HIKAYAT BANTA AMAT

Hikayat  Banta Amat

# Alih aksara dari Arab Melayu/Jawi/harah Jawoe ke huruf Latin oleh : T.A. Sakti

 

Bagian 1

 

Alhamdulillah pujoe keu Tuhan

Zike sajan nyan di babah

Ingat makna teuma beek han

Hate keunan seureuta lidah

 

Lom seulaweut teuma lagi

Nyan keu Nabi Rasulullah

Teuma do’a lom sigeutue

Keu Ibu dilee ngon Ayah

 

Seubab payah neupeulaku

Neubrie ngon bu dua lhee babah

Ya Illahi wa ya Rabbi

Keu lon neubrie he ya Allah

 

Saboh haba lon keumeung rawi

Hana sakrie indah han ban

Tan na meunan laen beurangi

‘Ajeb seukali ta deungoe dumna

 

Rakan lon keubah hai Teungku beh

Lhok Meulaboh asai mula

Geuyue karang hai Adek beh

Haba nyang jroh hana nyang sa

 

Han keuh dapat lon meudakwa

Suroh Raja he Dalem beh

Lom pih hate teungoh galak

Lon pih hai Nyak teungoh suka

 

Masa lon duek sideh di gampong

Sinan keuh ulon peukeunong haba

Ulon karang phon di sinoe

Ta deungoe kamoe lon calitra

 

Hajat rakan ulon peutroeh

Lon keumeung boeh nyang seutia

Saboh nanggroe luah han sakrie

Nan geurasie Banatiya

 

Raja raya keurajeun luah

Hana tuah aneuk hana

Nama gobnyan raja Ansari

Judo nyakti Putroe Ridla

 

Hareuta le that hana sakrie

Seudeukah neubrie hana reuda

Teutapi gobnyan that biet susah

Dalam gundah akan aneuknda

 

Nyan keuh seubab jeut keu soailan

That silauan keu aneuknda

Neu meulakee uroe malam

Ubak Tuhan mohon pinta

 

Hana teudoh pih meungsiat

Neu meuhajat jeun Aulia

Jeub-jeub tabib mita ubat

Galak neuh that bijeeh mata

 

Neu khanduri neuyue khatam

Uroe malam hana reuda

Neu meulakee ubak Tuhan

Beuranggajan lakee do’a

 

Ya Illahi wa ya Rabbi

Po lon neubrie ban lon pinta

Neubrie aneuk keu lon sidroe

Ureung lakoe nyang jroh rupa

 

Meunan sabe neu meulakee

Goh troeh watee Tuhan karonya

Meunan sabe hana khali

Seudeukah neubrie hana reuda

 

Bak simalam neu beuradu

Deungoe Teungku malam jula

Raja neu eh ateuh kaso

Deungon judo Putroe Muda

 

Padum lawet teuma dudoe

Hamel Putroe pih ka nyata

Na lhee buleun hamel Putroe

Leumah lumpoe Poteuraja

 

Raja neu eh ateuh tilam

Leumah burhan Allah peunyata

Na nyuem jitroen mata uroe

Jidong bak dhoe Poteuraja

 

Meunyuem peudeh sang teumakot

Neu seulimbot beek neu eue rupa

Badan tutong mata seupoet

Teukeujoet ka lalu jaga

 

Bagian 2

 

Oh teukeujoet bak meulumpoe

Bujang Meuntroe neuseurantan

Peurdana jak rijang-rijang

Sare datang ubak Raja

 

Jibot jaroe ban dua blah

Mohon titah bak Meukuta

Ampon Tuanku meuribee ampon

Hoe neu suroh Pomeukuta

 

Seuot Raja Meukuta Nanggroe

Takrah keunoe dum Peutua

Ban jideungoe meunan titah

Rakyat jikrah hana reuda

 

Jitroen rakyat subhanallah

Han tatu’oh han ngon hingga

Dalam peunoh mideun sarat

Jitroen rakyat ban ie raya

 

Oh sajan troeh ka meusapat

Marji Daulat Poteuraja

Jiboet jaroe ban dua blah

Mohon titah nyang sijahtra

 

Ampon-ampon meuribee kali

Ubak gaki Po Meukuta

Teuma seuot Raja Nanggroe

Judo Putroe Raja raya

 

Han peu tuan lon ta daulat

Tamong leugat dumna gata

Tamong dumna rakyat

Lon meudharat susah raya

 

Rakyat tamong dum meukarat

Seumah teuot Poteuraja

Oh lheuh seumah dudoe surot

Deungon likot na lhee deupa

 

Duek bak teumpat dum kafilah

Deungon zaujah Putroe Ridla

Uleebalang dum meusapat

Aneuk rakyat duek meubanja

 

Beuot jaroe ban dua blah

Mohon titah ubak Raja

Ampon Tuanku Syahi ‘Alam

Peu soailan Po Meukuta

 

Peu buhajat Meukuta Nanggroe

Neukrah kamoe dum lasyeuka

Seure nanggroe nyang tan wase

Toh seure gle nyang meulangga

 

Seure gampong nyang meuseugang

Toh seure blang tan meusara

Seure nanggroe nyang neu meuprang

Peugah rijang Po Meukuta

 

Seure laot neu jeumeurang

Toh keuh bintang neu meuhawa

Teuma seuot Raja Nanggroe

Kon keu Putroe nyang lon hawa

 

Lon hoi gata dumna nanggroe

Lon meulumpoe saboh rasia

Nujum tanyong seureuta Meuntroe

Peu neulumpoe Po Meukuta

 

Ulon peugah nyang lon lumpoe

Wahe Meuntroe dumna gata

Na nyuem jitroen mata uroe

Jidong bak dhoe lon meucahya

 

Badan tutong mata seupoet

Teuma teukeujoet ulon jaga

Oh teukeujoet bak meulumpoe

Bujang Meuntroe lon seureuta

 

Nyan keuh lumpoe gata deungoe dum

Pakrie maklum nibak gata

Teuma seuot Teungku Nujum

Meunoe neukheun ubak Raja

 

Piyoeh dilee Ampon Daulat

Lon lob kitab peupoh angka

Nujum neu eue le neulihat

Neutakat bak bintang Raja

 

Ampon meu’ah tanglong nanggroe

Deungoe lon kheun proe Po Meukuta

Leumah lon eue dalam surat

Aneuk Daulat ka rab nyata

 

Bagian 3

 

Raya tuah Tuhanku brie

Lahe takbi Po Meukuta

Nyan keuh Daulat sangkot-paot

Roeh meulimboet lam rahsia

 

Badan tutoeng mata seupoet

Teu ‘uet limboet sangat raya

Han ek tantang sang teumakoet

Meunan limboet Po Meukuta

 

Bah lon peugah haba lawi

Oh tan Duli budak nyata

Bala pih le hana sakrie

Tinggai Ummi Putroe Muda

 

Nyang phoen bala mate Duli

Tuhan neubrie keu Aneuknda

Hareuta jicok dum le Wali

Hana jibrie keu Putroe Muda

 

Kapai pirak kapai beusoe

Jicok dudoe le syeedara

Putroe Ridla nyang isteuri

Dudoe keuji hana tara

 

Nyan keuh bala wahe Duli

Dalam takbi leumah nyata

Leumah lon eue dalam bab tan

Bukon wayang Po Meukuta

 

Laen pih le hana sakrie

Meugoh mate sabe bahya

Oh lheuh Nujum neu hareutoe

Neulakee woe keudeh gisa

 

Ateuh ulee beuot jaroe

Neu izin nyoe lon Meukuta

Com di teuot seumah bak gaki

Raja nanggri peutoe neubuka

 

Joek seureuban nyang meusujoe

Ji peujaroe keu Panita

Nyang laen dum neubrie ringget

Nyang-nyang wajeb deungon kada

 

Ladom neujoek siluweu sutra

Ladom ija nyang meusujoe

Woe keu rakyat dum keumbali

Tinggai Duli Poteuraja

 

Ruku’ sujud hana khali

Pujoe Rabbi hana reuda

Laen pih na dum beurangrie

Tuhan ghani nyang that kaya

 

Lawet lawan teuma dudoe

Ka troeh sampoe Poteuraja

Ka keuh troeh had janji sampoe

Tinggai nanggroe Po Meukuta

 

Malam Khameeh neu beurangkat

Tinggai rakyat bala tantra

Habeh langkah ngon raseuki

Ka teukeudi saboh masa

 

Troeh ngon ajai sampoe tanggoh

Datang le troeh maot teuka

Teuka wareh asoe gampoeng

Geujak junjoeng manyet gata

 

Geutot beude geuboh ubat

Tanda adat Poteuraja

Wali karong dum meusapat

Geujak ngadap Po Meukuta

 

Tunong baroh jitroen rakyat

Mideun sarat hanatara

Dalam peunoh dum meusak-sak

Laen teungoh jak han peu kira

 

Geu seumeusie hana khali

Seudeukah geubrie hanatara

Ka keuh ‘a’ue hana teudoeh

Meugeureupoeh hana ngon sa

 

Keubeu leumoe sie han teudoeh

Rakyat riyoeh subra donya

Raja mate ateuh kasoe

Putroe ba-e roe ie mata

 

Putroe Ridla moe meusoek-meusoek

Ingat judo ka leupah bungka

Allah Allah pakrie keuh jinoe

Hoe troeh lon nyoe ya Rabbana

 

Bagian 4

 

Allah hai untong pakrie keuh ulon

Mate tiyong tinggai cintra

Mate unoe tinggai sambang

Mate dagang seungue banda

 

Wahe aneukingat keudroe

Jeup-jeup nanggroe meureuraba

Putroe ba-e hana bagoe

Ji tumboek droe limpah dada

 

Oh ji ingat nyan keu judo

Ie mata roe ateuh tika

Putroe jimoe that ka meudo

Ateuh kasoe ka teurhanta

 

Ph lon ingat ie mata roe

Sayang judo leupah bungka

Bukon sayang bungong pade

Jipoet angen gle reubah meutimpa

 

Bukon sayang bungong kumbang

Lam keunarang habeh mala

Tuboh paleh badan suwang

Jinoe meulang-lang troeh an tuha

 

Oh lon ingat reuloh hate

Bah le mate sajan gata

Bukon sayang cicem murong

Ji meu eumpung di bubong para

 

Oh lon ingat nyan keu untong

Meu geugulong ngon ie mata

Bukon sayang bungong panjoe

Keunong uroe layee rata

 

Oh lon ingat keu judo droe

Roe meutaloe ngon ie mata

Bukon sayang bungong geutoe

Angen tampoe rhot u donya

 

Meuka mate Raja Nanggroe

Tinggai Putroe keupeu guna

Budak lam pruet goh lom lahe

Dilee mate Po Meukuta

 

Oh lon ingat han meusampe

Bah le mate sajan Raja

Adak udep han soe kalon le

Keuji sabe akhe masa

 

Oh lon ingat nariet jameun

Miseu neukheun le Panita

Jeup-jeup pinto lon teurjunun

Jeup-jeup rinyeun lon teurhanta

 

Saleh hoe troeh siseun nyoe

Neutueng kamoe ya Rabbana

Han jeut lon ingat he ya Akhi

Nariet takbi kheun Ulama

 

Meunan jikheun Putroe ahli

Duek di gaki Poteuraja

Mate Raja tanglong nanggroe

Tinggai Putroe dawok rugha

 

Raja mate Putroe balee

Lam peunangkee budak baro na

Teuduek siat haba Cut Ti

Ulon rawi Poteuraja

 

Raja mate geu seumanoe

Putroe jimoe hana reuda

Oh lheuh manoe suci badan

Boh lam kafan Poteuraja

 

Kafan ‘Arab ija ihram

Dum beebeewan boh bak muka

Minyeuk ‘athar ulee gafo

Keunan geuroe lam keureunda

 

Minyeuk gahru jibab puteh

Dumpeu habeh hanatara

Dumpeu hase ka keuh cukop

Teuma geutop dalam keureunda

 

Toep di ateuh ija sundusen

Haloh licen jeuneh sutra

Cukop hase dumpeu laen

Ka geu peutroen Poteuraja

 

Tajoe sidroe inong male

Ngon breuh pade sipreuk rata

Teuma geu peuduek di teungoh leun

Neumeung inseun siklep mata

 

Bagian 5

 

Geucok sinan geumee u jeurat

Ureung jak intat troh meulaksa

Teuma geulhom dalam uruek

Ulama duek neulakee do’a

 

Raja pih ka lheuh geuseubee

Woe meureeree rakyat dum na

Uroe keulhee geukhanduri

Karong Wali bandum sama

 

Malam limong troeh bak tujoh

Hana teudoh sikleb mata

Malam tujoh geukhanduri

Seutot faki dum Ulama

 

Geusie keubeu siuroe siploh

Hana teudoh sikleb mata

Meunan sabe troeh bak peutploh

Deungoe kiroh subra donya

 

Lheuh nibak nyan teuma dudoe

Ulama woe dum barang na

Rakyat laen dum keumbali

Tinggai Wali lam istana

 

Putroe Ridla tinggai sajan

Uroe malam moe han reuda

Wali karong ji seumimpan

Peutoe geuklam ka jibuka

 

Cok hareuta dum le Wali

Han jitem brie keu Putroe Muda

Ji meubagi sabe keudroe-droe

Ji puwoe u rumoh tangga

 

Oh habeh meuh dum lam geudong

Ka jiusong dum jirata

Habeh jicok dum sinaroe

Guci guroe ka jihila

 

Geudong intan geudong pudoe

Cit ka baroe han peu kira

Kapai pirak kapai beusoe

Ka keu adoe raja muda

 

Habeh dumpeu dum sinaroe

Ji peutoe bak eumpang sira

Parang puntong ngon mata syok

Nyan pih harok han jikira

 

Manok itek kameng keubeu

Dumpeu jihue le syeedara

Peu ji teumeung habeh jicok

Han teujalok akan aneuknda

 

Nyan keuh ureung buta hate

Han jipike keu syeedara

Oh ka habeh dum sinaroe

Laju jiwoe dum jirata

 

Meunoe jikheun ubak Putroe

Nyan Meuligoe bah keu gata

Dumpeu habeh jimeung woe-woe

Tinggai Putroe dawok rugha

 

Teuduek haba Wali Karong

Laen ujong lon calitra

Lawet lawan lheuh khuteubah

Lon kisah keu Putroe Muda

 

Amma ba’du dudoe akhe

Ulon rawi Putroe Muda

Padum lawety nyang ka tinggai

Lon peugah hai Wali Raja

 

Jinoe laen ulon rawi

Keu Sinyak Ti Putroe Muda

Meunoe jikheun Putroe ahli

Moe meu’i’i roe ie mata

 

Allah Allah he ya Rabbi

Mate Duli habeh hareuta

Pat keuh lon cok nyang lon pajoh

Saleh ho troeh meuraba-raba

 

