike, nyang liya ate ka jigisa

Boh meureuyam hana teudoh, kon aenda beh lon museum

Junga ka reuloh seunambak ka reuntoh, Imeum Meulaboh ka tinggai donya

‘Oh ka syahid Imeum Meulaboh, maken sunggoh nibak nyang ka

Seupot ngon uroe wahe adeknda beh, prang ka teudoh sikleb mata

Teuduekkeu haba siblah Meulaboh, haba musoh teuduek dilee

Ama bakdu teuma dudoe, teleungokeu nyoe laen calitra

Teuseubut haba keu urueng Museulimin, nyang that yakin bak Rabbana

Yohnyan jitamong keudeh bak Teungku, jingadu jipeugah haba

Pakrikeu hai keu geutanyoe dum, pakri maklum bak Syaikuna

Keureuna geutanyoe keusukaran, ubat beude tan pat tamita

Geutanyoe geuprang ban peuet sagoe, pat tajak bloe gob me hana

Lom pih teuma breueh pade tan, keusukaran jeueb-jeueb peukara

Nyang get Teungku udeh tajak, peue tagalak nanggroe cikala

Di Ueebalang nanggroe ka jibri,ka seb janji ngon Beulanda

Geutanyoe sinoe ka geutaki, ubah janji Raja cikala

Masa dilee janji prang sabi,ka jiili u kuala

Geutanyoe sinoe ka meukurong, meuse tiyong dalam cintra

Habeh grueling haba jipeugah, yohnyan neubalaih ule Syaikuna

Di lon aneuk hanle kujak, hana lon harab keu nanggroe Raja

Nyang lon harab keu Tuhan sidroe, laen sinaroe hamba sahya

Keu gata aneuk meunyeum teumakot, jak tasurot bijeh mata

‘oh jileungo haba meumeunan, jiteubiet sinan ban sineuna

Ureueng Woyla ka mupake, jibungkale ban sineuna

Ureueng Bubonpi ka jiwoe, Teungku sinoe tinggai lam kuta

Beungoh uroe wahe rakan, jipeubeudoih prang meuse nyang ka

Ka jipeuek ngon sided, jiprang Teungku Tanglong Agama

Kakeu jime meureuyam teureulat, kuta pipak seun-seun sideupa

Ka jipeulheueh meureuyam kudok, aneuk ji sijut u dalam kuta

Suji meuse glanteue nyang that, yohnyankeu rakyat ubah ie muka

‘Oh jibareh hana teudoh, maken sunggoh leubeh bak nyangka

Nyang di laot hana lale,ban-ban keude u aki kuta

Kayee keunong putoih meukhan,soe he rakan nyang han liya

Oroe nyan jip rang kuta Syekh Dawoodhan jitakot ka jiek lanja

U aki kuta jiek katok, Teungku Syekh Dawood teubiet u luwa

Geusuet ngon sikin geutang ngon janggot, ka geulob u dalam laksa

Nakeu siat sinan geumeucang, teukeudi Tuhan ajai teuka

Teungku Syekh Dawood cahid di padang,bukon sayang muda baliya

Teungku pi cahid kuta pi talo,ka jiundo bak Syaikuna

Kaeu talo kuta nyang jip rang, teuduek ‘ohnan siat haba

Pasai pada meunyatakan karangan Teungku,cahdan itu lon balek lagee

Taleungokeu nyoe wahe teelan, nyoe karangan lon peuteuntee

Dua ploh tujoh buleue Rameulan, teubietkeu yohnyan Tanglong Agama

pang lima prang dum hanale, habeh mate bak prang baroe sa

Teungku jeunoe habeh pike, geuteubietle laju u luwa

Masa geuteubiet wahe rakan, geuseumayang dilee lam kuta

Lheueh nibak nyan geumeuleuteh, geuteubiet keudeh u luwa kuta

Masa geuteubiet wahe rakan, geumeuhajat tuan jeueb-jeuen eiliya

Geumeulakee ubak Allah, beu -ek geupinah musoh teuka

Deungon kramat Soedina ‘Ali, beureukat Siti Patimah Dohra

Beureukat kramat Abubakari, sahbat Nabi peuet seureuta

Beureukat kramat Soedina Usennyang cahid laen di Akabala

Beureukat mokjidat panghulee Makah, lon beuleupaih nibak bahya

Beureukat Kakbah kubu Nabi, beureukat wali dum ambia

Beureukat entu Nab Adam, beureukat makam tanoh meulia

Beureukat Hamdam mama Nabi, sabat Ansari dum seureuta

Geuteubiet sinan geumeuseulaweuet,  nyang ladombeuet lakee du’a

Teuma geupiyoh di meueujid, bileue ngon hatib sajan seureuta

Bukon sayang that keu Teungku, han meulaku tinggai kuta

Bukon sayang tanglong nanggroe, neuteubiet keudroe prang geurada

pang lima prang hanle sidroe, bukon that rugoe Tanglong Agama

Teungku yohnyan geupeujok droe, bak Tuhan sidroe nyang kuwasa

Geubeudoih sinan wahe adoe, keudeh geupeutoe laju bak kuta

Teungku geujak bak kuta Syekh Dawood, malam seupot geutot suwa

Sira geujak geumeudike, suara meuse dum biula

Soe nyang leungo sijuek ate, sajan ile ngon ie mata

Nakeu siat lheueh nibak nyan, katok keunan rab ngon kuta

Teungku meuhoi teuma keudroe, soe na asoe dalam kuta

Teuma jiseuot ureueng di dalam,soe nyan tuan diluwa kuta

Nyoekeu ulon Teungku di Meukek, ka tasidek na tatusoe

Nama nyoe soe saleh tanyong kamoe, peugah aneuk droe bijeh mata

Nyoekeu ulon Keurani Nyak She, nyang gaseh leubeh Lila Peukasa

Nyoe he aneuk keumala nanggroe, tajak poh kamoe bijeh mata

Peuekeu sabab taprang kamoe, peugah aneuk droe nyang sijahtra

Keurani Nyak She ate geuransang, jipeugah reujang narit Syaikuna

Nyang jeuet muprang Teungku keunoe,  geuyue kamoe di Lila Peukasa

Adat han meutem Teungku meutuwah, mupaban bah ka buet Raja

Kamoe prang jeunoe bandum santeut, caratji peuet muprang gata

Sabab nyang phon tango lon peugah, meuseutot sah bak Teungku bila

Sabab nyang dua taleungo lon kheun kri, han jeuet gob ili u kuala

Neukheun Teung neuprang sabi, pakon neubeunci keu Lila Peukasa

Kamoe Meulaboh ka neutaki, kameng gasi habeh Teungku ba

Habeh neucok kameng ngon itek,habeh neutarek keunoe dum neuba

Kamoe kuala namiet kaphe, jalo kawe habeh Teungku ba

Sabab nyang lhee neumeukawen, hana neutem Lila Peukasa

Kon sikupu kon siwadan,han geumubisan deungon gata

Sabab nyang peuet krueng meusagang, Datok Janggot han meuneu Raja

Uleebalang dum neuniet hanale, nakeu  euse droeneu raja

Jeunoe Teungku pakri pike, ho ret u gle lheueh tabbing

Pakri Teungku kupubeude,tamupake meusikleb mata

Bek he aneuk tapoh kamoe, keureuna lon nyoe kumeung bungka

Jakkeu Teungku beuseulamat, hana kianat kamoe dumna

Habeh haba Teungku di sinan, geutanyong yohnyan Teuku Panglima

Teuma jipeugah lam Kuta Manggi, ngon Teungku HajI sapat banduwa

Grueling haba ka meuteuntee, Teungku jak dilee na saboh kuta

Nyankeu kuta HajI Sarong, seudong-seudong ban sienna

Teuma geutanyong bak kuta nyan, soe he rakan dalam kuta

Teuma jiseuot ureueng didalam, soe meuhoi nyan diluwa kuta

Teuma geutanyong Teungku HajI,  geusudi ngon Teuku Panglima

Teuma jikheun di Kuta Manggi, Teungku HajI sinan banduwa

Lheueh  jipeugah Teungku neujakle, Tuhan teukeudi ujeuen ka teuka

Jipot angen Jilinggang ngon kayee, seupot he sampee glab gulita

Teukeudirullah peurintah Tuhan, Teungku pi yohnyan katok bak kuta

Pinto kuta pi hana jitob, Teungku neulob neutanyong lanja

‘Oh sare tok Teungku u dalam, geutanyong yohnyan Teuku Panglima

Teungku HajI na disinoe, peugah aneuk droe bijeh mata

Jimeukheun na jimeukheun tan, katok geudeubang meutang bak muka

Nyang ladom rakan teungoh eh mangat, teukeujotji that jigrob u luwa

Lheueh nibak nyan teuma geumeucang,  su geudeubang meuse rapana

Nakeu siat sinan geumeucang, jipluengkeu yohnyan ka geutueng kuta

Lajukeu geujak u Kuta Nibong, jak lakee tulong bak Teuku Panglima

‘Oh grueling haba jipeugah, geubeudoih pantaih geu-eu u luwa

‘Ohban geukalon apui ka leumah, geuteubiet pantaih Teuku Panglima

Teungku HajI pi geujak sajan,  tokle tuwan keunan bak kuta

‘Oh tok keunan meureumpok Teungku, geutanyong lajule Teuku Panglima

Soe teudong nyan lon eu sidroe, na lon tusoe takheun nama

Nyoekeu ulon Teungku Di Meukek, nyan soe sidek Teuku Pnglima

Nyoekeu ulon Panglima Dalam, lheueh seunampang bak Panglima Muda

‘Oh lheueh seunampang Teungku pi reubah, jitajo pantaih Panglima Muda

Lheueh nyan jicang Teungku di sinan, bak malam nyan cahit Syikuna

Sabab jeuet cahit han ek meulawan, gobnyan tuwan ka keunong boh uka

Beungoh uroe jicok Teungku, jime lajule Beulanda

Teuma jiboeh lam sambok apui, jime Teungku ho nyang jiyue ba

Laju u laot keudeh jibeukam, Teungku jilhom keudeh jiba

Nakeu sijeuem peulayaran, geukeubah sinan teuma Syaikuna

Teuduekkeu haba kisah keu Teungku,  amabakdu ka samporeuna

Jeunoe lon seubut nyang mate laen, geupuwoe Pole bandum u tangga

Nyang siblah Raja Teungku HajI Ben,  bandum Polem geupuwoe lanja

Di Ranto Panyang jimoe ba-e, jikalon judo ka tinggai donya

Phon di baroh tok u tunong, ureueng inong habeh gabra

Hanle lon boh nama nanggroe, han jeuet adoe bak lon kira

‘Oh habeh haba kakeu sampoe, tamat surat nyoe watee luha

Buleuen Sawai uroe Jumeu’at, tamat surat he syeedara

Nyang po surat Juha Muda Pahlawan,  nyankeu aneuk Lila Peukasa

Nyang surat nyoe Panglima Nyak Amin, sabab yakin that keu Raja

Sabab ate ka keusuroilan,keu jonjongan Meukuta donya

,Oh teuingat wahe adoe, geunab uroe ro ie mata

Panglima Nyak Amin na taturi, panglima prang sabi Juha Muda

Nyankeu Panglima Juhan  Pahlawan, yoh geumeuprang ngon Beulanda

Jeunoe hanle geuduek sajan, teukeudi Tuhan ka geubungka

Di Peunaga jeunoe teutab, sinankeu teumpat ka seuninya

Sabab teuingat geunab uroe, lon surat nyoe meung keu tanda

Taklem horeumat beureukat sampoe, ampon kamoe Po Meukuta

Lah bak pihak han jeuet lon woe, geunab uroe ro ie mata

Wahe Allah kupaban bah, ,ohnoe tuah ateueh donya

Hanle lon peugah haba laju, sanjak ngon lagu han jeut lon rika

Ureueng seumurat ka neutusoe, tamat surat nyoe he syeedara

(Tamat– T.A. Sakti).

Catatan  : Tamat saya salin dari huruf Latin ejaan Snouck Hurgronye/Belanda ke Ejaan Yang Disempurnakan/EYD  ; pada malam Selasa, 25 Ramadhan 1430 H bersamaan
tanggal 14 September 2009 pukul 22.30  WIB beberapa jam  setelah buka puasa.  Alhamdulillahi Rabbil ‘Alaminnn…!!!. Dalam kegiatan transliterasi Hikayat Teungku Di Meukek  ini,  saya banyak dibantu ketiga putri-putra saya, yakni Cut Naila Hafni. T. Idham Khalid dan T.Amalul Arifin. Karena naskah yang disalin dari ejaan Belanda ke EYD, maka saya perlu membimbing mereka. Salinan/transliterasi ini bersumber buku  “TWO ACHEHNESE POEMS“ ,yang merupakan  kajian dan terjemahan G.W.J. DREWES, terbitan THE HAGUE – MARTINUS NIJHOFF – 1980. Pada kesempatan ini saya mohon izin  kepada penulis dan penerbit atas upaya transliterasi dan posting ke blog saya ini, semata-mata bagi pelestarian hikayat Aceh. Dapat saya tambahkan, bahwa dewasa ini tradisi “berhikayat“ di Aceh  dalam keadaan nyaris punah dalam kehidupan masyarakat Aceh sehari-hari!!!. Usaha alih aksara/ejaan Hikayat Teungku Di Meukek  ini merupakan naskah ke 32 dari kegiatan transliterasi naskah-naskah sastra Aceh lama yang saya geluti sejak tahun 1992, yang menghasilkan hampir 7000 halaman ( hikayat, nadham dan tambeh) yang sudah berhuruf Latin, namun hanya secuil saja yang telah dapat diterbitkan. Semua itu saya lakukan dalam rangka  : cari-cari kegiatan atau hana buet mita buet/”upaya pelarian”  dari keadaan diri saya yang cedera akibat tabrakan mobil/colt barang tivi di Yogyakarta , yang ( hari ini) tepat  25 tahun lalu. ( T.A. Sakti )

HIKAYAT QAULUR RIDHWAN

HIKAYAT QAULUR RIDHWAN

 

Karya :  “TGK. ABDUSSALAM BIN LEUBE POLEM”

 

* Alih huruf dari Arab Melayu/Jawi/harah Jawoe ke Latin oleh : T.A. Sakti

 

BISMILLAHIRRAHMANIRRAHIM

 

Hamba fakir mengatakan

Meumuji tuhan ji nyang asa

Sibagoe pujoe nyang that peureuseh

Ban tammuzaiyeh di haq ta’ala

 

Rahim wadud tuhan geutanyoe

Keu barangsoe na bahgia

Karonya taufik keu ureueng nyan

Nibak Tuhanku Rabbana

 

Lheueh puji lon nyan keu tuhan

Seulaweuet tuan keu sarpada

Nyan keu nabi akhe zaman

That pilihan bak Rabbana

 

Ku ek syaksi hanna Tuhan

Illa Rahman Qadim Baqa

Nabi Muhammad hamba Allah

Panglima nyang leubeh di ateueh donya

 

Arridhwanul mau’idlihi

Lil Ikhwani

Lheueh keu pujoe ngon seulaweuet

Nyoe hikayat lon keu gata

 

Nyoe lon bohnan Qaulur Ridhwan

Peungajaran keu syeedara

Wa innamaa billahis ta’iinu

Fainnahu lamuh’inul ma’anii

 

Hamba Allah minta tulong

Beuroh bak untong nyang bahgia

Aduen tuha muda adoe

Tajak keunoe lem panglima

 

lon teumanyong meung sipatah

beugot tapeugah di syeedara

pane gampong teu Dalem droe

Hantom puroe meu-eu rupa

 

Gampong laman di nanggroe ‘Adan

Peurmanyenan meukat sira

Di Dalam jeh pat bu nanggroe

Siri sagoe rumoh tangga

 

Nanggroe teungku blang Tan Qeudah

Nanggroe bineh tan agama

Di Dalem nyan teuma sidroe

Toh bu nanggroe teuh digata

 

nanggroe meu teungku bineh pasi

nanggroe teukeudi ringan agama

Nyankeu nanggroe han got sigak

Nanggroe Mantak geukheun nama

 

Alhamdulillah ‘ala kulli haalin

beugot ihwal bandum gata

limong watee ta seumbahyang

nasihat abang teu nyang hina

 

zakeuet fitrah pi beutaboeh

bek ta gaseh keu areuta

khabar nasihat beu tadeungo

bek takheun meu singoh lusa

 

untong mate teu di aduen

hana kamoe bantu gata

roe meung bak khem sitle  rakan

nyang moe sidroe sit meugata

 

ta peunyuem dalem beuseuleusoe

khabar kamoe dagang hina

jeh ‘oh lawet ka tameukat

toh siri pat krong sa-dua

 

jeh ‘oh dum treb peurburuan

toh beukalan teulam donya

uroe pi beungoh gata u pasi

mita teukeudi raseuki patna

 

ija pi Dalem ruya rayoe

pruet pi han troe rok-rok masa

jeh ‘oh lawet peutang pagi

pulang tuan sinja kala

 

parang saboh ija sipinggang

bungkoih meuneung geutah sala

Allah Allah aduen teungku

Beumeulaku ta keukira

 

Soe bu gaseh keu geutanyoe

Laen sidroe Tuhan asa

Cuba pike dalem Adan

Na bacut bron tameukat sira

 

Beungeh jibloe ureueng binoe

Akan geutanyoe he syeedara

Nyan keu alamat kureueng gaseh

Leumah di jih lahe tanda

 

Adat aneuk teupi meunan

Kureueng supan ji keu gata

Meungroe bak gata kureueng raseuki

Jayeh di hate ji keugata

 

Ija bajee han ek tabloe

Keu ureueng binoe istimewa pula

Gata jidhot ji gurantang

Meuroe abang ji kalon papa

 

Gohlom saket meung siuroe

Gata meunoe teuji hina

Adat saket teu meuthon thon

Lehpi meuhan jibri tuba

 

Nyankeu bek bron bak ‘ibadat

Beu that kuat keu Rabbana

Usaha haleue roe sit wajeb

Sikada seb keu biaya

 

Sitna neuyue uleh tuhan

Lam Quru’an nyata makna

Nyang jeuet salah tinggai ibadat

Sinan keuthat teuka papa

 

Geutanyoe meunghan bak Tuhan sidroe

Bak beurangsoe pisit hana

Seupeurti teurseubut dalam Hikam

Narit tamam bak aulia

 

Manlam yakun biahdi,   Lam yakun bil ahdi

Nyakni barang siapa tiada ada dengan tuhan yang asa

Tiada ia dengan seorang jua pun

Pike aduen bandeng ji na

 

Pakon ureueng geucang di blang

Sang binatang babi raya

Siteungoh ureueng nyang geugantung

Geujho lam krueng sipeukara

 

Ladom keukang geuboh u takue

Na tamse bue geuba di rimba

Ladom rumoh habeh tutong

Asoe gampong han ji publa

 

‘ajib akai dum takalon

That sungguhan mita laba

Adat meunoe buet akhirat

Cit keuramat sikleb mata

 

Uroe pika paja gajah

Hate susah keumeueng bungka

Sira di ulee meu ie paseueng

Nyankeu palang ulee gata

 

Jak teudhab dhab ban kuk’uk manok

Ban beungoh ka keunoe gata

Lem Blang Keudah aduen canden

Meunoe ta meu’en dalam rimba

 

Ohka paja shadek uroe

Tajak u sumgoe manoe gata

Adat han manoe ie seumbahyang

Teuseubeh mameung teungoh jak gata

 

Ohtok teu ugle kayee ta teubang

Beuliyong ta ayon bileueng sa sa

Kayee ta teubang saboh dada gle

Habeh mate kheung nyang teuka

 

Tatot tacah keunong sikureueng

Tujoh keunong tajak gata

Pula keureutoe atawa pade

Ta pileh ri nyang meulaba

 

Lingka rangkang birah pisang

Kuemili gadong  dum tapula

Trueng ngon campli sawi bayam

Rihan nalom pi tapula

 

Rukon jeuneh nyo rezeuki

Miseue labu ie that mulia

Lom direuteuk dua lhee jeuneh

Pula beuhabeh uleh gata

 

Jameun siseuen tame u lancang

Najan alang sira gata

Leubeh nibak nyan tabloe eungkot

Mulia that u nanggroe rimba

 

Dum jeueb buleun meunan adat

Toh pane pat rugoe gata

Pade lam karong meuhat keubu

Ibadat meur/beu-o  keupeuele areuta

 

Lon pi dalem aneuk dagang

Miseue abang papa neu kada

Aduen lem Mantak tadeungo lon

Peurintah Tuhan nyankeu gata

 

Nanggroe digata bineh pasi

Jalan rezeuki le digata

Nyankeu jeuneh eungkot laot

‘Ajayeb that neu karonya

 

Hireuen dahsyat gadoh pike

Awai akhe cuba kira

Jareng jeue deungon bubee

Beumeu teuntee alat digata

 

Jalo …  (Hikayat ini belum tamat-TA. Sakti.)

 

HIKAYAT BANTA AMAT

Hikayat  Banta Amat

# Alih aksara dari Arab Melayu/Jawi/harah Jawoe ke huruf Latin oleh : T.A. Sakti

 

Bagian 1

 

Alhamdulillah pujoe keu Tuhan

Zike sajan nyan di babah

Ingat makna teuma beek han

Hate keunan seureuta lidah

 

Lom seulaweut teuma lagi

Nyan keu Nabi Rasulullah

Teuma do’a lom sigeutue

Keu Ibu dilee ngon Ayah

 

Seubab payah neupeulaku

Neubrie ngon bu dua lhee babah

Ya Illahi wa ya Rabbi

Keu lon neubrie he ya Allah

 

Saboh haba lon keumeung rawi

Hana sakrie indah han ban

Tan na meunan laen beurangi

‘Ajeb seukali ta deungoe dumna

 

Rakan lon keubah hai Teungku beh

Lhok Meulaboh asai mula

Geuyue karang hai Adek beh

Haba nyang jroh hana nyang sa

 

Han keuh dapat lon meudakwa

Suroh Raja he Dalem beh

Lom pih hate teungoh galak

Lon pih hai Nyak teungoh suka

 

Masa lon duek sideh di gampong

Sinan keuh ulon peukeunong haba

Ulon karang phon di sinoe

Ta deungoe kamoe lon calitra

 

Hajat rakan ulon peutroeh

Lon keumeung boeh nyang seutia

Saboh nanggroe luah han sakrie

Nan geurasie Banatiya

 

Raja raya keurajeun luah

Hana tuah aneuk hana

Nama gobnyan raja Ansari

Judo nyakti Putroe Ridla

 

Hareuta le that hana sakrie

Seudeukah neubrie hana reuda

Teutapi gobnyan that biet susah

Dalam gundah akan aneuknda

 

Nyan keuh seubab jeut keu soailan

That silauan keu aneuknda

Neu meulakee uroe malam

Ubak Tuhan mohon pinta

 

Hana teudoh pih meungsiat

Neu meuhajat jeun Aulia

Jeub-jeub tabib mita ubat

Galak neuh that bijeeh mata

 

Neu khanduri neuyue khatam

Uroe malam hana reuda

Neu meulakee ubak Tuhan

Beuranggajan lakee do’a

 

Ya Illahi wa ya Rabbi

Po lon neubrie ban lon pinta

Neubrie aneuk keu lon sidroe

Ureung lakoe nyang jroh rupa

 

Meunan sabe neu meulakee

Goh troeh watee Tuhan karonya

Meunan sabe hana khali

Seudeukah neubrie hana reuda

 

Bak simalam neu beuradu

Deungoe Teungku malam jula

Raja neu eh ateuh kaso

Deungon judo Putroe Muda

 

Padum lawet teuma dudoe

Hamel Putroe pih ka nyata

Na lhee buleun hamel Putroe

Leumah lumpoe Poteuraja

 

Raja neu eh ateuh tilam

Leumah burhan Allah peunyata

Na nyuem jitroen mata uroe

Jidong bak dhoe Poteuraja

 

Meunyuem peudeh sang teumakot

Neu seulimbot beek neu eue rupa

Badan tutong mata seupoet

Teukeujoet ka lalu jaga

 

Bagian 2

 

Oh teukeujoet bak meulumpoe

Bujang Meuntroe neuseurantan

Peurdana jak rijang-rijang

Sare datang ubak Raja

 

Jibot jaroe ban dua blah

Mohon titah bak Meukuta

Ampon Tuanku meuribee ampon

Hoe neu suroh Pomeukuta

 

Seuot Raja Meukuta Nanggroe

Takrah keunoe dum Peutua

Ban jideungoe meunan titah

Rakyat jikrah hana reuda

 

Jitroen rakyat subhanallah

Han tatu’oh han ngon hingga

Dalam peunoh mideun sarat

Jitroen rakyat ban ie raya

 

Oh sajan troeh ka meusapat

Marji Daulat Poteuraja

Jiboet jaroe ban dua blah

Mohon titah nyang sijahtra

 

Ampon-ampon meuribee kali

Ubak gaki Po Meukuta

Teuma seuot Raja Nanggroe

Judo Putroe Raja raya

 

Han peu tuan lon ta daulat

Tamong leugat dumna gata

Tamong dumna rakyat

Lon meudharat susah raya

 

Rakyat tamong dum meukarat

Seumah teuot Poteuraja

Oh lheuh seumah dudoe surot

Deungon likot na lhee deupa

 

Duek bak teumpat dum kafilah

Deungon zaujah Putroe Ridla

Uleebalang dum meusapat

Aneuk rakyat duek meubanja

 

Beuot jaroe ban dua blah

Mohon titah ubak Raja

Ampon Tuanku Syahi ‘Alam

Peu soailan Po Meukuta

 

Peu buhajat Meukuta Nanggroe

Neukrah kamoe dum lasyeuka

Seure nanggroe nyang tan wase

Toh seure gle nyang meulangga

 

Seure gampong nyang meuseugang

Toh seure blang tan meusara

Seure nanggroe nyang neu meuprang

Peugah rijang Po Meukuta

 

Seure laot neu jeumeurang

Toh keuh bintang neu meuhawa

Teuma seuot Raja Nanggroe

Kon keu Putroe nyang lon hawa

 

Lon hoi gata dumna nanggroe

Lon meulumpoe saboh rasia

Nujum tanyong seureuta Meuntroe

Peu neulumpoe Po Meukuta

 

Ulon peugah nyang lon lumpoe

Wahe Meuntroe dumna gata

Na nyuem jitroen mata uroe

Jidong bak dhoe lon meucahya

 

Badan tutong mata seupoet

Teuma teukeujoet ulon jaga

Oh teukeujoet bak meulumpoe

Bujang Meuntroe lon seureuta

 

Nyan keuh lumpoe gata deungoe dum

Pakrie maklum nibak gata

Teuma seuot Teungku Nujum

Meunoe neukheun ubak Raja

 

Piyoeh dilee Ampon Daulat

Lon lob kitab peupoh angka

Nujum neu eue le neulihat

Neutakat bak bintang Raja

 

Ampon meu’ah tanglong nanggroe

Deungoe lon kheun proe Po Meukuta

Leumah lon eue dalam surat

Aneuk Daulat ka rab nyata

 

Bagian 3

 

Raya tuah Tuhanku brie

Lahe takbi Po Meukuta

Nyan keuh Daulat sangkot-paot

Roeh meulimboet lam rahsia

 

Badan tutoeng mata seupoet

Teu ‘uet limboet sangat raya

Han ek tantang sang teumakoet

Meunan limboet Po Meukuta

 

Bah lon peugah haba lawi

Oh tan Duli budak nyata

Bala pih le hana sakrie

Tinggai Ummi Putroe Muda

 

Nyang phoen bala mate Duli

Tuhan neubrie keu Aneuknda

Hareuta jicok dum le Wali

Hana jibrie keu Putroe Muda

 

Kapai pirak kapai beusoe

Jicok dudoe le syeedara

Putroe Ridla nyang isteuri

Dudoe keuji hana tara

 

Nyan keuh bala wahe Duli

Dalam takbi leumah nyata

Leumah lon eue dalam bab tan

Bukon wayang Po Meukuta

 

Laen pih le hana sakrie

Meugoh mate sabe bahya

Oh lheuh Nujum neu hareutoe

Neulakee woe keudeh gisa

 

Ateuh ulee beuot jaroe

Neu izin nyoe lon Meukuta

Com di teuot seumah bak gaki

Raja nanggri peutoe neubuka

 

Joek seureuban nyang meusujoe

Ji peujaroe keu Panita

Nyang laen dum neubrie ringget

Nyang-nyang wajeb deungon kada

 

Ladom neujoek siluweu sutra

Ladom ija nyang meusujoe

Woe keu rakyat dum keumbali

Tinggai Duli Poteuraja

 

Ruku’ sujud hana khali

Pujoe Rabbi hana reuda

Laen pih na dum beurangrie

Tuhan ghani nyang that kaya

 

Lawet lawan teuma dudoe

Ka troeh sampoe Poteuraja

Ka keuh troeh had janji sampoe

Tinggai nanggroe Po Meukuta

 

Malam Khameeh neu beurangkat

Tinggai rakyat bala tantra

Habeh langkah ngon raseuki

Ka teukeudi saboh masa

 

Troeh ngon ajai sampoe tanggoh

Datang le troeh maot teuka

Teuka wareh asoe gampoeng

Geujak junjoeng manyet gata

 

Geutot beude geuboh ubat

Tanda adat Poteuraja

Wali karong dum meusapat

Geujak ngadap Po Meukuta

 

Tunong baroh jitroen rakyat

Mideun sarat hanatara

Dalam peunoh dum meusak-sak

Laen teungoh jak han peu kira

 

Geu seumeusie hana khali

Seudeukah geubrie hanatara

Ka keuh ‘a’ue hana teudoeh

Meugeureupoeh hana ngon sa

 

Keubeu leumoe sie han teudoeh

Rakyat riyoeh subra donya

Raja mate ateuh kasoe

Putroe ba-e roe ie mata

 

Putroe Ridla moe meusoek-meusoek

Ingat judo ka leupah bungka

Allah Allah pakrie keuh jinoe

Hoe troeh lon nyoe ya Rabbana

 

Bagian 4

 

Allah hai untong pakrie keuh ulon

Mate tiyong tinggai cintra

Mate unoe tinggai sambang

Mate dagang seungue banda

 

Wahe aneukingat keudroe

Jeup-jeup nanggroe meureuraba

Putroe ba-e hana bagoe

Ji tumboek droe limpah dada

 

Oh ji ingat nyan keu judo

Ie mata roe ateuh tika

Putroe jimoe that ka meudo

Ateuh kasoe ka teurhanta

 

Ph lon ingat ie mata roe

Sayang judo leupah bungka

Bukon sayang bungong pade

Jipoet angen gle reubah meutimpa

 

Bukon sayang bungong kumbang

Lam keunarang habeh mala

Tuboh paleh badan suwang

Jinoe meulang-lang troeh an tuha

 

Oh lon ingat reuloh hate

Bah le mate sajan gata

Bukon sayang cicem murong

Ji meu eumpung di bubong para

 

Oh lon ingat nyan keu untong

Meu geugulong ngon ie mata

Bukon sayang bungong panjoe

Keunong uroe layee rata

 

Oh lon ingat keu judo droe

Roe meutaloe ngon ie mata

Bukon sayang bungong geutoe

Angen tampoe rhot u donya

 

Meuka mate Raja Nanggroe

Tinggai Putroe keupeu guna

Budak lam pruet goh lom lahe

Dilee mate Po Meukuta

 

Oh lon ingat han meusampe

Bah le mate sajan Raja

Adak udep han soe kalon le

Keuji sabe akhe masa

 

Oh lon ingat nariet jameun

Miseu neukheun le Panita

Jeup-jeup pinto lon teurjunun

Jeup-jeup rinyeun lon teurhanta

 

Saleh hoe troeh siseun nyoe

Neutueng kamoe ya Rabbana

Han jeut lon ingat he ya Akhi

Nariet takbi kheun Ulama

 

Meunan jikheun Putroe ahli

Duek di gaki Poteuraja

Mate Raja tanglong nanggroe

Tinggai Putroe dawok rugha

 

Raja mate Putroe balee

Lam peunangkee budak baro na

Teuduek siat haba Cut Ti

Ulon rawi Poteuraja

 

Raja mate geu seumanoe

Putroe jimoe hana reuda

Oh lheuh manoe suci badan

Boh lam kafan Poteuraja

 

Kafan ‘Arab ija ihram

Dum beebeewan boh bak muka

Minyeuk ‘athar ulee gafo

Keunan geuroe lam keureunda

 

Minyeuk gahru jibab puteh

Dumpeu habeh hanatara

Dumpeu hase ka keuh cukop

Teuma geutop dalam keureunda

 

Toep di ateuh ija sundusen

Haloh licen jeuneh sutra

Cukop hase dumpeu laen

Ka geu peutroen Poteuraja

 

Tajoe sidroe inong male

Ngon breuh pade sipreuk rata

Teuma geu peuduek di teungoh leun

Neumeung inseun siklep mata

 

Bagian 5

 

Geucok sinan geumee u jeurat

Ureung jak intat troh meulaksa

Teuma geulhom dalam uruek

Ulama duek neulakee do’a

 

Raja pih ka lheuh geuseubee

Woe meureeree rakyat dum na

Uroe keulhee geukhanduri

Karong Wali bandum sama

 

Malam limong troeh bak tujoh

Hana teudoh sikleb mata

Malam tujoh geukhanduri

Seutot faki dum Ulama

 

Geusie keubeu siuroe siploh

Hana teudoh sikleb mata

Meunan sabe troeh bak peutploh

Deungoe kiroh subra donya

 

Lheuh nibak nyan teuma dudoe

Ulama woe dum barang na

Rakyat laen dum keumbali

Tinggai Wali lam istana

 

Putroe Ridla tinggai sajan

Uroe malam moe han reuda

Wali karong ji seumimpan

Peutoe geuklam ka jibuka

 

Cok hareuta dum le Wali

Han jitem brie keu Putroe Muda

Ji meubagi sabe keudroe-droe

Ji puwoe u rumoh tangga

 

Oh habeh meuh dum lam geudong

Ka jiusong dum jirata

Habeh jicok dum sinaroe

Guci guroe ka jihila

 

Geudong intan geudong pudoe

Cit ka baroe han peu kira

Kapai pirak kapai beusoe

Ka keu adoe raja muda

 

Habeh dumpeu dum sinaroe

Ji peutoe bak eumpang sira

Parang puntong ngon mata syok

Nyan pih harok han jikira

 

Manok itek kameng keubeu

Dumpeu jihue le syeedara

Peu ji teumeung habeh jicok

Han teujalok akan aneuknda

 

Nyan keuh ureung buta hate

Han jipike keu syeedara

Oh ka habeh dum sinaroe

Laju jiwoe dum jirata

 

Meunoe jikheun ubak Putroe

Nyan Meuligoe bah keu gata

Dumpeu habeh jimeung woe-woe

Tinggai Putroe dawok rugha

 

Teuduek haba Wali Karong

Laen ujong lon calitra

Lawet lawan lheuh khuteubah

Lon kisah keu Putroe Muda

 

Amma ba’du dudoe akhe

Ulon rawi Putroe Muda

Padum lawety nyang ka tinggai

Lon peugah hai Wali Raja

 

Jinoe laen ulon rawi

Keu Sinyak Ti Putroe Muda

Meunoe jikheun Putroe ahli

Moe meu’i’i roe ie mata

 

Allah Allah he ya Rabbi

Mate Duli habeh hareuta

Pat keuh lon cok nyang lon pajoh

Saleh ho troeh meuraba-raba

 

Habeh jicok dum le Wali

Han jitem brie keu Putroe Muda

Beungoh seupot troeh le jiwoe

Jeup-jeup nanggroe hana reuda

 

Beungoh seupot hana teudoh

Ta deungoe kiroh subra donya

Oh lon ingat malam uroe

Beudoh Putroe jak meumita

 

Bagian 6

 

Oh seupot ka troeh le jiwoe

Jeup-jeup nanggroe hana reuda

Ek sirumoh tron sirangkang

Bukon sayang aneuk dara

 

Jak meumita geunap uroe

Oh troek had woe u rumoh tangga

Bak tan wareh deungon karong

Jeup-jeup gampong lon meuraba

 

Pihak ‘ayeb peudeh untong

Jeup-jeup gampong meudiwana

Oh lon ingat nyang keu nasib

Lon teugeuntiet tan syeedara

 

Oh lon ingat judo payong

Meu geugulong ngon ie mata

Lon tueng upah peu ek kayee

Hana malee meunglon hina

 

Keupeu jeut na masa dilee

He panghulee jinoe ka papa

Dilee lon duek dalam meuligoe

Tapi uroe nyoe roe ie mata

 

Yoh na judo Raja Nanggroe

Lam meuligoe hate suka

Meunan jikheun Tuan Putroe

Meu teutalo ngon ie mata

 

Sira jimoe meusoek-meusoek

Bungong tajoek sayang raya

Bak siseun nyoe saleh ho troek

Hate lon brok hanatara

 

Sira ji kheun ji reut ngon oek

Ngon jitumboek beukah dada

Tuan Putroe hate meuroek

Jeup sangoe lhok jak meumita

 

Oh meuteumeung breuh siaree

Han pat jiplee eumpang hana

Ngon pruet raya bube kuree

Duek teurlele jeup-jeup tangga

 

Beungoh ji jak seupoet jiwoe

Geunap uroe meunan juga

Beungoh sikai seupoet sikai

Meunan keuh hai had ngon hingga

 

Ladom ji pajoh ladom tinggai

Ingat keu hai singoh lusa

Untuong saket pajan-pajan

Han ji tujan jak meumita

 

Ingat keudroe Putroe Intan

Hana mawang ngon syeedara

Oh meuteumeung breuh siaree

Han pat jiplee eumpang hana

 

Ngon pruet raya bube keudee

Duek teurlele jeup-jeup tangga

Eumpang pih tan han pat jiboeh

Lakee bulooh bak ureung lingka

 

Bah keuh dumnan saboh atoe

Laen pih le han peu kira

Meunyoe mantong jeut lon seumurat

Leumah leugat peu nyang hawa

 

Bah keuh dumnan teuduek siat

Lon seumurat tan biasa

Lawet lawan teuma dudoe

Saket Putroe budak nyata

 

Lheuh nibak nyan geuseumanoe

Manyak jimoe hana reuda

Allah Allah hai Potallah

Pakrie lon bah he Bentara

 

Hoe keuh lon mee pat lon keubah

Aneuk lidah Putroe Muda

Budak jimee dalam ayoen

Ma ka jitroen jak meumita

 

Budak jimee lon ka susah

Pakrie ilah Putroe Muda

Jikalee na ureung upah

Jeut lon keubah siuroe dua

 

Bagian 7

 

Seuot Putroe nyang meutuah

Beek ta gundah wahe Poma

Ma jak mee le rijang pantah

Ji keubah bak leumueng Poma

 

Putroe Ti cok boeh lam ayoen

Sya-e pantoen le jibuka

Putroe Ridla ji meusya-e

Deungon tamse jilhom punca

 

Allah haido kudoda idi

Bak keumiki di dalam paya

Sinyak jimoe han peu lon brie

Habeh wali cok hareuta

 

Allah haido kudoda idang

Bak keutapang di rot raya

Sinyak jimoe bukon sayang

Han sigeupang le hareuta

 

Allah haido kudoda idi

Boh keumili sikarang dua

Sinyak jimoe that ka meudo

Ie mata roe meuleu lumba

 

Allah hai do kudoda idi

Bak keumili han soe hawa

Sinyak jimoe han peu lon brie

Ma jih faki tan hareuta

 

Sira jimoe meusoek-meusoek

Bungong tajok sayang raya

Bak siseun nyoe saleh hoe troek

Hate lon broek hanatara

 

Sira jimoe jireut ngon oek

Ngon jitumboek leumbam dada

Tuan Putroe hate meuroek

Jeup sagoe lhok jak meumita

 

Oh meuteumeung breuh siaree

Han pat jiplee eumpang hana

Ngon pruet raya bube keudee

Duek teurlele jeup-jeup tangga

 

Tuan Putroe ji meusya-e

Su sang bangsi buloh bungga

Si manyak cut han le jimoe

Ji deungoe bunyoe Ma ji rika

 

Meunoe jikheun sira jimoe

Boh tuloe ngon boh cempala

Oh lon ingat ie mata roe

Oh tan judo hana le hareuta

 

Jak kutimang putiek sukoen

Habeh jitroen angen bawa

Sinyak tinggai dalam ayoen

Diloen kutroen jak meumita

 

Jak kutimang putiek nipah

Aneuk lidah sidroe saja

Kaom teuh le meugah-meugah

Bu sikulah hantom teuka

 

Jak kutimang putiek langsat

Cut Amat rupa samlakoe

Beujeut aneuk ta meujareng

Beek meudeungkeng ngon rakan droe

 

Jak kutimang putiek ramboet

Beungoh seupoet Ma seumanoe

Beujeut aneuk keu Pawang Laot

Beujeut ka got dayong keumudoe

 

Jak kutimang bungong panjoe

Keunong uroe layee rata

Oh lon ingat bukon rugoe

Po Samlakoe tan le hareuta

 

Jak kutimang bungong mancang

Bentara Blang Cut Amat Banta

Oh lon ingat bukon sayang

E buleun trang roe ie mata

 

Bah keuh dumnan he syeedara

Beek le panyang he syeedara

Meunyoe lon tempeugah laju

Na peu teungku ta meurika

 

Si Amat cut rayek laju

Ban boh labu baro geupula

Banta Amat rayek keufroe

Tuhan sidroe nyang peulara

 

Bagian 8

 

Amat Banta rayek leugat

Ban kulat ujeun keunong sa

Ma jih Putroe dawok susah

Jeup kafilah jak meumita

 

Beungoh jijak seupoet jiwoe

Geunap uroe meunan juga

Peu titah Potallahon haq

Ban nyang kheundak ase pinta

 

Teulheuh buleun ka jeut jijak

Ma jih galak hana tara

Tuan Putroe hate galak

Oh jeut jijak Amat Banta

 

Aneuk baro jeut ji takteeh

Ma jih leubeeh hate suka

Ma jih Putroe luka hate

Hana peu brie tan hareuta

 

Nyan keuh seubab hate that weuh

Ji eu ateuh Amat Banta

Digob laen dijih saban

Keutiwasan malee mata

 

Oh ji kalon nibak gaki

Hana peu brie tan hareuta

Hareuta na yoh mantong Duli

Habeh wali cok pusaka

 

Oh jikalon nibak jaroe

Tuan Putroe roe ie mata

Beuthat jikheun beurang gapeu

Ta niet bue pajoeh boh bangka

 

Dilon Poma han kupateh

Hate peudeh nibak nyang ka

Cuba keuh na Raja Nanggroe

Kon ek geubloe gleung suasa

 

Sabe meunan geunap uroe

Sinyak Putroe jimoe rugha

Putroe Ridla dawok jimoe

Ri geumanoe ngon ie mata

 

Oh lon ingat keu aneuk droe

Geunap uroe hate luka

Bukon sayang Banta Amat

Oh lon ingat roe ie mata

 

Keupeu jeut na Karong-Wali

Hana jibrie keu Amat Banta

Oh lon ingat nyan keuh untong

Jeup-jeup gampong jak meumita

 

Banta Amat rayek keudroe

Umue sampoe dua thonen ka

Ji meututo bak siuroe

Deungon Ma droe Putroe Muda

 

Wahe Ma Po Ma Teungku droe

Ta deungoe kamoe kheun bak gata

Teuma seuot Tuan Putroe

Sang geumanoe roe ie mata

 

Han peu aneuk cuba peugah

Lon deungoe sah aneuk bak gata

Wahe Poma beek susah le

Cuba pike wahe Poma

 

Pakon aneuk susah hate

Peu ta pike wahe Banta

Lon ngieng gata Ma Teungku droe

Geunap uroe jak meumita

 

Beungoh neujak seupoet neuwoe

Jeup-jeup nanggroe hana reuda

Bukon sayang hate rusak

Dawok neujak rok-rok masa

 

Nyan keuh hai Ma hate saket

Ka bicah phet lon ka raya

Jinoe neubrie lon meulangkah

Mita seudeukah rumoh lingka

 

Seuot Putroe nyang bangsawan

Beek hai Intan tajak gata

Bah keuh lon jak aneuk badan

Bah hai Intan taduek gata

 

Oh ka rayek aneuk badan

Cit han lon tham wahe Banta

Gata aneuk umue baro

Meung oh pinto goh lom lon ba

 

Bagian 9

 

Oh ji eue le ureung nanggroe

Ulon sidroe tan bicara

Seuot Banta nyang meutuah

Lon ube drah ji peuhaba

 

Beuthat jikheun meunoe meudeh

Beek ta pateh Ma digata

Pakrie aneuk han kupateh

Jikheun paleh lon he Banta

 

Jikheun gata ulon yue jak

Lon peutulak bijeeh mata

Beuthat jikheun beurang gapeu

Neu niet bue pajoeh boh bangka

 

Diloen Poma han lon pateh

Hate peudeh nibak nyang ka

Keupeu jeut Ma lon kueh-eh

Gata jayeh bak ureung lingka

 

Oh lon ingat han meusampe

Oh lon pike han meurasa

Digata Ma tajak sabe

Weuh that hate hana reuda

 

Jinoe Poma beek neujak le

Lon nyoe ube ta peulara

Ta duek gata Ma Teungku droe

Bah le kamoe jak meumita

 

Meunan jikheun Po Samlakoe

Ma jih Putroe roe ie mata

Wahe Mapo Ma Teungku droe

Pakon tamoe sabe rugha

 

Geutanyoe Ma peudeh untong

Jeup-jeup gampong jak meumita

Ma jih Putroe pih moe sajan

Han meuban-ban ureung gila

 

Ka teuingat keuhinaan

Jimoe sajan Amat Banta

Pihak gasien ngon miseukin

Aneuk yatim jak meumita

 

Amat jitroen laju u leun

Meunoe jikheun ubak Bunda

Wahe Mapo Ma meutuah

Na Potallah soe peulara

 

Seuot Putroe nyang meutuah

Pakrie lon bah bijeeh mata

Meuka tajak aneuk badan

Tapreeh sinan sikleb mata

 

Putroe jitroen bagah rijang

Jipeugah nyan bak aneuk droe

He aneuk Po aneuk Teungku

Jeh rot timue rumoh Apa

 

Jak keuh aneuk keunan laju

Mangat lon eue beek meutuka

Beek roh tajak rumoh laen

Meukon bak nyan kaom Apa

 

Peu nan Apa hai Ma meutuah

Cuba peugah lon deungoe nyata

Nama dilee Raja Sufi

Oh tan Duli ayah gata

 

Dilee kon nyan nan geurasi

Oh tan Duli geupeuraya

Banta Amat laju jijak

Ka meurumpok deungon Apa

 

Meubrie saleum mumat jaroe

Cit meubudhoe Amat Banta

Umue baro goh lom sampoe

Akai ragoe han sabe sa

 

Raja tanyong meunoe pantah

Panee roekah bijeeh mata

Pakrie Apa han neuturie

Raja Ansari du lon Raja

 

Meunyoe aneuk Raja Ansari

Keumuen kami bijeeh mata

Meunyoe meunan aneuk badan

Hai intan jak Putroe Muda

 

Banta jijak seun sigeutue

U leupu laju ji hala

Banta jijak leumah leumboet

Bak teuot jiseumah Poma

 

Bagian 10

 

Oh lheuh seumah Banta suroet

Deungon likoet na lhee deupa

Raja neuwoe le di likoet

Beek teumakoet Amat Banta

 

Raja neu ek laju lalu

Neuyue brie bu keu Po Banta

Amat teuduek ateuh tilam

Hai bulan ho tajak gata

 

Seuot Banta nyang meutuah

Jipeugah bak Teungku Apa

Lon hai Apa mita seudeukah

Peu na mudah nibak gata

 

Raja meuhoi le isteuri

Ka neuyue brie peu ek jiba

Neuyue brie breuh meusigantang

Mangat jiriwang le ji gisa

 

Amat cok breuh ka ji seuon

Leugat jitroen woe bak Bunda

Oh sare troeh u meuligoe

Meuhoi Ma droe Amat Banta

 

Wahe Mapo Ma Teungku droe

Lon ka troeh woe nibak Apa

Putroe jitroen pantah laju

Oh jideungoe su Po amat Banta

 

Wahe Mapo hai Ma badan

Beek ta tham-tham lon jak bak Apa

Singoh uroe lon meulangkah

Mita seudeukah wahe Poma

 

Seuot Putroe nyang meutuah

Aneuk lidah bijeeh mata

Meubeek tajak roeh ho laen

Puteh licen malee mata

 

Hana lon jak rumoh laen

Meukon bak en kaom Apa

Nyan keuh aneuk lon peuingat

He Cut Amat beek meutuka

 

Hana patot Ma lon ubah

Bak Potallah lon meudeesya

Oh sare ka beungoh uroe

Beudoh keudroe Pocut Banta

 

Meuka beudoh nibak ji eh

Laju keudeh nibak Apa

Geunap uroe keunan jijak

Ka meunyuem glak nibak Apa

 

Geunap uroe ji peureugi

Teuka beunci Poteuraja

Raja mariet ngon isteuri

Wahe Poti deungoe hamba

 

Si Amat Cut jinoe ta tham

Salah waham dalam dada

Lon hai Poti sang teujalok

Ka meunyuem syok keu si Banta

 

Peu teujalok Tuanku Ampon

Peugah bak lon Pomeukuta

Raja peugah meunoe lagee

Lon jitipee le si Banta

 

Kareuna hareuta jih hana le

Ma jih hari jak meumita

Nyan keuh seubab wahe Putroe

Lon jikiloe uleh Banta

 

Teuma seuot Tuan Putroe

Sira jimoe ngon ie mata

Hana patoet Tuanku droe

Aneuk jaroe culok mata

 

Jih ubiet that umue baro

Peu jikilo ureung tuha

Beek antara jimat beude

Meung dapu han ek ji lingka

 

Beek antara jimat peudeung

Meung ureung jiturie hana

Beek antara jimat tumbak

Meung jijak goh lom sideupa

 

Beek antara jimat beusoe

Meung sidroe jiturie hana

Beek takheun nyan wahe Nyak Ti

Nibak beunci siribee daya

 

Bagian 11

 

Adak han ek jimat beusoe

Deungon jaroe lon ji timpa

Adak han ek jimat peudeung

Ji tulak kengkeung lon binasa

 

Seuot Putroe nyang juhari

Peu ji taki jih baroe sa

Teuduek haba Tuan Putroe

Beungoh uroe troeh Po Banta

 

Ban sare troeh u meuligoe

Marit Putroe deungon Banta

Putroe marit deungon Amat

Suara mangat sang su biola

 

Jeh rot timue aneuk tajak

Na meurie bak kaom gata

Nyan keuh Putroe nyang meutuah

Han ji peugah narit Raja

 

Amat Banta ji jak laju

Jeh rot timue rumoh Apa

Hana dakwa jaweub bantah

Peu ji peugah jih baroe sa

 

Oh sare troeh keudeh ji jak

Ka meurumpok deungon Duya

Meubrie saleum mumat jaroe

Cit meubudho Amat Banta

 

Hamamah tanyong ubak Amat

Suara mangat hanatara

Ho ta meungjak aneuk Teungku

Peugah laju bijeeh mata

 

Amat seuot laju pantah

Mita seudeukah nibak Duya

Tabrie ngon breuh na sigantang

Na ji riwang ubak Bunda

 

Amat ji ek le u leupu

Ka neubrie bu le Putroe Muda

Oh lheuh makeun reutek jaroe

Marit jinoe Amat Banta

 

Han peu laen cit jipeugah

Cit seudeukah ji jak mita

Amat cok breuh ka jiseu-on

Laju jitron woe bak Bunda

 

Oh sare troeh u meuligoe

Jihoi Ma droe pantah sigra

Wahe Mapo Ma meutuah

Nyoe seudeukah nibak Duya

 

Putroe ji troen pantah laju

Oh ji deungoe su Amat Banta

Wahe aneuk Po Samlakoe

Ka troeh ta woe bijeeh mata

 

Seuot Banta nyang seureuloe

Ka troeh lon woe wahe Bunda

Banta ji ek u meuligoe

Duek teupipoe wet ngon sila

 

Geunap uroe keunan ji jak

Hamamah kheun bak Banta Muda

Wahe aneuk nyang budiman

Bak rumoh nyan ta jak gata

 

Amat tanyong pantah leugat

Soe po teumpat wahe Duya

Hamamah peugah ubak Amat

Suara mangat hanatara

 

Nyan keuh rumoh Sinyak Lawi

Kaom Wali Ayah gata

Phon sinoe kon troeh u tunong

Han peu tanyong wahe Banta

 

Amat ji troen laju ji jak

Ka meurumpok deungon Makwa

Wahe Makwa nyang meutuah

Peu na mudah brie keu hamba

 

Siti Lawi seuot pantah

Peu ta peugah wahe Banta

Lon he Makwa mita seudeukah

Peu na mudah brie keu hamba

 

Siti Lawi brie makanan

Lheuh nibak nyan jiwoe lanja

Neuyue brie breuh na sigantang

Na jiriwang woe bak Bunda

 

Bagian 12

 

Banta ji troen rijang-rijang

Ji riwang u rumoh tangga

Oh troeh Banta u meuligoe

Jihoi Ma droe sigra-sigra

 

Wahe Mapo he Ma badan

Ta cok rijang breuh bak Makwa

Putroe ji troen pantah laju

Oh ji deungoe su Amat Banta

 

Putroe cok breuh ka jitarek

Banta ji ek likot Poma

Meunan-meunan geunap uroe

Han peu adoe lon calitra

 

Beungoh jijak seupot jiwoe

Banta laloe jak mumita

Jak rumoh nyoe jak rumoh jeh

Hingga habeh Amat Banta

 

Phon meurannoe troeh meurandeh

Bandum habeh jeup-jeup syeedara

Habeh bandum ka jiturie

Laen lagi lon peuhaba

 

Eumpung puyoh dalam pade

Puyoh mate dalam cintra

Oh lon ingat susah hate

Oh lon pike hana laba

 

Teuduek haba oh noe siat

Lon riwayat Amat Banta

Amat Banta aneuk yatim

That miseukin ateuh donya

 

Lagi ‘ayeb ngon hinaan

Ngon teumpat tan ayah hana

Jipoet angen barat laot

Ji beudoh riboet di ujong raja

 

Nyoe lon kalam ulon sangkot

Jinoe lon boet Amat Banta

Udep lam susah beungoh seupoet

Hana patot bak ta kira

 

Gunong buket labang nanggroe

Buleun uroe tanglong donya

Lon kisah Cut Amat sidroe

Deungon Ma droe neumeuhaba

 

Amma ba’du teukeudirullah

Deungoe lon peugah Amat Banta

Bak siuroe grak bak Allah

Amat peugah ubak Poma

 

Wahe Mapo Ma Teungku droe

Ta deungoe kamoe sikrak haba

Peu na pusaka Ma bak Ayah

Cuba peugah lon deungoe nyata

 

Seuot Putroe nyang juhari

Banta sudi bijeeh mata

Hareuta le yoeh na Duli

Habeh Wali tueng pusaka

 

Peu ta peugah Ma boh hate

Nyang ka tan le peu ta kira

Laen peu na di yueb keupoek

Parang broek-broek cuba mita

 

Amat peugah Putroe beudoh

Ji ek kreeh-kroh le u para

Keudeh keunoe Putroe jeungeuk

Ngon teubiet meuk dalam mata

 

Jeungeuk keunoe jingieng keudeh

Parang teu eh ateuh para

Putroe cok le ka ji peutroen

Hai aneuk lon nyoe pusaka

 

Nyan keuh aneuk pusaka bak Du

Parang dapu he bentara

Laen aneuk han sapeu na le

Hai boh hate bijeeh mata

 

Oh jikalon uleh Amat

Hate mangat hanatara

Siploh uroe ji meuasah

Baro leumah bibi mata

 

Oh sare lheuh ji meuasah

Lom jipeugah ubak Bunda

Wahe Mapo e Ma badan

Ta deungoe laman kheun bak gata

 

Bagian 13

 

Geutanyoe Ma han sapeu na le

Keudeh u gle jak lam rimba

Adak taduek dalam nanggroe

Geunap uroe beunci teuka

 

Got keuh ta jak jinoe u gle

Bah le mate rimueng seuba

Bah le ta jak keudeh u gle

Na pueh hate Teungku Apa

 

Meunyoe mantong lon di mideun

Na peu geukheun dum syeedara

Meuka tan le peu lom geukheun

Bah lam uteun rimba raya

 

Adak lon jak bak Apa droe

Geunap uroe lam geuceula

Nibak hudep bah le mate

Na meusampe geutueng hareuta

 

Adak hudep han sakon le

Keuji sabe akhe masa

Jinoe lon jak dalam uteun

Tinggai mideun bah keu Duya

 

Geutanyoe Ma ta jak u gle

Taboeh pade ta cah rimba

Taduek sinoe hana hase

Saket hate rok-rok masa

 

Oh ka tan le lon di sinoe

Peu jikheun nyoe dum syeedara

Meunyoe mantong lon di nanggroe

Geunap uroe beunci teuka

 

Seuot Putroe nyang bangsawan

Hai intan ban hajat gata

Wahe aneuk pakrie lon bah

Kheundak Allah ka troeh masa

 

Peu ta kheun nyan cit lon pateh

That lon gaseh bijeeh mata

Adak nyang han lon peuturoet

Peu lon ikoet tan hareuta

 

Hareuta han aneuk pih tan

Payah badan mantong sahja

Tuan Putroe ka teupike

Lalu ile ngon ie mata

 

Ie mata ro seun-seun siploh

Ban ujeun toh meuleulumba

Amat tanyong hana teudoh

Wahe Ma beh pakon rugha

 

Pakon tamoe e Ma badan

Peu susahan wahe Poma

Beek ta weuh le Ma keu lumpu

Meutan breuh bu han meusampe

 

Oh tan pade dalam keupoek

Jeup sagoe lhok jak meumita

Amat jimoe meusok-meusok

Bungong tajok ro ie mata

 

Bak siseun nyoe saleh ho troek

Hate lon broek wahe Poma

Geutanyoe Ma susah hate

Beek taduek le jak ta bungka

 

Adak tajak dalam uteun

Han soe tanyong tan syeedara

Cuba keuh na meuh ngon pirak

Adak ta jak pih ji mita

 

Apa geukheun lon geumeungpoh

Geumeuteuoh deungon Duya

Dilon hai Ma hana hajat

Han lon minat keu hareuta

 

Adak lon poh Apa sidroe

Toh geulantoe laen Raja

Hana patot nyang buet meunan

Nyoe digobnyan tan bicara

 

Nyan keuh ureung miseu beunteung

Tan geusayang keu syeedara

Oh ka geucok han geupulang

Bah kumeucang oh watee raya

 

Nyan keuh narit bak lon kaseb

Ka bicah phet lon ka raya

Hareuta Du kee habeh jicok

Han teujalok akan sahaya

 

Bagian 14

 

Peu kupajoeh jinoe dikee

Pa kuteumee kujak mita

Adak ureung nyang na pike

Bah keuh lon brie keu si Banta

 

Hareuta le hana lon minat

Asai mangat lon ngon Apa

Hana hajat lon keurajeun

Bah lam uteun jak lam rimba

 

Beudoh hai Ma jinoe tajak

Hana galak dum keu donya

Bah beuhabeh bandum geutueng

Beek le geukheun singoh lusa

 

Putroe deungoe narit Amat

Hate mangat dalam dada

Ka teupike nyan keuh untong

Meugeugulong ngon ie mata

 

Putoe jimoe bukon sayang

Neupandang bak Amat Banta

Oh teuingat dalam hate

Lalu ile ngon ie mata

 

Ie mata ro hana peu kheun

Ban ujeun buleun keunong sa

Pakon tamoe hai Ma Teungku

Peugah laju lon deungoe nyata

 

Beek ta tanyong aneuk Teungku

Beek lon eu-eu bijeeh mata

Digob laen digata sajan

Lon soailan wahe Banta

 

Digob laen dalam nanggroe

Lon duek keudroe dalam rimba

Bukon sayang Cut Amat sidroe

Seupot lam nanggroe peungeuh rimba

 

Cempala cut jipoe meulinggang

Cicem subang jipoe meugisa

Lon ngon Banta ka meulang-lang

Teungoh ladang uteun raya

 

Meunan jikheun Tuan Putroe

Sira jimoe ngon ie mata

Bukon sayang lon eu madat

Lila nubat dum meubanja

 

Bukon sayang bungong uroe

Putoeh taloe angen bawa

Tuan Putroe neu jeumeurang

Sayang bintang jak lam rimba

 

Bukon sayang bungong mancang

Pucok ija plang meutangga-tangga

Oh lon ingat bukon sayang

E buleun trang leupah bungka

 

Bukon sayang lon eu bambang

Ji jeumeurang laot raya

Si Manyak Cut teungoh alang

Pihak tan wang han soe kira

 

Sira jimoe ji meurawe

Seureuta ile ngon ie mata

Sira jijak jimoe sabe

Oh troeh u gle baro reuda

 

Meurumpok sinan sibak kayee

Ju meuteuntee sang keupala

Teumpat lutoeng deungon himbee

Bue ngon cagee keunan teuka

 

Putroe jiduek diyueb kayee

Top ngon ulee ro ie mata

Ka teuingat nyoe keuh untong

Top keulubong Putroe Muda

 

Digob untong boh timon phang

Dalam hidang rok-rok masa

Dilon untong boh timon bruek

Ban taduek-duek teuka bala

 

Digob untong miseu reubong

Na soe tulong le syeedara

Allah Allah hai Potallah

Pakrie bah lon ka troeh masa

 

Tuan Putroe ka jiba e

Ie mata ro hana reuda

Amat marit jikheun meunoe

Beek le tamoe wahe Poma

 

Bagian 15

 

Adak tamoe han soe kalon

Hana sakon dalam rimba

Beudoh hai Ma beek taduek le

Ta mita gle pat na data

 

Putroe beudoh jijak leugat

Timue barat han meuhoe ka

Ji teungoh cot jitroen paloh

Ta eu jibloeh lam beuluka

 

Ji teungoh cot ji ek gunong

Han peu tanyong he syeedara

Jaroe gaki duroe pajoeh

Ban ujeun toeh ro ie mata

 

Bukon sayang puteh leusoh

Ta eu jibloeh dalam rimba

Tunong baroh han meuhoe le

Jijak sabe hana reuda

 

Badeuk gajah dum jiboh droe

Ban sinaroe dalam rimba

Bukon sayang bungong uroe

Jiboh nanggroe jak lam rimba

 

Jijak laju hana piyoeh

Teubiet reuoh lam-lam mata

Jeumeurang krueng ji arong gle

Ji jak sabe hana reuda

 

Uroe malam jijak sabe

Lam lungkiek gle rimba raya

Jijak laju hana teudoeh

Hingga troeh bak saboh data

 

Ka jikalon sibak kayee

That meuteuntee jroh lagoina

Banta Amat ka jilihat

Ta preeh siat wahe Poma

 

Oh jikalon keudeh keunoe

Jikheun meunoe nibak Poma

Sinoe hai Ma ta ceumeucah

Beek le payah tajak mita

 

Krueng pih rab uteun luah

Han that payah ie ta mita

Seuot Putroe nyang bangsawan

Hai intan ban hajat gata

 

Dilon hai Ma han kutuoh

Banta meehmoh silagoina

Peu nyang takheun ulon pubuet

Meunan hai Cut Amat Banta

 

Seuot Amat bungong meurak

Beek le tajak wahe Poma

Di sinoe Ma that meuteuntee

Lagi kayee hana raya

 

Bah le taduek ta ceumeucah

Beek that payah tajak mita

Taduek sinoe cit that cakap

Dumpeu pih rab wahe bunda

 

Putroe ngon Banta sinan teutap

Uroe pih rab leuho sinja

Oh lheuh malam teuka suboh

Amat beudoh jak cah rimba

 

Habeh jicah dum kayee gle

Ka peungeuh le siblah rimba

Habeh jicah dum kayee tho

Peugot jambo deungon Poma

 

Oh sare lheuh bandum habeh

Teumpat duek eh deungon Poma

Geunap uroe jicah sunggoh

Teubiet reuoh Banta Muda

 

Umue peut buleun jicah sabe

Ka peungeuh gle rimba raya

Oh lheuh jicah teuma jitoet

Asap seupoet dalam rimba

 

Oh ka peungeuh dum seuleusoe

Jikheun meunoe ubak Poma

Wahe Mapo Ma Teungku droe

Jak le tawoe ubak Duya

 

Tajak bloe Ma pade bijeeh

Sinoe lon preeh wahe Poma

Oh neudeungoe narit Amat

Geujak leugat Putroe Muda

 

Bagian 16

 

Hana dakwa jaweub neubrie

Ji peureugi pantah sigra

Oh sare troeh u meuligoe

Ji peutoe bak Duya Banta

 

Hamamah kalon Tuan Putroe

Pane tawoe he Ma si Banta

Kugieng gata reuoh-reuah

Peu na susah tajak mita

 

Putroe seuot cit meutaleh

Pade bijeeh lon jak mita

Neubrie bloe meusinaleh

Lon mee keudeh dalam rimba

 

Sinyak yue mee singoh beutroek

Jimeung tajoeh lusa raya

Hamamah deungoe narit meunan

Jibrie yoh nyan pade keu Banta

 

Putroe cok le ka ji seu-on

Leugat jitroen puwoe keu Banta

Oh sare troeh dalam uteun

Meunoe jikheun Putroe Muda

 

Ka jimeuhoi Banta Amat

Suara mangat hana tara

Wahe aneuk nyang boh hate

Nyoe pat pade nibak Dunya

 

Oh ji deungoe geubrie pade

Mangat hate Amat Banta

Ji cok pade ka jitajoek

Peut uroe roek hana reuda

 

Oh sare lheuh tajoek pade

Mangat hate Banta Muda

Teutap jiduek dalam jambo

Sujud Syuko keu Rabbana

 

Oh watee ji seumbahyang

Pujoe Tuhan Rabbul ‘Akla

Hana ingat keu peu laen

Lahe bathen Tuhan Esa

 

Hana laen nyang jipujoe

Tuhan sidroe nyang kuasa

Sinan teutap malam uroe

Deungon Ma droe Putroe Ridla

 

Teukeudirullah peurintah Tuhan

Bak simalam teuka ie raya

Teuka watee teungoh malam

Nekmat datang ateuh Banta

 

Teuka reudok deungon ujeun

Teuka ie krueng ban semua

Ile u darat lam bak pade

Habeh reule ban sineuna

 

Hanyot ngon broeh dum reun-mareun

Habeh jicreun pade Banta

Kayee hanyot dum ubebe

Meugeunton pade Banta Muda

 

Ie raya ek teungoh malam

Banta pansan teungeut indra

Oh sare ka beungoh uroe

Beudoh Putroe basoh muka

 

Oh jikalon nibak pade

Ka jihoi le Amat Banta

Wahe aneuk Po Samlakoe

Deungoe kamoe bijeeh mata

 

Ta troen keunoe aneuk Teungku

Ta eue laju ie that raya

Lon ngieng pade habeh reubah

Saleh gajah saleh ie raya

 

Oh jideungoe reubah pade

Ka jitroen le Amat Banta

Oh ban ji eue reubah pade

Laju ile ngon ie mata

 

Wahe Poma Ma meutuah

Kon buet gajah buet ie raya

Pakrie hai Ma nyan lon peuglah

Habeh reubah pade dara

 

Seuot Putroe nyang meutuah

Pakrie lon bah wahe Banta

Peuglah aneuk seun sigeutue

Bak tampu ta tiek u lua

 

Bagian 17

 

Phon beungoh kon peuglah pade

Amat sare dawok rugha

Sira peugleh sira jimoe

Sang geumanoe ngon ie mata

 

Troeh an seupot peuglah pade

Meuteumeung le aneuk naga

Aneuk naga ube pureh

Sinan teu-eh lam ie raya

 

Po Amat cok laju jimat

Hate mangat hana nyang sa

Putroe kalon ji tanyong peu

Aneuk uleu wahe Poma

 

Ta boih rijang hai boh hate

Beek ta mat le aneuk naga

Ta boih keudeh aneuk badan

Beek sampe intan jicoh gata

 

Banta susah hana sakrie

Ji peureugi ubak naga

Po Amat Cut jimat sabe

Ma jih sare dawok rugha

 

Seuot Banta jikheun meunoe

Uleu nyoe ulon peulara

Uleu jiboh dalam eumpang

Jiwoe rijang rumoh tangga

 

Oh sare troeh nyan u teumpat

Jicok leugat kanot raya

Ka jipasoe dalam dandang

Meuseuragang jih ka raya

 

Jicok sinan mee ho laen

Salen malen jih ka raya

Ka jipasoe dalam beulidi

Makeun jibrie beungoh sinja

 

Tujoeh uroe dalam beulidi

Rayek lagi aneuk naga

Jicok sinan mee lam abeuk

Ka ji peuduek dalam paya

 

Tujoeh uroe teutap sinan

Bak paya nyan pih ka raya

Po Amat Cut mee ho laen

Sangat jisyen aneuk naga

 

Ji boeh taloe nibak reukueng

Keudeh u krueng jihue lanja

Aneuk naga sinan teutap

Ampon Daulat beungoh sinja

 

Oh troeh Banta ka jilangkah

Naga jihah ateuh Banta

Banta suleung le makanan

Lheuh nibak nyan jiwoe lanja

 

Padum lawet meunan sabe

Kuneng pade pih ka rata

Ka jitroen saboh cicem gle

Ji pajoeh pade han ban publa

 

Nama cicem Indra Bayeun

Rupa sang ureung manusia

Jinoe cicem meunan geukheun

Dilee ureung saboh masa

 

Dilee masa Sulaiman keurajeun

Le that ureung nyang binasa

Nyan keuh aneuk ureung gasien

That miseukin ibu bapa

 

Ku jicarot bak si uroe

Seurapa droe aneuk dara

Ji meulakee ubak Tuhan

Seureutakan ngon ie mata

 

Ya Illahi wa ya Rabbi

Po lon neubrie ban lon pinta

Beujeut keuh lon Indra Bayeun

Meunan jikheun yoh meupinta

 

Meunan sabe ji meulakee

Timoh bulee phon bak dada

Habeh timoh dum sileungkap

Jipoe leugat dalam rimba

 

Oh sare troeh dalam uteun

Ji makeun boh pade Banta

Habeh ji pajoeh dum boh pade

Putoeh tangke bak peunula

 

Bagian 18

 

Banta Amat saket hate

Jingieng pade cicem seuba

Banta susah hana sakrie

Ji peureugi ubak naga

 

Wahe ulon nyang budiman

Ta deungoe lon kheun ubak gata

Naga deungoe Amat peugah

Jingieng pantah le u lua

 

Naga seuot han peu salah

Cuba peugah lon deungoe nyata

Dilon adek saket hate

Habeh pade cicem seuba

 

Habeh ji pajoeh le cicem gle

Pakrie pike nibak gata

Meunyoe meunan dalem boh hate

Aneuk kayee gle ta jak mita

 

Banta peugot naga peugah

Cintra indah hanatara

Oh sare lheuh ka jipeugot

Cintra ji joek jiwoe lanja

 

Banta meusom likoet buloeh

Jipreeh-preeh roeh cicem rimba

Banta Amat saket hate

Ka ji jak le ubak naga

 

Oh sare troeh ka ji peugah

Khem meuhah-hah cicem rimba

Ban ji deungoe khem cicem gle

Saket hate aneuk naga

 

Naga peugah ubak Amat

Suara mangat hanatara

Wahe Aduen Dalem Payong

Ta jak puntong kayee raya     

 

Banta peugot saboh peulintek

Watee ji ek cit meusingkla

Amat Banta ji beudoh le

Aneuk kayee gle ka jimita

 

Oh lheuh ji koh dum ka hase

Ja jimee le ubak naga

Amat peugot naga peugah

Hingga sudah dum peukara

 

Oh sare lheuh dum peulintek

Ji peu-ek euncong bak kayee

Ladom jitheun nibak ateung

Jeut ek roeh Bayeun cicem rimba

 

Po Amat Cut saket hate

Jingieng pade reubah rata

Nibak ji loeb keunan cicem

Maken ji khem hana reuda

 

Meunyoe ku teumeung cicem asee

Ku lueh bulee kuplah keudua

Sira jiplueng sira jikheun

Keudeh u krueng nibak naga

 

Amat tanyong le keu pade

Pakrie pike laen bicara

Han jitem loeb lam peulintek

Ta balek laen bicara

 

Meuhan jiloeb keunan ji-ek

Cicem sulet silagoina

Naga seuot jikheun meunoe

Ji peurunoe Amat Banta

 

Na tadeungoe bicara balek

Lom ji sidek pantah sigra

Naga seuot nyang meuteuntee

Takoh kayee dum nyang lingka

 

Kayee nyang toe bineeh pade

Koh beusare dum cut raya

Oh ka habeh kayee teuglong

Han pat jidong oh jiteuka

 

Ta kueh uruek teuma saboh

Oh seudang jroh ta dong gata

Samat teungoh cit beuteudong

Sinan jidong oh jiteuka

 

Ta boh jaroe nibak ulee

Nabeek jithee meugrak keupala

Oh jiteuka sinan jidong

Ta mat beukong Po Meukuta

 

Bagian 19

 

Amat deungoe nariet meunan

Jiwoe yoh nyan pantah sigra

Jicok parang ngon beuliyong

Ka jipuntong kayee rata

 

Habeh jikoh dum kayee gle

Nyang toe pade Amat Banta

Amat tamong dalam pade

Ka jikueh le uruek raya

 

Amat jidong teuma sidroe

Jiboeh jaroe di keupala

Na sikeujab Banta sinan

Troeh le keunan cicem Indra

 

Jingieng keudeh jingieng keunoe

Hana tungoe miseu nyang ka

Cicem jingieng keudeh keunoe

Nyang na tungoe sikrak saja

 

Banta Amat jikira tungoe

Meuseugamoe teungoh sinja

Ja jipeutoe sinan jidong

Amat rungkhom pantah sigra

 

Jinoe kusie binatang asee

Habeh pade kee dum ka seuba

Seuot cicem jikheun meunoe

Beek sie kamoe wahe Banta

 

Ho cit kuba binatang asee

Jeh pade kee habeh dum na

Jikheun meunoe lom le cicem

Lon brie laen pade keu gata

 

Amat jaweub sira khem-khem

Meukah cicem pat ka mita

Beek ta gundah ulon cicem

Lon brie laen meuh keu gata

 

Pat bu katueng meuh meukatoe

Panee nanggroe ka jak mita

Cuba peulheuh lon lam jaroe

Lon keupruek droe na keulua

 

Po Amat cok jiboeh taloe

Jitiek-tiek droe ateuh tika

Cicem Indra ka jinari

Sue sang bangsi buloh bungga

 

Sigoe jikeupruek sigoe jikeupuek

Meuh meuhamboe ateuh tika

Banta Amat ka keuh tahe

Ji kalon ro maneek meutia

 

Teuma cicem jiploh taloe

Ji pasoe peuloeb lam cintra

Amat Banta hate galak

Oh na meurak cicem rimba

 

Padum lawet teuma dudoe

Banta ngon Putroe hate suka

Jicok sadeup jikoh pade

Ji teubiet le deungon Bunda

 

Beungoh jijak seupoet jiwoe

Geunap uroe meunan juga

Aneuk ngon nang di blang laloe

Cicem sidroe dalam cintra

 

Leupah Amat deungon Ma droe

Cicem peutoe bak guci raya

Dalam sarong keulua droe

Ka jimanoe pantah sigra

 

Ka jimanoe ngon ie lam guci

Badan suci hana leuta

Oh lheuh suci nab ngon likoet

Dudoe jiloeb dalam cintra

 

Dalam cintra ji peuloeb droe

Rupa meuwoe miseu nyang ka

Oh sare troeh seupoet uroe

Troeh le woe Amat Banta

 

Banta jiduek ateuh tilam

Jilop hidang le jibuka

Jingieng asoe tan lam hidang

Banta heran ngon ie muka

 

Banta Amat jihoi Ma droe

Neujak keunoe wahe Bunda

Putroe peurab le bak dapu

Jak taguen bu keu Po Banta

 

Bagian 20

 

Putroe masak bu eungkot reundang

Boeh lam hidang keu Po Banta

Oh lheuh makeun Banta Amat

Hate mangat hanatara

 

Amat ji-eh keutidoran

Teungeut pansan malam jula

Oh lheuh wudhuk tueng ie seumayang

Laju u blang deungon Bunda

 

Cicem Indra mangat hate

Oh ka tan le ureung dua

Ka ji teubiet dalam sarong

Ji keurucong peu nyang hawa

 

Ie lam guci habeh jicrong

Asoe dalong ka seureupha

Geunap uroe meunan sabe

Ka teupike Amat Banta

 

Oh troeh u blang meunoe jikheun

Bah kucie jak luem wahe Bunda

Amat jiwoe seun sigeutue

Ji ek laju u rumoh tangga

 

Banta jiduek likoet bubong

Dalam sarong cicem keulua

Oh jiteubiet dalam sarong

Ta eu jicrong lam guci raya

 

Oh sare lheuh ji seumajoeh

Putroe piyoh ateuh keuta

Rupa indah hana sakri

Sang-sang Diyu bungsu Indra

 

Leubeeh nibak Putroe Aloih

Nyang geutroh di Tanoh Nata

Cahya badan hu seumeulhoeh

Keudeh jeuoh leumah cahya

 

Miseu geukheun Putroe Faridoeh

Nyang geutroh-troh dum geuteumpa

Putroe Faridan nyang geutroh-troh

Putroe Faridoeh ureung geuba-ba

 

Banta Amat yoe han teudoeh

Ji eu leusoeh Putroe Muda

Dalam hate jih meureubeut

Jimeung pubuet sang malee mata

 

Bit pih meunan hate tutong

Tamse seudong ji ek bisa

Banta jiduek likoet bubong

Ka ji tinggong seunang raya

 

Ji keumeung drob Tuan Putroe

Teuingat keudroe beek binasa

Bah le kucok jinoe sarong

Beek jeut jikong dalam cintra

 

Banta Amat meunyum troh nyum

Sang meuteumeung buleun ruja

Meukheuk teukhem krub jiteugom

Putroe rungkhom laju jiwa

 

Tuanku beek neucok sarong

Neungieng keu lon siblah mata

Beek jan geuwoe Bunda di blang

Neubrie rijang Po Meukuta

 

Banta Amat iem beurdiri

Cit meupo Ti peugah haba

Beek antara na ji seuot

Meureunggot han bulee mata

 

Putroe Indra apoh-apah

Allah Allah ka troeh masa

Neubrie pulang hai Tuanku

Keu lon neu eue siblah mata

 

Putroe Indra riyoh jimoe

Lon uroe nyoe malee raya

Banta Amat pih that hireun

Tan leupah kheun sikrak haba

 

Meunyum malee sang di hate

Ka teupike Amat Banta

Ban dua hoe sabe malee

Toep ngon ulee han le haba

 

Geumeuduek-duek saboh sapat

Na siat woe Putroe Ridla

Putroe meuhoi Banta Amat

Suara mangat hanatara

 

Bagian 21

 

Wahe aneuk puteh licen

Hoe ka cicem dalam cintra

Banta Amat jikheun meunoe

Neu ek keunoe wahe Bunda

 

Putroe ek le rijang pantah

Hingga leupah keudeh lanja

Putroe Ridla ka teuseupoek

Bungong tajok neu eue rupa

 

Putroe Indra beudoh laju

Ji tajoe le seumah Bunda

Putroe Ridla le meututo

Ngon bungong keundo Siti Indra

 

Hai Putroe Cut lon teumanyong

Hai Cut Bungong bijeeh mata

Beek weuh hate Putroe Bungong

Lon teumanyong beek sia-sia

 

Putroe seuot insya Allah

Han peu salah wahe Poma

Peugah aneuk nyan bak bungong

Lon teumanyong bijeeh mata

 

Putroe Ridla yoh nyan tanyong

Bak Cut Bungong putroe muda

Pat teuh gampong seure nanggroe

Digata soe ayah bunda

 

Seure nanggroe ta keurajeun

Ta cuba kheun lon deungoe nyata

Soe nan gata yoh di nanggroe

Peugah Putroe pantah sigra

 

Meunoe jikheun sira jimoe

Dum geumanoe ro ie mata

Tuanku beek neu meuwayang

Neubrie pulang sarong hamba

 

Putroe Indra jimoe sabe

Ka teupike Amat Banta

Ka teusuwe dalam hate

Ka teupike dalam dada

 

Bah le ku sadong saman jinoe

Beek le tamoe Putroe Muda

He Putroe Cut ta deungoe kamoe

Seb ka jinoe Po Jroh Rupa

 

Nyoe ku peugah Tuan Putroe

Ta duek sinoe sajan hamba

Putroe seuot jikheun meunoe

Po Samlakoe beek meuseunda

 

Peu ta lakee Tuan Putroe

Ta khem keu kamoe han ta kira

Ku sangka kon buet teuh meunoe

Ta peungeut kamoe uleh gata

 

Masa ta duek di cong kayee

Gata sidroe laen bicara

Han kupulang jinoe sarong

Ta duek ngon lon he Adeknda

 

Beek le tamoe Bintang Canden

Sangat lon syen Nyak keu gata

Ta duek sinoe Puteh Licen

Lon meukawen Nyak ngon gata

 

Putroe Indra sangat malee

Jitoeb ulee leumah muka

Seubab Banta meunan tuto

Jeut jiba-e Putroe Muda

 

Seubab jikheun jimeukawen

Puteh Licen sang malee mata

Putroe Indra malee sipu

Han jeut ji eue muka Raja

 

Sarong han le jijeut lakee

Meunyum malee sang di mata

Oh ji deungoe narit Putroe

Jimoe yoh nyan Putroe Muda

 

Wahe Bunda beek neusudi

Gampong Abi han pareksa

Han lon tupat daerah nanggroe

Han lon tusoe nan ayahnda

 

Beek neusidek ngon neusasat

Lon ubit that yoh meupinta

Lon hai Bunda lumpoe ingat

Cit ubit that tan ayahnda

 

Bagian 22

 

Padum lawet dalam uteun

Padum buleun lama masa

Nyan keuh Bunda han lon jeut kheun

Bayang-bayang leumah nyata

 

Sang na teuingat dalam hate

Bak lon pike wahe Bunda

Ayah dilon ureung gasien

That miseukin hanatara

 

Hana nanggroe tan keurajeun

Lagi geukheun ureung papa

Nama ulon tan geurasi

Yoh di nanggri bak ayahnda

 

Miseu lon duek di teungoh leun

Meunoe lon kheun wahe Poma

Lon meulakee nibak Tuhan

Seureutakan ngon ie mata

 

Beujeut lon keu Indra Bayeun

Meunan lon kheun wahe Bunda

Oh sare lheuh lon meulakee

Timoh bulee phon bak dada

 

Teuma lon po u dalam gle

Seureuta ile ngon ie mata

Ka lon peutoe ubak pade

Putoh tangke bak peunula

 

Lheuh nibak nyan teuma dudoe

Bak siuroe jeut binasa

Jeut ka roeh lon dalam taloe

Pi-e budhoe Po Meukuta

 

Banta Amat di sinan toe

Duek bak sagoe likoet Bunda

Banta jikhem leumah gigoe

Ji deungoe Putroe peugah haba

 

Meunyum malee di sinan toe

Jitroen dudoe bak seulasa

Putroe Ridla marit dudoe

Deungon Putroe Siti Indra

 

Wahe aneuk Po Sambinoe

Ta niet kamoe ureung tuha

Beek le tajak nyan hoe laen

Lon peukawen ngon si Banta

 

Putroe Indra han le tuto

Cit meutahe matong saja

Putroe Indra duek teupakong

Seubab sarong ka bak Banta

 

Hana sapeu le meututo

Meung ta eue ro ngon ie mata

Putroe Indra sinan teutap

Troen teudhab-dhab Putroe Ridla

 

Oh sare troeh ubak Amat

Suara mangat hanatara

Wahe aneuk Po Samlakoe

Ta deungoe kamoe bijeeh mata

 

Gata aneuk lon peukawen

Puteh Licen gata ka raya

Banta Amat iem beurdiri

Turon lagi ubak naga

 

Hana sapeu jaweub jibrie

Oh lheuh Po Ti peugah haba

Putroe Ridla ula-ilie

Hana sakrie meehmoh raya

 

Jicok tika adee pade

Ji peuhase dum peukara

Pade leukat pade jatoe

Mee lam uroe dum seumua

 

Teuma neutroen Tuan Putroe

U nanggroe laju ji hala

Ji jak kalon Teungku Mudem

Soe-soe nyang tem sidroe dua

 

Oh sare troeh ubak Mudem

Sira khem-khem peugah haba

Ulon Teungku raya hajat

Neujak siat dalam rimba

 

Neumee alat dumpeu beek han

Ngon peukhatam Amat Banta

Neuba rakan na nam tujoh droe

Singoh uroe beutroeh neuteuka

 

Bagian 23

 

Beek han neujak Teungku meutuah

Neu seuleuah keu Pocut Banta

Mudem seuot alhamdulillah

Insya Allah ulon teuka

 

Putroe jiwoe troeh u teumpat

Cit teudhab-dhab rok-rok masa

Oh sare troeh le u rumoh

Ta eue meehmoh jak leung tika

 

Lheuh nibak nyan teuma seupoet

Troeh le laju malam jula

Hingga suboh beungoh uroe

Beudoh Putroe jak leung tika

 

Lheuh nibak nyan teuma siat

Troeh le leugat Mudem teuka

Jiboet ranub dalam bate

Ka jijoek le Putroe Muda

 

Putroe marit sira khem-khem

Deungon Mudem baro teuka

Meunoe jikheun Putroe Canden

Sira khem-khem peugah haba

 

Nyoe na ranub na saboh criek

Pineung putiek saboh dua

Ranub uteun pineung boh awe

Ngon thoe tangke kureung rasa

 

Ha Teungku beek saket hate

Seubab lam gle rimba raya

Hana panyang ulon rawe

Han meusampe tan hareuta

 

Nyoe keuh nyang na ranub uteun

Neu meung bulueng dum syeedara

Teungku Mudem teuma seuot

Leumoh leumbot ngon suara

 

Insya Allah he Sambinoe

Bak kamoe ateuh jeumala

Bak gata na ranub uteun

Bak lon buleun han sapeu na

 

Teungku Mudem meunan neukheun

Putroe hireun seungab lanja

Lheuh nibak nyan teuma akhe

Ka geuboet le hidang raya

 

Hidang hase dum sinaroe

Ji dong Putroe bak seulasa

Peusinget gupet peubasah jaroe

Neu makeun beutroe bu ngon sira

 

Teuma marit Tuan Putroe

Jiboet jaroe ateuh jeumala

Sira buta camplie bungkok

Tujoh on oek dalam sira

 

Eungkot di laot lon deungoe gah

Seulunyok patah lam piala

Mudem seuot alhamdulillah

Insya Allah Putroe Muda

 

Neupajoh bu subuju jaroe

Nekmat ka troe ta cie rasa

Teungku Mudem jaroe neusrah

Dua lhee babah ka meumada

 

Oh lheuh makeun dum sinaroe

Pinah dudoe hidang raya

Teuma marit Tuan Putroe

Ngon aneuk droe Amat Banta

 

Wahe aneuk Puteh Licen

Teungku Mudem jak bak gata

Jak le ta troen u seuramoe

Beek tamoe-moe bijeeh mata

 

Banta Amat laju jitroen

Di keu Mudem duek teurhanta

Lheuh nyan Mudem neupeusunat

Banta Amat aneuk Raja

 

Teuma marit Teungku Mudem

Neulakee troen meujak gisa

Hoe ka Cut E Po Sambinoe

Idzin kamoe Putroe Muda

 

Putroe seuot han peu salah

Insya Allah jak neugisa

Putroe mRidla brie seudeukah

Meuh keureutah bandum rata

 

Bagian 24

 

Teungku Mudem mangat hate

Ka neuwoe le u rumoh tangga

Padum lawet teuma dudoe

Tuan Putroe laen bicara

 

Wahe aneuk Po Samlakoe

Deungoe lon kheun proe wahe Banta

Gata aneuk lon peukawen

Ngon Cut Lihen Putroe Muda

 

Teuma seuot Banta Amat

Mangat-mangat narit Poma

Wahe Mapo Ma Teungku droe

Bak lon sidroe hana dawa

 

Hana jeut le ulon peuseuek

Narit nyang seb lon leupah ka

Hana jeut le Ma lon ubah

Lon ka leupah sikrak haba

 

Putroe deungoe narit Amat

Krue seumangat bijeeh mata

Tuan Putroe jak bak Syiah

Putroe peugah pantah sigra

 

Oh lheuh saleum mumat jaroe

Tuan Putroe peugah haba

Putroe marit musyawarah

Deungon Syiah nyang lam rimba

 

Teuma seuot Teungku Syiah

Insya Allah dilee gata

Han jan habeh Putroe peugah

Teungku Syiah troeh le teuka

 

Syiah neuba saksi keudroe

Uroe dudoe beek meudakwa

Oh sare troeh Teungku Syiah

Ji wakilah Putroe Muda

 

Ta deungoe suara sangat indah

Jiyue peunikah linto teuka

Putroe Indra lheuh wakilah

Ji ek pantah rumoh tangga

 

Steuma jitroen Banta Amat

Ji khideumat Teungku tapa

Amat jiduek le di sinan

Neumat tangan le Aulia

 

Syiah neukheun a’uzubillah

Ngon bismillah sajan seureuta

Oh lheuh Teungku kheun bismillah

Alhamdulillah le neubaca

 

Putroe Indra hai meutuah

Lon peunikah nyan keu gata

Banta seuot alhamdulillah

Lon meunikahPutroe Muda

 

Oh lheuh ijab kabul nikah

Neu fatihah le ulama

Putroe Ridla brie khanduri

Han neubi brie le Teungku tapa

 

Ie nyang ta brie hana lon jeb

Dilon ka treb ku puasa

Teungku Syiah meunan neukheun

Dalam uteun le neugisa

 

Rakan na lhee pih sajan droe

Leugat neuwoe dalam rimba

Teungku Syiah ka leupah woe

Tinggai Putroe deungon Banta

 

Banta Amat jinoe linto

Darabaro Putroe Indra

Umue baro goh lom baleeh

Adak leubeeh sithon dua

 

Hana ulon peuteh pureh

Meuroe saboh tan keurija

Dipo inong pih tan andam

Dipo agam pih tan gaca

 

Ban teulhee gobnyan sinan diam

Putoh kalam siklep mata

Hana jeut le lon keumarang

Jaroe ceukang he syeedara

 

Jaroe batat jeup-jeup atot

Lon meusangkot hana reuda

Nyan keuh Teungku le that karot

Hate lupoet dalam dada

 

Bagian 25

 

Bak siploh-ploh lon boh saboh

Meubeek gadoh asai punca

Bit pih dumnan lon meuteuoh

Meungbeek boih-boih he syeedara

 

Nyoe na bacut lon peuingat

Nyoe amanat hai teumuda

Beek na salah amai lon tan

Page dudoe ta lakee do’a

 

Ta lakee do’a wahe rakan

Keu lon tuan hina dina

Geulantoe lon brie ngon seudeukah

Ulon peugah saboh haba

 

Geulantoe ulon keumeung hajat

Ulon surat saboh cakra

Geulantoe lon brie ranub sigapu

Nyoe keuh Teungku haba Banta

 

Bah le dumnan wahe rakan

Laen lakuan lon calitra

Amma ba’du beungoh uroe

Kisah meuwoe ubak naga

 

Aneuk naga yoh saboh roe

Sideh nanggroe laot raya

Aneuk Raja yoh di nanggroe

Anyot keunoe ie raya ba

 

Teuma jinoe ji lakee woe

Jimohon droe hanatara

Naga mariet deungon Amat

Suara mangat aneuk naga

 

Meunoe ji kheun ji meututo

Ta deungoe sye dalam paya

Deungon Amat ji meututo

Ie mata ro aneuk naga

 

Banta Amat sangat jisyen

Jikheun Dalem uleh naga

He Dalem Po Dalem payong

Ta peuidzin lon saboh masa

 

Lon meungmarit haba sipatah

Beurayek meu’ah nibak gata

Salah ta teugah beuna ta ikoet

Pa nyang karot taboh dawa

 

Banta Amat teuma seuot

Leumoh leumbot ngon suara

Amat seuot insya Allah

Cuba peugah he syeedara

 

Deungon Banta ji meututo

Ie mata ro meuleu lumba

He Dalem Cut bungong tanjong

Ta peidzin lon woe bak Bunda

 

Ulon Dalem raya hajat

Lon woe siat bak ayahnda

Lon duek sinoe paya sarat

Krueng ubit that lon ka raya

 

Ie jiteungoh dum u darat

Ulon meuhat jipoh pahna

Ureung nanggroe bandum arat

Ie raya that hanatara

 

Jinoe bandum jimeupakat

Ulon meuhat ji meungtuba

Ulon jinoe meuhat mate

Ji tuba le manusia

 

Adak han jipoh deungon beusoe

Beuthat ngon reunong lon binasa

Nyan keuh dum hat Dalem Teungku

Pakrie laku toh bicara

 

Teusia pih Dalem Teungku

Ka neubrie bu jeh oh masa

Meuhan ta idzin meuhat mate

Han meusampe ta peulara

 

Ulon Dalem meuhat mate

Pakrie pike nyang meurasa

Amat seuot pantah-pantah

Allah Allah he syeedara

 

Pakrie tawoe nyan hai adoe

Ulon sidroe dalam rimba

Han ta gaseh ngon ta sayang

Pagi peutang lon bak gata

 

Bagian 26

 

Hana ta gaseh meusigeutu

Han ta tem eue meusiblah mata

Wali karong lon cit ka tan

Gata intan nyang lon cinta

 

Amat jimoe ngon bantangan

Seubab ka tan aneuk naga

Ie mata ro seun-seun siploh

Ban ujeun toh hana reuda

 

Allah Allah hai adoe beh

Saleh ho roeh oh tan gata

Meuhat mate rimueng pajoeh

Hai adoe beh pungo gila

 

Lon sangka na gata adoe

Na cit na soe boh bicara

Jinoe gata pike ta woe

Ulon sidroe that seungsara

 

Gata adoe ta woe bak Du

Lon ngon Ibu dalam rimba

Banta Amat moe meu’u’u

Hate tunu hanatara

 

Meunoe jikheun sira jimoe

Lon siuroe nyoe pungo gila

Meunyoe meunan adoe badan

Ku jak sajan deungon gata

 

Kaomku han syeedara

Ku jak sajan adoe raja

Nibak mate sinoe gob boh

Bah le ta boih lon le gata

 

Yoh nyan naga teuma seuot

Hana patot meunan juga

Kru seumangat Dalem badan

Lon ba sajan Dalem Raja

 

Pakon Dalem lon meung ungki

Beek Allah brie lon meureuka

Beek antara lon meung ungki

Beek Allah brie lon beek lupa

 

Dilon dalam hana patot

That lon takot keu meureuka

Pakon Dalem meunan titah

Ulon susah he syeedara

 

Amat Banta lom ji peugah

Allah Allah hai syeedara

Ulon adoe beek ta keubah

Lon meulangkah sajan gata

 

Meuhan ta ba wahe adoe

Bah kutob droe yoh na gata

Soe got mate lon siuroe nyoe

Peugah adoe nyang meurasa

 

Banta Amat that meupoet-poet

Bineeh laot dalam bangka

Lom pih jikheun sira jimoe

Lon duek sinoe pih tan laba

 

Lon duek sinoe han meusampe

Di dalam gle rimba raya

Banta Amat that meupoet-poet

Naga seuot beek le rugha

 

Beek ta moe le wahe Dalem

Sangat lon syen nyan keu gata

Gata Dalem lon ba sajan

Beek le kaman ro ie mata

 

Teutapi na bacut salah

Pat ta keubah Ma digata

Ma teuh Putroe pat ta keubah

Cuba peugah lon deungoe nyata

 

Putroe Indra nyang isteuri

Nyan pih pakrie Dalem Raja

Pakrie ta keubah nyan Dalem droe

Gata ngon adoe leupah bungka

 

Nyan keuh Dalem beutapike

Mate lam gle han soe kira

Amat seuot le meupatot

Beek ta takot he adeknda

 

Ulon teujok bak Potallah

Nyang peurintah alam donya

Adakna lon pih di nanggroe

Tuhan sidroe nyang peulara

 

Bagian 27

 

Ulon teuh nyoe hana dapat

Hana kuat ngon kuasa

Aneuk naga lom ji marit

Haba nyang bit ubak Banta

 

Nyoe beumeunan hai Dalem droe

Jak le ta woe ubak Bunda

Peugah bak judo nyang that canden

Gata Dalem kheundak bungka

 

Amat beudoh teuma jiwoe

Ubak Ma droe Putroe Ridla

Oh sare troeh u meuligoe

Seumah Ma droe Banta Muda

 

Com di teuot seumah jaroe

Idzin kamoe wahe Poma

Putroe Ridla teuma seuot

Ie mata srot ateuh dada

 

Teutapi na bacut salah

Pat ta keubah Ma digata

Putroe Indra nyang isteuri

Nyan pih pakrie bijeeh mata

 

Banta Amat seuot pantah

Nibak Allah lon joek gata

Gata dua droe Ma lon keubah

Akhe teulah jeut binasa

 

Gata lon joek bak Potallah

Nyang peurintah alam donya

Meupat laen han lon keubah

Ulon leupah sikleb mata

 

Ta idzin Ma jinoe seukarang

Beek le lintang uroe jula

Banta Amat com bak teuot

Putroe sambot ngon ie mata

 

Beumeutuah hai bintang srot

Beek lupoet hate lam dada

Beu ta ingat pagi peutang

Beu ta sayang lon ka tuha

 

Tuan Putroe hate mangat

Banta Amat jitroen lanja

Putroe Indra jimoe sajan

Han ubah ban ureung gila

 

Putroe Indra nyang that susah

Ta eue johjah ngon ie mata

Putroe jikheun lom sipatah

Allah Allah pakrie daya

 

Allah hai judo nyang meutuah

Lon neukeubah dalam rimba

Saleh pakrie jinoe zaujah

Teungku leupah ka neubungka

 

Pakrie keuh lon he tuanku

Han soe brie bu deungon ija

Oh tan gata he Teungku droe

Untong kamoe rimueng seuba

 

Saleh hoe troeh lon siseun nyoe

Oh ka tan le Po Meukuta

Saleh pakrie he tuanku

Lon ngon Ibu han soe kira

 

Bukon sayang lon eue seulayang

Angen datang rok-rok masa

Lon ngon Bunda ka meulanglang

Dalam padang rimba raya

 

Lon ngon Bunda tinggai dalam gle

Teungku tan le leupah bungka

Bukon sayang lon eue bambang

Jroh meuragam jipoe meubanja

 

Lon ngon Bunda han soe sayang

Teungku ka tan han soe kira

Putroe Indra moe meureb-reb

Hate saket oh tan gata

 

Ta deungoe su jimoe ba-e

Su meusye-sye dalam rimba

Putroe jimoe that meusok-meusok

Sang meureubok ngon cempala

 

Allah Allah judo payong

Ta tinggai lon ta jak gata

Bukon sayang aneuk beulalang

Cicem subang po meugisa

 

Bagian 28

 

Badan paleh tuboh suwang

Judo ka tan pakrie rupa

Bukon sayang lon eue labu

Bak piluhu boh meulaksa

 

Bukon sayang lon eue Teungku

Neujak laju sajan naga

Tinggai adek kawai dapu

Di Teungku ka leupah bungka

 

Bukon sayang lon eue sipoet

Bineeh laot jroh meubanja

Han soe le lon idang suroet

Beungoh seupoet miseu nyang ka

 

Bukon sayang bak rangkileh

Boh pih habeh peulandok seuba

Allah hai judo nyang lon gaseh

Soe ngon lon eh oh tan gata

 

Hana soe ngon le lon manoe

Beungoh uroe watee jaga

Hana soe ngon le lon meututo

Oh tan judo pakrie daya

 

Untong-untong lon meulumpoe

Han soe peugoe peugah rasia

Untong Teungku pajan neuwoe

Ulon sidroe hate rugha

 

Bukon sayang lon eue tikoeh

Dalam buloeh di bubong para

Lon ngon Bunda saleh hoe troeh

Teungku jeuoh ka neubungka

 

Bukon sayang lon eue bayam

Jroh meupadam timoh rata

Keupeu lon lom Teungku ka tan

Soe lon hidang rijang jula

 

Bukon sayang bungong meulu

Meutabu lam laot raya

Teungku leupah ulon rindu

Han soe lon eue dalam rimba

 

Putroe Indra moe meureb-reb

Hate saket putoeh asa

Ta deungoe su bukon ‘ajab

Na bagoe dhab ngon biola

 

Soe nyang kalon hate galak

Nyuem ta jak eue sikleb mata

Soe nyang deungoe hate rindu

Nyuem beutajak kalon rupa

 

Ngon langgam su miyueb manyang

Na ban canang geupeeh tiga

Soe nyang deungoe hate bimbang

Nyuem beek leukang sikleb mata

 

Bah keuh dum nan ba-e Putroe

Laen adoe lon calitra

Amma ba’du teuma dudoe

Kisah meuwoe ubak naga

 

Banta ji troen di rumoh droe

Jak bak adoe kheundak bungka

Oh sare troeh bineeh sungoe

Ji kheun meunoe jihoi naga

 

He adoe cut adoe payong

Pat kuduek lon na tabungka

Aneuk naga teuma seuot

Leumoh leumbot ngon suara

 

He Dalem Po Dalem payong

Bak ulee lon ta duek gata

Troen keuh laju mangat ta jak

Ie that seungkak hanatara

 

Banta jitroen bineeh reuleung

Ji teuimpeung bak ulee naga

Naga jikheun ubak Amat

Beukong ta mat Dalem bak cula

 

Mumat Dalem beukong bit-bit

Beek teugeuntit bak lon gisa

Amat deungoe narit meunan

Ngon dua tangan jimat cula

 

Banta Amat ka meunyuem glie

Untong pakrie bak ji gisa

Jimat oh kong hana sakrie

Jikab bibi jipet mata

 

Bagian 29

 

Naga gisa bacut-bacut

Mangat beek kuyut hate Po Banta

Oh sare ka teupat ulee

Ka ji kajee laot raya

 

Tangieng jiplueng tamse riboet

Ie di likoet meubura-bura

Ie lam gampong han le sangkoet

Oh ka jisuroet aneuk naga

 

Tangieng jiplueng that meudhab-dhab

Na siat u laot raya

Lom pih jikheun ubak Amat

Ji peuingat hana reuda

 

Aneuk naga jiplueng laju

Hate seu-u hanatara

Aneuk naga hate mangat

Banta Amat sajan jiba

 

Tangieng jiplueng that meupoet-poet

Ie di likoet puteh safa

Aneuk naga hate seu-u

Jiwoe bak Du Ayah Bunda

 

Tujoeh uroe ji beurjalan

Meurumpok lawan Pawoh raya

Pawoeh tanyong pantah-pantah

Panee dikah manusia

 

Ka mee keunoe dikee siblah

Beek meungdikah mantong saja

Aneuk naga teuma seuot

Cit meupatot ta leh haba

 

Dalem ulon peu ta lakee

Hana ta thee cit digata

Adak meugob ka kupajoeh

Panee roe troeh keunoe kuba

 

Pawoh marit lom sipatah

Peu ka peugah sulet raya

Meuhan ka brie dikee siblah

Ingat kuplah di keupala

 

Nyang got ka joek keunoe siblah

Beek kutingkah wah keupala

Ka joek rijang hawa leupah

Beek kreuh babah wahe naga

 

Aneuk naga hate susah

Lom ji peugah ubak Banta

Ta loeb Dalem lam babah kee

Lon meureupah beek rhot gata

 

Ta duek Dalem yueb lidah kee

Pawoh asee kuteumeung tampa

Nyang han patoet peu ji lakee

Ji eue dikee sare kuba

 

Ka jikalon ateuh ulee

Peu ji lakee keumeung rasa

Adak meugob han kupajoeh

Panee kutroeh keunoe lon ba

 

Han ji pikee nyang bumeunan

Seubab jih nyan tan bicara

Panee kubrie nyoe Dalem kee

Meukon ulee beukah dua

 

Ta loeb Dalem pantah-pantah

Lon meureupah beek srot gata

Banta Amat teuma jiloeb

Dalam sagoeb babah naga

 

Leupah Banta keudeh jiloeb

That meupot-pot Pawoh raya

Ka kupeuloeb dalam babah

Ji keumeung plah ulee naga

 

Pawoh tajoe jihah babah

Ingat kuplah theun keupala

Aneuk naga sangat lisek

Kah kuculek deungon cula

 

Keunong Pawoh meuasek-asek

Lom ji culek aneuk mata

Pawoh raya beungeeh han soe

Lom ji peutoe ubak naga

 

Ka jitajoe hana sakrie

Sang bubiri teungoh meunta

Aneuk naga ka meunyuem glie

Ubak Rabbi mohon pinta

 

Bagian 30

 

Ya Rabbi wa ya Rabbi

Keulon brie na kuasa

Beureukat keuramat Entu Nini

Beureukat Umi Ma lon naga

 

Beureukat Entu Nabi Adam

Beu-ek lon lawan Pawoh raya

Oh sare lheuh ji meulakee

Rahob ulee deungon muka

 

Aneuk naga teuga han soe

Tuhan sidroe brie kuasa

Ji meureupah dalam laot

Miseu ribot badee raya

 

Ji meungpoh-poh ngon meuinsyok

Peut uroe roek hana reuda

Ie lam laot jeut meugeulumbang

Ji meuhantam Pawoh ngon naga

 

Eungkot lam laot habeh mate

Ji plueng sabe hana reuda

Ji sangka troeh ureung meupukat

Eungkot ji limpat hanatara

 

Naga ngon Pawoh meureupah sabe

Eungkot mate cut ngon raya

Ji meureupah peut uroe roek

Troeh eungkot thok ji jak peugla

 

Oh thok kalon ji meureupah

Pakon dikah ka meudawa

Peu ka seunoh cuba peugah

Ku deungoe sah jinoe sigra

 

Oh thok tanyong Pawoh peugah

Ku lakee siblah manusia

Han jitem brie pih meusiblah

Lon meureupah nyan keuh punca

 

Thok ji marit lom sipatah

Ji tanyong sah ubak naga

Panee ta mee hai meutuah

Cuba peugah asai mula

 

Oh thok tanyong naga peugah

Ashaliyah dalam rimba

Habeh dumpeu ji hareutoe

Teukab jaroe thok nyang raya

 

Ka ji peugah awai akhe

Thok teupike sikleb mata

Teuingat keudroe masa dilee

Yoh meuteumeung manusia

 

Meunan cit jih jimeureupah

Ji lakee siblah ji meungrasa

Meunyoe meunan Nyak meutuah

Adak jiplah pih ta ridha

 

Cit lam meunan jih nyan sabe

Miseu kafe tan bicara

Dilee ngon lon jimeureupah

Jikheun siblah ji meungrasa

 

Nyang lon meupoh peut ploh uroe

Troeh Tangiroe ji jak peugla

Nyoe pih meunan gata adoe

Troeh lon sidroe ku jak peugla

 

Teuma jinoe jak le ta woe

Pawoh pindoe le bicara

Naga pih ka jilakee droe

Leugat jiwoe ubak Bunda

 

Thok meututo deungon Pawoh

Ta deungoe kiroh subra donya

Pakon meunan gata adoe

Han got bunyoe ku eue rupa

 

Beek le meunan gata Pawoh

Nyang geutroh-troh galak digata

Meutan tajok peu ta lakee

Ta tueng malee rhot suara

 

Thok ngon Pawoh ka jeut reupah

Naga leupah woe bak Bunda

Aneuk naga jiwoe ka troek

Pawoh ngon Thok jeut prang raya

 

Gata adoe beu ta pike

Nyan geutamse thok ngon naga

Geutanyoe Nyak nyan keuh tamse

Gob meupake ta jak gata

 

Bagian 31

 

Bah keuh dum nan ulon peugah

Meuwoe kisah bak aneuk naga

Aneuk naga ka troek jiwoe

Meuteumeung sidroe waki raja

 

Assalamualaikum Po Samlakoe

Ka troeh ta woe bijeeh mata

Aneuk naga teuma seuot

Ie mata srot meuleu lumba

 

‘Alaikum salam warahmatullah

Brie horeumat nyang mulia

Oh lheuh saleum mumat jaroe

Ka troeh lon woe ubak gata

 

Lheuh nibak nyan teuma dudoe

Po Waki woe ubak Raja

Oh sare troeh ka ji peugah

Jikheun Allah Allah Po Meukuta

 

Roeh meukarat bak ji peugah

Jikheun Allah ka roeh ula

Jikheun Duli ka roeh Daulat

Yo meuthat-that miseu geumpa

 

Nibak jaroe ting-ting teupong

Nibak punggong peugot teumpa

Ji keumeung kheun Ampon Daulat

Roeh meukarat jeut meutuka

 

Raja naga susah hate

Teuku Waku peugah haba

Teuku Waki teuma piyoeh

Oh thoe reuoh peugah haba

 

Ampon Tuanku Meukuta Nanggroe

Sinyak ka jiwoe di Kuala

Aneuk Tuanku yoh saboh roe

Jeh pat ka jiwoe Po Meukuta

 

Manusia geuba sidroe

Jroh Samlakoe hanatara

Rupa indah miseu uroe

Sinyak puwoe nyoe ho lanja

 

Ban Raja deungoe narit Waki

Hana sakrie galak raya

Seureuta ngon jaweub neubrie

Jak tueng lagi keunoe ta ba

 

Ban Waki deungoe narit meunan

Jiplueng yoh nyan tamse guda

Jiplueng laju hana teudoh

Hingga troeh bak aneuk naga

 

Oh sare troeh keunan jinoe

Jibot jaroe u jeumala

Ampon meu’ah Po Samlakoe

Raja nanggroe yue tueng gata

 

Ta jak laju jinoe ta woe

Bak ayah droe bijeeh mata

Aneuk naga seuot pantah

Insya Allah jak sigoe gata

 

Waki di keu jih di likoet

Peunoh laot meuleu lumba

Aneuk naga di hadapan

Jimee sajan Amat Banta

 

Oh troeh keudeh nyan u dalam

Ngadap Juhan Raja raya

Ta eue jidong jroh meurumpan

Di hadapan Po Meukuta

 

Teuku Waki peu-ek seumbah

Bak Khalifah Raja Raya

Jibot jaroe ban dua blah

Mohon titah ubak Raja

 

Ampon Tuanku Syahi Alam

Seumbah laman Po Meukuta

Ampon meu’ah dum na kamoe

Bak siuroe nyoe meu’ah deesya

 

Raja seuot neukheun meunoe

Ampon jinoe barang nyang ka

Tamong laju keunoe pantah

Hai meuh mirah cahya mata

 

Aneuk tamong pantah laju

Jak seumah Du Raja Raya

Rakyat laen bandum sajan

Seumah Juhan Raja Naga

 

Bagian 32

 

Oh lheuh seumah teuma surot

Deungon likot na lhee deupa

Aneuk Naga di hadapan

Amat sajan dikeu Raja

 

Raja marit teuma dudoe

Ngon aneuk droe neu meunghaba

Wahe aneuk Po Samlakoe

Ka troeh ta woe bijeeh mata

 

Ka troeh ta woe aneuk badan

Panee insan indah rupa

Aneuk Naga teuma seuot

Jaroe jibot u jeumala

 

Dalem ulon he Tuanku

Ureung brie bu beungoh sinja

Adak meukon Dalem sidroe

Han troeh lon woe bak Meukuta

 

Habeh dumpeu ji hareutoe

Yoh saboh roe dalam rimba

Ka ji peugah awai akhe

Ka teupike Poteuraja

 

Beuthat meunan bintang canden

Sangat lon syen Nyak keu gata

Gata aneuk ta kheun Dalem

Dilon Cutben bijeeh mata

 

Gata dua bak lon sidroe

Po Samlakoe indah rupa

Poteuraja hate galak

Oh na sinyak dua-dua

 

Aneuk naga lom ji peugah

Bak Khalifah Du jih Raja

Jibot jaroe ban dua blah

Ampon meu’ah Po Meukuta

 

Idzin Tuanku jinoe neubrie

Lon peureugi woe bak Bunda

Raja seuot neukheun meunoe

Jak le ta woe bijeeh mata

 

Ta jak aneuk keudeh laju

Jak bak Ibu dalam guha

Aneuk Naga leugat ji jak

Hate galak hana tara

 

Banta Amat ji ba sajan

Ubak Mawang dalam guha

Amat Banta hantom jarak

Ho nyang ji jak sajan jiba

 

Oh sare troeh nyan u leupu

Tamong laju dalam guha

Oh meurumpok ngon Ibu droe

Mumat jaroe pantah sigra

 

Wahe aneuk Po Samlakoe

Ka troeh ta woe bijeeh mata

Lon kheun aneuk gata han le

He boh hate lon that rugha

 