Habeh jicok dum le Wali

Han jitem brie keu Putroe Muda

Beungoh seupot troeh le jiwoe

Jeup-jeup nanggroe hana reuda

 

Beungoh seupot hana teudoh

Ta deungoe kiroh subra donya

Oh lon ingat malam uroe

Beudoh Putroe jak meumita

 

Bagian 6

 

Oh seupot ka troeh le jiwoe

Jeup-jeup nanggroe hana reuda

Ek sirumoh tron sirangkang

Bukon sayang aneuk dara

 

Jak meumita geunap uroe

Oh troek had woe u rumoh tangga

Bak tan wareh deungon karong

Jeup-jeup gampong lon meuraba

 

Pihak ‘ayeb peudeh untong

Jeup-jeup gampong meudiwana

Oh lon ingat nyang keu nasib

Lon teugeuntiet tan syeedara

 

Oh lon ingat judo payong

Meu geugulong ngon ie mata

Lon tueng upah peu ek kayee

Hana malee meunglon hina

 

Keupeu jeut na masa dilee

He panghulee jinoe ka papa

Dilee lon duek dalam meuligoe

Tapi uroe nyoe roe ie mata

 

Yoh na judo Raja Nanggroe

Lam meuligoe hate suka

Meunan jikheun Tuan Putroe

Meu teutalo ngon ie mata

 

Sira jimoe meusoek-meusoek

Bungong tajoek sayang raya

Bak siseun nyoe saleh ho troek

Hate lon brok hanatara

 

Sira ji kheun ji reut ngon oek

Ngon jitumboek beukah dada

Tuan Putroe hate meuroek

Jeup sangoe lhok jak meumita

 

Oh meuteumeung breuh siaree

Han pat jiplee eumpang hana

Ngon pruet raya bube kuree

Duek teurlele jeup-jeup tangga

 

Beungoh ji jak seupoet jiwoe

Geunap uroe meunan juga

Beungoh sikai seupoet sikai

Meunan keuh hai had ngon hingga

 

Ladom ji pajoh ladom tinggai

Ingat keu hai singoh lusa

Untuong saket pajan-pajan

Han ji tujan jak meumita

 

Ingat keudroe Putroe Intan

Hana mawang ngon syeedara

Oh meuteumeung breuh siaree

Han pat jiplee eumpang hana

 

Ngon pruet raya bube keudee

Duek teurlele jeup-jeup tangga

Eumpang pih tan han pat jiboeh

Lakee bulooh bak ureung lingka

 

Bah keuh dumnan saboh atoe

Laen pih le han peu kira

Meunyoe mantong jeut lon seumurat

Leumah leugat peu nyang hawa

 

Bah keuh dumnan teuduek siat

Lon seumurat tan biasa

Lawet lawan teuma dudoe

Saket Putroe budak nyata

 

Lheuh nibak nyan geuseumanoe

Manyak jimoe hana reuda

Allah Allah hai Potallah

Pakrie lon bah he Bentara

 

Hoe keuh lon mee pat lon keubah

Aneuk lidah Putroe Muda

Budak jimee dalam ayoen

Ma ka jitroen jak meumita

 

Budak jimee lon ka susah

Pakrie ilah Putroe Muda

Jikalee na ureung upah

Jeut lon keubah siuroe dua

 

Bagian 7

 

Seuot Putroe nyang meutuah

Beek ta gundah wahe Poma

Ma jak mee le rijang pantah

Ji keubah bak leumueng Poma

 

Putroe Ti cok boeh lam ayoen

Sya-e pantoen le jibuka

Putroe Ridla ji meusya-e

Deungon tamse jilhom punca

 

Allah haido kudoda idi

Bak keumiki di dalam paya

Sinyak jimoe han peu lon brie

Habeh wali cok hareuta

 

Allah haido kudoda idang

Bak keutapang di rot raya

Sinyak jimoe bukon sayang

Han sigeupang le hareuta

 

Allah haido kudoda idi

Boh keumili sikarang dua

Sinyak jimoe that ka meudo

Ie mata roe meuleu lumba

 

Allah hai do kudoda idi

Bak keumili han soe hawa

Sinyak jimoe han peu lon brie

Ma jih faki tan hareuta

 

Sira jimoe meusoek-meusoek

Bungong tajok sayang raya

Bak siseun nyoe saleh hoe troek

Hate lon broek hanatara

 

Sira jimoe jireut ngon oek

Ngon jitumboek leumbam dada

Tuan Putroe hate meuroek

Jeup sagoe lhok jak meumita

 

Oh meuteumeung breuh siaree

Han pat jiplee eumpang hana

Ngon pruet raya bube keudee

Duek teurlele jeup-jeup tangga

 

Tuan Putroe ji meusya-e

Su sang bangsi buloh bungga

Si manyak cut han le jimoe

Ji deungoe bunyoe Ma ji rika

 

Meunoe jikheun sira jimoe

Boh tuloe ngon boh cempala

Oh lon ingat ie mata roe

Oh tan judo hana le hareuta

 

Jak kutimang putiek sukoen

Habeh jitroen angen bawa

Sinyak tinggai dalam ayoen

Diloen kutroen jak meumita

 

Jak kutimang putiek nipah

Aneuk lidah sidroe saja

Kaom teuh le meugah-meugah

Bu sikulah hantom teuka

 

Jak kutimang putiek langsat

Cut Amat rupa samlakoe

Beujeut aneuk ta meujareng

Beek meudeungkeng ngon rakan droe

 

Jak kutimang putiek ramboet

Beungoh seupoet Ma seumanoe

Beujeut aneuk keu Pawang Laot

Beujeut ka got dayong keumudoe

 

Jak kutimang bungong panjoe

Keunong uroe layee rata

Oh lon ingat bukon rugoe

Po Samlakoe tan le hareuta

 

Jak kutimang bungong mancang

Bentara Blang Cut Amat Banta

Oh lon ingat bukon sayang

E buleun trang roe ie mata

 

Bah keuh dumnan he syeedara

Beek le panyang he syeedara

Meunyoe lon tempeugah laju

Na peu teungku ta meurika

 

Si Amat cut rayek laju

Ban boh labu baro geupula

Banta Amat rayek keufroe

Tuhan sidroe nyang peulara

 

Bagian 8

 

Amat Banta rayek leugat

Ban kulat ujeun keunong sa

Ma jih Putroe dawok susah

Jeup kafilah jak meumita

 

Beungoh jijak seupoet jiwoe

Geunap uroe meunan juga

Peu titah Potallahon haq

Ban nyang kheundak ase pinta

 

Teulheuh buleun ka jeut jijak

Ma jih galak hana tara

Tuan Putroe hate galak

Oh jeut jijak Amat Banta

 

Aneuk baro jeut ji takteeh

Ma jih leubeeh hate suka

Ma jih Putroe luka hate

Hana peu brie tan hareuta

 

Nyan keuh seubab hate that weuh

Ji eu ateuh Amat Banta

Digob laen dijih saban

Keutiwasan malee mata

 

Oh ji kalon nibak gaki

Hana peu brie tan hareuta

Hareuta na yoh mantong Duli

Habeh wali cok pusaka

 

Oh jikalon nibak jaroe

Tuan Putroe roe ie mata

Beuthat jikheun beurang gapeu

Ta niet bue pajoeh boh bangka

 

Dilon Poma han kupateh

Hate peudeh nibak nyang ka

Cuba keuh na Raja Nanggroe

Kon ek geubloe gleung suasa

 

Sabe meunan geunap uroe

Sinyak Putroe jimoe rugha

Putroe Ridla dawok jimoe

Ri geumanoe ngon ie mata

 

Oh lon ingat keu aneuk droe

Geunap uroe hate luka

Bukon sayang Banta Amat

Oh lon ingat roe ie mata

 

Keupeu jeut na Karong-Wali

Hana jibrie keu Amat Banta

Oh lon ingat nyan keuh untong

Jeup-jeup gampong jak meumita

 

Banta Amat rayek keudroe

Umue sampoe dua thonen ka

Ji meututo bak siuroe

Deungon Ma droe Putroe Muda

 

Wahe Ma Po Ma Teungku droe

Ta deungoe kamoe kheun bak gata

Teuma seuot Tuan Putroe

Sang geumanoe roe ie mata

 

Han peu aneuk cuba peugah

Lon deungoe sah aneuk bak gata

Wahe Poma beek susah le

Cuba pike wahe Poma

 

Pakon aneuk susah hate

Peu ta pike wahe Banta

Lon ngieng gata Ma Teungku droe

Geunap uroe jak meumita

 

Beungoh neujak seupoet neuwoe

Jeup-jeup nanggroe hana reuda

Bukon sayang hate rusak

Dawok neujak rok-rok masa

 

Nyan keuh hai Ma hate saket

Ka bicah phet lon ka raya

Jinoe neubrie lon meulangkah

Mita seudeukah rumoh lingka

 

Seuot Putroe nyang bangsawan

Beek hai Intan tajak gata

Bah keuh lon jak aneuk badan

Bah hai Intan taduek gata

 

Oh ka rayek aneuk badan

Cit han lon tham wahe Banta

Gata aneuk umue baro

Meung oh pinto goh lom lon ba

 

Bagian 9

 

Oh ji eue le ureung nanggroe

Ulon sidroe tan bicara

Seuot Banta nyang meutuah

Lon ube drah ji peuhaba

 

Beuthat jikheun meunoe meudeh

Beek ta pateh Ma digata

Pakrie aneuk han kupateh

Jikheun paleh lon he Banta

 

Jikheun gata ulon yue jak

Lon peutulak bijeeh mata

Beuthat jikheun beurang gapeu

Neu niet bue pajoeh boh bangka

 

Diloen Poma han lon pateh

Hate peudeh nibak nyang ka

Keupeu jeut Ma lon kueh-eh

Gata jayeh bak ureung lingka

 

Oh lon ingat han meusampe

Oh lon pike han meurasa

Digata Ma tajak sabe

Weuh that hate hana reuda

 

Jinoe Poma beek neujak le

Lon nyoe ube ta peulara

Ta duek gata Ma Teungku droe

Bah le kamoe jak meumita

 

Meunan jikheun Po Samlakoe

Ma jih Putroe roe ie mata

Wahe Mapo Ma Teungku droe

Pakon tamoe sabe rugha

 

Geutanyoe Ma peudeh untong

Jeup-jeup gampong jak meumita

Ma jih Putroe pih moe sajan

Han meuban-ban ureung gila

 

Ka teuingat keuhinaan

Jimoe sajan Amat Banta

Pihak gasien ngon miseukin

Aneuk yatim jak meumita

 

Amat jitroen laju u leun

Meunoe jikheun ubak Bunda

Wahe Mapo Ma meutuah

Na Potallah soe peulara

 

Seuot Putroe nyang meutuah

Pakrie lon bah bijeeh mata

Meuka tajak aneuk badan

Tapreeh sinan sikleb mata

 

Putroe jitroen bagah rijang

Jipeugah nyan bak aneuk droe

He aneuk Po aneuk Teungku

Jeh rot timue rumoh Apa

 

Jak keuh aneuk keunan laju

Mangat lon eue beek meutuka

Beek roh tajak rumoh laen

Meukon bak nyan kaom Apa

 

Peu nan Apa hai Ma meutuah

Cuba peugah lon deungoe nyata

Nama dilee Raja Sufi

Oh tan Duli ayah gata

 

Dilee kon nyan nan geurasi

Oh tan Duli geupeuraya

Banta Amat laju jijak

Ka meurumpok deungon Apa

 

Meubrie saleum mumat jaroe

Cit meubudhoe Amat Banta

Umue baro goh lom sampoe

Akai ragoe han sabe sa

 

Raja tanyong meunoe pantah

Panee roekah bijeeh mata

Pakrie Apa han neuturie

Raja Ansari du lon Raja

 

Meunyoe aneuk Raja Ansari

Keumuen kami bijeeh mata

Meunyoe meunan aneuk badan

Hai intan jak Putroe Muda

 

Banta jijak seun sigeutue

U leupu laju ji hala

Banta jijak leumah leumboet

Bak teuot jiseumah Poma

 

Bagian 10

 

Oh lheuh seumah Banta suroet

Deungon likoet na lhee deupa

Raja neuwoe le di likoet

Beek teumakoet Amat Banta

 

Raja neu ek laju lalu

Neuyue brie bu keu Po Banta

Amat teuduek ateuh tilam

Hai bulan ho tajak gata

 

Seuot Banta nyang meutuah

Jipeugah bak Teungku Apa

Lon hai Apa mita seudeukah

Peu na mudah nibak gata

 

Raja meuhoi le isteuri

Ka neuyue brie peu ek jiba

Neuyue brie breuh meusigantang

Mangat jiriwang le ji gisa

 

Amat cok breuh ka ji seuon

Leugat jitroen woe bak Bunda

Oh sare troeh u meuligoe

Meuhoi Ma droe Amat Banta

 

Wahe Mapo Ma Teungku droe

Lon ka troeh woe nibak Apa

Putroe jitroen pantah laju

Oh jideungoe su Po amat Banta

 

Wahe Mapo hai Ma badan

Beek ta tham-tham lon jak bak Apa

Singoh uroe lon meulangkah

Mita seudeukah wahe Poma

 

Seuot Putroe nyang meutuah

Aneuk lidah bijeeh mata

Meubeek tajak roeh ho laen

Puteh licen malee mata

 

Hana lon jak rumoh laen

Meukon bak en kaom Apa

Nyan keuh aneuk lon peuingat

He Cut Amat beek meutuka

 

Hana patot Ma lon ubah

Bak Potallah lon meudeesya

Oh sare ka beungoh uroe

Beudoh keudroe Pocut Banta

 

Meuka beudoh nibak ji eh

Laju keudeh nibak Apa

Geunap uroe keunan jijak

Ka meunyuem glak nibak Apa

 

Geunap uroe ji peureugi

Teuka beunci Poteuraja

Raja mariet ngon isteuri

Wahe Poti deungoe hamba

 

Si Amat Cut jinoe ta tham

Salah waham dalam dada

Lon hai Poti sang teujalok

Ka meunyuem syok keu si Banta

 

Peu teujalok Tuanku Ampon

Peugah bak lon Pomeukuta

Raja peugah meunoe lagee

Lon jitipee le si Banta

 

Kareuna hareuta jih hana le

Ma jih hari jak meumita

Nyan keuh seubab wahe Putroe

Lon jikiloe uleh Banta

 

Teuma seuot Tuan Putroe

Sira jimoe ngon ie mata

Hana patoet Tuanku droe

Aneuk jaroe culok mata

 

Jih ubiet that umue baro

Peu jikilo ureung tuha

Beek antara jimat beude

Meung dapu han ek ji lingka

 

Beek antara jimat peudeung

Meung ureung jiturie hana

Beek antara jimat tumbak

Meung jijak goh lom sideupa

 

Beek antara jimat beusoe

Meung sidroe jiturie hana

Beek takheun nyan wahe Nyak Ti

Nibak beunci siribee daya

 

Bagian 11

 

Adak han ek jimat beusoe

Deungon jaroe lon ji timpa

Adak han ek jimat peudeung

Ji tulak kengkeung lon binasa

 

Seuot Putroe nyang juhari

Peu ji taki jih baroe sa

Teuduek haba Tuan Putroe

Beungoh uroe troeh Po Banta

 

Ban sare troeh u meuligoe

Marit Putroe deungon Banta

Putroe marit deungon Amat

Suara mangat sang su biola

 

Jeh rot timue aneuk tajak

Na meurie bak kaom gata

Nyan keuh Putroe nyang meutuah

Han ji peugah narit Raja

 

Amat Banta ji jak laju

Jeh rot timue rumoh Apa

Hana dakwa jaweub bantah

Peu ji peugah jih baroe sa

 

Oh sare troeh keudeh ji jak

Ka meurumpok deungon Duya

Meubrie saleum mumat jaroe

Cit meubudho Amat Banta

 

Hamamah tanyong ubak Amat

Suara mangat hanatara

Ho ta meungjak aneuk Teungku

Peugah laju bijeeh mata

 

Amat seuot laju pantah

Mita seudeukah nibak Duya

Tabrie ngon breuh na sigantang

Na ji riwang ubak Bunda

 

Amat ji ek le u leupu

Ka neubrie bu le Putroe Muda

Oh lheuh makeun reutek jaroe

Marit jinoe Amat Banta

 

Han peu laen cit jipeugah

Cit seudeukah ji jak mita

Amat cok breuh ka jiseu-on

Laju jitron woe bak Bunda

 

Oh sare troeh u meuligoe

Jihoi Ma droe pantah sigra

Wahe Mapo Ma meutuah

Nyoe seudeukah nibak Duya

 

Putroe ji troen pantah laju

Oh ji deungoe su Amat Banta

Wahe aneuk Po Samlakoe

Ka troeh ta woe bijeeh mata

 

Seuot Banta nyang seureuloe

Ka troeh lon woe wahe Bunda

Banta ji ek u meuligoe

Duek teupipoe wet ngon sila

 

Geunap uroe keunan ji jak

Hamamah kheun bak Banta Muda

Wahe aneuk nyang budiman

Bak rumoh nyan ta jak gata

 

Amat tanyong pantah leugat

Soe po teumpat wahe Duya

Hamamah peugah ubak Amat

Suara mangat hanatara

 

Nyan keuh rumoh Sinyak Lawi

Kaom Wali Ayah gata

Phon sinoe kon troeh u tunong

Han peu tanyong wahe Banta

 

Amat ji troen laju ji jak

Ka meurumpok deungon Makwa

Wahe Makwa nyang meutuah

Peu na mudah brie keu hamba

 

Siti Lawi seuot pantah

Peu ta peugah wahe Banta

Lon he Makwa mita seudeukah

Peu na mudah brie keu hamba

 

Siti Lawi brie makanan

Lheuh nibak nyan jiwoe lanja

Neuyue brie breuh na sigantang

Na jiriwang woe bak Bunda

 

Bagian 12

 

Banta ji troen rijang-rijang

Ji riwang u rumoh tangga

Oh troeh Banta u meuligoe

Jihoi Ma droe sigra-sigra

 

Wahe Mapo he Ma badan

Ta cok rijang breuh bak Makwa

Putroe ji troen pantah laju

Oh ji deungoe su Amat Banta

 

Putroe cok breuh ka jitarek

Banta ji ek likot Poma

Meunan-meunan geunap uroe

Han peu adoe lon calitra

 

Beungoh jijak seupot jiwoe

Banta laloe jak mumita

Jak rumoh nyoe jak rumoh jeh

Hingga habeh Amat Banta

 

Phon meurannoe troeh meurandeh

Bandum habeh jeup-jeup syeedara

Habeh bandum ka jiturie

Laen lagi lon peuhaba

 

Eumpung puyoh dalam pade

Puyoh mate dalam cintra

Oh lon ingat susah hate

Oh lon pike hana laba

 

Teuduek haba oh noe siat

Lon riwayat Amat Banta

Amat Banta aneuk yatim

That miseukin ateuh donya

 

Lagi ‘ayeb ngon hinaan

Ngon teumpat tan ayah hana

Jipoet angen barat laot

Ji beudoh riboet di ujong raja

 

Nyoe lon kalam ulon sangkot

Jinoe lon boet Amat Banta

Udep lam susah beungoh seupoet

Hana patot bak ta kira

 

Gunong buket labang nanggroe

Buleun uroe tanglong donya

Lon kisah Cut Amat sidroe

Deungon Ma droe neumeuhaba

 

Amma ba’du teukeudirullah

Deungoe lon peugah Amat Banta

Bak siuroe grak bak Allah

Amat peugah ubak Poma

 

Wahe Mapo Ma Teungku droe

Ta deungoe kamoe sikrak haba

Peu na pusaka Ma bak Ayah

Cuba peugah lon deungoe nyata

 

Seuot Putroe nyang juhari

Banta sudi bijeeh mata

Hareuta le yoeh na Duli

Habeh Wali tueng pusaka

 

Peu ta peugah Ma boh hate

Nyang ka tan le peu ta kira

Laen peu na di yueb keupoek

Parang broek-broek cuba mita

 

Amat peugah Putroe beudoh

Ji ek kreeh-kroh le u para

Keudeh keunoe Putroe jeungeuk

Ngon teubiet meuk dalam mata

 

Jeungeuk keunoe jingieng keudeh

Parang teu eh ateuh para

Putroe cok le ka ji peutroen

Hai aneuk lon nyoe pusaka

 

Nyan keuh aneuk pusaka bak Du

Parang dapu he bentara

Laen aneuk han sapeu na le

Hai boh hate bijeeh mata

 

Oh jikalon uleh Amat

Hate mangat hanatara

Siploh uroe ji meuasah

Baro leumah bibi mata

 

Oh sare lheuh ji meuasah

Lom jipeugah ubak Bunda

Wahe Mapo e Ma badan

Ta deungoe laman kheun bak gata

 

Bagian 13

 

Geutanyoe Ma han sapeu na le

Keudeh u gle jak lam rimba

Adak taduek dalam nanggroe

Geunap uroe beunci teuka

 

Got keuh ta jak jinoe u gle

Bah le mate rimueng seuba

Bah le ta jak keudeh u gle

Na pueh hate Teungku Apa

 

Meunyoe mantong lon di mideun

Na peu geukheun dum syeedara

Meuka tan le peu lom geukheun

Bah lam uteun rimba raya

 

Adak lon jak bak Apa droe

Geunap uroe lam geuceula

Nibak hudep bah le mate

Na meusampe geutueng hareuta

 

Adak hudep han sakon le

Keuji sabe akhe masa

Jinoe lon jak dalam uteun

Tinggai mideun bah keu Duya

 

Geutanyoe Ma ta jak u gle

Taboeh pade ta cah rimba

Taduek sinoe hana hase

Saket hate rok-rok masa

 

Oh ka tan le lon di sinoe

Peu jikheun nyoe dum syeedara

Meunyoe mantong lon di nanggroe

Geunap uroe beunci teuka

 

Seuot Putroe nyang bangsawan

Hai intan ban hajat gata

Wahe aneuk pakrie lon bah

Kheundak Allah ka troeh masa

 

Peu ta kheun nyan cit lon pateh

That lon gaseh bijeeh mata

Adak nyang han lon peuturoet

Peu lon ikoet tan hareuta

 

Hareuta han aneuk pih tan

Payah badan mantong sahja

Tuan Putroe ka teupike

Lalu ile ngon ie mata

 

Ie mata ro seun-seun siploh

Ban ujeun toh meuleulumba

Amat tanyong hana teudoh

Wahe Ma beh pakon rugha

 

Pakon tamoe e Ma badan

Peu susahan wahe Poma

Beek ta weuh le Ma keu lumpu

Meutan breuh bu han meusampe

 

Oh tan pade dalam keupoek

Jeup sagoe lhok jak meumita

Amat jimoe meusok-meusok

Bungong tajok ro ie mata

 

Bak siseun nyoe saleh ho troek

Hate lon broek wahe Poma

Geutanyoe Ma susah hate

Beek taduek le jak ta bungka

 

Adak tajak dalam uteun

Han soe tanyong tan syeedara

Cuba keuh na meuh ngon pirak

Adak ta jak pih ji mita

 

Apa geukheun lon geumeungpoh

Geumeuteuoh deungon Duya

Dilon hai Ma hana hajat

Han lon minat keu hareuta

 

Adak lon poh Apa sidroe

Toh geulantoe laen Raja

Hana patot nyang buet meunan

Nyoe digobnyan tan bicara

 

Nyan keuh ureung miseu beunteung

Tan geusayang keu syeedara

Oh ka geucok han geupulang

Bah kumeucang oh watee raya

 

Nyan keuh narit bak lon kaseb

Ka bicah phet lon ka raya

Hareuta Du kee habeh jicok

Han teujalok akan sahaya

 

Bagian 14

 

Peu kupajoeh jinoe dikee

Pa kuteumee kujak mita

Adak ureung nyang na pike

Bah keuh lon brie keu si Banta

 

Hareuta le hana lon minat

Asai mangat lon ngon Apa

Hana hajat lon keurajeun

Bah lam uteun jak lam rimba

 

Beudoh hai Ma jinoe tajak

Hana galak dum keu donya

Bah beuhabeh bandum geutueng

Beek le geukheun singoh lusa

 

Putroe deungoe narit Amat

Hate mangat dalam dada

Ka teupike nyan keuh untong

Meugeugulong ngon ie mata

 

Putoe jimoe bukon sayang

Neupandang bak Amat Banta

Oh teuingat dalam hate

Lalu ile ngon ie mata

 

Ie mata ro hana peu kheun

Ban ujeun buleun keunong sa

Pakon tamoe hai Ma Teungku

Peugah laju lon deungoe nyata

 

Beek ta tanyong aneuk Teungku

Beek lon eu-eu bijeeh mata

Digob laen digata sajan

Lon soailan wahe Banta

 

Digob laen dalam nanggroe

Lon duek keudroe dalam rimba

Bukon sayang Cut Amat sidroe

Seupot lam nanggroe peungeuh rimba

 

Cempala cut jipoe meulinggang

Cicem subang jipoe meugisa

Lon ngon Banta ka meulang-lang

Teungoh ladang uteun raya

 

Meunan jikheun Tuan Putroe

Sira jimoe ngon ie mata

Bukon sayang lon eu madat

Lila nubat dum meubanja

 

Bukon sayang bungong uroe

Putoeh taloe angen bawa

Tuan Putroe neu jeumeurang

Sayang bintang jak lam rimba

 

Bukon sayang bungong mancang

Pucok ija plang meutangga-tangga

Oh lon ingat bukon sayang

E buleun trang leupah bungka

 

Bukon sayang lon eu bambang

Ji jeumeurang laot raya

Si Manyak Cut teungoh alang

Pihak tan wang han soe kira

 

Sira jimoe ji meurawe

Seureuta ile ngon ie mata

Sira jijak jimoe sabe

Oh troeh u gle baro reuda

 

Meurumpok sinan sibak kayee

Ju meuteuntee sang keupala

Teumpat lutoeng deungon himbee

Bue ngon cagee keunan teuka

 

Putroe jiduek diyueb kayee

Top ngon ulee ro ie mata

Ka teuingat nyoe keuh untong

Top keulubong Putroe Muda

 

Digob untong boh timon phang

Dalam hidang rok-rok masa

Dilon untong boh timon bruek

Ban taduek-duek teuka bala

 

Digob untong miseu reubong

Na soe tulong le syeedara

Allah Allah hai Potallah

Pakrie bah lon ka troeh masa

 

Tuan Putroe ka jiba e

Ie mata ro hana reuda

Amat marit jikheun meunoe

Beek le tamoe wahe Poma

 

Bagian 15

 

Adak tamoe han soe kalon

Hana sakon dalam rimba

Beudoh hai Ma beek taduek le

Ta mita gle pat na data

 

Putroe beudoh jijak leugat

Timue barat han meuhoe ka

Ji teungoh cot jitroen paloh

Ta eu jibloeh lam beuluka

 

Ji teungoh cot ji ek gunong

Han peu tanyong he syeedara

Jaroe gaki duroe pajoeh

Ban ujeun toeh ro ie mata

 

Bukon sayang puteh leusoh

Ta eu jibloeh dalam rimba

Tunong baroh han meuhoe le

Jijak sabe hana reuda

 

Badeuk gajah dum jiboh droe

Ban sinaroe dalam rimba

Bukon sayang bungong uroe

Jiboh nanggroe jak lam rimba

 

Jijak laju hana piyoeh

Teubiet reuoh lam-lam mata

Jeumeurang krueng ji arong gle

Ji jak sabe hana reuda

 

Uroe malam jijak sabe

Lam lungkiek gle rimba raya

Jijak laju hana teudoeh

Hingga troeh bak saboh data

 

Ka jikalon sibak kayee

That meuteuntee jroh lagoina

Banta Amat ka jilihat

Ta preeh siat wahe Poma

 

Oh jikalon keudeh keunoe

Jikheun meunoe nibak Poma

Sinoe hai Ma ta ceumeucah

Beek le payah tajak mita

 

Krueng pih rab uteun luah

Han that payah ie ta mita

Seuot Putroe nyang bangsawan

Hai intan ban hajat gata

 

Dilon hai Ma han kutuoh

Banta meehmoh silagoina

Peu nyang takheun ulon pubuet

Meunan hai Cut Amat Banta

 

Seuot Amat bungong meurak

Beek le tajak wahe Poma

Di sinoe Ma that meuteuntee

Lagi kayee hana raya

 

Bah le taduek ta ceumeucah

Beek that payah tajak mita

Taduek sinoe cit that cakap

Dumpeu pih rab wahe bunda

 

Putroe ngon Banta sinan teutap

Uroe pih rab leuho sinja

Oh lheuh malam teuka suboh

Amat beudoh jak cah rimba

 

Habeh jicah dum kayee gle

Ka peungeuh le siblah rimba

Habeh jicah dum kayee tho

Peugot jambo deungon Poma

 

Oh sare lheuh bandum habeh

Teumpat duek eh deungon Poma

Geunap uroe jicah sunggoh

Teubiet reuoh Banta Muda

 

Umue peut buleun jicah sabe

Ka peungeuh gle rimba raya

Oh lheuh jicah teuma jitoet

Asap seupoet dalam rimba

 

Oh ka peungeuh dum seuleusoe

Jikheun meunoe ubak Poma

Wahe Mapo Ma Teungku droe

Jak le tawoe ubak Duya

 

Tajak bloe Ma pade bijeeh

Sinoe lon preeh wahe Poma

Oh neudeungoe narit Amat

Geujak leugat Putroe Muda

 