Lon kheun aneuk han le ta woe

Ma teuh sidroe pungo gila

Putroe Naga moe han sakrie

Lon sudi aneuk bak gata

 

He boh hate aneuk intan

Panee insan keunoe ta ba

Aneuk Naga teuma seuot

Ie mata srot nibak dada

 

Adak kon na gobnyan sidroe

Han troeh lon woe Ma bak gata

Ureung brie bu beungoh seupot

Lon seulimbot geubrie ija

 

Masa dilee yoh lam uteun

Nyoe keuh ureung nyang peulara

Aneuk Naga meunan jikheun

Putroe hireun ngon ie mata

 

Putroe Naga lom ji peugah

Bak Cut indah Banta Muda

Meunyoe meunan aneuk badan

Lon hai intan Ibu gata

 

Ta jak keunoe aneuk Teungku

Bintang Timue cahya mata

Ji cok Banta ka ji seuon

Ji com-com le Putroe Naga

 

Bagian 33

 

Gata aneuk that lon gaseh

Hai Cut Puteh Banta Muda

Adak kon na gata sidroe

Han troeh jiwoe aneuk hamba

 

Saleh pat-pat ka Kleung pajoeh

Hai aneuk beh tuah gata

Adak kon na gata intan

Han soe sayang dalam rimba

 

Adak meugob laen-laen

Hana ji syen aneuk hamba

Ka keuh mate meuhat jipoh

Han ji satoh lagee gata

 

Hana jisyen meusigeutue

Ji seuruku deungon nuga

Gata aneuk ta tem brie bu

Ta tem hiroe ta peulara

 

Ta tem gaseh ta kheun adoe

Gata sidroe nyoe Aulia

Gata aneuk nyoe salihin

Hate yakin hanatara

 

Banta Amat ka ji iem droe

Ji pujoe le Putroe Naga

Hana sapeu jaweub ji brie

Iem beurdiri mantong sahja

 

Ka ji syuko keu Potallah

Ban peurintah alam donya

Han ji ingat nyan keu pujoe

Tuhan sidroe hana lupa

 

Allah hai aneuk tangke hate

Lon kheun han le bijeeh mata

Gata dua bak lon sidroe

Po Samlakoe indah rupa

 

Gata dua sangat lon syen

Bintang canden ayeun mata

Banta Amat hana jarak

Ho nyang ji jak Aneuk Naga

 

Putroe Naga hate galak

Oh na sinyak dua dua

Han jeut jarak Banta Amat

Hate mangat hanatara

 

Aneu naga teutap dukhoe

Geunap uroe hate suka

Padum buleun dalam laot

Han teumakot Amat Banta

 

Ka ji meuhoi Banta Amat

Ji peuingat hana reuda

Wahe Dalem aduen kamoe

Neujak keunoe siklep mata

 

Amat beudoh teuma sidroe

Ubak adoe Aneuk Naga

Oh troeh Banta ji hareutoe

Ji peugah proe dum peurkara

 

Gata Dalem jinoe ta woe

Ma teuh sidroe dalam rimba

Pakrie Dalem cuba pike

Ma teuh lam gle Po Meukuta

 

Bit pih meunan ulon peugah

Dalem meutuah ingat saja

Meubeek tuwoe hai Dalem droe

Uroe dudoe lon beek ta ceula

 

Uroe dudoe lon beek lupoet

That lon takoet Dalem Raja

Banta Amat teuma seuot

Ie mata sroet meuleu-lumba

 

Seubab teuingat Ma jih lam gle

Jimoe sabe hanatara

He adek cut adoe payong

Ta idzin lon woe bak Bunda

 

Ta intat lon woe u nanggroe

Ma lon sidroe dalam rimba

Aneuk Naga seuot pantah

Insya Allah Po Meukuta

 

Ta deungoe Dalem lon peuingat

Lon amanat nibak gata

Beek ta ubah narit wasiet

Haba nyang bit lon calitra

 

Bagian 34

 

Peu nyang geubrie nibak ibu

Dalem Teungku beek neuhawa

Beuthat geubrie meuh meukatoe

Beek ta puwoe Dalem Raja

 

Nyang ta lakee cit malakat

Lon kheun teupat nibak gata

Nyang laen beek ta meunafsu

Dalem Teungku han hoe taba

 

Meung geutem brie nyan malakat

Hase siat peu nyang hawa

Hase beude hase ubat

Hase rakyat meuploh laksa

 

Nyan keuh Dalem beek ta ubah

Ban lon peugah beek meutuka

Nyan keuh Dalem lon peuingat

Lon amanat Dalem bak gata

 

Geubrie rot wie beek ta tueng-tueng

Beuta timpung Dalem digata

Nibak ayah pih cit meunan

Dalem intan nyan neucinta

 

Meuroe ta duek di dalam gle

Bahya sabe hantom reuda

Bahya sabe hantom jarak

Peu nyang heundak jaroe digata

 

Wahe Dalem beudoh ta jak

Keudeh ubak lom bak Bunda

Wahe ayah tanglong nanggroe

Dalem sidroe kheundak gisa

 

Peu na ayah bungong jaroe

Dalem neuwoe dalam rimba

Raja seuot suara mangat

Hai Cut Amat beek ta gisa

 

Neubrie ayah ulon woe siat

Lon ka treb that keunoe lama

Meunyoe ta woe hai boh hate

Peu keuh lon brie bijeeh mata

 

Nyoe leupeu meuh ayah brie

Saboh guci puwoe le gata

Keu peu roe meuh ayah brie

Lon ji taki di rot raya

 

Peu cit aneuk kubrie jinoe

Cuba kheun proe bak ayahnda

Banta seuot jikheun teupat

Cit malakat nyang lon hawa

 

Nyan pih lon brie hai aneuk beh

Puteh leusoh Amat Banta

Amat Banta ji jaweub le

Nyang rot kiri han hoe lon ba

 

Meunyoe ta brie wahe ayah

Bak uram lidah nyang lon hawa

Meunyoe meunan aneuk meutuah

Beudoh pantah ta cok lanja

 

Naga jihah Banta jiloeb

Dalam sagob babah Naga

Banta teubiet dalam babah

Allah Allah han kuasa

 

Meunyoe meunan aneuk meutuah

Nyoe ku muntah wahe Banta

Naga muntah ka teukeujoet

Ka teugeuncot u nab Banta

 

Banta jicok pantah-pantah

Teuma jipeugah bak ayahnda

Peu makeusud wahe ayah

Cuba peugah lon deungoe nyata

 

Raja seuot neukheun meunoe

Ta deungoe kamoe bijeeh mata

Tujoh Raja lam meuligoe

Tujoh Putroe indah rupa

 

Bale Gadeng keurawang jih meuh

Jeuoh peungeuh ji plueng cahya

Di teungoh leun tujoh kalam

Turab intan ban peut punca

 

Ka geutot le ngon keumeunyan

Cit han jeut han wahe Banta

Oh lheuh neupeugah neu peurunoe

Banta woe le ubak nyang ka

 

Bagian 35

 

Wahe Mapo Ma teungku droe

Dalem sidroe kheundak gisa

Peu na Poma bungong jaroe

Dalem neuwoe dalam rimba

 

Putroe cok le ngon malakat

Ji jok leugat keu Cut Banta

Peu makeusud he Ma teungku

Peugah laju ngon deungoe nyata

 

Hase Kuta tujoh lapeh

Troeh keudeh lam awan miga

Lapeh nyang phon Kuta Beusoe

That seureuloe ban peut punca

 

Lapeh nyang dua Kuta Pirak

Jroh meuhalak hanatara

Lapeh nyang lhee meuh seuneupoh

Hue seumeulhoh u Antara

 

Lapeh nyang peut Kuta Beusoe

Hue sang uroe ta eu rupa

Meunan meunan ban tujoh lapeh

Meuteureubeh ngon pancang suda

 

Jeup-jeup pinto beude meuasoe

Jeup-jeup sagoe kawai rata

Nyan keuh aneuk Po Samlakoe

Jak le ta woe bijeeh mata

 

Oh sare ka beungoh uroe

Beudoh Putroe jak bak Raja

Peugah Banta ji kheun meuwoe

Bujang Meuntroe ta seureuta

 

Troeh le rakyat dum meuron-ron

Meuhimpon keunan bak Raja

Raja peugah le bak rakyat

Neuyue intat Amat Banta

 

Rakyat deungoe haba meunan

Ji boet tangan ateuh jeumala

Insya Allah tuanku droe

Dum sinaroe kamoe suka

 

Aneuk Naga pih jak sajan

Intat tuan Amat Banta

Oh sare troeh bineh sungoe

Jikheun meunoe Aneuk naga

 

Ta deungoe Dalem keudeh laju

Beek le ateuh lon neu eue rupa

Amat teungoh bineeh sungoe

Sira jimoe ngon ie mata

 

Aneuk Naga pih moe sajan

That ji sayang Amat Banta

Allah Allah Dalem teungku droe

Pakon neumoe Po Meukuta

 

Oh tan lon eue Dalem sidroe

Hate seungkoe dalam dada

Weuh that hate lon han bagoe

Oh tan sidroe Dalem Raja

 

Oh lon ingat hate reuloh

Oh lon teuoh hate luka

Oh lon ingat hate reule

Na nyuem beek cre sikleb mata

 

Aneuk Naga jimoe sabe

Na nyuem beek cre deungon Banta

Oh ji ingat han meusanoe

Oh ji pike han meurasa

 

Aneuk Naga han ek moe le

Jikheun sare ubak Banta

Idzin Dalem jinoe ta brie

Lon peureugi kheundak gisa

 

Amat seuot jikheun meunoe

Idzin kamoe he syeedara

Amat jikheun lom sipatah

Ji peugah bak Aneuk Naga

 

Banta Amat jikheun meunoe

Beek le ta moe he adinda

Beuta ingat keu lon adoe

Ulon sidroe dalam rimba

 

Adak meung na gata adoe

Na cit meusoe boh bicara

Jinoe gata pih ka ta woe

Ulon sidroe gadoh bicara

 

Bagian 36

 

Oh ka tan le gata adoe

Ulon sidroe pungo gila

Ulon sidroe susah hate

Oh ka tan le lon eue gata

 

Hana pat le lon peugah droe

Oh tan sidroe adoe Raja

Gadoh akai lon lam peu-eud

Han sakon jeut oh tan gata

 

Amat Banta that meupot-pot

Teuma seuot Aneuk Naga

Beek le ta moe Dalem payong

Ta idzin lon woe jak gisa

 

Jak keuh adoe beuseulamat

Beuta ingat lon lam rimba

Bukon sayang Banta Amat

Hate tan mangat sira gisa

 

Ji arong gle jeumerang blang

Bukon sayang Banta Muda

Ji teungoh cot ji troen paloh

Ta eue ji bloeh lam beuluka

 

Hate saket rasa putoeh

Moe that riyoeh hanatara

Ingat keu Ma dalam uteun

Ingat u krueng Aneuk Naga

 

Sayang adoe dalam laot

Ie mata srot meulumba-lumba

Ban dua ho hat tutong

Meugeu gulong ngon ie mata

 

Ingat keu Ma dalam uteun

Ingat u krueng Aneuk Naga

Ji jak laju hana teudoh

Hingga troeh u rumoh tangga

 

Oh meurumpok deungon Ma droe

Mumat jaroe Amat Banta

Com bak teuot seumah jaroe

Tuan Putroe moe that rugha

 

Wahe aneuk Po Samlakoe

Ka troeh ta woe bijeeh mata

Putroe Ridla ji beudoh le

Ngon breuh pade ji jak mita

 

Oh meuteumeung nyan breuh pade

Ji sipreuk le ateuh Banta

Krue seumangat hai boh hate

Lon kheun han le bijeeh mata

 

Putroe Ridla moe ka meudroe

Troeh le judo Putroe Indra

Putroe Indra ka ji tajoe

Seumah judo Banta Muda

 

Jak meuteumeung le ngon linto

Dara Baro goh lom raya

Oh lheuh seumah teuma surot

Dudoe jiboet hidang raya

 

Ka ji beuot ngon hidangan

Brie makanan keu Amat Banta

Diyueb dalong di dalam pingan

Di ateuh nyan sange raya

 

Ka ji beuot mgon peunuman

Di likoet nyan bate suasa

Amat Banta buka hidang

Pajoh makanan ta ci rasa

 

Ji pajoh bu sibuju jaroe

Nekmat ka troe Banta Muda

Oh lheuh makeun Banta Amat

Hate mangat geunap uroe

 

Putroe Indra ranub sigapu

Brie keu Teungku Banta Muda

Banta pajoh ranub sigapu

Ji beudoh hu cahya muka

 

Putroe Indra hate seu-u

Jingieng Teungku Banta Muda

Banta Amat pih ka galak

Dua pihak hate suka

 

Cok Malakat dalam bungkoeh

Ka neuyue boh bak Putroe Muda

Putroe Indra cok Malakat

Troeh le leugat pantah sigra

 

Bagian 37

 

Bah keuh dum nan wahe sahbat

Lon riwayat Putroe Muda

Nyoe lon peugah saboh hatoe

Laen pih le peugah haba

 

Meunyoe mantong reudoek di gle

Na keuh sabe ie raya teuka

Meunyoe mantong jantong hate

Leumah pike rok-rok masa

 

Meunyoe panyang lon meurawe

Han got lagi akhe masa

Meunyoe mantong nyawong tuboh

Lon yue suroh peu nyang hawa

 

Seb keuh dum nan lon peuhaba

Saboh leu-a lon hareutoe

Amma ba’du teuduek siat

Deungoe sahbat lon calitra

 

‘Ajaeb subhanallah

Raja indah lon peuhaba

Nama Nanggroe Iran Shafah

Keurajeun luah hanatara

 

Dua blah Raja taklok keunan

Bak Raja nyan nyang that raya

Neumeu aneuk pih na sidroe

Jroh seureuloe hana ngon sa

 

Ureung binoe aneuk Duli

Nan geurasi Putroe Cahya

Rupa indah hana sakrie

Jeup-jeup nanggri gob meuhawa

 

Troeh seulangke geunap uroe

Tuan Putroe hana ridha

Putroe teutap lam meuligoe

Raja Nanggroe susah raya

 

Geunap uroe troeh antusan

That soailan Poteuraja

Neupangge le Putroe Intan

Neutanyong ban hana reuda

 

Raja neuyue nibak Bujang

Jak tueng rijang Putroe Cahya

Bujang ji jak rijang-rijang

Hingga datang dalam Kuta

 

Oh sare troeh ubak Putroe

Jiboet jaroe u jeumala

Pocut Ampon tanglong nanggroe

Raja sidroe yue tueng gata

 

Putroe deungoe narit Bujang

Ji cok pinggang ija sutra

Ji cok subang na ban cawan

Letlot bintang jiplueng cahya

 

Cok ngon incien mata pudoe

Sok bak jaroe Putroe Muda

Putroe jitroen di meuligoe

Bak ayah droe neujak lanja

 

Oh troeh keudeh Tuan Putroe

Jiboet jaroe u jeumala

Jidong di yueb peurdana seumbah

Mariet sipatah Putroe Muda

 

Ampon Tuanku Meukuta Nanggroe

Peu hareutoe neupangge hamba

Nyang ka hantom nyang na meunoe

Bak siuroe nyoe neuba sabda

 

Seuot Raja neukheun meunoe

Ta deungoe kamoe bijeeh mata

Gata aneuk puteh licen

Lon peukawen deungon Raja

 

Putroe deungoe geumeu peukawen

Putroe Canden ro ie mata

Putroe marit lom sipatah

Ji peugah bak Poteuraja

 

Wahe ayah tanglong nanggroe

Ta deungoe kamoe sikrak haba

Beek tuanku neu peukawen

Hana lon tem Po Meukuta

 

Pakon ayah leupah that meugriet

Lon mantong ubit goh lom raya

Lon meutanggoh umue sithon

Teungku Ampon Meukuta Donya

 

Bagian 38

 

Putroe Cahya meunan jikheun

Sangat hireun Poteuraja

Raja marit lom sipatah

Neupeugah bak Putroe Cahya

 

Wahe aneuk nyang sambinoe

Ta deungoe kamoe bijeeh mata

Pakon aneuk ta meutanggoh

Puteh leusoh Putroe Muda

 

Peugah laju he aneuk beh

Ta meutanggoh peu kareuna

Putroe Cahya seuot pantah

Ji peugah bak Poteuraja

 

Nyang jeut ayah lon meutanggoh

Goh lom troeh nyang sabe padra

Goh troeh ayah nyang sikufu

Hana nafsu beuthat Raja

 

Beuthat Teungku Uleebalang

Hana reumbang lon bak mata

Hana galak lon keu lakoe

Lon duek keudroe hate suka

 

Meunan jikheun sinyak Putroe

Raja nanggroe lom meusabda

Pakon aneuk puteh licen

Lon peukawen han ta ridha

 

Pakon meunan he aneuk droe

Lon brie lakoe han ta ridha

Peugah laju bungong geutoe

Pakon Putroe ta meudakwa

 

Teuma seuot Tuan Putroe

Ji peugah proe nibak Raja

Nyang jeut ayah lon meutanggoh

Datang musoh akhe masa

 

Ulon jicok hai ayah beh

Han sahoe roeh Po Meukuta

Nyan keuh ayah lon meutanggoh

Meung goh lom troeh lon eue rupa

 

Meugoh lom troeh nyang ek meuprang

Beurang gajan han lon ridha

Akhe dudoe jeut soailan

Lon ji tahan le Beulanda

 

Meunan jikheun Putroe ahli

Lom neu sudi uleh Raja

Pakrie ta thee Bungong Meulu

Peugah laju bijeeh mata

 

Soe nyang peugah panee Teungku

Nyang ka troeh su dum peurkara

Teuma seuot Bungong Meulu

Bukon hai Du gob peuhaba

 

Putroe Cahya peugah laju

Leumah lon eue dalam pinta

Leumah lon eue dalam surat

Di dalam bab nyang keudua

 

Nyan keuh ayat lon kheun teupat

Beek mudharat akhe masa

Beek jeut roeh lon dalam ikat

Ji tangkap uleh Beulanda

 

Beek meukaret le keu linto

Dara Baro goh lom raya

Beek meugriet le nyan keu linto

Dara Baro goh lom raya

 

Poteuraja ka keuh tahe

Neudeungoe tuto Putroe Cahya

Peu ji marit Bungong Kundoe

Ji meututo deungon Raja

 

Idzin ayah lon seukarang

Lon riwang keudeh lam Kuta

Beek treb ayah sinoe lon duek

Meureubok deuk dalam cintra

 

Seuot Raja neukheun meunoe

Idzin kamoe jak le gisa

Oh lheuh idzin nibak ayah

Jitroen pantah Putroe Cahya

 

Dalam Kuta jiwoe laju

Bungong Meulu hate suka

Buka pinto tujoh lapeh

Tamong keudeh lam astana

 

Pahlawan bandum teueh-eh

Bungong puteh tamong lanja

Leupah tamong bungong puteh

Teutop habeh pinto Kuta

 

Poteuraja sideh teutap

Bungong Meurak hate suka

Cok meureubok boh bak jaroe

Geunap uroe ji peukuwa

 

Putroe Cahya dalam meuligoe

Dawok laloe deungon cintra

Meureubok jroh rupa indah

Hate dasyah Putroe Cahya

 

Rupa pih jroh ta eue indah

Na sang ulah maneek meutia

Mata puteh gigoe mirah

Rupa indah hana ngon sa

 

Bagian 39

 

Bulee keuieng jroh that hijo

Bulee bahoe jroh meunggisa

Bulee tampang puteh sabon

Sion-on jampu meutia

 

Bulee taku ban manek roe

Puteh hijo ta eue rupa

Jitheun jaroe Bungong Kundoe

Na dum geuroe jilhom kuwa

 

Cok meureubok ji ploh taloe

Ji pasoe peuloeb lam cintra

Cintra pih jroh hana bagoe

Ayeun jaroe Putroe Muda

 

Aneuk cintra intan pudoe

Ban peut sagoe geuboh geunta

Oh ji halip jitiek-tiek droe

Crang cring taloe meusuara

 

Papeun cintra culek sipoet

Puyoh meulot ngon Cempala

Sang-sang sabe lam ji meuloet

Hate leucot han sagai bla

 

Putroe Cahya hate laloe

Lam meuligoe hate suka

Dayang-dayang dum sinaroe

Geunap uroe meuseu-suka

 

Geunap uroe hate galak

Meukhen-meukhak hana reuda

Dayang-dayang bijak-bijak

Kipah pirak on suasa

 

Ka jibeudoh ji meunginjak

Ji meulikak aneuk dara

Ngon kawoh meuh nibak gaki

Ji meunari ateuh tika

 

Meukleb mata meututo bibi

Ji kheun sya-e su biola

Ji meusya-e jroh han sakri

Su sang bangsi buloh beungga

 

Ji hayak gleung deungon subang

Hate girang aneuk dara

Ji meupanton ji meudendang

Ji meutak-tham pura-pura

 

Ji tiek aleh lintak-linton

Meuhayon subang meuncintra

Nyang ladom ek nyang ladom troen

Sya-e panton hana reuda

 

Nyang di jaroe jimat kipah

Di babah panton jibaca

Ngon lagham su jroh han bagoe

Kisah nanggroe indah rupa

 

Di nanggroe Rom beude meutatah

Nanggroe Makkah beude suasa

Sarong hijo geulabo kunyet

Peudeung gamet peutron on buga

 

Langkah meutoto teuot meumetmet

Meukeudhet-keudhet ban Cempala

Ji meunyanyoe ji meudendang

Hantom reunggang siklep mata

 

Geunap uroe lam piasan

Putroe Intan deungon cakra

Putroe Cahya hate deundam

Ngon Dendayang muda-muda

 

Poteuraja hate susah

Neumeu peunikah Putroe Cahya

Bak han jitem ta pakri bah

Gadoh susah han le haba

 

Kuta kukoh ban peut sagoe

Pancang beusoe dum geupula

Han jeut tamong beurang gasoe

Dum sinaroe agam dara

 

Pinto teutop dum geukunci

Hana sakri han soe buka

Bah keuh dum nan ulon rawi

Keu si Nyak Ti Putroe Cahya

 

Teuduek siat Putroe ahli

Laen lagi lon calitra

Teutap siat Putroe bungong

Lon seumong keu Amat Banta

 

Bagian 40

 

‘Ajaeb subhanallah

Meuwoe kisah ubak mula

Banta Amat lam meuligoe

Ngon judo droe Putroe Muda

 

Padum lawet dalam uteun

Padum buleun lama masa

Geunap uroe hate galak

Neukhem-meukhak hana reuda

 

Banta amat hate laloe

Geunap uroe meuseu-suka

Umue peut thon sabet lawi

Leumah lumpoe saboh rahsia

 

Banta ji eh ateuh tilam

Leumah baruhan Allah peunyata

Na nyuem jipoet bungong keumang

Bak pioh manyang Bungong Jeumpa

 

Siseun ji ek srot meulayang

Banta pansan le teurhanta

Oh ji beudoh nibak reubah

Ji ek pantah miseu nyang ka

 

Oh lheuh jipoet bungong keumang

Boeh bak ulee Pocut Banta

Oh troeh Banta u peureudee

Bungong Kumbee di jeumala

 

Teuduek haba teuma oh nan

Lheuh nibak nyan jaga Banta

Oh teukeujot bak meulumpoe

Duek teupipoe wet ngon sila

 

Banta ingat dalam hate

Ka teupike keu rahsia

Lumpoe lon nyoe sang meusampoe

Meuteumeu Putroe nyang jroh rupa

 

Bit pih meunan leumah lumpoe

Po Samlakoe hana haba

Hana sapat ji hareutoe

Lam hate droe mantong saja

 

Na sikeujap teuma dudoe

Jaga Putroe Siti Indra

Jicok ngon breuh jak taguen bu

Brie keu Teungku Amat Banta

(Catatan : Hikayat ini belum tamat,

baru sebagiannya! – T.A. Sakti).

 

HIKAYAT RANTO – Kisah Perantauan Masyarakat Pidie ke Pantai barat-selatan Aceh Tempo Dulu

HIKAYAT  RANTO
Karya : Leube Isa, Bambi, Pidie (ACEH)
( Salen phon Hikayat Ranto, Rabu, poh 6 seupot 5 Ramadhan 1430 H/26 Agustus 2009.  Ban-ban nyoe bersama 10 orang lainnya ulon teurimongng anugerah budaya “Tajul Alam” dari Pemerintah Aceh dalam rangka Pekan Kebudayaan Aceh Ke Lima (PKA V)  tgl.  10 Agustus 2009 di Anjong Mon Mata, Banda Aceh yang diserahkan Wagub Muhammad Nazar, S.Ag. Bak 4 Puasa Amal geupeusunatle Pak Dehan Uleekareng. Naila  teungoh daftar ulang ngon pasoe KRS pada PBSI FKIP Unsyiah, lulus Ujian Masuk Bersama(UMB) Unsyiah tahun 2009. Idham yakin jak Seumayang Teuraweh ngon Seumayang Jamaah Shuboh,tapi teulat-teulat diwoe)
HIKAYAT RANTO
Karya :  Leube Isa alias Leube Bambi, Pidie,(Aceh)
Aslinya dalam huruf Arab Jawi/Jawoe
#Alih aksara dari huruf Latin ejaan Belanda ke Latin EYD
Oleh : T.A. Sakti
( Hikayat Ranto, sengaja saya posting  Selasa, 25 Ramadhan 1430 H/15 September 2009 hari ini, dalam rangka memperingati seperempat abad//25 tahun musibah lalulintas yang saya alami pada  Sabtu, 25 Ramadhan 1405 H/15 Juni 1985 M  di sekitar Kalasan, lebih kurang 8 km sebelah timur kota Yogyakarta. Saat itu, saya serta  konvoi mahasiswa Universitas Gadjah Mada, Yogyakarta  dalam perjalanan pulang terakhir, setelah menyelesaikan tugas Kuliah Kerja Nyata (KKN-UGM) di kabupaten Boyolali, Jawa Tengah. Saya, T.Abdullah Sulaiman serta beberapa teman ditempatkan di desa Guli, kecamatan Nogosari. Begitulah,…sekejab setelah melintasi Candi Prambanan pada siang yang panas dan mulai musim “mudik Lebaran”, serta  dalam suana ‘puasa tua’ sekitar pukul 13.11 WIB , sepeda motor HONDA saya yang dikemudikan Joko Supriyanto ditabrak mobil colt barang/tivi.  HIKAYAT RANTO, mengisahkan kehidupan anak manusia lebih seabad lalu yang umumnya dari wilayah Pidie , yang mengadu untung dengan merantau ke belahan Barat-Selatan wilayah Aceh sekarang.  Hikayat ini menjelaskan, bahwa upaya memperbaiki nasib di rantau tidaklah semulus yang diharapkan. Bahkan lebih banyak  gagal dibanding yang berjaya.Namun, para perantau dari Pidie terus mengalir bagaikan air. Hikayat Ranto menjelaskan, bahwa pemicu merantau itu disebabkanrasa malu hidup miskin, yang selalu dilecehkan isteri dan sindiran mertua. Pemuatan Hikayat Ranto  dalam blog saya terasa tepat, mengingat musibah yang saya alami juga terjadi  ketika saya sedang “menjaring nasib” di perantauan Yogyakarta. T.A. Sakti)
Bismilahirrahmanirrahim
Nyoekeu Isim lon boeh sinoe
Subhanallah walhamdulillah,Tuhan nyang sah qadim sidroe
Meuha suci deungon puji,Tuhanku Rabbi wajeb sidroe
Suci ngon pujoe sabet bak Tuhan, Laen nibak nyan geuceula dumnoe
Tuhan geutanyoe amat tinggi, Laen ’abeudi hamba barangsoe
Baranggari dum meukhluek, Nyang sabe duek lam donya nyoe
Kaya gasien hamba Tuhan, Seukalian alam dum barangsoe
Meuseuki ulat nyang lam batee, Bahle meusilee leumah cit droe
Meuhat raseuki dum bak Allah, Leungo lon peugah wahe adoe
Seupeurti ban fireuman Tuhan, Dalam Qur’an takalon keudroe
Wama mindabbatin fil ardhi, Illa ’alallahi rizquha
Makna meuphom dum bak sahbat, sit bingong that ulon sidroe
Sabab rindu deungon deundam, Nyoe lon karang peu-ubat ate droe
Digob geukarang deungon awe, Ladom geurante deungon taloe
Dilon lon karang dalam  ate, Lon rawe-rawe lam dada droe
Loncok daweuet deungon keureutah, Teuma lon kisah keu pi-e droe
Supaya jeuet keu ibarat, Jeuet seulamat dua nanggroe
Geutanyoe at udeb dalam donya, Dua peukara hantom sunyoe
Saboh bagoe tuntut ileumee, Mita guree nyang peuhareutoe
Dua bagoe mita hareukat, Tapileh pat laba rugoe
Meung bek Teungku jalan salah, Banci Allah keu geutanyoe
Lon peuingat dum syeedara, Tuha muda aduen adoe
Leumah akai ubak hate, Ji tamongle lam dada droe
Taleungo nyoe lon peuhaba, Agam dara aduen adoe
Bekkeu dawok ta meututo, Ingat hai po dum geutanyoe
Meuseuki uroe meuseuki malam, Ingat keu untong akhe dudoe
Aduen adoe tuha muda, agam dara dum sinaroe
Dara agam kaya gasien, seumayang teelan dum bek sunyoe
‘Ohtroih umuteu siploh thon, wajeb ta seuon nyang limong peue
Cahdat seumayangpuasa jakeuet, haji teuma jeuet geunap limong peue
Jakalee han ek tajak u Makah, taseumah nang eumbah geunab uroe
Tameuseulaweuet tabri seudeukah, nyanpi roe sah ampon deesya droe
Apui Nuraka jimeusumpah, dami Allah han jipeutoe
Suloih nyang akhe beutabeudoih, di awai suboh lam jaga droe
Pinto langet tujoh lapeh, yohnyan habeh dum teubuka keudroe
Tameulakee ubak Tuhan, neutulak han baranggapeue
Di lon teelan kupeuingat, lon nyoe sisat malam uroe
Tameulakee bak sunggoh ate, ie mata ile sajan meutaloe
Taleueng  jaroe tangah u langet, Araih taniet rab geutanyoe
Kaureuna Araih rahmat sinan, peureuman Tuhan taleungo jeunoe
Jadonllahi foeka oidihem, ingat dalem makna jeunoe
Poteu peutroih peue nyang hajat,nyang meukeusud  wahe adoe
Sipeureuti ban peuruman Allah, bek  taubah harab geutanyoe
Ud’uni astajib lakom, Tuhan neukheun keu geutanyoe
Meung jimeuhon hamba bak kee, peue jilakee kubri jeunoe
Peuruman Tuhan hana khali, hadih nabi sajan meutaloe
Man talaba syai’an jadda wajada,, makna ji teuma tapeuharetoe
Meung na jituntut sunggoeh ate, meuhat geubri beksokgeutanjoe
Haba lon nyoe sang ajeumat, le that mupeu’at soe tem pakoe
Amabakadu dudoe nibaknjan, njoe kurangan phon kumula
Kurangan keu ureung lakoe, bungka di nanggroe  tuha muda
Tinggai  nanggroe deungon Ma wang,  jak lam utan dum cut raya
Tuhan  peujeuet nanggroe rantoe, sinankeu laloe manusia
Aceh Pidie tunong baroh, le that gadoh dalam  rimba
Peuebu sabab nyan jeut meunan, leungo teelan  lon  calitra
Sabab jipateh iblih syaitan, siribee ban jipeudoda
Jigusuek di ulee jisaih di glunjueng , teuma di tamong u lam dada
Limong peukara jeut jiyue dilee, leungo sampee lon calitra
Phon-phon jiyeu meu’adoe-angkat, ke dua mumadat he syeedara
Keulhee jiyue tameu Judi, teuma pancuri akhe dudoe
Kupeuet jiyeu tameusabong, that meuntong jalan gata
Limong jiyeu tameurebot, ngon  nyan toek  limong peukara
Taleungo nyoe wahe adoe ,seksa dudoe  lam neraka
Teuduek ohnan saboh pangkat, jeunoe lon sambat laen haba
Nanggroe ranto na tatuban, keusukaran dum peukara
Watee saket aloh-alah, apoh-apah hanteu kira
Tabalek wie tabalek uneun, sapeue pih tan na tarasa
Lon boh jeunoe saboh ca- e, na tatukre he syeedara
Boh pisang mas masak di lubang
Makanan cicem si barau-barau
Meutuah tuboh meuteumeiriwang
Jakalee malang mate di rantau
Beuneung raja di dalam paya
Limpah cahaya langet bumoe
Ku eh han teungeut kubleut han jaga
Pajan masa kuteumei woe
Adak na sayeub kuteureubang, yeum beureujang troh u naggroe
Tinggai sidroe baranggajan, rakanpi han jitem peutoe
Apuipi  tan  jujeepih han, kutika yan dawok tamoe
Adak na pade dalam keupok ,hana soe tumbok pakri jinoe
Takeumeung yue gob hana sidroe, toh pakri proe tapeulagee
Yohnyan teuingat nyan keu Ma wang, teuingat yohnyan keu istri droe
Adak  han kujak masa dilee, na soe peulagee  jan   mumeunoe
Amabakdu bacut lon seubut, bek that lupot ureueng binoe
Na taleungo putroe mutual, hankeu leupah bungka judo droe
Allah Allah Nyak  sambinoe, keu lakoe bek paleng muka
Adak na  taeu dalam uteuen, taseumpom teupeuen taro ie mata
Adak proe teungoh tapuminyoe, taeh tamoe dalam tika
Nyan dum saket dengom mangat , nanggroe barat he syeedara
Lon peurasa  sit ka dilee, sipu malee lon peuhaba
Adak tan tajak nyan u barat , dalam surat  taeu nyata
Beuthat taweuh keu ureng lakoe, he ureueng binoe tuha muda
Aduen adoe rakan sahbat, beutaingat  cut  ngon raya
Keu  ureueng lakoe beuthat tahiro, ingat he po si umu donya
Beutapikee maseng keudroe, leupaih lakoe dalam rimba
Uroe malam hana teungeut, lam teuingat po keu gata
Lah bak pihak tan peue puwoe, ate teugoe-goe nyan keu gata
Masa tajak  jok saboh kruboih, ngon peunajoh linto bungka
Untong-untong ngon tajak intat, bungka u barat gampong gata
Laen nikak nyan pi teuingat , ranup lipat ban sikada
Padum teelan ngon bu kulah, masa meulangkah u kuala
Tajak Polem beuseulamat, beutaingat Poma ka tuha
Mata  ka seupot geulinyoeng ka tuloe, beurijang tawoe tajak tanom Ma
Untong di nanggroe sapeue pakat,  oh troih u barat laen kira
Meunan jikheun yoh dinannggroe ,oh troih u ranto pungo gila
Meukeude pi tan lampoihpi han, pat na glanggang jijak mita
Meunan-meunan gadoh nanggroe,pike adoe tuha muda
Jilting aneuk deungon nang eumbah, masa jikeubah han jikira
Ladom galak bak Meukeude, ladom po Leube pula lada
Bitpi galak bak meukeude, le nyang leube pajoh riba
Meukat apiun ngon gala ran, laba teelan Baraga na
Gala lam jaroe laba jilakee, nyankeu sampee jeuet keuriba
Apiun jiplah ngon timangan, nyanpi tuwan deesya raya
Nyang meukeude le nyang hareuem, sisat bandum sagai donya
Meukat apiun ngon galaran,keu lhee teelan reuyeue meulaba
Meunan nyang le nanggroe ranto, meuseuki he po malemji na
‘Ohtroih u ranto tan Seumayang tuwo keu Tuhan dum teurata
Masa disagree jiseumayang, jeunoe jibuang han jikira
Hana hiro keu ibadat, bandum sisat leube nyang na
Nyang that leubeh tahareukat, wahe sahbat LAMPOIH LADA
Adak na reuyeue bek tasambat, beuteutakot nyankeu deesya
Laen nibak nyan po damage siwa adoe tanoh paya
Lompi soe bloe LADA lam bak, hareuem mutual teungku raja
Adak tabloe teungoh meubungong, han peue tanyong nyanpi riba
Dilon Teungku kupeuingat, lonpi sisat leubeh bak gata
Dumna nanggroe le nyang meunan, bukon teelan lon peurbula
Malem-malem nyang meukeude, glanggang rame jibri beulanja
Jibri pangkaikeu ureueng meutajoe, bukon adoe pungo gila
Meuseuki malem jeuet beuet ‘Arab, rugoe kitab Seumayang hana
Jareung-jareung na seumayang, buleung limong he syeedara
Tabri manok keu ureung meutajoe, bukon rugoe amai gata
Tajok peudeung keu ureung meureubot, wajeb meuhat  deesya gata
Taplah apiun ngon timpangan, nyanpi teelan sama juga
Samaih digob digata  sikatoe, bukoen rugoe sia-sia
Meuih ngon pirak ureueng binoe, lam donya nyoe lesoe hawa
Tuntut donya ureueng sisat, bek  he sahbat galak  gata
Peureuman Tuhan hana khali, hadih nabi hana reuda
Addunnya  djifaton watalibuha kilabon, makna muphom ubak gata
Jinoe makna teungku tapham, di lon bingong ate buta
Kaureuna sabab eleumee kureueng, lom ngon budueng  akai hana
Donya  that khieng nibak bangke, ureueng nyan tuntut anjeng nama
Maken tatuntut maken meureulop, maken taturot maken jiba
Padum-padum ureung tuntut, ban meekest jih han ek  na
Patah gakI  puntoeng  jaroe, han jitem troe  nafsu hawa
Meunan nyang le iblih tipee, hana jithee tuha muda
Miseue  sidom eu meulisan, nyuem jipeureulan ngon peudana
Pruetpi han troe jihpi mate, meutindeh bangke ban sineuna
Saboh nafsu ban bubayang, meuse tadong teungoh luha
Maken tapeucrok maken diplueng, meuse ie kreung u kuala
Meung han get niet bak hareukat, ingat sahbat sisat gata
Meuseuki  teelan bak meununtut, meung bek po cut deungon riya
Aduen adoe rakan sahbat, beutaingat dum syeedara
Tahareukat bak meusampe, bek keu tabri ceuma leuta
Adak mate bunda ngon ayah, tabri seudeukah jeuet keu pahla
Meunghan meunan wahe adoe, khanuri rugoe sia-sia
Teugoe takalon na khanuri, sang kasahle keu ayahnda
Gatapi mate hareukat payah, page balaih dudoe Nuraka
Meung han get niet bak hareukat, ingat sahbat dudoe teuka
Malingkan Mwot jak tueng nyawong, nyang phon keunong teuka cuba
Hingga datang ‘an kiyamat, cit lam ‘azeueb he syeedara
Di Aceh kon troih u ranto, meunan he po tan meutuka
Meunan teelan bandum nanggroe, troih ‘an jinoe reuyeue meulaba
Meung na areuta get peukayan, wareh rakan that mulia
Meungtan areuta lagi gasien, keuhinaan bak syeedara
Adak istri teungoh baleh, maken leubeh hina keu gala
Bak tuan tha han peue peugah, breueh nyang mirah nyan di mita
Boh seulimengngon eungkot brok, nyan keuh jijok po keu gata
Campli cina eumpeuen beurijuek, nyan dipuduek unab gata
Teuduek haba nyan ohnan dilee, jeunoe sampee laen calitra
Amabakdu dudoe nibak nyan, muwoe kurangan bak  ayah bunda
Masa jijak  roe sit kutham, jipateh han aneuk boh ate
Roe kupaban aneuk ku saboh, kuniet ka gadoh dalam luweuek  gle
Meunan di Poma keu geutanyoe, dawok neumoe meu’eh tanle
Meung ka teu’ngat neuseubut Allah,ie mata limpah sajan ile
Ie mata srot seun-seun siploh, basah tuboh neusampohle
Beutaingat aduen adoe, bekkeu laloe dumteu sare
Aneuk cut raya nyan di Aceh, meung jipreh-preh tokteu hanle
Adak di Nang eumbah han peue peugah, sit lam gundah gata tanle
Nyampang-nyampang neupajoh mangat, yohnyan teuingat ie mata ile
Adak  na gaseh deungon sayang,  dumteu tuan bek laloele
Laen nibak nyan leungo lon peugah, leungo beusah dumteu sare
Nang eumbahteu syik po di nanggroe  meung neupreh woe gata boh ate
Adak na aneuk hanpeue  peugah,  jiteuoh ayah peutang page
Wahe Mapo Ma mutuah , hoka ayah ku eu tanle
Ban po Maji leungo saura meunan, han muban-ban ie mata ile
Wah aneuk po aneuk mutual,  hanale ayah ka leupah u gle
Treb ka leupah aneuk u barat,  hana geu’ngat keu gata boh ate
Rumoh tireh han soe peudab, ayah gata that buta ate
Aleue patah bubong teuhah, paleh ayah aneuk boh ate
Among diblang hansoe meugoe, bahle deuek-troe gata boh ate
Geudong dinanggroe badan payah,meutamah sosah dalam ate
Ranub pineueng gapu bakong, seunawak pinggang breueh ngon pade
Peonage mangat aneuk di barat, geuduek teutap gata tanle
Meunankeu narit ureueng binoe, keu geutanyoe dumteu sare
Adak na jitakot keu Poteu Allah, hana ubah nibak ate
Tinggaikeu aneuk po di nanggroe, ruya-ruyoe han sapeuele
Nyampang-nyampang gob woe di peukan, at eu teudong-dong weuehkeu ate
Teuma geubri eungkot saboh, puwoe po jroh tapajohle
Maji kalon eungkot bak jaroe, meutaloe-taloe ie mata ile
Jibeudoih duek jiseubut Allah, ie mata limpah bak dadale
Nyandum pellagra di ureueng binoe, di ureueng lakoe buta ate
Jan Uroe Raya ngon Makmeugang, teuduek-teudong nyan di pante
Duek reunyeun jeh duek reunyeun nyoe, Poma jimoe rusak ate
Teuma geubri sie na bacut, puwoe nyak cut parole
Poma ji eu sie bak jaroe, neu leumpaih droe tumbok ate
Bu oek di ulee meugeureubang, teuoh keu untong beureujang mate
Sabab ji ingat nyang ka leupaih, hana gundah tinggai boh ate
Bukon that some agam mutual, aneuk jikeubah bahle Beranger
Adak na Wali nyan di nanggroe, ‘asa uroe baro jiteuka
Jijak euntat sie sigupang , jiboh sajan U sitangke
Hana sapeue laen nibak nyan, ji tijik pisang saboh sisi
Bitpi dumnan bungong jaroe, seuluweuekeu adoe saboh jibri
Masa nyan Poma ate ji bicah, teuingat keu ayah aneuk boh ate
Na meubunyoe gob peuhaba, rab geubungka teungoh ili
Teutapi bungka kon geuriwang,mita glanggang pat na rame
Beurayek meu’ah Teungku Ampon, untong lon sibagoe lagi
Uroe Raya peukayan tan, keutiwasan aneuk boh ate
Di aneuk gob ija peudandang,kasab meujuhang seuluweue meucangge
Di aneuk kee bek ‘an  mirah, meung ija puteh han ek kubri
Sare beungoh lheueh jimanoe, teuma jiwoe bak bundale
‘Oh sajan troih nyan u rumoh, lakee meu’ah deesya page
Jicom di teuot seumah di gakI, teuma ie mata sajan ile
Allah Allah aneuk mutual, kupaban bah jantong ate
Bukon paleh ureueng di barat,han ji ingat u nanggroele
Baranggasoe mei geuteuoh, isib gadoh beuhanyot bangke
Aneuk prumoh han ji ingat, meu’adoe angkat meuse kaphe
Nyankeu ureueng paleh sabe, seurapa Nabi dudoe page
Meunan teelan bandum nanggroe, di lon adoe savagely
Habeh haba di ureueng lakoe, ureueng binoe jinoe takira
Sabab leupah lakoe u barat, ureueng binoe that jithok ate
Paleng mukaji keu lakoe, nyang jeuet jiboih droe peuturot ate
AMABAKDU dudoe nibak nyan, taleungo teelan tuha muda
Peuebu sabab leupaih lakoe, wahe teungku droe peudeh pinta
Haba pansie geunab uroe, ureueng lakoe tan beulanja
Ija mirah gluing di gakI, meung han tabri hina gata
Euncien peurmata po bak jaroe, laen adoe ulee ceumara
Bahle meunan keu jih tap woe, di geutanyoe bahle ta bungka
Tinggaikeu jih po di nanggroe, geunap uroe peuseutet hawa
Adak na eumbah han ji larang, han ek jitham aneuk dara
Ureueng binoe malee hanle, keureuna akhe umu donya
Nyankeu sabab han that jiwoe, keureuna bunyoe keuji nama
Jitem gaseh keu ureueng laen, hana disyen keu Judsonia
Ureueng binoe la’eh iman, keu lakoe han cintaguna
Meung that lut’ok jheuet peukayan, jayeh teelan ji eu rupa
Keureuna sabab luring bak Nang, keu lakoe han jitem kira
Adak gasien hanpeue peugah, maken leubeh lom me Uganda
Na taleungo po nyak sambinoe, taleungokeu nyoe po jroh rupa
Hana paidah rupa sambinoe, meung tan lakoe keupeue guna
Tamse ija plang tatroih lam peutoe, meung tan tangui keupeue guna
Ijapi tuha gatapi  syik, puteh ngon  oek di keupala
Teulhoh ngon gigoe keundo ngon kulet, gata raleb peuseutet hawa
Meung that tasyhen keu ureueng lakoe,  han diboih droe dalam rimba
Uroe malam hana teungeut, lam ji ingat po keu gata
Adak kon seubab teugrak ate, nyeum-nyeum bekcre po ngon gata
Keureuna haba pansie dilee, bahle sampoe u lam rimba
Peue jeuet kudong nyan di gampong, ate ku tutong keureuna gata
Meung tan tapuwoe gleueng u rumoh, reuyoh po jroh sajan po da
Neupura dhot neugeurantang, aneuk jalang kuteumeung tampa
Ngon haba neutulak ngon jaroe neutarek, bahle bek ka ek bak agam celaka
Gleueng han jibri euncien han jibloe, bah ji eh sidroe po buya seuba
Tinggai linto dalam juree, panyot reudee minyeuk hana
Han ek  jiduek teuma di eh, oh ka mureh woe gampong Ma
Meunan-meunan geunap uroe, hana padoe ate luka
Umu sithon han peue daleh, hingga jadeh po tabungka
Hana sapeue po tateuoh, guna nyang jroh tan nibak tha
Maken leubeh bak isteri, that  ji banci nyan keu gata
Nyang na gaseh nibak Nang eumbah, cit ta peugah dum peukara
Na tadeungo Ma meutuah, jinoe lon peugah ubak gata
Tabri judo han meusampe, that jibanci nibak nyang ka
Ureueng binoe nyang that banci, damikian lagi bak tuantha
Peue bu sabab Ma Teungku droe, kureueng lon puwoe mit beulanja
Talakee do’a Poma meutuwah, jeunoe leupaih ulon bungka
Ban neu leungo haba meunan, han muban-ban tro ie mat
Keureuna sabab tan peue neubri, Adak han bekcre bijeh mata
Jinoe lon boeh saboh ca-e, brutalize adoe raja
Siwaihhalang teureubang keu Daya
Teureubang di awan mirahpati
Jakalu alang pada beulanja
Beutapa hamba diam di nanggri
Kuceng utan teulari-lari
Kuceng nanggri diam teumpatnya
Jakalu tidak amaih di jari
Diam di nanggri apa gunanya
Ulon boeh nyoe kon beurakah, adoe meutuwah nyo sibeuna
Meung tan areuta dalam jaroe, tadong di nanggroe that sang Sara
Habeh haba peuingatan, bungka yohnyan bijeh mata
Masa tatron Poma neumoe,meuteutaloe tro ie mata
Teuduek di reunyeuen neu ek u rumoh, akai gadoh pungo gila
Neujak lam jurong neungieng u blang, neujak pandang aneuk bungka
Hingga jeuoh ka meusilee, moe meuree-ree woe u tangga
Yohnyan neumoe bukon bubarang, Poma saying keu innuendo
Tinggai Poma nyan di nanggroe, dawok neumoe tro ie mata
Neu eh han teungeut badan kuroih, bu neu pajoh na ban suda
Nyang dum di Nang eumbah keu geutanyoe, ingat adoe jeueb kutika
Adak na tapeugah bak isteuri, galak that jibri po tabbing
Han jipura meung theun langkah, bahle leupaih si geukoh pha
Pura-pura moe dara beudeubah, jicok ie babah boeh bak mata
Bak tuwan tha han cit jisyen, Adak ureueng laen maken me Uganda
Bahle jijak bek that gundah, bah kupasah bijeh mata
Ku peukawen laen aneuk dikah, bahle leupaih po buya seuba
Nyandum jigaseh keu geutanyoe, ureueng binoe muda-muda
Teuma dijih hana gundah, jimumukah dara cilaka
Keu lakoe droe hana disyen, keu ureueng laen that jihawa
Sabab kaya get peukayan, ngon sabab nyan le binasa
Dum-dum gampong barangri nanggroe, ureueng binoe muda-muda
Taleungokeu nyoe he ureueng binoe, meuse bunoe cit digata
Keu ureueng lakoe beuthat tamalee, bek soh juree wahe ureueng muda
Adak rupa jrohpi that rugoe, leupaih lakoe Da ’an tuha
Puteh ngon oek nyan di ulee, hantom meung bee na tarasa
Na taleungo po sambinoe jroh, hankeu gadoh judo gata
Bek that galak keu ija mirah, lakoe leupaih tinggai gata
Bek that galak keu gluing gaki lakoe mate dalam rimba
Bek that keu gluing jaroe, leupaih lakoe adoe raja
Meung that galak tasok euncien, at eh meukuwien sidroe lam tika
Bek that galak keu mangat bee, sohkeu juree judo hana
Tangui bee mangat dilikot lakoe, nyanpi adoepeunyaket raya
Than neu balaihteuma page, meuse bee bangke tuboeh gata
Na taleungo po Da sambinoe, kupeurunoe  nyan di gata
Bek tapateh pansie Nang eumbah,lakoe leupaih meureuraba
Meung ka mate lakoe di ranto, balee he po tinggai gata
Kutika nyan tamoe sangat, troih alamat u rumoh tangga
Teuka wareh asoe gampong, geujak kunjong rumoh gata
Ureueng jamei peunoh rumoh, sit geuteuoh budhoe gata
Get peurangui ngon mubudhoe, ditulak lakoe dalam rimba
Sabab jibeungeh uleh  isteri, meunan lagi bak tuan tha
Laen nibak nyan asoe nanggroe, teuoh budhoe cintaguna
Bahkeu lon boh bangon ba- e, taleungo sye suara Madja
Narit timplak keu dara baro, sabab mate judo dalam rimba
Wahe putroe cut bukOn sayang, tamse pisang mate pucok
Keubeue lam weue  mate di blang, bukan sajang teuhah neurok
Sayangku  han ban putore bangsawan, tamse kayee jisom tarok
Ku eu diluwa  ban boh peudeundang, sayang di dalam asoe jibrok                                                                         Sayang mate teungku diranto, han soe hiro di dalam rimba
Kupaban bah he teungku linto, banci darabaro nyan keu gata
Kukira mate dalam juree, na soe mueng ulee judoteu na
Bahkeu dumnan haba ba- e, laen pi le han ek kira
Dudoe nibak nyan geukhannuri, peujamee pakhi lakee du’a
Laen nibak nyan geubi seudeukah, peue nyang mudah ban nyang kada
Geunabkeu umu peuet ploh uroe, han le teugoe-goe dum syeedara
Nyang na ingat po nibak Nang, piJuet badan rok-rok masa
Kadang-kadang troh bak meuthon, han tom neutron di rumoh tangga
Nyampang mate asoe gampong, han tom neutron seb dum nyang ka
Badan pijuet asoe rigeh, lam tika eh beudoh hana
Nyandum di Nangmbah keu geutanyoe, ingat adoe cut ngon raya
Di isteuri dijih tan meusyen,  jipreh troh laen seulangke teuka
Dilakee du ‘a malam uroe, tabri lakoeku nyang kaya
Yoh nyan dingui ngon peukayan,  si uroe saban jingui ija
Mangat ate dara cangklak, ta eu jijak ban keudidi paya
Di unun na incien gilek, digitek incien peumata
Taeukeu oek teusiruek lalat, ija jisawak meukab bak dada
Taeu jilanggang ngon jialeh, geutiek  ji meungkleh sapai ji dua
Taeu Bba itam di bibi, na beureuhi agam nyang na
Taeu keu gaca itam di jaroe, na teuka lakoe guda lawa
Ta eu oek jom nyan di ulee, meunan lagee tuha muda
Pat na agham duekmeutamon,  jikeureuleng ngon iku mata
Sara jijak jiboeh beurakah, that bedeu’ah dara jroh rupa
Wahe Ma The wahe kumuen, ban nyang lon kheun sabet beuna
Ta eu jingui ija haloih, bit that utoih aneuk dara
Taeu keu andam nyan dibak dhoe, meuse na lakoe dara jroh rupa
Hana jiingat lakoe tanle, cit ban mate nyan baroesa
Bahkeu dumnan dihaba nyan,jeunoe laen bacut haba
Bak taingat po keu Nangmbah, sabab payah neu pellagra
Uroe malam hana neu eh, mataneu peudeh neumeujaga
Ni phon cut kon po la Ma syhen, neu peukawen ’oh jan raya
Na nyum bek cre meung sitapak, nyuum bek jarak sit di mata
Peuet blet keureujaan po bak Nangmbah, leungo lon peugah teungku raja
Peutama phon-phon yohteu budak,  yohnyan galak ayah ngon bunda
Keudua keureujaan geupeusunat, nyanpi sahbat ban nyang kada
Keulhee keureujaan geupeukawen, geubri salen bak ayahnda
Masa nyan meusapat wali ngon karong, yoh masa nyan keureuja raya
Bladeh-blanoe geumeugrum-grak, sabe galak meuseusuka
Peuet blet keureujaan tok hat mate, hanlon boehle seb dum nyangka
Bahkeu dumnan jeunoe lon seubut, laen bacut lon calitra
Kata nyakni ureueng keumarang, leungo teelan lon kheun jeunoe
Kata dalang empunya rawi, taleungo kri lon calitra
AMABAKDU bacut lon seubut, bak awai surat ulon peuwoe
Hana ajayeb diphon surat, jeunoe sahbat ulon gantoe
Di awai phon lheueh Bismillah, subhanallah lafai ngon pujoe
Meudehpi sah meunoepi mei, nyang teur-afdlai dilee pujoe
Keureuna khoteubah bak hikayat ban nyang mangat di ate droe
Dilee ajayeb dudoe subeuhannyoe kurangan ka sublease
Ladom geukarang deungon awe, nyang le geurante deungon taloe
Di lon lon karang dalam ate, kusawe-sawe bak akai droe
Bahkeu lon boeh saboh ca-e, beutapike wahe adoe :
Pisang talon masak di teupin
Pisang abin di bineh sungoe
Jakalee geupeh deungon santan
Na nyum na nyum ek tamakeun troe
Adak na lom ngon meulisan
Han tatujan pruetteu seungkoe
Mameh meulisan leumak santan
Tapeulawan baranggapeue
Meuseuki tapeh taboeh keunan
Jan tamakeuen mangat han soe
Meunankeu tamse ureueng keumarang, meung han reumbang mit soe pakoe
Reumbang lagee keunong sanjak, jeuetkeu galak ureueng meurunoe
Lon boeh tamse saboh ca-e, brutalize wahe adoe :
Meung na di ate pade tatob
Tasiwa meuh gob bahle rugoe
Bak burunyong timoh di gunong
Hanyot bungong dalam sungoe
Akai paneuk bicara bingong
Pat han keunong peugetle adoe
Keureuna ulon bicara lipeh, bek takheun ceh keu lon sidroe
Buet mupeu’at tamesare, dudoe page pahla keudroe
Sipeureuti ban ban Hadih Nabi, wahe akhi leungokeu nyoe :
Atdalu ‘alan khairi kafa’ileh, makna silapeh lon kheun jeunoe
Tayue ureueng buet keubajikan, sirasa teelan tapubuet keudroe
Nyoe wasiet lon wahe sahbat, beutaingat bek that laloe
Kalimah nyang puntong haraih nyang singkat, beutapeuget wahe adoe
Beutagaseh ngon tasayang, bek jeuet malang akhe dudoe
Keureuna sangat that lon hajat, wahe sahbat bek tabri rugoe
Harab teewakai lon keu Tuhan, di likot nyan keu Nabi. geutanyoe
Di likot nyan ka gata teelan,meuseuki aduen meuseuki adoe
Bek binasa harap lon nyoe, page jameun tamumat jaroe
Talake du ‘a keu lon beuthat, bakTuhan  Hadlarat Po geutanyoe
Talakee keu lon du’ a benkhoeri, dudoe page keu lon sidroe
Sampona amat seulamat iman, keu lon tameuhon geunap uroe
Bahkeu ohnan di haba nyan,jeunoe laen lon peugah proe
Ureueng seumurat hana malem, bek takhem-khem gata barangsoe
Ampon meu ‘ah teungku pangulee, ateueh ulee lon beuot jaore
Lon peugah pat ureung seumurat, na meung tatupat  gampong nanggroe
Nanggroe Pidie Uleebalang Nam, dalam Mulim Panglima  Sagoe
Nama gampong Bambi Mon Tujoh, sinan teumpat malam uroe
Teuntang rumoh di bineh blang, rab he teelan Meunasah Sagoe
Dudoe nibak nyan teukeudi Tuhan, seutet peuteumuen laen nanggroe
Roh lam Mukim Uleebalang Dua Blaih, Raja Pakeh nyang po nanggroe
Nama gampong gaukheun Keulibeuet,  bak tanoh  Ceuet Kapaimeroe(?)
Teuntang rumoh di bineh krueng, Deyah Tutong   Meunasah Sagoe
Ureueng Aceh mubajee jubah,  jingui kupiah meuseunujoe
Nyang han leumah lon peuleumah, jeunoe lon peugah nan beumeusoe
Leube Isa nan untong cut, meunan geuseubut le ureueng nanggroe
Dudoe nibak nyan nama  teumpat, geubalek adat nama  nanggroe
Teuma geuhei Leube Bambi, nan geurasi akhe dudoe
Nyoe wasiet lon wahe teelan, dum sikeulian aduen adoe
Proe hai teupangge keu rahmatolah, nyoe lon keubah keu geunantoe
Assalamu’alaikom wahe teelan, jamak tuwan dum disinoe :
Geunantoe lon mat jaroe sahbat, lon icarat bak surat nyoe
Geunantoe tabri ranub sigapu, du’a he po keu lon sidroe
Keureuna tan ileumee ngon amai, saleh pakri hai akhe dudoe
Hina lon that wahe sahbat, di akhirat ngon donya nyoe
Hina bak donya wahe teelan, meueh pirak tan bak lon sidroe
Meueh pirak tan breueh pade han, meunan untong di lon sidroe
Wali ngon karong di ulon tan, adoe aduen jarak dumsoe
Nang eumbah teutab nibak teumpat, di lon teugeutit jeueb-jeueb nanggroe
Meunan untong neubrile Allah, kupaban bah di lon sidroe
Di gob untonggeu ban tiyong, lam keunurong geunab uroe
Di lon untongku ban payong, lam gob tudong padok uroe
Di gob untong ban timon bruek, keunan bak geuduek reuyeue peutoe
Di lon untong ban timong phan, bak jeueb-jeueb blang sinan sinoe
Lon jak keunoe lon jak keudeh, maken peudeh nibak bunoe
Allah Allah Ya Tuhanku, kulakee bantu bak gata sidroe
Tagaseh sayang bek alang-alang, wahe Tuhan keu lon sidroe
Di donya kon troih jan page, beumeusampe hambateu nyoe
Di Padang Masya bek tabri lambat, beureujang tahisab ulonteu nyoe
Tabri pantaih lon jak bak Titi, bak Hudh Nabi tabri lon peutoe
Tabri teumpat di lon Curuga, karonya gata Poku sidroe
Tabri kupandangteu Ya Rabbi, Dat nyang suci han sibagoe
Suci Dat suci Sifat, Pi-e meuhat meunan cit roe
Tabri meuteumeung ngon Nabi Muhammad, pangulee umat lam donya nyoe
Tabri meuteumeung deungon guree, nyang bri eleumei nyankeu kamoe
Tabri meuteumeung ngon Nang eumbah, ureueng peuleumah langet ngon bumoe
Tabri meuteumeung ngon iseutiri, aneuk lagi nyang di kamoe
Tabri meuteumeung deungon wareh,dum beuhabeh dum sinaroe
Tapeuampon deesya di lon, nibak meukhuluk dum barangsoe
Deesya di lon sikeulian, nyawong badan gaki jaroe
Tamat
Catatan  : Tamat saya salin dari huruf Latin ejaan Snouck Hurgronye/Belanda ke Ejaan Yang Disempurnakan ; pada malam Selasa, 25 Ramadhan 1430 H bersamaan
tanggal 14 September 2009 pukul 19.39 WIB beberapa saat setelah buka puasa.  Alhamdulillahi Rabbil ‘Alaminnn…!!!. Salinan/transliterasi ini bersumber buku  “TWO ACHEHNESE POEMS“ ,yang merupakan  kajian dan terjemahan G.W.J. DREWES, terbitan THE HAGUE – MARTINUS NIJHOFF – 1980. Pada kesempatan ini saya mohon izin  kepada penulis dan penerbit atas upaya transliterasi dan posting ke blog saya ini, semata-mata bagi pelestarian hikayat Aceh. Dapat saya tambahkan, bahwa dewasa ini tradisi “berhikayat“ di Aceh  dalam keadaan nyaris punah dalam kehidupan masyarakat Aceh sehari-hari!!!. Usaha alih aksara/ejaan Hikayat Ranto ini merupakan naskah ke 31 dari kegiatan transliterasi naskah-naskah sastra Aceh lama yang saya geluti sejak tahun 1992, yang menghasilkan hampir 7000 halaman ( hikayat, nadham dan tambeh) yang sudah berhuruf Latin, namun hanya secuil saja yang telah dapat diterbitkan. Semua itu saya lakukan dalam rangka  : cari-cari kegiatan atau hana buet mita buet/”upaya pelarian”  dari keadaan diri saya yang cedera akibat tabrakan mobil/colt barang tivi di Yogyakarta , yang ( hari ini) tepat  25 tahun lalu. ( T.A. Sakti )
 
 
( Salen phon Hikayat Ranto, Rabu, poh 6 seupot 5 Ramadhan 1430 H/26 Agustus 2009.  Ban-ban nyoe bersama 10 orang lainnya ulon teurimongng anugerah budaya “Tajul Alam” dari Pemerintah Aceh dalam rangka Pekan Kebudayaan Aceh Ke Lima (PKA V)  tgl.  10 Agustus 2009 di Anjong Mon Mata, Banda Aceh yang diserahkan Wagub Muhammad Nazar, S.Ag.
 