Bagian 16

 

Hana dakwa jaweub neubrie

Ji peureugi pantah sigra

Oh sare troeh u meuligoe

Ji peutoe bak Duya Banta

 

Hamamah kalon Tuan Putroe

Pane tawoe he Ma si Banta

Kugieng gata reuoh-reuah

Peu na susah tajak mita

 

Putroe seuot cit meutaleh

Pade bijeeh lon jak mita

Neubrie bloe meusinaleh

Lon mee keudeh dalam rimba

 

Sinyak yue mee singoh beutroek

Jimeung tajoeh lusa raya

Hamamah deungoe narit meunan

Jibrie yoh nyan pade keu Banta

 

Putroe cok le ka ji seu-on

Leugat jitroen puwoe keu Banta

Oh sare troeh dalam uteun

Meunoe jikheun Putroe Muda

 

Ka jimeuhoi Banta Amat

Suara mangat hana tara

Wahe aneuk nyang boh hate

Nyoe pat pade nibak Dunya

 

Oh ji deungoe geubrie pade

Mangat hate Amat Banta

Ji cok pade ka jitajoek

Peut uroe roek hana reuda

 

Oh sare lheuh tajoek pade

Mangat hate Banta Muda

Teutap jiduek dalam jambo

Sujud Syuko keu Rabbana

 

Oh watee ji seumbahyang

Pujoe Tuhan Rabbul ‘Akla

Hana ingat keu peu laen

Lahe bathen Tuhan Esa

 

Hana laen nyang jipujoe

Tuhan sidroe nyang kuasa

Sinan teutap malam uroe

Deungon Ma droe Putroe Ridla

 

Teukeudirullah peurintah Tuhan

Bak simalam teuka ie raya

Teuka watee teungoh malam

Nekmat datang ateuh Banta

 

Teuka reudok deungon ujeun

Teuka ie krueng ban semua

Ile u darat lam bak pade

Habeh reule ban sineuna

 

Hanyot ngon broeh dum reun-mareun

Habeh jicreun pade Banta

Kayee hanyot dum ubebe

Meugeunton pade Banta Muda

 

Ie raya ek teungoh malam

Banta pansan teungeut indra

Oh sare ka beungoh uroe

Beudoh Putroe basoh muka

 

Oh jikalon nibak pade

Ka jihoi le Amat Banta

Wahe aneuk Po Samlakoe

Deungoe kamoe bijeeh mata

 

Ta troen keunoe aneuk Teungku

Ta eue laju ie that raya

Lon ngieng pade habeh reubah

Saleh gajah saleh ie raya

 

Oh jideungoe reubah pade

Ka jitroen le Amat Banta

Oh ban ji eue reubah pade

Laju ile ngon ie mata

 

Wahe Poma Ma meutuah

Kon buet gajah buet ie raya

Pakrie hai Ma nyan lon peuglah

Habeh reubah pade dara

 

Seuot Putroe nyang meutuah

Pakrie lon bah wahe Banta

Peuglah aneuk seun sigeutue

Bak tampu ta tiek u lua

 

Bagian 17

 

Phon beungoh kon peuglah pade

Amat sare dawok rugha

Sira peugleh sira jimoe

Sang geumanoe ngon ie mata

 

Troeh an seupot peuglah pade

Meuteumeung le aneuk naga

Aneuk naga ube pureh

Sinan teu-eh lam ie raya

 

Po Amat cok laju jimat

Hate mangat hana nyang sa

Putroe kalon ji tanyong peu

Aneuk uleu wahe Poma

 

Ta boih rijang hai boh hate

Beek ta mat le aneuk naga

Ta boih keudeh aneuk badan

Beek sampe intan jicoh gata

 

Banta susah hana sakrie

Ji peureugi ubak naga

Po Amat Cut jimat sabe

Ma jih sare dawok rugha

 

Seuot Banta jikheun meunoe

Uleu nyoe ulon peulara

Uleu jiboh dalam eumpang

Jiwoe rijang rumoh tangga

 

Oh sare troeh nyan u teumpat

Jicok leugat kanot raya

Ka jipasoe dalam dandang

Meuseuragang jih ka raya

 

Jicok sinan mee ho laen

Salen malen jih ka raya

Ka jipasoe dalam beulidi

Makeun jibrie beungoh sinja

 

Tujoeh uroe dalam beulidi

Rayek lagi aneuk naga

Jicok sinan mee lam abeuk

Ka ji peuduek dalam paya

 

Tujoeh uroe teutap sinan

Bak paya nyan pih ka raya

Po Amat Cut mee ho laen

Sangat jisyen aneuk naga

 

Ji boeh taloe nibak reukueng

Keudeh u krueng jihue lanja

Aneuk naga sinan teutap

Ampon Daulat beungoh sinja

 

Oh troeh Banta ka jilangkah

Naga jihah ateuh Banta

Banta suleung le makanan

Lheuh nibak nyan jiwoe lanja

 

Padum lawet meunan sabe

Kuneng pade pih ka rata

Ka jitroen saboh cicem gle

Ji pajoeh pade han ban publa

 

Nama cicem Indra Bayeun

Rupa sang ureung manusia

Jinoe cicem meunan geukheun

Dilee ureung saboh masa

 

Dilee masa Sulaiman keurajeun

Le that ureung nyang binasa

Nyan keuh aneuk ureung gasien

That miseukin ibu bapa

 

Ku jicarot bak si uroe

Seurapa droe aneuk dara

Ji meulakee ubak Tuhan

Seureutakan ngon ie mata

 

Ya Illahi wa ya Rabbi

Po lon neubrie ban lon pinta

Beujeut keuh lon Indra Bayeun

Meunan jikheun yoh meupinta

 

Meunan sabe ji meulakee

Timoh bulee phon bak dada

Habeh timoh dum sileungkap

Jipoe leugat dalam rimba

 

Oh sare troeh dalam uteun

Ji makeun boh pade Banta

Habeh ji pajoeh dum boh pade

Putoeh tangke bak peunula

 

Bagian 18

 

Banta Amat saket hate

Jingieng pade cicem seuba

Banta susah hana sakrie

Ji peureugi ubak naga

 

Wahe ulon nyang budiman

Ta deungoe lon kheun ubak gata

Naga deungoe Amat peugah

Jingieng pantah le u lua

 

Naga seuot han peu salah

Cuba peugah lon deungoe nyata

Dilon adek saket hate

Habeh pade cicem seuba

 

Habeh ji pajoeh le cicem gle

Pakrie pike nibak gata

Meunyoe meunan dalem boh hate

Aneuk kayee gle ta jak mita

 

Banta peugot naga peugah

Cintra indah hanatara

Oh sare lheuh ka jipeugot

Cintra ji joek jiwoe lanja

 

Banta meusom likoet buloeh

Jipreeh-preeh roeh cicem rimba

Banta Amat saket hate

Ka ji jak le ubak naga

 

Oh sare troeh ka ji peugah

Khem meuhah-hah cicem rimba

Ban ji deungoe khem cicem gle

Saket hate aneuk naga

 

Naga peugah ubak Amat

Suara mangat hanatara

Wahe Aduen Dalem Payong

Ta jak puntong kayee raya     

 

Banta peugot saboh peulintek

Watee ji ek cit meusingkla

Amat Banta ji beudoh le

Aneuk kayee gle ka jimita

 

Oh lheuh ji koh dum ka hase

Ja jimee le ubak naga

Amat peugot naga peugah

Hingga sudah dum peukara

 

Oh sare lheuh dum peulintek

Ji peu-ek euncong bak kayee

Ladom jitheun nibak ateung

Jeut ek roeh Bayeun cicem rimba

 

Po Amat Cut saket hate

Jingieng pade reubah rata

Nibak ji loeb keunan cicem

Maken ji khem hana reuda

 

Meunyoe ku teumeung cicem asee

Ku lueh bulee kuplah keudua

Sira jiplueng sira jikheun

Keudeh u krueng nibak naga

 

Amat tanyong le keu pade

Pakrie pike laen bicara

Han jitem loeb lam peulintek

Ta balek laen bicara

 

Meuhan jiloeb keunan ji-ek

Cicem sulet silagoina

Naga seuot jikheun meunoe

Ji peurunoe Amat Banta

 

Na tadeungoe bicara balek

Lom ji sidek pantah sigra

Naga seuot nyang meuteuntee

Takoh kayee dum nyang lingka

 

Kayee nyang toe bineeh pade

Koh beusare dum cut raya

Oh ka habeh kayee teuglong

Han pat jidong oh jiteuka

 

Ta kueh uruek teuma saboh

Oh seudang jroh ta dong gata

Samat teungoh cit beuteudong

Sinan jidong oh jiteuka

 

Ta boh jaroe nibak ulee

Nabeek jithee meugrak keupala

Oh jiteuka sinan jidong

Ta mat beukong Po Meukuta

 

Bagian 19

 

Amat deungoe nariet meunan

Jiwoe yoh nyan pantah sigra

Jicok parang ngon beuliyong

Ka jipuntong kayee rata

 

Habeh jikoh dum kayee gle

Nyang toe pade Amat Banta

Amat tamong dalam pade

Ka jikueh le uruek raya

 

Amat jidong teuma sidroe

Jiboeh jaroe di keupala

Na sikeujab Banta sinan

Troeh le keunan cicem Indra

 

Jingieng keudeh jingieng keunoe

Hana tungoe miseu nyang ka

Cicem jingieng keudeh keunoe

Nyang na tungoe sikrak saja

 

Banta Amat jikira tungoe

Meuseugamoe teungoh sinja

Ja jipeutoe sinan jidong

Amat rungkhom pantah sigra

 

Jinoe kusie binatang asee

Habeh pade kee dum ka seuba

Seuot cicem jikheun meunoe

Beek sie kamoe wahe Banta

 

Ho cit kuba binatang asee

Jeh pade kee habeh dum na

Jikheun meunoe lom le cicem

Lon brie laen pade keu gata

 

Amat jaweub sira khem-khem

Meukah cicem pat ka mita

Beek ta gundah ulon cicem

Lon brie laen meuh keu gata

 

Pat bu katueng meuh meukatoe

Panee nanggroe ka jak mita

Cuba peulheuh lon lam jaroe

Lon keupruek droe na keulua

 

Po Amat cok jiboeh taloe

Jitiek-tiek droe ateuh tika

Cicem Indra ka jinari

Sue sang bangsi buloh bungga

 

Sigoe jikeupruek sigoe jikeupuek

Meuh meuhamboe ateuh tika

Banta Amat ka keuh tahe

Ji kalon ro maneek meutia

 

Teuma cicem jiploh taloe

Ji pasoe peuloeb lam cintra

Amat Banta hate galak

Oh na meurak cicem rimba

 

Padum lawet teuma dudoe

Banta ngon Putroe hate suka

Jicok sadeup jikoh pade

Ji teubiet le deungon Bunda

 

Beungoh jijak seupoet jiwoe

Geunap uroe meunan juga

Aneuk ngon nang di blang laloe

Cicem sidroe dalam cintra

 

Leupah Amat deungon Ma droe

Cicem peutoe bak guci raya

Dalam sarong keulua droe

Ka jimanoe pantah sigra

 

Ka jimanoe ngon ie lam guci

Badan suci hana leuta

Oh lheuh suci nab ngon likoet

Dudoe jiloeb dalam cintra

 

Dalam cintra ji peuloeb droe

Rupa meuwoe miseu nyang ka

Oh sare troeh seupoet uroe

Troeh le woe Amat Banta

 

Banta jiduek ateuh tilam

Jilop hidang le jibuka

Jingieng asoe tan lam hidang

Banta heran ngon ie muka

 

Banta Amat jihoi Ma droe

Neujak keunoe wahe Bunda

Putroe peurab le bak dapu

Jak taguen bu keu Po Banta

 

Bagian 20

 

Putroe masak bu eungkot reundang

Boeh lam hidang keu Po Banta

Oh lheuh makeun Banta Amat

Hate mangat hanatara

 

Amat ji-eh keutidoran

Teungeut pansan malam jula

Oh lheuh wudhuk tueng ie seumayang

Laju u blang deungon Bunda

 

Cicem Indra mangat hate

Oh ka tan le ureung dua

Ka ji teubiet dalam sarong

Ji keurucong peu nyang hawa

 

Ie lam guci habeh jicrong

Asoe dalong ka seureupha

Geunap uroe meunan sabe

Ka teupike Amat Banta

 

Oh troeh u blang meunoe jikheun

Bah kucie jak luem wahe Bunda

Amat jiwoe seun sigeutue

Ji ek laju u rumoh tangga

 

Banta jiduek likoet bubong

Dalam sarong cicem keulua

Oh jiteubiet dalam sarong

Ta eu jicrong lam guci raya

 

Oh sare lheuh ji seumajoeh

Putroe piyoh ateuh keuta

Rupa indah hana sakri

Sang-sang Diyu bungsu Indra

 

Leubeeh nibak Putroe Aloih

Nyang geutroh di Tanoh Nata

Cahya badan hu seumeulhoeh

Keudeh jeuoh leumah cahya

 

Miseu geukheun Putroe Faridoeh

Nyang geutroh-troh dum geuteumpa

Putroe Faridan nyang geutroh-troh

Putroe Faridoeh ureung geuba-ba

 

Banta Amat yoe han teudoeh

Ji eu leusoeh Putroe Muda

Dalam hate jih meureubeut

Jimeung pubuet sang malee mata

 

Bit pih meunan hate tutong

Tamse seudong ji ek bisa

Banta jiduek likoet bubong

Ka ji tinggong seunang raya

 

Ji keumeung drob Tuan Putroe

Teuingat keudroe beek binasa

Bah le kucok jinoe sarong

Beek jeut jikong dalam cintra

 

Banta Amat meunyum troh nyum

Sang meuteumeung buleun ruja

Meukheuk teukhem krub jiteugom

Putroe rungkhom laju jiwa

 

Tuanku beek neucok sarong

Neungieng keu lon siblah mata

Beek jan geuwoe Bunda di blang

Neubrie rijang Po Meukuta

 

Banta Amat iem beurdiri

Cit meupo Ti peugah haba

Beek antara na ji seuot

Meureunggot han bulee mata

 

Putroe Indra apoh-apah

Allah Allah ka troeh masa

Neubrie pulang hai Tuanku

Keu lon neu eue siblah mata

 

Putroe Indra riyoh jimoe

Lon uroe nyoe malee raya

Banta Amat pih that hireun

Tan leupah kheun sikrak haba

 

Meunyum malee sang di hate

Ka teupike Amat Banta

Ban dua hoe sabe malee

Toep ngon ulee han le haba

 

Geumeuduek-duek saboh sapat

Na siat woe Putroe Ridla

Putroe meuhoi Banta Amat

Suara mangat hanatara

 

Bagian 21

 

Wahe aneuk puteh licen

Hoe ka cicem dalam cintra

Banta Amat jikheun meunoe

Neu ek keunoe wahe Bunda

 

Putroe ek le rijang pantah

Hingga leupah keudeh lanja

Putroe Ridla ka teuseupoek

Bungong tajok neu eue rupa

 

Putroe Indra beudoh laju

Ji tajoe le seumah Bunda

Putroe Ridla le meututo

Ngon bungong keundo Siti Indra

 

Hai Putroe Cut lon teumanyong

Hai Cut Bungong bijeeh mata

Beek weuh hate Putroe Bungong

Lon teumanyong beek sia-sia

 

Putroe seuot insya Allah

Han peu salah wahe Poma

Peugah aneuk nyan bak bungong

Lon teumanyong bijeeh mata

 

Putroe Ridla yoh nyan tanyong

Bak Cut Bungong putroe muda

Pat teuh gampong seure nanggroe

Digata soe ayah bunda

 

Seure nanggroe ta keurajeun

Ta cuba kheun lon deungoe nyata

Soe nan gata yoh di nanggroe

Peugah Putroe pantah sigra

 

Meunoe jikheun sira jimoe

Dum geumanoe ro ie mata

Tuanku beek neu meuwayang

Neubrie pulang sarong hamba

 

Putroe Indra jimoe sabe

Ka teupike Amat Banta

Ka teusuwe dalam hate

Ka teupike dalam dada

 

Bah le ku sadong saman jinoe

Beek le tamoe Putroe Muda

He Putroe Cut ta deungoe kamoe

Seb ka jinoe Po Jroh Rupa

 

Nyoe ku peugah Tuan Putroe

Ta duek sinoe sajan hamba

Putroe seuot jikheun meunoe

Po Samlakoe beek meuseunda

 

Peu ta lakee Tuan Putroe

Ta khem keu kamoe han ta kira

Ku sangka kon buet teuh meunoe

Ta peungeut kamoe uleh gata

 

Masa ta duek di cong kayee

Gata sidroe laen bicara

Han kupulang jinoe sarong

Ta duek ngon lon he Adeknda

 

Beek le tamoe Bintang Canden

Sangat lon syen Nyak keu gata

Ta duek sinoe Puteh Licen

Lon meukawen Nyak ngon gata

 

Putroe Indra sangat malee

Jitoeb ulee leumah muka

Seubab Banta meunan tuto

Jeut jiba-e Putroe Muda

 

Seubab jikheun jimeukawen

Puteh Licen sang malee mata

Putroe Indra malee sipu

Han jeut ji eue muka Raja

 

Sarong han le jijeut lakee

Meunyum malee sang di mata

Oh ji deungoe narit Putroe

Jimoe yoh nyan Putroe Muda

 

Wahe Bunda beek neusudi

Gampong Abi han pareksa

Han lon tupat daerah nanggroe

Han lon tusoe nan ayahnda

 

Beek neusidek ngon neusasat

Lon ubit that yoh meupinta

Lon hai Bunda lumpoe ingat

Cit ubit that tan ayahnda

 

Bagian 22

 

Padum lawet dalam uteun

Padum buleun lama masa

Nyan keuh Bunda han lon jeut kheun

Bayang-bayang leumah nyata

 

Sang na teuingat dalam hate

Bak lon pike wahe Bunda

Ayah dilon ureung gasien

That miseukin hanatara

 

Hana nanggroe tan keurajeun

Lagi geukheun ureung papa

Nama ulon tan geurasi

Yoh di nanggri bak ayahnda

 

Miseu lon duek di teungoh leun

Meunoe lon kheun wahe Poma

Lon meulakee nibak Tuhan

Seureutakan ngon ie mata

 

Beujeut lon keu Indra Bayeun

Meunan lon kheun wahe Bunda

Oh sare lheuh lon meulakee

Timoh bulee phon bak dada

 

Teuma lon po u dalam gle

Seureuta ile ngon ie mata

Ka lon peutoe ubak pade

Putoh tangke bak peunula

 

Lheuh nibak nyan teuma dudoe

Bak siuroe jeut binasa

Jeut ka roeh lon dalam taloe

Pi-e budhoe Po Meukuta

 

Banta Amat di sinan toe

Duek bak sagoe likoet Bunda

Banta jikhem leumah gigoe

Ji deungoe Putroe peugah haba

 

Meunyum malee di sinan toe

Jitroen dudoe bak seulasa

Putroe Ridla marit dudoe

Deungon Putroe Siti Indra

 

Wahe aneuk Po Sambinoe

Ta niet kamoe ureung tuha

Beek le tajak nyan hoe laen

Lon peukawen ngon si Banta

 

Putroe Indra han le tuto

Cit meutahe matong saja

Putroe Indra duek teupakong

Seubab sarong ka bak Banta

 

Hana sapeu le meututo

Meung ta eue ro ngon ie mata

Putroe Indra sinan teutap

Troen teudhab-dhab Putroe Ridla

 

Oh sare troeh ubak Amat

Suara mangat hanatara

Wahe aneuk Po Samlakoe

Ta deungoe kamoe bijeeh mata

 

Gata aneuk lon peukawen

Puteh Licen gata ka raya

Banta Amat iem beurdiri

Turon lagi ubak naga

 

Hana sapeu jaweub jibrie

Oh lheuh Po Ti peugah haba

Putroe Ridla ula-ilie

Hana sakrie meehmoh raya

 

Jicok tika adee pade

Ji peuhase dum peukara

Pade leukat pade jatoe

Mee lam uroe dum seumua

 

Teuma neutroen Tuan Putroe

U nanggroe laju ji hala

Ji jak kalon Teungku Mudem

Soe-soe nyang tem sidroe dua

 

Oh sare troeh ubak Mudem

Sira khem-khem peugah haba

Ulon Teungku raya hajat

Neujak siat dalam rimba

 

Neumee alat dumpeu beek han

Ngon peukhatam Amat Banta

Neuba rakan na nam tujoh droe

Singoh uroe beutroeh neuteuka

 

Bagian 23

 

Beek han neujak Teungku meutuah

Neu seuleuah keu Pocut Banta

Mudem seuot alhamdulillah

Insya Allah ulon teuka

 

Putroe jiwoe troeh u teumpat

Cit teudhab-dhab rok-rok masa

Oh sare troeh le u rumoh

Ta eue meehmoh jak leung tika

 

Lheuh nibak nyan teuma seupoet

Troeh le laju malam jula

Hingga suboh beungoh uroe

Beudoh Putroe jak leung tika

 

Lheuh nibak nyan teuma siat

Troeh le leugat Mudem teuka

Jiboet ranub dalam bate

Ka jijoek le Putroe Muda

 

Putroe marit sira khem-khem

Deungon Mudem baro teuka

Meunoe jikheun Putroe Canden

Sira khem-khem peugah haba

 

Nyoe na ranub na saboh criek

Pineung putiek saboh dua

Ranub uteun pineung boh awe

Ngon thoe tangke kureung rasa

 

Ha Teungku beek saket hate

Seubab lam gle rimba raya

Hana panyang ulon rawe

Han meusampe tan hareuta

 

Nyoe keuh nyang na ranub uteun

Neu meung bulueng dum syeedara

Teungku Mudem teuma seuot

Leumoh leumbot ngon suara

 

Insya Allah he Sambinoe

Bak kamoe ateuh jeumala

Bak gata na ranub uteun

Bak lon buleun han sapeu na

 

Teungku Mudem meunan neukheun

Putroe hireun seungab lanja

Lheuh nibak nyan teuma akhe

Ka geuboet le hidang raya

 

Hidang hase dum sinaroe

Ji dong Putroe bak seulasa

Peusinget gupet peubasah jaroe

Neu makeun beutroe bu ngon sira

 

Teuma marit Tuan Putroe

Jiboet jaroe ateuh jeumala

Sira buta camplie bungkok

Tujoh on oek dalam sira

 

Eungkot di laot lon deungoe gah

Seulunyok patah lam piala

Mudem seuot alhamdulillah

Insya Allah Putroe Muda

 

Neupajoh bu subuju jaroe

Nekmat ka troe ta cie rasa

Teungku Mudem jaroe neusrah

Dua lhee babah ka meumada

 

Oh lheuh makeun dum sinaroe

Pinah dudoe hidang raya

Teuma marit Tuan Putroe

Ngon aneuk droe Amat Banta

 

Wahe aneuk Puteh Licen

Teungku Mudem jak bak gata

Jak le ta troen u seuramoe

Beek tamoe-moe bijeeh mata

 

Banta Amat laju jitroen

Di keu Mudem duek teurhanta

Lheuh nyan Mudem neupeusunat

Banta Amat aneuk Raja

 

Teuma marit Teungku Mudem

Neulakee troen meujak gisa

Hoe ka Cut E Po Sambinoe

Idzin kamoe Putroe Muda

 

Putroe seuot han peu salah

Insya Allah jak neugisa

Putroe mRidla brie seudeukah

Meuh keureutah bandum rata

 

Bagian 24

 

Teungku Mudem mangat hate

Ka neuwoe le u rumoh tangga

Padum lawet teuma dudoe

Tuan Putroe laen bicara

 

Wahe aneuk Po Samlakoe

Deungoe lon kheun proe wahe Banta

Gata aneuk lon peukawen

Ngon Cut Lihen Putroe Muda

 

Teuma seuot Banta Amat

Mangat-mangat narit Poma

Wahe Mapo Ma Teungku droe

Bak lon sidroe hana dawa

 

Hana jeut le ulon peuseuek

Narit nyang seb lon leupah ka

Hana jeut le Ma lon ubah

Lon ka leupah sikrak haba

 

Putroe deungoe narit Amat

Krue seumangat bijeeh mata

Tuan Putroe jak bak Syiah

Putroe peugah pantah sigra

 

Oh lheuh saleum mumat jaroe

Tuan Putroe peugah haba

Putroe marit musyawarah

Deungon Syiah nyang lam rimba

 

Teuma seuot Teungku Syiah

Insya Allah dilee gata

Han jan habeh Putroe peugah

Teungku Syiah troeh le teuka

 

Syiah neuba saksi keudroe

Uroe dudoe beek meudakwa

Oh sare troeh Teungku Syiah

Ji wakilah Putroe Muda

 

Ta deungoe suara sangat indah

Jiyue peunikah linto teuka

Putroe Indra lheuh wakilah

Ji ek pantah rumoh tangga

 

Steuma jitroen Banta Amat

Ji khideumat Teungku tapa

Amat jiduek le di sinan

Neumat tangan le Aulia

 

Syiah neukheun a’uzubillah

Ngon bismillah sajan seureuta

Oh lheuh Teungku kheun bismillah

Alhamdulillah le neubaca

 

Putroe Indra hai meutuah

Lon peunikah nyan keu gata

Banta seuot alhamdulillah

Lon meunikahPutroe Muda

 

Oh lheuh ijab kabul nikah

Neu fatihah le ulama

Putroe Ridla brie khanduri

Han neubi brie le Teungku tapa

 

Ie nyang ta brie hana lon jeb

Dilon ka treb ku puasa

Teungku Syiah meunan neukheun

Dalam uteun le neugisa

 

Rakan na lhee pih sajan droe

Leugat neuwoe dalam rimba

Teungku Syiah ka leupah woe

Tinggai Putroe deungon Banta

 

Banta Amat jinoe linto

Darabaro Putroe Indra

Umue baro goh lom baleeh

Adak leubeeh sithon dua

 

Hana ulon peuteh pureh

Meuroe saboh tan keurija

Dipo inong pih tan andam

Dipo agam pih tan gaca

 

Ban teulhee gobnyan sinan diam

Putoh kalam siklep mata

Hana jeut le lon keumarang

Jaroe ceukang he syeedara

 

Jaroe batat jeup-jeup atot

Lon meusangkot hana reuda

Nyan keuh Teungku le that karot

Hate lupoet dalam dada

 

Bagian 25

 

Bak siploh-ploh lon boh saboh

Meubeek gadoh asai punca

Bit pih dumnan lon meuteuoh

Meungbeek boih-boih he syeedara

 

Nyoe na bacut lon peuingat

Nyoe amanat hai teumuda

Beek na salah amai lon tan

Page dudoe ta lakee do’a

 

Ta lakee do’a wahe rakan

Keu lon tuan hina dina

Geulantoe lon brie ngon seudeukah

Ulon peugah saboh haba

 

Geulantoe ulon keumeung hajat

Ulon surat saboh cakra

Geulantoe lon brie ranub sigapu

Nyoe keuh Teungku haba Banta

 

Bah le dumnan wahe rakan

Laen lakuan lon calitra

Amma ba’du beungoh uroe

Kisah meuwoe ubak naga

 

Aneuk naga yoh saboh roe

Sideh nanggroe laot raya

Aneuk Raja yoh di nanggroe

Anyot keunoe ie raya ba

 

Teuma jinoe ji lakee woe

Jimohon droe hanatara

Naga mariet deungon Amat

Suara mangat aneuk naga

 

Meunoe ji kheun ji meututo

Ta deungoe sye dalam paya

Deungon Amat ji meututo

Ie mata ro aneuk naga

 

Banta Amat sangat jisyen

Jikheun Dalem uleh naga

He Dalem Po Dalem payong

Ta peuidzin lon saboh masa

 

Lon meungmarit haba sipatah

Beurayek meu’ah nibak gata

Salah ta teugah beuna ta ikoet

Pa nyang karot taboh dawa

 

Banta Amat teuma seuot

Leumoh leumbot ngon suara

Amat seuot insya Allah

Cuba peugah he syeedara

 

Deungon Banta ji meututo

Ie mata ro meuleu lumba

He Dalem Cut bungong tanjong

Ta peidzin lon woe bak Bunda

 

Ulon Dalem raya hajat

Lon woe siat bak ayahnda

Lon duek sinoe paya sarat

Krueng ubit that lon ka raya

 

Ie jiteungoh dum u darat

Ulon meuhat jipoh pahna

Ureung nanggroe bandum arat

Ie raya that hanatara

 

Jinoe bandum jimeupakat

Ulon meuhat ji meungtuba

Ulon jinoe meuhat mate

Ji tuba le manusia

 

Adak han jipoh deungon beusoe

Beuthat ngon reunong lon binasa

Nyan keuh dum hat Dalem Teungku

Pakrie laku toh bicara

 

Teusia pih Dalem Teungku

Ka neubrie bu jeh oh masa

Meuhan ta idzin meuhat mate

Han meusampe ta peulara

 

Ulon Dalem meuhat mate

Pakrie pike nyang meurasa

Amat seuot pantah-pantah

Allah Allah he syeedara

 

Pakrie tawoe nyan hai adoe

Ulon sidroe dalam rimba

Han ta gaseh ngon ta sayang

Pagi peutang lon bak gata

 

Bagian 26

 

Hana ta gaseh meusigeutu

Han ta tem eue meusiblah mata

Wali karong lon cit ka tan

Gata intan nyang lon cinta

 