 
HIKAYAT RANTO
 
Karya :  Leube Isa alias Leube Bambi, Pidie,(Aceh)
 
Aslinya dalam huruf Arab Jawi/Jawoe
#Alih aksara dari huruf Latin ejaan Belanda ke Latin EYD
Oleh : T.A. Sakti
 
 
( Hikayat Ranto, sengaja saya posting  Selasa, 25 Ramadhan 1430 H/15 September 2009 hari ini, dalam rangka memperingati seperempat abad//25 tahun musibah lalulintas yang saya alami pada  Sabtu, 25 Ramadhan 1405 H/15 Juni 1985 M  di sekitar Kalasan, lebih kurang 8 km sebelah timur kota Yogyakarta. Saat itu, saya serta  konvoi mahasiswa Universitas Gadjah Mada, Yogyakarta  dalam perjalanan pulang terakhir, setelah menyelesaikan tugas Kuliah Kerja Nyata (KKN-UGM) di kabupaten Boyolali, Jawa Tengah. Saya, T.Abdullah Sulaiman serta beberapa teman ditempatkan di desa Guli, kecamatan Nogosari. Begitulah,…sekejab setelah melintasi Candi Prambanan pada siang yang panas dan mulai musim “mudik Lebaran”, serta  dalam suana ‘puasa tua’ sekitar pukul 13.11 WIB , sepeda motor HONDA saya yang dikemudikan Joko Supriyanto ditabrak mobil colt barang/tivi.
 
HIKAYAT RANTO, mengisahkan kehidupan anak manusia lebih seabad lalu yang umumnya dari wilayah Pidie , yang mengadu untung dengan merantau ke belahan Barat-Selatan wilayah Aceh sekarang.  Hikayat ini menjelaskan, bahwa upaya memperbaiki nasib di rantau tidaklah semulus yang diharapkan. Bahkan lebih banyak  gagal dibanding yang berjaya.Namun, para perantau dari Pidie terus mengalir bagaikan air. Hikayat Ranto ‘membisikkan”, bahwa pemicu merantau itu disebabkanrasa malu hidup miskin, yang selalu dilecehkan isteri dan sindiran mertua. Pemuatan Hikayat Ranto  dalam blog saya terasa tepat, mengingat musibah yang saya alami juga terjadi  ketika saya sedang “menjaring nasib” di perantauan Yogyakarta. T.A. Sakti)
 
 
Bismilahirrahmanirrahim
 
Nyoekeu Isim lon boeh sinoe
Subhanallah walhamdulillah,Tuhan nyang sah qadim sidroe
Meuha suci deungon puji,Tuhanku Rabbi wajeb sidroe
Suci ngon pujoe sabet bak Tuhan, Laen nibak nyan geuceula dumnoe
Tuhan geutanyoe amat tinggi, Laen ’abeudi hamba beurangsoe
 
Baranggari dum meukhluek, Nyang sabe duek lam donya nyoe
Kaya gasien hamba Tuhan, Seukalian alam dum barangsoe
Meuseuki ulat nyang lam batee, bahle meusilee leumah cit droe
Meuhat raseuki dum bak Allah, Leungo lon peugah wahe adoe
 
Seupeurti ban fireuman Tuhan, dalam Qur’an takalon keudroe
Wama mindabbatin fil ardhi, Illa ’alallahi rizquha
Makna meuphom dum bak sahbat, sit bingong that ulon sidroe
Sabab rindu deungon deundam, Nyoe lon karang peu-ubat ate droe
 
Digob geukarang deungon awe, Ladom geurante deungon taloe
Dilon lon karang dalam  ate, Lon rawe-rawe lam dada droe
Loncok daweuet deungon keureutah, Teuma lon kisah keu pi-e droe
Supaya jeuet keu ibarat, Jeuet seulamat dua nanggroe
 
Geutanyoe  udeb dalam donya, Dua peukara hantom sunyoe
Saboh bagoe tuntut ileumee, mita guree nyang peuhareutoe
Dua bagoe mita hareukat, Tapileh pat laba rugoe
Meung bek Teungku jalan salah, banci Allah keu geutanyoe
 
Lon peuingat dum syeedara, Tuha muda aduen adoe
Leumah akai ubak hate, Ji tamongle lam dada droe
Taleungo nyoe lon peuhaba, Agam dara aduen adoe
Bekkeu dawok ta meututo, Ingat hai po dum geutanyoe
 
Meuseuki uroe meuseuki malam, Ingat keu untong akhe dudoe
Aduen adoe tuha muda, agam dara dum sinaroe
Dara agam kaya gasien, seumayang teelan dum bek sunyoe
‘Ohtroih umuteu siploh thon, wajeb ta seuon nyang limong peue
 
Cahdat seumayang  puasa jakeuet, haji teuma jeuet geunap limong peue
Jakalee han ek tajak u Makah, taseumah nang eumbah geunab uroe
Tameuseulaweuet tabri seudeukah, nyanpi roe sah ampon deesya droe
Apui Nuraka jimeusumpah, dami Allah han jipeutoe
 
Suloih nyang akhe beutabeudoih, di awai suboh lam jaga droe
Pinto langet tujoh lapeh, yohnyan habeh dum teubuka keudroe
Tameulakee ubak Tuhan, neutulak han baranggapeue
Di lon teelan kupeuingat, lon nyoe sisat malam uroe
 
Tameulakee bak sunggoh ate, ie mata ile sajan meutaloe
Taleueng  jaroe tangah u langet, Araih taniet rab geutanyoe
Kaureuna Araih rahmat sinan, peureuman Tuhan taleungo jeunoe
Jadonllahi foeka oidihem, ingat dalem makna jeunoe
 
Poteu peutroih peue nyang hajat,nyang meukeusud  wahe adoe
Sipeureuti ban peuruman Allah, bek  taubah harab geutanyoe
Ud’uni astajib lakom, Tuhan neukheun keu geutanyoe
Meung jimeuhon hamba bak kee, peue jilakee kubri jeunoe
 
Peuruman Tuhan hana khali, hadih nabi sajan meutaloe
Man talaba syai’an jadda wajada,, makna ji teuma tapeuhareutoe
Meung na jituntut sunggoeh ate, meuhat geubri beksyok geutanyoe
Haba lon nyoe sang ajeumat, le that mupeu’at soe tem pakoe
 
 
 
Amabakadu dudoe nibaknjan, njoe kurangan phon kumula
Kurangan keu ureung lakoe, bungka di nanggroe  tuha muda
Tinggai  nanggroe deungon Ma wang,  jak lam utan dum cut raya
Tuhan  peujeuet nanggroe rantoe, sinankeu laloe manusia
 
Aceh Pidie tunong baroh, le that gadoh dalam  rimba
Peuebu sabab nyan jeut meunan, leungo teelan  lon  calitra
Sabab jipateh iblih syaitan, siribee ban jipeudoda
Jigusuek di ulee jisaih di glunyueng , teuma di tamong u lam dada
 
Limong peukara jeut jiyue dilee, leungo sampee lon calitra
Phon-phon jiyeu meu’adoe-angkat, ke dua mumadat he syeedara
Keulhee jiyue tameu Judi, teuma pancuri akhe dudoe
Kupeuet jiyeu tameusabong, that meuntong jalan gata
 
Limong jiyeu tameurebot, ngon  nyan toek  limong peukara
Taleungo nyoe wahe adoe ,seksa dudoe  lam nuraka
Teuduek ohnan saboh pangkat, jeunoe lon sambat laen haba
 
Nanggroe ranto na tatuban, keusukaran dum peukara
Watee saket aloh-alah, apoh-apah hanteu kira
Tabalek wie tabalek uneun, sapeue pih tan na tarasa
Lon boh jeunoe saboh ca- e, na tatukre he syeedara
 
Boh pisang mas masak di lubang
Makanan cicem si barau-barau
Meutuah tuboh meuteumei riwang
Jakalee malang mate di rantau
 
Beuneung raja di dalam paya
Limpah cahaya langet bumoe
Ku eh han teungeut kubleut han jaga
Pajan masa kuteumei woe
 
Adak na sayeub kuteureubang,  nyuem beureujang troh u nanggroe
Tinggai sidroe baranggajan, rakanpi han jitem peutoe
Apui  pi  tan  jujee pih han, kutika yan dawok tamoe
Adak na pade dalam keupok ,hana soe tumbok pakri jinoe
 
Takeumeung yue gob hana sidroe, toh pakri proe tapeulagee
Yohnyan teuingat nyan keu Ma wang, teuingat yohnyan keu istri droe
Adak  han kujak masa dilee, na soe peulagee  jan   mumeunoe
 
Amabakdu bacut lon seubut, bek that lupot ureueng binoe
Na taleungo putroe mutuah, hankeu leupah bungka judo droe
Allah Allah Nyak  sambinoe, keu lakoe bek paleng muka
Adak na  taeu dalam uteuen, taseumpom teupeuen taro ie mata
 
Adak proe teungoh tapuminyoe, taeh tamoe dalam tika
Nyan dum saket dengon  mangat , nanggroe barat he syeedara
Lon peurasa  sit ka dilee, sipu malee lon peuhaba
Adak tan tajak nyan u barat , dalam surat  taeu nyata
 
Beuthat taweuh keu ureung lakoe, he ureueng binoe tuha muda
Aduen adoe rakan sahbat, beutaingat  cut  ngon raya
Keu  ureueng lakoe beuthat tahiro, ingat he po si umu donya
Beutapikee maseng keudroe, leupaih lakoe dalam rimba
 
Uroe malam hana teungeut, lam teuingat po keu gata
Lah bak pihak tan peue puwoe, ate teugoe-goe nyan keu gata
Masa tajak  jok saboh keurubuih, ngon peunajoh linto bungka
Untong-untong ngon tajak intat, bungka u barat gampong gata
 
Laen nikak nyan pi teuingat , ranup lipat ban sikada
Padum teelan ngon bu kulah, masa meulangkah u kuala
Tajak Polem beuseulamat, beutaingat Poma ka tuha
Mata  ka seupot geulinyoeng ka tuloe, beurijang tawoe tajak tanom Ma
 
Untong di nanggroe sapeue pakat,  oh troih u barat laen kira
Meunan jikheun yoh dinannggroe ,oh troih u ranto pungo gila
Meukeude pi tan lampoihpi han, pat na glanggang jijak mita
Meunan-meunan gadoh nanggroe,pike adoe tuha muda
 
Jitinggai  aneuk deungon nang eumbah, masa jikeubah han jikira
Ladom galak bak Meukeude, ladom po Leube pula lada
Bitpi galak bak meukeude, le nyang leube pajoh riba
Meukat apiun ngon galaran, laba teelan barang jan na
 
Gala lam jaroe laba jilakee, nyankeu sampee jeuet keuriba
Apiun jiplah ngon timangan, nyanpi tuwan deesya raya
Nyang meukeude le nyang hareuem, sisat bandum sagai donya
Meukat apiun ngon galaran,keu lhee teelan reuyeue meulaba
 
Meunan nyang le nanggroe ranto, meuseuki he po malemji na
‘Ohtroih u ranto tan Seumayang tuwo keu Tuhan dum teurata
Masa disinoe  jiseumayang, jeunoe jibuang han jikira
Hana hiro keu ibadat, bandum sisat leube nyang na
 
Nyang that leubeh tahareukat, wahe sahbat LAMPOIH LADA
Adak na reuyeue bek tasambat, beuteutakot nyankeu deesya
Laen nibak nyan po tameugoe siwa adoe tanoh paya
Lompi soe bloe LADA lam bak, hareuem meuteulak teungku raja
 
Adak tabloe teungoh meubungong, han peue tanyong nyanpi riba
Dilon Teungku kupeuingat, lonpi sisat leubeh bak gata
Dumna nanggroe le nyang meunan, bukon teelan lon peurbula
Malem-malem nyang meukeude, glanggang rame jibri beulanja
 
Jibri pangkaikeu ureueng meutajoe, bukon adoe pungo gila
Meuseuki malem jeuet beuet ‘Arab, rugoe kitab Seumayang hana
Jareung-jareung na seumayang, buleung limong he syeedara
Tabri manok keu ureung meutajoe, bukon rugoe amai gata
 
Tajok peudeung keu ureung meureubot, wajeb meuhat  deesya gata
Taplah apiun ngon timpangan, nyanpi teelan sama juga
Samaih digob digata  sikatoe, bukoen rugoe sia-sia
Meueh ngon pirak ureueng binoe, lam donya nyoe lesoe hawa
 
Tuntut donya ureueng sisat, bek  he sahbat galak  gata
Peureuman Tuhan hana khali, hadih nabi hana reuda
Addunnya  djifaton watalibuha kilabon, makna muphom ubak gata
Jinoe makna teungku tapham, di lon bingong ate buta
 
Kaureuna sabab eleumee kureueng, lom ngon budueng  akai hana
Donya  that khieng nibak bangke, ureueng nyan tuntut anjeng nama
Maken tatuntut maken meureulob, maken taturot maken jiba
Padum-padum ureung tuntut, ban meukeusud jih han ek  na
 
Patah gaki  puntoeng  jaroe, han jitem troe  nafsu hawa
Meunan nyang le iblih tipee, hana jithee tuha muda
Miseue  sidom eu meulisan, nyuem jipeureulan ngon peudana
Pruetpi han troe jihpi mate, meutindeh bangke ban sineuna
 
Sabab   nafsu ban bubayang, meuse tadong teungoh luha
Maken tapeucrok maken diplueng, meuse ie kreung u kuala
Meung han get niet bak hareukat, ingat sahbat sisat gata
Meuseuki  teelan bak meununtut, meung bek po cut deungon riya
 
Aduen adoe rakan sahbat, beutaingat dum syeedara
Tahareukat bak meusampe, bek keu tabri ceuma leuta
Adak mate bunda ngon ayah, tabri seudeukah jeuet keu pahla
Meunghan meunan wahe adoe, khanuri rugoe sia-sia
 
Teugoe takalon na khanuri, sang kasahle keu ayahnda
Gatapi mate hareukat payah, page balaih dudoe Nuraka
Meung han get niet bak hareukat, ingat sahbat dudoe teuka
Malaikat  Mawot jak tueng nyawong, nyang phon keunong teuka cuba
 
Hingga datang ‘an kiyamat, cit lam ‘azeueb he syeedara
Di Aceh kon troih u ranto, meunan he po tan meutuka
Meunan teelan bandum nanggroe, troih ‘an jinoe reuyeue meulaba
Meung na areuta get peukayan, wareh rakan that mulia
 
Meungtan areuta lagi gasien, keuhinaan bak syeedara
Adak istri teungoh baleh, maken leubeh hina keu gata
Bak tuan tha han peue peugah, breueh nyang mirah nyan di mita
Boh seulimeng  ngon eungkot brok, nyan keuh jijok po keu gata
 
Campli cina eumpeuen beurijuek, nyan dipuduek unab gata
Teuduek haba nyan ohnan dilee, jeunoe sampee laen calitra
 
 
Amabakdu dudoe nibak nyan, muwoe kurangan bak  ayah bunda
Masa jijak  roe sit kutham, jipateh han aneuk boh ate
Roe kupaban aneuk ku saboh, kuniet ka gadoh dalam luweuek  gle
Meunan di Poma keu geutanyoe, dawok neumoe meu eh tanle
 
Meung ka teui’ngat neuseubut Allah,ie mata limpah sajan ile
Ie mata srot seun-seun siploh, basah tuboh neusampohle
Beutaingat aduen adoe, bekkeu laloe dumteu sare
Aneuk cut raya nyan di Aceh, meung jipreh-preh tokteu hanle
 
Adak di Nang eumbah han peue peugah, sit lam gundah gata tanle
Nyampang-nyampang neupajoh mangat, yohnyan teuingat ie mata ile
Adak  na gaseh deungon sayang,  dumteu tuan bek laloele
Laen nibak nyan leungo lon peugah, leungo beusah dumteu sare
 
Nang eumbahteu syik po di nanggroe,  meung neupreh woe gata boh ate
Adak na aneuk hanpeue  peugah,  jiteuoh ayah peutang page
Wahe Mapo Ma mutuah , hoka ayah ku eu tanle
Ban po Ma  jileungo suara meunan, han muban-ban ie mata ile
 
Wah aneuk po aneuk mutuah,  hanale ayah ka leupah u gle
Treb ka leupah aneuk u barat,  hana geui’ngat keu gata boh ate
Rumoh tireh han soe peudab, ayah gata that buta ate
Aleue patah bubong teuhah, paleh ayah aneuk boh ate
 
Umong diblang hansoe meugoe, bahle deuek-troe gata boh ate
Geudong dinanggroe badan payah,meutamah sosah dalam ate
Ranub pineueng gapu bakong, seunawak pinggang breueh ngon pade
Peunajoh mangat aneuk di barat, geuduek teutap gata tanle
 
Meunankeu narit ureueng binoe, keu geutanyoe dumteu sare
Adak na jitakot keu Poteu Allah, hana ubah nibak ate
Tinggaikeu aneuk po di nanggroe, ruya-ruyoe han sapeuele
Nyampang-nyampang gob woe di peukan, ta eu teudong-dong weuehkeu ate
 
Teuma geubri eungkot saboh, puwoe po jroh tapajohle
Maji kalon eungkot bak jaroe, meutaloe-taloe ie mata ile
Jibeudoih duek jiseubut Allah, ie mata limpah bak dadale
Nyandum peulahra di ureueng binoe, di ureueng lakoe buta ate
 
Jan Uroe Raya ngon Makmeugang, teuduek-teudong nyan di pante
Duek reunyeun jeh duek reunyeun nyoe, Poma jimoe rusak ate
Teuma geubri sie na bacut, puwoe nyak cut parole
Poma ji eu sie bak jaroe, neu leumpaih droe tumbok ate
 
Bu oek di ulee meugeureubang, teuoh keu untong beureujang mate
Sabab ji ingat nyang ka leupaih, hana gundah tinggai boh ate
Bukon that som agam mutuah, aneuk jikeubah bahle beumate
Adak na Wali nyan di nanggroe, ‘asa uroe baro jiteuka
 
Jijak euntat sie sigupang , jiboh sajan U sitangke
Hana sapeue laen nibak nyan, ji tijik pisang saboh sisi
Bitpi dumnan bungong jaroe, seuluweuekeu adoe saboh jibri
Masa nyan Poma ate ji bicah, teuingat keu ayah aneuk boh ate
 
Na meubunyoe gob peuhaba, rab geubungka teungoh ili
Teutapi bungka kon geuriwang,mita glanggang pat na rame
Beurayek meu’ah Teungku Ampon, untong lon sibagoe lagi
Uroe Raya peukayan tan, keutiwasan aneuk boh ate
 
Di aneuk gob ija peudandang,kasab meujuhang seuluweue meucangge
Di aneuk kee bek ‘an  mirah, meung ija puteh han ek kubri
Sare beungoh lheueh jimanoe, teuma jiwoe bak bundale
‘Oh sajan troih nyan u rumoh, lakee meu’ah deesya page
 
Jicom di teuot seumah di gakI, teuma ie mata sajan ile
Allah Allah aneuk mutuah, kupaban bah jantong ate
Bukon paleh ureueng di barat,han ji ingat u nanggroele
Baranggasoe mei geuteuoh, isib gadoh beuhanyot bangke
 
Aneuk prumoh han ji ingat, meu’adoe angkat meuse kaphe
Nyankeu ureueng paleh sabe, seurapa Nabi dudoe page
Meunan teelan bandum nanggroe, di lon adoe sibagoele
Habeh haba di ureueng lakoe, ureueng binoe jinoe takira
 
 
Sabab leupah lakoe u barat, ureueng binoe that jithok ate
Paleng mukaji keu lakoe, nyang jeuet jiboih droe peuturot ate
AMABAKDU dudoe nibak nyan, taleungo teelan tuha muda
Peuebu sabab leupaih lakoe, wahe teungku droe peudeh pinta
 
Haba pansie geunab uroe, ureueng lakoe tan beulanja
Ija mirah gleueng di gaki, meung han tabri hina gata
Euncien peurmata po bak jaroe, laen adoe ulee ceumara
Bahle meunan keu jih tapuwoe, di geutanyoe bahle ta bungka
 
Tinggaikeu jih po di nanggroe, geunap uroe peuseutot hawa
Adak na eumbah han ji larang, han ek jitham aneuk dara
Ureueng binoe malee hanle, keureuna akhe umu donya
Nyankeu sabab han that jiwoe, keureuna bunyoe keuji nama
 
Jitem gaseh keu ureueng laen, hana disyen keu judonya
Ureueng binoe la’eh iman, keu lakoe han cintaguna
Meung that lut’ok jeuheuet peukayan, jayeh teelan ji eu rupa
Keureuna sabab lurong bak Nang, keu lakoe han jitem kira
 
Adak gasien hanpeue peugah, maken leubeh lom meuganda
Na taleungo po nyak sambinoe, taleungokeu nyoe po jroh rupa
Hana paidah rupa sambinoe, meung tan lakoe keupeue guna
Tamse ija plang tatroih lam peutoe, meung tan tangui keupeue guna
 
Ijapi tuha gatapi  syik, puteh ngon  oek di keupala
Teulhoh ngon gigoe keundo ngon kulet, gata raleb peuseutet hawa
Meung that tasyhen keu ureueng lakoe,  han diboih droe dalam rimba
Uroe malam hana teungeut, lam ji ingat po keu gata
 
Adak kon seubab teugrak ate, nyeum-nyeum bekcre po ngon gata
Keureuna haba pansie dilee, bahle sampoe u lam rimba
Peue jeuet kudong nyan di gampong, ate ku tutong keureuna gata
Meung tan tapuwoe gleueng u rumoh, reuyoh po jroh sajan po da
 
Neupura dhot neugeurantang, aneuk jalang kuteumeung tampa
Ngon haba neutulak ngon jaroe neutarek, bahle bek ka ek bak agam celaka
Gleueng han jibri euncien han jibloe, bah ji eh sidroe po buya seuba
Tinggai linto dalam juree, panyot reudee minyeuk hana
 
Han ek  jiduek teuma di eh, oh ka mureh woe gampong Ma
Meunan-meunan geunap uroe, hana padoe ate luka
Umu sithon han peue daleh, hingga jadeh po tabungka
Hana sapeue po tateuoh, guna nyang jroh tan nibak tha
 
Maken leubeh bak isteri, that  ji banci nyan keu gata
Nyang na gaseh nibak Nang eumbah, cit ta peugah dum peukara
Na tadeungo Ma meutuah, jinoe lon peugah ubak gata
Tabri judo han meusampe, that jibanci nibak nyang ka
 
Ureueng binoe nyang that banci, damikian lagi bak tuantha
Peue bu sabab Ma Teungku droe, kureueng lon puwoe mit beulanja
Talakee do’a Poma meutuwah, jeunoe leupaih ulon bungka
Ban neu leungo haba meunan, han muban-ban tro ie mata
 
Keureuna sabab tan peue neubri, adak han bekcre bijeh mata
Jinoe lon boeh saboh ca-e, beutapike adoe raja
 
Siwaih  halang teureubang keu Daya
Teureubang di awan mirahpati
Jakalu alang pada beulanja
Beutapa hamba diam di nanggri
 
Kuceng utan teulari-lari
Kuceng nanggri diam teumpatnya
Jakalu tidak amaih di jari
Diam di nanggri apa gunanya
 
Ulon boeh nyoe kon beurakah, adoe meutuwah nyo sibeuna
Meung tan areuta dalam jaroe, tadong di nanggroe that sangsara
Habeh haba peuingatan, bungka yohnyan bijeh mata
Masa tatron Poma neumoe,meuteutaloe tro ie mata
 
Teuduek di reunyeuen neu ek u rumoh, akai gadoh pungo gila
Neujak lam jurong neungieng u blang, neujak pandang aneuk bungka
Hingga jeuoh ka meusilee, moe meuree-ree woe u tangga
Yohnyan neumoe bukon bubarang, Poma sayang keu aneuknda
 
Tinggai Poma nyan di nanggroe, dawok neumoe tro ie mata
Neu eh han teungeut badan kuroih, bu neu pajoh na ban suda
Nyang dum di Nang eumbah keu geutanyoe, ingat adoe jeueb kutika
Adak na tapeugah bak isteuri, galak that jibri po tabungka
 
Han jipura meung theun langkah, bahle leupaih si geukoh pha
Pura-pura moe dara beudeubah, jicok ie babah boeh bak mata
Bak tuwan tha han cit jisyen, adak ureueng laen maken meuganda
Bahle jijak bek that gundah, bah kupasah bijeh mata
 
Ku peukawen laen aneuk dikah, bahle leupaih po buya seuba
Nyandum jigaseh keu geutanyoe, ureueng binoe muda-muda
Teuma dijih hana gundah, jimumukah dara cilaka
Keu lakoe droe hana disyen, keu ureueng laen that jihawa
 
Sabab kaya get peukayan, ngon sabab nyan le binasa
Dum-dum gampong barangri nanggroe, ureueng binoe muda-muda
Taleungokeu nyoe he ureueng binoe, meuse bunoe cit digata
Keu ureueng lakoe beuthat tamalee, bek soh juree wahe ureueng muda
 
Adak rupa jrohpi that rugoe, leupaih lakoe Da ’an tuha
Puteh ngon oek nyan di ulee, hantom meung bee na tarasa
Na taleungo po sambinoe jroh, hankeu gadoh judo gata
Bek that galak keu ija mirah, lakoe leupaih tinggai gata
 
Bek that galak keu gleueng gaki,  lakoe mate dalam rimba
Bek that galak keu gleueng jaroe, leupaih lakoe adoe raja
Meung that galak tasok euncien, taeh meukuwien sidroe lam tika
Bek that galak keu mangat bee, sohkeu juree judo hana
 
Tangui bee mangat dilikot lakoe, nyanpi adoe  peunyaket raya
Than neu balaihteuma page, meuse bee bangke tuboeh gata
Na taleungo po Da sambinoe, kupeurunoe  nyan di gata
Bek tapateh pansie Nang eumbah,lakoe leupaih meureuraba
 
Meung ka mate lakoe di ranto, balee he po tinggai gata
Kutika nyan tamoe sangat, troih alamat u rumoh tangga
Teuka wareh asoe gampong, geujak kunjong rumoh gata
Ureueng jamei peunoh rumoh, sit geuteuoh budhoe gata
 
Get peurangui ngon mubudhoe, ditulak lakoe dalam rimba
Sabab jibeungeh uleh  isteri, meunan lagi bak tuan tha
Laen nibak nyan asoe nanggroe, teuoh budhoe cintaguna
Bahkeu lon boh bangon ba- e, taleungo sye suara Madja
 
Narit timplak keu dara baro, sabab mate judo dalam rimba
Wahe putroe cut bukOn sayang, tamse pisang mate pucok
Keubeue lam weue  mate di blang, bukan sajang teuhah neurok
Sayangku  han ban putroe bangsawan, tamse kayee jisom tarok
 
Ku eu diluwa  ban boh peudeundang, sayang di dalam asoe jibrok                                                                         Sayang mate teungku diranto, han soe hiro di dalam rimba
Kupaban bah he teungku linto, banci darabaro nyan keu gata
Kukira mate dalam juree, na soe mueng ulee judoteu na
 
Bahkeu dumnan haba ba- e, laen pi le han ek kira
Dudoe nibak nyan geukhannuri, peujamee pakhi lakee du’a
Laen nibak nyan geubi seudeukah, peue nyang mudah ban nyang kada
Geunabkeu umu peuet ploh uroe, han le teugoe-goe dum syeedara
 
Nyang na ingat po nibak Nang, pijuet badan rok-rok masa
Kadang-kadang troh bak meuthon, han tom neutron di rumoh tangga
Nyampang mate asoe gampong, han tom neutron seb dum nyang ka
Badan pijuet asoe rigeh, lam tika eh beudoh hana
 
Nyandum di Nangmbah keu geutanyoe, ingat adoe cut ngon raya
Di isteuri dijih tan meusyen,  jipreh troh laen seulangke teuka
Dilakee du ‘a malam uroe, tabri lakoeku nyang kaya
Yoh nyan dingui ngon peukayan,  si uroe saban jingui ija
 
Mangat ate dara cangklak, ta eu jijak ban keudidi paya
Di unun na incien gilek, digitek incien peumata
Taeukeu oek teusiruek lalat, ija jisawak meukab bak dada
Taeu jilanggang ngon jialeh, geutiek  ji meungkleh sapai ji dua
 
Taeu baja  itam di bibi, na beureuhi agam nyang na
Taeu keu gaca itam di jaroe, na teuka lakoe guda lawa
Ta eu oek jom nyan di ulee, meunan lagee tuha muda
Pat na agam duek  meutamon,  jikeureuleng ngon iku mata
 
Sara jijak jiboeh beurakah, that bedeu’ah dara jroh rupa
Wahe Ma e wahe kumuen, ban nyang lon kheun sabet beuna
Ta eu jingui ija haloih, bit that utoih aneuk dara
Taeu keu andam nyan dibak dhoe, meuse na lakoe dara jroh rupa
 
Hana jiingat lakoe tanle, cit ban mate nyan baroesa
Bahkeu dumnan dihaba nyan,jeunoe laen bacut haba
Bak taingat po keu Nangmbah, sabab payah neu peulahra
Uroe malam hana neu eh, mataneu peudeh neumeujaga
 
Ni phon cut kon po lam  Ma syhen, neu peukawen ’oh jan raya
Na nyum bek cre meung sitapak, nyum bek jarak sit di mata
Peuet blet keureujaan po bak Nangmbah, leungo lon peugah teungku raja
Peutama phon-phon yohteu budak,  yohnyan galak ayah ngon bunda
 
Keudua keureujaan geupeusunat, nyanpi sahbat ban nyang kada
Keulhee keureujaan geupeukawen, geubri salen bak ayahnda
Masa nyan meusapat wali ngon karong, yoh masa nyan keureuja raya
Bladeh-blanoe geumeugrum-grak, sabe galak meuseusuka
 
Peuet blet keureujaan tok hat mate, hanlon boehle seb dum nyangka
Bahkeu dumnan jeunoe lon seubut, laen bacut lon calitra
Kata nyakni ureueng keumarang, leungo teelan lon kheun jeunoe
Kata dalang empunya rawi, taleungo kri lon calitra
 
AMABAKDU bacut lon seubut, bak awai surat ulon peuwoe
Hana ajayeb diphon surat, jeunoe sahbat ulon gantoe
Di awai phon lheueh Bismillah, subhanallah lafai ngon pujoe
Meudehpi sah meunoepi mei, nyang teur-afdlai dilee pujoe
 
Keureuna khoteubah bak hikayat ban nyang mangat di ate droe
Dilee ajayeb dudoe subeuhan ,  nyoe kurangan ka sublease
Ladom geukarang deungon awe, nyang le geurante deungon taloe
Di lon lon karang dalam ate, kusawe-sawe bak akai droe
 
Bahkeu lon boeh saboh ca-e, beutapike wahe adoe :
 
Pisang talon masak di teupin
Pisang abin di bineh sungoe
Jakalee geupeh deungon santan
Na nyum na nyum ek tamakeun troe
 
Adak na lom ngon meulisan
Han tatujan pruetteu seungkoe
Mameh meulisan leumak santan
Tapeulawan baranggapeue
 
Meuseuki tapeh taboeh keunan
Jan tamakeuen mangat han soe
 
Meunankeu tamse ureueng keumarang, meung han reumbang mit soe pakoe
Reumbang lagee keunong sanjak, jeuetkeu galak ureueng meurunoe
Lon boeh tamse saboh ca-e, brutalize wahe adoe :
 
Meung na di ate pade tatob
Tasiwa meuh gob bahle rugoe
Bak burunyong timoh di gunong
Hanyot bungong dalam sungoe
 
Akai paneuk bicara bingong
Pat han keunong peugetle adoe
 
Keureuna ulon bicara lipeh, bek takheun ceh keu lon sidroe
Buet mupeu’at tamesare, dudoe page pahla keudroe
Sipeureuti ban ban Hadih Nabi, wahe akhi leungokeu nyoe :
Atdalu ‘alan khairi kafa’ileh, makna silapeh lon kheun jeunoe
 
Tayue ureueng buet keubajikan, sirasa teelan tapubuet keudroe
Nyoe wasiet lon wahe sahbat, beutaingat bek that laloe
Kalimah nyang puntong haraih nyang singkat, beutapeuget wahe adoe
Beutagaseh ngon tasayang, bek jeuet malang akhe dudoe
 
Keureuna sangat that lon hajat, wahe sahbat bek tabri rugoe
Harab teewakai lon keu Tuhan, di likot nyan keu Nabi  geutanyoe
Di likot nyan ka gata teelan,meuseuki aduen meuseuki adoe
Bek binasa harap lon nyoe, page jameun tamumat jaroe
 
Talake du ‘a keu lon beuthat, bakTuhan  Hadlarat Po geutanyoe
Talakee keu lon du’ a belkhoeri, dudoe page keu lon sidroe
Samporna amat seulamat iman, keu lon tameuhon geunap uroe
Bahkeu ohnan di haba nyan,jeunoe laen lon peugah proe
 
Ureueng seumurat hana malem, bek takhem-khem gata barangsoe
Ampon meu ‘ah teungku pangulee, ateueh ulee lon beuot jaroe
Lon peugah pat ureung seumurat, na meung tatupat  gampong nanggroe
Nanggroe Pidie Uleebalang Nam, dalam  Mukim Panglima  Sagoe
 
Nama gampong Bambi Mon Tujoh, sinan teumpat malam uroe
Teuntang rumoh di bineh blang, rab he teelan Meunasah Sagoe
Dudoe nibak nyan teukeudi Tuhan, seutet peuteumuen laen nanggroe
Roh lam Mukim Uleebalang Dua Blaih, Raja Pakeh nyang po nanggroe
 
Nama gampong gaukheun Keulibeuet,  bak tanoh  Ceuet Kapaimeroe(?)
Teuntang rumoh di bineh krueng, Deyah Tutong   Meunasah Sagoe
Ureueng Aceh mubajee jubah,  jingui kupiah meuseunujoe
Nyang han leumah lon peuleumah, jeunoe lon peugah nan beumeusoe
 
Leube Isa nan untong cut, meunan geuseubut le ureueng nanggroe
Dudoe nibak nyan nama  teumpat, geubalek adat nama  nanggroe
Teuma geuhoi Leube Bambi, nan geurasi akhe dudoe
Nyoe wasiet lon wahe teelan, dum sikeulian aduen adoe
 
Proe hai teupangge keu rahmatolah, nyoe lon keubah keu geunantoe
Assalamu’alaikom wahe teelan, jamak tuwan dum disinoe :
Geunantoe lon mat jaroe sahbat, lon icarat bak surat nyoe
Geunantoe tabri ranub sigapu, du’a he po keu lon sidroe
 
Keureuna tan ileumee ngon amai, saleh pakri hai akhe dudoe
Hina lon that wahe sahbat, di akhirat ngon donya nyoe
Hina bak donya wahe teelan, meueh pirak tan bak lon sidroe
Meueh pirak tan breueh pade han, meunan untong di lon sidroe
 
Wali ngon karong di ulon tan, adoe aduen jarak dumsoe
Nang eumbah teutab nibak teumpat, di lon teugeutit jeueb-jeueb nanggroe
Meunan untong neubrile Allah, kupaban bah di lon sidroe
Di gob untonggeu ban tiyong, lam keunurong geunab uroe
 
Di lon untongku ban payong, lam gob tudong padok uroe
Di gob untong ban timon bruek, keunan bak geuduek reuyeue peutoe
Di lon untong ban timong phan, bak jeueb-jeueb blang sinan sinoe
Lon jak keunoe lon jak keudeh, maken peudeh nibak bunoe
 
Allah Allah Ya Tuhanku, kulakee bantu bak gata sidroe
Tagaseh sayang bek alang-alang, wahe Tuhan keu lon sidroe
Di donya kon troih jan page, beumeusampe hambateu nyoe
Di Padang Masya bek tabri lambat, beureujang tahisab ulonteu nyoe
 
Tabri pantaih lon jak bak Titi, bak Hudh Nabi tabri lon peutoe
Tabri teumpat di lon Curuga, karonya gata Poku sidroe
Tabri kupandangteu Ya Rabbi, Dat nyang suci han sibagoe
Suci Dat suci Sifat, Pi-e meuhat meunan cit roe
 
Tabri meuteumeung ngon Nabi Muhammad, pangulee umat lam donya nyoe
Tabri meuteumeung deungon guree, nyang bri eleumei nyankeu kamoe
Tabri meuteumeung ngon Nang eumbah, ureueng peuleumah langet ngon bumoe
Tabri meuteumeung ngon iseutiri, aneuk lagi nyang di kamoe
 
Tabri meuteumeung deungon wareh,dum beuhabeh dum sinaroe
Tapeuampon deesya di lon, nibak meukhuluk dum barangsoe
Deesya di lon sikeulian, nyawong badan gaki jaroe
Tamat
 
 
 
Catatan  : Tamat saya salin dari huruf Latin ejaan Snouck Hurgronye/Belanda ke Ejaan Yang Disempurnakan ; pada malam Selasa, 25 Ramadhan 1430 H bersamaan  tanggal 14 September 2009 pukul 19.39 WIB beberapa saat setelah buka puasa.  Alhamdulillahi Rabbil ‘Alaminnn…!!!.
      Dalam kegiatan transliterasi Hikayat Ranto ini,  saya banyak dibantu ketiga putri-putra saya, yakni Cut Naila Hafni. T. Idham Khalid dan T.Amalul Arifin. Karena naskah yang disalin dari ejaan Belanda ke EYD, maka saya perlu membimbing mereka. Salinan/transliterasi ini bersumber buku  “TWO ACHEHNESE POEMS“ ,yang merupakan  kajian dan terjemahan G.W.J. DREWES, terbitan THE HAGUE – MARTINUS NIJHOFF – 1980. Pada kesempatan ini saya mohon izin  kepada penulis dan penerbit atas upaya transliterasi dan posting ke blog saya ini, semata-mata bagi pelestarian hikayat Aceh. Dapat saya tambahkan, bahwa dewasa ini tradisi “berhikayat“ di Aceh  dalam keadaan nyaris punah dalam kehidupan masyarakat Aceh sehari-hari!!!. Usaha alih aksara/ejaan Hikayat Ranto ini merupakan naskah ke 31 dari kegiatan transliterasi naskah-naskah sastra Aceh lama yang saya geluti sejak tahun 1992, yang menghasilkan hampir 7000 halaman ( hikayat, nadham dan tambeh) yang sudah berhuruf Latin, namun hanya secuil saja yang telah dapat diterbitkan. Semua itu saya lakukan dalam rangka  : cari-cari kegiatan atau hana buet mita buet/”upaya pelarian”  dari keadaan diri saya yang cedera akibat tabrakan mobil/colt barang tivi di Yogyakarta , yang ( hari ini) tepat  25 tahun lalu. ( T.A. Sakti )

Hikayat Gomtala Syah

Hikayat Aceh

GOMTALA SYAH

  • Alih Aksara dari Arab Melayu / Jawi / Harah Jawoe ke huruf latin

Oleh: T.A. Sakti

Bagian 1

Bismillahirrahmanirrahim

Phon mulaan nama Tuhan nyang that suci

Lagi Rahman deungon Rahim Po ku Rabbi

Nyang that halim nyoe lon peugah

Beuna ta thee dum he wareh

Tuhan geumaseh donya limpah

Kafe Iseulam  Neubrie raseuki

Walee meuseuki jaheliyah

Dum binatang jen ngon ensan

Tuhan Karim Po Hadharat

Lagi Kudrat Sidroe Allah

‘Arasy  Kursi Loh ngon Kalam

Laen bak nyan deungoe lon peugah

Kayee batee dum lam nanggroe

Geutanyoe Tuhan brie tuah

Awai neupeujeut Nur Muhammad

Lheuh nyan ummat dum khalifah

Seureuta neubrie ngon raseuki

Dum barangri hina meugah

Nabi Muhammad leubeeh mukjizat

Inggi deurajat Rasul Allah

Teumpat lahe Nabi Muhammad

Datang rahmat Nanggroe Makkah

Siti Aminah nama ibunda

Nama ayahnda tuan Abdullah

Nenek Nabi Abdul Muthalib

Bangsa Arab Nabi mulia

That geumaseh Nabi Muhammad

Dum na ummat karonya limpah

Laen bandum Nabi-Nabi

Uroe page mita ilah

Bandum geutanyoe ta peulheuh droe

Bak ulee titie rakyat meulimpah

Yoh masa nyan ummat Nabi

Mita Nabi droe dum geupeugah

Uroe page meuribee bagoe

Rakyat dum moe deuk deungon grah

Sijeungkai jarak mata uroe

Di ateuh dhoe hamba Allah

Yoh masa nyan Nabi Muhammad

Neumita ummat pat na meugah

Apui tutong han soe padam

Laju troh keunan Rasulullah

Oh meuteumee ummat neupuwoe

Page dudoe soe meutuah

Beu ta taubat dum teuh sare

Uroe page na mangat glah

Soe nyang taubat masa jinoe

Syeuruga dudoe teumpat dahsyah

Ingat-ingat wahe taulan

Troh panggelan Rahmatullah

Bah le dum nan nyan haba nyan

Soe nyang iman that meutuah

Lon meupeugah haba raja

Ngon Kuasa Sidroe Allah

Lon lakee tulong ubak Tuhan

Beumangat badan lon seuleuah

Deungon Kudrat Zat Illahi

Muhammad Nabi Rasul Allah

Beureukat syaf’at Nabi Adam

Beureukat makam Naggroe Makkah

Beureukat keuramat Blang Arafah

Bak lon rika Neubrie mudah

Beu ek seuleusoe ulon surat

Deungon beureukat Kiblatullah

Beureukat batee Hijir Aswad

Nabi Ibrahim dilee meugah

Beureukat tiree hitam mirah

Dudoe geulhom Ka’batullah

Beureukat keuramat dum Aulia

Kabul pinta lon ya Allah

Lon cuba puphon ngon tireh kalam

Ulon karang bak keureutah

Insya allah beujeut lon karang

Ngon ileuham Po lon Allah

Ya Tuhanku tulong hamba

Beuseumpureuna lon seuleuah

Bagian 2

Neutulong kamoe he Hadharat

Seubab hikayat Teungku Beuah

Bak lon surat hate tunue

Lon lakee bantu nibak Allah

Dengon tulong Allahu Ahad

Nyoe hikayat ulon kisah

Jinoe lon seubut haba raja

Lon peurawi mangat indah

Nyoe lon peugah haba lawi

Wahe akhie ngon lon kisah

Sidroe raja lon riwayat

Deungoe sahbat ulon peugah

Neu keurajeun amat sangat

Timue Barat meusyeuhu gah

Ulon peugah Daulat Ampon

Atoe turon lon seuleuah

Meunyoe raja cit ngon putroe

Dilon sidroe galak leupah

Nyan keuh raja nyang asliyah

Deungoe jinoe lon boh nan sah

Nama nanggroe Palimbang Syam

Usman Juhan nama raja

Nama putroe Cut Budiman

Meualeut nan deungon raja

Nyan keuh raja nyang samlakoe

Geu pujoe ban saboh donya

Sideh Nanggroe Syam neu keurajeun

Geunap buleun neu puasa

Hate teuh saleh tangan murah

Neubrie seudeukah jeu ulama

Kaya pih that hana sabe

Geudong meuritie tujoh laksa

Lingka kuta dum teudong-dong

Asoe di dalam intan meutia

Peudoe yakut dengan zamrut

Meungret ta bot han ek kira

Keubeu leumoe han peu peugah

That barullah meuploh laksa

Lampoh umong han peu kheun le

Beurandang pade meubanja-banja

Kapai di laot na peut ribee

Bandum teuntee hareuta raja

Seureutoh lapan ploh ra di baroh

Hukom neuboh khalifah dumna

Jeub-jeub nanggroe lam geupujoe

Tan siuroe gob ceureuca

Bah pih meunan Neubrie le Tuhan

Usman Juhan hate liya

Dawok neumoe uroe malam

Neu takot karam asoe donya

Neutakot salah nibak Tuhan

Bak peutimang rakyat dumna

Uroe malam beutangisan

Neutakot keu Tuhan Poteuraja

Ie seumayang nibak tuboh

Hantom teudoh dikutika

Neu puasa geunap uroe

Siseun gantoe siklep mata

Sunat peureulee han neutinggai

Sabe neukawai jeub kutika

Peugot meuseujid dum jeup nanggroe

Meunasah sagoe neuyue peuna

Tiep Jum’at jak u meuseujid

Neu peuteubiet sudeukah raja

Neuyue seumubeut jeub meunasah

Neubrie seudeukah dum ulama

Yoh masa nyan nanggroe lam aman

That bit seunang rakyat dumna

Judie taroh tan lam nanggroe

Reubot tajoe han sapat na

Ureung piep madat neuyue gasie

Nyang pancurie neuyue sula

Neu hukom rakyat rakan sahbat

Bak dua pat han tilek muka

Boh kayee le dalam nanggroe

Rata jeup sagoe meukeuba-keuba

Bagian 3

Pade pih jeut ureung meugoe

Siringget tabloe sigunca dua

Dumpeu mudah Tuhanku brie

Seubab Duli ade raya

Aneuk nanggroe tan neubrie buet

Tan meubacut neu enanya

Aneuk yatim neu peusayang

Neubrie rijang ngon beulanja

Ureung gasien dum neutulong

Jeup-jeup gampong soe nyang teuka

Raja meutuah that bit shaleh

Ucap taseubeeh hana reuda

Meusyuhurah jeup-jeup nanggroe

Lam geupujoe jeup-jeup donya

Raja Usman meugah u jeuoh

That tawajjoh keu Rabbana

Lapan blah thon neu keurajeuen

Teukeudi Tuhan Po nyang Kuasa

Bak simalam raja nanggroe

Deungon putroe neu eh dua

Malam Seunanyan buleun pih jroh

Neu siteuboh raja raya

Raja meutuah rhot maknikam

Nyan u dalam rahim nisa

Hingga suboh beungoh uroe

Beudoh jak manoe sigoe dua

Oh lheuh manoe neu seumbahyang

Makeun minom putroe ngon raja

Lheueh nibak nyan pinah hidang

Neujeb rijang ngon ie kahwa

Meunan sabe geunap uroe

Tuan putroe deungon raja

Poh dua blah oh cot uroe

Makeun putroe lom ban dua

Oh lheueh makan pinah hidang

Putroe tatang ngon ceurana

Makeun sireh saboh lipat

Bibi hu that sang peureuda

Teuma neu tren nyan u mideun

Bale di leuen teumpat seunia

Peudana Meuntroe teuka keunan

Hadap Sulthan beurang jan masa

Meunan sabe geunap uroe

Hana padoe jeup kutika

Putroe Budiman pih ka hamil

Putroe lape jeup kutika

Ureung nanggroe mee bu kulah

Keu Budiman Syah Putroe Muda

Jeup-jeup uroe hana padoe

Ureung nanggroe jak bak Raja

Mee bu kulah ngon bu gateng

Geupeusunteng Pitroe Muda

Habeh uroe sampoe buleun

Budak yoh nyan pandang donya

Dua blah buleun dua blah uroe

Budak sampoe jipandang donya

Rupa ceudah hana lawan

Aneuh pih agam samlakoe raja

Teungoh ji ek mata uroe

Sinyak jimoe meukuw’a-kuw’a

Uroe Jumeu’at Buleun Molod

Budak Cut Tuhan karonya

Elok pareh ban sinaroe

Dalam nanggroe hana ngon sa

Paleut jaroe jroh meukulam

Lidah hitam meukeumala

Mata hitam miseu nilam

Nyang puteh sang buleun purnama

Bulee kuneng buleun siuroe

Meucahya dhoe miseu qamar

Muka bunta bujue alang

Boh hidong ban cumboi meutia

Ulee tamse boh beurabang

Takue panyang oh meumada

Gukee puteh jampue mirah

Siulah sang bintang raja

Bagian 4

Ulee bahoe jroh that keumang

Raya u manyang dum geujangka

Boh beuteh na miseu jantong

Jroh that turon dum geusuda

Sapai dua jroh that turon

Di bahoe phon dum geusahja

Aneuk jaroe tiruet-tiruet

Ujong cut-cut uram raya

Ta eue badan jroh meutrieng blang

Raya u manyang keumang u dada

Raja Usman that sukaan

Putroe Budiman sijuek mata

Neu eue aneuk tamse bintang

Uleebalang indah rupa

Ureung jak eue jeup-jeup nanggroe

Bungong jaroe sajan jiba

Mee beureuteh deungon pisang

Ladom timon phang ngon timon saka

Peurumoh Geuchiek Peurumoh Meuntroe

Peutua Nanggroe judo Panglima

Judo bula mee sigeupang

Uleebalang mee sibahra

Nyang meung nama mee sitahe

Peurumoh Kadhi mee sifaha

Tujoh uroe Putroe madeung

Siploh krong meutamah areuta

Jeuoh ngon toe ureung datang

Peuseumbahan jimee keu Raja

Sireutoh lapan ploh raja di baroh

Bandum ka troh jak bak Raja

Tujoh uroe saket Cut Ti

Neu khanduri le Baginda

Neusie keubeue leumoe beulati

Ulama faki neuyue pinta

Geujak tueng ngon ahli nujum

Habeh bandum keunan teuka

Dum neuyue ek u meuligoe

Di seuramoe geuleung tika

Habeh geu ek ‘alim faki

Duek meuritie teupat banja

Geubeuot apui geuyue khatam

Geubeut sajan deungon do’a

Tahlil pih lheuh khatam hase

Geubaca le lom ngon do’a

Geurah jaroe lheuh Fatihah

Subhanallah lom geubaca

Teuma geubeuot ngon hidangan

Cawan pingan dalong pih na

Ladom geubrie ateuh dalong

Nyang manyang ureung meunama

Ladom geubrie lam pingan meuh

Jeuoh peungeuh jiplueng cahya

Nyang ladom lam pingan pirak

Bube nyang hak maseng jeumba

Nyang ladom lam pingan haloh

Nyang meureugoh biek Panglima

Nyang ladom lam pingan batee

Ban patot mee maseng kada

Nyang ladom geuleung bak tanoh

Sinan geuboh nyang hina-hina

Ladom geuboh lam capah kayee

Nyan keu geuthee hamba sahya

Geubeuot pih saboh sidroe

Mangat sampoe ho jimeuba

Geubot ngon sie saboh teumalang

Mangat rijang puleh hawa

Nyan keuh babad bangsa kureung

Hamba ureung peumeudeka

Sare habeh dum seuleusoe

Geurah jaroe bandum rata

Seungab siat dang pajoh bu

Dum na Teungku hana haba

Lheuh pajoh bu teuma dudoe

Bandum geuwoe ubak tangga

Syiah Ulama Bujang Meuntroe

Bandum geuwoe tinggai Raja

Bagian 5

Tinggai Raja deungon Putroe

Geunap uroe meuseu-suka

Padum lawet teuma dudoe

Hamil Putroe budak ka na

Siploh buleun dua blah uroe

Aneuk Putroe pandang donya

Buleun Muharram uroe Seunayan

Cut Budiman aneuk meukuta

Rupa ceudah hana bagoe

Ban mata uroe baro keulua

Kulet puteh ban buleun trang

Usman Juhan galak raya

Neu eue aneuk samlakoe ban

Usman Juhan neucom neuwa

Teuma madeung Tuan Putroe

Ureung nanggroe dum tron rata

Habeh ji tron ureung nanggroe

Bungong jaroe bandum jiba

Lagee nyang ka dilee puroe

Tuan Putroe ji peumulia

Lagee yoh na nyan aneuk phon

Nyoe pih meunan jikeurija

Hana guna panyang reunteh

Joroe keuboh manfaat hana

Bah teuduek nyan dilee siat

Meuwoe riwayat keu Putroe Muda

Padum lawet teuma meulheung

Ka lheuh madeung Putroe Jeumpa

Oh lheuh madeung Putroe Budiman

Deungoe taulan lon calitra

Budak neupeu-eh dalam ayon

Neu ek neutron dodi-ida

Jinoe lon peugah bhah lam ayon

Bak canek phon lon peuija

Allah hai do doda idi

Sinyak cut di doda-ida

Beurijang rayek Po Samlakoe

Peutimang Nanggroe geulantoe Abi

Troh teukeudi Tuhan sidroe

Gata Samlakoe peutimang Neugri

Allah hai do doda idang

Geulayang blang ka putoh taloe

Beurijang rayek Uleebalang

Lon rasie nan bak ayah droe

Ban dua droe gohlom boh nan

Jinoe kaman lon boh keudroe

Nyang tuha na kreh lam jaroe

Nyang adoe panah pusaka

Nyang tuha nama Syah Midan

Nyang adoe nan syah Gumiran

Hingga rayek seun sigeutue

Aneuk Teungku jitupeu bahsa

Hana panyang ulon peugah

Mate ayah tinggai bunda

Oh lheuh mate raja nanggroe

Deungoe jinoe lon calitra

Geupeeh tamboe geuseukok gong

Ureung gampong dum troh teuka

Geutot beude ngon meuriam

Ji tron rijang jak bak raja

Kadhi-kadhi Meuntroe-meuntroe

Raja nanggroe peulikot donya

Lheuh nyan teuma geuseumiyub

Ureung jak beut lakee do’a

Oh lheuh seumiyub raja meugah

Bulueng seudeukah bandum rata

Geubileung uroe raja hana le

Geuboh tahlil kifarat puasa

Kifarat seumbahyang ngon puasa

Le areuta Raja Nanggroe

Kifarat puasa ngon seumbahyang

Usman Juhan yue boh keudroe

Bah teuduek nyan haba kifarat

Jinoe lon peugah soai khanduri

Geusie keubeue dua siuroe

Ureung nanggroe galak hate

Bagian 6

Pakrie han galak Teungku meutuah

Hana payah mita raseuki

Oh ka hana le Poteuraja

Geudong dua ka soh han le

Dua geudong ringget habeh

Hana puleh weuh that hate

Pakrie han weuh Teungku meutuah

Gobnyan Khalifah nyang that ade

Raja ade ngon seunang that

Aneuk rakyat hantom meupake

Lheuh nyan teuma troh sireutoh

Geudong tujoh ka soh han le

Oh ka tan le Poteuraja

Tinggai aneukda ngon Putroe Ti

Susah hate nyan dua droe

Dawopk neumoe sabe-sabe

Bak simalam neumeulumpoe

Ban dua droe neujak lam gle

Bak nyum na sang neujak tapa

Syiah lam rimba meurumpok le

Ban meurumpok Teungku Syiah

Neu peugah bit susah hate

Ta dong sinoe aneuk meutuah

Peu na mudah makeun kubrie

Teuma neukheun insya Allah

Banta meutuah teukeujot le

Ban teukeujot bak meulumpoe

Lajue neumoe ie mata ile

Ban teukeujot ka beungoh uroe

Bandua droe jaga sigoe le

Oh ban jaga duek teupipo

Ban dua droe geumeujak lam gle

Seubab geujak wahe adoe

Peuseutot lumpoe tunue hate

Geulakee izin nibak bunda

Lon meung bungka izin neubrie

Izin lon brie he aneukda

Bandua tajak dalam gle

Ban neubeudoh neucok langkah

Ngon Bismillah neubaca le

Neujak le yoh nyan lajue bandua

Dalam rimba siat ka troh le

Ban sare troh bandua gobnyan

Syiah Beurahman meurumpok le

Ban meurumpok saleum geubrie

Geujak meuriti teuka keunan le

Assalamu’alaikum he samlakoe

Gata dua droe saleum lon brie

Wa’alaikum salam Teungku Panita

Kamoe bandua Tuhan teukeudi

Teungku neukheun deungon sunggoh

Ta jak piyoh keudeh bak Bale

Neujak Teungku neujok bungkoh

Ranub ta pajoh aneuk boh hate

Neupajoh ranub baro bicah

Idang ka troh keunan ukeu le

Oh lheuh ranub neusrah babah

Teungku peugah beek lalee le

Makeun aneuk bu sibabah

Mangat puleh grah beek thoe hate

Teuma neuseuot insya Allah

Teungku langkah keunoe sigra le

Han peu aneuk makeun lajue

Aneuk Teungku lon khanduri

Oh ban lheuh makeun bandua gobnyan

Geupeuhah idang lheuh rah jaroe

Marit Teungku Malek Beurahman

Ngon banta nyan lom he adoe

Wahe aneuk Meuntroe Intan

Lon meukalam ngon samlakoe

Pane nanggroe ho beujalan

Cut bintang beunta hareutoe

Umue baro muda seudang

Pakon bintang ta boh nanggroe

Soe nan ayah deungon bunda

Soe nan gata bandua droe

Bagian 7

Peu na hajat keunoe teuka

Lam rimba raya jinoe taboh droe

Teuma seuot Syah Gumirah

Deungoe Lon Tuan he Teungku droe

Nama nanggroe Palimbang Syam

Usman Juhan ayah kamoe

Nama ibu Putroe Budiman

Syah Midan aduen lon sidroe

Nama ulon Syah Gumiran

Bandua nyan aduen adoe

Oh ka hana le du lon raja

Lon seungsara jeup-jeup nanggtoe

Nyan keuh jeut jinoe keunoe teuka

Bak rasa peuseutot lumpoe

Cuba ta peugah lon deungoe nyata

Pa Bentara peu gata lumpoe

Gumiran Syah peugah lanja

Bak Aulia neu hareutoe

Habeh dumpeu neu calitra

Dumna haba yoh saboh roe

Seuot Teungku Po Bentara

Tuhan kaya nyang Samporeuna

Beek le aneuk tajak mita

Bandua ta duek jinoe ngon kamoe

Jinoe lon brie peu nyang hawa

Ube sikada nibak kamoe

Banta seuot insya Allah

Ban nyang titah Teungku jinoe

Habeh narit Banta dua

Teungku Tapa beudoh jak woe

Teuma neujak Syah Gumirah

Bandua nyan aduen adoe

Neutron Teungku di Balee raya

Lam guha gata lon puwoe

Neubrie do’a sianika

Neu peuhija Keumala Nanggroe

Syah Midan ngeut silagoina

Syah Gumiran nyang lisek tuloe

Dumna ileumee habeh neubrie

Jeut geu-uji sakti bagoe

Teuma jeut le bungong pade

Ji amai le hekeumat nyoe

Habeh bandum ka jeut neupham

Syah Gumiran lisek tuloe

Tujoh uroe tujoh malam

Dum sibarang ka seuleusoe

Neutoep pinto le Beurahman

Banta sinan teutap teukhoe

Beuthat han jeut di Syah Midan

Neuduek sajan peungon adoe

Teuma neuwoe di Beurahman

Troh taulan bak teumpat baroe

Teutap neuduek dalam taman

Karangan Banta dua droe

Teutap sunan dalam kaluet

Jitueng buet malam ngon uroe

Hana ingat le meubacut

Lam jiseubut ngon jipujoe

Nyang na leumah Tuhan ma’bud

Tan meukeusud laen jeup syoe

Trieng beutong peugot keu go lham

Trieng agam keu go peulintek

Amma ba’du wahe abang

Keunarang laen lon balek

Bit pih laen wahe abang

Saboh dan aduen ngon adek

Ulon peugah seun saboh dan

Neupham taulan narit nyang baek

Keumang-keumang bungong hasan

Bungong peukan bee jih tarek

Meunyoe jampu roh meusikhan

Payah rakan bak ta tilek

Haba lon nyoe meumeuoh cit tan

Na bagoe ban keundoe tarek

Miseu ureung hawa mancang

Sikrak nyum sang ta pajoh ek

Bagian 8

Meung le singke jampu reuhang

Meunan abang bak lon tilek

Sabang nanggroe wahe abang

Luah han ban wahe adek

Rakyat ramee hana macam

Ngon pahlawan tarek-tarek

Keurajeun sinan Said Ba’dan

Meugah han ban lom ngon tarek

Bak ujong gunong Buket Jiran

Tujoh bulan jak wahe adek

Deungon Nanggroe Syam Palimbang

Dua thon pasang guda tarek

Meulinteung gunong Buket Jiran

Deungoe lon kheun ban wahe adek

Si rot baroh Syam Palimbang

U tunong nyan lom he Nyak Cek

Samat teungoh Buket Jiran

U gaki nyan Padang Tasek

Nyan keuh Nanggroe Padang Safaran

Said Ba’dan raja nyang tarek

Raja meukawen pih na sidroe

Ureung binoe that ceureudek

Rupa elok hana macam

Indra Lailan nan nyang baek

Raja Ba’dan peukong nanggroe

Lam meuligoe Putroe hai adek

Aneuk raja pih na sidroe

Ureung binoe jroeh lagoi ek

Lagi pih na keusukaran

Lon peugah ban bacut hai adek

Manyak jimoe uroe malam

Sikeujab han ji iem adek

Neu mita ubat Putroe Intan

Jih meuran raya lagoi ek

Poteuraja gundah han ban

Indra Lailan saban euncek

Neu meukaoy uleh raja

Ratna Indra Cut nyang baek

Beu rijang puleh he bijeeh mata

Lon meunazar putroe cantek

Nama Teungku Syiah Tapa

Jameun masa ka he adek

Bak ujong Naggroe Padang Safaran

Aulia sinan nyang that tarek

Sinan geuduek dalam guha

Bak neutapa wahe Nyak Cek

Keunan kaoy Putroe muda

Ratna Indra putroe cantek

Sireutoh keubeu limong ploh unta

Poteuraja kheun he euncek

Bak rot tajak bak Aulia

Sidroe raja sinan nyang tarek

Sibuleun jak pasang guda

Nanggroe raja wahe adek

Rap ngon gaki Buket Jiran

Sinan taulan raja nyang tarek

Nama raja deungoe lon kheun ban

Harun Makam nan he adek

Laen nanggroe wahe taulan

Nyan jipeunan Padang Tadek

Sireutoh tujoh takloek keunan

Harun Makam nyang that tarek

Nyan Aulia bak ceu nanggroe

Ta pham adoe bak Padang Tasek

Nam uroe jak leupah keunan

Jeuoh nanggroe nyan Padang Tasek

Jih ka dilee peukeumah droe

Koy Putroe wahe adek

Harun Makam jipreeh sinan

Geuba Putroe nyan nyang that tarek

Meunyoe leupah bak nanggroe nyan

Ji cok Putroe nyan wahe adek

Bak ceu nanggroe jipeugot kuta

Ji preeh geuba Putroe cantek

Ka neutupeu le Sulthan

Said Ba’dan sangat lisek

Bagian 9

Meunyoe han ek bak peutheun prang

Putrie bintang jicok hai adek

Kareuna raja Harun Makam

Meugah han ban lagi tarek

Nyan keuh seubab ek jeut paloe

Tuan Putroe soe ek

Aneuk raja aneuk Meuntroe

Dalam nanggroe wahe adek

Soe ek peulheuh kaoy Putroe

Nyan keuh lakoe Putroe cantek

Tan kuasa pih meusidroe

Teuduek ohnoe dilee euncek

Puteh-puteh bungong geutoe

Seupot uroe cantek-cantek

Deungoe lon kisah laen bagoe

Deungoe adoe narit nyang baek

Ladom hawa pajoeh bada

Ladom suka pajoeh timpham

Ladom galak teungkulok sutra

Ladom hawa ija bukam

Nyang ladom ngui gleung suasa

Taeu ija macam-macam

Sugoet mirah taeu di ulee

Jisoek bajee dum potongan

Watee jijak teuhah ulee

Hana malee inong jalang

Lon keumarang goh biasa

Lon peuhah haba macam-macam

Bah keuh dumnan dua banja

Putroe muda lon peuriwang

Deungoe lon peugah Putroe muda

Aneuk Raja Said Ba’dan

Nama Putroe Ratna Indra

Aneuk Cutda Indra Lailan

Teutap sinan lam istana

Meuseun-suka ngon Dendayang

Sikureung droe muda-muda

Ratna Indra Putroe Seudang

Geunap siploh bak keunira

Sang meutia saboh karang

Rupa elok bak bintang kala

Cahya muka sang buleun trang

Soe nyang kalon Ratna Indra

Teuka hawa le di sinan

Umue baro teungoh muda

Lapan thon ka wahe abang

Badan bulat keuing linteng

Hana bandeng ngon teuladan

Soe nyang kalon ji keureuleng

Cut linteng jroh han macam

Muka bunthok lipeh bibie

Juhari Putroe aneuk bangsawan

Soe nyang kalon Putroe Siti

Meugule reubah le pansan

Oek teuh hitam jroh meutapee

Dan lagi meung patah manyam

Aneuk raja aneuk Kadhi

Beurahi keu Putroe muda

Gigoe lintek hana sakrie

Dan lagi puteh dum intan

Ngon peukaian meuh peulangi

Dan lagi intan meukarang

Gleung bak jaroe ngon bak gaki

Ikai meuduri anteng meukarang

Ngon Dendayang sikureung droe

Ngon Putroe siploh he abang

Teutap sinan lam meuligoe

Sajan Putroe Muda Seudang

Laen jinoe lon hareutoe

Deungoe adoe wahe abang

Said Ba’dan lon peuduek ohnoe

Deungon Putroe dan Dendayang

Tarek layeu boet keumudoe

Ta pasoe layeu kuangkang

Ulon peugah nyang saboh roe

Lon peugoe keu muda seudang

Bagian 10

Umue lhee thon dalam guha

Troh teuka Syiah Beurahman

Neu buka le deungon pintoe

Neu laloe keudeh u dalam

Banta dua hana neuthee

Syuko keu guree keu nekmat Tuhan

Syah Midan hana troh tapa

Gumiran ka samporeuna

Syekh Beurahman peurab lanja

Neucok Banta ngon Syah Midan

Teuma neucok Syah Gumiran

Keudeh u luwa peuteubiet rijang

Syah Gumiran neusrah gaki

Neutitie u Balee Gambang

Teuma neuduek ateuh keurusi

Dan lagi deungon Syah Midan

Beurahman kheun nariet pantah

Neupeugah bak Syah Gumiran

Wahe aneuk ka seb tapa

Tuhan Esa nyang brie simpan

Jinoe aneuk Banta Muda

Bandua deungon Syah Midan

Ta theun lon plah paleut jaroe

Lon pasoe sakti meukarang

Gumiran theun pantah-pantah

Jaroe neuplah le Beurahman

Lheuh nibak nyan teuma dudoe

Ka neupasoe le Beurahman

Jan meusukee uroe dudoe

Neu teupuek jaroe nanggroe karam

Ka neuplah pha teuma dudoe

Neupasoe laen nibak nyan

Aneuk Raja na tujoh droe

Taklok keunoe bak Beurahman

Bak sidroe-droe wahe adoe

Lhee reutoh droe Uleebalang

Sidroe Panglima bak keunira

Siploh laksa rakyat rakan

Han soe tu’oh peu calitra

Rakyat raja dum sibarang

Ta deungoe ulon hareutoe

Nyang tujoh droe lon peugah nan

Peutama phon Zinggi Diwi

Dan lagi Ahmad Geuritan

Meuploh laksa nyang simpati

Meuploh kati Panglima Prang

Laen nibak nyan Harun Ali

Keu eumpat lagi Hari Buwan

Lagi gagah ngon beurani

Hardan Ali Hari Buwan

Nyang keulimong Hasan Pari

Keunam geurasi Ratna Lukman

Nyang keutujoh Raja Keurani

Juwah miseu uleu biram

Keunan datang dum jilari

Jan neupangge le Beurahman

Hana sidroe jimeu ungki

Zinggi Diwi Hari Buwan

Troh keunan jipeurangi

Beuot jari bak Beurahman

Teuma marit Zinggi Diwi

Dan lagi Ahmad Geuritan

Ampon Tuanku meuribee kali

Di yueb gaki Po Janjongan

Peu na hajat wahe Duli

Nanggroe siri neu keumeung prang

Beurahman seuot tanyong Zinggi

Bukon nanggri lon keumeung prang

Nyang lon pangge gata keunoe

Deungoe kamoe dum sibarang

Kareuna gata lon brie jinoe

Oh jipangge le Gumiran

Uroe dudoe beek meuungki

Aneuk kami Syah Gumiran

Teuma seuot Zinggi Diwi

Dan lagi Ahmad Geuritan

Bagian 11

Hana patot lon meuungki

Hoe nyang neubrie ulon tuan

Ban tujoh kamoe cit syeedara

Sapeu haba dum sibarang

Lheuh nibak nyan neucok cumboi

Jamaloi peuseumbah rijang

Ban tujoh droe kalam cumboi

Neu pasoe lam pha Gumiran

Teuma neucok saboh malakat

Rupa jroh that hana macam

Sinan teubiet peu ta kasad

Lam malakat meutia nyan

Oh neupeuduek ateuh bumoe

Teudong jinoe Kuta Reuntang

Mideun dalam ngon meuligoe

Dum sinaroe ngon meuriam

Lam istana Tuan Putroe

Dum sinaroe ngon Dendayang

Ngon pasukan kawai meuligoe

Tujoh droe wahe e taulan

Beurahman brie soek bak jaroe

Galak han soe muda seudang

Hingga abeh ka seuleusoe

Dum sinaroe neu seumulang

Di Syah Midan teuduek keudroe

Cit keu adoe geu seumulang

Kareuna gobnyan tan troh tapa

Cit ka kada nibak Tuhan

Meusapeu tan neu peujaroe

Teuduek keudroe hana kalam

Nyang aulia bak ceu nanggroe

Janji Putroe peulheuh naza

Leupah keunan Pocut Putroe

Saboh Nanggroe Harun Makam

Han that jeuoh intan peudoe

Oh nam uroe guda pasang

Meung jipreh troh jiba Putroe

Bak ceu Nanggroe Kuta Reuntang

Soe ek peutroh hajat Putroe

Nyan keuh lakoe Ratna Indra

Aneuk Kadhi aneuk Meuntroe

Dalam Nanggroe Padang Safaran

Tan kuasa pih meusidroe

Kadhi Meuntroe Raja-raja

Kareuna Raja Harun Makam

Pahlawan limong ploh dua

Soe nyang hajat Putroe Intan

Ta lawan prang Raja raya

Teuma seuot Syah Gumiran

Pakon meunan ji angkara

Teungku hanmee seukalian

Putroe Intan Ratna Indra

Beurahman seuot teuma nyoe ban

Neu peugah nyan bak Gumiran

Nyang jeut meunan Putroe Intan

Raja Ba’dan hana ridha

Ka dilee kon cit ka meunan

Harun Makam raja raya

Nyang jinoe geupreeh troh datang

Geucok rijang Ratna Indra

Bak peunyuem lon han ek lawan

Raja Ba’dan han kuasa

Rakyat kureung Raja Ba’dan

Harun Makam le that tantra

Jinoe aneuk tajak keunan

Tueng Putroe nyan uleh gata

Deungon Raja Harun Makam

Ta lawan prang gata dua

Menyoe kon meunan Meuntroe Intan

Bukon sayang Ratna Indra

Bandua deungon Syah Midan

Jak peungon prang raja raya

Gumiran jiseuot meunoe

Di kamoe hana kuasa

Kamoe dua meujak keunoe

Kon keu Putroe meujak mita

Bagian 12

Meucre gampong lon boh nanggroe

Hajat kamoe meujak tapa

Parang tabrie ngon makanan

Peu tanaman dum neupula

Boh keumiri ngon bak jagong

Boh gadong ngon boh keutila

Syah Midan duek nibak rangkang

Sajan Pawang he syeedara

Beungoh uroe jak teumeubang

Woe bak rangkang ph ka sinja

Geunap uroe sabe meunan

Teuduek oh nan saboh haba

Ladom galak boh timon phang

Ladom abang timon saka

Ladom galak teubee gadeng

Ladom meusyen teubee kama

Ladom galak keu boh mancang

Ladom taulan boh keupula

Ladom galak keu boh rambot

Ladom patot keu boh suta

Meunan-meunan wahe abang

Rayek seudang agam dara

Ulon peuduek Syah Gumiran

Teutap sajan Pawang Rusa

Jinoe meugisa keu Raja Ba’dan

Bak simalam leumah rasia

Raja neu-eh lam meuligoe

Sajan Putroe Lailan Indra

Bak simalam neu meulumpoe

Na nyum sidroe Syiah teuka

Na nyum neu ek u meuligoe

Keunyuet asoe raja raya

Rupa hibat hana bagoe

Mumat jaroe deungon raja

Teuma dudoe neukheun meunoe

Dalam lumpoe leumah nyata

Wahe Raja Said Ba’dan

Deungoe lon tuan he syeedara

Na dua droe aneuk Sulthan

Nibak rangkang Pawang Rusa

Sidroe geuhoi nan Syah Midan

Nyang adoe gobnyan Syah Gumiran

Neu peukawen deungon Putroe

Meuhan nanggroe keunong bala

Meuhan neutueng keu judoe Putroe

Tutong nanggroe musem khueng teuka

Aneuk raja ban dua droe

Neutueng sidroe dalam dua

Raja seuot dalam lumpoe

Aneuk kamoe goh lheuh naza

Seulama goh hajat sudah

Han jeut nikah Putroe Muda

Teungku seuot teuma meunoe

Dalam lumpoe raja raya

Oh lheuh nikah Tuan Putroe

Peulheuh dudoe kaoy naza

Han jeut meunan wahe Teungku droe

Keu judo Putroe raja raya

Kareuna Raja Harun Makam

Meugah han ban he panitia

Ampon Daulat beek susahan

Ji lawan prang le Gumiran

Ulon teuh nyoe pih angat that

Sayang lon that ke Putroe Muda

Nama ulon wahe Sulthan

Malek Beurahman nyan geuboh gla

Ban neu deungoe haba meunan

Suka han ban hate raja

Oh teukeujot beungoh uroe

Raja Nanggroe neutron lanja

Ban sare troh u leun meuligoe

Neu ek jinoe u Balee Raya

Teuma neuhoi ilee ngon bujang

Tron di manyang sabda raja

Jibot jaroe dua tangan

Hadap Sulthan raja raya

Bagian 13

Peu ek seumbah Datok Bujang

Tron lom yoh nyan sabda raja

Ta tot beude ngon meuriam

Sigala alam ta seuranta

Ban Bujang deungoe sabda meunan

Tot meuriam ngon ramtaga

Habeh jitron Uleebalang

Ka peunoh blang rakyat dumna

Tujoh ploh raja taklok keunan

Ubak Ba’dan raja nyang raya

Habeh jitron bandum keunan

Junjong Sulthan Raja Meukuta

Jibeuot jaroe dua tangan

Bak Sulthan turon sabda

Neu meusabda Raja Ba’dan

Uleebalang deungoe dumna

Ta deungoe he Uleebalang

Dum sibarang raja raya

Nanggroe bahya rab ka datang

Bak lon beuklam leumah rahsia

Na nyum teuka Malek Beurahman

Ubak lama neu peuhaba

Na dua droe aneuk Sulthan

Nibak rangkang Pawang Rusa

Ta peukawen deungon Putroe

Meuhan nanggroe keunong bala

Meunyoe ta tueng nyan pih paloe

Kaoy Putroe goh seumpureuna

Teuma seuot Uleebalang

Ban nyang reumbang bak sarpada

Meunyoe han nyan pih paloe

Tutong nanggroe musem khueng teuka

Jinoe Tuanku beek jeut sukaran

Neutueng rijang aneuk raja

Meunyoe jicok le Harun Makam

Ta lawan prang raja raya

Keumah janji sapeu padan

Muda Seudang geutueng sigra

Keumah pakat Uleebalang

Teubiet u blang rakyat dumna

Rakyat rame hana macam

Panglima Prang meuploh laksa

Peut droe Meuntroe jak tueng bintang

Laen rakan preeh di sana

Na sikhan uroe geubeurjalan

Troh bak rangkang Pawang Rusa

Oh troh keunan ubak Pawang

Marit rijang le Peurdana

Na dua droe ureung dagang

Nibak rangkang ladang gata

Teuma seuot Teungku Pawang

Ka lam hutan tamong rimba

Bujang beungeh keu Lem Pawang

Pakon meunan buet di gata

Hana ta thee aneuk Sulthan

Muda Seudang nyan bandua

Meuntroe yue jak jih lam hutan

Buet han reumbang ta keurija

Ta puwoe keunoe pantah rijang

Ban Seudang nyan bandua

Lem Pawang jak that teumakot

Bak teuot jipeugot geumpa

Geujak u keue roh u likot

Hate teumakot Pawang Rusa

Pakon teuma jeut teumakot

Seubab neudhot le Peurdana

Neujak u keue ngieng u likot

Ka meusangkot ateuh rimba

Teutob gaki luka teuot

Siluweu rot han neukira

Oh sare troh bak Gumiran

Marit rijang Pawang Rusa

He Adek Cut Meuntroe Intan

Ta tueng Pawang dalam rimba

Seuot Banta teuma nyoe ban

Pakon meunan Pawang Rusa

Bagian 14

Han lon tunee ureung datang

Nibak rangkang na silaksa

Geudhot ulon meugurantang

Yoe lon tuan miseu geumpa

Teuma geutanyong le ureung nyan

Gata bintang geupareksa

Geuyue jak tueng bak ulon tuan

Tawoe rijang gata bandua

Keudeh tawoe ubak rangkang

Meuhan datang keunoe teuka

Banta seuot narit Pawang

Panee ureung wahe bapa

Han lon tunee wahe bintang

Nyum lon tuan rakan raja

Hana got deuh ulon pandang

Geuyue rijang jak tueng gata

Ban Banta deungoe narit meunan

Cok ngon parang geuwoe lanja

Oh sare troh ubak rangkang

Beudoh Bujang ji peumulia

Jibot jaroe dua tangan

Bak Gumiran ji meuhaba

Ampon Tuanku Syahi Alam

Lon surohan nibak Raja

Peurintah Raja Said Ba’dan

Ayah Tuan Ratna Indra

Neuyue jak tueng Syahi Alam

Bak ulon tuan pantah sigra

Beutroh jinoe le u dalam

Na sajan lon meuseureuta

Banta deungoe narit meunan

Seuot rijang Syah Gumiran

Han peu salah wahe abang

Ban nyang reumbang nibak gata

Teutapi na bacut lintang

Ulon tuan mante rimba

Nibak peunyuem ulon tuan

Neu surohan ubak raja

Neuyue tueng le Raja Ba’dan

Na piasan neukalon nyata

Siluweu brok sangkulok tan

Na miseu ban himbee rimba

Pakrie galak di Sulthan

Kulet badang sang lutong kra

Peukayan brok nibak badan

Piasan neu kalon liya

Teuma seuot Datok Bujang

Beek he meunan tanglong donya

Beuthat gob kheun keu piasan

Raja Ba’dan sangat suka

Dua lhee goe seunda wayang

Lem Pawang ulon calitra

Bujang marit ngon Gumiran

Lem Pawang meubleek-bleek mata

Ngon teumakot hai adoe jroh

Takot geupoh uleh raja

Susah meutamah bak neupike

Dalam hate Pawang Rusa

Teuma meunoe lom meulintah

Allah Allah rugoe raya

Ulon sidroe keunong tipee

Hana lon thee aneuk raja

Jikheun droe samblang geutah

Nyoe ka meugah raja nyang raya

Ulon tanyong kareuna Allah

Han geupeugah nyang sibeuna

Adak lon thee ureung meugah

Lon peuindah that mulia

Hana ulon yue jak ceumeucah

Beek that payah aneuk raja

Kadang ulon pih ek meugah

Seubab payah lon useuha

Jinoe pakrie buet ka leupah

Allah Allah rugoe raya

Ulon sidroe hana tuah

Ngon teulah apoeh keupala

Bagian 15

Pawang Rusa teutap teulah

Gumiran Syah lon calitra

Bujang peu-ek ateuh gajah

Syah Midan ngon Syah Gumiran

Deungon rakyat dum bahrullah

Jiwoe pantah ubak raja

Jipeeh tamboe palu geundrang

Arak Tuan Raja Muda

Ban sare troh u teungoh blang

Ampeung rijang Syah Gumiran

Jitot beude ngon meuriam

Muda Seudang ngon syeedara

Ateuh gajah meubalohan

U dalam peutamong lanja

Oh ka sampoe troh u dalam

Raja Ba’dan neutron lanja

Watee meurumpok ngon Muda Seudang

Neudrob rijang neucom neuwa

Gumiran Syah pih neu sujud

Bak teuot neuseumah raja

Teuma Raja mat bak jaroe

Neu puwoe Banta bandua

Mat bak jaroe Muda Seudang

Peu-ek rijang u Balee Raya

Geupeuduek bak keurusi intan

Hamparan meuh ngon peurmata

Raja-raja dum seukalian

Raja Ba’dan sajan seureuta

Ateuh keurusi dum sibarang

Hadap bintang Syah Gumiran

He Aneuk Cut Bungong Tanjong

Cut Tanglong Muda bahlia

Neujok bungkoh le Raja Ba’dan

Gumiran neusambot sigra

Pajoh ranub aneuk bak lon

Ranub leupong tawo buga

Beek ta kira he panyot tanglong

Kareuna ulon ureung hina

Teuma seuot bungong bakong

Sue meualon sang biola

Krue seumangat Daulat payong

Bak ulon ateuh jeumala

Na bak Daulat tan bak ulon

Umue peut thon ka lam rimba

Han peu aneuk pajoh bakong

Putik sukon bungong jeumpa

Di Syah Midan teuduek keudroe

Nyang that bakoe Syah Gumiran

Hana rancak bak meututo

Teuduek tahe hana haba

Keumang-keumang bungong kundo

Kuneng ijo bungong jeumpa

Cempala tujoh sikawan

Cicem subang poe meugisa

Oh lheuh ranub Muda Seudang

Bungkoh neupulang ubak raja

Teutap sinan Muda Seudang

Sajan Ba’dan Raja raya

Neungui suasa pudoe ngon intan

Meujampue sajan ngon meutia

Nyang bunoe kon seungab kalam

Han ek jan lon calitra

Bah le jinoe lon peuriwang

Geutot meuriam geunta donya

Jipeeh tamboe palu geundrang

Uleebalang hate suka

Rakyat jitron rab peunoh blang

Lewat surohan bak Raja-raja

U meulason teubee meu on

Jak bak ulon Daulat Raja

Raja suroh Uleebalang

Peu leubeehan peumulia

Han ek peugah dum piasan

Hingga malam uroe sinja

Geu peuhase lam meuligoe

Le Putroe Cut Lailan Indra

Bagian 16

Geuleung tika meuploh kudoe

Kasab sujoe meupeureuda

Di ateuh nyan kasoe tilam

Bak tidoran aneuk raja

Bantai suson tampok intan

Keurawang ngon kasab sutra

Lom geupeuduek ngon hamparan

Di ateuh nyan meuh geuteumpa

Aneuk langet di ateuh nyan

Tiree saja bandum lingka

Ayu-ayu dum geupasang

Manek intan ngon meutia

Sare hase sileungkapan

Buet Cut Intan Lailan Indra

Bak teumpat eh Muda Seudang

Raja Ba’dan peumulia

Teuduek siat kaso tilam

Raja Ba’dan neusalen Banta

Peukayan jroh peudoe intan

Han peu taulan lon calitra

Ulon piyoh dilee siat

Jaroe keurawat he Teungku beh

Teuduek siat Syahi Alam

Raja Ba’dan ngon Banta dua

Jinoe lon kisah Cut Bangsawan

Aneuk Lailan Ratna Indra

Ban jideungoe troh Cut Abang

Putroe Intan hate suka

Cit ka jithee buet Sulthan

Raja Ba’dan leumah rahsia

Habeh maklum dum sibarang

Peurbuatan Du jih Raja

Cit ka dilee ka geubrie pham

Raja Ba’dan keu Putroe Muda

Ka jingui le ngon peukayan

Peudoe intan ngon meutia

Seb keuh dumnan peudoe intan

Dudoe rakan lon calitra

Puliek pineung panca lugam

Masak plah nam muda plah dua

Jicok ranub boh lam bate

Ka hase Cut Ratna Indra

Jiboh ngon ie lam seurahi

Ngon srah gaki Syah Gumiran

Banta geupeu-ek u meuligoe

Aduen ngon adoe dua syeedara

Neujok ngon ie lam seurahi

Ngon srah gaki Syah Gumiran

Oh sare lheuh neusrah gaki

Laju neutitie u ateuh keuta

Keurusi meuh peudoe intan

Di ateuh nyan neuduek Banta

Oh neuduek di ateuh tilam

Ban buleun trang yoh purnama

Na sikeujab teuma dudoe

Ji tron Putroe jak seumapa

Ngon karah meuh nibak jaroe

Cut Putroe peutron keu Raja

Ka jiseumah nibak teuot

Puan jijok keu Cut Banta

Lheuh nyan teuma putik rambot

Langkah jisurot jibrie mulia

Hana kalam rot deh rot noe

Ji ek Putroe u istana

Oh sare troh u meuligoe

Jiduek keudroe ateuh keuta

Teuduek siat Tuan Putroe

Di seuramoe lon calitra

Geubeuot le ngon makanan

Di likot nyan idang raya

Ka geubeuot deungon jaroe

Di seuramoe ureung tuha

Peusinget gupet basah jaroe

Makeun samlakoe bu ngon sira

Kru seumangat Teungku Meuntroe

Bak kamoe ateuh jeumala

Bagian 17

Cit beusigoe sajan kamoe

Peurab keunoe makeun sama

Han peu salah bungong geutoe

Di kamoe baro ban leungka

Gumiran Syah neurah jaroe

Nekmat katroe taci rasa

Neu pajoh bu sibuju jaroe

Makeun ngon droe ngon syeedara

Oh lheuh makeun Uleebalang

Pinah idang le Peurdana

Lheuh nyan teuma peudoe intan

Duek bak tilam kaso sutra

Peukayan meuh nibak badan

Miseu intan na bandua

Bandua indah hana ban

Nyang leubeehan Syah Gumiran

Nibak rupa oh ta pandang

Han tiwasan nibak mata

Teutapi na bacut alang

Di Syah Midan kureung bahsa

Habeh teungeut lam meuligoe

Dum sinaroe Raja-raja

Ngon dendayang sikureung droe

Sajan Putroe Ratna Indra

Banta neu-eh di seuramoe

Cut Putroe di dalam kama

Habeh teungeut dum sinaroe

Jaga sidroe Putroe Muda

Lawet lawan teuma dudoe

Di sinoe na bacut haba

Ratna Indra lam meuligoe

Di seuramoe Syah Gumiran

Hana teungeut Tuan Putroe

Hate wawoe dalam dada

Seubab Banta na dua droe

Tuan Putroe hate gila

Bak jikira tanglong nanggroe

Ka na lakoe Ratna Indra

Teutapi hana lom meusoe

Meuhat sidroe dalam dua

Meunyoe ek leupah hajat sampoe

Teutap Putroe troh an tuha

Meuhan leupah wahe adoe

Ka na lakoe bak jikira

Han seungab hate bungong geutoe

Ji takot paloe akhe masa

Kadang han ek geu peusampoe

Hajat kamoe bak Aulia

Kareuna Raja Harun Makam

Meugah han ban ateuh donya

Meunyoe han ek geulawan prang

Ulon tuan that seungsara

Kadang-kadang teuma geuwoe

Tinggai kamoe tok seulamanya

Kareuna janji hana sampoe

Lon yue ek keunoe lam istana

Bah lon marit kaman jinoe

Deungon kamoe Syah Gumiran

Tajak beutroh taeu keudroe

Beek jeut rugoe teulah raya

Meunan pike Tuan Putroe

Teuma dudoe meunoe kira

Teutapi na bacut paloe

Malee kamoe buka haba

Kareuna gobnyan ban trok baroe

Teuma meunoe lom jikira

Meunyoe malee bak ta peugoe

Meuhat dudoe deuk ta rasa

Meunan pike bungong kumbee

Peu lon malee gobnyan dua

Meukon ulon yue ek keunoe

Han ek sampoe dum peukara

Geuploh bungkoh di seuramoe

Cut Putroe keuting ceurana

Di Cut Banta ube buet droe

Kon ngon Putroe geumeuseunda

Bagian 18

Pajoh ranub Syah Gumiran

Cut Intan hana le haba

Geukue bungkoh di seuramoe

Cut Putroe buka ceureupa

Geunap lhee seun lageum Cut Ti

Neu tupeue le Syah Gumiran

Rot deh rot noe ban dua si

Peungaroe lisek lagoina

Syah Midan eh han beurheunti

Han neutukri reusam Banta

Tarek bantai eh Gumiran

Cut Intan hana le haba

Yoh awai phon hana wayang

Dudoe Tuan neumeuseunda

Cit neusaja Muda Seudang

Putroe ragam Ratna Indra

Eh Gumiran nyang badui

Putroe Ti nyang lisek raya

Po Banta ka jamok pajoh

Cut Haloh ka pijet seuba

Bandua droe sabe utoh

Miseu puyoh ngon cempala

Syah Gumiran peuhah limbot

Putroe Cut ji gulong tika

Cit neusaja Banta Saidi

Neukalon krie Putroe Muda

Cut Putroe hana jeut tacie

Narit takwi ji tupeu makna

Banta Muda ka neutik gaki

Putroe Ti ka jiseumpom pha

Teuma neu eh Syah Gumiran

Cut Intan neubeudoh lanja

Bandum lageum wahe abang

Dumpeu trang neutupeu bahsa

Meupeu lageum meukrie macam

Meupeu lagham dalam bahsa

Nyan dum digob geumeuwayang

Di Syah Midan neu tupeu hana

Ratna Indra nyang badui

Nyang pancuri Syah Gumiran

Dalam hate Putroe Bintang

Na nyum sangka reuloh donya

Nyang jeut meunan wahe abang

Malee Bintang buka haba

Han geutem ek euntreuk kadang

Malee Tuan deungon Banta

Beuthat pih meunan lon meukalam

Kri nyang reumbang euntreuk teuma

Putroe jibeut ngon hikeumat

Pansan rakyat troh bak Raja

Nyang ta teungeut ureung lhee droe

Cut Putroe jibuka haba

Tangah u langet jileung jaroe

Teuma dudoe meu seumpeuna

Ya Illahi waya Rabbi

Po lon neubrie ban lon pinta

Bijeeh lon tanom beumeujadi

Pucok neubrie beumeucula

Lheuh nyan teuma rahob jaroe

Jikheun meunoe sikrak haba

Bak rubek gle papeun peutoe

Kayee jatoe papeun behtra

Neu ek Cut Abang u meuligoe

Intan pudoe tanyong haba

Meunan jikheun buleun peunoh

Ka mehmoh lam hate Banta

Syah Midan neu ceunggok ulee

Baro neuthee Putroe meuhaba

Nyang bunoe kon hana neutupeu

Hana neuthee dum nan seunda

Beuthat pih meunan hana neuseuot

Neutarek limbot neupet ngon mata

Han jeut balah di Syah Midan

Syah Gumiran neuseuot sigra

Han lon jeut ek wahe sambinoe

Kareuna kamoe jamee ban teuka

Bagian 19

Ban Putroe deungoe haba meunan

Lom jimarit miseu nyang ka

Bak meuluweuk timong di gunong

Behtra tamong sijudo dua

Neu ek Cut Bang u rumoh inong

Lon meutanyong sipatah haba