Amat jimoe ngon bantangan

Seubab ka tan aneuk naga

Ie mata ro seun-seun siploh

Ban ujeun toh hana reuda

 

Allah Allah hai adoe beh

Saleh ho roeh oh tan gata

Meuhat mate rimueng pajoeh

Hai adoe beh pungo gila

 

Lon sangka na gata adoe

Na cit na soe boh bicara

Jinoe gata pike ta woe

Ulon sidroe that seungsara

 

Gata adoe ta woe bak Du

Lon ngon Ibu dalam rimba

Banta Amat moe meu’u’u

Hate tunu hanatara

 

Meunoe jikheun sira jimoe

Lon siuroe nyoe pungo gila

Meunyoe meunan adoe badan

Ku jak sajan deungon gata

 

Kaomku han syeedara

Ku jak sajan adoe raja

Nibak mate sinoe gob boh

Bah le ta boih lon le gata

 

Yoh nyan naga teuma seuot

Hana patot meunan juga

Kru seumangat Dalem badan

Lon ba sajan Dalem Raja

 

Pakon Dalem lon meung ungki

Beek Allah brie lon meureuka

Beek antara lon meung ungki

Beek Allah brie lon beek lupa

 

Dilon dalam hana patot

That lon takot keu meureuka

Pakon Dalem meunan titah

Ulon susah he syeedara

 

Amat Banta lom ji peugah

Allah Allah hai syeedara

Ulon adoe beek ta keubah

Lon meulangkah sajan gata

 

Meuhan ta ba wahe adoe

Bah kutob droe yoh na gata

Soe got mate lon siuroe nyoe

Peugah adoe nyang meurasa

 

Banta Amat that meupoet-poet

Bineeh laot dalam bangka

Lom pih jikheun sira jimoe

Lon duek sinoe pih tan laba

 

Lon duek sinoe han meusampe

Di dalam gle rimba raya

Banta Amat that meupoet-poet

Naga seuot beek le rugha

 

Beek ta moe le wahe Dalem

Sangat lon syen nyan keu gata

Gata Dalem lon ba sajan

Beek le kaman ro ie mata

 

Teutapi na bacut salah

Pat ta keubah Ma digata

Ma teuh Putroe pat ta keubah

Cuba peugah lon deungoe nyata

 

Putroe Indra nyang isteuri

Nyan pih pakrie Dalem Raja

Pakrie ta keubah nyan Dalem droe

Gata ngon adoe leupah bungka

 

Nyan keuh Dalem beutapike

Mate lam gle han soe kira

Amat seuot le meupatot

Beek ta takot he adeknda

 

Ulon teujok bak Potallah

Nyang peurintah alam donya

Adakna lon pih di nanggroe

Tuhan sidroe nyang peulara

 

Bagian 27

 

Ulon teuh nyoe hana dapat

Hana kuat ngon kuasa

Aneuk naga lom ji marit

Haba nyang bit ubak Banta

 

Nyoe beumeunan hai Dalem droe

Jak le ta woe ubak Bunda

Peugah bak judo nyang that canden

Gata Dalem kheundak bungka

 

Amat beudoh teuma jiwoe

Ubak Ma droe Putroe Ridla

Oh sare troeh u meuligoe

Seumah Ma droe Banta Muda

 

Com di teuot seumah jaroe

Idzin kamoe wahe Poma

Putroe Ridla teuma seuot

Ie mata srot ateuh dada

 

Teutapi na bacut salah

Pat ta keubah Ma digata

Putroe Indra nyang isteuri

Nyan pih pakrie bijeeh mata

 

Banta Amat seuot pantah

Nibak Allah lon joek gata

Gata dua droe Ma lon keubah

Akhe teulah jeut binasa

 

Gata lon joek bak Potallah

Nyang peurintah alam donya

Meupat laen han lon keubah

Ulon leupah sikleb mata

 

Ta idzin Ma jinoe seukarang

Beek le lintang uroe jula

Banta Amat com bak teuot

Putroe sambot ngon ie mata

 

Beumeutuah hai bintang srot

Beek lupoet hate lam dada

Beu ta ingat pagi peutang

Beu ta sayang lon ka tuha

 

Tuan Putroe hate mangat

Banta Amat jitroen lanja

Putroe Indra jimoe sajan

Han ubah ban ureung gila

 

Putroe Indra nyang that susah

Ta eue johjah ngon ie mata

Putroe jikheun lom sipatah

Allah Allah pakrie daya

 

Allah hai judo nyang meutuah

Lon neukeubah dalam rimba

Saleh pakrie jinoe zaujah

Teungku leupah ka neubungka

 

Pakrie keuh lon he tuanku

Han soe brie bu deungon ija

Oh tan gata he Teungku droe

Untong kamoe rimueng seuba

 

Saleh hoe troeh lon siseun nyoe

Oh ka tan le Po Meukuta

Saleh pakrie he tuanku

Lon ngon Ibu han soe kira

 

Bukon sayang lon eue seulayang

Angen datang rok-rok masa

Lon ngon Bunda ka meulanglang

Dalam padang rimba raya

 

Lon ngon Bunda tinggai dalam gle

Teungku tan le leupah bungka

Bukon sayang lon eue bambang

Jroh meuragam jipoe meubanja

 

Lon ngon Bunda han soe sayang

Teungku ka tan han soe kira

Putroe Indra moe meureb-reb

Hate saket oh tan gata

 

Ta deungoe su jimoe ba-e

Su meusye-sye dalam rimba

Putroe jimoe that meusok-meusok

Sang meureubok ngon cempala

 

Allah Allah judo payong

Ta tinggai lon ta jak gata

Bukon sayang aneuk beulalang

Cicem subang po meugisa

 

Bagian 28

 

Badan paleh tuboh suwang

Judo ka tan pakrie rupa

Bukon sayang lon eue labu

Bak piluhu boh meulaksa

 

Bukon sayang lon eue Teungku

Neujak laju sajan naga

Tinggai adek kawai dapu

Di Teungku ka leupah bungka

 

Bukon sayang lon eue sipoet

Bineeh laot jroh meubanja

Han soe le lon idang suroet

Beungoh seupoet miseu nyang ka

 

Bukon sayang bak rangkileh

Boh pih habeh peulandok seuba

Allah hai judo nyang lon gaseh

Soe ngon lon eh oh tan gata

 

Hana soe ngon le lon manoe

Beungoh uroe watee jaga

Hana soe ngon le lon meututo

Oh tan judo pakrie daya

 

Untong-untong lon meulumpoe

Han soe peugoe peugah rasia

Untong Teungku pajan neuwoe

Ulon sidroe hate rugha

 

Bukon sayang lon eue tikoeh

Dalam buloeh di bubong para

Lon ngon Bunda saleh hoe troeh

Teungku jeuoh ka neubungka

 

Bukon sayang lon eue bayam

Jroh meupadam timoh rata

Keupeu lon lom Teungku ka tan

Soe lon hidang rijang jula

 

Bukon sayang bungong meulu

Meutabu lam laot raya

Teungku leupah ulon rindu

Han soe lon eue dalam rimba

 

Putroe Indra moe meureb-reb

Hate saket putoeh asa

Ta deungoe su bukon ‘ajab

Na bagoe dhab ngon biola

 

Soe nyang kalon hate galak

Nyuem ta jak eue sikleb mata

Soe nyang deungoe hate rindu

Nyuem beutajak kalon rupa

 

Ngon langgam su miyueb manyang

Na ban canang geupeeh tiga

Soe nyang deungoe hate bimbang

Nyuem beek leukang sikleb mata

 

Bah keuh dum nan ba-e Putroe

Laen adoe lon calitra

Amma ba’du teuma dudoe

Kisah meuwoe ubak naga

 

Banta ji troen di rumoh droe

Jak bak adoe kheundak bungka

Oh sare troeh bineeh sungoe

Ji kheun meunoe jihoi naga

 

He adoe cut adoe payong

Pat kuduek lon na tabungka

Aneuk naga teuma seuot

Leumoh leumbot ngon suara

 

He Dalem Po Dalem payong

Bak ulee lon ta duek gata

Troen keuh laju mangat ta jak

Ie that seungkak hanatara

 

Banta jitroen bineeh reuleung

Ji teuimpeung bak ulee naga

Naga jikheun ubak Amat

Beukong ta mat Dalem bak cula

 

Mumat Dalem beukong bit-bit

Beek teugeuntit bak lon gisa

Amat deungoe narit meunan

Ngon dua tangan jimat cula

 

Banta Amat ka meunyuem glie

Untong pakrie bak ji gisa

Jimat oh kong hana sakrie

Jikab bibi jipet mata

 

Bagian 29

 

Naga gisa bacut-bacut

Mangat beek kuyut hate Po Banta

Oh sare ka teupat ulee

Ka ji kajee laot raya

 

Tangieng jiplueng tamse riboet

Ie di likoet meubura-bura

Ie lam gampong han le sangkoet

Oh ka jisuroet aneuk naga

 

Tangieng jiplueng that meudhab-dhab

Na siat u laot raya

Lom pih jikheun ubak Amat

Ji peuingat hana reuda

 

Aneuk naga jiplueng laju

Hate seu-u hanatara

Aneuk naga hate mangat

Banta Amat sajan jiba

 

Tangieng jiplueng that meupoet-poet

Ie di likoet puteh safa

Aneuk naga hate seu-u

Jiwoe bak Du Ayah Bunda

 

Tujoeh uroe ji beurjalan

Meurumpok lawan Pawoh raya

Pawoeh tanyong pantah-pantah

Panee dikah manusia

 

Ka mee keunoe dikee siblah

Beek meungdikah mantong saja

Aneuk naga teuma seuot

Cit meupatot ta leh haba

 

Dalem ulon peu ta lakee

Hana ta thee cit digata

Adak meugob ka kupajoeh

Panee roe troeh keunoe kuba

 

Pawoh marit lom sipatah

Peu ka peugah sulet raya

Meuhan ka brie dikee siblah

Ingat kuplah di keupala

 

Nyang got ka joek keunoe siblah

Beek kutingkah wah keupala

Ka joek rijang hawa leupah

Beek kreuh babah wahe naga

 

Aneuk naga hate susah

Lom ji peugah ubak Banta

Ta loeb Dalem lam babah kee

Lon meureupah beek rhot gata

 

Ta duek Dalem yueb lidah kee

Pawoh asee kuteumeung tampa

Nyang han patoet peu ji lakee

Ji eue dikee sare kuba

 

Ka jikalon ateuh ulee

Peu ji lakee keumeung rasa

Adak meugob han kupajoeh

Panee kutroeh keunoe lon ba

 

Han ji pikee nyang bumeunan

Seubab jih nyan tan bicara

Panee kubrie nyoe Dalem kee

Meukon ulee beukah dua

 

Ta loeb Dalem pantah-pantah

Lon meureupah beek srot gata

Banta Amat teuma jiloeb

Dalam sagoeb babah naga

 

Leupah Banta keudeh jiloeb

That meupot-pot Pawoh raya

Ka kupeuloeb dalam babah

Ji keumeung plah ulee naga

 

Pawoh tajoe jihah babah

Ingat kuplah theun keupala

Aneuk naga sangat lisek

Kah kuculek deungon cula

 

Keunong Pawoh meuasek-asek

Lom ji culek aneuk mata

Pawoh raya beungeeh han soe

Lom ji peutoe ubak naga

 

Ka jitajoe hana sakrie

Sang bubiri teungoh meunta

Aneuk naga ka meunyuem glie

Ubak Rabbi mohon pinta

 

Bagian 30

 

Ya Rabbi wa ya Rabbi

Keulon brie na kuasa

Beureukat keuramat Entu Nini

Beureukat Umi Ma lon naga

 

Beureukat Entu Nabi Adam

Beu-ek lon lawan Pawoh raya

Oh sare lheuh ji meulakee

Rahob ulee deungon muka

 

Aneuk naga teuga han soe

Tuhan sidroe brie kuasa

Ji meureupah dalam laot

Miseu ribot badee raya

 

Ji meungpoh-poh ngon meuinsyok

Peut uroe roek hana reuda

Ie lam laot jeut meugeulumbang

Ji meuhantam Pawoh ngon naga

 

Eungkot lam laot habeh mate

Ji plueng sabe hana reuda

Ji sangka troeh ureung meupukat

Eungkot ji limpat hanatara

 

Naga ngon Pawoh meureupah sabe

Eungkot mate cut ngon raya

Ji meureupah peut uroe roek

Troeh eungkot thok ji jak peugla

 

Oh thok kalon ji meureupah

Pakon dikah ka meudawa

Peu ka seunoh cuba peugah

Ku deungoe sah jinoe sigra

 

Oh thok tanyong Pawoh peugah

Ku lakee siblah manusia

Han jitem brie pih meusiblah

Lon meureupah nyan keuh punca

 

Thok ji marit lom sipatah

Ji tanyong sah ubak naga

Panee ta mee hai meutuah

Cuba peugah asai mula

 

Oh thok tanyong naga peugah

Ashaliyah dalam rimba

Habeh dumpeu ji hareutoe

Teukab jaroe thok nyang raya

 

Ka ji peugah awai akhe

Thok teupike sikleb mata

Teuingat keudroe masa dilee

Yoh meuteumeung manusia

 

Meunan cit jih jimeureupah

Ji lakee siblah ji meungrasa

Meunyoe meunan Nyak meutuah

Adak jiplah pih ta ridha

 

Cit lam meunan jih nyan sabe

Miseu kafe tan bicara

Dilee ngon lon jimeureupah

Jikheun siblah ji meungrasa

 

Nyang lon meupoh peut ploh uroe

Troeh Tangiroe ji jak peugla

Nyoe pih meunan gata adoe

Troeh lon sidroe ku jak peugla

 

Teuma jinoe jak le ta woe

Pawoh pindoe le bicara

Naga pih ka jilakee droe

Leugat jiwoe ubak Bunda

 

Thok meututo deungon Pawoh

Ta deungoe kiroh subra donya

Pakon meunan gata adoe

Han got bunyoe ku eue rupa

 

Beek le meunan gata Pawoh

Nyang geutroh-troh galak digata

Meutan tajok peu ta lakee

Ta tueng malee rhot suara

 

Thok ngon Pawoh ka jeut reupah

Naga leupah woe bak Bunda

Aneuk naga jiwoe ka troek

Pawoh ngon Thok jeut prang raya

 

Gata adoe beu ta pike

Nyan geutamse thok ngon naga

Geutanyoe Nyak nyan keuh tamse

Gob meupake ta jak gata

 

Bagian 31

 

Bah keuh dum nan ulon peugah

Meuwoe kisah bak aneuk naga

Aneuk naga ka troek jiwoe

Meuteumeung sidroe waki raja

 

Assalamualaikum Po Samlakoe

Ka troeh ta woe bijeeh mata

Aneuk naga teuma seuot

Ie mata srot meuleu lumba

 

‘Alaikum salam warahmatullah

Brie horeumat nyang mulia

Oh lheuh saleum mumat jaroe

Ka troeh lon woe ubak gata

 

Lheuh nibak nyan teuma dudoe

Po Waki woe ubak Raja

Oh sare troeh ka ji peugah

Jikheun Allah Allah Po Meukuta

 

Roeh meukarat bak ji peugah

Jikheun Allah ka roeh ula

Jikheun Duli ka roeh Daulat

Yo meuthat-that miseu geumpa

 

Nibak jaroe ting-ting teupong

Nibak punggong peugot teumpa

Ji keumeung kheun Ampon Daulat

Roeh meukarat jeut meutuka

 

Raja naga susah hate

Teuku Waku peugah haba

Teuku Waki teuma piyoeh

Oh thoe reuoh peugah haba

 

Ampon Tuanku Meukuta Nanggroe

Sinyak ka jiwoe di Kuala

Aneuk Tuanku yoh saboh roe

Jeh pat ka jiwoe Po Meukuta

 

Manusia geuba sidroe

Jroh Samlakoe hanatara

Rupa indah miseu uroe

Sinyak puwoe nyoe ho lanja

 

Ban Raja deungoe narit Waki

Hana sakrie galak raya

Seureuta ngon jaweub neubrie

Jak tueng lagi keunoe ta ba

 

Ban Waki deungoe narit meunan

Jiplueng yoh nyan tamse guda

Jiplueng laju hana teudoh

Hingga troeh bak aneuk naga

 

Oh sare troeh keunan jinoe

Jibot jaroe u jeumala

Ampon meu’ah Po Samlakoe

Raja nanggroe yue tueng gata

 

Ta jak laju jinoe ta woe

Bak ayah droe bijeeh mata

Aneuk naga seuot pantah

Insya Allah jak sigoe gata

 

Waki di keu jih di likoet

Peunoh laot meuleu lumba

Aneuk naga di hadapan

Jimee sajan Amat Banta

 

Oh troeh keudeh nyan u dalam

Ngadap Juhan Raja raya

Ta eue jidong jroh meurumpan

Di hadapan Po Meukuta

 

Teuku Waki peu-ek seumbah

Bak Khalifah Raja Raya

Jibot jaroe ban dua blah

Mohon titah ubak Raja

 

Ampon Tuanku Syahi Alam

Seumbah laman Po Meukuta

Ampon meu’ah dum na kamoe

Bak siuroe nyoe meu’ah deesya

 

Raja seuot neukheun meunoe

Ampon jinoe barang nyang ka

Tamong laju keunoe pantah

Hai meuh mirah cahya mata

 

Aneuk tamong pantah laju

Jak seumah Du Raja Raya

Rakyat laen bandum sajan

Seumah Juhan Raja Naga

 

Bagian 32

 

Oh lheuh seumah teuma surot

Deungon likot na lhee deupa

Aneuk Naga di hadapan

Amat sajan dikeu Raja

 

Raja marit teuma dudoe

Ngon aneuk droe neu meunghaba

Wahe aneuk Po Samlakoe

Ka troeh ta woe bijeeh mata

 

Ka troeh ta woe aneuk badan

Panee insan indah rupa

Aneuk Naga teuma seuot

Jaroe jibot u jeumala

 

Dalem ulon he Tuanku

Ureung brie bu beungoh sinja

Adak meukon Dalem sidroe

Han troeh lon woe bak Meukuta

 

Habeh dumpeu ji hareutoe

Yoh saboh roe dalam rimba

Ka ji peugah awai akhe

Ka teupike Poteuraja

 

Beuthat meunan bintang canden

Sangat lon syen Nyak keu gata

Gata aneuk ta kheun Dalem

Dilon Cutben bijeeh mata

 

Gata dua bak lon sidroe

Po Samlakoe indah rupa

Poteuraja hate galak

Oh na sinyak dua-dua

 

Aneuk naga lom ji peugah

Bak Khalifah Du jih Raja

Jibot jaroe ban dua blah

Ampon meu’ah Po Meukuta

 

Idzin Tuanku jinoe neubrie

Lon peureugi woe bak Bunda

Raja seuot neukheun meunoe

Jak le ta woe bijeeh mata

 

Ta jak aneuk keudeh laju

Jak bak Ibu dalam guha

Aneuk Naga leugat ji jak

Hate galak hana tara

 

Banta Amat ji ba sajan

Ubak Mawang dalam guha

Amat Banta hantom jarak

Ho nyang ji jak sajan jiba

 

Oh sare troeh nyan u leupu

Tamong laju dalam guha

Oh meurumpok ngon Ibu droe

Mumat jaroe pantah sigra

 

Wahe aneuk Po Samlakoe

Ka troeh ta woe bijeeh mata

Lon kheun aneuk gata han le

He boh hate lon that rugha

 

Lon kheun aneuk han le ta woe

Ma teuh sidroe pungo gila

Putroe Naga moe han sakrie

Lon sudi aneuk bak gata

 

He boh hate aneuk intan

Panee insan keunoe ta ba

Aneuk Naga teuma seuot

Ie mata srot nibak dada

 

Adak kon na gobnyan sidroe

Han troeh lon woe Ma bak gata

Ureung brie bu beungoh seupot

Lon seulimbot geubrie ija

 

Masa dilee yoh lam uteun

Nyoe keuh ureung nyang peulara

Aneuk Naga meunan jikheun

Putroe hireun ngon ie mata

 

Putroe Naga lom ji peugah

Bak Cut indah Banta Muda

Meunyoe meunan aneuk badan

Lon hai intan Ibu gata

 

Ta jak keunoe aneuk Teungku

Bintang Timue cahya mata

Ji cok Banta ka ji seuon

Ji com-com le Putroe Naga

 

Bagian 33

 

Gata aneuk that lon gaseh

Hai Cut Puteh Banta Muda

Adak kon na gata sidroe

Han troeh jiwoe aneuk hamba

 

Saleh pat-pat ka Kleung pajoeh

Hai aneuk beh tuah gata

Adak kon na gata intan

Han soe sayang dalam rimba

 

Adak meugob laen-laen

Hana ji syen aneuk hamba

Ka keuh mate meuhat jipoh

Han ji satoh lagee gata

 

Hana jisyen meusigeutue

Ji seuruku deungon nuga

Gata aneuk ta tem brie bu

Ta tem hiroe ta peulara

 

Ta tem gaseh ta kheun adoe

Gata sidroe nyoe Aulia

Gata aneuk nyoe salihin

Hate yakin hanatara

 

Banta Amat ka ji iem droe

Ji pujoe le Putroe Naga

Hana sapeu jaweub ji brie

Iem beurdiri mantong sahja

 

Ka ji syuko keu Potallah

Ban peurintah alam donya

Han ji ingat nyan keu pujoe

Tuhan sidroe hana lupa

 

Allah hai aneuk tangke hate

Lon kheun han le bijeeh mata

Gata dua bak lon sidroe

Po Samlakoe indah rupa

 

Gata dua sangat lon syen

Bintang canden ayeun mata

Banta Amat hana jarak

Ho nyang ji jak Aneuk Naga

 

Putroe Naga hate galak

Oh na sinyak dua dua

Han jeut jarak Banta Amat

Hate mangat hanatara

 

Aneu naga teutap dukhoe

Geunap uroe hate suka

Padum buleun dalam laot

Han teumakot Amat Banta

 

Ka ji meuhoi Banta Amat

Ji peuingat hana reuda

Wahe Dalem aduen kamoe

Neujak keunoe siklep mata

 

Amat beudoh teuma sidroe

Ubak adoe Aneuk Naga

Oh troeh Banta ji hareutoe

Ji peugah proe dum peurkara

 

Gata Dalem jinoe ta woe

Ma teuh sidroe dalam rimba

Pakrie Dalem cuba pike

Ma teuh lam gle Po Meukuta

 

Bit pih meunan ulon peugah

Dalem meutuah ingat saja

Meubeek tuwoe hai Dalem droe

Uroe dudoe lon beek ta ceula

 

Uroe dudoe lon beek lupoet

That lon takoet Dalem Raja

Banta Amat teuma seuot

Ie mata sroet meuleu-lumba

 

Seubab teuingat Ma jih lam gle

Jimoe sabe hanatara

He adek cut adoe payong

Ta idzin lon woe bak Bunda

 

Ta intat lon woe u nanggroe

Ma lon sidroe dalam rimba

Aneuk Naga seuot pantah

Insya Allah Po Meukuta

 

Ta deungoe Dalem lon peuingat

Lon amanat nibak gata

Beek ta ubah narit wasiet

Haba nyang bit lon calitra

 

Bagian 34

 

Peu nyang geubrie nibak ibu

Dalem Teungku beek neuhawa

Beuthat geubrie meuh meukatoe

Beek ta puwoe Dalem Raja

 

Nyang ta lakee cit malakat

Lon kheun teupat nibak gata

Nyang laen beek ta meunafsu

Dalem Teungku han hoe taba

 

Meung geutem brie nyan malakat

Hase siat peu nyang hawa

Hase beude hase ubat

Hase rakyat meuploh laksa

 

Nyan keuh Dalem beek ta ubah

Ban lon peugah beek meutuka

Nyan keuh Dalem lon peuingat

Lon amanat Dalem bak gata

 

Geubrie rot wie beek ta tueng-tueng

Beuta timpung Dalem digata

Nibak ayah pih cit meunan

Dalem intan nyan neucinta

 

Meuroe ta duek di dalam gle

Bahya sabe hantom reuda

Bahya sabe hantom jarak

Peu nyang heundak jaroe digata

 

Wahe Dalem beudoh ta jak

Keudeh ubak lom bak Bunda

Wahe ayah tanglong nanggroe

Dalem sidroe kheundak gisa

 

Peu na ayah bungong jaroe

Dalem neuwoe dalam rimba

Raja seuot suara mangat

Hai Cut Amat beek ta gisa

 

Neubrie ayah ulon woe siat

Lon ka treb that keunoe lama

Meunyoe ta woe hai boh hate

Peu keuh lon brie bijeeh mata

 

Nyoe leupeu meuh ayah brie

Saboh guci puwoe le gata

Keu peu roe meuh ayah brie

Lon ji taki di rot raya

 

Peu cit aneuk kubrie jinoe

Cuba kheun proe bak ayahnda

Banta seuot jikheun teupat

Cit malakat nyang lon hawa

 

Nyan pih lon brie hai aneuk beh

Puteh leusoh Amat Banta

Amat Banta ji jaweub le

Nyang rot kiri han hoe lon ba

 

Meunyoe ta brie wahe ayah

Bak uram lidah nyang lon hawa

Meunyoe meunan aneuk meutuah

Beudoh pantah ta cok lanja

 

Naga jihah Banta jiloeb

Dalam sagob babah Naga

Banta teubiet dalam babah

Allah Allah han kuasa

 

Meunyoe meunan aneuk meutuah

Nyoe ku muntah wahe Banta

Naga muntah ka teukeujoet

Ka teugeuncot u nab Banta

 

Banta jicok pantah-pantah

Teuma jipeugah bak ayahnda

Peu makeusud wahe ayah

Cuba peugah lon deungoe nyata

 

Raja seuot neukheun meunoe

Ta deungoe kamoe bijeeh mata

Tujoh Raja lam meuligoe

Tujoh Putroe indah rupa

 

Bale Gadeng keurawang jih meuh

Jeuoh peungeuh ji plueng cahya

Di teungoh leun tujoh kalam

Turab intan ban peut punca

 

Ka geutot le ngon keumeunyan

Cit han jeut han wahe Banta

Oh lheuh neupeugah neu peurunoe

Banta woe le ubak nyang ka

 

Bagian 35

 

Wahe Mapo Ma teungku droe

Dalem sidroe kheundak gisa

Peu na Poma bungong jaroe

Dalem neuwoe dalam rimba

 

Putroe cok le ngon malakat

Ji jok leugat keu Cut Banta

Peu makeusud he Ma teungku

Peugah laju ngon deungoe nyata

 

Hase Kuta tujoh lapeh

Troeh keudeh lam awan miga

Lapeh nyang phon Kuta Beusoe

That seureuloe ban peut punca

 

Lapeh nyang dua Kuta Pirak

Jroh meuhalak hanatara

Lapeh nyang lhee meuh seuneupoh

Hue seumeulhoh u Antara

 

Lapeh nyang peut Kuta Beusoe

Hue sang uroe ta eu rupa

Meunan meunan ban tujoh lapeh

Meuteureubeh ngon pancang suda

 

Jeup-jeup pinto beude meuasoe

Jeup-jeup sagoe kawai rata

Nyan keuh aneuk Po Samlakoe

Jak le ta woe bijeeh mata

 

Oh sare ka beungoh uroe

Beudoh Putroe jak bak Raja

Peugah Banta ji kheun meuwoe

Bujang Meuntroe ta seureuta

 

Troeh le rakyat dum meuron-ron

Meuhimpon keunan bak Raja

Raja peugah le bak rakyat

Neuyue intat Amat Banta

 

Rakyat deungoe haba meunan

Ji boet tangan ateuh jeumala

Insya Allah tuanku droe

Dum sinaroe kamoe suka

 

Aneuk Naga pih jak sajan

Intat tuan Amat Banta

Oh sare troeh bineh sungoe

Jikheun meunoe Aneuk naga

 

Ta deungoe Dalem keudeh laju

Beek le ateuh lon neu eue rupa

Amat teungoh bineeh sungoe

Sira jimoe ngon ie mata

 

Aneuk Naga pih moe sajan

That ji sayang Amat Banta

Allah Allah Dalem teungku droe

Pakon neumoe Po Meukuta

 

Oh tan lon eue Dalem sidroe

Hate seungkoe dalam dada

Weuh that hate lon han bagoe

Oh tan sidroe Dalem Raja

 

Oh lon ingat hate reuloh

Oh lon teuoh hate luka

Oh lon ingat hate reule

Na nyuem beek cre sikleb mata

 

Aneuk Naga jimoe sabe

Na nyuem beek cre deungon Banta

Oh ji ingat han meusanoe

Oh ji pike han meurasa

 

Aneuk Naga han ek moe le

Jikheun sare ubak Banta

Idzin Dalem jinoe ta brie

Lon peureugi kheundak gisa

 

Amat seuot jikheun meunoe

Idzin kamoe he syeedara

Amat jikheun lom sipatah

Ji peugah bak Aneuk Naga

 

Banta Amat jikheun meunoe

Beek le ta moe he adinda

Beuta ingat keu lon adoe

Ulon sidroe dalam rimba

 

Adak meung na gata adoe

Na cit meusoe boh bicara

Jinoe gata pih ka ta woe

Ulon sidroe gadoh bicara

 

Bagian 36

 

Oh ka tan le gata adoe

Ulon sidroe pungo gila

Ulon sidroe susah hate

Oh ka tan le lon eue gata

 