Ban Banta deungoe Putroe taleh

Cit ka teupreh dum geusahja

Meurante timoh di gunong

Anyot bungong  u kuala

Han lon jeut ek u rumoh inong

Salah meukeunong bak teumpat gata

Keumang-keumang bungong rihat

Nyang mirah that bungong jeumpa

Tuanku ek keunoe siat

Na peu hajat tanyong hamba

Pulo pinang manok meususoh

Di Meulaboh na Geudong Cina

Meuna hajat neu marit ngon lon

Keunoe ta tron sikleb mata

Teuma seuot Panyot Tanglong

Ngon panton sikrak ji kata

Bateung rubek gunong kayee lhon

Urot rambong pucok Krueng Woyla

Pucok Krueng Jantho batang keumunyan

Kayee di sinan dum bak sala

Lon yue tron keunoe tayue ek keunan

Beuizin Intan dilon kugisa

Bukon sayang ureung teumarah

Baling patah papeun binasa

Yoh di gampong neutem meulangkah

Oh sampoe sudah neu keumeung gisa

Ureung tak geutah geutueng keu bohbhan

Ureung suet lulan geurawe sutra

Nibak cut meugleung bak peunyum lon

Sang sang ulon hana mulia

Krue seumangat Cut Abang payong

Mulia bak lon Tuanku Raja

Meunyoe meunan he adek payong

Pakon han ta tron meusikleb mata

Lagi kamoe ureung meudagang

Patot Intan gata jak sapa

Ban Putroe deungoe haba meunan

Teupike yoh nyan Ratna Indra

Bahle lon tron jinoe kaman

Neu ek pih han Banta Muda

Meunan pike putik rambot

Peu lon takot gobnyan dua

Rasa cit patot lon puteuntee

Dengon jamee nyang that mulia

Sapa jamee roh buet sunat

Nabi Muhammad nyang meusabda

Soe nyang pubuet ban amanat

Uroe akhirat raya that pahla

Meunan pike puteh lumat

Lalu jimat ngon ceurana

Cok dandawan mat bak jaroe

Suliek jinoe pineung muda

Suliek pineung panca lugam

Masak plah nam muda plah dua

Ji cok ranub jikoh tangke

Ka jiboh le lam ceurana

Cok keurandam peuneugot Syam

Keurawang intan ngon meutia

Cok keutumbu dua judo

Baro-baro ban lheuh geuteumpa

Saboh keutumbu boh jeumuju

Saboh keutumbu boeh boh pala

Saboh keutumbu bungong lawang

Ji rancang ngon gapu naga

Jiboh ranub surang sareng

Sang geurubeng papeun behtra

Teuma jicok bungong lawang

Jilayang bak pineung muda

Keuieng leunteng baho keumang

Ji meugeutang ngon ija sutra

Bagian 20

Oh ta kalon indah han ban

Sang lakuan Gaseng Jawa

Ranub kuneng jroh peureuseh

Ji pileh le Putroe Muda

Tangieng u yueb tangke han deuh

Tangieng u ateuh tangke hana

Maken tangieng samat teungoh

Han ta tu’oh mita punca

Teuma jicok bungong lawang

Ji labang ban siseun lingka

Pineung muda dum jipateng

Ji puseng bakong meulila

Di Aceh kon tanggoe u Kleng

Hana bandeng ngon ta peusa

Jicok bacut minyeuk gahru

Jilabo bak on ranub teuma

Rot luwa keureutah teucang

Jikarang bungong peureuda

Ngon karah meuh sang jilinggang

Buet Cut Intan Ratna Indra

Ji keumeung brie keu Cut Abang

Cut Intan hate jih suka

Sare hase seuleungkapan

Cut Intan peutoe jibuka

Jicok kunci mat bak jaroe

Ceu’iet peutoe ka jibuka

Buka peutoe ceu’at ceu’iet

Mita bit bit bajee ija

Teuma jicok ngon peukaian

That analan Ratna Indra

Cok siluweu meuseulimpok

Ka jisok bajee meudobma

Ngon ija plang naw’ak Cut Ti

Pirak sandi meuh suasa

Ija pinggang meuh peulangi

Dan lagi meukasab rupa

Sok gleung jaroe ngon gleung gaki

Beurahi Cut Ratna Indra

Soe nyang kalon dum beurahi

Dan lagi hate jih gila

Jisok subang mata intan

Meujeureulang peungeuh u muka

Soe nyang kalon reubah pansan

Hana jan trang taeu rupa

Ngon euntuek meuh tujoh taloe

Bak takue Cut Ratna Indra

Bhan keuieng patam bak dhoe

Bak jaroe ikai meugeunta

Soe nyang kalon cit ka paloe

Seupot uroe han jikira

Keuruncong meuh jaroe gaki

Juhari intan meutia

Soe nyang kalon dum beurahi

Beuthat Sufi pih ek hawa

Sare hase dum sinaroe

Cok bak jaroe puan meuceuntra

Teuma jitron u seuramoe

Cut Putroe jijak seumapa

Jitop ulee ngon ija burak

Keu ija sawak peulangi Jawa

Ngon karah meuh nibak jaroe

Cut Putroe jitron le lanja

Na teuh keunoe he Teungku e

Saweu judo adek nyang hina

Syah Gumiran seuot meunoe

Neu deungoe Putroe meusuara

Hijo hijo naleung sambo

Hijo biro naleung komkomma

Dengoe adek Darabaro

Nyoe Po Linto balah haba

Puteh kuneng hijo biro

Prak ike sijudo dua

Na bu kamoe he adek e

Saweu judo Ratna Indra

Di langet na bintang sawo

Nyang leubeh hu bintang kala

Bagian 21

Teutapi adek hana got ato

Kamoe Banta tron di rimba

Bungong peukan cabeung bak meulu

Ranub sigapu dalam ceurana

Krue seumangat Daulat Tuanku

Bak gob bantu bak lon raja

Lheuh jisapa bungong kundo

Peurab laju Putroe Muda

Putroe seumah nibak teuot

Banta sambot ngon tangannya

Di Syah Midan nyum teumakot

Dalam limbot neubeudoh hana

Syah Midan eh teungeut keudroe

Adek ngon Putroe neumeujaga

Lheuh ji seumah putik rambot

Jaroe jibot ateuh Banta

Lheuh nyan teuma Putroe surot

Meunan patot that mulia

Na lhee langkah Putroe surot

Cut Bintang rhot duek bak tika

Oh lheuh ta sapa adek ta surot

Pakrie lon sambot suara gata

Aneuk cicem cut ji tron u bumoe

Meureubok manoe dalam cintra

Krue seumangat tanglong nanggroe

Nibak kamoe ateuh jeumala

Lom jiseuot Syah Gumiran

Deungoe Intan lon calitra

Nama nanggroe Palimbang Syam

Usman Juhan Du lon Raja

Nama bunda Cut Budiman

Syah Midan aduen nyang tuha

Nama ulon Syah Gumiran

Cut Intan ka lon calitra

Dilon hai Nyak ka lon peugah nan

Gata Intan soe beunama

Peu nan nanggroe geuboh nan

Ayah tuan deungon bunda

Ban jideungoe haba meunan

Seuot yoh nyan Ratna Indra

Ka neutanyong lon hareutoe

Nama nanggroe Padang Anta

Ayah ulon Raja Ba’dan

Indra lailan nama bunda

Nama ulon Po Janjongan

Ayah hoi nan Ratna Indra

Rot deh rot noe han le kalam

Seungab yoh nyan sikutika

Na sikeujab lheuh nibak nyan

Cut Intan lagi meuhaba

Nyang jeut lon tron keunoe hai duli

Hati beurahi dilon keu gata

Takoh bak u peugot meunasah

Beugot ta tarah rungka ngon bara

Lon eue Tuanku hana susah

Hana le gundah hate lam dada

Ban neudeungoe haba meunan

Neu jaweub yoh nyan pantah sigra

E adek cutbungong rihan

Dilon pih meunan ban kheun gata

Kapai meulayeu laot beuladeh

‘Alam pih meuceh alamat Raja

Ulon eue gata bintang peureuseh

Hate nyang peudeh hana le luka

Aneuk beurangoe datang u pasi

Mirahpati datang u rimba

Jinoe he adek ulon meujanji

Dilon beurahi hate keu gata

Ratna Indra teuma marit

Haba nyang bit ulon calitra

Aneuk guda plang guda peulangi

Guda jinari di teungoh data

Jinoe Cut Abang ulon meujanji

Pakrie hai duli ka nibak gata

Teuma seuot Muda Samlakoe

Pakrie Adoe ulon calitra

Bagian 22

Seubab kamoe na dua droe

Beujeut sidroe dalam dua

Ta deungoe he puteh licen

Beujeut meukawen deungon gata

Teuma seuot puteh licen

Rupa canden ban meutia

Kadang ubah uroe dudoe

Tinggai kamoe ta jak gata

Hana ubah wahe e adoe

Meugoh sampoe nyawong keulua

Seulama goh janji sampoe

Kamoe dua droe han meugisa

Keumah pakat janji sampoe

Ji ek Putroe dalam istana

Hingga faja suboh uroe

Lam meuligoe habeh jaga

Teuduek siat Banta ngon Putroe

Raja Nanggroe lon calitra

Amma ba’du teungku nanggroe

Limong ngon nyoe ka sampureuna

Raja neutron di meuligoe

Neu ek jinoe bak Balee Raya

Na sikeujab teuma dudoe

Troh sampoe Teungku Peurdana

Cit ka janji malam baroe

Beungoh uroe beutroh teuka

Meugoh nikah Tuan Putroe

Hana jeut woe rakyat dumna

Habeh bandum ka meusapat

Peuduek pakat raja raya

Teuma tron sabda bak Sulthan

Nibak Ba’dan raja raya

Ta deungoe jinaoe hai Uleebalang

Dum sibarang raja raya

Jinoe gata duek musyawarat

Ta meupakat buet keurija

Pakrie ta ubuet nyang atoran

Krie nyang reumbang nibak gata

Kareuna ulon teungoh susah

Putroe indah goh lheuh naza

Seulama goh hajat sampoe

Han jeut kheun droe meukeurija

Nibak pike ulon tuan

Akhe zaman jeut binasa

Ta peunikah mantong jinoe

Bah le dudoe ta meukeurija

Beuthat pih meunan he Uleebalang

Dum sibarang Raja-raja

Ampon Tuanku Daulat Ampon

Kamoe seuon mangat saka

Ban nyang nafsu syahi alam

Nyang mee geunggam alam donya

Ohn raja deungoe narit meunan

Syahi alam sukacita

Sapeu pakat dum geusare

Putroe Ti hana keurija

Peu keuh seubab tanglong nanggroe

Seubab Putroe goh lheuh naza

Teuduek oh nan saboh ulah

Gumiran Syah lon peugisa

Gumiran kheun bak Syah Midan

Deungoe lon tuan he Kakanda

Lon meutanyong sikrak kalam

Kheun beurijang lon deungoe nyata

Teuma seuot le Syah Midan

Han peu tuan he syeedara

Droe neuh jinoe lon peukawen

Beek han neutem he Kakanda

Syah Midan neuseuot meunoe

Na di kamoe toh di gata

Beek neukira keulon sidroe

Bah le dudoe tajak mita

Teuma seuot le Syah Midan

Hom hai intan ban kheun gata

Han lon dawa he samlakoe

Deungon kamoe lisek gata

Bagian 23

Teungoh-teungoh neu meukalam

Troh utosan nibak Raja

Neuyue jak tueng nibak bujang

Muda Seudang cit nyan dua

Troh le keunan u hadapan

Hadap Juhan nibak raja

Lheuh nibak nyan teuma dudoe

Marit jinoe raja raya

He aneuk Cut Muda Seudang

Lon meukalam deungon gata

Banta seuot Insya Allah

Han peu salah Po Meukuta

Pat gampong peu nan nanggroe

Cuba Samlakoe jinoe calitra

Soe nan ayah deungon ibu

Soe nan Teungku dua gata

Teuma seuot Bungong Tanjong

Ban nyang hukom Po Meukuta

Nama nanggroe Palimbang Syam

Usman Juhan Du lon Raja

Nama ulon Syah Gumiran

Syah Midan aduen nyang tuha

Kareuna kamoe hukom Daulat

Ban nyang hajat neukaranya

Ban Raja deungoe narit meunan

Suka han ban Poteuraja

Raja tanyong lom sipatah

Soe meunikah gata dua

Teuma seuot Syah Gumiran

Syah Midan nyang aduen hamba

Gumiran cok dalam bajee

Keu jeunamee jok keu Raja

Areuta neubrie bak Beurahman

Manikam ube boh u na

Banta jok le keu Raja Ba’dan

Syahi Alam kalon rupa

Ban neukalon ma’anikam

Tahe mandang Raja raya

Pane jitueng meunoe macam

Meukon ureung sangat kaya

Harga yum adat ta publoe

Siploh nanggroe goh lom padra

Dalam hate Raja Nanggroe

Meuhan nyonyoe Raja nyang raya

Meunan pike Raja siat

Neuhoi leugat ngon Panita

Nama Teungku Syiah Abdullah

Nyang peunikah Raja nyang raya

Raja peujok ubak Syiah

Neu peuleumah kalon rupa

Poteuraja neu wakilah

Neu peunikah aneuk Raja

Ratna Indra Teungku Syiah

Neu peunikah deungon Banta

Teungku seuot Insya Allah

Han peu salah Po Meukuta

Ka neucok ie neusrah babah

Teungku Syiah neubaca do’a

Lheuh nyan neukheun ngon Bismillah

Alhamdulillah phon neubaca

Ratna Indra putroe indah

Lon peunikah keu Meukuta

Teuma seuot Syah Midan sah

Insya Allah kaboi hamba

Akad nikah ka seuleusoe

Geupeu ek jinoe dalam istana

Cit ka hase dum sinaroe

Han peu adoe lon calitra

Linto geupeu ek u meuligoe

Geupeu jaroe ubak Maja

Oh sare troh lam meuligoe

Beudoh Putroe peumulia

Banta geupeuduek ateuh tilam

Ngon intan Cut Ratna Indra

Rot wie bantai jipeuduek Putroe

Dendayang sinaroe ngadap lingka

Bagian 24

Na sikeujab Banta sinan

Beudoh Intan jak leung tika

Geulhom tiree geuleung tilam

Sampoe troh oh nan tamat haba

Syah Midan teutap ngon Putroe

Nyang adoe sajan Baginda

Padum na treb teuma dudoe

Lam meuligoe meuseu suka

Na keuh umue lhee ploh uroe

Teuma dudoe lawet lawan

Lom meututo guree hamba

Poteuraja pangge Bujang

Troh le keunan ji peuteuka

Ubak Raja Said Ba’dan

Jibot jaroe di jeumala

Suroh Raja tot meuriam

Ban Bujang deungoe meunan sabda

Jimat lanja le ngon tunam

Dua jaroe ka jiangkat

Ampon Daulat Syahi Alam

Teuma jitot beude nubat

Ji tron rakyat Uleebalang

Dua jaroe ka ji angkat

Am pon Daulat Meukuta Alam

Peu ek seumbah dum Peutua

Turon sabda bak Sulthan

Ta deungoe he dum Bentara

Peutua Meuntroe ngon Bujang

Laen bak nyan dum lasyeuka

Tuha muda beusa seudang

Ulon han le kumat nanggroe

Ta gantoe Banta Syah Midan

Kareuna lon umue rab sampoe

Geuliyueng tuloe mata lon klam

Taboh laen keu geulantoe

Judo Putroe keu Sulthan

Laen nibak nyan lon hareutoe

Kaoy Putroe goh sampureuna

Oh lheuh taboh Raja Nanggroe

Teuma dudoe ta beujalan

Nyan keuh narit nibak kamoe

Pakrie jinoe Uleebalang

Teuma seuot Bujang Meuntroe

Ampon kamoe Po Janjongan

Patot Tuanku neuboh geulantoe

Judo Putroe cahya intan

Hate suka dum sinaroe

Beek le jiwoe dom di sinan

Teutapi Duli beek le laloe

Bak kamoe abeh that got meunan

Kareuna rakyat dum sinaroe

Ngon siuroe nyoe le rijang

Ban Raja deungoe haba Meuntroe

Po Samlakoe neupangge rijang

Troh le keunan geubot jaroe

Ampon kamoe Syahi Alam

Raja yue duek bak keurusi

Dan lagi ateuh hamparan

Banta neuduek ateuh keuta

Marit Raja Said Ba’dan

Wahe aneuk bijeeh mata

Ta deungoe haba sikrak kalam

Lon meupeugah saboh haba

Ban dua gata wahe intan

Teuma seuot Syah Gumiran

Nibak hamba hana larang

Peu na hajat neucalitra

Kamoe dua soe peutimang

Ban Raja deungoe meunan haba

Turon sabda nibak Ba’dan

Kareuna ulon uroe ‘Asha

Umue tuha akai hilang

Han ek leumah le bicara

Hate buta mata lon klam

Hajat ulon e Bentara

Lon boh gata keu Sulthan

Bagian 25

Teuma seuot Syah Gumiran

Ban nyang suka Po Janjongan

Peu nyang hajat Po Meukuta

Kamoe dua nyang teurimong

Teuma seuot Raja raya

Gata dua he buleun trang

Soe keuh nyang mat nyan neuraca

Kheun beusigra wahe intan

Teuma seuot Syah Gumiran

Aduen hamba keu Sulthan

Ban Raja deungoe meunan kata

Hate suka hana lawan

Uleebalang dum meupakat

Ka geu daulat le Syah Midan

Neubrie salen uleh Raja

Kulah kama kreh meudolang

Teuma geucok Muda Samlakoe

Geuba jinoe ubak Ragam

Kulah kama geu peuseuon

Geuhoi Ampon dum sibarang

Rakyat jiduek dum meususon

Nyang daulat phon Said Ba’dan

Lheuh nyan teuma Teungku Kadhi

Bujang Meuntri Uleebalang

Maseng-maseng ban nyang babat

Teuma raklyat di likot nyan

Lheuh geudaulat teuma geusurot

Meunan patot wahe abang

Geu peusunteng ngon buleukat

Meunan adat deungon reusam

Lheuh geudaulat seuon jaroe

Teuma dudoe geubalek nan

Syah Midan rupa juhari

Peugang Nanggri Padang Shafaran

Seukandan Diwa nama Duli

Nan geurasi Diwa Seukandan

Teuma geutot beude nubat

Alamat geuboh Sulthan

Geutot beude tujoh seun tujoh

Raja geuboh Diwa Seukandan

Lheuh nyan teuma ka seuleusoe

Teutap oh noe saboh syahdan

Raja ka neu ek u meuligoe

Ubak Putroe cahya intan

Habeh bandum ka seuleusoe

Raja Nanggroe neu seumulang

Laen jinoe lon hareutoe

Kaoy Putroe geu meupadan

Cit ka hase dum sinaroe

Han peu adoe lon atoran

Cit ka dilee geu bicara

Jinoe lanja geu beujalan

Uleebalang ngon Bentara

Peutua Meuntroe ngon Bujang

Laen rakyat dum meulaksa

Lasyeuka deungon Pahlawan

Han ek peugah he syeedara

Lom Peutua meuploh kawan

Dengon alat dum seunjata

Tumbak khanja ngon seunapan

Nyang Pahlawan gulam cokma

Nyang Panglima dum geudubang

Nyang di rakyat tumbak khanja

Laen teuma sikin panyang

Han ek habeh lon calitra

Le that tantra Diwa Seukandan

Nyang jeut le that geuba tantra

Geuthee bala akhe datang

Ka neu tupeu le Baginda

Ji sangga le Harun Makam

Teuduek siat nyang di lua

Lam istana lon peuriwang

Cit ka hase si anika

Ratna Indra Putroe Seudang

Ngon Dendayang sikureung droe

Ma Putroe Cut Indra Lailan

Bagian 26

Laen nibak nyan dum sinaroe

Dalam Nanggroe Padang Shafaran

Judo Raja judo Meuntroe

Meugleung jaroe ikai subang

Habeh bandum sajan Putroe

Hana sidroe nyang tinggalan

Keumah hase dum sinaroe

Ji tron jinoe bungong peukan

Ngon Dendayang sikureung droe

Ireng Putroe aneuk Ba’dan

Oh sare troh u leun meuligoe

Dum sinaroe dong meurintang

Teuduek siat Tuan Putroe

Ulon puwoe Diwa Seukandan

Raja neutron di meuligoe

Deungon adoe Syah Gumiran

Di likot nyan Raja Nanggroe

Neutron dudoe Said Ba’dan

Oh troh keunan u leun meuligoe

Neu ek jinoe ateuh kandran

Said Ba’dan ateuh guda

Seukandan Diwa gajah balohan

Gumiran Syah teudong keudroe

Bah le dudoe lon karangan

Nyoe lon peugah Tuan Putroe

Dum sinaroe ngon Dendayang

Ateuh gajah nyang seureuloe

Ban siploh droe saban-saban

Siploh kandran nyan siploh droe

Indah han soe meubalohan

Judo Geusyik judo Meuntroe

Sajan Putroe Indra Lailan

Meuhat-meuhat dum siploh droe

Ta deungoe adoe lon atoran

Siploh gajah ureung binoe

Sireutoh droe judo Sulthan

Laen nibak nyan ureung lakoe

Dum sinaroe Uleebalang

Rakyat teudong dum meuriti

Teubagi lhee boh pasukan

Di Raja Ba’dan saboh tantra

Seukandan Diwa saboh kawan

Judo Raja judo Meuntroe

Sajan Putroe meupasukan

Bak keunira puteh leusoh

Dua reutoh gajah balohan

Sare hase dum sinaroe

Teuma dudoe geubeujalan

Nyang jak dilee Tuan Putroe

Ureung binoe dum sibarang

Di likot nyan teuma dudoe

Ayah Putroe Said Ba’dan

Deungon rakyat meuploh katoe

Lapan ploh droe gajah balohan

Nyang di likot Raja Nanggroe

Judo Putroe Diwa Seukandan

Teuma geutot beude nubat

Alamat bungka Sulthan

Rakyat teubiet dum meubulak

Ka meusak-sak sang peunoh blang

Jipeeh tambo ngon geudeumbak

Ji arak Putroe Bangsawan

Rakyat bungka lhee teuratak

Sira geujak meupiasan

Gong ngon geundrang tambo nafiri

Keucapi deungon hareudam

Sangkaikala ka meubunyi

Nibak sagi Panglima Prang

Keumang payong dum ka meukri

Ureung nanggri nyang meupiasan

Rakyat jijak jroh meuriti

Meuceuradi pudoe intan

Ji yop suleng deungon bangsi

Teuma meu’i’i suara gambang

Ladom ta eue ji meutangkeh

Ji peubareh beude seunapan

Bagian 27

Ladom ta eue jimeung anjak

Ji surak bagoe geulumbang

Rakyat bandum hate galak

Nyang gunjak bak teumpat Beurahman

Jimat ‘alam ngon pupanji

Ji peunari dalam kawan

Rakyat bandum that beurani

Teumasok Duli ngon Panglima Prang

Geujak peulheuh kaoy Cut Ti

Aneuk Duli Said Ba’dan

Watee malam geubereunti

Singoh lagi geu beurjalan

Uroe malam hana khali

Ureung nanggri ji meupiasan

Oh jula malam rakyat dum eh

Oh mureh beudoh beurjalan

Meunan-meunan wahe wareh

Han ek habeh ulon karang

Raja bungka dengon Putroe

Geunap uroe dalam shafaran

Limong buleun neucre nanggroe

Troh sampoe u Tasek Alam

Raja ka troh bak ceu nanggroe

Laen jinoe lon karangan

Amma ba’du laen bagoe

Nam boh ngon nyoe nyang ka simpan

Teuma nyang nam deungoe lon peugah

Lon puwoe kisah ke Harun Makam

Said Ba’dan neumeulangkah

Ka meugah bak Syahi Alam

Deungon aneuk Ratna Indra

Sajan Poma Indra lailan

Di likot nyan Seukandan Diwa

Meulintee Raja Said Ba’dan

Ngon pahlawan meuploh laksa

Bentara Meuntroe ngon Bujang

Sireutoh droe Putroe Muda

Judo Raja Padang Shafaran

Bandum judo Raja-raja

Muda-muda meugleung subang

Na baro troh bak ceu nanggroe

Goh lom sampoe Tasek Alam

Ban ji tupeu geuba han soe

Galak tuloe Harun Makam

Cit dilee kon jimeu naza

Hana paksa goh lom reumbang

Nyangka keumeung prang geupuga

Ji tron paksa keunong bintang

Riyeuk di laot hantom reuda

Goh lom teuka ribot tajam

Nyoe nyangka roh sabe padra

Seukandan Diwa ngon Harun Makam

Reudok di gle hantom teudoh

Ujeun han troh keunoe u blang

Nyang dilee kon cit lam teudoh

Keumeung runtoh Tasek Alam

Sulthan Harun neukrah rakyat

Ka meusapat dum Uleebalang

Han ek peugah wahe adoe

Limong ploh droe nyang pahlawan

Jeup-jeup kuta geyue pasoe

Jipreeh Putroe keunan datang

Han peu adek lon hareutoe

Dilee Putroe kalon kheun ban

Nyoe lon peugah kuta geupasoe

Kuta sagoe kuta reuntang

Di keu kuta tanglong nanggroe

Deungoe lon kheun proe wahe abang

Han that jeuoh Poma Putroe

Sikhan uroe pasang guda

Geukueh uruek dum meubanja

Limong ploh dua jroeh meureuntang

Meunan suroh nibak Raja

Rot neubungka Said Ba’dan

Di dalam blang maha cina

Di sana suroh Sulthan

Bagian 28

Han peu peugah misue kuta

Hana raya deungon panyang

Teuma di ateuh han silala

Lam uroe kha ka meuteuntang

Tanoh geuboh pih tan meupat

Beek meubakat deuh geupandang

Di ateuh nyan tanoh geuboh

Di baroh papeun geulabang

Luah uruek puteh leusoh

Jeut sireutoh geuduek urang

Rakyat peunoh bandum sunggoh

Meunan suroh Harun Makam

Nyang dilee kon cit Meukuta

Hana raya cit uruek nyan

Oh geudeungoe rab troh Raja

Peugot lanja dum geudong nyan

Nyang jeut meunan geupeurintah

Beek meugah bak ureung datang

Hingga leungka dum sinaroe

Geupasoe rakyat dum keunan

Saboh geudong wahe adoe

Geupasoe sidroe pahlawan

Sikureung ploh sidroe peutua

Geupasoe lanja Panglima Prang

Bak lon pike sireutoh uroe

Nyang sidroe meuhat pahlawan

Nyang ban bandum keubai beusoe

Lhe peut ploh droe ek jimeucang

Jeup-jeup geudong ureung ka doe

Sireutoh droe ngon pahlawan

Bak bineh rot dum meubanja

Limong ploh dua jroh meureuntang

Deungoe jinoe lon calitra

Panglima deungon pahlawan

Limong ribee dua reutoh

He adek beh Panglima Prang

Teuma dudoe lam limong ploh

Teungoh lhee reutoh ngon pahlawan

Dalam geudong bandum geuboh

Siap jipreeh troh Raja datang

Teutap di sinan hana kiroh

Jinoe lon boh laen macam

Bukon sayang putik pawoh

Ureung mat buloh sutra geuilang

Ta deungoe he Tuanku beh

Aneuk Meulaboh nyang peu kabaran

Ban nyang geukheun nyoe ulon boh

Hana haloih hana panyang

Manyang-manyang teupi paloh

Aneuk peuyoh dalam kubang

Nyang bunoe kon lon peuteudoh

Teungoh lon boh Harun Makam

Amma ba’du Ampon Duli

Teungoh peureugi Diwa Seukandan

Limong buleun limong uroe

Troh bak nanggroe Harun Makam

Si uroe treuk jeuoh Shafaran

Ngon Aulia bak nanggroe nyan

Teukeudi Allah Tuhan nyang Esa

Deungoe Cut Da narit laman

Troh bak padang nyang that raya

Nanggroe Raja Tasek Alam

Raja Ba’dan beurangkat lanja

Dum na tantra Diwa Seukandan

Geungieng ureung han sidroe na

Leugat lanja geuberjalan

Nyang jak dilee kawan Putroe

Ureung binoe dum sibarang

Di likot nyan ayah Putroe

Dum sinaroe Panglima Prang

Nyang di likot judo Putroe

Raja Nanggroe Diwa Seukandan

Meuhat jarak wahe adoe

Sikhan uroe ta beurjalan

Kareuna seubab dalam padang

Sang-sang rab oh tapandang

Bagian 29

Oh nan jarak wahe abang

Siteuntang tangieng ngon mata

Ban sare troh dalam padang

Putroe Intan jipoh lawa

Siploh gajah meubalohan

Indra Lailan Ratna Indra

Jingieng ureung tan meubayang

Nyang jeut intan hana liya

Lagi Teungku dalam padang

Deuh ji pandang dumna tantra

Padang luah wahe adoe

Sikhan uroe ta pasang guda

Neujak pantah Tuan Putroe

Tutong uroe han sapat bla

Poteuraja hana neutham

Cut Intan ji pasang guda

Sabe leumah deuh neupandang

Dalam padang peungeuh raya

Sabe keuh deuh Raja pandang

Di dalam blang han tantra

Mantong jeuoh kuta nanggroe

Gohlom sampoe keunan teuka

Nibak pike Raja Ba’dan

Hana lawan di rot Raja

Limong buleun geu beurjalan

Hana leuntang sikleep mata

Gohlom sampoe bak pikeran

Harun Makam peudom tantra

Said Ba’dan hana neuthee

Keunong tipee uleh Raja

Nyan keuh seubab jeut meupaloe

Seubab Putroe neupoh lawa

Ka oh nan kada Tuhan Sidroe

Di Tuan Putroe keunong bala

Hingga troh u teungoh padang

Deungoe abang lon calitra

Jaga-jaga di dalam blang

Harun Makam nyang eumpunya

Dalam geudong dum sinaroe

Pahlawan nyoe limong ploh dua

Ka jibeudoh dum sibarang

Meureuntang jidong meubanja

Tuan Putroe leupah jalan

Di beulakang tinggai tantra

Ban Putroe eue ka meureuntang

Indra Lailan srot ie muka

Tuan Putroe keumeung riwang

Ka jitawan uleh lasyeuka

Seubab ka roh u hadapan

Di beulakang teudong tantra

Tantra Raja Said Ba’dan

Goh troh datang keunan teuka

Han that jeuoh wahe abang

Deuh ta pandang siteuntang mata

Ban Raja eue teudong lawan

Tahe mandang sikutika

Bunoe hana deuh lon pandang

Pane urang keunan teuka

Paleh tahe Raja mandang

Raja Ba’dan jinoe meusabda

Ta deungoe he Uleebalang

Dum sibarang tuha muda

Pane teuka dum angkatan

Di hadapan meuploh laksa

Teuma seuot Uleebalang

Han lon tuban Pomeukuta

Lom neumarit Raja Ba’dan

Neupeugah ban jeup peutua

Nibak pike ulon tuan

Harun Makam nyang po tantra

Beuthat pih meunan Uleebalang

Cuba pandang ta eue rupa

Menyoe tantra Harun Makam

Ka jitawan Putroe Muda

Ban jideungoe meunan kalam

Dumna rakan ji pareksa

Bagian 30

Ji eue beude ngon seunapan

Geudeubang peudeung ngon cokma

Panglima kheun bak Sulthan

Nyoe angkatan tantra Raja

Lon eue bandum meugeudeubang

Seunapan beude ceureupa

Lam teureupong deuh lon pandang

Pahlawan limong ploh dua

Tuan Putroe ka jitawan

Pakrie padan Pomeukuta

Ban Raja deungoe meunan kalam

Reubah pansan ateuh guda

Aneuk peurumoh seukalian

Ka jitawan le lasyeuka

Pakon bunoe han ulon tham

Allah Tuhan ka troh masa

Jinoe pakrie ulon paban

Raja Ba’dan hate luka

Poteuraja beungeeh han ban

Ka troh datang Seukandan Diwa

Ban sare troh u hadapan

Marit rijang Raja raya

Wahe Aneuk Muda Seudang

Ka jitawan Putroe Muda

Bunoe hana deuh angkatan

Leupah jalan Ratna Indra

Bandum habeh nyan sinaroe

Judo Putroe judo Raja

Jinoe Aneuk beudoh ta prang

Ta tueng pulang Putroe Muda

Ban jideungoe meunan kalam

Dum pahlawan beungeh raya

Bujang Meuntroe Uleebalang

Panglima Prang pasang guda

Ladom gajah meubalohan

Pahlawan nyang teuga-teuga

Peudeung cokma ngon geudeubang

Seunapan meuriam lila

Jipeeh tambo palu geundrang

Neu peu ek prang Seukandan Diwa

Rakyat ramee sang peunoh blang

Ji surak ban taga raya

Ngon pupanji puteh hitam

Ngon ‘alam nyang meupeurmata

Limong reutoh gajah balohan

Diwa Seukandan nyang po tantra

Teungoh geu ek dum meurumpan

Ta deungoe abang lon calitra

Ban jikalon le pahlawan

Harun Makam nyang po tantra

Teuma jikheun dum bak rakan

Dong bak timban beek syok sangka

Beek meusurot u beulakang

Ta lawan prang tantra teuka

Ban jideungoe kheun pahlawan

Panglima prang dong meubanja

Cokma peudeung dumka timban

Jipreeh datang lawan teuka

Hingga troh le keunan datang

Oh dum makan aneuk lila

Pahlawan beut saboh hekeumat

Angen barat jipot lanja

Jipot angen ribot gadoet

Jibapot angkatan teuka

Maken ji ek jroh meurumpan

Ji lawan prang tantra teuka

Ureung datang he panghulee

Piyoh dilee sikleeb mata

Seukandan Diwa ka neupiyoh

Angen teudoh han le teuka

Teudoh angen ngon su bunyoe

Leumah jinoe gunong nyang raya

Gunong manyang tampok awan

Buet pahlawan limong ploh dua

Adak cicem manyang teureubang

Troh bak teumpat nyan mate leupah na

Bagian 31

Rakyat tahe mata mandang

Raja Ba’dan hate luka

Habeh crebre dumna kandran

Angen hantam hana reuda

Ladom mate dum teureuban

Ladom pansan teungoh indra

Teuduek oh nan saboh padan

Indra Lailan lon calitra

Deungon aneuk Putroe Intan

Ngon dendayang muda-muda

Sireutoh ureung dua ploh kandran

Ka jitawan le lasyeuka

Ka jicok uleh pahlawan

Puwoe u dalam ubak Raja

Jipalu gong deungon geundrang

Arak Tuan Putroe Muda

Ji surak bandum angkatan

Harun Makam hate suka

Teuduek Putroe nyang sambinoe

Sireutoh droe muda-muda

Teuma marit Raja Ba’dan

Neu tanyong ban bak aneuknda

He Adek Cut Muda Seudang

Dum sibarang Raja-raja

Lon eue gunong raya han ban

Pakrie jalan rot ta daya

Ta cuba eue peue haluan

Ateuh buket nyan wahe Raja

Raja-raja Uleebalang

Soe na sayang keu Putroe Muda

Meunan narit Raja Ba’dan

Han troh tuban Poteuraja

Teuma seuot Diwa Seukandan

Dum pahlawan tan suara

Ka nibak pham ulon tuan

Han troh seunuban Poteuraja

Nibak pike ulon tuan

Nyang troh tuban Syah Gumiran

Meunyoe dumnan han jipaban

Le saktian dalam dada

Ban Raja deungoe haba meunan

Tanyong yoh nyan Syah Gumiran

Oh neupangge le Sulthan

Hana sinan Banta Muda

Teuma seuot Uleebalang

Dum sibarang Raja-raja

Hantom lon eue Muda Seudang

Lawet beurjalan Pomeukuta

Yoh nyan neuthee Syahi Alam

Gumiran hana neu bungka

Nyang dilee kon tan neutuban

Limong bulan cre di tangga

Kareuna lhee boh pasukan

Dumna rakan di likot nyan

Nibak hate Syahi Alam

Gumiran hana seureuta

Teutap sinan rakyat di blang

Han meuriwang lam uroe kha

Takoh bak jok tacu keu lham

Takueh kulam teumpat manoe

Amma ba’du tujoh simpan

Gumiran nyang that peurkasa

Goh lom beurangkat Muda Seudang

Hana sajan tantra Raja

Lon peugisa ubak uram

Yoh beurjalan Seukandan Diwa

Raja neu ek ateuh kandran

Gumiran teubiet u lua

Leupah Raja neubeurjalan

Gumiran neu meudiwana

Lheuh nyan neujak keudeh keunoe

Jeup-jeup nanggroe tiep-tiep banda

Nyang jeut meunan neutinggai droe

Neukalon proe pakrie rupa

Uleebalang Kadhi Meuntroe

Dum sinaroe sajan Raja

Bagian 32

Neukalon ci pi e budhoe

Soe na adoe nyang peurkasa

Lam istana pih tan neuwoe

Lawet adoe beurangkat Raja

Limong buleun limong uroe

Ta deungoe adoe lon calitra

Bak simalam Posamlakoe

Neu meulumpoe Syah Gumiran

Seukandan Diwa nyuem ka neuwoe

Deungon Putroe indah rupa

Deungon rakyat dum sinaroe

Habeh geuwoe Raja-raja

Tuan Putroe jeut ka paloe

Tuhan sidroe nyang peulara

Na nyuem neu ek u meuligoe

Samlakoe beudoh jak sapa

Neumat jaroe aduen neuh sidroe

Tuan Putroe beungeh raya

Neu eue rupa Raja nanggroe

Juwah bagoe uleu bisa

Na nyuem bak sang ie mata rhot

Ka teukeujot Syah Gumiran

Beudoh bak eh teuma siat

Neu ingat lumpoe beungoh faja

Oh neu ingat nyan keu lumpoe

Teuma dudoe neuboh makna

Neuthee yoh nyan ka meulumpoe

Ban sinaroe Putroe Muda

Gumiran beut saboh hekeumat

Troh le siat aneuk guda

Ban sare troh Indra Diran

Neu pasang le Syah Gumiran

Ji teureubang dalam awan

Troh le rijang u hadapan Raja

Ban neu eue le Raja Ba’dan

Ka datang e Syah Gumiran

Bak lon kira Posamlakoe

Sajan kamoe gata bungka

Lon pareksa teuma dudoe

Oh meupaloe teuka bala

Yoh nyan lon thee hana sinoe

Samlakoe ho leupah gata

Gumiran Syah seuot meunoe

Ta deungoe kamoe Pomeukuta

Masa neu tron di meuligoe

Ngon kamoe sajan seureuta

Teukeudurullah e ayah droe

Saket kamoe teuntang dada

Lheuh nyan lon ek u meuligoe

Geuliyueng tuloe seupot mata

Tan lon peugah saket asoe

Lon takot paloe han leupah bungka

Sinan lon eh lam meuligoe

Malam uroe teungeut hana

Saket pih that hana bagoe

Rab sampoe nyawong keulua

Tujoh malam tujoh uroe

Jaga kamoe nibak indra

Tuhan neubrie puleh asoe

Miseu puroe dilee nyang ka

Lon eue rakyat tan le sidroe

Ban sinaroe habeh bungka

Nyang na tinggai lam meuligoe

Dua ploh droe kawai istana

Lon keumeung jak teuma dudoe

Meu lon sidroe hana guna

Kareuna Raja Uleebalang

Pahlawan deungon panglima

Habeh bandum geubeurjalan

Ikot sajan Daulat Meukuta

Meunan pike ulon tuan

Han sukaran jan na bala

Teutap lon duek nyan di dalam

Seungap diam lam istana

Siploh uroe lheuh nibak nyan

Dengoe laman Pomeukuta

Bagian 33

Hate susah lon hana ban

Seunang lon tan Pomeukuta

Lheuh nyan lon tron di meuligoe

Leugat jinoe lon jak bungka

Hana rakan pih meusidroe

Jeuoh nanggroe lon peuteuka

Padum na treb lon cre nanggroe

Bak uroe nyoe troh ban pinta

Raja Ba’dan mariet meunoe

Ta deungoe kamoe Syah Gumiran

Kareuna ulon ka meupaloe

Tuan Putroe ka binasa

Siploh kandran sireutoh droe

Ureung binoe muda-muda

Bandum inong ureung meusoe

Kadhi Meuntroe Raja-raja

Habeh bandum ka meupaloe

Sajan Putroe Ratna Indra

Gumiran Syah tanyong meunoe

Toh pakri roe jeut binasa

Pakrie ek jeut dicok Putroe

Ta hareutoe nibak mula

Teuma seuot Raja Nanggroe

Ta deungoe kamoe Syah Gumiran

Ban sare troh lam padang nyan

Deungoe laman lon calitra

Reului pih tan uroe tutong

Cut Tanglong jipasang guda

Tuan Putroe hana lon tham

Dalam padang hana tantra

Oh sare troh u teungoh blang

Deuh lon pandang dum lasyeuka

Leupah Putroe u hadapan

Di beulakang teudong tantra

Han lon tunee rakyat datang

Nyang awai tan leumah nyata

Oh ban lon eue sang peu palang

Meureuntang teudong meubanja

Lon yue kalon dumna rakan

Pahlawan limong ploh dua

Tuan Putroe ka jitawan

Harun Makam nyang po tantra

Teuma seuot Syah Gumiran

Pakon Tuan han tangaza

Keupeu cit le dum angkatan

Han geulawan tantra raja

Raja Ba’dan seuot meunoe

Ta deungoe kamoe nyang sijahtra

Kon hai Banta tan meulawan

Deungoe lon tuan peu calitra

Oh ban ji eue jroh meurumpan

Panglima Prang pasang guda

Habeh beungeh dum pahlawan

Jipeu ek prang dum jingaza

Oh rab sampoe bak musohan

Teuka datang angen raya

Rakyat teudong dum meurumpan

Diwa Seukandan pih seureuta

Si unab gajah beurjalan

Meuriwang limong ploh deupa

Habeh crebre dumna rakan

Ribot tajam ban boh lila

Nibak kamoe dum sibarang

Tan saktian dalam dada

Teudoh angen Po Samlakoe

Leumah jinoe gunong raya

Maka han jeut dum beurjalan

Teutap intan han soe ngaza

Nyan keuh seubab jeut ka lintang

Bungong karang leupah jiba

Jinoe aneuk gaseh sayang

Haluan tabrie bak gata

Meulaen dum han jituban

Meulainkan Po Bijeehmata

Nyang jeut aneuk lon beurjalan

Muda Seudang seubab gata

Bagian 34

Ulon harap keu Samlakoe

Nyang jeut kamoe dum meubungka

Meunyoe hana Po Samlakoe

Kaoy Putroe han sampureuna

Beule gaseh aneuk ngon sayang

E Buleun Trang Cahya Mata

Meunan mariet Raja Ba’dan

Teuma Gumiran neu seuot haba

Insya Allah Po Janjongan

Na laman soe padubawa

Beek that gundah Po Janjongan

Keudeh bak Tuhan ta lakee do’a

Di Tuanku neuduek keudroe

Na kamoe nyang padubawa

Deungon tulong Tuhan sidroe

Lon boh buket nyoe beu meuleu-a

Beureukat Guree lon Malek Beurahman

Lon boh buket nyan beujeut keu paya

Di Tuanku neuduek seunang

Neu eue peurbuatan Syah Gumiran

Mangat jiturie Murid Beurahman

Treb ka laman ulon tapa

Mangat jiturie Syah Gumiran

Mangat jituban Seukandan Diwa

Mangat jithee na aneuk Palimbang

Usman Juhan du lon Raja

Cit dilee kon keumeung meuprang

Goh lom reumbang keunong kutika

Di laot hana geulumbang

Goh lom datang ujeun keunong sa

Nyoe nyang ka roh sabe lawan

Harun Makam Syah Gumiran

Reudok di gle hantom datang

Han tom reunggang ujeun teuka

Tuan Putroe han ji pulang

Tasek Alam huru-hara

Mangat jithee Said Ba’dan

Padang Shafaran teumpat neuraja

Ujeun di langet sabe teudoh

Hantom guroh geulanteu teuka

Di Tuanku beek that kiroh

Neuhoi taroh dum nyang hawa

Bandua sie manok meususoh

Neuhoi taroh neu meujuara

Manok ceungkeh dalam keureupoh

Treb ka hana roh lhee seun puasa

Bak uroe nyoe neupeutaroh

Beek that kiroh Po Meukuta

Meunan nariet Syah Gumiran

Raja Ba’dan hate suka

Rakyat tahe dum sibarang

Mata mandang ateuh Banta

Lheuh neumariet Banta Seudang

Beudoh rijang Syah Gumiran

Neucok panah boh lam reugam

Pusakaan bak ayahanda

Marneu kucob Syah Gumiran

Neu srom yoh nyan u antara

Gunong hancoe ka teureuban

Panah riwang lam tangannya

Hancoe gunong adek Teungku

Sigeutue han le meutanda

Tinggai padang miseu puroe

Leumah jinoe laot nyang raya

Laot apui luah han ban

Buet pahlawan limong ploh dua

Pajoh ranub Syah Gumiran

Neuprueh keunan lam laot raya

Sinoe neuprueh Po Samlakoe

Laot ka doe jeut keu data

Gunong hancoe laot ka doe

Jinoe nanggroe leumah nyata

Hana ubah miseu puroe

Teukab jaroe rakyat dum na

Nyoe keuh teumpat Harun Makam

Tasek Alam geukheun nama

Bagian 35

Poteuraja hireun mandang

Neu eue peurbuatan Syah Gumiran

Seureuta ngon Diwa Seukandan

Uleebalang ngon Panglima

Han jan siat ka teureuban

Kaya Tuhan Po Nyang Kuasa

Meunan pike dum seukalian

Gumiran sangat peurkasa

Teuma mariet Syah Gumiran

Beudoh rakan na ta bungka

Uroe nyoe troh ta beurjalan

Sampoe datang bak Kutaraja

Ban geudeungoe meunan kalam

Raja Ba’dan Seukandan Diwa

Raja neu ek ateuh kandran

Panglima Prang pasang guda

Deungoe lon peugah Syah Gumiran

Indra Diran ka troh teuka

Ka teudong le di hadapan

Neu ek rijang neu pohlawa

Nyang jak dilee Syah Gumiran

Di likot nyan Seukandan Diwa

Nyang di likot Said Ba’dan

Uleebalang ngon Panglima

Yoh nyan geujak jroh meureuntang

Syah Gumiran nyang peurtama

Nyang jeut meunan wahe abang

Proe hai datang lawan teuka

Meunyoe dilee Muda Seudang

Ek meusagang tantra raja

Guda saboh droe neuh sidroe

Lam jaroe panah pusaka

Deungon pantah hana bagoe

Ka sampoe bak Kutaraja

Laen rakyat dum sinaroe

Goh lom sampoe sajan Banta

Oh troh ka rab Kuta Nanggroe

Po Samlakoe tron euncong guda

Syah Gumiran tron u bumoe

Guda jiwoe ubak mula

Lheuh nyan teuma Po Samlakoe

Neu peujeut droe keu asan raya

Bak jih raya dheun jih rampak

Illahon Haq nyang karonya

Banta ka jeut keu bak asan

Di dalam Blang Mahajana

Bak peureudee that meusigak

Di yueb bak tanoh dum rata

Na sikeujab teuma dudoe

Troh sampoe Seukandan Diwa

Nyan di likot Said Ba’dan

Uleebalang ngon Panglima

Ban neukalon asan rampak

Kaneujak Seukandan Diwa

Deungon Raja Said Ba’dan

Piyoh yueb bak asan raya

Deungon rakyat meubalohan

Uleebalang ngon Panglima

Nyang jeut meunan neu peujeut droe

Beek dudoe payah geumita

Kareuna Banta awai sampoe

Di likot nyoe tinggai Raja

Habeh bandum keunan datang

Piyoh kandran gajah guda

Lheuh nyan teuma wahe abang

Gumiran laen neu puga

Gadoh teuma ngon bak asan

Kuta Reuntang ka meubanja

Dalam Kuta saboh meuligoe

Na tujoh droe ngon lasyeuka

Teumpat timoh uram asan

Kuta Dalam teumpat Raja

Rakyat bandum roh u dalam

Lingka Tuan pacang junga

Geunireng nyan Kuta Reuntang

Panglima Prang roh di sana

Bagian 36

Samat teungoh Kuta Dalam

Raja Ba’dan Seukandan Diwa

Laen teuma Uleebalang

Meuntroe Bujang ngon Bentara

Di rakyat laen pasukan

Cit ka meunan yoh neucipta

Maseng-maseng meuatoran

Hamparan keurusi keutua

Di leun meuligoe Balee Gambang

Kuta Reuntang ngon Panglima

Meuh peulanggi keurusi tilam

Di ateuh nyan Syah Gumiran

Lheuh nyan neutron Muda Seudang

Bak Sulthan neu peuteuka

Neumat Raja nibak jaroe

Neuba jinoe Balee Raksa

Seureuta nyan aduen droe

Neu ek keunoe Pomeukuta

Raja neu ek u Nalee Gambang

Bak hamparan keurusi keutua

Laen bak nyan dum sibarang

Meuntroe Bujang ngon Bentara

Bandum geu ek Uleebalang

Balee Gambang luah raya

Leung keurusi ngon hamparan

Meureuntang geuduek meubanja

Ladom geu ek u meuligoe

Ureung meusoe nyang biek Raja

Hate suka mata laloe

Nyuem karab toe Padang Shafaran

Poteuraja hireun laloe

Meunoe bagoe dalam dada

Bunoe lon duek di yueb asan

Dalam padang han sapeu na

Jinoe karoh lon u dalam

Gumiran banyak bicara

Na nyuem lagee neu meulumpoe

Raja Nanggroe meunan rasa

Teutap Raja tahe keudroe

Po Samlakoe ulon calitra

Cok keureutah mat bak jaroe

Kireman jinoe neu rika

Teuma neucok deungon kalam

Surat rijang Syah Gumiran

Neu meung peu-et nyan u dalam

Harun Makam nama Raja

Phon hijeurah kira uroe

Teuma dudoe neuboh angka

Cicem palacut jipoe u blang

Mita beulalang eumpeun aneuknda

Ta deungoe lon wahe abang

Nyoe keunarang baro leungka

Meunoe haba dalam surat

Soe deungoe mangat ro ie mata

Lheuh neuboh ngon Bismillah

Alhamdulillah pih seureuta

Poteuraja neuduek dahsyah

Gumiran Syah neu meurika

Habeh dumpeu ngon khuteubah

Deungoe lon peugah dua banja

Salam ‘alaikum Harun Makam

Said Ba’dan empunya sapa

Seumbah dan salam Diwa Seukandan

Keupada Tuan Harun Raja

Takzim teukirem Syah Gumiran

Adek Sulthan Seukandan Diwa

Lhee droe ureung dalam surat

Sujud khideumat bak Baginda

Neu eue beudeuh dalam surat

Duli hadharat neu peunyata

Said Ba’dan neu beurangkat

Peulheuh hajat bak Aulia

Deungon aneuk Putroe Intan

Padang Shafaran sideh neuhala

Oh sare troh Nanggroe Janjongan

Ka jitawan le lasyeuka

Bagian 37

Seumah sujud Said Ba’dan

Di bawahkan kawoh Meukuta

Wahe Tuanku neugaseh sayang

Kamoe meudagang Nanggroe Meukuta

Hajat ulon Po Janjongan

Beujeut keu rakan geutanyoe dua

Beuthat neusyen kamoe meudagang

Jinoe neupulang Putroe Muda

Laen nibak nyan ngon Dendayang

Judo Sulthan Raja raya

Jinoe Tuanku nyan neupulang

Gaseh sayang keu lon nyang hina

Lhee droe kamoe beuot tangan

Ubak Janjongan horeumat mulia

Sireutoh droe Putroe Seudang

Meugleung subang meuh peurmata

Han seb siblet lon boet tangan

Siribee seun ulon ganda

Nyang ka leupah nyan buet jaroe

Meu’ah bak kamoe dum sibarang

Jinoe Tuanku neupulang Putroe

Kamoe lhee droe mohon pinta

Meunyoe Tuanku neupulang Putroe

Bahle nanggroe hukom Meukuta

Nibak Daulat neutueng Putroe

Kamoe lhee droe neu peuhamba

Neuyue cok ie neuyue sampoh broh

Neuyue mee bungkoh neuyue hue guda

Beudoh neu eue Daulat Ampon

Kha ulon hamba nyang hina

Meunan nariet lam kireman

Tamat kalam wa intaha

Lheuh geusurat teuma geulipat

Geuhoi surat ngon ceundana

Banta neubeut saboh hikeumat

Neusrom leugat dalam hawa

Soe nyang peugah bala teumpat

Lon surat pih hana bida

Di laot geupawang pukat

Di darat geupawang rusa

Syah Gumiran teuduek siat

Deungon Daulat Seukandan Diwa

Tarek layeu boh taloe klat

Angen barat keunong paksa

Ulon peugah seun saboh bab

Ta pham sahbat haba Raja

Wahe Teungku beek neu upat

Ureung surat goh biasa

Nyoe keuh baro lon meurunoe

Wahe Adoe keumuen Apa

Cit nyoe keuh phon lon seumurat

Nyoe Hikayat Basyah Gomtala

Amma ba’du nyang keulapan

Harun Makam ulon calitra

Nyang bunoe kon seungab diam

Jinoe rakan ulon gisa

Sulthan Harun bak uroe nyan

Balee Gambang duek seunia

Deungon rakyat Uleebalang

Pahlawan limong ploh dua

Hana neuthee Raja datang

Meupiasan hana reuda

Lawet geu puwoe Indra Lailan

Meupiasan hantom reuda

Nyang jeut meunan wahe abang

Geupreeh datang lawan teuka

Mangat beek jiwoe Uleebalang

Peuduek piasan keu ayeun mata

Dalam Kuta dum sibarang

Uroe malam hantom reuda

Laloe rakyat bak piasan

Di padang ka teudong Kuta

Ateuh Balee duek Sulthan

Uleebalang ban siseun lingka

Raja neuduek ateuh tilam

Rhot meulayang surat bak tika

Bagian 38

Ban Raja eue surat meulayang

Harun Makam neucok sigra

Lheuh nyan teuma neuleung surat

Raja lihat peu na haba

Lheuh nyan teuma neuploh lipat

Phon neulihat nibak angka

Baro neuthee Harun Makam

Said Ba’dan ka troh teuka

Seureuta ngon Diwa Seukandan

Syah Gumiran adek Raja

Nyeng beut surat Harun Makam

Uleebalang deungoe dumna

Nariet mangat hana macam

Na tamse gan abet keureuma

Bak uroe nyoe baro datang

Di teungoh blang teudong tantra

Jinoe Putroe geulakee pulang

Uleebalang pike bak gata

Teuma seuot Uleebalang

Ban nyang reumbang bak sarpada

Gunong manyang laot meulintang

Habeh karam ban sineuma

Poteuraja meunan kalam

Seuot pahlawan limong ploh dua

Ta deungoe jinoe lon peugah nan

Dilee cit tan lon calitra

Lam limong ploh wahe adoe

Cit dua droe nyang peurkasa

Sidroe geuhoi Ahmad Faridan

Sidroe geupeunan Amin Mika

Lagi gagah deungon tungang

That pahlawan hana nyang sa

Nyang laen dum han ek peugah

Kuweut babah han sakon guna

Ulon peugah nyang dua droe

Nyang geutusoe dalam laksa

Meunan nariet Ahmad faridan

Dua sajan ngon Amin Mika

Meuka lon cok panee lon pulang

Meugoh lon meuprang hana ridha

Ban Raja deungoe meunan kalam

Harun Makam hate suka

Tantra nyang teuka neu eue lon tham

Jinoe lon lawan Seukandan Diwa

Padum na treb dalam kaluet

Hantom na buet Po Meukuta

Jinoe Tuanku neubalah surat

Haba beumangat jampu ngon tuba

Uleebalang sapeu pakat

Balah surah uleh Raja

Ahmad Faridan peugot surat

Nyang riwayat Amin Mika

Meunoe haba dalam surat

Ta pham beugot he syeedara

Teulheuh geuboh ngon Bismillah

Ngon khuteubah habeh leungka

Deungoe jinoe ulon peugah

Syahdan adalah nyang peurtama

Daulat Tuanku Said Ba’dan

Di likot nyan Seukandan Diwa

Seureuta ngon Syah Gumiran

Adek Janjongan muda bahlia

Nyang seuot saleum Harun Makam

Wa’alaikum salam Seukandan Diwa

Di likot nyan Uleebalang

Ngon pahlawan limong ploh dua

Nanggroe jeuoh keunoe neulandang

Beutroh u dalam bak teumpat hamba

Oh noe ka troh Po Janjongan

Meutot meuriam meuampeung gata

Gata meupeuduek ateuh hamparan

Meu peurjamuan  kamoe peumulia

Putroe Tuanku neulakee pulang

Beutroh u dalam keunoe neuteuka

Nafsu Tuanku beujeut keu taulan

Bak lon pih meunan hajat meupinta

Bagian 39

Bgak lon Tuanku raya that sayang

Jinoe lon pulang aneuk gata

Neu eue beudeuh dalam kireman

Na lon tuan hamba nyang hina

Reudok di gle hantom reunggang

Sigeutue pih tan teuka ie raya

Meuka lon cok pane lon pulang

Meugoh lom meuprang sia-sia

Tanda lon gaseh ngon lon sayang

Bak boh meuriam Putroe digata

Tumbak ngon cokma dalam alasan

Lon keumeung pulang keu Syah Gumiran

Seumbah salam Ahmad Faridan

Dua sajan ngon Amin Mika

Dalam limong ploh na tatuban

Dua droe nyan si syeedara

Raya lon gaseh deungon lon sayang

Got ta riwang yoh goh binasa

Cicem subang mirah gigi

Meurak meunari dalam rimba

Tamat kalam wa barihalli

Amat Pari lipat sigra

Lheuh geusurat bungong padi

Amat Pari nyang keurija

Teuma geuhoi lheuh nibak nyan

Ngon keumeunyan gahru jeumpa

Amat jok le ubak Bujang

U padang ji intat lanja

Bujang ka troh u teungoh blang

U dalam ji tamong sigra

Hingga troh le bak Sulthan

Bak Ba’dan Seukandan Diwa

Nyang teuleubeeh Syah Gumiran

Rupa na ban bintang kala

Bujang di yueb peu ek seumbah

Surat pantah jok bak Raja

Teuma mariet Syah Gumiran

Panee rakan keunoe teuka

Teuma seuot Teungku Bujang

Lon tuan suroh Baginda

Nibak Raja Harun Makam

Lon utosan Po Meukuta

Neuyue intat surat kireman

Nibak laman keu Po Meukuta

Bujang jok le deungon surat

Sambot leugat Syah Gumiran

Oh lheuh neucok surat kireman

Bujang yoh nyan laju gisa

Gumiran ploh dalam lipat

Ka neulihat peu na haba

Syah Gumiran baca kireman

Raja Ba’dan deungoe suara

Seureuta ngon Diwa Seukandan

Neuduek sajan lhee seureuta

Habeh neu eue troh u dalam

Habeh neupham dum peurkara

Neu deungoe nariet maneh ngon masam

Syah Gumiran neu tupeu makna

Ban Banta eue nariet meunan

Beungeh han ban ji ek bisa

Gumiran kheun bak Sulthan

Han ji pulang Putroe Muda

Tuan Putroe han ji pulang

Ji pakat prang Harun Makam

Meunan nariet dalam surat

Hate mangat Syah Gumiran

Neu meriet le leugat-leugat

Bak Daulat Seukandan Diwa

Wahe Dalem Cut Dalem Payong

Neu eue buet lon nyang adoe gata

Han ji pulang Putroe Intan

Tasek Alam haru hara

Han lon turie Harun Makam

Ulon boh jrat saboh masa

Hantom na buet nyang dilee kon

Hana lon tuban Amin Mika

Bagian 40

Bak siseun nyoe neu eue piasan

Seudong ngon biram meuseunoh bisa

Hana lon teubiet keudeh u padang

Sinoe di dalam lon hanco donya

Lheuh neukheun nyan Syah Gumiran

Neuboh lam reugam panah pusaka

Teuma neubeudoh Muda Seudang

Neu ek rijang ateuh Diwa

Banta Muda neubeurjalan

Balee Gambang neutron lanja

Banta neumat ngon teureupong

Neu lhoeh ujong Kutaraja

Leumah Kuta dengon Gampong

Leumah tampong rumoh Raja

Ka leumah ngon Kuta Reuntang

Harun Makam nyang empunya

Ban got leumah deuh neupandang

Neurajam bak Kutaraja

Sinoe neusrom le Gumiran

Sideh karam jeut keu paya

Rakyat mate dum teureuban

Nyan buet tangan Syah Gumiran

Kon Meukuta panah seudoe

Sikhan nanggroe ka binasa

Rakyat mate meuploh katoe

Ngon nanggroe ka jeut keu paya

Ka hana le Kuta Reuntang

Panah riwang bak empunya

Ban ji eue le Ahmad Faridan

Kuta Reuntang ka binasa

Yoh nyan jithee harun Makam

Ureung datang that peurkasa

Bit pih dumnan ka teureuban

Goh lom hiram ngon ie muka

Lheuh nyan teuma lawet lawan

Ji meupadan Raja-raja

Neumariet bak Uleebalang

Harun Makam nama Raja

Raja neukheun bak pahlawan

Ahmad Faridan Amin Mika

Ta deungoe he dum pahlawan

Gata sibarang limong ploh dua

Seureuta ngon Uleebalang

Meuntroe Bujang ngon Bentara

Ulon jinoe heundak meukalam

Kheun beuseunang dumna gata

Ka hana le Kuta Reuntang

Nanggroe sikhan ka binasa

Jinoe aneuk pakrie padan

Ureung datang that angkara

Bah le ulon teubiet u blang

Lon lawan prang Seukandan Diwa

Nibak ‘ayeb malee keujie

Bah le mate nyawong pahna

Meunan neukheun uleh Daulat

Mupakat pahlawan dumna

Teuma seuot Ahmad Faridan

Beek Janjongan dukacita

Ampon Tuanku Syahi Alam

Meuseu dumnan lam biasa

Tuanku duek sinoe di dalam

U padang ulon jak ngaza

Nyang ka hantom ulon meuprang

Siseun nyoe tuan ulon cuba

Silawet lon dalam kaluet

Hantom na buet ulon rasa

Bak siseun nyoe bah neubrie buet

Tuanku duek dalam Kuta

Jinoe Tuanku neukrah rakyat

Beumeusapat dalam Kuta

Ulon jinoe lon beurangkat

Lon meuhajat meujak ngaza

Geuduek sinan geumupakat

Meuwoe riwayat keu Syah Gumiran

Lawet lawan teuma dudoe

Po Samlakoe ulon calitra

Bagian 41

Oh troh panah dalam jaroe

Banta woe bak Balee Raksa

Troh u Balee keunan Daulat

Peugot surat Syah Gumiran

Cok keureutah deungon kalam

Syah Gumiran ka neumeurika

Meunoe haba dalam surat

Nariet mangat jampu riba

Syahdan adalah phon riwayat

Deungoe sahbat haba Raja

Seumbah saleum Duli hadharat

Nibak Daulat Seukandan Diwa

Seureuta ngon Syah Gumiran

Keupada Tuan Harun Raja

Jinoe Tuanku Putroe neupulang

Sayang rakan dum peurkara

Beek Tuanku neu keumeung meuprang

Han ek lon lawan gata le tantra

Rakyat pih le alat pih timban

Ngon pahlawan limong ploh dua

Lam limong ploh Po Janjongan

Dua droe nyan that peurkasa

Sidroe geuhoi Ahmad Faridan

Sidroe geupeunan Amin Mika

Beek Tuanku neupeujeut prang

Jinoe neupulang Cut Ratna Indra

Beuthat pih meunan Harun Makam

Lon cuba lawan keu pura-pura

Deungoe nariet payu ngon ceukang

Amin Faridan ji ek bisa

Ahmad Pari le meukalam

Bak Sulthan Harun Raja

Bah Tuanku lon balag surat

Izin hadharat Meukuta donya

Di Tuanku neuduek teutap

Ulon meubrat mangat suka

Ulon teumee laot darat

Meunyoe na hayat udep nyawa

Jinoe Tuanku neujok kireman

Di dalam nyan neuboh haba

Nariet han meukrie tuto han reumbang

Nariet keunarang Syah Gumiran

Nariet han meukrie tuto han sopan

Nariet seukang that ureung teuka

Ahmad faridan cok keureutah

Neusurat pantah sigra-sigra

Meunoe haba dalam surat

Nariet mangat na dum tuba

Seumbah saleum Ahmad Faridan

Harun Makam nama Raja

Seureuta ngon Ahmad Faridan

Teulhee sajan Amin Mika

Tuhan sidroe brie sampaikan

Keu hadapan Seukandan Diwa

Seureuta ngon Said Ba’dan

Syah Gumiran nyang that peurkasa

Nanggroe neuh jeuoh keunoe datang

Beutroh u dalam neutamong lanja

Meunyoe ka troh keunoe neulangkah

Gaki neuh lon srah ngon ie sira

Putroe Tuanku hana lon pulang

Nyang got neuriwang mita guda

Ie krueng mirah ie laot hijo

Po Linto Baro ka apon asa

Adak goh ta prang mei ka talo

Kuta hanco nanggroe karam

Seukandan Diwa meugah that beuhe

Gob cok judo dikeu mata

Syah Gumiran hikeumat jih le

Ngon beuhe sangat peurkasa

Sinan bak ta duek nanggroe ta hanco

Han ta jeut lalo keunoe u lua

Cit meubabah nyang na tuto

N sang mante himbee rimba

Crang keu crang cring Linto Baro

Dara Baro Ratna Indra

Bagian 42

Bukon sayang Linto Baro

Han le judo ka leupah gob ba

Dalam Kuta teuduek tahe

Miseu Bante tron di rimba

Punggong mariet babah mante

Ta cuba lalo keunoe u lua

Cuba teubiet keunoe u padang

Ahmad Faridan keumeung eue rupa

Beek meubabah nyang na ‘ajam

Keunoe dalam blang ta meujuara

Kamoe Tuanku han ek meulawan

Syah Gumiran panah pusaka

Ta cuba teubiet keunoe u padang

Nyang meukalam lon meu eue rupa

Bit pih adek nanggroe karam

Bak lon tuan goh lom meurasa

Miseu dumnan peu takian

Beek he intan ta meuseunda

Gata ta duek sinan di dalam

Peuleumah ‘ajam tarek that do’a

Seumbah dan salam Ahmad faridan

Dua sajan ngon Amin Mika

Ta cuba teubiet keunoe u padang

Mangat lon hantam peudeung di muka

Di langet na bintang meukarang

Habeh leukang oh teuka geumpa

Putroe Tuanku jinoe lon pulang

Lon brie nyang seudang anjeng nyang dara

Keunoe ta teubiet u dalam padang

Sinoe lon pulang peu hajat gata

Beudeuh ta eue dalam kireman

Nariet pahlawan Amin Mika

Peu peungui na lon pulang

Nariet han reumbang ta meusabda

Beek ta mariet miseu musang

Lagee eungkong rupa gata

Meunyoe cit tarek gata saktian

Keunoe lam padang peuleumah teuga

Di kamoe adek hana saktian

Gata meulandang tarek that do’a

Hana lon turie Said Ba’dan

Hana lon tuban Seukandan Diwa

Hana lon turie Syah Gumiran

Meugoh lon hantam peudeung di muka

Bit pih meunan lon meukalam

Ampon Janjongan deungoe hamba

Meu’ah Ampon Syah Gumiran

Leupah kalam hana lam dada

Haba nyang saket nariet nyang reumbang

Neu pham Sulthan Said Raja

Bak deuh neu eue lam kireman

Ampon Tuan sibarang deesya

Tamat surat wallahu ‘alam

Ahmad Faridan lipat sigra

Teuma geujok ubak Bujang

Rakyat sajan teubiet u lua

Surat jimee uleh Bujang

U padang peu teubiet lanja

Ahmad faridan nibak uroe nyan

Keumeung jak prang tantra teuka

Di likot nyan Panglima Prang

Pahlawan dua ploh laksa

Dumnan tantra Harun Makam

Geuplah bagian jeut keudua

Ladom teubiet jak u padang

Ladom sajan Amin Mika

Goh lom teubiet nyang u padang

Ladom sajan Poteuraja

Nyoe lon peugah Ahmad Faridan

U padang ka troh jihala

Di likot nyan dum pahlawan

Rakyat sajan siploh laksa

Ateuh gajah nyang pahlawan

Panglima Prang ateuh guda

Nyang di rakyat meupasukan

Geu beurjalan ngon gaki saja

Bagian 43

Ji peeh tambo palu geudrang

Jipeu ek prang phon jipuga

Mgon ji surak that meugeudham

Tasek Alam nyuem ka geumpa

Di Panglima dum geudeubang

Pahlawan peudeung ngon cokma

Nyang di rakyat sikin panyang

Ladom sandang beude raya

Ladomgulam seunapan puteh

Ladom meuceh tumbak meujunga

Oh hase alat peupeurangan

Neu beurjalan Raja Muda

Nyang jak di keu Uleebalang

Di likot nan rakyat dumna

Beungoh jitron angen Seulatan

Seupot tuan Seulatan Daya

Teutap sinan rakyat di blang

Lem Bujang ulon calitra

Ban sare troh bak Gumiran

Surat kireman dijok le sigra

Gumiran cok leugat-leugat

Neuploh lipat neu beut lanja

Gumiran Syah baca kireman

Raja Ba’dan deungoe seureuta

Na cit sajan Diwa Seukandan

Habeh neupham mangat suka

Habeh neupham haba lam surat

Nariet nyang brat siploh gunca

Le nyang saket miet nyang mangat

Nariet jeungkat bak Amin Mika

Miet nyang mameh le nyang reuhang

Syah Gumiran ka ji ek bisa

Seureuta ngon Diwa Seukandan

Miseu biram uleu bisa

Teuma mariet Syah Gumiran

Bak Cut Abang neukheun sigra

Jak ta teubiet Dalem u padang

Amat Faridan nyang that peurkasa

Deungon rakyat dum sibarang

Di padang baro ban teuka

Lon sangka beek ji meuayang

Syah Gumiran sangat peurkasa

BAN Raja deungoe haba meunan

Diwa Seukandan ek euncong guda

Bah lon kisah keu Syah Gumiran

Indra Diran ka troh teuka

Gumiran kheun bak Raja Ba’dan

Janjongan tinggai lam Kuta

Lon siuroe kumasok prang

U padang meu’en pandikar

Insya Allah Muda Seudang

Bak lon tuan do’a seujahtra

Lheuh neukheun nyan uleh Gumiran

Neutron rijang ek euncong guda

Ban jikalon le pahlawan

Diwa Seukandan empunya tantra

Jibot jaroe dua blah tangan

Jimeu kalam bak Syah Gumiran

Ampon Tuanku Syahi Alam

Seumbah laman bak Meukuta

Meunyoe Tuanku teubiet u padang

Kamoe sajan meujak ngaza

Peu cit ta duek dum di dalam

Beusajan Daulat Po Meukuta

Teuma seuot Syah gumiran

Beek hai rakan tajak gata

Kareuna prang noe that sukaran

Ahmad Faridan gagah peurkasa

Sinoe ta duek gata di dalam

Bah lon tuan teubiet u lua

Do’a beu le gata hai rakan

Lon cuba lawan tantra Raja

Oh ka mate ulon tuan

He rakan ban hajat gata

Ban jideungoe meunan kalam

Dum pahlawan han le haba

Bagian 44

Teutap geuduek dum di dalam

Sah Gumiran neupasang guda

Ka neuteupuek di beulakang

Ji teureubang dalam tantra

Guda saboh droe neuh sidroe

Reugam lam jaroe panah pusaka

Di likot nyan Diwa Seukandan

Ateuh guda plang neupoh lawa

Neumat ngon kreh nibak tangan

Sa’dun jan geuhoi nama

Nang jak dilee Syah Gumiran

Dua sajan neu seureuta

Sira geujak geumeupadan

Meunoe kalam geubeurkata

Nyang meututo Syah Gumiran

He Cut Abang deungoe hamba

Digata Dalem ngon pahlawan

Dilon tuan bah sidroe saja

Deungon tantra tamong keumbali

Nyang nanggri ulon peu pahna

Pat nyang han ek uroe dudoe

Cit na kamoe soe theun sangga

Insa Allah he Po Samlakoe

Bak kamoe ateuh jeumala

Deungon tulong Tuhan Sidroe

Neubrie beusampoe troh ban pinta

Teungoh geujak geubeurjalan

Ahmad Faridan kalon rupa

Ban jikalon Ahmad Faridan

Sah Gumiran ka troh teuka

Hana tantra di beulakang

Dua sajan ngon syeedara

Mantong jeuoh wahe rakan

Siteuntang tangieng ngon mata

Teuma jikheun dum bak rakan

Pahlawan jipasang guda

Rot deh rot noe geubeurjalan

Meuhadapan dua tantra

Jipeulheuh nafah Ahmad Faridan

Angen datang sikutika

Teuma neutupeu le Syah Gumiran

Yoh masa nyan neutheun sangga

Neu beut do’a bak Beurahman

Teudong yoh nyan Jabal ‘aqla

Angen jipoet riboet kon wayang

Ka neutham ngon gunong raa

Han ek leupah le poet u blah noe

Ulak jinoe ateuh tantra

Jipoet keudeh ka roh keunoe

Ka meuwoe ateuh Panglima

Geuboh ateuh gob roh ateuh droe

Ka meupaloe rakyat binasa

Miseu batee ta rhom u pante

Meuhat akhe keunong muka

Meunan miseu wahe adoe

Tuhan Sidroe peutron bala

Soe khianat pulang keudroe

Angen tampoe rhot cong guda

Hantom dum nan angen tarek

Meubalek ngon gajah meunta

Ladom rakyat na ban geulayang

Keudeh manyang jipoe lam hawa

Sigoe dumpeu deungon kandran

Meulayang-layang angen timpa

Rhot u bumoe teuma lheuh nyan

Mate sinan nyawong pahna

Ladom ji bapoe dalam laot

Ladom ji bapoet dalam rimba

Ladom mate sinan layee

Meuabee di dalam tantra

Amat Faridan hana jithee

Dumnan padee rakyat pahna

Ban jikalon rakyat mate

Ji hirup le nafah sigra

Teudoh angen leumah nanggroe

Ka meuwoe ban miseu nyang ka

Bagian 45

Neuthee sinoe le Syah Gumiran

Han le tajam angen teuka

Gumiran Syah teupok tangan

Gunong ka lham miseu nyang ka

Gadoh gunong angen pih tan

Meupandang ban dua tantra

Sayah Gumiran panah bak jaroe

Neuseudoe bak Nanggroe Raja

Sinoe neurhom Po Samlakoe

Sideh nanggroe jeut keu paya

Lheuh nibak nyan teuma dudoe

Panah jiwoe lam tangannya

Neusroh keudeh teuma lom dudoe

Jeup-jeup nanggroe neu geulawa

Oh myam meumat Tasek Alam

Harun Makam nama raja

Sireutoh tujoh ploh Nanggroe Sulthan

Taklok keunan ubak raja

Habeh bandum ka teureuban

Nyan buet tangan Syah Gumiran

Ateuh guda neu meukandran

Sigala alam neu pohlawa

Pat nyang leumah deuh meubayang

Neu rajam ban sagai donya

Rakyat mate nanggroe karam

Panah simpan jeut keu paya

Miseu laot meugeulumbang

Meunan macam nanggroe raja

Nyan nyang na treuk wahe abang

Lingka dalam Poteuraja

Laen bandum ka teureuban

Keunong hantam habeh pahna

Panah pusaka dalam jaroe

Tutong bagoe dum nuraka

Sinoe neusrom dalam jaroe

Ji seudoe bak nanggroe raja

Lheuh jipajoh eumpeun keudroe

Leugat jiwoe ubak Banta

Meunan-meunan geunap uroe

Teutap oh noe Syah Gumiran

Angen barat jipoet malam

Beungeh datang angen teunggara

Ulon peuduek Syah Gumiran

Diwa Seukandan lon calitra

Seureuta ngon Ahmad Faridan

Harun Makam nyang poe tantra

Ban meuteumee meuhadapan

Ahmad Faridan Seukandan Diwa

Teuma mariet Ahmad Faridan

Seubuet tuan nama gata

Nyang ka hantom ulon pandang

Cuba kheun ban lon deungoe nyata

Teuma seuot Muda Seudang

Nyoe keuh laman Seukandan Diwa

Meulintee Raja Said Ba’dan

Aduen Gumiran muda bahlia

Bak uroe nyoe lon masok prang

Lon cok bintang lam istana

Ban sare troh u teungoh blang

Meurumpok lawan adek ngon gata

Dilon adek lon peugah nan

Digata intan soe beurnama

Nyang ka hantom ulon pandang

Uroe nyoe rakan ta meungieng mata

Teuma seuot muda pahlawan

Ahmad Faridan nan lon hamba

Panglima Raja Harun Makam

Aduen pahlawan Amin Mika

Bak uroe nyoe lon teubiet u blang

Meurumpok lawan Seukandan Diwa

Jikalau nyoe gata he Sulthan

Peu na haluan keunoe ta ba

Jikalau na ta ba haluan

Ta brie kaman lon cuba rasa

Ban neu deungoe haba meunan

Neu seuot yoh nyan Seukandan Diwa

Bagian 46

Na bak ulon wahe rakan

Na haluan ulon teuh bawa

Teutapi adek deungoe lon peugah

Cuba hah babah mangat ta rasa

Ahmad Faridan hah le babah

Kreuh le pantah ka neuhila

Ban neututoek dalam babah

Sinan le reubah ka teurhanta

Ka keuh mate Ahmad Faridan

Beungeh pahlawan dua ploh lima

Ka keuh mate sidroe pahlawan

Buet tangan Seukandan Diwa

Ban jakalon Ahmad Faridan

Sa’idunjan sangat bisa

Ka ji tajoe bandum keunan

Ateuh pahlawan Seukandan Diwa

Keunan ji ek dum meurumpan

Miseu kawan aneuk kadra

Hana jan troh keunan datang

Sa’idunjan lom jirasa

Oh ban teupat teupat deungon badan

Pahlawan habeh binasa

Habeh bandum ka teureuban

Dua ploh nam pahlawan raya

Dua ploh nam wahe taulan

Ahmad Faridan nyang peutua

Ban jikalon mate pahlawan

Panglima Prang beungeh raya

Lhee ribee lapan ploh Panglima Prang

Ji ek curam ateuh guda

Laen rakyat di likot nyan

Ji ek sajan ngon panglima

Rakyat ramee hana padan

Diwa Seukandan sidroe saja

Keunan ji ek dum meurumpan

Ji surak ban meutaga raya

Peudeung cokma ngon geudeubang

Panglima Prang pasang guda

Ji keumeung drop Diwa Seukandan

Dumna rakan ka jilingka

Neumat bak wie Sa’idunjan

Uneun Tuan peudeung raya

U likot pih neu peuriwang

Rakyat pansan meuploh laksa

Nyang rot kiri baro lapang

Di likot nyan ka meubanja

Han jeut keunong meu bubayang

Sa’idunjan sangat bisa

Bit pih dumnan ka teureuban

Hana rakan hate liya

Maken ji ek keunan curam

Han ji tujan beungoh sinja

Tujoh uroe tujoh malam

Sikeujab hana tom reuda

Susah bacut Diwa Seukandan

Seubab taulan rakyat that bha

Teutap sinan dalam kawan

Keu Syah Gumiran ta riwang teuma

Jeuoh nanggroe leupah jalan

Indra Diran neu pohlawa

Deungon panah dalam reugam

Sigala alam neu peuteuka

Oh nyang neumat Harun Makam

Seukalian habeh pahna

Pat nyang leumah deuh meubayang

Neu rajam ngon panah pusaka

Seukandan Diwa nyuem sukaran

Neu tupeu ban le Syah Gumiran

Ka neutarek taloe keukang

Keudeh neuriwang bak padang nyang ka

Troh le keunan Syah Gumiran

Indra Diran pantah raya

Neu eue aduen that sukaran

Neu rajam u dalam tantra

Rakyat mate dum teureuban

Diwa Seukandan lheuh u lua

Bagian 47

Siploh ribee sigoe karam

Panah riwang ubak Banta

Lom sigoe treuk Banta rajam

Habeh simpan bandum pahna

Nyang na tinggai dua ploh droe

Goh lom sampoe ajai teuka

Habeh jiplueng dum sinaroe

Leugat jiwoe dalam Kuta

Oh sare troh keudeh jiwoe

Jiboet jaroe ubak Raja

Ampon Tuanku Syahi Alam

Jinoe neupulang Ratna Indra

Beek Tuanku le neu meuprang

Ureung datang that peurkasa

Habeh mate dum pahlawan

Ahmad Faridan ka binasa

Laen teuma Panglima Prang

Pahlawan dua ploh lima

Teuma rakyat dum sibarang

Bak bilangan siploh laksa

Habeh bandum ka teureuban

Buet tangan Seukandan Diwa

Laen nibak nyan Tuanku droe

Dumna nanggroe habeh pahna

Habeh karam dum sinaroe

Nyan buet jaroe Syah Gumiran

Nyang na tinggai cit nanggroe nyoe

Laen ka dhoe jeut keu paya

Laen bandum ka teureuban

Keunong hantam jeut keu data

Sireutoh tujoh ploh nanggroe Sulthan

Habeh karam ban sineuna

Oh nyang neumat Tasek Alam

Habeh simpan Po Meukuta

Hana rakyat jiba sajan

Dua kandran jipohlawa

Sidroe geuhoi Syah Gumiran

Sidroe geupeunan Seukandan Diwa

Nyan keuh judo Tuan Putroe

Raja Nanggroe Padang Shafaran

Guda saboh droe neuh sidroe

Bak jaroe na kreh peunawa

Hana jan rab troh ta peutoe

Rhot di sinoe ateuh guda

Hana peudeung ngon jimeucang

Sa’idunjan sangat bisa

Ban ji tunyok bak pahlawan

Reubah sinan le teurhanta

Teuma meu ek dum sibarang

Tujoh malam meuglet lingka

Oh sare troh Syah Gumiran

Ji simpan ngon sikleeb mata

Guda saboh droe neuh sidroe

Lam jaroe panah pusaka

Han jipiyoh geunap uroe

Jeup-jeup nanggroe ji peuteuka

Guda pantah miseu kilat

Han jan siat ka troh jiteuka

U timue sigoe jipeurab

Keudeh u barat sigoe jigisa

Na nyuem nanggroe ka kiamat

Ta eu bakat meuleu lumba

Yoh goh keunoe lom jipeurab

Yoh goh kiamat mideun raja

Nyang got jinoe Ampon Daulat

Ta pulang leugat Cut Ratna Indra

Yoh goh lom troh Syah Gumiran

Ji simpan ngon kuta-kuta

Nyang got beek le neu meuwayang

Jak jok pulang Putroe Muda

Yoh goh keunoe lom jisiram

Beek ji simpan Po Meukuta

Ban Raja deungoe meunan kalam

Ji ek pitam ngon ie muka

Rakyat mate nanggroe karam

Harun Makam pucat muka

Bagian 48

Yoh nyan mariet Harun Makam

Neuhoi rijang Amin Mika

Laen teuma Uleebalang

Dum sibarang Raja-raja

Troh le keunan u hadapan

Harun Makam neu meusabda

Wahe aneuk Uleebalang

Panglima Prang Amin Mika

Ka hana le rakyat di blang

Panglima Prang habeh pahna

Dua ploh limong Uleebalang

Ahmad Faridan tinggai donya

Laen nibak nyan teuma dudoe

Dumna nanggroe habeh pahna

Jinoe ta pulang Tuan Putroe

Yoh goh sampoe keunoe teuka

Ban jideungoe meunan kalam

Beungeh pahlawan Amin Mika

Laen nibak nyan seukalian

Pahlawan dua ploh lima

Nyang na tinggai dum di dalam

Sajan pahlawan Amin Mika

Hate saket muka masam

Miseu biram jiek bisa

Ji deungoe aduen di jih ka tan

Ahmad Faridan ka binasa

Sigoe bandum ji meukalam

Nyang phon Tuan Amin Mika

Jiboet jaroe dua tangan

Bak Sulthan ji meuhaba

Ampon Tuanku Syahi Alam

Pahlawan heundak meuhaba

Putroe Tuanku hana lon pulang

Meugoh hilang nyawong hamba

Rakyat mate nanggroe karam

Digob Tuanku tan binasa

Patot jinoe nanggroe ta pulang

Nwayang neu meuhaba

Teuma seuot Harun Makam

Beek ta sagang he Panglima

Meunyoe aneuk lom ta meuprang

Akhe datang teulah teuka

Amin Mika lom jibantah

Ji marah keu Poteuraja

Tuto paleh beek ta peugah

Maken juwah Amin Mika

Bit Tuanku hana malee

Miseu asee ek di muka

Keupeu ta cok masa dilee

Cit ka ta thee raya bala

Jinoe pulang neukheun bak kee

Hana malee Poteuraja

Aduen kee mate dalam abee

Jinoe dikee toh keu bila

Nanggroe hancoe rakyat padee

Nyang dikee goh lom kurasa

Peu ta takot gata di juree

Lon theun ulee barang bahya

Sireutoh tujoh ploh nanggroe lon prang

Han soe lawan Amin Mika

Singoh kuteubiet sidroe u padang

Ahmad Faridan kujak tueng bila

Bak gob meugah Diwa Seukandan

Meugoh lon lawan han gadoh bisa

Oh meuteumee ku mat bak tangan

Keudeh u manyang ku rhom lam hawa

Bak soe meugah Syah Gumiran

Di dalam tangan panah pusaka

Oh meuteumee singoh dalam blang

Aneuk panah nyan kusrom bak muka

Ku cok meuligoe kutiek u laot

Kuta nyan kuboet kutiek lam rimba

Kamoe di blang sideh meukalot

Peu ta takot gata lam kuta

Na keuh pura gob peukeujot

Ka yoe atot di Po Meukuta

Bagian 49

Goh lom ta eu bak kee meulot

Neudong di likot neu meujuara

Amin Mika that meupot-pot

Na nyuem teumakot Raja raya

Seubab neu deungoe jimeucarot

Neu turot ban kheun Panglima

Han that neujeut bantah pahlwan

Harun Makam seungab haba

Kaen puteh keu seureuban

Ija Syam bajee plah dada

Beek ta khem-khem wahe abang

Lon keumarang tan biasa

Na ta deungoe wahe rakan

Lon peugah ban ubak gata

Seubab ulon wahe taulan

Lon keumarang lam saket pha

Seb keuh dum nan wahe adoe

Teutap ohnoe lon boh banja

Lon peuriwang ubak bunoe

Raja Nanggroe Amin Mika

Teutap sinan dum sibarang

Beusar seudang cut ngon raya

Geuduek sinan dum sinaroe

Teungoh meuproe jak tueng bila

Amma ba’du siploh sampoe

Po Samlakoe lon calitra

Ban dua ngon aduen adoe

Judo Putroe Ratna Indra

Habeh talo ureung nanggroe

Panah jiwoe lam tangannya

Lheuh nibak nyan teuma dudoe

Gumiran woe dalam kuta

Oh sare troh u leun meuligoe

Tron Samlakoe ateuh guda

Gumiran ek bak teumpat droe

Guda jiwoe dalam rimba

Troh u balee Po Samlakoe

Ban dua droe ngon syeedara

Duek bak keuta nyang meusujoe

Mumat jaroe ngon deungon Raja

Troh le keunan dum sinaroe

Kdhi Meuntroe Raja-raja

Jak meurumpok ngon Samlakoe

Jak mat jaroe Syah Gumiran

Neu cok sutra deungon sujoe

Neu pasoe dalam jeureugha

Cok keureutah mat bak jaroe

Surat jinoe Syah Gumiran

Meunoe haba dalam surat

Ta deungoe sahbat dua banja

Seumbah saleum Syah Gumiran

Keupada Tuan Harun Raja

Di likot nyan dum sibarang

Panglima Prang Amin Mika

Beuna neuthee he Janjongan

Nyoe kireman habeh haba

Baroe lon teubiet keudeh u padang

Lon eu piasan jak kalon Banda

Lon jak eu ceue Tasek Alam

Oh na makam Nanggroe Raja

Bak lon jak-jak Po Janjongan

Srot lam reugam panah pusaka

Ban sare rhot ateuh bumoe

Hanco nanggroe sikhan donya

Keu jeut lon teubiet keudeh u padang

Ahmad Faridan lakee eue rupa

Lon sangka tarek Ahmad Faridan

Yoh goh na lawan sabe padra

Ban sare troh u teungoh padang

Miseu beulalang cempala seuba

Rakyat ka mate nanggroe ka karam

Saleh sidum nan gadoh lam hawa

Jikalau seb Putroe ta pulang

Meuhan lon rajam lom lam kuta

Nariet lon nyoe bukon meuwayang

Dalam kireman ta eue nyata

Bagian 50

Kuta lon hanco gata lon rajam

Meuligoe Tuan lon srom lam hawa

Nyang got Tuanku Putroe ta pulang

Seubab that sayang lon kalon gata

Insya Allah ngon tulong Tuhan

Singoh lon rajam keunan lamkuta

Dalam surat nyoe habeh khabaran

Hana le pantang gaseh seutia

Ta eue singoh buet Syah Gumiran

Miseu boh mamplam geulawa mita

Keu jeut han le lon teubiet u blang

Baroe lon jalan teulah lon raya

Seubab lon deungoe Ahmad Faridan

Deungon lon tuan saleh ek padra

Meusie dumnan han peu kheun droe

Meu bak jaroe hana meurasa

Ka troek bak khad kiamat nanggroe

Han jeut bak kamoe wayang seunda

Saleh ka grak bak Tuhan Sidroe

Neu gulong nanggroe kiamat donya

Tamat surat Po Samlakoe

Lipat jinoe neu rhom lam hawa

Surat jipoe ban geulayang

Rhot lam tangan Raja raya

Ka neucok le Harun Makam

Neuploh rijang neubeut sigra

Ban neukalon haba lam surat

Yoh nyan pucat muka Raja

Neudeungoe nariet bandum brat that

Hana meusikrak nyang peunawa

Teuma mariet Ampon Daulat

Neukheun teupat bak Amin Mika

Wahe aneuk Uleebalang

Nyoe kireman habeh haba

Tuan Putroe jinoe ta pulang

Meuhan karam ngon istana

Geutanyoe mate nanggroe karam

Le saktian Syah Gumiran

Nyan dum tarek Ahmad Faridan

Hana meujan ji geulawa

Hana jeut le ta meuwayang

Ka seb dumnan ube nyang ka

Nibak ulon meunan reumbang

Beek le sagang he Panglima

Amin Mika seuot rijang

Meu gurantang ngon suara

Ngon amarah hana bagoe

Jidhoet jinoe Poteuraja

Beek neupeugah nibak kamoe

Ban hajat droe gata Raja

Meungka uroe hanjeut malam

Meungka agam hanjeut dara

Meugka musoh hanjeut rakan

Beurang kajan pih ku ngaza

Ulon teuh nyoe tan le kalam

Kon miseu ban haba gata

Ban Raja deungoe haba meunan

Seungab yoh nyan tan le haba

Hingga malam le ngon uroe

Dum sinaroe geumeujaga

Uleebalang dum sinaroe

Keuchiek Sagoe ngon Bentara

Geu meupakat dum sinaroe

Singoh uroe geujak ngaza

Keumah pakat ka seuleusoe

Beungoh uroe teubiet faja

Ka meusue le deungon geundrang

Panglima Prang pasang guda

Hingga mureh datang siang

Ka troh u blang rakyat dum na

Amin Mika di baresan deupan

Di likot nyan rakyat dum na

Laen Meuntroe Uleebalang

Tan di Bujang ngon Peutua

Habeh bandum teubiet u blang

Jak peungon prang Amin Mika

Bagian 51

Teungoh geu ek dum meurumpan

Geu surak ban taga raya

Ta cok teupong ngon manisan

Ta ligan jampue ngon sira

Han ek habeh lon atoran

Syah Gumiran ulon calitra

Ban neu deungoe meusue geundrang

Beudoh rijang Banta Muda

Hate suka hana macam

Bak abang neu mariet sigra

Wahe Dalem lon Cut Abang

Lagee piasan uroe nyoe ka na

Beek ta teubiet le u padang

Sinoe di dalam ta meujuara

Beek le kiroh beek le kiyam

Bah le curam ji ek lanja

Sapeu pakat saboh padan

Syah Gumiran Seukandan Diwa

Laen Meuntroe Uleebalang

Dum sibarang neubrie aja

Teutap bandum hana kalam

Ureung datang hate liya

Keumang-keumang bungong mancang

Lam keunarang angen timpa

Nyoe lon peugah ureung datang

Rakyat di blang lon calitra

Amin Mika ka troh u blang

Jipasang di ateuh guda

Laen teuma dum sibarang

Pahlawan dua ploh lima

Laen Meuntroe Uleebalang

Dum sibarang Raja-raja

Habeh teubiet dum u padang

Meusidroe tan le lam kuta

Bak uroe nyoe prang sudahan

Seudong ngon biram meuseunoh bisa

Rakyat ji ek dum boh singgam

Meuploh kuyan meung Panglima

Han lon tudum boh had langam

Bak bilangan troh meulaksa

Rakyat jidong sang pupalang

Meureuntang na dum bak nangla

Le that rakyat dong meurumpan

Ngon pasukan meujeumba-jeumba

Jipeeh tambo palu geundrang

Gong ngon canang hareudam mama

Jiyoeb suleng ngon nafiri

Kudangdi deungon biola

Deungon alam ji peunari

Pupanji meuploh wareuna

Sangkaikala ngon meubunyoe

Bak sagoe Tuan Panglima

Rakyat ji ek jroh meutabu

Nyang seu-ue Geuchiek Panglima

Ji eue lawan tan meurumpak

Ji peujak u gaki kuta

Pahlawan nyang that seureuloe

Dua ploh droe that peurkasa

Keunan ji ek dum meupeudoe

Ban peut sagoe ka jilingka

Ji eue lawan tan meusidroe

Ji peutoe bak pinto kuta

Teuma mariet dum pahlawan

Ji meukalam Amin Mika

Hoe saleh ka Said Ba’dan

Nanggroe Shafaran keunoe teuka

Ta cie teubiet keunoe u padang

Harun Makam keumeung eue rupa

Hoe saleh ka Diwa Seukandan

Judo intan Ratna Indra

Ta cuba teubiet keunoe dalam blang

Muda pahlawan meukalon rupa

Hoe saleh ka Syah Gumiran

Rupa na ban meuh suasa

Meunyoe na nafsu keu bungong karang

Sinoe lon pulang bak ujong cokma

Bagian 52

Meugah tarek adek Sulthan

Di dalam reugam panah pusaka

Ta cuba teubiet keunoe u padang

Sinoe lon pulang Teumuda gata

Beusoe seureuloe peudeung tungang

Ujong geudeubang gantoe Teumuda

Keunoe ta teubiet siat beurijang

Peudeung geudeubang eumpeun jih hana

Po Samlakoe Muda Bangsawan

Beek di dalam ta meujuara

Beek meung babah nyang na tajam

Gata di dalam kamoe di lua

Baroe ta poh Ahmad Faridan

Uroe nyoe rakan lon tuengbila

Ka teubiet keunoe he nyak beurijang

Yoh goh lon pasang gajah lam kuta

Pat droe tarek gata meulandang

Yoh goh na lawan nyang sabe padra

Ta cuba teubiet keunoe u padang

Mangat lon hantam peudeung di muka

Amin Mika mariet lagee nyan

Syah Gumiran neuseot sigra

Neu deungoe nariet saket dum guncang

Neu groeb rijang bak Balee Raksa

Ateuh Diwa neu ek rijang

Syah Gumiran ka ji ek bisa

Seureuta ngon Diwa Seukandan

Ateuh pupalang meu’en panika

Syah Gumiran panah lam jaroe

Neukheun meunoe sikrak haba

Soe saleh nyang meuhoi kamoe

Peurab keunoe meukalon rupa

Lon deungoe nariet nyuem lham nanggroe

Seungkoe-seungkoe bisa-bisa

Hantom lon deungoe nyang ka puroe

Bak siseun nyoe ji ek bisa

Wahe Dalem rancak han soe

Bak sangka droe that peurkasa

Mata buta geuliyueng tuloe

Barang gasoe han lon taba

Teungoh teungeut lon ta peugoe

Theun boh gandoe Syah Gumiran

Bit neukalon kamoe meulandang

Hate tan girang badan tan liya

Na padum na Dalem ba rakan

Syah Gumiran keumeung bileung sa

Lon sangka beek neu meuwayang

Nyang got ta riwang yoh goh binasa

Jak le tawoe keudeh u dalam

Indra Lailan keunoe ta ba

Amin Mika seuot rijang

Beek that ‘ajam ta peugah haba

Ta teubiet keunoe u geulanggang

Indra Lailan bak ujong cokma

Teuma seuot Syah Gumiran

Hai rakan beek that kreuh jungka

Lon takot soh Tasek Alam

Harun Makam gadoh nama

Meunan nariet Muda Seudang

Neu rajam ateuh Panglima

Sinoe neu srom le Gumiran

Sideh keunong Tantra Raja

Na lhee ribee sigoe karam

Nyang pansan na siploh laksa

Rakyat mate dum teureuban

Panah riwang ubak Banta

Nyang bunoe kon seungab diam

Seubab sayang neu eue tantra

Nyang bunoe kon cit lam neu eh

Nyoe phon peudeh camplie China

Neurhom keunoe neurhom keudeh

Teubai lipeh hana bida

Rakyat mate dum teu eh eh

Dum beureuteh aneuk langla

Syah Gumiran hate peudeh

Neu bareh bak Tantra Raja

Bagian 53

Ateuh Diwa neu meutangkeh

Neuhoi keudeh Amin Mika

He Dalem Cut nyang that ‘areh

Cuba pileh boh keureuma

Lon di dalam sinoe ku eh

Gata pileh lon geulawa

Ta peugah seb dum nyang habeh

Ta pileh beu peunoh raga

Meunyoe ka seb beudoh jak woe

Meung goh lom troe beek ta gisa

Bak peunyuem lon hana lom troe

Boh kayee nyoe cit mangat rasa

Dilon Dalem lon seuleuah

Hana payah lon keulua

Ulon sidroe lon meupayah

Muntah darah cit na gata

Meunyoe goh seb beek ta minah

Aneuk panah leumak raya

Bak peunyuem lon hana lom troe

Pakon Adoe ta weeh hana

Nyang got jinoe ta woe pantah

Yoh goh payah langoe guda

Meunyoe le that got ta tamah

Meuhat mirah ie kuala

Beek bunoe kon ta meuharah

Cit meubabah nyang na raya

Yoh goh lom jaga sidom mirah

Nyang juwah sidom seurangga

Tuboh liya hate gundah

Oh ji ampah sampoe lam mata

Bunoe beungeh uleu juah

Yoh goh meugah seudong bisa

Oh ji pandang gadoh juah

Oh ji rudah buta mata

Meunan nariet Gumiran Syah

Neurhom pantah Amin Mika

Keunong ureung nyawong sudah

Nyang meugah lhee ribee pahna

Lhee ribee lapan ploh Panglima Prang

Dum sibarang tinggai donya

Bandum mate ka teureuban

Nyan buet tangan Syah Gumiran

Laen rakyat di likot nyan

Lam bilangan siploh laksa

Nyang na tinggai wahe rakan

Pahlawan dua ploh lima

Amin Mika ulee kawan

Enam ngon nyan nyang peurkasa

Laen rakyat di likot nyan

Bak bilangan nam ploh laksa

Kadhi Meuntroe tan Dibujang

Deungoe Abang lon calitra

Angen barat jipoet siang

Oh malam datang keunong sa

Habeh mate Panglima Prang

Pahlawan beungeh lagoina

Yoh nyan beungeh dua ploh nam

Ji proh meukham pinto kuta

Rakyat ji ek dum meurumpan

Sudang pacang jiloet sigra

Ji peubeude ngon seunapan

Meuriam deungon ramtaga

Rakyat ji ek sang bupalang

Troh u dalam tamong lanja

Ngon jisurak suara meugham

Tasek Alam nyuem meugeumpa

Ban peut sagoe ji ek curam

Ureung di dalam hana haba

Panglima deungon Raja Ba’dan

Seungab diam duek lam kuta

Nyang na rancak Syah Gumiran

Neu linggang di ateuh guda

] Di likot nyan Diwa Seukandan

Bak tangan meuriam lila

Sigoe neutot jeura hitam

Rakyat pansan siploh laksa

Bagian 54

Sinoe meuthum sideh meutham

Neu linggang di ateuh kuta

Beude raya lam seunatang

Aneuk curam dum u lua

Siblah jaroe neumat tunam

Siblah tangan beude raya

Hana putoh sue meuriam

Diwa Seukandan utoh meujra

Meunan sabe wahe Abang

Gumiran ulon calitra

Ban neukalon dum pahlawan

Ka curam bak pinto kuta

Peulheuh panah dalam reugam

Rakyat lapang lingka kuta

Maken ji ek dum meurumpan

Dum nan simpan han jikira

Nyang bunoe kon neu meuwayang

Bak kira sang jitem gisa

Ban neukalon that sukaran

Ka ji hantam pinto kuta

Peulheuh panah dalam reugam

Pahlawan ka tinggai donya

Amin Mika tan neurajam

Laen simpan dum binasa

Nyang na tinggai cit limong blah droe

Mariet jinoe Syah Gumiran

He Dalem Cut tanglong nanggroe

Nyan buet jaroe ureung teuka

Nyang got Dalem gisa ta jakwoe

Beek tinggai Binoe mate gata

Hana lon poh Gata sidroe

Samlakoe lon kalon rupa

Meunyoe bit-bit han tatem woe

Theun jinoe kurhom di muka

He Dalem Cut ulon peugah

Gata nyang sah si syeedara

Beek meunafsu buloh beukah

Tan paidah bak lon kira

Na dum Gata miseu birah

Nyang meugah hana kutaba

Pileh beuhabeh dum boh tufah

Lon seuleuah cit keu Gata

Beek ta kheun tan ulon peugah

Dudoe teulah tan digata

Syah Gumiran that bit gagah

Meunyuem gundah Lem Panglima

Amin Mika teuka pike

Jinoe han le ulon gisa

Nanggroe karam rakyat mate

Han meusampe hajat pinta

Dang-dang meunan teuka pike

Ka neurhom le Syah Gumiran

Aneuk panah sue meudeungong

Rab bingong Teuku Panglima

Neusaja han neupeukeunong

Neurhom manyang le Gumiran

Amin Mika ka teukeujot

Laju jisuroet bak pinto kuta

Ban neukalon ka jisuroet

Miseu riboet neugeulawa

Ban rakyat eue Amin suroet

Plueng dilikoet meuleulumba

Oh sare troeh u teungoh padang

Ji pasang le ateuh guda

Peulheuh panah Syah Gumiran

Jarang-jarang neugeulawa

Panglima plueng ji teureubang

Tinggai guda plang han jikira

Seubab teumakot gadoh malee

Meuhei hei jiplueng ban guda

Rakyat jiplueng meuhah-meuhah

Ban asee grah lam uroe kha

Dalam padang apoeh-apah

Langoe darah sang kuala

Jareung-jareung peulheuh panah

Gumuran Syah meusuara

Bagian 55

Ho ka Gata dum pahlawan

Beudoh rakan ta meudo’a

Ban jideungoe dum pahlawan

Ji dapan di ateuh Diwa

Ji eue musoh jiplueng curam

Ji surak ban taga raya

Maken jiplueng leubeeh curam

Pahlawan han le jigisa

Ka keuh taloe Harun Makam

Ureung landang that peurkasa

Amin Mika troeh u dalam

Harun Makam meusuara

Turon sabda bak Sulthan

Bak pahlawan Amin Mika

Wahe aneuk Uleebalang

Gumiran ka ta peupahna?