Hana pat le lon peugah droe

Oh tan sidroe adoe Raja

Gadoh akai lon lam peu-eud

Han sakon jeut oh tan gata

 

Amat Banta that meupot-pot

Teuma seuot Aneuk Naga

Beek le ta moe Dalem payong

Ta idzin lon woe jak gisa

 

Jak keuh adoe beuseulamat

Beuta ingat lon lam rimba

Bukon sayang Banta Amat

Hate tan mangat sira gisa

 

Ji arong gle jeumerang blang

Bukon sayang Banta Muda

Ji teungoh cot ji troen paloh

Ta eue ji bloeh lam beuluka

 

Hate saket rasa putoeh

Moe that riyoeh hanatara

Ingat keu Ma dalam uteun

Ingat u krueng Aneuk Naga

 

Sayang adoe dalam laot

Ie mata srot meulumba-lumba

Ban dua ho hat tutong

Meugeu gulong ngon ie mata

 

Ingat keu Ma dalam uteun

Ingat u krueng Aneuk Naga

Ji jak laju hana teudoh

Hingga troeh u rumoh tangga

 

Oh meurumpok deungon Ma droe

Mumat jaroe Amat Banta

Com bak teuot seumah jaroe

Tuan Putroe moe that rugha

 

Wahe aneuk Po Samlakoe

Ka troeh ta woe bijeeh mata

Putroe Ridla ji beudoh le

Ngon breuh pade ji jak mita

 

Oh meuteumeung nyan breuh pade

Ji sipreuk le ateuh Banta

Krue seumangat hai boh hate

Lon kheun han le bijeeh mata

 

Putroe Ridla moe ka meudroe

Troeh le judo Putroe Indra

Putroe Indra ka ji tajoe

Seumah judo Banta Muda

 

Jak meuteumeung le ngon linto

Dara Baro goh lom raya

Oh lheuh seumah teuma surot

Dudoe jiboet hidang raya

 

Ka ji beuot ngon hidangan

Brie makanan keu Amat Banta

Diyueb dalong di dalam pingan

Di ateuh nyan sange raya

 

Ka ji beuot mgon peunuman

Di likoet nyan bate suasa

Amat Banta buka hidang

Pajoh makanan ta ci rasa

 

Ji pajoh bu sibuju jaroe

Nekmat ka troe Banta Muda

Oh lheuh makeun Banta Amat

Hate mangat geunap uroe

 

Putroe Indra ranub sigapu

Brie keu Teungku Banta Muda

Banta pajoh ranub sigapu

Ji beudoh hu cahya muka

 

Putroe Indra hate seu-u

Jingieng Teungku Banta Muda

Banta Amat pih ka galak

Dua pihak hate suka

 

Cok Malakat dalam bungkoeh

Ka neuyue boh bak Putroe Muda

Putroe Indra cok Malakat

Troeh le leugat pantah sigra

 

Bagian 37

 

Bah keuh dum nan wahe sahbat

Lon riwayat Putroe Muda

Nyoe lon peugah saboh hatoe

Laen pih le peugah haba

 

Meunyoe mantong reudoek di gle

Na keuh sabe ie raya teuka

Meunyoe mantong jantong hate

Leumah pike rok-rok masa

 

Meunyoe panyang lon meurawe

Han got lagi akhe masa

Meunyoe mantong nyawong tuboh

Lon yue suroh peu nyang hawa

 

Seb keuh dum nan lon peuhaba

Saboh leu-a lon hareutoe

Amma ba’du teuduek siat

Deungoe sahbat lon calitra

 

‘Ajaeb subhanallah

Raja indah lon peuhaba

Nama Nanggroe Iran Shafah

Keurajeun luah hanatara

 

Dua blah Raja taklok keunan

Bak Raja nyan nyang that raya

Neumeu aneuk pih na sidroe

Jroh seureuloe hana ngon sa

 

Ureung binoe aneuk Duli

Nan geurasi Putroe Cahya

Rupa indah hana sakrie

Jeup-jeup nanggri gob meuhawa

 

Troeh seulangke geunap uroe

Tuan Putroe hana ridha

Putroe teutap lam meuligoe

Raja Nanggroe susah raya

 

Geunap uroe troeh antusan

That soailan Poteuraja

Neupangge le Putroe Intan

Neutanyong ban hana reuda

 

Raja neuyue nibak Bujang

Jak tueng rijang Putroe Cahya

Bujang ji jak rijang-rijang

Hingga datang dalam Kuta

 

Oh sare troeh ubak Putroe

Jiboet jaroe u jeumala

Pocut Ampon tanglong nanggroe

Raja sidroe yue tueng gata

 

Putroe deungoe narit Bujang

Ji cok pinggang ija sutra

Ji cok subang na ban cawan

Letlot bintang jiplueng cahya

 

Cok ngon incien mata pudoe

Sok bak jaroe Putroe Muda

Putroe jitroen di meuligoe

Bak ayah droe neujak lanja

 

Oh troeh keudeh Tuan Putroe

Jiboet jaroe u jeumala

Jidong di yueb peurdana seumbah

Mariet sipatah Putroe Muda

 

Ampon Tuanku Meukuta Nanggroe

Peu hareutoe neupangge hamba

Nyang ka hantom nyang na meunoe

Bak siuroe nyoe neuba sabda

 

Seuot Raja neukheun meunoe

Ta deungoe kamoe bijeeh mata

Gata aneuk puteh licen

Lon peukawen deungon Raja

 

Putroe deungoe geumeu peukawen

Putroe Canden ro ie mata

Putroe marit lom sipatah

Ji peugah bak Poteuraja

 

Wahe ayah tanglong nanggroe

Ta deungoe kamoe sikrak haba

Beek tuanku neu peukawen

Hana lon tem Po Meukuta

 

Pakon ayah leupah that meugriet

Lon mantong ubit goh lom raya

Lon meutanggoh umue sithon

Teungku Ampon Meukuta Donya

 

Bagian 38

 

Putroe Cahya meunan jikheun

Sangat hireun Poteuraja

Raja marit lom sipatah

Neupeugah bak Putroe Cahya

 

Wahe aneuk nyang sambinoe

Ta deungoe kamoe bijeeh mata

Pakon aneuk ta meutanggoh

Puteh leusoh Putroe Muda

 

Peugah laju he aneuk beh

Ta meutanggoh peu kareuna

Putroe Cahya seuot pantah

Ji peugah bak Poteuraja

 

Nyang jeut ayah lon meutanggoh

Goh lom troeh nyang sabe padra

Goh troeh ayah nyang sikufu

Hana nafsu beuthat Raja

 

Beuthat Teungku Uleebalang

Hana reumbang lon bak mata

Hana galak lon keu lakoe

Lon duek keudroe hate suka

 

Meunan jikheun sinyak Putroe

Raja nanggroe lom meusabda

Pakon aneuk puteh licen

Lon peukawen han ta ridha

 

Pakon meunan he aneuk droe

Lon brie lakoe han ta ridha

Peugah laju bungong geutoe

Pakon Putroe ta meudakwa

 

Teuma seuot Tuan Putroe

Ji peugah proe nibak Raja

Nyang jeut ayah lon meutanggoh

Datang musoh akhe masa

 

Ulon jicok hai ayah beh

Han sahoe roeh Po Meukuta

Nyan keuh ayah lon meutanggoh

Meung goh lom troeh lon eue rupa

 

Meugoh lom troeh nyang ek meuprang

Beurang gajan han lon ridha

Akhe dudoe jeut soailan

Lon ji tahan le Beulanda

 

Meunan jikheun Putroe ahli

Lom neu sudi uleh Raja

Pakrie ta thee Bungong Meulu

Peugah laju bijeeh mata

 

Soe nyang peugah panee Teungku

Nyang ka troeh su dum peurkara

Teuma seuot Bungong Meulu

Bukon hai Du gob peuhaba

 

Putroe Cahya peugah laju

Leumah lon eue dalam pinta

Leumah lon eue dalam surat

Di dalam bab nyang keudua

 

Nyan keuh ayat lon kheun teupat

Beek mudharat akhe masa

Beek jeut roeh lon dalam ikat

Ji tangkap uleh Beulanda

 

Beek meukaret le keu linto

Dara Baro goh lom raya

Beek meugriet le nyan keu linto

Dara Baro goh lom raya

 

Poteuraja ka keuh tahe

Neudeungoe tuto Putroe Cahya

Peu ji marit Bungong Kundoe

Ji meututo deungon Raja

 

Idzin ayah lon seukarang

Lon riwang keudeh lam Kuta

Beek treb ayah sinoe lon duek

Meureubok deuk dalam cintra

 

Seuot Raja neukheun meunoe

Idzin kamoe jak le gisa

Oh lheuh idzin nibak ayah

Jitroen pantah Putroe Cahya

 

Dalam Kuta jiwoe laju

Bungong Meulu hate suka

Buka pinto tujoh lapeh

Tamong keudeh lam astana

 

Pahlawan bandum teueh-eh

Bungong puteh tamong lanja

Leupah tamong bungong puteh

Teutop habeh pinto Kuta

 

Poteuraja sideh teutap

Bungong Meurak hate suka

Cok meureubok boh bak jaroe

Geunap uroe ji peukuwa

 

Putroe Cahya dalam meuligoe

Dawok laloe deungon cintra

Meureubok jroh rupa indah

Hate dasyah Putroe Cahya

 

Rupa pih jroh ta eue indah

Na sang ulah maneek meutia

Mata puteh gigoe mirah

Rupa indah hana ngon sa

 

Bagian 39

 

Bulee keuieng jroh that hijo

Bulee bahoe jroh meunggisa

Bulee tampang puteh sabon

Sion-on jampu meutia

 

Bulee taku ban manek roe

Puteh hijo ta eue rupa

Jitheun jaroe Bungong Kundoe

Na dum geuroe jilhom kuwa

 

Cok meureubok ji ploh taloe

Ji pasoe peuloeb lam cintra

Cintra pih jroh hana bagoe

Ayeun jaroe Putroe Muda

 

Aneuk cintra intan pudoe

Ban peut sagoe geuboh geunta

Oh ji halip jitiek-tiek droe

Crang cring taloe meusuara

 

Papeun cintra culek sipoet

Puyoh meulot ngon Cempala

Sang-sang sabe lam ji meuloet

Hate leucot han sagai bla

 

Putroe Cahya hate laloe

Lam meuligoe hate suka

Dayang-dayang dum sinaroe

Geunap uroe meuseu-suka

 

Geunap uroe hate galak

Meukhen-meukhak hana reuda

Dayang-dayang bijak-bijak

Kipah pirak on suasa

 

Ka jibeudoh ji meunginjak

Ji meulikak aneuk dara

Ngon kawoh meuh nibak gaki

Ji meunari ateuh tika

 

Meukleb mata meututo bibi

Ji kheun sya-e su biola

Ji meusya-e jroh han sakri

Su sang bangsi buloh beungga

 

Ji hayak gleung deungon subang

Hate girang aneuk dara

Ji meupanton ji meudendang

Ji meutak-tham pura-pura

 

Ji tiek aleh lintak-linton

Meuhayon subang meuncintra

Nyang ladom ek nyang ladom troen

Sya-e panton hana reuda

 

Nyang di jaroe jimat kipah

Di babah panton jibaca

Ngon lagham su jroh han bagoe

Kisah nanggroe indah rupa

 

Di nanggroe Rom beude meutatah

Nanggroe Makkah beude suasa

Sarong hijo geulabo kunyet

Peudeung gamet peutron on buga

 

Langkah meutoto teuot meumetmet

Meukeudhet-keudhet ban Cempala

Ji meunyanyoe ji meudendang

Hantom reunggang siklep mata

 

Geunap uroe lam piasan

Putroe Intan deungon cakra

Putroe Cahya hate deundam

Ngon Dendayang muda-muda

 

Poteuraja hate susah

Neumeu peunikah Putroe Cahya

Bak han jitem ta pakri bah

Gadoh susah han le haba

 

Kuta kukoh ban peut sagoe

Pancang beusoe dum geupula

Han jeut tamong beurang gasoe

Dum sinaroe agam dara

 

Pinto teutop dum geukunci

Hana sakri han soe buka

Bah keuh dum nan ulon rawi

Keu si Nyak Ti Putroe Cahya

 

Teuduek siat Putroe ahli

Laen lagi lon calitra

Teutap siat Putroe bungong

Lon seumong keu Amat Banta

 

Bagian 40

 

‘Ajaeb subhanallah

Meuwoe kisah ubak mula

Banta Amat lam meuligoe

Ngon judo droe Putroe Muda

 

Padum lawet dalam uteun

Padum buleun lama masa

Geunap uroe hate galak

Neukhem-meukhak hana reuda

 

Banta amat hate laloe

Geunap uroe meuseu-suka

Umue peut thon sabet lawi

Leumah lumpoe saboh rahsia

 

Banta ji eh ateuh tilam

Leumah baruhan Allah peunyata

Na nyuem jipoet bungong keumang

Bak pioh manyang Bungong Jeumpa

 

Siseun ji ek srot meulayang

Banta pansan le teurhanta

Oh ji beudoh nibak reubah

Ji ek pantah miseu nyang ka

 

Oh lheuh jipoet bungong keumang

Boeh bak ulee Pocut Banta

Oh troeh Banta u peureudee

Bungong Kumbee di jeumala

 

Teuduek haba teuma oh nan

Lheuh nibak nyan jaga Banta

Oh teukeujot bak meulumpoe

Duek teupipoe wet ngon sila

 

Banta ingat dalam hate

Ka teupike keu rahsia

Lumpoe lon nyoe sang meusampoe

Meuteumeu Putroe nyang jroh rupa

 

Bit pih meunan leumah lumpoe

Po Samlakoe hana haba

Hana sapat ji hareutoe

Lam hate droe mantong saja

 

Na sikeujap teuma dudoe

Jaga Putroe Siti Indra

Jicok ngon breuh jak taguen bu

Brie keu Teungku Amat Banta

(Catatan : Hikayat ini belum tamat,

baru sebagiannya! – T.A. Sakti).

 

About these ads

4 pemikiran pada “HIKAYAT BANTA AMAT

  1. Saya mohon izin untuk mengcopy hikayat banta_amat, saya sekarang mencoba untuk lebih ingin tahu tentang banta_amat… terima kasih

  2. saya teramat suka dengat hikayat budaya aceh….lau bisa lebih lengkap lagi……..

Tinggalkan Balasan

Isikan data di bawah atau klik salah satu ikon untuk log in:

WordPress.com Logo

You are commenting using your WordPress.com account. Logout / Ubah )

Twitter picture

You are commenting using your Twitter account. Logout / Ubah )

Facebook photo

You are commenting using your Facebook account. Logout / Ubah )

Google+ photo

You are commenting using your Google+ account. Logout / Ubah )

Connecting to %s