Lon eue Gata ka tariwang

Diwa Seukandan ka binasa

Gata dilee troeh u dalam

Rakyat di blang goh jigisa

Lon eue Gata muka masam

Raja Ba’dan Gata nyang singkla

Bak meunyuem lon ka meunang prang

Ureung datang ka jiguda

Pakrie Gata troeh u dalam

Rakyat di blang goh jigisa

Peu ta puwoe Uleebalang

Rampasan bak ureung teuka

Jikalau na he pahlawan

Toh pakrie ban lon eue rupa

Poteuraja meunan kalam

Seuot rijang Amin Mika

Seureuta ngon jiboet jaroe

Ampon kamoe Po Meukuta

Ampon Tuanku Syahi Alam

Nyawong badan milek Gata

Beuthat taboh lon cong pacang

Boh neureupang takue hamba

Jinoe Tuanku Putroe neupulang

Ureung landang that peurkasa

Kamoe di lua Gobnyan di dalam

Miseu boh mamplam keunong geulawa

Habeh mate dum pahlawan

Sikhan kawan nyang ka pahna

Laen rakyat Panglima Prang

Meusidroe tan le meugisa

Adak kon pantah dilon tuan

Karab simpan nyawong keulua

Daulat Ampon lon jeunulang

Neujoek pulang Ratna Indra

Bak uroe nyoe le beurijang

Meuhan datang keunoe teuka

Teuma seuot Syahi Alam

Jroh that reumbang haba Gata

Hana peu le ta meukalam

Kalon tuban buet digata

Poteuraja beungeh han ban

Ka neupulang timplak haba

Masa dilee ka ulon tham

Ta kheun abang hana bila

Ta dhoet ulon meugeurantang

Ta kheun intan ta tuengbila

Digob bandum ka geu meungprang

Gata intan goh ta rasa

Ulon teu iem han lon sagang

Lon kira sang that peurkasa

Lon sangka biet aneuk agam

Han lon tuban aneuk dara

Lon kira na ban ta peugah

Gumiran Syah ta peupahna

Hana lon thee gata birah

Cit meubabah nyang that raya

Yoh di jeuoh ta meuharah

Ta plueng pantah oh meusua

Meunan nariet Harun Makam

Seuot rijang Amin Mika

Bagian 56

Ampon Tuanku meuploh ribee

Meu’ah lon lakee bak sarpada

Beuthat neukheun asee-asee

Han malee lon Po Meukuta

Seubab teukeujoet gadoh malee

Ha Panghulee ka troeh masa

Ka troeh bak had taloe kamoe

Bak siseun nyoe gadoh nama

Nyang dilee kon hana meunoe

Bak siuroe nyoe han ek padra

Ampon Tuanku Duli Hadharat

Jaroe lon angkat ateuh jeumala

Jinoe Tuanku neubalah surat

Nariet beumangat dum asoe kaya

Ube nyang ka Duli Hadharat

Sujud khideumat Syah Gumiran

Amin Mika meunan kalam

Harun Makam hana dawa

Sapeu pakat dua Gobnyan

Kireman geusurat sigra

Amin Mika peugot surat

Deungoe sahbat lon calitra

Meunoe haba dalam surat

That bit mangat ban asoe kaya

Ampon Tuanku Syahi Alam

Said Ba’dan nama raja

Di likot nyan Diwa Seukandan

Syah Gumiran nyang peurkasa

Meu’ah Ampon dum sibarang

Harun Makam le that deesya

Jinoe Tuanku Putroe lon pulang

Neu preeh di blang Po Meukuta

Bak nyang meucok keunan meuintat

Duli Hadharat Meukuta Donya

Nafsu ulon beujeut keu sahbat

Ampon Daulat beujeut syeedara

Adak hanjeut neu meusahbat

Neutueng hai Daulat keu hamba sahya

Beudoh neu eue dalam surat

Jaroe lon angkat ateuh jeumala

Beugot Tuanku neu peukhideumat

Jinoe lon intat Cut Ratna Indra

Jinoe Tuanku neulheuh hajat

Kamoe nyang intat sajan Meukuta

Meunan haba dalam surat

Lheuh geulipat geuyue bawa

Lheuh nyan geujoek ubak Bujang

U padang ji baplueng lanja

Leupah bujang jak mee surat

Geumupakat dalam Kuta

Amin Mika mariet leugat

Ampon Daulat Po Meukuta

Jinoe Tuanku Putroe lon intat

Deungon rakyat bala tantra

Harun Makam seuot pantah

Han peu hai Panglima

Lheuh nyan geuhoi Bujang Meuntroe

Ban sinaroe tuha muda

Geu peutron le Tuan Putroe

Peu ek jinoe ateuh rungka

Ban sare troh u leun meuligoe

Ban sinaroe Raja-raja

Siploh gajah meubalohan

Indra Lailan Ratna Indra

Geu peuteubiet le di dalam

Rakyat sajan meuploh laksa

Seureuta ngon Harun Makam

Ka sajan ngon Amin Mika

Nyang jak dilee Harun Makam

Di likot nyan Amin Mika

Samat teungoh Tuan Putroe

Rakyat sinaroe ireng lingka

Ateuh kandran dum sinaroe

Ureung meusoe Raja-raja

Geutot beude ngon meuriam

Tasek Alam nyuem meugeumpa

Bagian 57

Geupeeh tamboe palu geundrang

Arak Tuan Putroe Muda

Han ek peugah wahe abang

Piasan peumeu’en mata

Teungoh geujak geubeurjalan

Lam Bujang ulon calitra

Bujang ka troeh u teungoh blang

Tamong rijang dalam Kuta

Ban sare troeh bak Gumiran

Kireman dijok le sigra

Gumiran Syah neucok le leugat

Neuploh lipat lajue neubaca

Habeh maklum haba lam surat

Neulipat peuduek bak meja

Gumiran Syah mariet leugat

Neu peugah bak Seukandan Diwa

Seureuta ngon Said Ba’dan

Neu peugah pham haba Raja

Gumiran neuhoi pahlawan

Dum sibarang tuha muda

Jak ta teubiet dum u padang

Ampeung Tuan ureung teuka

Amin Mika keunoe datang

Harun Makam pih seureuta

Tuan Putroe jinoe pulang

Harun Makam meunan haba

Ban geudeugoe meunan kalam

Uleebalang hate suka

Ji beudoh le dum pahlawan

Panglima Prang ngon Bentara

Jicok beude ngon seunapan

Keudeh u padang teubiet lanja

Deungon rakyat dum sibarang

Gong ngon geundrang ji meusuara

Habeh bandum ka u padang

Cit Gumiran tinggai lam Kuta

Seureuta ngon Said Ba’dan

Lhee droe sajan Seukandan Diwa

Raja-raja Uleebalang

Duek di dalam sajan Banta

Teutap sinan lawet lawan

Harun Makam lon calitra

Hingga troeh le u teungoh blang

Rakyat sajan meuploh laksa

U meulason teubee meu on

Geumee keunan ke Syah Gumiran

Rot deh rot noe geubeurjalan

Meuhadapan dua tantra

Ban meurumpok ngon pahlawan

Syah Gumiran nyang poe tantra

Jitot beude ngon meuriam

Ampeung Tuan ureung teuka

Jipeeh ngon gong palu geundrang

Meusue canang hareudam mama

Rot deh rot noe meupiasan

Meusue canang habeh gubra

Rakyat ji jak jroeh meurumpon

Giduek kandran gajah guda

Hate suka dum pahlawan

U dalam neutamong sigra

Oh troh teuka bak Po Samlakoe

Geupiyoh droe sikleep mata

Dileun Balee dong meureuntang

Harun Makam Amin Mika

Teuma mariet Harun Makam

Bak Gumiran neumeuhaba

Neudong diyueb peu ek seumbah

Jaroe dua blah ateuh jeumala

Ampon Tuanku meuribee ampon

Salah that lon le bak gata

Teuma seuot Syah Gumiran

Pakon Sulthan hana mata

Pakon bak lon ta boet jaroe

Kon ngon kamoe ta meudeesya

Kareuna ulon kon Sulthan

Diwa Seukandan ulon hamba

Bagian 58

Ban geudeungoe meunan kalam

Harun Makam hate liya

Seubab akai neuh ka kureung

Han neutuban padubawa

Kareuna gobnyan rayek pangkat

Timue barat cit geuhala

Nyang dilee kon gobnyan daulat

Nyoe ka meuhat roh lam hina

Neuboet jaroe pantah leugat

Neumariet bak Seukandan Diwa

Ampon Tuan Duli Hadharat

Sujud khideumat bak sarpada

Diwa Seukandan mariet leugat

Pakon sisat he kakanda

Pakon bak lon ta boet tangan

Kon ngon lama ta meudeesya

Ayah ulon Said Ba’dan

Sinan Tuan meuhat pinta

Meunyoe na mantong mata uroe

Buleun adoe padam cahya

Beek bak ulon ta boet jaroe

Keudeh ta peutoe nibak Ayahnda

Harun Makam sangat malee

Dum geuseubee lam keureunda

Bit pih meunan hana neuthee

Seubab ratee hate liya

Lheuh nyan teuma seuon tangan

Bak Ba’dan Raja nyang raya

Ampon Tuanku Syahi Alam

Nyang meugeunggam alam donya

Kamoe meudong di hadapan

Nyawong badan hukom Meukuta

Ube nyang ka buet salahan

Ampon laman sibarang deesya

Ban Harun deungoe haba meunan

Com di tangan ngon Raja raya

Lheuh nyan teuma Uleebalang

Ngon pahlawan Amin Mika

Neuweeh sinan Harun Makam

Bak Sulthan Seukandan Diwa

Mumat jaroe ngon Sulthan

Syah Gumiran pih seureuta

Ah lheuh ampon bak Gumiran

Dum sibarang sukacita

Lheuh nibak nyan teuma dudoe

Geu peujaroe Ratna Indra

Habeh bandum sireutoh droe

Tuan Putroe troen cong guda

Troen cong gajah Indra lailan

Bak Raja Ba’dan meu’ah deesya

Di likoet nyan Putroe Intan

Aneuk Ba’dan Ratna Indra

Teulheuh nyan bak ayah nanggroe

Bak judo droe Seukandan Diwa

Teuma beudoh Syah Gumiran

Com bak tangan Ratna Indra

Teuma neucom le Indra Lailan

Syah Gumiran Seukandan Diwa

Judo Raja Uleebalang

Com bak tangan Syah Gumiran

Hingga habeh dum sinaroe

Peu ek Putroe u Balee Raksa

Lheuh nyan mariet Harun Makam

Ampon lama Po Meukuta

Tuanku pulheuh hajat Intan

Ulon sajan Poteuraja

Teuma seuot Gumiran Syah

Han peu salah wahe Raja

Lheuh nyan geujoek bungong jaroe

Peu nyang adoe sajan geuba

Hate suka mata laloe

Neu eue meuligoe deungon Kuta

Harun Makam tahe keudroe

Po Samlakoe ulon calitra

Lam peuprangan siploh uroe

Hingga adoe troh ban pinta

Bagian 59

Amma ba’du that samlakoe

Siblah sampoe bak calitra

Puteh-puteh maneek intan

Mirah padam ie suasa

Neu mariet le Syah Gumiran

Nibak Ba’dan Seukandan Diwa

Jinoe Tuanku ta beurjalan

Beek cong kandran miseu nyang ka

Ban geudeungoe haba meunan

Po Janjongan beudoh sigra

Tron cong Balee bandum sibarang

Uleebalang ek euncong guda

Seureuta ngon Harun Makam

Rakyat sajan meuploh laksa

Habeh bandum ateuh kandran

Ban atoran pangkat raja

Deungoe lon kisah Syah Gumiran

Jen Islam ka troh teuka

Gumiran tron le gambang

Neu ek rijang ateuh guda

Neucok inciem sok bak tangan

Gadoh sinan le ngon Kuta

Ngon meuligoe sigoe hilang

Balee Gambang han meuhoe ka

Rakyat teudong dalam padang

Harun Makam Amin Mika

Raja tahe mata mandang

Syah Gumiran banyak bicara

Habeh bandum rakyat tahe

Ji syuko keu nekmat teuka

Deungoe lon kisah keu bungong kundoe

Neulaloe lam awan miga

Hireun Raja Uleebalang

Muda Seudang han meuhoe ka

Rakyat jijak jroh meureuntang

Ngon piasan hana reuda

Limong uroe geubeurjalan

Troh Tuan bak Syiah Tapa

Nibak teumpat habeh nanggroe

Saboh sungoe nyang that raya

Pucok krueng nyan jila jiran

Ie jih tajam ban boh lila

Jinoe lon peugah beugot ta pham

Ie di dalam dua bangsa

Siblah puteh siblah hitam

Poku Tuhan Nyang Kuasa

Ie nyang puteh miseu dadeh

Deungoe habeh lon calitra

Ie nyang hitam jeureungeh gleh

Tuhan ‘areh sangat kaya

Han that jarak wahe sahbat

Bak bineh rab babah guha

Nyang Aulia lam guha nyan

Hajat Putroe peulheuh nazar

Deungoe jinoe lon hareutoe

Troeh sampoe angkatan Raja

Raja ka troe bineeh sagoe

Piyoeh jinoe dum na tantra

Peudong keemah ngon seuladang

Syah Gumiran ka troeh neu teuka

Neu mariet le Syah Gumiran

Ubak rakan rakyat Raja

Beek tabloeh-bloeh dalam sungoe

Lon peurunoe dum na gata

Jikalau najih deungon manoe

Deungoe kamoe peu calitra

Rot blah deh beek manoe

Si blah noe jeut bee hawa

Bak ie hitam beek peurab droe

Bak ie ceukoe han peu mara

Soe han pateh lon peurunoe

Uroe dudoe teulah teuka

Ban rakyat deungoe kheun Samlakoe

Kabui dudoe nyang neusabda

Hana ji bloeh dalam sungoe

Meusidroe tan nyang peuteuka

Bagian 60

Hana sidroe keujeut jak keunan

Dalam krueng nyan he syeedara

Puleh payah dumna rakan

Sie keurubeun kibah unta

Ladom taguen ladom panggang

Ladom reundang ladom rasa

Sare hase dum sibarang

Geuyue khatam lakee do’a

Geutoet gahru ngon keumunyan

Indra Lailan loeb lam guha

Cit ka hase kruet ngon beudak

Kheuleumbak gahru jeumpa

Tuan Putroe geuboh beudak

Ka sampoe hak troeh ban pinta

Habeh bandum geurhah ulee

Geumeulakee bak Aulia

Sare hase seuleungkapan

Cut Intan teubiet u lua

Geuleung Amin angkat tangan

Lheuh nibak nyan rahoeb muka

Geuyue boeh le ngon khanduri

Teungku Faki makeun rata

Lheuh khanduri seupoet uroe

Ban sinaroe eh seunia

Hingga jaga beungoh uroe

Miseu baroe lom keurija

Han ek peugah wahe adoe

Tujoh uroe treb di sana

Lawet lawan teuma dudoe

Laen bagoe lon calitra

Ya Allah Tuahanku Sidroe

Lon pujoe silama-lama

Uroe malam ulon surat

Nyoe hikayat beu ek leungka

Ya Allah ulon meulakee

Gata nyang mee peutroh pinta

Beek meudaleeh ulon sidroe

Uroe dudoe beek roh deesya

Ratna Indra bak siuroe

Kroet kreut asoe hana tara

Teuma mariet bak judo droe

Tuan Putroe buka haba

Daulat Ampon Tanglong Nanggroe

Saket asoe lon hana tara

Keudeh Teungku ta jak manoe

Dalam sungoe siseun dua

Ban Raja deungoe nariet Putroe

Beudoh jinoe hana dawa

Neu peurab le bineeh sungoe

Tuan Putroe kheun bak Raja

Daulat Ampon lon judo droe

Pat ta manoe nyang seunia

Seuot Raja Putroe tanyong

Si u tunong pante raya

Nibak ulon sinan keunong

Cut bungong bak ta meu-upa

Ban Putroe deungoe nariet keunong

Sigra neutamong lam sungoe raya

Oh troeh lam krueng Putroe Intan

Manoe siram le ban dua

Ie jih sijuek miseu zamzam

Sang macam ie Krueng Kalkautsar

Teungoh manoe Putroe Intan

Deuh neupandang laen rupa

Troeh bak pante Diwa Seukandan

Laen ragam lon calitra

Blah deh ie that jeureungeeh

Si blah bineeh sungoe raya

Si blah noe nyan ie ceukoe

Cut Putroe teungoh meu-upa

Raja meuhoi Tuan Putroe

Ta jak keunoe Putroe Muda

Teuma neujak Tuan Putroe

Neu tanyong proe peu na haba

Sinoe jroh that bak ta manoe

Ie nyoe Putroe baek rupa

Bagian 61

Bak ie ceukoe beek ta manoe

Kulet asoe ceuma leuta

Hana lon eue masa lon jak

Di sideh hak Tuan Putroe

Teuma seuot Tuan Putroe

Deungoe kamoe he Kakanda

Han jeut judo neujak keunan

Syah Gumiran ka neubrie aja

Teuma seuot Diwa Seukandan

Peu salahan jeut keu ceudra

Beek ta pateh Syah Gumiran

Ji meuwayang deungon gata

Ka teukeudi nibak Tuhan

Putroe Intan hana dawa

Ie jeureungeeh han jeut manoe

Han lon pakoe sang peurbula

Lam ie hitam neubloeh jinoe

Lakoe Binoe Putroe ngon Raja

Ban sare troeh lam ie hitam

Teukeudi Tuhan Po Nyang Esa

Goh lom sampoe troeh u dalam

Cut Intan meulaen rupa

Ban dua ngon Diwa Seukandan

Jeut tuan miseu Raja Kra

Timoh iku deungon bulee

Kon ban dilee ka jeut peut pha

Ureung dua laen lagee

Euncong kayee jiplueng lanja

Geumegroeg-groeb keudeh keunoe

Ulah bagoe lutoeng rimba

Teutap sinan euncong bak kayee

Meu eue eue gutee bak keupala

Cukeeh Po Jeh cukeeh Po Nyoe

Galak han soe agam dara

Watee geukhem nyang leubeeh jroh

Meu’oh ‘oh ban saboh rimba

Hana soe thee pih meusidroe

Cut Putroe jroh ka jeut keu Kra

Neu situboh deungon Putroe

Miseu bagoe buet Raja Kra

Ngon teukeudi nibak Tuhan

Srot manikam ubak nisa

Hana sidroe nyang na tuba

Syah Gumiran nyang tupeu bahsa

Neukalon treb hana neuwoe

Ka meupaloe bak neukira

Teuma beudoh Po Samlakoe

Bineeh sungoe neujak mita

Ban sare troeh bineeh sungoe

Hana sinoe ureung dua

Neungieng keudeh neungieng keunoe

Neu eue lagee ureung dua

Gaki jih peut panyang bulee

Iku lagee peudeung raya

Gumiran Syah le eleumee

Yoh nyan neuthee nyoe Teumuda

Hate saket bungong kumbee

Euncong kayee neu ek le lanja

Banta ka troeh euncong kayee

Neudrob himbee agam dara

Ban neupeurab neu keumeung mat

Ji groeb leugat le ban dua

Neu ek keudeh jigroeb keunoe

Payah han soe Syah Gumiran

Gumiran Syah beungeeh han soe

Ingat keu droe bue ceulaka

Leumah pike Po Samlakoe

Meunyoe meunoe payah raya

Lheuh nyan neutroen le u bumoe

Neucok le nyoe panah pusaka

Ka neushrom le euncong kayee

Keunong himbee le ban dua

Himbee ka rhot ka meugule

Ka neucok le Syah Gumiran

Teuma neucok le Samlakoe

Rajah jinoe pantah sigra

Bagian 62

Ban dua droe geupeusapat

Neuba leugat bak krueng nyang ka

Ban sare troeh bineeh sungoe

Neu seumanoe pantah sigra

Neu seumanoe bak ie puteh

Badan puleh miseu nyang ka

Gumiran Syah akai areh

Ek puleh ureung jeut keu Kra

Hana le bulee hana le iku

Ban neu eue indah that rupa

Gumiran Syah teuduek tahe

Neusyuko keu Tuhan Esa

Allah hai Po Rabbol ‘ibad

Kuasa that sidroe gata

Langet bumoe dum lat batat

Laot darat Neu karonya

Eleumee lon neubrie beutajam

Beujeut lon pham jeub kutika

Ya Tuhanku lon meulakee

Gata nyang mee peutroh pinta

Puleh tahe Syah Gumiran

Meututo ngon Seukandan Diwa

Wahe Dalem Cut Abang droe

Keudeh tawoe ubak tantra

Meubeek le treb tanyoe sinoe

Ban dua droe ngon Teumuda

Neujak lajue kaman jinoe

Deungon kamoe lhee seureuta

Teuma seuot Diwa Seukandan

Jak hai intan dilee gata

Hana patot he Cut Abang

Lon beurjalan dikeue gata

Nyang jak dilee buleun peunoh

Samat teungoh Seukandan Diwa

Di likoet nyan Syah Gumiran

Ban lhee sajan sisyeedara

Leupah sinan neubeurjalan

Troeh le rijang ubak tantra

Teuma mariet Syah Gumiran

Bak Raja Ba’dan neucalitra

Ampon Daulat Tanglong Nanggroe

Beek treb sinoe Po Meukuta

Nyang phon beudoh ureung binoe

Sireutoh droe ek euncong guda

Teuma beudoh Raja Ba’dan

Di likot nyan dum lasyeuka

Beudoh teuma Diwa Seukandan

Pahlawan nyang teuga-teuga

Teuma beudoh Harun Makam

Dum pahlawan ngon lasyeuka

Nyoe lon kisa Syah Gumiran

Indra Diran ka troeh teuka

Ka teudong le di hadapan

Syah Gumiran neupoh lawa

Neu tarek le taloe keukang

Ji teureubang u padang Shafa

Jipoe lajue rot lam awan

Meurhang-rhang lam awan miga

Ta deungoe diyueb su ban canang

Oh manyang ban gaseng Jawa

Seukandan Diwa seutot jalan

Syah Gumiran rot lam hawa

Ban sare troeh bineeh nanggroe

Meututo jinoe Harun Raja

Neu beuot le dua jaroe

Ampon kamoe Po Meukuta

Ampon Tuanku Meukuta Nanggroe

Tamong bak kamoe sikleeb mata

Beu neutamong Daulat Ampon

Bak ulon ureung nyang hina

Ban raja deungoe meunan kalam

Tamong rijang dalam Kuta

Deungon rakyat dum sibarang

Diwa Seukandan pih seureuta

Seureuta ngon Syah Gumiran

Sampoe datang dalam Kuta

Bagian 63

Geutot beude ngon meuriam

Ampeung Tuan ureung teuka

Hate suka hana macam

Harun Makam nama Raja

Tron cong guda ek u manyang

Balee Gambang duek meucakra

Geubrie teumpat indah han ban

Syah Gumiran that mulia

Geusie keubeu meuploh ribee

Geupeujamee ureung teuka

Indra Lailan ureung binoe

Sajan Putroe peurumoh Raja

Dum geupeu ek u meuligoe

Tuan Putroe Ratna Indra

Horeumat le han ek kheun droe

Neulakee woe Syah Gumiran

Teutap sinan tujoh uroe

Jroh that budhoe Harun Raja

Ban Harun deungoe neulakee woe

Raja Nanggroe salen Banta

Habeh neusalen dum sinaroe

Keuchiek Meuntroe sajan Banta

Rakyat jitron dum sinaroe

Bungong jaroe bandum geuba

Jak meurumpok ngon Samlakoe

Meuh sikatoe bak ureung kaya

Geubrie ngon meuh nam ploh peutoe

Peuleumah budhoe Harun Raja

Hingga habeh dum seuleusoe

Leugat neuwoe Poteuraja

Ateuh Balee mumat jaroe

Neutron dudoe ek euncong guda

Ulon kisah Syah Gumiran

Di hadapan teudong guda

Neu ek laju Muda Seudang

Neupasang lam padang raya

Deungon rakyat Uleebalang

Piasan hana tom reuda

Hingga leupah Tasek Alam

Piyoeh kandran bak krueng raya

Saboh pante ureung binoe

Sireutoh droe muda-muda

Tron dalam krueng dum sinaroe

Cut Putroe manoe meu-upa

Laen teuma ureung agam

Manoe di dalam sungoe basa

Qadha hajat Putroe Intan

Srot manikam Ratna Indra

Ban neukalon miseu intan

Cok le rijang kalon rupa

Cut Putroe boeh lam oen kayee

Neuseubee yueb batee raya

Manikam srot di cong kayee

Bungong kumbee yoh miseu Kra

Tuhan utoh nyan peuteuntee

Meunan lagee neu karonya

Cit ka kada masa dilee

Lam eleumee Tuhan Esa

Han jeut ingat he panghulee

Neulakee peu peu nyang hawa

Hana meusidroe nyang na ureung thee

Bungeng kumbee teuka masa

Puleh payah miseu dilee

Beudoh meureeree dum geubungka

Umue sithon geujak geuwoe

Troeh sampoe u padang Shafa

Maseng-maseng woe u nanggroe

Bujang Meuntroe Raja-raja

Sikureung ploh ureung binoe

Bandum geuwoe bak judonya

Ratna Indra Lailan Putroe

Leugat neuwoe sajan Raja

Seukandan Diwa Syah Gumiran

Raja Ba’dan woe u tangga

Hingga habeh dum u dalam

Seungab diam lam istana

Bagian 64

Hate suka hana macam

Indra Lailan Putroe Muda

Puteh puteh bungong peukan

Nyang got ragam bungong meulue

Lon balek ayat wahe abang

Laen macam lon peulaku

Kureung pakhok gadoh ragam

Hana macam lon he teungku

Beek neu upat keu ulon tuan

Tulesan kureung sigeutue

Soe nyang baca wahe abang

Keu ulon tuan neulakee bantu

Pihak galak wahe rakan

Uroe malam lon peulaku

Seb keuh dum nan wahe rakan

Ulon tuan hate tunu

Nyang jeut tunu wahe rakan

Saket badan lon he teungku

Bah keuh dum nan nyan khabaran

Jinoe tuan laen lagu

Amma ba’du nyoe dua blah

That biet indah wahe teungku

Nyoe lon kisah Syah Gumiran

Bak simalam hate rindu

Neuingat Nanggroe Syam palimbang

Seureuta sajan deungon ibu

Umue nam thon lon beurjalan

Tan lon riwang ubak ibu

Hate susah Muda Seudang

Hingga malam uroe laju

Hingga mugreb datang siang

Syah Gumiran neutron le laju

Troeh u Balee neuseumbahyang

Ka troeh datang Daulat Tuanku

Seukandan Diwa deungon Ba’dan

Lhee sajan ngon bungong meulue

Beuot jaroe Syah Gumiran

Bak Raja Ba’dan le meungadu

Ampon Ayah lon meukalam

Deungon abang seureuta itu

Neupeugah bak Syahi Alam

Lon kuriwang ubak Ibu

Tinggai sinoe Lem Cut Abang

Lon tuan beurangkat laju

Raja deungoe meunan kalam

Raja Ba’dan moe me’u-‘u

That neugaseh Muda Seudang

Aneuk badan nyuem sang laku

Poteuraja seuot rijang

Wahe Bintang Cut Bungong Meulue

Hana dapat lon kheundak tham

Cut Intan jak saweu Ibu

Adak tawoe Syah Gumiran

Teuntee ta riwang teuma hai Teungku

Jak beuseulamat beek na rintangan

Izin laman tawoe laju

Teuma mariet Diwa Seukandan

Lon pih Tuan jak saweu Ibu

Meunyoe leupah Syah Gumiran

Beusajan Daulat Tuanku

Uroe dudoe ulon riwang

Lon ba sajan Adek Teungku

Ban Raja deungoe meunan kalam

Susah han ban Daulat Tuanku

Meunyoe tawoe aneuk badan

Putroe Intan ba he Teungku

Beek ta keubah bak lon tuan

Akhe datang sampoe umue

Meunan nariet Said Ba’dan

Indra Lailan pangge laju

Troeh le keunan u hadapan

Du sajan ngon Cut Meulue

Ban sare troeh keunan datang

Meukalam Daulat Tuanku

Wahe aneuk Putroe Bintang

Dua sajan deungon Ibu

Bagian 65

Gumiran Syah keumeung riwang

Tajak sajan Bungong Meulue

Seutot judo gata Intan

Beek bantahan aneuk Teungku

Meunyoe na umue gunaseh Tuhan

Teuntee ta riwang lheuh saweu Ibu

Putroe seuot pantah-pantah

Han peu salah he Tuanku

Meungka na izin gata Ayah

Lon meulangkah sajan Teungku

Habeh nariet keumah padan

Cut Intan neu ek u leupu

Buka peutoe ngui pakaian

Ikai subang peu nyang nafsu

Nyoe lon peugah Said Ba’dan

Bak Gumiran neukheun laju

Wahe aneuk Meuntroe Intan

Rakyat sajan intat Teungku

Ta ba rakyat ngon pahlawan

Syah Gumiran jak saweu Ibu

Seuot Banta Syah Gumiran

Han peu rakan Ayah Teungku

Neulakee tulong ubak Tuhan

Syam Palimbang beu lon teumee eue

Do’a beu le bak Janjongan

Keu lama hamba meunglalu

Raja seuot Insya Allah

Han peu salah Bintang Timue

Poteuraja neuduek tufah

Gumiran Syah lon kheun laku

Neucok daweut ngon keureutah

Deungoe lon peugah meu sigeutue

Neusurat le pantah-pantah

Ngon Bismillah phon dahulu

Teulheuh neuboeh ngon khuteubah

Haba indah bayek laku

Keumeung kirem Syam Palimbang

‘Abdurrahman nama Teungku

Seumbah salam Diwa Seukandan

Padang Shafaran banda nyang makmue

Seureuta ngon Syah Gumiran

Adek Janjongan Daulat Tuanku

Dilee geuhoi Banta Syah Midan

Diwa Seukandan dudoe meusyeuhu

Tuhan sidroe brie sampaikan

Keupada tuan ulon nyang guru

Ampon Allah deesya sibarang

‘Abdurrahman nama meusyeuhu

Teungku deungoe lon brie maklumkan

Diwa Seukandan neuyue peulaku

Deungon Putroe neuba sajan

Judo Intan Bungong Meulue

Jikalau sampoe surat lon karang

Banta yoh nyan neuyue peulaku

Neukrah rakyat dum sibarang

Gong ngon canang neuyue palu

Neuyue teubiet bandum u blang

Ampeung Bintang Bungong Meulue

Meunyoe na gaseh deungon sayang

Dum sibarang neupeulaku

Tamat surat haba simpan

Syah Gumiran neulipat laju

Lheuh nyan neurhom dalam awan

Syam Palimbang troh bak Teungku

Teuma dudoe lawet lawan

‘Abdurrahman lon kheun laku

Leuhoe uroe lheuh seumbahyang

Srot di manyang surat laju

Ka neucok le pantah rijang

Panee datang meunoe laku

Ka neubeut le pantah rijang

Syah Gumiran ureung peulaku

Habeh maklum lua dalam

Habeh neupham haba itu

Teungku neuhoi le ngon Bujang

Gong ngon geundrang neuyue palu

Bagian 66

Neukheun ka woe Syah Gumiran

Putroe sajan dum bintang hue

Neukrah rakyat dum sibarang

U padang jiteubiet laju

Neubrie nariet bak budiman

Syah Gumiran woe bak Ibu

Ka troeh surat bak ulon tuan

Putroe sajan Bungong Meulue

Ban Putroe deungoe woe Gumiran

Cut Intan hate neuh seu-u

Hingga hase dum sibarang

Rakyat curam tron bak Teungku

Keumang-keumang bungong peukan

Lam keunarang bungong meulue

Putoh sutra seungab ilang

Teuduek lingkang han le meusue

Teuduek Teungku Abdurrahman

Keu Syah Gumiran lon kisah laju

Keumah hase dum sibarang

Muda Seudang ek u leupu

Bandua deungon Cut Abang

Raja Ba’dan lon kheun laku

Ratna Indra neuhoi rijang

Troeh datang Cut Bungong Meulue

Hana meusidroe laen ureung

Raj Ba’dan neumariet laju

Wahe aneuk cahya intan

Lon peusan haba sigeutue

Gata ta jak judo sajan

Deungoe intan lon kheun laku

Peu nyang geuyue beek bantahan

Cut Intan beudoh le laju

Adak salah buet han reumbang

Cut Intan beujroh peulaku

Beu ta thee droe ta meudagang

Hana mawang soe peulaku

Bu ngon eungkot masak rijang

Ureung agam hate seu-u

Ngon judo droe beek meubantah

Beuthat salah buet sigeutue

Peue nyang geukheun beek ta bantah

Beek raya babah aneuk Teungku

Dinab tuan beutamalee

Beek meulakee peue nyang nafsu

Beu ta pateh beek meutuka

Ayahnda nyang peugah laju

Adak saket gata Aneuknda

Beu le saba Cut Bungong Meulue

Ta sifeut droe ureung hina

Beek meuhawa Bintang Timue

Kadang geupujoe bak na keuh hai

Aneuk Raja beek sang Badu

Meunan nariet Raja raya

Ratna Indra seuot laju

Insya Allah wahe Ayahnda

Han lon tuka meusigeutue

Habeh wasiet Poteuraja

Putroe Muda ek u leupu

Keumah hase dum sibarang

Gumiran jak seumah Ibu

Com di teuot seumah bak tangan

Raja Ba’dan geumoe meu’u’u

Beumeutuah he Buleun Trang

Beek na rintang harabiru

Lheuh pamitan bak Sulthan

Ban lhee sajan neutron laju

Guda teudong di hadapan

Neu ek rijang Bintang Timue

Nyang duek dikeue Syah Gumiran

Diwa Seukandan nyang rot ikue

Samat teungoh Putroe Intan

Jroh kon wayang ta eue laku

Keunong pakat reumbang padan

Dara agam hate rindu

Meurak cut Cempala seudang

Yueb bak Asan jikuku-kuku

Bagian 67

Beuthat tan meuh ngon peukaian

Jroh ruman le soe meunafsu

Ruman hana hareuta pih tan

Le ‘amalan galak Tuhanku

Cempala cut tujoh seukawan

Cicem Subang meujudo-judo

Ratna Indra seutot Cut Bang

Tinggai mawang dalam leupu

Ayam puteh teureubang malam

Ayam hitam jikupu-kupu

Pihak gaseh dalam badan

Siri bulan neu peulaku

Seb keuh dumnan haba wayang

Syah Gumiran ulon peulaku

Neutarek le taloe keukang

Jiteureubang pantah laju

Guda jipoe sue meugrang-grang

Keudeh u manyang lam awan hijo

Siklab-sikleb jiteureubang

Syam Palimbang sampoe Teungku

Ka geudong le di teungoh blang

Tron rijang Cut Bungong Meulue

Ban lhee neutron di cong kandran

Guda riwang le bak dahulu

Piyoeh sinan Bungong Kumbang

Troeeh datang rakyat meu’u’u

Cit dilee kon ka neubrie pham

Uleebalang hate seu-u

U meulason teubee meu-on

Mee keunan keu Bungong Meulue

Jak meurumpok ngon Cut Intan

Putroe Seudang baek laku

Ateuh gajah meubalohan

Ban lhee sajan leugat laju

Geutot beude ngon meuriam

Lua dalam han jeut ta eue

Jipeeh tamboe palu geundrang

Keudeh u dalam peutamong laju

Meurumpok le ‘Abdurrahman

Ngon Budiman nama Ibu

Com bak jaroe seumah tangan

Han ek rakan lon kheun laku

Ka neupeu ek u meuligoe

Cut Putroe neuseumah Ibu

Teutap sinan lam meuligoe

Malam uroe hate rindu

Mangat hate Cut Budiman

Oh woe Intan Bintang Timue

Deungon judo pih na sajan

Cut Intan hate neuseu-u

Pulang nanggroe Abdurrahman

Seukalian nibak Teungku

Diwa Seukandan mat neuraca

Tan meuriba meusigeutue

Hukom seunang hana tara

Miseu nyang ka yoh dahulu

Uleebalang Kadhi Meuntroe

Dum sinaroe hate seu-u

Gumiran Syah neuduek keudroe

Hana sapeu neupeulaku

Teutap sinan lam meuligoe

Aduen adoe Bungong Meulue

Deungon Putroe Ratna Indra

Baro geuba Bintang Timue

Hana sapeu nyang na dawa

Gobnyan ban dua baek that laku

Horeumat jroh ngon tuantha

Hantom neujak meusigeutue

Ban nyang wasiet bak Ayahnda

Putroe Muda neupeulaku

Meusigeutue han neupeutuka

Rok-rok masa lam mangat su

Teutap saja ngon tuantha

Sajan Raja judo Teungku

Seureuta ngon Syah Gumiran

Muda Seudang that meusyeuhu

Bagian 68

Lawet lawan teuma dudoe

That seureuloe wahe Teungku

Soe nyang deungoe meuduek adoe

Mata laloe hate rindu

Padum na treb woe u nanggroe

Hamel Putroe Pocut Meulue

Padum na treb hamel Putroe

Nyata jinoe aneuk Teungku

Aneuk pih agam that samlakoe

Miseu bagoe Bintang Timue

Oh lheuh madeung Tuan Putroe

Deungoe beurangsoe lon kheun laku

Geupeutron u leun istana

Geurasi nama aneuk Teungku

Peulita Umar Sikan Rami

Aneuk Duli nan meusyeuhu

Rayek laju Bungong Pade

Sajan Abi deungon Ibu

Neu pubeut le Teungku Kadhi

Hekeumat sakti neubrie laju

Uroe malam hana khali

Laen rawi wahe Teungku

Rupa na ban Lheuk Bangguna

Lam cintra jikutru-kutrue

Ladom galak meukat sira

Ladom hawa meukat eungkot

Ladom galak ija sutra

Jitem bungka dalam laot

Ladom galak keu peukaian

Jipoh badan beungoh seupoet

Ladom galak boh seumeuta

Ladom hawa keu boh ramboet

Ladom galak gleung suasa

Adak teumaga payah baloet

Adak gasien tan hareuta

Beuthat deesya jimeureuboet

Meunyoe han seb keu beulanja

Han jikira beungoh seupoet

Meungtan taboh gleung suasa

Geunap sinja lam meupot-pot

Han jeut ta eue nibak rupa

Seuntok masa cit dalam kroet

Adak tahoi meuta pura

Ngon suara lam meudhoet-dhoet

Meungna ta bloe gleung suasa

Cahya muka dum bintang rhoet

Adak tahoi Ma Sidara

Ngon suara leumah leumboet

Peue nyang tayue hana dawa

Jijak lanja jipeuturoet

Bah keuh dumnan wahe Teungku

Laen laju lon tuan turoet

Amma ba’du nyoe nyang peut blah

Got that ceudah adoe tuloet

Gumiran Syah lon meupeugah

Nyang meugah aneuk Raja Cut

Lam istana Bintang Timue

Hate rindu beungoh seupoet

Bak simalam eh beuradu

Lam keuleumbu neuseulimboet

Pham beuhabeh wahe Teungku

Beek rugoe bu habeh eungkoet

Mata layoeh soe deungoe su

Teungeut laju dalam seupoet

Deungoe beudeuh kheun beulagu

Beek rindu keu ureung karoet

Neu meulumpoe Bintang Timue

Bungong Meulue deuh meubapoet

Dalam kulam hireun ta eue

He Teungku meuikoet-ikoet

Samat teungoh ma’anikam

Lingka bandum meuh meusaloeb

Laen lingka jroh meutabu

Hana got hue cahya seupoet

Mata lazat hate rindu

Mita kayu neukeumeung choet

Bagian 69

Meuteumeung le kayee gahru

Nyuem jimeusue leumah leumboet

Bineeh kulam neupeurab laju

Cut Meulue neu cukuet-cukuet

Paneuk jaroe na sigeutue

Meulalu lam kulam rat rhot

Ban neukalon rab meulalu

Bintang Timue ka teukeujoet

Neubeudoh le sigra laju

Hate rindu putiek ramboet

Takbi lumpoe ka neuatoe

Meuhat Teungku Cut Putroe got

Han neutupat barat ngon timue

Bungong Meulue lam nanggroe gob

Kareuna gobnyan goh na judo

Nyang jeut rindu keu Putroe got

Dalam hate neuh that seu-u

Beudoh laju neujak seutot

Cok peukaian Bungong Meulue

Peue nyang nafsu pileh nyang got

Teungoh malam tron di leupu

Bak Ibu hana neu peurhob

Nyang jeut meunan wahe Teungku

Beek ganje roeh bak geudrob

Bak abang hana neubrie su

Cut Meulue takoet neuseutot

Hana meusidroe na ureung eue

Tron di leupu panyot ceulot

Guda jen ka troeh jilalu

Neu ek laju troeh babah rot

Neutarek le taloe keukang

Jiteureubang beungoh seupoet

Jipoe meuyueb su ban canang

Oh manyang ban gambang nyang got

Keudeh keunoe jiteureubang

Troeh bak padang pih nyang that got

Teupike le Syah Gumiran

Jeuoh jalan lam nanggroe gob

Guda laen adak neupasang

Lhee thoen abang neudom bak rot

Meunyoe ulon giduek kandran

Tulong Tuhan han meurumpok

Han lon tupat nanggroe makam

Meunyoe tajam ulon seutot

Bah le jinoe lon beurjalan

Jeub seurukan lon eue beugot

Meunan pike Syah Gumiran

Guda tajam srot le meuphat

Syah Gumiran troen u bumoe

Guda jiwoe bak teumpat sot

Lheuh nyan neujak keudeh keunoe

Cut Putroe hajat neuseutot

Neu ek gle jeh neutron gle nyoe

Geunap uroe jeut simpang rot

Ek gunong jeh troen gunong nyoe

Lamlam duroe lamlam urot

Padum lawet neu beurjalan

Syah Gumiran aneuk tuloet

Umue sithon neucre kandran

Troeh bak padang rimba seupoet

Troeh bak buket nyang that manyang

Di blahdeh nyan leumah laot

Leumah laot dalam padang

Geulumbang meubapoet-bapoet

Laot luah hana macam
Kapai tajam lhee thon han troek

Samat teungoh meugeulumbang

Lingka padang uteun seupoet

Mantong jeuoh wahe abang

Hana got trang deuh meusagoeb

Teu pike le Muda Seudang

Lam padang neukalon laot

Dalam rimba luah han ban

Geulumbang bakat ngon riboet

Neu syukoe le Syah Gumiran

Peurintahan Tuhan Ma’bud

Bagian 70

Teungoh neujak neubeurjalan

Meurumpok mamplam bak babah rhot

Nibak cabeung dum buahan

Dua macam Banta lihat

Ladom mirah ladom hijoe

Banyak laku han troeh dapat

Boh jih le that hana macam

Siploh lubang kapai sarat

Bak jih raya ramphak cabang

Troeh u manyang pucoek bulat

Bak peureudee uram mamplam

Saboh kulam nyang raya that

Deungoe lon peugah wahe abang

Ie di dalam nyang hitam that

Saboh naga dalam kulam

Jaga mamplam beek ureung pot

Badan raya lagi panyang

Dalam kulam jikuwat-kuwat

Han lon tukrie peugah macam

Pham Cut Abang haba nyang got

Neu peurab le Syah Gumiran

Boh mamplam neu keumeung jak pot

Naga kalon deuh meubayang

Beudoh rijang jimeuhirup

Leumah neu eue naga silam

Gumiran neu keumeung seupot

Oh ban neu eue badan raya

Meung dumnan hana lon takoet

Peukreuh hate Muda Seudang

Nyang dumnan peu ka peukeujoet

Neucok panah boh lam reugam

Neumeung rajam jikeurawat

Naga hoi le Syah Gumiran

Sujud rijang ubak teuot

Ampon Tuanku Syahi Alam

Geulinyueng klam mata seupoet

Neu peuampon deesya laman

Nyang salahan ka u likoet

Bak lon sangka panee urang

Boh mamplam neumeujak leugoet

Han lon tupeu Po Janjongan

Hoe beurjalan peu makeusud

Gumiran Syah seuot rijang

Ampon bak Tuhan he Adek Cut

Nibak ulon han le deesya

Ube nyang ka lheuh u likoet

Meunan nariet Syah Gumiran

Raja Naga teuma seuot

Hoe keumeung langkah Po Meukuta

Bak hamba neupeugah bacut

Peue na hajat deungon pinta

Siri Banda Nanggroe Pocut

Nyang ka hantom lon eue rupa

Sang Gata aneuk Raja Cut

That samlakoe lon eue rupa

Dalam rimba sidroe peu buet

Peu nama nanggroe geurasi nan

Cut Intan soe nan geuseubuet

Teuma seuot Syah Gumiran

He rakan ta deungoe lon seubut

Nama Nanggroe Syam Palimbang

Syah Gumiran lon geuseubut

Di ulon ka lon kheun nama

Digata soe nan Adek Cut

Raja Naga seuot rijang

Deungoe abang lon kheun bacut

Nama ulon Nagasilan

Geu urohkan nan geuseubut

Lom neutanyong uleh Banta

Nyang gata cit sinoe teumpat

Cuba peugah lon deungoe nyata

Peue keurija nyang ta pubuet

Jiseuot le Raja Naga

Jaga-jaga lon duek bak rot

Lon kon naga deungon kulam

Ngon bak mamplam nyang bineeh rot

Bagian 71

Lom geutanyong Muda Seudang

Kon bak mamplam bak bineeh rot

Cuba peugah jinoe beutrang

Lon deungoran takheun beugot

Ji seuot le Nagasilan

Janjongan neudeugoe beugot

Hekeumat Raja ‘Usyor Zamzam

Farama Hiram Banda nyang got

Amiren Cahya Putroe Intan

Aneuk Sulthan miseu culot

Bit neukalon rimba padang

Gumiran bandum geupeugot

Nyoe keuh nanggroe Farama Hiram

Teumpat Tuan Cut Putroe got

Ban neudeungoe meunan kalam

Gumiran neu tanyong teumpat

Hantom lon deungoe meunan macam

Soe nyang lihat ‘ajeb that-that

Seubab neudeungoe Putroe Seudang

Nyang jeut tuan that neukarat

Nyang jinoe pat ‘Ursyom Zamzam

Lon keumeung pham peugah leugat

Amiren Cahya Putroe Intan

Na sajan ngon Raja Daulat

Naga peugah pantah rijang

Bak uram ka jiriwayat

Neudeungoe lon Syahi Alam

Beugot neupham haba ‘ajab

Nama nanggroe ‘Ursyon Zamzam

Farama Hiram Raja Daulat

Nama isteuri Cut Kandy Syam

Rupa na ban dum malakat

Raja meuaneuk pih na sidroe

Sambinoe na miseu kilat

Tujoh raja taklok keunan

Bak tuan nyan geujak daulat

Ngon pahlawan na tujoh droe

Kawai Putroe Pocut Ubat

Badan raya that seureuloe

Hana bagoe rupa hibat

Nama jinoe lon hareutoe

Ban tujoh droe lon riwayat

Peurtama phon Pari Bardan

Muhammad Saman dua meuhat

Lagi gagah deungon tungang

Ban dua nyan Ampon Daulat

Syariat Marban lhee lon seubut

Marnyang keu peut Nyak Koeb meuhat

Nyang keulimong Ibnu Kahar

Namploh gunca ek jimee brat

Nam lon seubut Marju Ratna

Hekeumat donya bak jih le that

Nyang keutujoh Adnan Fared

Nyang meusaket ek jikarat

Ban tujoh droe duek di Dalam

Siri intang Kuta Daulat

Nyuem mangat that lon deungoe kalam

Hana macam barang kapat

Naga leugat ji hareutoe

Po Samlakoe hireun dahsyat

Gumiran Syah hireun laloe

Naga pindoe peugah leugat

Padum na treb lam meuligoe

Tuan Putroe aneuk Daulat

Sikureung thon umue sampoe

Gohna lakoe Cut Nyak Leukat

Han dijeut ek pih meusidroe

Beurang gasoe aneuk daulat

Tan kuasa beurang gasoe

Goh sampoe nyang sabe pangkat

Raja kalon aneuk ceudah

Bak Allah neulakee leugat

Mohon tulong ubak Allah

Neuminah tan le bak teumpat

Ngon neutapa geunap uroe

Raja Nanggroe sakti le that

Bagian 72

Jeut keu laot teuma dudoe

Leumah jinoe cit meubakat

Siblah nanggroe jeut keu rimba

Tujoh raja sinan teumpat

Deungon rakyat meuploh laksa

Han ek kira lon peugah had

Neu pangge jen neu meusabda

Troh lanja bak Ampon Daulat

Deungon rakyat bala tantra

Habeh teuka dum meusapat

Teutap sinoe dalam rimba

Sidroe hana deuh soe lihat

Oh ta kalon cit meurimba

Rakyat raja hana meupat

Naga laju le calitra

Hate suka bungong riwat

Siblah nanggroe laot raya

Sinan Kuta Ampon Daulat

Nibak pusat laot raya

Poteuraja sinan teumpat

Naga peugah ubak Banta

Nyang lam Kuta sajan Daulat

Peurtama phon Poteuraja

Judo raja dua meuhat

Tuan Putroe geunap tiga

Aneuk dara nyang baek that

Ngon Dendayang na tujoh droe

Siploh sampoe bak riwayat

Pahlawan nyang kawai Putroe

Na tujoh droe bak lon hisab

Hana tom cre malam uroe

Yueb meuligoe sinan teutap

Beurang gasoe han ek ngaza

Meungkon raja nyang areh that

Meungkon tarek that peurkasa

Hana daya ek geurapat

Beek nyang ta prang ngon tangaza

Meung Kuta hana soe tupat

Oh ta kalon cit meurimba

Laot raya cit meubakat

Pakrie nyang ek rot tangaza

Leumah hana deuh soe lihat

Raja laen keunoe teuka

Hana daya ek geutupat

Teutap sinan troeh an jinoe

Lam laot nyoe sinan teumpat

Naga habeh ji hareutoe

Po Samlakoe ceureudek that

Habeh bandum ji hareutoe

Habeh sampoe pasai ngon bab

Dalam hate Po Samlakoe

Meunoe bagoe wahe sahbat

Nyoe nyang nyoe takbi lumpoe

Yoh di nanggroe lon bak teumpat

Nyang lon lumpoe saboh kulam

Bungong lapan deuh lon lihat

Nyang bungong di dalam kulam

Meukarang bandum meuikat

Samat teungoh ma’anikam

Jroh meureulang cahya hue that

Laen bandum cahya padam

Ma’anikam nyang leubeeh that

Nyoe keuh laot makna kulam

Bungong karang Putroe meuhat

Samat teungoh ma’anikam

Putroe Intan aneuk Daulat

Laen bandum meuh sibarang

Dendayang peunyuem lon meuhat

Tan meutuka bak ulon pham

Nagasilan nyang riwayat

Na sipeu treuk goh lom teuntee

Nyang kayee goh lom troeh dapat

Nyang lon lumpoe kayee gahru

Lon syot Teungku bungong riwat

Ban ulon mat nyuem jimeusu

Goh lom Teungku ulon dapat

Bagian 73

Uroe dudoe meunyoe na umue

Kayee gahru pih lon tupat

Syah Gumiran hate rindu

Sigeutue laen lon peujoek

Beek takhem-khem wahe Teungku

Lon peulaku hate that broek

Ta peugah he Nagasilan

Boh mamplam ta peugah beuntoek

Peu manfaat wahe rakan

Bak uram gata duek seuntoek

Ji seuot le Nagasilan

Suroh Raja bak lon neujoek

Meusoe nyang pot boh kayee nyan

Bak lon tuan neuyue antoek

Neu seuot le Syah Gumiran

Bak lon tuan peugah beuntoek

Ta deungoe he Po Janjongan

Boh kayee nyan alamat toek

Soe nyang pajoeh boh kayee nyan

Putroe Intan keunan neujoek

Beuthat dilee cit geumeuprang

Dudoe tuan roeh bak geujoek

Soe nyang nafsu Putroe Intan

Boh kayee nyan dilee geuthoek

Beuthat teuga geumeulawan

Dudoe abang roh geumasoek

Meunan neukheun le Sulthan

Hantroek wahan ngon tajuloek

Meu ek meuteumeung pajoeh mamplam

Putroe Intan meuteumeung cok

Boh kayee nyan lhee ban macam

Deungoe lon kheun ban meusipucoek

Saboh hijoe laen hitam

Mirah padam miseu loklok

Bit pih meunan lon peugah ban

Mirah hitam han jeut neucok

Han jeut pajoeh mirah hitam

Seukalian hekeumat gob

Neuseuot le Syah Gumiran

Nagasilan peugah beuntoek

Nyang mirah deungon nyang hitam

Han jeut makan peu seubab broek

Ji peugah le Nagasilan

Nyang hitam peunyaket budoek

Soe nyang pajoeh wahe rakan

Luka badan dum habeh broek

Nyang mirah hue racoen sajan

Soe nyang makan sinan dudoek

Han jan taweeh wahe rakan

Bak uram sinan meutumpoek

Boh nyang hijoe mameeh han ban

Soe nyang makan nekmat seuntoek

Meusigeutue ta teumeung makan

Lazat tuan nyuem sang maboek

Neuseuot le Syah Gumiran

Boh kayee nyan bah lon juthoek

Jiseuot le Nagasilan

Payah tuan reunong han toek

Ngon manyang that dalam awan

Leumah pih tan dalam pucoek

Han jeut ta ek Po Janjongan

Deungoe laman peugah beuntoek

Meunyoe ta ek euncoeng kayee nyan

Kala peusan dum di pucoek

Nyang bisa-bisa dum sibarang

Bandum sinan nibak pucoek

Adak ta rhom wahe abang

Nyang hijoe tan leumah tampoek

Nyang hijoe cit saboh wet-wet

Si u barat cabeung pucoek

Han ek leumah oh ta lihat

Hana meupat dalam sagoeb

Barang gasoe han troeh pinta

Payah teuka keunoe nyang toek

Ulon di yueb jaga-jaga

Soe nyang teuka cit lon antoek

Bagian 74

Meunan nariet Silannaga

Syah Gumiran atoe pakhoek

Pakrie cit han ta meudawa

Ulon teuka nyoe ho ka troek

Pakrie ta kheun jaga-jaga

Ulon teuka ta duek dawoek

Meunan nariet Syah Gumiran

Neu meuhaba siuroe suntoek

Teuman seuot Silannaga

Bak gata ka ulon masoek

That lon takoet keu Meukuta

Ngon gata han sabe pakhoek

Beuthat neupoh uleh Raja

Peu nyang hawa ulon peutroek

Cuba laen keunoe teuka

Lon seuba hana jan meutroek

Gata sidroe nyang syeedara

Di donyan an leumah seuntoek

Teuma seuot Syah Gumiran

Bit nyoe gata lon tamasoek

Peu nyang lon yue singoh lusa

Peu nyang pinta lon ta peutroek

Teuma seuot Silannaga

Peu nyang hawa bak lon neujoek

Neu peugah pat Po Meukuta

Peu ta mita keunoe nyang toek

Insya Allah lon useuha

Tuhan Esa meuhat nyang peutroek

Meusoe laen hana daya

Tan kuasa meu ube oek

Meunan nariet Silannaga

Gumiran neupeugah oh troek

Nyang troeh keunoe lon peuteuka

Ubak gata nyoe hoe ka troek

Ulon jak cok Amiren Cahya

Aneuk Raja dalam laot

Padum na treb lon cre nanggroe

Bak Putroe goh lom lon masoek

Meunyoe aduen teuh keu kamoe

Ta cok Putroe dalam laot

Nama Putroe Amiren Cahya

Keunoe ta ba bak lon beutroek

Ban jideungoe meunan haba

Hitam muka ji ek reudoek

Allah Allah Po Meukuta

Ulon hamba ajai rab toek

Meunyoe keunan neu seuraya

Hai Raja Cut bungong tajoek

Han meusampe meusyeedara

Hajat pinta na nyuem han troek

Kareuna ulon hekeumat raja

Bit naga ulon duek dawoek

Oh meuthee bak Raja raya

Ulon hamba cit geuantoek

Meung nyang laen peu Meukuta

Siri Raja han keunoe toek

Ngon nyan han ek lon keurija

Kareuna hamba na mit nyang broek

Bak lon jak joek Putroe Muda

Meung gata leupah ta masoek

Oh meuthee bak Raja Nanggroe

Lon geuseudoe ngon geuantoek

Han jeut sidroe ureung teuka

Allah gata ka lon masoek

Lagi ka jeut keu syeedara

Lon ngon gata gaseh meuroek

Bit pih meunan he Meukuta

Hate hamba sangat that broek

Meug geuthee ka leupah gata

Ulon hamba ajai ka troek

Lon pakrie ban hai syeedara

Leubeeh gata ngon ulon broek

Meunan nariet Naga pindoe

Sira jimoe meusoek-meusoek

Teuma seuot Syah Gumiran

Nagasilan pakon dawoek

Bagian 75

Ji seuot le Silannaga

That sayang gata keunoe toek

Han meusampe neu meurakan

Hajat tuan han ek peutroek

Kareuna Raja ‘Arsyon Zamzam

That ‘ajam sakti neuh lhoek

Adak laen neuboeh padan

Lon tuan sajan ku masoek

Allah Allah wahe Tuhan

Nafsu rakan neubrie beutroek

Meunan nariet Nagasilan

Ie mata ban ujeun reudoek

Neuseuot le Syah Gumiran

Lam laot nyoe bah lon masoek

Insya Allah ngon tulong Tuhan

Ulon tuan keunan bak neujoek

Ta duek gata wahe rakan

Beek susahan sinan seuntoek

Insya Allah Syahi Alam

Do’a sajan ulon teuh joek

Meunyoe na hajat Putroe Intan

Boh mamplam dilee neu juthoek

Meunyoe meuteumee pajoeh mamplam

Putroe Intan meuteumee cok

Sinan dali ta eue macam

Lon peugah pham bak ta juloek

Teuma seuot Syah Gumiran

Pot le gata keu lon tajoek

Teuma seuot Raja Naga

Han jeut Raja lon meuceunggoet

Bak jih panyang leusoeh raya

Awan miga ka rab tampoek

Leumah neu eue uleh raja

Dalam Kuta watee lon cok

Neukheun ulon le bicara

Manusia keunoe na troek

Han neubrie pot ubak hamba

Wasiet Raja masa neujoek

Nyang miyueb han deuh lam Kuta

Hana rot na ho ta baroek

Meung na hajat neu meurasa

Neu geulawa meunyoe ek troek

Meunyoe na bagi ngon bahgia

Sroet lanja keunoe meutumpoek

Meunan nariet Silannaga

Beudoh Banta bungong tajok

Neucok panah boh lam reugam

Bak Beurahman mohon beutroek

Beureukat guree lon Beurahman

Boh kayee nyan neubrie dudoek

Meunyoe judo lon Putroe nyan

Nyang hijoe nyan neubrie beutoek

Neu kucop le panah rijang

Neurhom mamplam sira dudoek

Neucok pantah pajoeh rijang

Lazat han ban mata lok-lok

Hireun tahe Nagasilan

Ji eue buet tan bungong tajoek

Lheuh neupajoeh mangat rasa

Bak Naga neu atoe pakhoek

Geutanyoe jinoe meu’ah deesya

Lon ku bungka hoe rot nyang troek

Meunyoe na umue akhe masa

Lon ngon gata lom meurumpok

Insya Allah Po Meukuta

Jan na sabda ulon ba troek

Neu peumeu’ah deesya kamoe

Uroe dudoe beu lom meurumpok

Jinoe laju neu peureugi

Seutot pasi rot rijang troek

Com bak teuot seumah di gaki

Neu peureugi bungong tajok

Leugat neujak seutot pasi

Beurheunti seuin-seun sipucoek

Geunap uroe hana khali

Laen lagi ulon antoek

Bagian 76

Banta bungka teuduek siat

Laen ayat ulon pakhoek

Deungoe beugot Macut Barat

Leubeeh lazat keunong antoek

Amma ba’du limong blah sampoe

Lon peugoe haba nyang lawi

Ma’anikm nyang saboh roe

Rhoet bak Putroe Tuan Siti

Putroe keubah bineeh sagoe

Nyang jinoe ka jeut peut gaki

Ngon kuasa Tuhan sidroe

Meunan bagoe neu peudali

Lheuh neukeubah uleh Putroe

Tujoh uroe sinan beurheunti

Lheuh nyan teuma wahe adoe

Tuhan sidroe nyang peujadi

Gaki jih peut deungon jaroe

Iku han soe panyang lagi

Ban jiteungoh dalam sungoe

Jijak jinoe rimba sunyi

Jijak keudeh jijak keunoe

Troeh sampoe bak guha pari

Keunan diloeb leugat sidroe

Jileung jaroe ubak Rabbi

Uroe malam hana laloe

Dawoek dukhoe lam ji puji

Ji lakee bak Tuhan sidroe

Ji mohon droe ubak Rabbi

Hana meusidroe soe peurunoe

Syiah adoe hana sini

Troen ileuham lam hate droe

Po ku sidroe meuhat nyang bri

Teutap sinan tujoeh uroe

Guha ka dhoe arat isi

Badan raya hana bagoe

Teubiet sinoe ji peureugi

Gunong hitam teungoh laju

Sinan Teungku guha lagi

Guha luah deungoe lon kheun proe

Siblah nanggroe nyuem rab sabe

Keunan jiloeb leugat jinoe

Malam uroe tan beurheunti

Teutap sinan tujoeh uroe

Peut be baroe raya isi

Arat guha raya badan

Sidroe Tuhan nyang peujadi

Tujoeh guha ka jitamong

Badan keumong rab ube gle

Ube na guha dalam gunong

Han lot tamong ujong gaki

Hana sapat nyang na gunong

Meunaong lam rimba sunyi

Diyueb kayee sinan piyoeh

Hana putoeh amai sakti

Badan raya rupa hibat

Buet kudrat Tuhanku Rabbi

Janggot panyang misee hibat

Iku bulat rab ube gle

Deungon panyang han troeh dapat

Sigoe jiwat troeh dalam gle

Ji hapit troeh laot darat

Ji panjat lam awan ijoe

Sinan jiduek di yueb kayee

Hana lalee amai sakti

Deungoe jinoe lon kheun laku

Lon peuteuntu mangat ta tukrie

Padum na treb lam jitapa

Deungoe Cutda ulon rawi

Umue sithon dalam rimba

Troeh ban pinta Tuhan neubrie

Habeh meuphom dum peurkara

Jameun masa nyang ka lawi

Jithee ayah deungon bunda

Manusia dilee jadi

Jitupeu biek deungon bangsa

Aneuk Raja ayah kami

Bagian 77

Habeh ngon nan bandum nyata

Phoen bak Kuha troeh bak Nini

Habeh bandum sukee Raja

Bandum rot Ma ngon rot Abi

Ji tupeu buet dilee punca

Nyang jeut hamba meunoe jadi

Hana meusidroe soe brie aja

Dalam tapa deuh teurjali

Ngon karonya Tuhan Esa

Ibu bapa ka jiturie

Meupat nanggroe meupeu banda

Asai mula ka ji tukrie

Ngon Apa Cut ka jitusoe

Deungon nan droe cit geurasi

Syah Gumiran Apa Cut kamoe

Meugah han soe hana sakrie

Adek ayah ulon sidroe

Siuroe siseun teurjali

Nyang jeut tan le nyang di nanggroe

Seutot lumpoe u dalam gle

Amiren Cahya nama Putroe

Apa Cut kamoe nyang meuhate

Farma Hiram nama nanggroe

Keunan jinoe neu peureugi

Dalam laot Putroe Intan

‘Arsyon Zamzam nama Raja

Bah lon seutot jinoe kaman

Ulon tuan mangat geuturie

Beek treuk kadang roh geumeuprang

Putroe Intan han geutem brie

Kadang han ek neulawan prang

‘Arsyon Zamzam kreuh sakti

Bah lon jak cok Putroe Intan

Lon lawan prang Raja ini

Meunan pike dalam badan

Beudoh rijang ji peureugi

Ban ji beudoh bak tidoran

Geumpa alam nyuem reuloh gle

Ngon iku meukuwang-kuwang

Na tamse ban go bupanji

Badan raya hana macam

Janggot panyang ka troeh u gle

Misee panyang that meudreeh-dreeh

Eumpang kreeh na ube guci

Deungon muka han peue daleeh

Kureung leubeeh na ube gle

Leugat laju ji beurjalan

Troeh yueb mamplam ji peureugi

Ji beudoh le dalam kulam

Nagasilan keumeung taki

Raja kra kheun beek le laku

Kuboet iku kah kutadi

Ban naga eue han ek lawan

Raya badan na ube gle

Ji tanyong le pantah rijang

Panee rakan ta peureugi

Krea seuot le pantah sigra

Seutot Apa lon dalam gle

Naga tanyong bak Raja Kra

Soe nan Apa cuba kheun le

Kra seuot le tanyong Naga

Syah Gumiran nan geurasi

Cuba peugah e hai Naga

Na rot gata neu peureugi

Naga seuot pantah sigra

Barona siseun lanti

Baro leupah gobnyan bungka

Keunan lanja seutot pasi

Raja Kra deungoe haba meunan

Leugat yoh nyan ji peureugi

Seutot pasi ji beurjalan

Syah Gumiran meuteumeung le

Goh meurumpok meuhadapan

Deuh ji pandang geupeureugi

Saleh yoh nyan Syah Gumiran

Apa Cut laman nyang seundiri

Bagian 78

Bak peunyuem lon sabet yoh nyan

Nagasilan nyang peugah krie

Dandang-dandang pike meunan

Syah Gumiran deuh neu eue le

Ban neupaleng u beulakang

Tahe mandang bungong pade

Dalam hate Syah Gumiran

Peue binantang na ube gle

Bunoe hana deuh lon pandang

Pajan datang ji peureugi

Saleh gunong saleh binatang

Saleh urang nanggroe ini

Saleh musoh saleh rakan

Saleh Tuan nyan Jen Pari

Gumiran Syah piyoeh siat

Neu lihat neukalon dali

Ban Bue kalon ka neu piyoeh

Jih pih teudoeh siat lanti

Jimeung mariet jitakot kon

Teujak teudong bineeh pasi

Oh thoe reuoh puleh payah

Gumiran Syah neu peureugi

Ban Kra kalon neu meulangkah

Beudoh pantah seutot lagi

Banta neujak sira ngieng u likoet

Deuh meumeet-meet ji peureugi

Yoh nyan neuthee Syah Gumiran

Nyoe binanatng sabet kon gle

Pakrie jih raya that badan

Kaya Tuhan Rabbol Kade

Han tom lon eue meunan macam

Umue laman padum lawi

Binatang nyan saleh khianat

Hana meupat ji meudeungki

Lom neu piyoeh bak ujong nyan

Neu eue macam saleh pakrie

Ban Kra kalon lom neu piyoeh

Dong di jeuoh ji beurdiri

Dalam hate Syah Gumiran

Pakon meunan binatang ini

Siat ji jak siat lintang

Hana curam ji peureugi

Watee lon jak jih beurjalan

Lon duek tuan jih beurdiri

Bak peunyuem lon han got ragam

Binatang nyan hana got krie

Teujak teudong Muda Seudang

Neu meuriwang neukalon jih

Lheuh nyan neu eh Syah Gumiran

Muda Seudang droe neubuni

Ban Bue kalon tan meubayang

Pantah han ban ji peureugi

Troeh le keunan meuhadapan

Ayat tuan laen rawi

Kureung pakhok antok kalam

Han got ragam lon meurika

Nyoe lon peugah wahe taulan

Deungoe abang lon calitra

Banta kalon ka troeh datang

Beudoh rijang neu peunyata

Di Bue pike ka leupah jalan

Ji meuriwang han got rupa

Teuma mariet Syah Gumiran

He binatang deungoe hamba

Soe nama kah ka kheun rijang

Lon eue badan kah that raya

Gata musoh atawa rakan

Lon deungoran peugah sigra

Peu kah jen atawa ensan

Atawa Milan hantu rimba

Bue seuot le pantah rijang

Lon kon lawan deungon gata

Ulon kon jen atawa ensan

Kon binatang beuthat peut pha

Bit neukalon raya badan

Ulon tuan miseu gata

Bagian 79

Bit neukalon sang binatang

Gata ngon lon saboh bangsa

Gata wareh ngon lon tuan

Han ta tuban asai mula

Keupeu neu tanyong nama ulon

Teungku Ampon soe beurnama

Gata sinan peugah dilee

Lon deungoe lagee ta peucalitra

Ban neudeungoe haba meunan

Beungeh han ban Syah Gumiran

Kutanyong kah ka tanyong kee

Le that lagee Bue ceulaka

Neucok panah dalam bajee

Neu meungkisee bak keupala

Bue seuot le meunoe lagee

Piyoeh dilee sikleep mata

Pakon meugriet neu meupoh kee

Neukheun lagee peue kareuna

Meunyoe tan seubab pike dilee

Neu meungpoh kee neu enanya

Ban neudeungoe meunan lagee

Dalam bajee neuboeh sigra

Lom neutanyong miseu dilee

Ka kheun lagee lon deungoe gata

Hoe meulangkah ka beurjalan

He binatang peugah sigra

Lon deungoe utoeh ka meukulam

Hana macam miseu gata

Bue seuot le pantah rijang

Lon tuan jak seutot Apa

Seutot Apa Cut lon beurjalan

Adek tuan lon ayahnda

Banta seuot rijang-rijang

Soe geuhoi nan Apa Cut gata

Bue peugah le teuma rijang

Syah Gumiran geuhoi nama

Ayah ulon Diwa Seukandan

Ibu laman Ratna Indra

Nama nanggroe Syam Palimbang

Ayah laman mat neuraca

Kusyik ulon Usman Juhan

Ampon laman deungoe hamba

Ayah Ibu Said Ba’dan

Indra Lailan isteurinya

Neumat Keurajeun Nanggroe Shafaran

Ta cuba pham uleh gata

Apa Cut lon Syah Gumiran

Lam reugam panah pusaka

Zameun ka treb neubeurjalan

Farama Hiram keunoe bungka

Amren Cahya nama Putroe

Apa Cut kamoe nyang meuhawa

Nama ibu Cut Kandy Syam

‘Ursyam Zamzam nama bapa

Neumat Keurajeun Farama Hiram

Laot saktian sinan Kuta

Ban Banta deungoe haba meunan

Yoh masa nyan neu pareksa

Bit-bit gata aneuk Sulthan

Diwa Seukandan geurasi nama

Lon eue gata sang binatang

Toh pakrie ban asai mula

Bue seuot le pantah rijang

Jameun tuan saboh masa

Nibak gaki buket Jilan

Ibu laman peulheuh nazar

Meuteumeung krueng saboh sinan

Ie di dalam dua bangsa

Siblah puteh siblah hitam

Po ku Tuhan nyang keureuja

Ayah manoe lam ie hitam

Ibu sajan siseun dua

Ka teukeudi nibak Tuhan

Jeut gobnyan miseu Raja Kra

Neu meusituboh yoh masa nyan

Jadi laman Tuhan karonya

Bagian 80

Nyan keuh seubab meunoe macam

Ulon tuan na miseu Kra

Apa Cut lon tiek lam ie puteh

Ayah puleh miseu nyang ka

Na saboh krueng teuma dudoe

Bak rot ta woe bak Aulia

Geu meupiyoeh dum sibarang

Beusar seudang tuha muda

Di sinan rhot ma’anikam

Ibu laman Ratna Indra

Teuma neuboeh lam on kayee

Uyueb batee neukeubah sigra

Teutap sinan tujoh uroe

Jadi kamoe akhe masa

Ulon teungoh teuma dudoe

Leugat jinoe lon jak tapa

Hana guree lon meurunoe

Tuhan sidroe brie rasia

Padum na treb teuma dudoe

Habeh lon tusoe dum syeedara

Lon thee Apa Cut leupah keunoe

Beudoh dudoe lon jak mita

Na keuh baro dua uroe

Nyoe hoe sampoe troeh bak gata

Na taturie na tatusoe

Apa Cut kamoe Syah Gumiran

Ban neu deungoe meunan bunyoe

Seuot jinoe Banta Muda

Wahe aneuk deungoe kamoe

Lon peugah nyoe ubak gata

Wahe keumuen na tatusoe

Nyoe keuh kamoe Apa Cut gata

Syah Gumiran nama kamoe

Samlakoe soe geuhoi nama

Bue seuot le leugat jinoe

He Apa droe deungoe hamba

Beu ta turie beu ta tusoe

Nyoe keuh kamoe Basyah Gomtala

Padum na treb lon deungoe bunyoe

Bak siuroe nyoe lon eue rupa

Lheuh nyan teuma mumat jaroe

Ban dua droe hate suka

Ngon kuasa Tuhan sidroe

Neubrie sampoe troeh ban pinta

Geu piyoeh le rot deh rot noe

Bandua droe keumuen Apa

Sutra puteh cob kupiyah

Sutra mirah lhab keu seumba

Dilee matan ulon peugah

Jinoe surah lon boeh makna

Nama Hikayat Gomtala Syah

Meunan peuneugah guree hamba

Dilee Teungku goh troeh wajah

Baro leumah pura-pura

Seureuta ngon ulon kisah

Gomtala Syah lon calitra

Teuma mariet Gomtala Syah

Wahe ayah deungoe hamba

Seureuta ngon jiboet jaroe

Ampon kamoe Ayah Muda

He Ayah Cut Mata Uroe

Aneuk teuh nyoe raya hawa

Beu Allah brie hajat sampoe

Keumuen teuh nyoe mohon pinta

Gumiran Syah tanyong meunoe

Po Samlakoe peu ta pinta

Peugah leugat he Samlakoe

Tuhan sidroe peutroeh pinta

Gumiran Syah kheun hareutoe

Seuot dudoe Basyah Gomtala

Nyang troeh langkah lon jak keunoe

Hajat kamoe gantoe gata

Ayah Cut duek bak teumpat nyoe

Bah le kamoe jak meumita

Amren Cahya nama Putroe

Lam laot nyoe he ayahnda

Bagian 81

Neu peuidzin lon Ayah Cut droe

Lon cok Putroe aneuk raja

Oh lheuh lon cok leugat lon woe

Lon peujaroe ubak gata

Meuhan jibrie ‘Arsyon Zamzam

Lon lawan prang Raja raya

Cit ka lon thee ek neumeuprang

Ek neusagang tantra raja

Beuthat ek droe nyang neumeuprang

Siseun tuan bah lon ngaza

Rimba lon cah laot lon dhoe

Lon cok Putroe Amiren Cahya

Di Ayah Cut neuduek keudroe

Na gantoe Basyah Gomtala

Insya Allah ngon tulong Tuhan

Neu eue buet tan Keumuen Apa

Mangat neukalon buet binatang

Mangat neutuban buet Raja Kra

Bit neukalon panyang iku

Ek lon eumpu Pinto Kuta

Teuma seuot Gumiran Syah

Han peu salah he aneuknda

Oh lheuh idzin nibak ayah

Beudoh pantah jimeung bungka

Le Gumiran neukheun lagee

Piyoeh dilee sikleep mata

Beek meugriet that ngon meudhab-dhab

Malaikat han neuridha

Meunyoe pantah buet seurikab

Piyoeh siat Basyah Gomtala

Jinoe aneuk lon peugot surat

Joek keu Daulat Raja Raya

Meuhan geubrie deungon mangat

Dudoe meuhat gata ngaza

Meunan nariet Syah Gumiran

Piyoeh yoeh nyan Basyah Gomtala

Syah Gumiran peugot surat

That bit ‘ajab haba Raja

Lheuh meututo beuot jaroe

Beudoh dudoe ka jibungka

Leugat laju ji peureugi

Bineeh pasie nyan kuala

Gomtala Syah beut hekeumat

Badan that kuat kon ban nyang ka

Ji peujeut droe keu eungkot tri

Jilangue le lam laot raya

Sikleeb siklab plueng beurlari

Sampoe lagi Kuta Raja

Basyah ka troeh u pusat laot

Kon ban eungkot laen rupa

Jeut keu bayeun Gomtala Syah

Jipoe pantah lam istana

Deungon surat nibak babah

Troeh leupah tingkap istana

Jiba surat kab ngon babah

Jitiek pantah lam leumueng Raja

Amma ba’du poma badan

‘Arsyon Zamzam lon calitra

Raja neu eh di meuligoe

Sajan Putroe isteurinya

Teulheuh nibak nyan teuma dudoe

Troeh sampoe Bayeun ji teuka

Deungon surat nibak babah

Jitiek that paih lam leumuengnya

Raja cok le leugat-leugat

Neuploh lipat ka neubuka

Habeh maklum dum sibarang

Hireun mandang Raja Raya

Ka teupike Ampon Daulat

Ek ji tupat lam laot raya

Meukon ureung rayek pangkat

Han ji tupat teumpat hamba

Meunan pike Raja Daulat

Neupangge rakyat Imum Bentara

Troeh le keunan han jan siat

Ampon Daulat neu meusabda

Bagian 82

Poteuraja neubaca surat

Dinab rakyat dum peutua

Tuan Putroe gob meuhajat

Aneuk Daulat Syah Gumiran

Nama Nanggroe Palimbang Syam

Raja Sulthan Juhan Usman

Nyan keuh jinoe pakrie padan

Uleebalang seuon sabda

Ampon Daulat lon jeunulang

Ban nyang reumbang bak sarpada

Ban nyang patoet sabe lawan

Meung reumbang han le meudawa

Neupeugah bak dum pahlawan

Troeh rijang keunan teuka

Oh troeh keunan dum meusapat

Raja Daulat peugah sigra

Raja peugah leugat-leugat

Na troeh surat saboh teuka

Gumiran Syah lam surat nyan

Juhan Usman nama ayahnda

Syah Gumiran lakee meukawen

Ngon Putroe Canden Amren Cahya

Pakrie ta tueng atawa han

Kareuna gobnyan aneuk raja

Meuhan ta tueng akhe alang

Nanggroe ji prang uleh Banta

Bak peunyuem lon le saktian

Adak ta lawan nyuem ek padra

Jikalau ta tueng ta balah surat

Meuhan bah that keunoe teuka

Habeh neupeugah pasai ngon bab

Yoe meukhab-khab pahlawan dum na

Teuma seuot Amud Hajidan

Di dalam nam nyang that tuha

Ampon Tuanku meuribee katoe

Tuan Putroe beek neu ridha

Jikalau troeh keunoe dudoe

Kamoe tujoh droe lawan ngaza

Keupeu cit na kamoe tujoh droe

Meung siuroe tan keureuja

Bak siseun nyoe bah ta pakoe

Toh buet jaroe balah guna

Daulat Ampon tanglong nanggroe

Bak siseun nyoe ta keureuja

Keupeu raya pruet raja tujoh droe

Rakyat sikatoe dalam rimba

Hana lon brie Tuan Putroe

Bah le bak dhoe laot peunawa

Pakrie ta tueng han meusoe-soe

Kareuna Putroe indah rupa

Han seupadan deungon Putroe

Ngon geutanyoe han sabe bangsa

Meunan nariet Amud Hajidan

Putroe Intan han ji ridha

Keumah pakat sapeu padan

Pahlawan ngon Raja Raya

Teuduek siat lem pahlawan

Bayeun tuan lon calitra

Bayeun jidong di hadapan

Ureung lapan peugah haba

Ji deungoe nariet bak Sulthan

Habeh jipham mangat suka

Lheuh nyan Bayeun ji meukalam

Ngon Sulthan Raja Raya

Ampon Tuanku meuribee katoe

Ta deungoe kamoe Pomeukuta

Tuanku tueng keu meulintee

Asoe juree Syah Gumiran

Beek Tuanku keumeung meuprang

Syah Gumiran that peurkasa

Adak tujoh droe na pahlawan

Nyang that geunggam Syah Gumiran

Nyang sidroe nyan teuga han ban

Han soe ek lawan barangrie Raja

Ulon teuh nyoe peuringatan

Seubab sayang keu sarpada

Bagian 83

Beek roeh dudoe teuka alang

Gata Sulthan sabe Raja

Ban Raja deungoe haba meunan

Seuot yoh nyan pantah sigra

Hana kutueng Syah Gumiran

Muka masam rok-rok masa

Lagi pih han sabe lawan

Deungon laman han sabe bangsa

Meuka han ek lon lawan prang

Lon thee agam ureung teuka

Bayeun deungoe haba meunan

Jikheun yoh nyan sikrak haba

Panee ta turie Syah Gumiran

Hana ta tuban Syah Gomtala

Meugoh lom troeh keunoe datang

Raja jalang kusalib jungka

Ban Raja deungoe haba meunan

Beungeeh han ban ji ek bisa

Neu beudoh le pantah rijang

Bayeun jalang le that haba

Antara kah nyang teureubang

Eumpeun musang le that haba

Sinan keuh phon meukab agam

Akhe datang jeut prang raya

Neusuet peudeung pantah rijang

Neu keumeung cang Bayeun teuka

Ban jikalon ka meulayang

Jipo rijang euncong jeumpa

Sira jipo meunoe lagee

Raja asee ceubeuh raya

Cuba ka troen keunoe dilee

Troeh peureudee uram jeumpa

Raj neugroeb le di juree

Meug han ku thee sabe padra

Bayeun jitroen le u bumoe

Ji kupruek droe leun istana

Ban ji kupruek ji hayak droe

Ka meuwoe badan ban nyang ka

Badan raya hana bagoe

Karab dhoe saboh istana

(Hikayat Gomtala Syah ini belum tamat, baru bagian permulaan saja!)